1 Toma 'orasa gena-ge, 'a Saulus 'o nyafusu sisengene tau-taunu ngowa-ngowa'a ngaku Yesus. Sababu gena-ge, unanga 'o tagi toma 'imam 'agung 2 re 'o golo'o surata watasa. Unanga mau gasa surata gena-ge toma wala puji ma sae'e toma limau Damsyik. Dadi na'o unanga ya'u sanga ngowa-ngowa'a 'aḏi mete'e Ma Jou Yesus 'ai do-doto'o, na-nau'u bolo we-were'a, unanga ya'u cako'o re ya'u gasa toma limau Yerusalem.✝

3 Wakutu Saulus re ngowa-ngowa'a 'aḏi ma'u mete'e ra unanga 'aḏi co-cori ḏua toma limau Damsyik, kage-kage tarangi rimoi da'u diwanga tala 'i nga'unu re sigoloḏi unanga. 4 Unanga 'o ruba* re 'o 'isene iḏingi rimoi ma betongo ra unanga, "Saulus, Saulus, i'a sa'olo ngana no sisikisa Ngoi?"

5 Saulus 'o sano, "Ma Jou, Ngana 'a guna?"

Iḏingi gena-ge ya sangoro, "Ngoi ne Yesus ga'a ngana no sisikisa. 6 Mada'a nena-ne ḏua, no momi'i re no tagi osama toma limau. I'a da'a ngana na waro 'o 'oru ga'a ngana balasu na 'a'a."

7 Ngowa-ngowa'a ga'a 'aḏi ma'u mete'e ra Saulus gena-ge 'aḏi sawana singadolo ya waro manga gogare riwara, sababu ya 'isene ma betongo mada'a 'aḏi oḏi'i matengo ua. 8 Saulus 'o momi'i re 'a welanga 'ai la'o, mada'a 'o oḏi'i ri oḏu'u. Ḏua ananga 'u gu'u 'ai giama re 'u tuda singosama da'a toma limau Damsyik. 9 Ma di'ara wangere ro'ange, unanga 'ai la'o 'i hafu, re kama oromo re ka'e mai ua.

10 'Age toma limau Damsyik, matengo 'ai lomanga 'a Ananias, unanga ngowa'a ngaku Yesus. Tai tingoḏi'i ma dara Ma Jou 'o kanau ra unanga, "Ananias!"

Ananias 'o sangoro, "Ya, Ma Jou."*

11 Ma Jou Yesus 'o kanau, "Ino no tagi so'o nena ḏua. Tagi ra Yudas 'ai wala toma Ngo'omo Boloto. I'a da'a, ngana no sano, ‘Le'a ngowa'a matengo 'ai lomanga Saulus, unanga gena-ge ngowa'a Tarsus’. Toma 'orasa gena-ge, Saulus 'o manyiata re 'o sanga tingoḏi'i. 12 Tai tingoḏi'i ma dara, 'o oḏi'i na-nau'u matengo 'ai lomanga 'a Ananias 'o sapolo, kara 'a siteru 'ai giama ra unanga di'a 'o oḏi'i nyengara moju."

13 Ananias 'o sangoro, "Ma Jou, ngoi to 'isene ḏua ngowa'a repe 'aḏi siajele mangale ngowa'a gena-ge. Unanga gena-ge 'o sisikisa ḏua ngowa-ngowa'a ngaku Yesus toma limau Yerusalem. 14 Re nange-ne unanga 'o sapolo 'ane re 'o sanga watasa toma 'o 'imam-'imam ma sae'e di'a 'o cako'o ngowa'a ngaku Yesus mo-moini."

15 Mada'a Ma Jou 'o kanau ra Ananias, "Tagi ḇato! Sababu Ngoi to cumutu unanga 'o de-de'oso Ngoi. Unanga 'o sihabari mangale Ngoi toma ngowa-ngowa'a Yahudi ua re manga 'olana re ngowa-ngowa'a Israel ḏi'i. 16 Ngoi masiretene ta sijumu ra unanga ḏuanga i'a unanga balasu 'o sanga ma sangisara ma repe mura ua, sababu 'o sihabari mangale Ngoi."

