1 యూదు రొజానైలా ఉజ్జియా, యోతాము, ఆహాజు, హిజ్కియా* ఏలిలా దినోన్రె యూదు గురించీ, యెరూసలేము గురించీ ఆమోజు పో యీల యెసయాకు కలిగిల దర్సనం.

2 యెహోవా కొతలగిలీసి, ఆకాసో ఆలకించు; బూమి, కన్నొలొక్కిరి సును. "మీ పిల్లానెకు పుసికిరి గొప్పలింకుగా కొరించి. ఈనె తంకె మో ఉంపరె ఉల్టిపొడిసె. 3 గై తా యజమానికు జని. గొద్దొ తా సొంత మనమరొ దొడ్డి జనుసి ఈనె ఇస్రాయేలుకు అరకని. ఇస్రాయేలుకు అర్దం యీలాని." 4 పాపిస్టి మనమానె, చెడుపైటి సంగరె పూరిలలింకె, దుస్ట మనమానే, అవినీతి కొరితల్లా మనమానే తొముకు బాద. తంకె యెహోవాకు చడిదిపేసె. ఇస్రాయేలీనెరొ పవీత్ర పురువుకు లెక్కకొరిలానింతొ. తా సంగరె సంబందం చిండిపీగిచ్చొ. 5 తొముకు ఇంకా మడ్డోనె కైంకి బైలీసె? తొమె ఇంకా కైంకి ఎదిరించిలీసొ? తొం ముండొల్లా గానాక, తొం కెల్జ పూరు నీర్చమాక. 6 అరిగొడ్డొ తీకిరి ముండొ జాంక గా నీలా చోటు నియ్యి. కేటెదిగినా గని, మడ్డోనె, నామానిలా గానె. సడానె మానిలానింతె. సడానెకు కేసే దొయిలానింతె, తెల్లొ సంగరె బొలికొరిలానింతె. 7 తొం దెసొ పాడైజేసి తొం దెసోనె నియ్య సంగరె పుడ్డైజీసె. తొం దిగితన్నుగా పొదరొలింకె తొం పచ్చానెకు జింకిగిల్లీసె. తంకు అంకీనెకు దిగిదిల్లాంచల్లా నాసనం కొర్లీసె. 8 సీయోను జో* ద్రాక్సతొట్టరె గుటె గుడిసె పనికిరి, దోస పాదున్రె గుటె పాక పనికిరి, ఆక్రమించిగిల్ల గుటె పట్టనం పనికిరి మిగిల్జేసి. 9 సైన్యమూనెకు అదిపతియీల యెహోవా అం కోసం కుండె సేసం ఈనెను నారొయిదిన్నే, అమె సొదొమ పనికిరి రొయితమ్మొ, గొమొర్రా సంగరె సమానంగా రొయితమ్మొ. 10 సొదొమ ఏలికానె, యెహోవా కొత సునొండి. గొమొర్రా ప్రజానె, అం పురువురొ ఉపదేసముకు కన్నొనొక్కిరి సునొండి. 11 యెహోవా యాకిరి కొయిలీసి. "విస్తారమైలా తొం బలీనె మెత్తె కైంకి?" దహన బలీనెగా అర్పించిలా పొట్టేల్లు, బలిసిలా దూడానెరొ తెల్లొ మెత్తె మోసాడ మరిపీసి. దున్నపోతునెరొ రొగుతొ, గొర్రిపిల్లానెరొ రొగుతొ, మేక పోతునెరొ రొగుతొ బుల్నే మెత్తె ఇస్టం నియ్యి. 12 తొమె మో సన్నిదికు మెత్తె మిసిగిమ్మాసిబులి అయిలీసొ మో దారొ మండితె తొముకు ఆయిబుల్లాట కేసె? 13 అర్దం నీలా అర్పనానె ఇంక తొమె మెత్తె దన్నైయితెనా. దూప నొగివురొ మెత్తె అసాయం. అమాస, విస్రాంతి దినోనె, సమాజ కూడికానె జరిగిలీసె గని, తొం దుర్మార్గ సమావేసానె మియ్యి సహించినారి. 14 తొం అమాస పొరొవోనె, నియమించిలా పొరొవోనె మెత్తె అసాయం. సడానె మెత్తె బాదించిలీసె. సడానెకు సహించినారికిరి యిసిగిజేంచి. 15 తొమె తొం అత్తోనె టెక్కికిరి ప్రార్దించిలాబెల్లె తొముకు నాదిక్కుంటా మో అంకీనె బుజ్జిపీగిమ్మి. తొమ్మె కెత్తొ ప్రార్దన కొరినన్నా మీ సున్ని. తొం అత్తోనె రొగుతొ సంగరె పూరికిరి అచ్చె. 