1 ತೊ ಜಾಗೊ ಸೊಡುನ್ ಜೆಜು ಅಪ್ನಾಚ್ಯಾ ಶಿಸಾಕ್ನಿ ಘೆವ್ನ್ ಅಪ್ನಾಚ್ಯಾ ಸ್ವಂತ್ ಗಾವಾಕ್ ಗೆಲೊ. 2 ಸಬ್ಬತಾಚ್ಯಾ ದಿಸಿ ಸಿನಾಗೊಗಾತ್ ಜೆಜು ಸಿಕ್ವುಕ್ಲಾಗ್ಲೊ. ಥೈ, ಲೈ ಲೊಕಾ ಹೊತ್ತಿ. ಲೊಕಾ ತೆಚಾ ಗೊಸ್ಟಿಯಾ ಆಯ್ಕುನ್ ಅಜಾಪ್ ಹೊಲಿ, ಅನಿ ತೆನಿ "ಹ್ಯಾ ಗೊಸ್ಟಿಯಾ ಹೆಕಾ ಖೈತ್ನಾ ಗಾವ್ಲ್ಯಾ? ಹೆಕಾ ಕಸ್ಲೆ ಜ್ಞಾನ್ ದಿಲ್ಲೆ ಹಾಯ್? ಅನಿ ಹ್ಯೊ ಅಜಾಪಾ ಕಸೆ ಕರುನ್ ಕರ್‍ತಾ?" ಮನುನ್ ಇಚಾರ್‍ಲ್ಯಾನಿ. 3 "ಮರಿಚೊ ಲೆಕ್ ಬಡಗಿ ನ್ಹಯ್ ಕಾಯ್ ಹ್ಯೊ? ಹೆಚೆ ಭಾವ್ ಜಾಕೊಬ್, ಜುಜೆ, ಜುದಾಸ್ ಅನಿ ಸಿಮಾವ್. ಹೆಚ್ಯಾ ಭೆನಿಯಾ ಹಿತ್ತೆಚ್ ರಾಯ್ನಾತ್ ಕಾಯ್?" ಅಶೆ ಮನುನ್ ತೆನಿ ಜೆಜುಕ್ ಅವ್ಮಾನ್ ಕರ್‍ಲ್ಯಾನಿ.

4 ಜೆಜುನ್ ತೆಂಕಾ "ದೆವಾಚ್ಯಾ ಗೊಸ್ಟಿಯಾ ಸಾಂಗ್ತಲ್ಯಾಕ್, ಅಪ್ನಾಚ್ಯಾ ಸ್ವತಾಚ್ಯಾ ಗಾಂವಾತ್, ಅಪ್ನಾಚ್ಯಾ ಲೊಕಾತ್ನಿ ಅನಿ ತೆಚಾ ಪಾವ್ನ್ಯಾ-ಸೊಯ್ರ್ಯಾತ್ನಿ ಸೊಡುನ್ ದುಸ್ರ್ಯಾಕ್ಡೆ ಲೈ ಮಾನ್ ಗಾವ್ತಾ" ಮಟ್ಲ್ಯಾನ್.

5 ಎಕ್ ಉಲ್ಲ್ಯಾ ಶಿಕ್ ಹೊತ್ತ್ಯಾ ಲೊಕಾಂಚ್ಯಾ ವರ್‍ತಿ ಹಾತ್ ಥವ್ನ್ ತೆಂಚಿ ದುಖ್ನಿ ಬರೆ ಕರಲ್ಲೆ ಸೊಡುನ್ ಜಾಸ್ತಿಚಿ ಅಜಾಪಾ ಜೆಜುಕ್ ತ್ಯಾ ಗಾಂವಾತ್ ಕರುಕ್ ಹೊವ್ಕ್ ನಾ, ಕಶ್ಯಾಕ್ ಮಟ್ಲ್ಯಾರ್ ತ್ಯಾ ಲೊಕಾಕ್ನಿ ವಿಶ್ವಾಸ್ ನತ್ತೊ, 6 ತ್ಯಾ ಲೊಕಾಕ್ನಿ ವಿಶ್ವಾಸ್ ನಸಲ್ಲೆ ಬಗುನ್ ಜೆಜು ಅಜಾಪ್ ಹೊಲೊ.

