1 ఆకాసొకు బీకి తాండెబిత్తరె తల్ల సొబ్బికి గుటె సంపూర్తి కొరువురొ యీసి. 2 పురువు సే కొర్లా తా పైటి సత్ర దినొ బిత్తరాక సంపూర్తి కొరికిరి, సే కొర్లా తా పైటి సొబ్బిట దీకిరి సత్ర దినొరె విస్రమించిసి. 3 ఈనె పురువు సే సత్రో దినెకు ఆసీర్వదించికిరి, పవిత్ర పరిచిసి; కిరుకు బుల్నే తాండె బిత్తరె పురువు సే కొర్లా పనికిరి, సుస్టించిల పనికిరి తా పైటి సొబ్బి బిత్తరె దీకిరి విస్రమించిసి.

4 పురువు యీల యెహోవా బీకి, ఆకాసొనెకు కొర్లా దినొరె బీ, ఆకాసొనె సుస్టించిల బెల్లె సడ తాండ్రొ ఉత్పత్తి యీల క్రమము ఎడాక. 5 యడకు అగుంతా యీనె బిల్లొరె కే గొచ్చొగుట్టంకా మొలిచిలానింతె; కిరుకు బుల్నే పురువు యీల యెహోవా బీ ఉంపరె బొరొసొ కురిపించిలానీ, బీకి సాగు పరిచితె కే మనమ నీ. 6 ఈనె ఆవిరి బీ దీకిరి ఉటికిరి బీకల్ల తింతిదీతవ్వి 7 పురువుయీల యెహోవా బీ మట్టిసంగరె మనమకు కొరికిరి తా నక్కొ రంద్రము బిత్తరె ఊపిరి బాకు పుంకిలబెల్లె మనమ జీవం పొందిగినిసి. 8 పురువు యీల యెహోవా తూర్పురె ఏదెనురె గుటె తొట్ట పొక్కిరి సే సుస్టించిల మనమకు తాండె బిత్తరె నొగిసి. 9 ఈనె పురువు యీల యెహోవా దిగితె సోకిలాట పనికిరి కైయితెకు బొల్టపనికిరి ప్రతి గొచ్చొకు, సే తొట్ట మొజిరె జీవ గొచ్చొకు బుల్లాట, బొల్ట చెడ్డానె తెలివి దిల్ల గొచ్చొకు బీ దీకిరి మొలిసిపించిసి. 10 ఇంక సే తొట్టకు తింతిదీతె ఏదెను దీకిరి గుటె వొద్దొ బయలుదేరికిరి సెట్టెదీకిరి చీలిజేకిరి సారాడకు పారిలీసి. 11 అగరె తల్లాటరొ నా పీసోను; సడ హవీలా దెసొకల్ల చుట్టు పారిలీసి; సెట్టె సున్న అచ్చి. 12 సే దెసొరొ సున్న బడే విలువీలాట; సెట్టె బోలము గోమేదకము మిలుసి. 13 దీటొ వొద్దొరొ నా గీహోను; సడ కూసు దెసొచుట్టు పారిలీసి. 14 తింటొ వొద్దొరొ నా హిద్దెకెలు; సడ అస్సురు తూర్పు ఆడకు పారిలీసి. చారోట వొద్దొ యూప్రటీసు. 15 ఈనె పురువు యీల యెహోవా మనమకు కడిగీకిరి ఏదెను తొట్టకు సాగుపర్చితె సడకు జొగితె తాండ్రె నొగిసి. 16 ఈనె పురువు యీల యెహోవా ఏ తొట్టరె తల్ల సొబ్బి గొచ్చొ పొగలానెకు తు అబ్యంతరము నీకుంట కైవొచ్చు; 17 ఈనె, బొల్టా సెడ్డానె తెలివిదిల్ల గొచ్చొ పొగలానె కైనాసె; సడకు తు కైల దినొరె కచ్చితముగా మొరొజోసు బులి నరుడు బుల్ల మనమకు ఆజ్ఞ దీసి. 18 ఇంక పురువు యీల యెహోవా మనమ ఒంటిరిగా తవ్వురొ బొల్టానీ; తాకు సొరిపొడిల సహాయము తా కోసం కొరుంచి బులి కొయిగినిసి. 19 పురువు యీల యెహోవా ప్రతి బీజంతువుకు ప్రతి ఆకాసొ చొడీనెకు నేలదీకిరి నిర్మించికిరి, ఆదాము సడకు కే నా నొగుసువొ దిగితె తా పక్కరకు సడానెకు దన్నైసి. పొర్నొతల్ల ప్రతీటకు ఆదాము కే నా నొగుసువొ సే నా సడకు కలిగిసి. 20 సెత్తిలె ఆదాము సొబ్బి పసువూనుకు ఆకాసొ చొడీనెకు సొబ్బి బీ జంతువూనెకు నానె నొగిసి. యీనెను ఆదాముకు సొరిపొడిల సహాయము తాకు నీకుంట యీజేసి. 21 సెత్తెలె పురువుయీల యెహోవా ఆదాముకు బొల్లెగుమ్మొరె తల్లపనికిరి కొరికిరి సే సొయిల బెల్లె తా పొక్కరొ ఎముకానెరె గుటెకు కడిగికిరి సే చోటుకు మోసో సంగరె బుజ్జిపేసి. 22 తరువాత పురువు యీల యెహోవా, సే ఆదాము దీకిరి కడిల పొక్క అడ్డొకు తిల్డ్రమొట్ట పనికిరి కొరికిరి సే మొట్టకు ఆదాము పక్కుకు కొడిగికిరి అయిసి. 23 సెత్తిలె ఆదాము యాకిరి కొయిసి మో హడ్డొనె బిత్తరె హడ్డొ మో మోసొనె బిత్తరె మోసొ ఎడ వొండ్ర పో దీకిరి కడివురొ యీసి గనక తిల్డ్రమొట్ట బులి కొయిసి. 24 ఈనె వండ్రపో తా బోకు తా మాకు సడిదీకిరి తా నైపోకు చెర్చుగునుసి; తంకె గుట్టె దే యీకిరి తాసె. 25 సెత్తెలె ఆదాము తా నైపో తంకె దీలింకె కొన్నానె నీకుంట సుచ్చ దేండ్రె అచ్చె; యీనె తంకు లజ్జొ బుల్లాట అరకనీ.