1 Naʻa mau nofo ki lalo ʻi he veʻe vaitafe ʻo Papilone,

ʻio, naʻa mau tangi ʻi heʻemau manatu ki Saione.

2 Naʻa mau tautau ʻemau ngaahi haʻape,

ʻi he ngaahi uilou ʻi he lotolotonga ʻo ia.

3 He naʻe fekauʻi ai ʻekinautolu naʻa nau fakapōpulaʻi ʻakimautolu ke mau hiva;

pea ko kinautolu naʻe fakaʻosiʻosi ʻakimautolu naʻa nau fekau ke mau fiefia,

ʻonau pehē, "Hiva mai kiate kimautolu ʻi he ngaahi hiva ʻo Saione."

4 ‌ʻE fēfē ʻemau hiva ʻaki ʻae hiva ʻa Sihova ʻi he fonua ʻoe muli?

5 Kapau te u fakangalongaloʻi koe, ʻE Selūsalema,

tuku ke ngalo ʻi hoku nima toʻomataʻu hono faiva.

6 Kapau ʻe ʻikai te u manatu kiate koe, tuku ke pikitai ʻa hoku ʻelelo ki hoku ʻaoʻingutu;

ʻo kapau ʻe ʻikai te u hiki māʻolunga hake ʻa Selūsalema ʻi hoku fungani fiefiaʻanga.

7 Manatu, ʻE Sihova, ki he fānau ʻa ʻItomi,

ʻi he ʻaho ʻo Selūsalema;

naʻa nau pehē, "Fakaʻauha ia!

Fakaʻauha ia, ʻo aʻu ki hono tuʻunga!"

8 ‌ʻE ʻofefine ʻo Papilone, ʻe fakaʻauha koe;

ʻe monūʻia ia, ʻaia te ne totongi kiate koe,

ʻo hangē ko hoʻo fai kiate kimautolu.

9 ‌ʻE monūʻia ia,

ʻaia te ne toʻo ʻo laiki hoʻo fānau iiki ki he maka.