Salmos 12

Ki he Takimuʻa ʻi he Semini, ko e Saame ʻa Tevita.

1 ‌ʻE Sihova, ke ke fakamoʻui; he kuo ngata ʻae tangata anga fakaʻotua;

he ʻoku fakaʻaʻau ʻo tokosiʻi ʻae angatonu ʻi he ngaahi fānau ʻae tangata.

2 ‌ʻOku nau taki taha lea loi ki hono kaungāʻapi:

ʻoku nau lea ʻi he loungutu lapu mo e kākā.

3 ‌ʻE fakaʻauha ʻe Sihova ʻae ngaahi loungutu lapu kotoa pē,

pea mo e ʻelelo ʻoku lea ʻaki ʻae ngaahi meʻa fakafielahi:

4 ‌ʻAkinautolu naʻe pehē, "Te tau ikuna ʻaki hotau ʻelelo;

ʻoku ʻotautolu pe hotau loungutu:

ko hai ʻae ʻeiki kiate kitautolu?

5 ‌ʻOku pehē ʻe Sihova, "Ko e meʻa ʻi he fakamālohiʻi ʻoe masiva, mo e ngaahi mafulu ʻoe vaivai,

te u tuʻu hake;

te u fokotuʻu moʻui ia meiate ia ʻaia ʻoku manuki kiate ia."

6 Ko e ngaahi folofola ʻa Sihova ko e folofola maʻa ia:

ʻo hangē ko e siliva kuo ʻahiʻahi ʻi he kulo ʻumea, kuo tuʻo fitu hono fakamaʻa.

7 ‌ʻE Sihova, te ke tauhi ʻakinautolu,

te ke fakamoʻui ʻakinautolu mei he toʻutangata ni ʻo taʻengata.

8 ‌ʻOku ʻeveʻeva ʻae angakovi ʻi he potu kotoa pē,

ʻoka hakeakiʻi ʻae kau tangata ʻoku mātuʻaki kovi.