Marcos 10

ಜೆಜು ಸೊಡ್ಪತ್ತರ್ ದಿತಲ್ಯಾ ವಿಶಯಾತ್ ಸಾಂಗ್ತಲೆ

1 ಮಾನಾ ಜೆಜು ತೊ ಜಾಗೊ ಸೊಡುನ್ ಜುದೆಯಾ ಪ್ರಾತ್ಯಾಕ್ ಅನಿ ಜೊರ್ದಾನ್ ನ್ಹಯ್ಚ್ಯಾ ತಿಕುಲ್ಯಾ ದಂಡೆಕ್ ಗೆಲೊ.ಅನಿಬಿ ಸುಮಾರ್ ಲೊಕಾ ತೆಚ್ಯಾ ಫಾಟ್ನಾ ಯೆಲಿ. ಸದ್ದಿಚ್ಯಾ ಬಾಸೆನ್ ಜೆಜುನ್ ತೆಂಕಾ ಶಿಕ್ವುಲ್ಯಾನ್.

2 ಥೈ ಉಲ್ಲಿ ಫಾರಿಜೆವಾ ಯೆವ್ನ್, ಜೆಜುಚಿ ಪರಿಕ್ಷಾ ಕರುಕ್ ಮನುನ್ "ಎಕ್ ಘೊಮನ್ಸಾನ್ ಅಪ್ನಾಚ್ಯಾ ಬಾಯ್ಕೊಕ್ ಸೊಡ್ತಲ್ಯಾ ವಿಶಯಾತ್ ಅಮ್ಚೊ ಖಾಯ್ದೊ ಕಾಯ್ ಸಾಂಗ್ತಾ?" ಮನುನ್ ತೆಕಾ ಇಚಾರ್‍ಲ್ಯಾನಿ.

3 ತನ್ನಾ ಜೆಜುನ್ "ಮೊಯ್ಜೆನ್ ತುಮ್ಕಾ ಹೆಚ್ಯಾ ವಿಶಯಾತ್ ಕಾಯ್ ಮನುನ್ ಖಾಯ್ದೊ ದಿಲ್ಯಾನಾಯ್?" ಮನುನ್ ಇಚಾರ್‍ಲ್ಯಾನ್.

4 ತನ್ನಾ ಫಾರಿಜೆವಾನಿ "ಎಕ್ಲ್ಯಾನ್ ಅಪ್ನಾಚ್ಯಾ ಬಾಯ್ಕೊಕ್ ಸೊಡ್ ಪತ್ರ್ ಲಿವ್ನ್ ದಿವ್ನ್ ಸೊಡುನ್ ದಿವ್ಕ್ ಹೊತಾ ಮನುನ್ ಮೊಯ್ಜೆನ್ ಸಾಂಗ್ಲ್ಯಾನಾಯ್" ಮಟ್ಲ್ಯಾನಿ.

5 ತನ್ನಾ ಜೆಜುನ್ "ತುಮ್ಚ್ಯೆ ಮಂಡ್ಪಾನಾಕ್ ಬಗುನ್ ಮೊಯ್ಜೆನ್ ತುಮ್ಕಾ ತೊ ಖಾಯ್ದೊ ದಿಲ್ಲ್ಯಾನ್. 6 ಖರೆ, ದೆವಾನ್ ಹಿ ಸಗ್ಳಿ ದುನಿಯಾ ರಚ್ತಾನಾ ಮಾನ್ಸಾಕ್ನಿ ಘೊಮಾನುಸ್ ಅನಿ ಬಾಯ್ಕೊಮನುಸ್ ಕರುನ್ ರಚ್ಲ್ಯಾನ್." ಮನುನ್ ಪವಿತ್ರ್ ಪುಸ್ತಕ್ ಸಾಂಗ್ತಾ. 7 ಹೆಚೆ ಸಾಟ್ನಿ ಎಕ್ ಘೊಮನುಸ್ ಅಪ್ನಾಚ್ಯಾ ಬಾಯ್-ಬಾಬಾಕ್ ಸೊಡ್ತಾ ಅನಿ ಅಪ್ನಾಚ್ಯಾ ಬಾಯ್ಕೊಚ್ಯಾ ವಾಂಗ್ಡಾ ಎಕ್ ಹೊತಾ, 8 ಅನಿ ತೆನಿ ದೊಗೆಬಿ ಎಕ್ ಶರಿರ್ ಹೊತ್ಯಾತ್, ತಸೆ ಮನುನ್ ತೆನಿ ದೊಗೆ ಜಾನಾ ನ್ಹಯ್, ತೆನಿ ಎಕುಚ್, 9 "ಅಶೆ ರಾತಾನಾ ದೆವಾನ್ ಜೊಡ್ವಲ್ಲೆ ಮಾನ್ಸಾನ್ ಮೊಡುಚೆ ನ್ಹಯ್" ಮನುನ್ ಸಾಂಗ್ಲ್ಯಾನ್.

