1 Ábati narihin aban líburu hóuburaguñu umutu* lidan lúhabu le lóunwenren le ñunbei luagu lálana arúeihani; abürühóuatu líburu tuguya turageirugugiñe luma tigibuagugiñe, darúatu lau sedü seyu. 2 Aba narihin aban ánheli gabafuti, álügüdaha lau umalali reinti, lariñaga:

—Ka gadünabei lun ladaarunu líburu luma lun laheiriduni tiseyun?

3 Úati ni aban garichati lun ladaarunu líburu tuguya, ni íbini lun larihin tuagun, ni sielu, ni múarugu, ni lábugiñe múa. 4 Aba nayahun saragu ladüga úa lan ni aban gadünati lun ladaarunu líburu tuguya, ni lun laliihanu. 5 Ábati lariñagun aban hádangiñe wéiyaaña mutu nun:

—Hebé bayahun, ladüga gáñeihali Liñún le lídangiñebei lani Hudá türibu, le ladügawagun urúei Dawidi lun gayara lan ladaarunu líburu luma lun laheiriduni sedü tiseyun.

6 Lamidanguati lálana arúeihani hama gádürü kátaña gabagaritiña hagía hama wéiyaaña mutu hagía, aba narihin aban Mudún rara, kamá hamuga afarúaali. Sédüñein liganchun, sedü lagu; agu burí ligía, lani Bungiu sedü Sífirigu ha ounahóubaña lidoun sun ubóu. 7 Ñǘbuinti Mudún ligía, aba lanügünu líburu tuguya lúhaburugugiñe le ñunbei luagu lálana arúeihani. 8 Dan le lárügüdünbarun líburu, aba háhuduragun gádürü kátaña gabagaritiña hagía hama wein-gádürü wéiyaaña mutu hagía ligibugiñe. Ñeinñoun aban árüpa luma kada aban hádangiñe wéiyaaña mutu hagía, luma aban kopu le golu buin lau kupali, lememe hafurieidun lumutuniña Bungiu. 9 Ábati heremuhani uremu iseri le:

«Garichatibu lun banügünu líburu, lun baheiriduni tiseyun,

ladüga rúatibu keisi adagaragüdüni,

ani gañei buguya gürigia lau bita lun Bungiu,

gürigia lídangiñe sun rasa, sun iñeñein, fulasu luma néchani.

10 Adügabáña urúeigume luma fádirigume

lun heseriwidun lun Wabungiute,

luma lun hagumadihan ubouagu».

11 Ábaya narihin, aba naganbuni hamalali saragu ánheligu geyegu lau lálana arúeihani luma geyegu hau kátaña gabagaritiña hagía, hama wéiyaaña mutu hagía. Ñéinñanu míñunu míñunu ánheligu, 12 hariñaga lau umalali héreti:

«Yuuti ubafu luma irisini, lichú aau luma erei,

uéiriguni luma inebesei, luma eteingiruni lun Mudún le afarúbei».

13 Aganba numuti giñe hariñaguni sun katei le ladügübei Bungiu sielu, le múarugubei, le lábugiñebei múa, luma le baranahabei, luma sun katei le lídanbei burí:

«Rualá eteingiruni, inebesei, uéiriguni, luma ubafu

lun le ñunbei luagu lálana arúeihani, luma lun Mudún, lun sun dan».

14 Aba hariñagun gádürü kátaña gabagaritiña hagía:

—Ítarala!

Aba háhuduragun wein-gádürü wéiyaaña mutu hagía aba híchugun uéiriguni lun.