ತನ್ನಾ ಜೆಜು ಅಜು-ಬಾಜುಚ್ಯಾ ಗಾಂವಾತ್ನಿ ಗೆಲೊ ಅನಿ ಸಿಕ್ವುಕ್ಲಾಗ್ಲೊ. 7 ಜೆಜುನ್ ಎಕ್ ದಿಸ್ ಬಾರಾ ಜಾನಾ ಶಿಸಾಕ್ನಿ ಎಕಾಕ್ಡೆ ಬಲ್ವುಲ್ಯಾನ್ ಅನಿ ದೊಗ್ಯಾ-ದೊಗ್ಯಾಕ್ನಿ ವಾಂಗಡ್ ಕರುನ್ ಧಾಡ್ಲ್ಯಾನ್ ಅನಿ ತೆಂಕಾ ಗಿರ್‍ಯಾಂಚ್ಯಾ ವರ್‍ತಿ ಅದಿಕಾರ್ ದಿಲ್ಯಾನ್. 8 ಅನಿ ತೆನಿ ತೆಂಕಾ " ತುಮಿ ಜಾತಾನಾ ವಾಟೆಕ್ ತುಮ್ಚ್ಯಾ ಹಾತಾತ್ಲೆ ದಾಂಡೆ ಸೊಡುನ್ ಕಾಯ್ಬಿ ಘೆವ್‍ನಕಾಶಿ. ಭಾಕ್ರಿ ಹೊಂವ್ದಿ,ಪಿಸ್ವಿ ಹೊಂವ್ದಿ ,ತುಮ್ಚ್ಯಾ ಕಿಶ್ಯಾತ್ನಿ ಪೈಸೆ ಸೈತ್ ಘೆವ್‍ನಕಾಶಿ".

9 ಪಾಂಯಾತ್ನಿ ವ್ಹಾನಾ ಘಾಲುನ್ ಘೆವಾ ಖರೆ ಆಂಗಾ ವಯ್ಲೆ ಸೊಡುನ್,ಅನಿ ಕಪ್ಡೆ ಸೈತ್ ಘೆವ್‍ನಕಾಶಿ. 10 ಅನಿ ತೆನಿ ತೆಂಕಾ "ಖಲ್ಯಾ ಘರಾತ್ ತುಮ್ಕಾ ಸ್ವಾಗತ್ ಕರ್‍ತ್ಯಾತ್, ತೆ ಗಾಂವ್ ಸೊಡುನ್ ಜಯ್ ಸಗೊಳ್ ತುಮಿ ತ್ಯಾಚ್ ಘರಾತ್ ರ್‍ಹಾವಾ. 11 ಅನಿ ಖಲ್ಯಾಬಿ ಗಾವಾತ್ಲ್ಯಾ ಲೊಕಾನಿ ತುಮ್ಕಾ ಸ್ವಾಗತ್ ಕರಿನಸ್ತಾನಾ,ತುಮಿ ಸಾಂಗಲ್ಲೆ ಆಯ್ಕುನಸ್ಲ್ಯಾರ್, ತುಮ್ಚ್ಯಾ ತಳ್‍ಪಾಂಯಾಂಚಿ ಧುಳ್ ಫಾಪ್ಡಾ*6:11 ಪಾಯಾಂಚಿ ಧುಳ್ ಫಾಪಡ್ತಲೆ ಮಟ್ಲ್ಯಾರ್ "ಹ್ಯಾ ಲೊಕಾಕ್ನಿ ಅಮಿ ತಿರಸ್ಕಾರ್ ಕರ್ತಾವ್ ಮನುನ್ ಅರ್ತ್‍, ಅನಿ ತೆ ಗಾಂವ್ ಸೊಡುನ್ ಜಾಂವಾ, ಹೆ ತೆಂಕಾ ಎಕ್ ಉಶಾರ್ಕಿ ಹೊಂವ್ದಿ" ಮನುನ್ ಸಾಂಗ್ಲ್ಯಾನ್.

12 ಹೆಚೆ ಸಾಟ್ನಿ ತೆನಿ ಭಾಯ್ರ್ ಗಾಂವಾತ್ನಿ ಗೆಲ್ಯಾನಿ ಅನಿ ತೆನಿ ಲೊಕಾಕ್ನಿ ತುಮಿ ಪಾಪ್ ಕರ್‍ತಲೆ ಸೊಡಾ ಮನುನ್ ಸಾಂಗುಕ್ಲಾಗ್ಲ್ಯಾನಿ. 13 ತೆನಿ ಸುಮಾರ್ ಲೊಕಾಂಚಿ ಗಿರೆ ಕಾಡ್ಲ್ಯಾನಿ ಅನಿ ಆರಾಮ್ ನಸಲ್ಲ್ಯಾಕ್ನಿ ಒಲಿವ್ ತೆಲ್ ಲಾವ್ಲ್ಯಾನಿ ಅನಿ ತೆಂಕಾ ಆರಾಮ್ ಕರ್‍ಲ್ಯಾನಿ.