10 ಘರಾಕ್ ಗೆಲ್ಲ್ಯಾ ತನ್ನಾ ಶಿಸಾನಿ ಜೆಜುಕ್ ಹ್ಯಾ ವಿಶಯಾತ್ ಇಚಾರ್‍ಲ್ಯಾನಿ 11 ತನ್ನಾ ಜೆಜುನ್ "ಅಪ್ನಾಚ್ಯಾ ಬಾಯ್ಕೊಕ್ ಸೊಡುನ್ ದುಸ್ರ್ಯಾ ಬಾಯ್ಕೊಮನ್ಸಿಕ್ಡೆ ಲಗಿನ್ ಹೊಲ್ಲೊ ಮಾನುಸ್ ಅಪ್ನಾಚ್ಯಾ ಬಾಯ್ಕೊಚ್ಯಾ ವಿರೊದ್ ವೆಭಿಚಾರ್ ಕರ್‍ತಾ," 12 "ತಸೆಚ್ ಎಕ್ ಬಾಯ್ಕೊಮನುಸ್ ಘೊವಾಕ್ ಸೊಡುನ್ ದುಸ್ರ್ಯಾ ಮಾನ್ಸಾಕ್ಡೆ ಲಗಿನ್ ಹೊಲ್ಯಾರ್, ತಿ ಬಿ ವೆಭಿಚಾರ್ ಕರ್‍ತಾ" ಮನುನ್ ಮಟ್ಲ್ಯಾನ್.

ಜೆಜು ಬಾರಿಕ್ ಪೊರಾಕ್ನಿ ಆಶಿರ್ವಾದ್ ದಿತಲೆ

13 ಥೊಡ್ಯಾನಿ ಜೆಜು ಅಪ್ನಾಚ್ಯಾ ಪೊರಾಂಚ್ಯಾ ವರ್‍ತಿ ಹಾತ್ ಥವ್ಕ್ ಮನುನ್ ತೆಂಚ್ಯಾ ಪೊರಾಕ್ನಿ ಜೆಜುಕ್ಡೆ ಘೆವ್ನ್ ಯೆಲ್ಯಾನಿ, ಖರೆ ಶಿಸಾನಿ ತೆಂಕಾ ಅಡ್ವುಲ್ಯಾನಿ. 14 ಹೆ ಬಗುನ್ ಜೆಜು ಅಪ್ನಾಚ್ಯಾ ಶಿಸಾಂಚ್ಯಾ ವರ್‍ತಿ ರಾಗ್ ಹೊಲೊ ಅನಿ "ಪೊರಾಕ್ನಿ ಮಾಜೆಕ್ಡೆ ಯೆವ್ಕ್ ಸೊಡಾ, ತೆಂಕಾ ಅಡ್ವುನಕಾಶಿ, ಕಶ್ಯಾಕ್ ಮಟ್ಲ್ಯಾರ್ ದೆವಾಚೆ ರಾಜ್ ಅಸ್ಲ್ಯಾಂಚೆಚ್," 15 ಖರೆಚ್ ಮಿಯಾ ತುಮ್ಕಾ ಸಾಂಗ್ತಾ "ಎಕ್ ಪೊರಾಂಚ್ಯಾ ಬಾಸೆನ್, ಬರ್‍ಯಾ ಮನಾನ್ ಜೆ ಕೊನ್ ದೆವಾಚೆ ರಾಜ್ ಸ್ವಿಕಾರ್ ಕರಿನಾ, ತೊ ಕನ್ನಾಚ್ ದೆವಾಚ್ಯಾ ರಾಜಾತ್ ಜಾವ್ನ್ ಪಾವುಕ್ ಹೊಯ್ನಾ" ಮನುನ್ ಸಾಂಗ್ಲ್ಯಾನ್. 16 ಮಾನಾ ಜೆಜುನ್ ಪೊರಾಕ್ನಿ ಅಪ್ನಾಚ್ಯಾ ಹಾತಿನಿ ಯಾಂಗ್ ಮಾರುನ್ ಧರುನ್ ಅಪ್ಲೊ ಹಾತ್ ತೆಂಚ್ಯಾ ಟಕ್ಲ್ಯಾ ವರ್‍ತಿ ಥವ್ನ್ ತೆಂಕಾ ಆಶಿರ್ವಾದ್ ದಿಲ್ಯಾನ್.