16 తొముకు దొయిగునొండి సుబ్రం కొరుగునొండి. తొం చెడు పైటీనె మెత్తె నాదిగిదీకుంటా సడానెకు కడిపేండి. తొం చెడు పైటీనె మానిపేండి. 17 కీడు కొరివురొ మానొండి మేలు కొరివురొ సుగ్గునొండి. న్యాయము కొరొండి. హింసింపబొడిలాలింకు చొడిదేండి. బో నీలాలింకు న్యాయం కొరొండి, రండింట తరుపురె టారొండి. 18 యెహోవా యాకిరి కొయిలీసి. "ఐండి అమె మిసికిరి గుటె నిర్నయముకు అయిమండి." తొం పాపొనె రొగుతొ పని గొర్రైకిరి రొన్నన్నా, సడానె మంచుపని దొగలగా ఊసె. కెంపు పనికిరి గొర్రైకిరి రొన్నన్నా, సడానె గొర్రె బొచ్చుపనికిరి దొగలగా ఊసె. 19 తొమె ఇస్టపొడికిరి మో కొత సున్నె యే దెసొ అందించిలా బొల్ట కదీనెకు అనుబవించుసొ. 20 నాసునుకుంటా తిరుగుబాటు కొర్నె, కత్తి తొముకు నాసనం కొరుసి. యెహోవా యాకిరి పలికిలీసి.

21 నమ్మకమైలా యే దెసొ గుటె దర్నింటగా క్యాకిరి మారిసి! సడ న్యాయం సంగరె పూరికిరి తవ్వి. నీతి తాండ్రె రొయితవ్వి. ఉంచినైనె సడపూరు కూనీకారీనె బొసపొక్కిరి అచ్చె. 22 తొ వెండి మస్టు యీజేసి, తొ ద్రాక్సరసొ పని సంగరె మిసిజేకిరి పలచబొడిజేసి. 23 తొ అదికారీనె ద్రోహినె, చొరొలింకె దీకిరి మిసుసె. తంకల్లా లంచొ మగుసె. బహుమానొ కోసం దిగుతోసె. బో నీలాలింకు ఆడుకు న్యాయం కొరినింతె, రండిలింకెరొ న్యాయమైలా మొర విచారించినింతె. 24 గనక ప్రబువు, ఇస్రాయేలురొ బలమైలాట, సైన్యాదిపతి యీల యెహోవా యాకిరి ప్రకటించిలీసి. "తంకు బాద! మో విరోదినె ఉంపరె మియ్యి ప్రతీకారం తీర్చుగునుంచి, మో సత్రునె ఉంపరె పగ తీర్చుగునుంచి. 25 తొత్తె యిరోదంగా మో అత్తొ బుల్లిదూంచి. తో బిత్తరె తల్ల కసవకు సుబ్రం కొరికిరి, తో కల్మసం అల్లా కడిపూంచి. 26 అగరె రొల్లపనికి న్యాయాదిపతీనెకు తొత్తె ఇంకా దూంచి. ఆరంబమురె రొల్లపనికిరి సలహాదారినెకంకా తొత్తె దూంచి. సెల్లె నీతిగల్లా దెసొబులి నమ్మకమైలా పట్టనం బులి తొత్తె నా ఆసి." 27 సీయోనుకు న్యాయము వల్లరెను, బుల్లికిరి అయిలా సడరొ నివాసీనెరొ నీతి వల్లరె యిడుదల కలుగుసి. 28 అతిక్రమం కొరిలాలింకే, పాపీనె మిసికిరి మిసికిరి ఏకంగా నాసనం ఊసె. యెహోవాకు చడిలాలింకె నసించిజూసె. 29 తొమె కోరిగిల్లా ఆకాసొ గొచ్చొ వల్లరె తొమె లజ్జొ పొడుసొ. తొమె బచ్చిగిల్లా తొటానె వల్లరె తొమె అవమానం యీజూసొ. 30 తొమె పత్రోనె వోడిజెల్లా ఆకాసొ గొచ్చొ పనికిరి, పనినీలా తొట పనికిరి యీజూసొ. 31 బలము గల్లాలింకె సులువుగా నియ్య రాంగదిల్లా నారపీచు పనికిరి తాసె. తా పైటి నియ్యరవ్వ పనికిరి తాసి. దీటా మిసికిరి పుడ్డుజోసె. నుగదిల్లాలింకె కేసే రొన్నింతె.