14 ಹೆರೊದ್ ರಾಜಾನ್ ಹೆಚ್ಯಾ ವಿಶಯಾತ್ ಆಯ್ಕ್ಲ್ಯಾನ್, ಕಶ್ಯಾಕ್ ಮಟ್ಲ್ಯಾರ್ ಜೆಜುಚಿ ಖಬರ್ ಸಗ್ಳ್ಯಾಕ್ಡೆ ಫರ್ಗಟಲ್ಲಿ. ಥೊಡೆಜಾನಾ "ಬಾಲ್ತಿಮ್‍ ದಿತಲೊ ಜುವಾಂವ್ ಮರಲ್ಲೊ ಅನಿ ಝಿತ್ತೊ ಹೊವ್ನ್ ಯೆಲಾ! ತಸೆ ಮನುನ್ ತೆಕಾ ಅಜಾಪಾ ಕರ್‍ತಲೊ ಬಳ್ ಹಾಯ್" ಮನುಲಾಗಲ್ಲ್ಯಾನಿ.

15 ಅನಿ ಉಲ್ಲೆ ಜಾನಾ "ತೊ ಎಲಿಯಾ ಮನ್ತಲೊ ಪ್ರವಾದಿ" ಮನುಲಾಗಲ್ಲ್ಯಾನಿ.

ಅನಿ ಹುರಲ್ಲೆ "ತೊ ಅದ್ಲ್ಯಾ ಕಾಲಾತ್ಲ್ಯಾ ಪ್ರವಾದ್ಯಾಂಚ್ಯಾ ಬಾಸೆನ್ ಎಕ್ ಪ್ರವಾದಿ" ಮನುಲಾಗಲ್ಲ್ಯಾನಿ.

16 ಹೆರೊದಾನ್ ಹೆ ಆಯ್ಕಲ್ಲ್ಯಾ ತನ್ನಾ "ತೊ ಬಾಲ್ತಿಮ್‍ ದಿತಲೊ ಜುವಾಂವ್! ಮಿಯಾ ತೆಚೆ ಚಂಡ್ ತೊಡುಕ್ ಲಾವಲ್ಲೊ, ಖರೆ ತೊ ಅತ್ತಾ ಝಿತ್ತೊ ಹೊವ್ನ್ ಯೆಲಾ!" ಮಟ್ಲ್ಯಾನ್.

17 ಹೆರೊದಾನ್ ಅಪ್ನಿಚ್ ಜುವಾಂವಾಕ್ ಧರುನ್ ಬಂದಿಖಾನ್ಯಾತ್ ಘಾಲುಕ್ ಸಾಂಗಟಲ್ಲ್ಯಾನ್. ಹೆರೊದಿಯಾಸಾಕ್ ಲಾಗುನ್ ತೆನಿ ಅಶೆ ಕರ್‍ತಲೆ ಪಡ್ಲೆ. ತಿ ಅಪ್ಲ್ಯಾ ಭಾವಾಚಿ-ಫಿಲಿಪ್ಪಾಚಿ ಬಾಯ್ಕೊ! ಜಾಲ್ಯಾರ್‍ಬಿ ತೊ ತಿಚೆಕ್ಡೆ ಲಗಿನ್ ಹೊಲ್ಲೊ, 18 ಜುವಾಂವ್ ಹೆರೊದಾಕ್ "ತಿಯಾ ತುಜ್ಯಾ ಭಾವಾಚ್ಯಾ ಬಾಯ್ಕೊಕ್ ಲಗಿನ್ ಕರುನ್ ಘೆವ್ನ್ ಥವ್ನ್ ಘೆಟಲ್ಲೆ ಖಾಯ್ದ್ಯಾ ಪರ್‍ಕಾರ್ ಸಮಾ ನ್ಹಯ್!" ಮನುನ್ ಸಾಂಗುಕ್ ಲಾಗಲ್ಲೊ.

19 ತೆಚ್ಯಾ ಸಾಟ್ನಿ ಹೆರೊದಿಯಾಸಾಕ್ ಜುವಾಂವಾ ವರ್‍ತಿ ರಾಗ್ ಹೊತ್ತೊ, ತಿ ತೆಕಾ ಜಿವಾನಿ ಮಾರುಚೆ ಮನುನ್ ಹೊತ್ತಿ. 20 ಖರೆ ಹೆರೊದ್ ಭಿಂವ್ ಲಾಗಲ್ಲೊ ಕಶ್ಯಾಕ್ ಮಟ್ಲ್ಯಾರ್ ಜುವಾಂವ್ ಎಕ್ ಬರೊ ಅನಿ ಪವಿತ್ರ್ ಮಾನುಸ್ ಮನುನ್ ತೆಕಾ ಗೊತ್ತ್ ಹೊತ್ತೆ,ತಸೆ ಮನುನ್ ತೊ ತೆಕಾ ಕಾಯ್ಬಿ ತರಾಸ್ ಹೊವ್ಕ್ ದಿ ನಸಿ, ತೊ ಸಾಂಗ್ತಾನಾ ತೆಕಾ ತರಾಸ್ ಹೊಲ್ಯಾರ್ಬಿ, ತೊ ಕುಶಿನ್ ತೆಚೆ ಆಯ್ಕಿ.