ಎಕ್ ಸಾವ್ಕಾರ್ ಮಾನುಸ್

17 ಜೆಜು ಥೈತ್ನಾ ಜಾವ್ಕ್ ಮನುನ್ ತಯಾರ್ ಹೊವ್ಕ್ ಲಾಗಲ್ಲೊ, ತನ್ನಾ ಎಕ್ ಮಾನುಸ್ ಪಳುನ್ ಯೆವ್ನ್ ಜೆಜುಚ್ಯಾ ಇದ್ರಾಕ್ ಡೊಗ್ಲಾ ಟೆಕುನ್ "ಬರ್‍ಯಾ ಗುರುಜಿ, ನಿರಂತರ್ ಜಿವನ್ ಮಾಕಾ ಗಾವುಚೆ ತರ್, ಮಿಯಾ ಕಾಯ್ ಕರುಚೆ?" ಮನುನ್ ಇಚಾರ್‍ಲ್ಯಾನ್.

18 ಜೆಜುನ್ ತೆಕಾ "ಮಾಕಾ ಬರೊ ಮನುನ್ ಕಶ್ಯಾಕ್ ಬಲ್ವುತೆ, ದೆವಾಕ್ ಸೊಡುನ್ ಕೊನ್ಬಿ ಬರೊ ನ್ಹಯ್. 19 ತುಕಾ ಖಾಯ್ದೆ ಗೊತ್ತ್ ಹಾತ್; ಜಿವಾನಿ ಮಾರುನಕೊ, ವೆಭಿಚಾರ್ ಕರುನಕೊ, ಚೊರುನಕೊ, ಅನಿ ಎಕ್ಲ್ಯಾವರ್ತಿ ಝುಟೆ ಅಪ್ವಾದ್ ಘಾಲುನಕೊ, ಮೊಸ್ ಕರುನಕೊ, ಅನಿ ತುಜ್ಯಾ ಬಾಯ್-ಬಾಬಾಕ್ ಮಾನ್‍ ದಿ."

20 ತನ್ನಾ ತ್ಯಾ ಮಾನ್ಸಾನ್ "ಗುರುಜಿ, ಮಿಯಾ ಬಾರಿಕ್ ಅಸ್ತಾನಾಚ್ಯಾನ್ ಹೆ ಸಗ್ಳೆ ಖಾಯ್ದೆ ಪಾಳುನ್ಗೆತ್ ಹಾಂವ್," ಮಟ್ಲ್ಯಾನ್.

21 ಜೆಜುನ್ ಪ್ರೆಮಾನ್ ತ್ಯಾ ಮಾನ್ಸಾಕ್ ಬಗಟ್ಲ್ಯಾನ್ ಅನಿ "ತಿಯಾ ಎಕ್ ಕರ್‍ತಲೆ ಹಾಯ್, ಜಾ ಅನಿ ತುಜೆಕ್ಡೆ ಹೊತ್ತೆ ಸಗ್ಳೆ ಇಕ್, ಅನಿ ಯೆಲ್ಲೆ ಪೈಸೆ ಗರಿಬಾಕ್ನಿ ದಿ, ಅನಿ ಸರ್‍ಗಾತ್ ತುಕಾ ಖರಿ ಸಾವ್ಕಾರ್ಕಿ ರ್‍ಹಾತಾ, ಮಾನಾ ಯೆ ಅನಿ ಮಾಜ್ಯಾ ಫಾಟ್ನಾ ಯೆ," ಮನುನ್ ಸಾಂಗ್ಲ್ಯಾನ್. 22 ಹೆ ಆಯ್ಕುನ್ ತೆಚೆ ತೊಂಡ್ ಬಾಡ್ಲೆ, ಅನಿ ತೊ ಬೆಜಾರಾನ್ ಥೈತ್ನಾ ಗೆಲೊ. ಕಶ್ಯಾಕ್ ಮಟ್ಲ್ಯಾರ್ ತೊ ಲೈ ಸಾವ್ಕಾರ್ ಹೊತ್ತೊ.