17 Dadi, Ananias 'o tagi re 'o osama toma wala ma dara gena-ge re 'a siteru 'ai giama ra Saulus. Unanga 'o kanau, "Saulus 'ari dowara, ngana no oḏi'i Ma Jou Yesus toma ngo'omo ma golona wakutu no tagi ino 'ane. Unanga gena-ge 'o soma'a ngoi to sapolo ra ngana, la no oḏi'i moju re ngana Ma Ngagara 'Ofi-'Ofi ni ḏegoro." 18 Toma 'orasa gena-ge ḏua, Saulus 'a basono sa'olo nyao'o ma ḏungi'i 'i palata ra Saulus 'ai la'o, re unanga ro oḏi'i moju. Togumu i'a, unanga 'o momi'i re 'o sanga baptis. 19 Unanga 'o oromo togumu i'a, 'ai de-de'e ri ḏibo moju.✝

Ma di'ara wangere muḏuo i'a, Saulus 'o tegoro toma ngowa-ngowa'a ngaku Yesus toma limau Damsyik.

20 Wakutu Saulus 'o tegoro toma limau Damsyik, unanga 'o osama toma wala-wala puji re 'o singadolo mangale Yesus gena-ge Ma Jou'ongu Madutu 'ai Ngowa'a Nau'u.

21 Ngowa'a mo-moini ya 'isene 'aḏi heranga masala. Ananga 'aḏi makanau matengo re matengo, "Unanga nena-ne ga'a 'o sisengene ngowa'a ngaku Yesus toma limau Yerusalem! Unanga 'ai maksudu 'o sapolo 'ane 'o cako'o re 'o gasa ngowa'a gena-ge toma 'imam-'imam ma sae'e!"

22 Mada'a Saulus 'ai kuasa ganapu te'e re lamo'o. Unanga 'o pula'a nana'o mangale Yesus gena-ge sa'olo 'O Kristus singadolo ngowa'a Yahudi toma limau Damsyik 'aḏi rubutu ri yoḏu'u.

23 Ma di'ara ḏua, ngowa'a Yahudi 'aḏi mafakati di'a sisengene 'a Saulus.Petrus 'ai ḏo-ḏagi 24 Lobi'i re wangere, ananga 'u danu unanga toma limau ma ngalana lamo'o di'a 'aḏi sisengene 'a Saulus. Mada'a 'a Saulus 'a waro manga masenge gena-ge. 25 Dadi 'age utu moi, 'a Saulus 'ai me-mete'e 'aḏi 'oro unanga, kara ananga 'u sigare toma karajanga lamo'o. Ḏua ananga 'u sisiala mete'e limau ma jangela ḏuḏunu.✝

26 Wakutu 'a Saulus 'o tagi toma limau Yerusalem, i'a da'a unanga 'a sitai'i mau 'o marimoi toma ngowa-ngowa'a ngaku Yesus. Mada'a ananga 'aḏi dawongo ua sababu 'aḏi mojongo unanga. Ananga 'aḏi ngaku ua unanga ro dadi ngowa'a ngaku Yesus. 27 Ḏua 'a Barnabas 'o sapolo ra unanga re 'u gasa ra Yesus 'ai so-soma'a. Barnabas 'a sijarita ra ananga mangale 'a Saulus 'o oḏi'i Ma Jou toma ngo'omo ma golona re Ma Jou ro siajele ra unanga. Barnabas 'o siajele ḏi'i 'a Saulus 'o singadolo mangale Yesus kama mojongo ua toma ngowa'a Damsyik. 28 Yesus 'ai so-soma'a 'aḏi ngaku 'a Barnabas. Dadi, 'a Saulus 'o tegoro re malomu ra Yesus 'ai so-soma'a re ngowa-ngowa'a ngaku Yesus. Unanga 'o doto'o ḏi'i mangale Yesus kama mojongo ua le'a ḇato toma limau Yerusalem 29 Unanga 'o kanau re 'o ma'u rubutu tau-taunu toma ngowa'a Yahudi ga'a 'aḏi pake Yunani manga demo. Mada'a ananga 'aḏi disa ngo'omo, la sisengene unanga. 30 Wakutu ngowa-ngowa'a ngaku Yesus ma lelegu ya 'isene gena-ge, ananga 'u gasa Saulus toma limau Kaisarea. Togumu i'a 'u siḏingoto unanga toma limau Tarsus.