21 ಆಕ್ರಿಕ್, ಹೆರೊದಿಯಾಸಾಕ್ ಎಕ್ ಬರೊ ಅವ್ಕಾಸ್ ಗಾವ್ಲೊ, ಹೆರೊದಾನ್ ಅಪ್ನಾಚ್ಯಾ ಜಲ್ಮಾಚ್ಯಾ ದಿಸಿ, ಅಪ್ನಾಚ್ಯಾ ರಾಜಾತ್ಲ್ಯಾ ಸಗ್ಳ್ಯಾ ಅದಿಕಾರ್‍ಯಾಕ್ನಿ, ಸೈನಿಕಾಂಚ್ಯಾ ಮುಖಂಡಾಕ್ನಿ ಅನಿ ಗಾಲಿಲಿಯಾಚ್ಯಾ ಮೊಟ್ಯಾ-ಮೊಟ್ಯಾ ಲೊಕಾಕ್ನಿ ಎಕ್ ಮೊಟೆ ಜೆವಾನ್ ಥವಲ್ಲ್ಯಾನ್. 22 ತನ್ನಾ ಹೆರೊದಿಯಾಸಾಚ್ಯಾ ಲೆಕಿನ್ ಬರೆ ಕರುನ್ ನಾಚ್ಲಿನ್, ಹೆ ಬಗುನ್ ರಾಜಾಕ್ ಅನಿ ಯೆಲ್ಲ್ಯಾ ಸಯ್ರ್ಯಾಕ್ನಿ ಲೈ ಕುಶಿ ಹೊಲಿ. ತೆಚೆ ಸಾಟ್ನಿ ರಾಜಾನ್ ಚೆಡ್ವಾಕ್ "ತುಕಾ ಕಾಯ್ ಪಾಜೆ ಮಾಗ್, ಮಿಯಾ ತುಕಾ ದಿತಾ," 23 ಅನಿ ಆನ್ ಘಾಲುನ್ "ಮಿಯಾ ತುಕಾ ಕಾಯ್ ಪಾಜೆ ತೆ, ಮಾಜ್ಯಾ ರಾಜಾತ್ಲಿ ಅರ್ದಿ ಅಸ್ತಿ ಮಾಗ್ಲ್ಯಾರ್ಬಿ ದಿತಾ!" ಮಟ್ಲ್ಯಾನ್.

24 ತನ್ನಾ ತೆ ಚೆಡು ಅಪ್ಲ್ಯಾ ಬಾಯ್‍ಕ್ಡೆ ಗೆಲೆ ಅನಿ "ಬಾಯ್ ಮಿಯಾ ಕಾಯ್ ಮಾಗುಚೆ?" ಮುನುನ್ ಇಚಾರ್‍ಲಿನ್.

ತನ್ನಾ ತಿಚ್ಯಾ ಬಾಯ್ನ್. "ಬಾಲ್ತಿಮ್‍ದಿತಲ್ಯಾ ಜುವಾಂವಾಚೆ ಟಕ್ಲೆ ಮಾಗ್" ಮನುನ್ ಸಾಂಗ್ಲಿನ್.

25 ತನ್ನಾ ತ್ಯಾ ಚೆಡ್ವಾನ್ ಲಗ್ಗುನಾ ರಾಜಾಕ್ಡೆ ಜಾವ್ನ್ "ಅತ್ತಾಚ್ ಎಕ್ ತಾಟಾತ್ನಾ, ಬಾಲ್ತಿಮ್‍ದಿತಲ್ಯಾ ಜುವಾಂವಾಚೆ ಟಕ್ಲೆ ಮಾಕಾ ಹಾನುನ್ ದಿವಾ" ಮನುನ್ ಇಚಾರ್‍ಲ್ಯಾನ್.

