Isaías 46

పురువు యింకా బబులోను పురువొనె

1 బేలు కూలిజెల్లీసి. నెబో క్రుంగిజెల్లీసి. తంకరొ ప్రతిమానె జంతువునె , పసువునె బొయిగీకుంటా జెల్లీసె. 2 సడానెకు బొయివురొ పసువునెకు బారంగా అచ్చి. సడానె సోమ్మసిల్లిజెల్లీసె సడానె అలిసిజేకుంటా, జోగిజేకుంటా సే ప్రతిమానెకు కాపాడినారికిరి తంకెంకా చెర బిత్తురుకు బాజేసె. 3 యాకోబు సంతానమూ, ఇస్రాయేలు సంతానంరె మిగిల్లా లింకే, తొమ్మె పెట్టొరె పొడిల బెల్లె తీకిరి మీ తొముకు బరించించి. తొమ్మె మా అడ్డాలురె తల్లబెల్లె తీకిరి మీ తొముకు కొక్కిగించి. మో కొత సునోండి. 4 తూ మొంత్ర యీజెల్ల జాంక, తో ముండొరె బల్లోనె దొగల యీజెల్ల జాంక తొత్తె బొయిలాట మియ్యాక. మియ్యాక తొత్తె కొరించి, తొత్తె కొక్కిగిల్లాట, తొత్తె బొయికుంటా రక్సించిలాటంకా మియ్యాక. 5 మెత్తె కాదీకిరి పోల్చికిరి కాసంగరె మెత్తె సముగా కొరుసె? మెత్తె సమానం బులి కాకు మెత్తె పోటీగా కొరుసె? 6 మనమానె బడే సున్న దన్నైకిరి ఓడదూసె. వెండికు దన్నైకిరి గొబ్బిరి తూసుసె. గుటె కంసాలీటకు బొరొతోనొ కు డక్కికిరి తాకు సడకు ఒప్పకొయివె. సెయ్యె సడకు గుటె పురువుగా రూపించుసి. తంకె సడకు సాగిల పొడికిరి ఒలుగుసె. 7 తంకె సడకు తంక కందోనె ఉంపరె ఉడిదీగీకిరి సడకు బొయిగీ బాజేకిరి సడరొ స్తానమురె టారొదూసె. సడ సెట్టెదీకిరి నాకదులుకుంటా సెట్టాక టారెకిరి తాసి. జొనె సడకు మొరలొగ్గినెనూ జబాబు దెన్ని, కారొ బాద కడిపీనారి, కాకు రక్సించినారి. 8 ఏ సంగతీనె గేపకం కొరిగీకిరి దైర్యంగా తాండి. పసిరిజేతెనా ఉల్టిపొడితల్ల తొమ్మె ఎడకు ఆలోసించిగీండి. 9 బడే కలొ తొల్లె జరిగిలాంచకు గేపకం కొరిగీండి. మియ్యాక పురువు, ఇంక కే పురువూ నీ. మియ్యాక పురువు, మో పనాట కేసే నియ్యి. 10 ఆది తీకిరి అంతం జాంక యీవలిసిలాంచకు మీ ప్రకటించుంచి. ఇంకా నాజరిగిలాంచకు అగుంతాక తెలియపర్చుంచి. మో సంకల్పం జరుగుసి. మో చిత్తమల్ల మీ నెరవేర్చుంచి బులి మీ కొయిలించి. 11 తూర్పు తీకిరి క్రూరమైల పక్సినెకు ఐపించిలించి. దూరు దెసొ తీకిరి మో ఇస్టము జరిగించిలా మనమకు డక్కిలించి. మీ కొయిలాటకు నెరవేర్చుంచి. ఉద్దేసించిలాటకు సపలం కొరుంచి. 12 కటిన మనుసూనె యీజేకిరి నీతికి దూరుగా తల్ల లింకే, మో కొత సునోండి. 13 మో నీతికు తొం పక్కరకు దన్నైంచి. సడ దూరుగా నీ. మో రక్సన ఆలిసుం కొరిలాని. సీయోనుకు మో రక్సన అందించుంచి. ఇస్రాయేలుకు మో రక్సన అనుగ్రహించుంచి.