23 ಮಾನಾ ಜೆಜುನ್ ಭೊತ್ಯಾನಿ ಬಗುನ್ ಶಿಸಾಕ್ನಿ "ಎಕ್ ಸಾವ್ಕಾರಾಕ್ ದೆವಾಚ್ಯಾ ರಾಜ್ಜ್ಯಾತ್ ಪ್ರವೆಸ್ ಕರ್‍ತಲೆ ಕವ್ಡೆ ಕಸ್ಟ್ ಹಾಯ್" ಮಟ್ಲ್ಯಾನ್.

24 ಜೆಜುನ್ ಅಶೆ ಮಟಲ್ಲೆ ಆಯ್ಕುನ್ ಶಿಸಾ ಅಜಾಪ್ ಹೊಲಿ. ಅನಿಬಿ ಜೆಜುನ್ "ಮಾಜ್ಯಾ ಪೊರಾನೊ, ದೆವಾಚ್ಯಾ ರಾಜಾತ್ ಜಾತಲೆ ಮಟ್ಲ್ಯಾರ್ ಕವ್ಡೊ ಕಸ್ಟ್! 25 ಎಕ್ ಒಂಟೆ ಸುಯಿಚ್ಯಾ ಡೊಳ್ಯಾತ್ನಾ ಅರಾಮ್ ಪಾರ್ ಹೊಯ್ಲ್, ಖರೆ ಎಕ್ ಸಾವ್ಕಾರ್ ಮಾನ್ಸಾಕ್ ದೆವಾಚ್ಯಾ ರಾಜಾತ್ ಗುಸುಚೆ ಮಟ್ಲ್ಯಾರ್ ತವ್ಡೆ ಸಸಾರ್ ನಾ" ಮಟ್ಲ್ಯಾನ್.

26 ಶಿಸಾ ಅನಿ ಉಲ್ಲಿ ಅಜಾಪ್ ಹೊಲಿ ಅನಿ "ತಸೆ ಹೊಲ್ಯಾರ್, ಕೊನ್ ರಕ್ಷನ್ ಹೊತಾ?" ಮನುನ್ ಬೊಲುನ್ಗೆಟ್ಲ್ಯಾನಿ.

27 ತನ್ನಾ ಜೆಜುನ್ ತೆಂಕಾ ಬಗುನ್ "ಮಾನ್ಸಾಕ್ ಹೆ ಸಾದ್ಯ್ ನಾ ಹೊಯ್, ಖರೆ ದೆವಾಕ್ ಅಸಾದ್ಯ ಮನ್ತಲೆ ಕಾಯ್‍ ಬಿ ನಾ" ದೆವಾಕ್ ಸಗ್ಳೆಬಿ ಸಾದ್ಯ್,

28 ತನ್ನಾ ಪೆದ್ರುನ್ "ಅಮಿ ಜಾಲ್ಯಾರ್ ಅಮ್ಚೆ ಸಗ್ಳೆ ಸೊಡುನ್ ತುಜ್ಯಾ ಫಾಟ್ನಾ ಹಾಂವ್" ಮಟ್ಲ್ಯಾನ್. 29 ತನ್ನಾ ಜೆಜುನ್ "ಹೊಯ್, ಮಿಯಾ ತುಮ್ಕಾ ಸಾಂಗ್ತಾ, ಮಾಜೆ ಸಾಟ್ನಿ ಅನಿ ದೆವಾಚ್ಯಾ ಬರ್ಯಾ ಖಬ್ರೆ ಸಾಟ್ನಿ, ಅಪ್ನಾಚೆ ಘರ್ ಹೊಂವ್ದಿ, ಭಾವಾಕ್ನಿ-ಭೆನಿಯಾಕ್ನಿ ಹೊಂವ್ದಿ, ಬಾಯ್ಕ್-ಬಾಬಾಕ್ ಹೊಂವ್ದಿ, ಪೊರಾಕ್ನಿ ಹೊಂವ್ದಿ, ಶೆತ್ ಹೊಂವ್ದಿ, ಜೊ ಮಾನುಸ್ ಸೊಡುನ್ ಯೆತಾ, 30 ತೆಕಾ ಶೆಂಬರ್ ವಾಟ್ಯಾನಿ ಗಾವ್ತಾ, ತವ್ಡೆಚ್ ನ್ಹಯ್ ಹ್ಯಾ ದುನಿಯಾತ್ ಪಾಜೆ ತವ್ಡಿ ಘರಾ, ಭಾವಾ, ಭೆನಿಯಾ, ಅವ್ಸಿಯಾ, ಪೊರಾ ಅನಿ ಶೆತ್ ಗಾಂವ್ತಾ ಅನಿ ಹೆಂಚ್ಯಾ ವಾಂಗ್ಡಾ ತ್ಯಾ ಮಾನ್ಸಾಕ್ ತರಾಸ್ಬಿ ಹಾಯ್. ಅನಿ ಹೆ ಸೊಡ್ಲ್ಯಾರ್ ಫಿಡೆ ಯೆತಲ್ಯಾ ಕಾಲಾತ್ ನಿರಂತರ್ ಜಿವನ್ಬಿ ತೆಕಾ ಗಾವ್ತಾ. 31 ಅತ್ತಾ ಜೆ ಕೊನ್ ಲೈ ಖಾಯ್ಲ್ಯಾ ಜಾಗ್ಯಾರ್ ಹಾತ್ ತೆನಿ ಎಗ್ದಮ್ ವೈರ್ ಹೊತ್ಯಾತ್, ಅನಿ ಅತ್ತಾ ಕೊನ್ ವೈಲ್ಯಾ ಜಾಗ್ಯಾರ್ ಹಾತ್ ತೆನಿ ಖಾಲ್ತಿ ಹೊತ್ಯಾತ್." ಮನುನ್ ಸಾಂಗಟ್ಲ್ಯಾನ್.

