Isaías 38

హిజ్కియా జబ్బు తీకిరి బొలైవురొ

1 సే దినోన్రె హిజ్కియాకు పొర్నొకడిల జబ్బు యీజేసి. ప్రవక్త, ఆమోజు పొ యెసయా సెట్టెకు ఐసి. "తువ్వు మొరిజీతెజెల్లీసు, ఇంక జీను గనక తో గొరొ ఒబ్బిడి కొరుగును" బులి యెహోవా కొయిలీసి బులి కొయిసి. 2 సెల్లె హిజ్కియా గోడ ఆడుకు బుల్లికిరి యెహోవాకు ప్రార్దన కొరిసి, 3 "యెహోవా, యదార్ద మనుసు సంగరె, సత్యం సంగరె తో సన్నిదిరె మీ క్యాకిరి జీంచో, సొబ్బిటికూ క్యాకిరి తో దృస్టికు బొల్ట కొరించివో, కృప సంగరె గేపకం కొరిగిను" బులి అంకీనెరె పని దన్నైగీసి. 4 సెల్లె యెహోవా కొత యెసయాకు ప్రత్యక్సమైకిరి యాకిరి కొయిసి. 5 "తు బుల్లికిరి హిజ్కియా పక్కరకు జేకిరి తా దీకిరి యాకిరి కో, తో పూర్వికుడైల దావీదు పురువైల యెహోవా తొత్తె కొయిలాట కిరబుల్నే తో అంకీన్రె పని మీ దిగించి. తో ప్రార్దన అంగీకరించించి. 6 ఇంకా తో జీకరె 15 బొచ్చురోనె ఆయుస్సు బొడుదూంచి. తొత్తె, ఏ పట్టనముకు అస్సూరు రొజా అత్తరె దీకిరి చొడిదీకిరి కాపాడుంచి. 7 యెహోవా కొయిల కొత నెవేరుసి బులితె, సే తొత్తె దిల్లా గుర్తు ఎడాక, 8 ఆహాజు కొర గడియారం ఉంపరె సూరిడురొ ఎలుగు అగురుకు జరిగిల నీడ ఇంకా దొస్ట పావంచానె పొచ్చుకు జరిగిసి." 9 యూదా రొజా హిజ్కియా జబ్బు పొడికిరి ఇంకా బొలైజిల్ల పొచ్చాడె సెయ్యె రాసిల ప్రార్దన, 10 మో జీకరె సకం బాగమురె మీ పాతాల ద్వారము ద్వారా జెవ్వురొ యీసి. మిగిల్లా సకం బాగం మీ వొరదిగిల్లాపనికిరాక. 11 సజీవునె దెసొరె యెహోవాకు దిగినారింత. మృతునె లొకొరె పొడిజీకిరి ఇంక మనమానెకు దిగిపారినారింత బులిగించి. 12 మో జీక కడిపేసె. గొర్రీనె జొగులొతా గుడిసె పనికిరి సడ మో పక్కరె తీకిరి కడిపేసె. నేత పైటితా కొరిలాపనికిరి మో జీకకు చుట్టిపీలించి. సెయ్యె మెత్తె మగ్గము తీకిరి దూరు కొరిసి. గుట్టె దినెరాక తు మో జీకకు ముగించిలీసు. 13 సొక్కల జాంక ఓర్చిగించి. సింహం పనికిరి మో అడ్డోనల్లా బంగిపేసి. గుట్టె దినెరాక తు మెత్తె ముగించిపూసు. 14 కొంటానె లెంజొ పిట్ట పనికిరి కిచకిచలాడించి. పావురం పనికిరి మూలిగించి. ఉంపురుకు దిక్కిరి, దిక్కిరి మో అంకీనె అలిసిజేసె. నలిగిజేంచి. యెహోవా, మెత్తె సాయం కొరు. 15 మీ కిర కొయిపారి? సెయ్యె మెత్తె కొత దీసి సెయ్యాక నెరవేర్చిసి. మో మనుసురె పూరిజెల్ల దుక్కొ వల్లరె మో బొచ్చురోనల్ల మెల్లిగా చలుగుంచి. 16 ప్రబూ, తు పొడిదిల్ల బాదానె మనమానెకు బొల్టాంచాక. సడానె వల్లరాక మో ఆత్మ జీలీసి. తు మెత్తె బొలొ కొరికిరి మెత్తె జీపించువు. 17 సే తీవ్రమీలా బాద వల్లరాక మెత్తె నెమ్మది యీసి. తో ప్రేమ సంగరె మో పొర్నొకు నాసనము బుల్లా గత్తొ తీకిరి చొడిపించిసు. మో పాపోనెకల్ల తో పింటి పొచ్చాడె పొక్కదీసు. 18 కైంకిబుల్నే పాతాలం బిత్తరె తొత్తె స్తుతి కలిగిని. మొర్నొ తొత్తె స్తుతి చెల్లించిని. సమాది బిత్తురుకు జెల్ల లింకె తో సొత్తొ ఉంపరె ఆస లొగ్గినింతె. 19 సజీవునె, సజీవునాక నీనా తొత్తె స్తుతించుసె. ఆజి మీ తొత్తె సజీవుడుగా స్తుతించిలించి. బోనె తంక పోనెకు తో సత్యముకు తెలియపర్చుసె. మెత్తె రక్సించిలాట యెహోవా. 20 మో జీక కలొ అల్ల యెహోవా మొందిరొరె సంగీత వాయిద్యానె మోగించించు. 21 ఇంకా యెసయా, గుటె అంజూరొ పొగల ముద్దకు సే గా కు బందొండి, సెల్లె సెయ్యె బొలె ఊసి బులి కొయిసి. 22 సడకు హిజ్కియా రొజా, మి ఇంకా యెహోవా మొందిరొకు జోంచి బుల్లాటకు సూచన కిర? బులి తాకు పొచ్చిరిసి.