1 Hiva kia Sihova ʻaki ʻae hiva foʻou:

hiva kia Sihova ʻa māmani kotoa pē.

2 Hiva kia Sihova, fakafetaʻi ki hono huafa;

fakahā atu ʻene fakamoʻui mei he ʻaho ki he ʻaho.

3 Fakahā hono nāunau ʻi he ʻao ʻoe hiteni,

mo ʻene ngaahi ngāue fakaofo ki he kakai kotoa pē.

4 He ʻoku lahi ʻa Sihova, pea totonu ke fakamālō lahi kiate ia:

ʻoku lelei ke manavahē lahi hake kiate ia ʻi he ngaahi ʻotua kotoa pē.

5 He ko e ʻotua kotoa pē ʻoe ngaahi puleʻanga ko e ngaahi tamapua ia:

ka ko Sihova naʻe ngaohi ʻe ia ʻae ngaahi langi.

6 ‌ʻOku ʻi hono ʻao ʻae fakaʻapaʻapa mo e māfimafi:

ʻoku ʻi hono faletapu ʻae mālohi mo e nāunau.

7 Tuku kia Sihova, ʻakimoutolu ʻae ngaahi faʻahinga ʻoe kakai,

tuku kia Sihova ʻae nāunau mo e māfimafi.

8 Tuku kia Sihova ʻae ongoongolelei ʻoku taau mo hono huafa:

ʻomi ʻae feilaulau, pea haʻu ki hono ngaahi lotoʻā.

9 Lotu kia Sihova ʻi he teunga matamatalelei ʻoe māʻoniʻoni:

mou manavahē ʻi hono ʻao, ʻa māmani kotoa pē.

10 Mou pehē ʻi he ʻao ʻoe hiteni ʻoku pule ʻa Sihova:

"ʻE fokotuʻumaʻu foki ʻa māmani,

pea ʻe ʻikai ngaueue ia:

te ne fakamaau ʻae kakai ʻi he māʻoniʻoni."

11 Tuku ke fiefia ʻae ngaahi langi,

pea nekeneka mo māmani; tuku ke ʻuʻulu ʻae tahi,

mo hono fonu ʻo ia.

12 Ke fiefia ʻae ngoue,

mo e meʻa kotoa pē ʻoku ʻi ai:

pea ʻe toki fiefia ʻae ngaahi ʻakau kotoa pē ʻoe vao,

13 ‌ʻI he ʻao ʻo Sihova: he ʻoku ne hāʻele mai, he ʻoku hāʻele mai ia ke fakamaau ʻa māmani:

te ne fakamaau ʻa māmani ʻi he māʻoniʻoni, mo e kakai ʻi heʻene moʻoni.