ಜೆಜು ತಿನ್ವೆ ಪಟಿ ಅಪ್ನಾಚ್ಯಾ ಮರನಾಚ್ಯಾ ವಿಶಯಾತ್ ಬೊಲ್ತಾ

32 ಜೆಜು ಅನಿ ತೆಚ್ಯಾ ವಾಂಗ್ಡಾ ಹೊತ್ತಿ ಲೊಕಾ ಜೆರುಜಲೆಮಾಚ್ಯಾ ವಾಟೆನ್ ಜಾವ್ನಗೆತ್ ರಾತಾನಾ, ಜೆಜು ಶಿಸಾಂಚ್ಯಾ ಫಿಡೆ-ಫಿಡೆ ಜಾವ್ನಗೆತ್ ಹೊತ್ತೊ, ಶಿಸಾ ಭಿಂಯಾವಲ್ಲ್ಯಾ ಸರ್ಕಿ ಹೊಲ್ಲಿ, ಅನಿ ತೆಂಚ್ಯಾ ವಾಂಗ್ಡಾ ಹೊತ್ತಿ ಲೊಕಾ ಭಿಂಯಾವಲ್ಲಿ. ಅನಿ ಎಗ್ದಾ ಜೆಜು ಬಾರಾ ಜಾನಾ ಶಿಸಾಕ್ನಿ ಕಡೆಕ್ ಬಲ್ವುನ್ ಘೆವ್ನ್ 33 "ಆಯ್ಕಾ, ಅಮಿ ಅತ್ತಾ ಜೆರುಜಲೆಮಾಕ್ ಜಾವ್ಕ್ ಲಾಗ್ಲಾಂವ್, ಥೈ ಮಾನ್ಸಾಚ್ಯಾ ಲೆಕಾಕ್ ಮಹಾಯಾಜಕಾಂಚ್ಯಾ ಅನಿ ಶಾಸ್ತರಾ ಸಾಂಗ್ತಲ್ಯಾಂಚ್ಯಾ ಹಾತಿತ್ ಧರುನ್ ದಿತ್ಯಾತ್. ಮಾನಾ ತೆಚೆ ವರ್‍ತಿ ಅಪ್ವಾದ್ ಘಾಲುನ್ ತೆಕಾ ಮರ್‍ನಾಚಿ ಶಿಕ್ಷಾ ದಿವ್ನ್ ಜುದೆವ್ ನ್ಹಯ್ ಹೊತ್ತ್ಯಾ ಲೊಕಾಂಚ್ಯಾ ಹಾತಾತ್ ದಿತ್ಯಾತ್, 34 ತಿ ಲೊಕಾ, ತೆಕಾ ಎಡ್ಸಡ್ತ್ಯಾತ್, ತೆಕಾ ಥುಕ್ತ್ಯಾತ್, ತೆಕಾ ಬಾರ್‍ಕೊಲಾನಿ ಮಾರ್‍ತ್ಯಾತ್. ಅನಿ ತೆಕಾ ಜಿವಾನಿಚ್ ಮಾರ್‍ತ್ಯಾತ್. ಖರೆ ತಿನ್ವ್ಯಾ ದಿಸಿ ತೊ ಝಿತ್ತೊ ಹೊವ್ನ್ ಉಟುನ್ ಯೆತಾ" ಮನುನ್ ಸಾಂಗ್ಲ್ಯಾನ್.

