1 Toma 'orasa gena-ge, 'Olana Herodes 'o soma'a sordado-sordado 'aḏi cako'o ngowa'a ngaku Yesus nga muḏuo i'a toma jama'ata Yerusalem, la ya'u sisikisa.* 2 Herodes 'o soma'a 'ai sordado sisengene 'a Yakobus, 'a Yohanes 'ai ioro. Ḏua sordado gena-ge 'aḏi tola'a Yakobus 'ai camala remanga samaranga. 3 Wakutu Herodes 'o 'isene ngowa'a Yahudi manga 'akala re sinyingara 'i sanangi sababu Yakobus 'o sengene ḏua, unanga dadunu 'o soma'a 'ai sordado-sordado 'aḏi cako'o 'a Petrus ḏi'i. Gena-ge ya si'a'a wakutu wangere lamo'o ma lomanga Roti Kama Ragi Ua. 4 Dadi sordado-sordado 'u cako'o re 'u singosama toma bui, kara Herodes 'ai sordado-sordado balangu rata 'aḏi jaga 'a Petrus toma bui -- balangu moi nga ḏuata.* Balangu-balangu gena-ge 'aḏi jaga Petrus ma'u ngali-ngali tau-taunu. Wakutu wangere lamo'o gena-ge togumu i'a, Herodes mau 'u sikalaki unanga toma ngowa'a repe manga biono.✝ 5 Wakutu 'a Petrus toma bui ma dara, ngowa'a ngaku Yesus mo-moini toma limau Yerusalem 'aḏi manyiata remanga 'akala re sinyingara mode-mode'e ra Ma Jou'ongu Madutu di'a Petrus.

6 Toma lobi'i rimoi, Petrus 'o otu re 'ai giama ya rate ya sirimoi toma sordado nga muḏiḏi 'u sigo-golona. Sordado nga muḏiḏi ma lelegu 'aḏi jaga toma bui ma ngalana. Ma ḇiḇini ino Herodes 'o kalaki 'a Petrus. 7 Kage-kage, Ma Jou'ongu Madutu 'ai mala'ekata matengo 'o made'oso ie sebanga i'a ra Petrus singadolo kamara gena-ge 'i romanga reo cahaya. Mala'ekata gena-ge 'u yowana singadolo 'a Petrus 'o kage re 'o kanau, "Hei, caiti no momi'i!" Toma 'orasa gena-ge ḏua, rate tai giama 'i palasara masiretene. 8 Gena ḏua, mala'ekata gena-ge dadunu 'o kanau, "Na sinamoto 'ani golona ma bi-biri'u re no masiga'e 'ani tarupa." Ḏua unanga 'a si'a'a sa'olo mala'ekata 'o siajele. Gena ḏua, mala'ekata 'o kanau moju, "Masiga'e 'ani juba re no mete'e ngoi." 9 Ḏua, Petrus 'o supu toma bui ma kamara 'o mete'e mala'ekata gena-ge. Mada'a unanga 'a waro ua 'oru 'i dadi ra unanga. Petrus 'a sibasono tala sa'olo tingoḏi'i ḇato. 10 Ananga 'aḏi supu re ya palisi'i toma sordado ja-jaga ma mulaingi re sordado ja-jaga ma soi ḏiḏi kara 'aḏi ngadolo toma ngalana besi lamo'o ga'a limau ma ngalana. Ḏua ngalana gena-ge 'i welanga masiretene, kara ananga 'aḏi supu re 'aḏi tagi mete'e ngo'omo rimoi singadolo 'aḏi ngadolo toma ngo'omo ma ḏo-ḏogumu. Kage-kage mala'ekata gena-ge 'o mairanga re sisoi'i i'a Petrus.

11 Gena ḏua, Petrus 'ai 'akala 'i ḏibo re 'o waro 'oru 'i dadi ḏua ra unanga. Ḏua 'o kanau tai 'akala re sinyingara ma dara, "Nena-ne ngoi ta waro mode-mode'e Ma Jou'ongu Madutu 'o soma'a 'Ai mala'ekata ro silalo'o ngoi ra Herodes 'ai kuasa re toma ngowa'a Yahudi manga 'ulungu ma jira."

12 Wakutu Petrus 'ai 'akala 'i ḏibo, unanga 'o tagi ra ngo Maria 'ami wala (Maria 'a Yohanes 'ai ngina. Yohanes gena-ge si'aro'o 'a Markus ḏi'i). Toma 'orasa gena-ge, ngowa'a ngaku Yesus manga repe 'aḏi malomu re 'aḏi manyiata di'a Petrus.

