1 Lárigiñe katei le, aba naganbuni hamalali saragu gürigia, hagúarahan:

«Alelúya! Lani Wabungiute asalbaruni, uéiriguni luma ubafu.

2 Ladüga aguseragüdati lau úarani luma ísuruni;

siadi laaru óunwenbu horu to agadeirubalin ubóu lau tisalufurin;

águyugüda laali háfarawagun lánigu tuagun».

3 Ábaya hagúarahan:

«Alelúya! Magumubei lamudeirun tugumulelin».

4 Hati wein-gádürü wéiyaaña mutu, hama gádürü kátaña gabagaritiña hagía, aba hélemuchun chülǘ múarugun; huduguatiña lun Bungiu le ñunbei luagu lala, aba hariñagun:

—Ítarala! Alelúya!

5 Ábati laganbún lariñagun aban umalali yarafa luéigiñe lala Bungiu:

«Ru humá uéiriguni lun Bungiu,

sun huguya le eseriwidubalin,

ani inebelá hun,

wéiyaaña, ñǘbürigiña».

6 Aganbayatina kamá hamuga hamalali saragu gürigia, kamá lamuri saragu duna luma wayuhuru héreti, agúaraha:

«Alelúya! Gumeseeli Wabureme Bungiu le Suntigabafu arúeiha.

7 Gúndaagua wamá, buin wamá lau ugundani, ru wagíame uéiriguni lun,

ladüga chülüha lidaani lamarieidun Mudún,

aranseru ladari,

8 tau tadaüragun linu to fínutu, haruma, ani mirí tuguya».

Mini tan linu fínutu, ibagari le suruti, le habagari lánigu Bungiu.

9 Ábati lariñagun ánheli nun:

—Babürüha: «Fuleseiwatiña ha amisurahóubaña lidoun fedu le lánina lamarieidun Mudún».

Aba lariñagun nun:

—Dimurei burí inarüniti le lariñagun Bungiu le.

10 Aba náhuduragun ligibugiñe ánheli ligía, aba lariñagun nun:

—Madügabéi le; lubúein Bungiu au kei buguya hama bíbirigu ha afalarubalin luganute Hesusu; lunlá Bungiu báhuduragua.

Uganu le lanügübei Hesusu lidoun larugounga, ligía uganu le líchugubei Sífiri houn profetagu.

11 Ábati narihini sielu hunreñu, aba lasaliragun aban gabayu haruti; leti awarihabalin, Gúnfuliti luma Inarüni, ligía líribei, ladüga lau irichaü lagumadiha, lau giñe irichaü lageindagua. 12 Ámirihati lagu kamá ligemeri watu, ñeinñein saragu ridi lábulugu; ñeinñein giñe aban iri bürüwañu luagu, ani ligíarügüñein asubudirei. 13 Féindiwatu daüguaü to luáguboun lau hitaü; «Lererun Bungiu» líribei. 14 Hafalareiti súdaragu ha siélubaña tau hadaüragun linu to fínutu, harutu, haruma, wariñu hagía hawagu gabayu harutiña. 15 Ñeinñoun aban eféin hamanatu áfurihatu liyumulugugiñe lun láchuoguniña néchanigu tau, ábame lagumadiruni lau badun lánina agumadihani le lauti gürabu, aribichagualounme beibei lidan lagei lanarime ligañi Bungiu. 16 Bürüwañu liña iri le tuagu lidáü luma luagu liyada: «Harúeite sun urúeigu, Habureme sun aburemeigu».

17 Aba narihin aban ánheli rara lidan weyu, le agúaragubei lau erei houn sun dunuru ha áhamahabaña sielu, lariñaga:

—Higougu, óundaragua humá lun óunwenbu ladineragüdün Bungiu, 18 hou humaamuga hágürügü urúeigu, gumadimatiña, hama wügüriña ganigitiña, hágürügü gabayu hau sun ha awarihabaliña, hágürügü sun hawuyeri gürigia dandu ha idamuni kei ha mama idamuni, dandu ñǘbürigiña kei wéinamuhaña.

19 Ábati narihini mónsturu hama lurúeitegu ubóu hau hánigu óundaraguaaña lun hageindagun luma le wariñubei luagu gabayu haruti hama lánigu. 20 Aba ladaürǘn mónsturu úara luma profeta yeeti le buga adügübei milaguru ligibugiñe mónsturu. Lau burí milaguru ligía, eyeeda laaña meha profeta ligía ha ígiraguagüdübaña houngua lun labürüdǘn liri mónsturu hawagu, hudugua hagía tun liyawa. Dánduti mónsturu kei profeta yeeti ligía, aba hagurún wínwanñu lidoun lagunu le laubei watu gemeti luma súfuru. 21 Ha híbiri, aba háfarawagun tau eféin to áfurihaboun liyumulugugiñe le wariñubei luagu gabayu, aba hakimuledun sun dunuru lau hágürügü.