26 ಹೆ ಆಯ್ಕುನ್ ರಾಜಾಕ್ ಲೈ ಬೆಜಾರ್ ಹೊಲೊ,ಖರೆ ಯೆಲ್ಲ್ಯಾ ಸಗ್ಳ್ಯಾ ಲೊಕಾಂಚ್ಯಾ ಇದ್ರಾಕ್ ಬೊಲಲ್ಲ್ಯಾ ಗೊಸ್ಟಿಚ್ಯಾ ಮುಲಾಜಾಕ್ ಪಡುನ್, ತೆಕಾ ತಿರಸ್ಕಾರ್ ಕರುಕ್ ಹೊವುಕ್ನಾ. 27 ತೆಚೆ ಸಾಟ್ನಿ ತೆನಿ "ಜುವಾಂವಾಚೆ ಟಕ್ಲೆ ಎಕ್ ಅಯ್ದಾನಾತ್ನಾ ತಿಕಾ ಹಾನುನ್ ದಿ" ಮನುನ್ ಅಪ್ಲ್ಯಾ ಸೈನಿಕಾಕ್ ಸಾಂಗ್ಲ್ಯಾನ್. ತನ್ನಾ ತ್ಯಾ ಸೈನಿಕಾನ್ ಜಾವ್ನ್ ಜುವಾಂವಾಚೊ ಚಂಡ್ ತೊಡ್ಲ್ಯಾನ್. 28 ಅನಿ ಜುವಾಂವಾಚೆ ಟಕ್ಲೆ ಆಯ್ದಾನಾತ್ನಾ ಘೆವ್ನ್ ಯೆಲ್ಯಾನ್ ಅನಿ ತ್ಯಾ ಚೆಡ್ವಾಚ್ಯಾ ಹಾತಿತ್ ದಿಲ್ಯಾನ್. ತೆನಿ ತೆ ಅಪ್ಲ್ಯಾ ಬಾಯ್ಚ್ಯಾ ಹಾತಿತ್ ದಿಲಿನ್. 29 ಹಿ ಖಬರ್ ಜುವಾಂವಾಚ್ಯಾ ಶಿಸಾಕ್ನಿ ಗಾವ್ಲಿ, ತನ್ನಾ ತೆನಿ ತೆಚೆ ಮಡೆ ಘೆವ್ನ್ ಜಾವ್ನ್ ಸಮಾದಿತ್ ಥವ್ಲ್ಯಾನಿ.*6:29 ಜುದೆವಾಂಚ್ಯಾ ಪದ್ದತಿ ಪರ್‍ಕಾರ್ ಮಡೆ ಸಮಾದ್ಯಾತ್ನಿ ಘಾಲುನ್ ಥೈತ್

30 ಜೆಜುಚಿ ಅಪೊಸ್ತಲಾ ಪರ್ತುನ್ ಯೆವ್ನ್ ಜೆಜುಕ್ ಭೆಟ್ಲ್ಯಾನಿ, ಅನಿ ಅಪ್ನಿ ಕಾಯ್-ಕಾಯ್ ಕರ್‍ಲ್ಯಾನಿ ಅನಿ ಕಾಯ್-ಕಾಯ್ ಶಿಕ್ವುಲ್ಯಾನಿ ತೆ ಸಗ್ಳೆ ತೆನಿ ಜೆಜುಕ್ ಸಾಂಗ್ಲ್ಯಾನಿ. 31 ಲೈ ಲೊಕಾ ಯೆವ್ನ್ಗೆತ್-ಜಾವ್ನ್ಗೆತ್ ಹೊತ್ತಿ ಜೆಜುಕ್ ಅನಿ ತೆಚ್ಯಾ ಶಿಸಾಕ್ನಿ ಜೆವಾನ್ ಕರುಕ್ ಸೈತ್ ಎಳ್ ನತ್ತೊ. ತಸೆ ಮನುನ್ ಜೆಜುನ್ ತೆಂಕಾ "ಚಲಾ ಅಮ್ಚ್ಯಾ ಎವ್ಡ್ಯಾಕ್ ಅಮಿ ಎಕ್ ಲೊಕಾನಸಲ್ಲ್ಯಾ ಜಾಗ್ಯಾಕ್ ಜಾಂವಾ, ತನ್ನಾ ತುಮ್ಕಾ ಉಲ್ಲೆ ಆರಾಮ್ ಘೆವ್ಕ್ ಹೊತಾ" ಮಟ್ಲ್ಯಾನ್. 32 ತನ್ನಾ ತೆನಿ ಎಕ್ ಢೊನಿತ್ ಚಡುನ್ ಕೊನ್ಬಿ ನಸಲ್ಲ್ಯಾ ಶಾಂತ್ ಜಾಗ್ಯಾಕ್ ಗೆಲ್ಯಾನಿ.

