1 ‌ʻOku hangē ko e holi ʻae hainiti ki he ngaahi tafeʻanga vai,

ʻoku pehē ʻae holi ʻa hoku laumālie kiate koe, ʻE ʻOtua.

2 ‌ʻOku holi hoku laumālie ki he ʻOtua, ki he ʻOtua moʻui:

te u hoko ʻafē ʻo fakahā au ʻi he ʻao ʻoe ʻOtua?

3 Ko ʻeku meʻakai ʻi he ʻaho mo e pō ʻa hoku ngaahi loʻimata,

lolotonga ʻoku nau pehē maʻuaipē kiate au, "Ko e fē ho ʻOtua?"

4 ‌ʻI heʻeku manatu ki he ngaahi meʻa ni, ʻoku ou lilingi hoku laumālie ʻiate au:

he naʻaku faʻa ʻalu mo e tokolahi, naʻaku ʻalu mo kinautolu ki he fale ʻoe ʻOtua,

ʻi he leʻo ʻoe fiefia mo e fakafetaʻi, mo e tokolahi naʻe tauhi ʻae ʻaho tapu.

5 Ko e hā ʻoku ke mapelu ai ki lalo, ʻE hoku laumālie?

pea ko e hā kuo ke maveuveu ai ʻi loto ʻiate au?

Ke ke ʻamanaki lelei ki he ʻOtua?

He ko e moʻoni te u fakafetaʻi kiate ia ʻi he ngaahi fakamoʻui ʻo hono fofonga.

6 ‌ʻE hoku ʻOtua, ʻoku mapelu ki lalo hoku laumālie ʻi loto ʻiate au:

ko ia te u manatu ai kiate koe mei he fonua ʻo Sioatani,

pea mo Heamoni, mo e moʻunga siʻi ko Maisa.

7 ‌ʻOku ui ʻae loloto ki he loloto ʻi he longoaʻa ʻo hoʻo ngaahi ʻahiohio vai:

ʻoku lōmakiʻi au ʻe hoʻo ngaahi peau kotoa pē mo hoʻo ngaahi ngalu.

8 Ka ko e moʻoni ʻe fekau mai ʻe Sihova ʻa ʻene ʻaloʻofa ʻi he ʻaho,

pea ʻe ʻiate au ʻene hiva ʻi he poʻuli,

mo ʻeku lotu ki he ʻOtua ʻo ʻeku moʻui.

9 Te u pehē ki he ʻOtua ko hoku makatuʻu, "Ko e hā kuo ke fakangaloʻi ai au?

Ko e hā ʻoku ou ʻalu mamahi pē ʻi he taʻomia ʻe he fili?"

10 Ko e manuki ʻa hoku ngaahi fili, ʻoku hangē ko e heletā kuo uhu ki hoku ngaahi hui;

ʻi heʻenau pehē mai kiate au ʻi he ʻaho kotoa pē, "Ko e fē ho ʻOtua?"

11 Ko e hā ʻoku ke mapelu ai ki lalo, ʻE hoku laumālie?

Pea ko e hā ʻoku ke maveuveu ai ʻi loto ʻiate au?

Ke ke ʻamanaki lelei ki he ʻOtua: he ko e moʻoni te u fakafetaʻi kiate ia,

ʻaia ko e fakamoʻui ʻo hoku mata, mo hoku ʻOtua.