ಜಾಕೊಬಾಚಿ ಅನಿ ಜುಂವಾವಾಚಿ ವಿನಂತಿ

35 ಜೆಬೆದೆವಾಚಿ ಪೊರಾ ಜಾಕೊಬ್ ಅನಿ ಜುವಾಂವ್ ಜೆಜುಕ್ಡೆ ಯೆವ್ನ್ "ಗುರುಜಿ, ಅಮ್ಚಿ ಎಕ್ ವಿನಂತಿ ಹಾಯ್ ತಿ ತಿಯಾ ಕರುನ್ ದಿವ್ಚೆ," ಮಟ್ಲ್ಯಾನಿ.

36 ತನ್ನಾ ಜೆಜುನ್ "ಕಾಯ್ ತೆ?" ಮನುನ್ ಇಚಾರ್‍ಲ್ಯಾನ್.

37 ತನ್ನಾ ತೆನಿ "ತಿಯಾ ವೈಭವಾನ್ ತುಜ್ಯಾ ರಾಜ್ಜ್ಯಾತ್ ಸಿವಾಸನಾರ್ ಬಸ್ತಾನಾ, ಅಮ್ಕಾ ದೊಗ್ಯಾಕ್ನಿ ಎಕ್ಲ್ಯಾಕ್ ತುಜ್ಯಾ ಉಜ್ವ್ಯಾ ಬಾಜುಕ್ ಅನಿ ಅನ್ಯೆಕ್ಲ್ಯಾಕ್ ಡಾವ್ಯಾ ಬಾಜುಕ್ ಬಸುಕ್ ಅವ್ಕಾಸ್ ಕರುನ್ ದಿ*10:37 ತೆನಿ ದೆವಾಚ್ಯಾ ರಾಜಾತ್ ಲೈ ಪ್ರಮುಕ್ ಜಾಗೆ ಇಚಾರುಲ್ಯಾತ್" ಮನುನ್ ಇಚಾರ್‍ಲ್ಯಾನಿ.

38 ತನ್ನಾ ಜೆಜುನ್ ತುಮಿ ಕಾಯ್ ಇಚರುಲ್ಯಾಸಿ ಮನುನ್ ತುಮ್ಕಾ ಗೊತ್ತ್ ನಾ, ಮಿಯಾ ಫಿತಲೆ ಹಾಯ್ ತ್ಯಾ ಸಂಕಟಾಚ್ಯಾ ಆಯ್ದಾನಾತ್ಲೆ ತುಮ್ಚ್ಯಾನ್ ಫಿವ್ಕ್ ಹೊತಾ ಕಾಯ್? ಮಿಯಾ ಘೆತಲೆ ಹಾಯ್ ತೆ ಬಾಲ್ತಿಮ್ ತುಮ್ಚ್ಯಾನ್ ಘೆವ್ಕ್ ಹೊತಾ ಕಾಯ್?" ಮನುನ್ ಇಚಾರ್‍ಲ್ಯಾನ್.*10:38 ಜೆಜುನ್ "ತೊ ಸೊಸ್ತಲೊ ಹಾಯ್ ತೊ ಕಸ್ಟ್ ತೆನಿಬಿ ಸೊಸುಕ್ ತಯಾರ್ ಹಾತ್ ಕಾಯ್" ಮನುನ್ ಇಚಾರ್‍ಲ್ಯಾನ್