33 ಹೆ ಸುಮಾರ್ ಲೊಕಾಕ್ನಿ ಗೊತ್ತ್ ಹೊವ್ನ್ ಸಗ್ಳ್ಯಾ ಶಾರಾನಿತ್ನಾ ಪಾಯ್ ವಾಟಾನಿ ಹೊವ್ನ್ ಜೆಜು ಅನಿ ಶಿಸಾಂಚ್ಯಾ ಅದ್ದಿ ಲೊಕಾಚ್ ಥೈ ಜಾವ್ನ್ ಪಾವ್ಲಿ. 34 ಢೊನಿತ್ನಾ ಉತ್ರುನ್ ಯೆತಾನಾ ಜೆಜುನ್ ಹ್ಯೊ ಮೊಟೊ ಲೊಕಾಂಚೊ ತಾಂಡೊ ಬಗಟ್ಲ್ಯಾನ್. ತೆಂಚೊ ತೆಕಾ ಪಾಪ್ ದಿಸ್ಲೊ,ಕಶ್ಯಾಕ್ ಮಟ್ಲ್ಯಾರ್ ತೆನಿ ರಾಕ್ವಾಲಿನಸಲ್ಲ್ಯಾ ಬಕ್ರ್ಯಾಂಚ್ಯಾ ಬಾಸೆನ್ ಹೊತ್ತೆ,ತಸೆ ಮನುನ್ ತೊ ತೆಂಕಾ ಸುಮಾರ್ ವಿಶಯ್ ಶಿಕ್ವುಲಾಲೊ.

35 ಎಳ್ ಹೊಂವ್ನ್ಗೆತ್ ಯಲ್ಲ್ಯಾತನ್ನಾ ಶಿಸಾನಿ "ಅದ್ದಿಚ್ ಎಳ್ ಹೊಲಾ, ಹ್ಯೊ ಬಗ್ಲ್ಯಾರ್ ಕೊನ್ನಸಲ್ಲೊ ಜಾಗೊ 36 ಲೊಕಾಕ್ನಿ ಧಾಡುನ್ ದಿ, ತೆನಿ ಜಗೊಳ್ಲ್ಯಾ ಗಾಂವಾತ್ನಿ, ಶೆತಾತ್ನಿ ಜಾಂವ್ದಿ ಅನಿ ತೆಂಕಾ ಕಾಯ್ತರ್ ಖಾವ್ಕ್ ಇಕಾತ್ ತರ್ಬಿ ಘೆಂವ್ದಿತ್" ಮನುನ್ ಸಾಂಗ್ಲ್ಯಾನಿ.

37 ತನ್ನಾ ಜೆಜುನ್ "ತುಮಿಚ್ ತೆಂಕಾ ಜೆವಾನ್ ದಿವಾ ಮಟ್ಲ್ಯಾನ್. ತನ್ನಾ ತೆನಿ" ದೊನ್ಸೆ ಚಾಂದಿಚ್ಯಾ ಪೈಸ್ಯಾನಿ*6:37 ಎಕ್ ಚಾಂದಿಚೊ ಪೈಸೊ,ಮಟ್ಲ್ಯಾರ್ "ಎಕ್ ದಿಸಾಚೊ ಪಗಾರ್" ತೆಂಕಾ ಖವ್ಕ್ ಬಾಕ್ರಿಯಾ ಹಾನುನ್ ದಿವ್ಚ್ಯೆ ಕಾಯ್? ಮಟ್ಲ್ಯಾನಿ 38 ತನ್ನಾ ಜೆಜುನ್ "ತುಮ್ಚ್ಯಾಕ್ಡೆ ಕವ್ಡಿ ಭಾಕ್ರಿಯಾ ಹಾತ್? ಮನುನ್ ಜಾವ್ನ್ ಬಗಾ" ಮಟ್ಲ್ಯಾನ್. ತೆನಿ ಬಗುನ್ ಯೆವ್ನ್"ಅಮ್ಚ್ಯಾಕ್ಡೆ ಪಾಂಚ್ ಭಾಕ್ರಿಯಾ ಅನಿ ದೊನ್ ಮಾಸೊಳ್ಯಾ ಹಾತ್" ಮಟ್ಲ್ಯಾನಿ.

