1 Aba narihin lamudeirun aban mónsturu baranahagiñe; sédüñein lichügü, diisi liganchun. Ñeinñein ridi luagu kada liganchun luma iri burí le aubei lanabaguei Bungiu luagu kada lichügü. 2 Mónsturu ligía lenege géigusi; ítara liña lugudi keisi lugudi osu, liabin liyuma kamá liyuma liñún. Aba líchuguni düragón lubafu luma lala lun, luma saragu ubafu lun lagumadihan. 3 Ñeinñein aban chaünti luagu aban lídangiñe lichügü mónsturu ligía, wéiriti lun yebe láfaruni hilagubei; gama lumoun aba lareidagun liwounun. Wéiritu hanigi sun gürigia lau mónsturu ligía. 4 Aba háhuduragun lun düragón luagu líchugun gumadi lun mónsturu, aba giñe háhuduragun lun mónsturu, aba hariñagun:

—Úati ni aban kei mónsturu le; kaba gayara láfaruni?

5 Igirúati giñe mónsturu ligía lun ladimurehan dimurei buiti luougua luma lun lanabaguni Bungiu, luma lun lagumadihan luagu bián-wein-bián hati. 6 Aba ladügün ítara; adimurehati wuribati luagu Bungiu, anabaléi liri, lani sanduariu, hama ha siélubaña. 7 Igirúati giñe lun lageindagun hama lánigu Bungiu darí lagañeiruniña, aba lichugúniwa ubafu lun hawagu sun rasa, fulasu, iñeñein luma néchani. 8 Ábame háhuduragun sun ha aganóubaña ubouagu lun mónsturu ligía, ha úabaña hiri bürüwañu lúmagiñe lubaragiñe ladügǘn ubóu tidan líburu to lánina ibagari, to lúmaboun Mudún le óunwebei.

9 Le garigeiruguti lun laganbun, aganbalá. 10 Ha lúntiña hanügǘn adaürǘwa, hanügǘba adaürǘwa, ha lúntiña háfarawagun tau eféin, háfarawaguba tau eféin. Ñeinba larihíwa haderebugu luma hafiñen lánigu Bungiu.

11 Lárigiñe, ábaya narihin ábanya mónsturu lamudeirun múarugugiñe. Ñeinñein bián ganchu luagu kamá liganchun mudún, gama lumoun ítara liña ladimurehan kamá aban düragón. 12 Ñeinñein sun lubafu furumiñeti mónsturu luma, liñúarü. Aba ladügün lun háhuduragun sun gürigia ha ubouagubaña lun furumiñeti mónsturu, le lareidaguagüdübei lídangiñe chaünti le luágubei. 13 Adügati giñe óunwenbu burí milaguru, ábürügüdati watu gemeti siélugiñe lun múarugun hagibugiñe gürigia. 14 Aba leyeeduniña ha ubouagubaña lau burí milaguru le unbei lichugúa ubafu lun lun ladügüni liñúarü furumiñeti mónsturu; aba ladügagüdün aban liyawa mónsturu le gawagubalin chaünti ani móunwenti. 15 Aba libihin habiaman mónsturu ubafu lun líchugun ibagari tun liyawa furumiñeti mónsturu lun tadimurehan luma táfaraguniña sun ha máhuduraguntiña tun. 16 Adügati giñe lun sun lan gürigia—wéinamuhaña, ñǘbürigiña, rísitiña, gudemetiña, idamuni, mama idamuni—lun lichugún aban makü luagu háhabu le hóunwenren o luagu lan herebe, 17 lun giñe ua lan ni aban gayaraati lagañeihan ni kata ni lalugurahan anhein ua lumakün mónsturu o linumerun liri luagu. 18 Busentitia katei le lichú aau; le gunfurandati, aturiahaléi linumerun mónsturu, ladüga linumerun lan wügüri; ani anihán númeru ligía: Sisi-san-ǘrüwa-wein-sisi.