39 ತೆನಿ "ಹೊಯ್ ಹೆ ಅಮಿ ಕರುಕ್ ಹೊತಾ" ಮನುನ್ ಜಬಾಬ್ ದಿಲ್ಯಾನಿ. ತನ್ನಾ ಜೆಜುನ್ ತೆಂಕಾ "ಮಿಯಾ ಫಿತಲ್ಯಾ ಆಯ್ದಾನಾತ್ಲೆ ತುಮಿ ಫಿತ್ಯಾಶಿ ಅನಿ ಮಿಯಾ ಘೆತಲೆ ಬಾಲ್ತಿಮ್ ತುಮಿ ಘೆತ್ಯಾಶಿ ತೆ ಖರೆ ಹಾಯ್. 40 ಖರೆ ಮಾಜ್ಯಾ ಉಜ್ವ್ಯಾಕ್ ಅನಿ ಮಾಜ್ಯಾ ಡಾವ್ಯಾಕ್ ಕೊನ್-ಕೊನ್ ಬಸ್ತಲೆ ಮನುನ್ ನಿರ್‍ದಾರ್ ಘೆತಲೊ ಅದಿಕಾರ್ ಮಾಕಾ ನಾ, ಜೆ ಕೊನಾಕ್ ತೆ ಜಾಗೆ ತಯಾರ್ ಕರುನ್ ಥವಲ್ಲೆ ಹಾತ್, ತೆಂಕಾ ತೆ ಜಾಗೆ ರಾಕುನ್ ಥವಲ್ಲೆ ಹಾತ್, ತೆ ದೆವುಚ್ ತೆಂಕಾ ದಿತಾ" ಮಟ್ಲ್ಯಾನ್.

41 ಹುರಲ್ಲಿ ಧಾ ಶಿಸಾ ಹೆ ಆಯ್ಕುನ್ ಜುವಾಂವ್ ಅನಿ ಜಾಕೊಬಾಚ್ಯಾ ವರ್‍ತಿ ರಾಗ್ ಹೊಲಿ. 42 ಮಾನಾ ಜೆಜುನ್ ಸಗ್ಳ್ಯಾ ಶಿಸಾಕ್ನಿ ಜಗ್ಗೊಳ್ ಬಲ್ವುನ್ "ಜುದೆವ್ ನ್ಹಯ್ ಹೊತ್ತ್ಯಾ ಅದಿಕಾರ್‍ಯಾಂಚ್ಯಾ ವಿಶಯಾತ್ ತುಮ್ಕಾ ಗೊತ್ತ್ ಹಾಯ್, ತೆ ಅದಿಕಾರಿ ಅಪ್ನಾಕ್ ಹೊತ್ತೊ ಅದಿಕಾರ್ ಲೊಕಾಕ್ನಿ ದಾಕ್ವುಕ್ ಲೈ ಕುಶಿ ಹೊತ್ಯಾತ್.ಅನಿ ತೆಂಕಾ ತೆಂಚ್ಯಾ ವರ್‍ತಿ ಸಗ್ಳೊ ಅದಿಕಾರ್ ದಿಲ್ಲೊ ಹಾಯ್, 43 ತೆ ರಾಂವ್ದಿತ್, ಖರೆ ತುಮ್ಚ್ಯೆ ಮದ್ದಿ ತಸೆ ರ್‍ಹಾವ್ಚೆ ನ್ಹಯ್, ತುಮ್ಚ್ಯೆ ಮದ್ದಿ ಕೊನ್ ಮೊಟೊ ಹೊವ್ಚೆ ಮನುನ್ ಯವಜ್ತಾ ತೊ ಸಗ್ಳ್ಯಾಂಚೊ ಸೆವಕ್ ಹೊವ್ಚೆ. 44 ತುಮ್ಚ್ಯಾ ಮದ್ದಿ ಕೊನ್ ಮೊಟೊ ಹೊವ್ಚೆ ಮನುನ್ ಯವಜ್ತಾ, ತೊ ಸಗ್ಳ್ಯಾಂಚೊ ಗುಲಾಮ್ ಹೊವ್ನ್ ರಾವ್ಚೆ. 45 ತಸೆಚ್ ಮಾನ್ಸಾಚೊ ಲೆಕ್ ಲೊಕಾನಿಕ್ನಾ ಸೆವಾ ಕರುನ್ ಘೆವ್ಕ್ ಯೆವ್ಕ್ ನಾ, ಸೆವಾ ಕರುಕ್ ಅನಿ ಅಪ್ನಾಚೊ ಜಿವ್ ದಿವ್ನ್ ಸುಮಾರ್ ಜನಾಕ್ನಿ ಸುಟ್ಕಾ ಕರುಕ್ ಮನುನ್ ಯೆಲಾ".