39 ಜೆಜುನ್ ಅಪ್ಲ್ಯಾ ಶಿಸಾಕ್ನಿ "ಲೊಕಾಕ್ನಿ ಹಿಂರ್ವ್ಯಾಂ ಗವ್ತಾಚ್ಯಾ ವರ್‍ತಿ ತಾಂಡೆ-ತಾಂಡೆ ಕರುನ್ ಬಸ್ವಾ" ಮನುನ್ ಸಾಂಗಟ್ಲ್ಯಾನ್. 40 ತಸೆ ಮನುನ್ ಲೊಕಾ ಶೆಂಬರ್ ಅನಿ ಪನ್ನಾಸ್ ಲೊಕಾಂಚೆ ತಾಂಡೆ ಕರುನ್ ಘೆವ್ನ್ ಬಸ್ಲಿ. 41 ಮಾಗಿರ್ ಜೆಜುನ್ ಪಾಂಚ್ ಭಾಕ್ರಿಯಾ ಅನಿ ದೊನ್ ಮಾಸೊಳ್ಲ್ಯಾ ಘೆವ್ನ್ ವೈರ್ ಬಗ್ಲ್ಯಾನ್ ಅನಿ ದೆವಾಕ್ ಧನ್ಯವಾದ್ ದಿಲ್ಲ್ಯಾನ್ ಅನಿ ಮೊಡುನ್ ವಾಟಾ ಮನುನ್ ಶಿಸಾಂಚ್ಯಾ ಹಾತಾತ್ನಿ ದಿಲ್ಲ್ಯಾನ್, ಅನಿ ದೊನ್ ಮಾಸೊಳ್ಯಾಬಿ ಸಗ್ಳ್ಯಾಂಚ್ಯಾ ಸಾಟ್ನಿ ಮೊಡುನ್ ದಿಲ್ಲ್ಯಾನ್, 42 ಸಗ್ಳ್ಯಾನಿ ಪೊಟ್ಭರ್ ಜೆವ್ಲ್ಯಾನಿ.

43 ಹುರಲ್ಲ್ಯಾ ಮಾಸೊಳ್ಯಾ ಅನಿ ಭಾಕ್ರಿಯಾ ಶಿಸಾನಿ ಗೊಳಾ ಕರ್ಲ್ಯಾರ್, ಬಾರಾ ಭುಟಿಯಾ ಭರ್‍ಲ್ಯಾ. 44 ಥೈ ಸುಮಾರ್ ಪಾಂಚ್ ಹಜಾರ್ ಘೊಮಾನ್ಸಾಚ್ ಹೊತ್ತಿ.

45 ಲೊಕಾಕ್ನಿ ಧಾಡುನ್ ಹೊಲ್ಲ್ಯಾ ಮಾನಾ, ಜೆಜುನ್ ಅಪ್ಲ್ಯಾ ಶಿಸಾಕ್ನಿ ಢೊನಿತ್ ಚಡುನ್ ತಿಕುಲ್ಲ್ಯಾ ದಂಡೆಕ್ ಬೆತ್ಸಾಯಿದಾ ಮನ್ತಲ್ಲ್ಯಾ ಗಾವಾಕ್ ಜಾವ್ಕ್ ಸಾಂಗ್ಲ್ಲ್ಯಾನ್, 46 ಮಾನಾ ಜೆಜು ಲೊಕಾಕ್ನಿ ಧಾಡುನ್ ದಿವ್ನ್ ಮಾಗ್ನಿ ಕರುಕ್ ಮಡ್ಡಿ ವರ್‍ತಿ ಗೆಲೊ.

47 ದಿಸ್ ಬುಡಲ್ಲ್ಯಾ ತನ್ನಾ ಢೊನ್ ಸಮುಂದರಾಚ್ಯಾ ಮದ್ದಿ ಪಾವಲ್ಲಿ, ತನ್ನಾ ಜೆಜು ಎಕ್ಲೊಚ್ ದಂಡೆಕ್ ಹೊತ್ತೊ, 48 ಶಿಸಾ ಸಮುಂದರಾತ್ ತರಾಸ್ ಕರುನ್ ಘೆತಲೆ ತೆನಿ ಬಗಟ್ಲ್ಯಾನ್. ಕಶ್ಯಾಕ್ ಮಟ್ಲ್ಯಾರ್ ತೆನಿ ವಾರ್ಯಾಚ್ಯಾ ವಿರೊದ್ ಆವ್ಲೊ*6:48 ಅವ್ಲೊ ಮಟ್ಲ್ಯಾರ್, ಪಾನಿಯಾತ್ನಾ ಢೊನ್ ಘೆವ್ನ್ ಜಾತಾನಾ ಢೊನ್ ಫಿಡೆ ಜಾವ್ಕ್ ಮನುನ್ ಪಾನಿ ಮಾರ್‍ತಲೆ ಹತಿಯಾರ್. ಮಾರಿತ್. ರಾಚ್ಚ್ಯಾ ತಿನ್ ಘಂಟ್ಯಾಕ್ನಾ ಸಾ ಘಂಟ್ಯಾಚ್ಯಾ ಮದ್ದಿ ತೊ ಪಾನಿಯಾ ವರ್‍ತಿ ಚಲುನ್ಗೆತ್ ತೆಂಚ್ಯಾ ಜಗ್ಗೊಳ್ ಯೆವ್ನ್ ತೆಂಕಾ ದಾಟುನ್ ಫಿಡೆ ಜವ್‍ಲಾಗಲ್ಲೊ. 49 ತೊ ಪಾನಿಯಾ ವರ್‍ತಿ ಚಲ್ತಲೆ ಬಗುನ್ ತೆನಿ "ಅಬಕ್ ಭುತ್!" ಮನುನ್ ಬೊಬ್ ಮಾರ್‍ಲ್ಯಾನಿ. 50 ತೆನಿ ತೆಕಾ ಬಗುನ್ ಭಿವ್ನ್ ಗೆಲ್ಲ್ಯಾನಿ, ತನ್ನಾ ಜೆಜುನ್ ತೆಂಕಾ