31 Toma 'orasa gena-ge, ngowa-ngowa'a ngaku Yesus mo-moini toma daeraha Yudea, daeraha Galilea re daeraha Samaria 'aḏi basono dame. Ma Ngagara 'Ofi-'Ofi ya'u riono tamanga 'ahu ma dara singadolo manga ngo-ngaku ganapu te'e, ananga 'aḏi 'ahu 'aḏi silamo'o re mojongo Ma Jou'ongu Madutu tau-taunu, re ngowa-ngowa'a ngaku Yesus dogo repe.

32 'A Petrus 'o tagi toma daeraha le'a bolo le'a 'o tutumu ngowa'a ngaku Yesus. 'Age wangere rimoi, unanga 'o tutumu ngowa-ngowa'a ngaku Yesus toma limau Lida. 33 I'a da'a, unanga 'o ma'u sanga na-nau'u ḇolo matengo 'ai lomanga 'a Eneas. Unanga kama momi'i i'a mai ua toma dederu ma di'ara musungu tu'angere ma dara. 34 'A Petrus 'o kanau ra unanga, "Eneas, 'a Yesus Kristus 'o si-la ngana. Momi'i re na lolo 'ani jungutu." Toma 'orasa gena-ge ḏua, Eneas 'o momi'i. 35 Ngowa'a manga repe masala toma limau Lida re daeraha Saron 'aḏi oḏi'i 'a Eneas. Sababu gena-ge, ananga manga repe 'aḏi ngaku Ma Jou Yesus.

36 Toma limau Yope, 'age rema ngowa'a were'a matengo 'ami lomanga ngo Tabita. Munanga ngowa'a ngaku Yesus. ('Ami lomanga toma Yunani manga demo ngo Dorkas, Dorkas ma ngale: manjanga.) Munanga mo 'a'a 'ori i'a la-la tau-taunu re mo riono ngowa'a ma dinga'unu ua. 37 Toma 'orasa gena-ge, munanga mo siḏi singadolo mo sengene. 'Ami maiyeti, ngowa'a ya 'ori'i re ya sigare toma kamara da'u re'u. 38 Limau Yope, 'i ma'u cori re limau Lida. Wakutu ngowa-ngowa'a ngaku Yesus toma limau Yope 'aḏi 'isene 'a Petrus unanga da'a toma limau Lida, ananga 'aḏi 'utusu nga muḏiḏi 'aḏi tagi si'a ra Petrus. Wakutu ananga gena-ge 'aḏi ngadolo, 'aḏi golo'o mode-mode'e ra Petrus, "No caiti ino." 39 Togumu i'a, Petrus 'o ma'u mete'e ra ananga. Ngadolo da'a 'u gasa toma kamara da'u re'u. Ngowa'a balo-balo sigoloḏi 'a Petrus re 'aḏi gaḏi re 'aḏi sijumu manga baju re juba ga'a ngo Dorkas madini wakutu mo 'ahu-'ahu moju. 40 'A Petrus 'o soma'a ananga mo-moini 'aḏi masupu. Unanga 'o maḏipolono re 'o manyiata. Ḏua 'o talaḏi i'a ma maiyeti re 'o kanau, "Tabita, no momi'i!" Toma 'orasa gena-ge ḏua, 'ami la'o 'i welanga re mo oḏi'i 'a Petrus, kara munanga mo momi'i. 41 'A Petrus 'a gu'u 'ami giama re 'o riono side'oso munanga. Togumu i'a 'a Petrus 'o 'aro'o ngowa-ngowa'a ngaku Yesus re ngowa'a balo-balo, kara 'o siḏibo munanga ra ananga. 42 Habari mangale gena-ge, ngowa'a mo-moini ya 'isene toma limau Yope. Sababu gena-ge ngowa'a repe 'aḏi ngaku Ma Jou Yesus. 43 'A Petrus 'o tegoro wangere muḏuo i'a moju ra Simon 'ai wala - Simon gena-ge ga'a wa-wati'i haiwani ma eno'o.