ಜೆಜು ಬಾರ್ತಿಮೆವ್ ಮನ್ತಲ್ಯಾ ಕುಡ್ಡ್ಯಾಕ್ ಬರೆ ಕರಲ್ಲೆ

46 ತೆನಿ ಜೆರಿಕೊ ಮನ್ತಲ್ಯಾ ಗಾವಾಕ್ ಯೆಲ್ಯಾನಿ. ಜೆಜು ಅಪ್ನಾಚ್ಯಾ ಶಿಸಾಂಚ್ಯಾ ವಾಂಗ್ಡಾ ಜಾವ್ಕ್ ಲಾಗಲ್ಲಿ ತನ್ನಾ ಲೊಕಾಂಚೊ ಮೊಟೊ ತಾಂಡೊ ತೆಂಚ್ಯಾ ಫಾಟ್ನಾ ಹೊತ್ತೊ, ತಿಮೆವಾಚೊ ಲೆಕ್ ಬಾರ್ತಿಮೆವ್ ಮನ್ತಲ್ಯಾ ನಾವಾಚೊ ಎಕ್ ಕುಡ್ಡೊ ಭಿಕಾರಿ ತ್ಯಾ ರಸ್ತ್ಯಾಚ್ಯಾ ದಂಡೆಕ್ ಬಸಲ್ಲೊ.

47 ನಜರೆತಾಚೊ ಜೆಜು ಥೈತ್ನಾ ಜಾವ್ಕ್ ಲಾಗ್ಲಾ ಮನುನ್ ಆಯ್ಕುನ್, "ಜೆಜು! ದಾವಿದಾಚ್ಯಾ ಲೆಕಾ! ಮಾಜಿ ದಯಾ ಕರ್!" ಮನುನ್ ಜೊರಾನ್ ಬೊಬ್ ಮಾರುಕ್ ಲಾಗ್ಲೊ.

48 ತನ್ನಾ ಲೊಕಾ ತೆಕಾ "ಗಪ್ ರ್‍ಹಾ" ಮನುನ್ ಜೊರ್ ಕರುಕ್ ಲಾಗ್ಲ್ಯಾರ್ಬಿ ತೊ "ದಾವಿದಾಚ್ಯಾ ಲೆಕಾ ಮಾಜಿ ದಯಾ ಕರ್!" ಮನುನ್ ಅನಿಬಿ ಜೊರಾನ್ ಬೊಬ್ ಮಾರುಕ್ ಲಾಗ್ಲೊ.

49 ಜೆಜು ಇಬೆ ರ್‍ಹಾಲೊ ಅನಿ "ತೆಕಾ ಹಿತ್ತೆ ಬಲ್ವಾ" ಮಟ್ಲ್ಯಾನ್. ತೆಚೆ ಸಾಟ್ನಿ ತೆನಿ ತ್ಯಾ ಮಾನ್ಸಾಕ್ "ಕುಶಿ ಹೊ" "ಉಟ್, ತೊ ತುಕಾ ಬಲ್ವುಲಾ" ಮಟ್ಲ್ಯಾನಿ.

50 ತೊ ಅಪ್ನಾಚೆ ಕಾಮ್ರಾನ್ ಟಾಕುನ್, ಹುಡಿಯಾ ಮಾರುನ್ಗೆತ್ ಜೆಜುಕ್ಡೆ ಗೆಲೊ.

51 ಜೆಜುನ್ ತೆಕಾ "ಮಿಯಾ ತುಕಾ ಕಾಯ್ ಕರುಚೆ?" ಮನುನ್ ಇಚಾರ್‍ಲ್ಯಾನ್. ತನ್ನಾ ತ್ಯಾ ಕುಡ್ಡ್ಯಾನ್ "ಗುರುಜಿ, ಮಿಯಾ ಅನಿ ಬಗುಕ್ ಪಾಜೆ" ಮಟ್ಲ್ಯಾನ್.

52 ತನ್ನಾ ಜೆಜುನ್ ತೆಕಾ "ತುಜ್ಯಾ ವಿಶ್ವಾಸಾನುಚ್ ತುಕಾ ಬರೆ ಕರ್‍ಲ್ಯಾನ್, ಜಾ" ಮಟ್ಲ್ಯಾನ್, ತನ್ನಾಚ್ ತೆಚಿ ದಿಸ್ಟ್ ಯೆಲಿ ಅನಿ ತೊ ತ್ಯಾ ರಸ್ತ್ಯಾನಿ ಜೆಜುಚ್ಯಾ ಫಾಟ್ನಾ ಗೆಲೊ.