Atos 16

Paulus 'o osama bui toma limau Filipi

16 Wakutu ngomi mi tagi toma manyiata ma ngi’i, ngomi ma’u sanga mosolese budaka matengo ga’a 'o roh ma jira mi dungosama sa’olo ngowa’a mai-maisi singadolo munanga nga’unu oḏi’i ngowa’a manga 'ahu toma biono i’a. Munanga gena-ge mo si’utungu masala di’a 'ami tuanga-tuanga. 17 Munanga gena-ge mo mete’e Paulus re ngomi tau-taunu, re mo maboa-boa’a, "Ngowa-ngowa’a nena-ne Ma Jou’ongu Madutu toma Gau’u 'Ai falalomu. Ananga 'aḏi sapolo 'aḏi siajele ra ngini ngo’omo di’a ngini sanga salamata!" 18 Ma wangere ma jelele i’a, munanga gena-ge mo maboa-boa’a so’o gena ḇato. Paulus 'ai 'akala ḇanyo mai ri moini ḏua kara 'o magelelo ra munanga 'o kanau, "Rema Jou Yesus Kristus 'ai lomanga, ngoi to soma’a roh ma jira no supu ra munanga nena-ne!" Toma 'orasa gena-ge ḏua, roh ma jira 'i supu re sisoi’i tala munanga.

19 Wakutu 'ami tuanga-tuanga 'aḏi basono tala sanga pipisi riwara, ananga 'aḏi cako’o Paulus re 'a Silas re 'aḏi gasa ananga nga muḏiḏi toma limau ma sigolona, la ya’u sikalaki. 20 Ananga 'aḏi sitalaḏi Paulus re 'a Silas toma Roma ma pamarenta re 'aḏi kanau, "Ananga nena-ne ngowa’a Yahudi 'aḏi 'a’a kaco tananga limau ma dara. 21 Ananga 'aḏi sidoto’o manga 'adata 'i ma’u rapu ra ngene ngowa’a Roma nanga 'atoranga. Dadi, ngene wa mete’e awa ananga manga 'adata!" 22 Ngowa’a repe 'aḏi kalaki Paulus re 'a Silas toma Roma manga pamarenta ma biono. Ḏua ananga gena-ge 'aḏi soma’a sordado-sordado ya 'acingi Paulus re 'a Silas manga juba tamanga lese re ya’u ca’olo. 23 Paulus re 'a Silas sanga ca’olo pasala i’a, kara ya’u singosama toma bui ma dara. Bui ma sae’e gena-ge 'o sanga parenta, "Paulus re 'a Silas gena-ge, balasu na’u jaga la-la ino." 24 Sababu gena-ge, unanga 'aḏi singosama Paulus re 'a Silas toma bui ma kamara toma ma dara madutu. Toma ngi’i gena-ge 'a Paulus re 'a Silas manga rou sanga lara.

25 Toma 'utu golona i’a Paulus re 'a Silas 'aḏi manyiata re 'aḏi manyanyi 'aḏi puji re silamo’o Ma Jou’ongu Madutu re ngowa-ngowa’a ma lelegu toma bui ma dara ḏi’i ya 'isene. 26 Kage-kage wusu 'i dadi siḏi masala singadolo bui ma bangini mai elala. Dadi bui ma ngalana mo-moini 'i matai welanga re 'o lara ma rate matai palasara. 27 Wakutu bui ma sae’e 'o momi’i, unanga 'o oḏi’i bui ma ngalana ri matai welanga. Ḏua unanga 'a onoso 'ai samaranga mau masisengene sababu unanga 'o ta’ajiri ngowa-ngowa’a mo-moini toma bui ma dara gena-ge raḏi wiḏi. 28 Mada’a Paulus 'o poa’a 'a siduga-duga, "No masise-sengene awa! Ngomi mo-moini 'ane-ne moju!" 29 Bui ma sae’e gena-ge 'o golo’o 'oboro re 'o lalara osama kamara ma dara gena-ge. Unanga 'o mojongo masala singadolo 'o terewete re 'o mapagara 'ai biono tala ra Paulus re 'a Silas manga biono. 30 Ḏua unanga 'o supu re ya’u gasa Paulus re 'a Silas, kara 'o kanau, "Tuanga-tuanga, ngoi balasu to 'a’a 'oru, la ngoi to sanga salamata?"

31 Paulus re 'a Silas ya sangoro, "Na’o no ngaku Ma Jou Yesus ngana no salamata, ngana re 'ani ngitu re ngale." 32 Ḏua Paulus re 'a Silas ya singadolo habari mangale Ma Jou Yesus; bae 'o bui ma sae’e re bae tai ngitu re ngale mo-moini. 33 Ma lobi’i gena-ge ḏua 'utu golona i’a, bui ma sae’e 'o gasa Paulus re 'a Silas toma ngi’i ma lelegu re ya’u soso’o manga nyaboto. Gena ḏua, unanga re 'ai ngitu re ngale, ananga 'aḏi sanga baptis. 34 Pasala i’a, unanga 'o gasa Paulus re 'a Silas tai wala re 'o pula’a oromo. Bui ma sae’e 'o maroanga masala sababu unanga rai ngitu ngale, ananga raḏi ngaku Ma Jou’ongu Madutu.

35 Ma ḇiḇini i’a, Roma manga pamarenta 'aḏi soma’a manga 'opsir 'aḏi tagi toma bui ma sae’e, ya singadolo parenta, "Sisupu Paulus re 'a Silas!"

36 Bui ma sae’e 'o siajele ra Paulus, "Tuanga-tuanga, Roma ma pamarenta 'aḏi parenta ngoi to sisupu ngini. Sababu gena-ge, ni supu re ni maḏibo reninga salamata!"

37 Mada’a Paulus 'o kanau i’a toma 'opsir gena-ge, "Ngomi ḏi’i ngowa’a Roma. I’a sa’olo ni sijuruhakimi nyangu, si-siḏa ni ca’olo ngomi toma ngowa’a repe manga biono, re Roma ma pamarenta 'aḏi singosama ngomi toma bui? Ḏua nena-ne ananga 'aḏi sisupu ngomi sigo-gogoro! Ngomi mi oḏu’u! Soma’a ananga 'aḏi sapolo ino masiretene, kara sisupu ngomi."

38 Opsir gena-ge ya singadolo Paulus 'ai go-golo’o toma Roma ma pamarenta. Wakutu Roma ma pamarenta ya waro Paulus re 'a Silas ge ngowa’a Roma ḏi’i, ananga 'aḏi mojongo sababu ya mete’e ua Roma ma hukumu. 39 Ḏua ananga 'aḏi sapolo re 'aḏi golo’o ma’afu ra Paulus re 'a Silas. Gena ḏua, ananga 'aḏi sisupu Paulus re 'a Silas toma bui gena-ge re 'aḏi golo’o ra ananga 'aḏi supu toma limau gena-ge. 40 Paulus re 'a Silas ya sisoi’i tala bui gena-ge re 'aḏi tagi ra ngo Lidia 'ami wala. I’a da’a, ananga 'aḏi ma’u sanga toma ngowa-ngowa’a ngaku Yesus re 'aḏi pula’a duga re domolo ra ananga. Gena ḏua, Paulus re 'a Silas 'aḏi sisoi’i tala limau gena-ge.