"ಭಿಂವ್ನಕಾಸಿ, ಮಿಯಾಚ್ ತೊ, ಧೈರ್‍ಯಾನ್ ರ್‍ಹಾವಾ," ಮಟ್ಲ್ಯಾನ್. 51 ಮಾನಾ ತೊ ಢೊನಿತ್ ಚಡ್ಲೊ ತನ್ನಾ ವಾರೊ ಥಂಡ್ ಹೊಲೊ ತನ್ನಾ ತೆನಿ ಅಜಾಪ್ ಹೊಲೆ, 52 ಪಾಂಚ್ ಹಜಾರ್ ಲೊಕಾಕ್ನಿ ಜೆವಾನ್ ದಿಲ್ಲ್ಯಾ ವಿಶಯಾಚೊ ಖರೊ ಅರ್ತ್‍, ತೆಂಕಾ ಹೊವ್ಕ್ ನತ್ತೊ, ಕಶ್ಯಾಕ್ ಮಟ್ಲ್ಯಾರ್, ತೆಂಚಿ ಕಾಳ್ಜಾ ಘಟ್ ಹೊಲ್ಲಿ.

53 ತೆನಿ ಸಮುಂದರ್ ದಾಟುನ್ ಗೆನಜರೆತ್ ಮನ್ತಲ್ಯಾ ಜಾಗ್ಯಾಕ್ ಯೆಲ್ಯಾನಿ, ಥೈ ತೆನಿ ಡೊನ್ ಭಾಂದ್ಲ್ಲ್ಯಾನಿ, 54 ತೆನಿ ಢೊನಿತ್ನಾ ಉತರ್ತಾನಾಚ್ ಲೊಕಾನಿ ಜೆಜುಚಿ ವಳಕ್ ಧರ್‍ಲ್ಯಾನಿ, 55 ಲೊಕಾನಿ ತ್ಯಾ ಪ್ರಾಂತ್ಯಾತ್ ಸಗ್ಳ್ಯಾಕ್ಡೆ ಪಳುನ್ ತೊ ಖೈಯ್ ಹಾಯ್ ಮನುನ್ ಇಚಾರ್‍ಲ್ಯಾನಿ ಅನಿ ಥೈ ಹಾತ್ರಾನಾತ್ನಿ ನಿಜಲ್ಲ್ಯಾ ಶಿಕ್ ಹೊತ್ತ್ಯಾಕ್ನಿ ಹಾತ್ರಾನಾ ಸಮೆತ್ ಉಕ್ಲುನ್ ಘೆವ್ನ್ ಯೆಲ್ಯಾನಿ. 56 ಜೆಜು ಖೈ-ಖೈ ಗೆಲೊ, ತ್ಯಾ ಗಾಂವಾತ್ನಿ, ಶಾರಾತ್ನಿ, ಶೆತಾತ್ನಿ, ಗೆಲೊ ತ್ಯಾ ಜಾಗ್ಯಾನಿತ್ಲ್ಯಾ ಬಾಜಾರಾತ್ನಿ ಶಿಕ್ ಹೊತ್ತ್ಯಾಕ್ನಿ ಘೆವ್ನ್ ಯೆಲ್ಯಾನಿ ಅನಿ ತುಜೆ ಕಪ್ಡೆ ತರ್ಬಿ ಅಪ್ಡುಕ್ ತೆಂಕಾ ಅವ್ಕಾಸ್ ದಿ ಮನುನ್ ಮಾಗ್ಲ್ಯಾನಿ ಅನಿ ಕೊನ್-ಕೊನ್ ಅಪಡ್ಲ್ಲ್ಯಾನಿ ತೆನಿ ಆರಾಮ್ ಹೊಲ್ಯಾನಿ.