13 'A Petrus 'o tolo'o wala gena-ge ma ngalana re 'a'a iḏingi. Ḏua falalomu were'a matengo 'ami lomanga ngo Rode mo ino di'a mawelanga ngalana gena-ge. 14 Munanga mo nana'o 'a Petrus 'ai iḏingi re mo maroanga masala singadolo mo sidaioranga mo welanga ngalana re mo jau-jau mo osama re mo siajele ra ananga, "Petrus, unanga da'a toma ngalana!" 15 Ananga 'aḏi sangoro, "Ngana no pona!" Mada'a ngo Rode mo mate'e Petrus mode'e. Ḏua ananga 'aḏi kanau, "Gena-ge unanga 'ai mala'ekata!"*

16 Petrus 'o tolo'o ma ngalana gena-ge tau-taunu. Wakutu ananga ya welanga re 'aḏi oḏi'i unanga, ananga 'aḏi heranga masala. 17 Petrus 'o pula'a po-poma rai giama, la ananga 'aḏi masiogoro. Gena ḏua, unanga 'a siajele ma duhu sa'olo Ma Jou'ongu Madutu 'u sisupu unanga toma bui. Ḏua 'o kanau, "Na siajele ra Yakobus re ngowa-ngowa'a ngaku Yesus ma lelegu ḏi'i." Togumu i'a, Petrus 'o sisoi'i tala wala gena-ge re 'o tagi toma ngi'i lelegu.

18 Ma ḇiḇini da-daini i'a, sordado-sordado 'aḏi nyiwere masala. Ananga 'aḏi waro manga gogare riwara, sababu Petrus ro cua toma bui ma dara. 19 Ḏua Herodes 'o soma'a sordado-sordado 'u disa Petrus, mada'a ananga ya'u sanga ua. Dadi, Herodes 'o sano sordado-sordado ga'a 'aḏi jaga 'a Petrus, kara 'o soma'a sisengene ananga.*

Pasala i'a, Herodes 'o maeanga toma daeraha Yudea re 'o tagi 'o tegoro wangere muḏuo i'a toma limau Kaisarea.

20 Ma di'ara ḏua, Herodes 'o porata masala toma ngowa-ngowa'a limau Tirus re limau Sidon. Sababu gena-ge, ananga 'aḏi sapolo talaḏi Herodes, 'aḏi mau golo'o dame ra unanga moju. 'Age matengo Herodes 'ai kadato ma ja-jaga ma sae'e 'ai lomanga Blastus re Herodes 'u silamo'o. Siḏa-siḏa ananga 'aḏi baja 'a Blastus singadolo unanga 'o mete'e ra ananga. Gena ḏua, ananga 'aḏi tagi talaḏi Herodes, 'aḏi golo'o dame, sababu ngowa-ngowa'a toma limau Tirus re limau Sidon 'aḏi mau sanga ngo-ngoromo da'a ra Herodes 'ai nagara ino moju.

21 Toma wangere rimoi sitatapu tala, 'a Herodes 'o mapake 'ai pakeanga kabasarana re 'o tegoro toma 'olana ma ḏe-ḏegoro re 'o mulaingi pula'a 'o bobita tai rayata manga biono.

22 Wakutu ananga ya 'isene Herodes 'ai bobita, ananga 'aḏi mapoa-poa'a, "Nena-ne, 'o jou'ongu ma iḏingi, manusia ma iḏingi ua!" 23 Toma 'orasa gena-ge ḏua, Herodes sanga hukumu ra Ma Jou'ongu Madutu 'ai mala'ekata, sababu Herodes 'o sisanangi ananga 'aḏi silamo'o unanga ma tero sa'olo unanga 'o jou'ongu, mada'a 'o silamo'o Ma Jou'ongu Madutu 'ai lomanga ua. 'Ai hukumana gena-ge: Herodes 'ai po'olo ma dara 'i dadi romanga reo kolotidi singadolo 'o sengene.

24 Mada'a Ma Jou'ongu Madutu 'ai demo ganapu rera re walata singadolo ngowa'a repe 'aḏi ngaku Ma Jou Yesus. 25 Barnabas re 'a Saulus ya siḏuanga manga munara toma limau Yerusalem togumu i'a, 'aḏi tagi maḏibo toma limau Antiokhia. Ananga 'aḏi gasa ngowa'a matengo ḏi'i 'ai lomanga 'a Yohanes, ga'a si'aro'o 'a Markus ḏi'i.