Mateus 25

ಧಾ ಧೆಡ್ನಿಯಾಂಚಿ ಕಾನಿ

1 ತನ್ನಾ ಸರ್ಗಾಚೊ ರಾಜ್ ಮಟ್ಲ್ಯಾರ್ ಅಸೊ. ಎಕ್ದಾ ಧಾ ಧೆಡ್ನಿಯಾ ಅರ್‍ತಿಯಾ ಘೆವ್ನ್ ನ್ಹವ್ರ್ಯಾಕ್ ಭೆಟುಕ್ ಗೆಲ್ಯಾನಿ. 2 ತ್ಯಾತುರ್ ಪಾಂಚ್ ಜಾನಾ ಬುದ್ದ್ ಅಸಲ್ಲ್ಯಾ ಅನಿ ಪಾಂಚ್ ಜಾನಾ ಬುದ್ದ್ ನಸಲ್ಲ್ಯಾ ಧೆಡ್ನಿಯಾ ಹೊತ್ತ್ಯಾ. 3 ಬುದ್ದ್ ನಸಲ್ಲ್ಯಾನಿ ತೆಂಚ್ಯಾ ಅರ್‍ತಿಯಾ ಘೆಟ್ಲ್ಯಾನಿ ಖರೆ ವಾಂಗ್ಡಾ ಜಾಸ್ತಿಚೆ ತೆಲ್ ಘೆವ್ಕ್‌ನ್ಯಾತ್. 4 ಬುದ್ದ್ ಅಸಲ್ಲ್ಯಾನಿ ತೆಂಚ್ಯಾ ಆರ್‍ತಿಯಾಂಚ್ಯಾ ವಾಂಗ್ಡಾ ಡಬ್ಬ್ಯಾತ್ನಾ ಜಾಸ್ತಿಚೆ ತೆಲ್ ಬಿ ಘೆಟ್ಲ್ಯಾನಿ. 5 ನ್ಹವ್ರೊ ಯೆವ್ಕ್ ಎಳ್ ಹೊಲ್ಲ್ಯಾಕ್ ತೆನಿ ಸಗ್ಳೆ ಜಾನಾ ಝೆಮುನ್ಗೆತ್-ಝೆಮುನ್ಗೆತ್ ನಿಜುನ್ ಪಡ್ಲ್ಯಾನಿ.

6 ಖರೆ ಮದ್ಯಾನ್ ರಾಚ್ಚೆ, ಅಬಗಾ, ನ್ಹೊವ್ರೊ ಯೆಲೊ, ತೆಕಾ ಮಿಳುಕ್ ಯೆವಾ. ಮನುನ್ ಕೊನ್‍ ಕಿ ಬೊಬ್ ಮಾರ್‍ತಲೆ ಆಯಿಕ್ಲೆ. 7 ತನ್ನಾ ತ್ಯಾ ಧಾ ಧೆಡ್ನಿಯಾ ಉಟ್ಲ್ಯಾ ಅನಿ ಅಪ್ನಾ-ಅಪ್ನಾಚ್ಯಾ ಅರ್‍ತಿಯಾ ಸಮಾ ಕರುನ್ ಘೆಟ್ಲ್ಯಾನಿ. 8 ತನ್ನಾ ಬುದ್ದ್ ನಸಲ್ಲ್ಯಾ ಧೆಡ್ನಿಯಾನಿ ಬುದ್ದ್ ಅಸಲ್ಲ್ಯಾ ಧೆಡ್ನಿಯಾಕ್ನಿ ಜಾವ್ನ್, ತುಮ್ಚ್ಯಾಕ್ಡೆ ಹೊತ್ತ್ಯಾ ತೆಲಾತ್ಲೆ ಉಲ್ಲೆ ತೆಲ್ ಅಮ್ಕಾಬಿ ದಿವಾ, ಅಮ್ಚ್ಯಾ ಆರ್‍ತಿಯಾ ಇಜುನ್ ಜಾವ್ಲ್ಯಾತ್. ಮನುನ್ ಸಾಂಗ್ಲ್ಯಾನಿ. 9 ತನ್ನಾ ಬುದ್ದ್ ಅಸಲ್ಲ್ಯಾ ಧೆಡ್ನಿಯಾನಿ, ನಾ ನಾ, ಅಮ್ಚೆಕ್ಡೆ ಹೊತ್ತೆ ತೆಲ್ ತುಮ್ಕಾ ದಿಲ್ಯಾರ್ ಅಮ್ಕಾಬಿ ಪಾವಿನಾ ಹೊಯ್ಲ್. ತುಮಿ ಇಕ್ತಲ್ಯಾಂಚ್ಯಾಕ್ಡೆ ಜಾವ್ನ್ ಇಕಾತ್ ಘೆಟಲ್ಲೆ ಬರೆ. ಮಟ್ಲ್ಯಾನಿ. 10 ತೆಚೆಸಾಟ್ನಿ ಬುದ್ದ್ ನಸಲ್ಲ್ಯಾ ಪಾಂಚ್ ಧೆಡ್ನಿಯಾ ಇಕ್ತಲ್ಯಾಂಚ್ಯಾಕ್ನಾ ತೆಲ್ ಇಕಾತ್ ಮನುನ್ ಗೆಲ್ಯಾನಿ: ತವ್ಡ್ಯಾಕ್ ಮಟ್ಲ್ಯಾರ್ ನ್ಹವ್ರೊ ಯೆಲೊ, ಅನಿ ತಯಾರ್ ಹೊತ್ತೆ ಸಗ್ಳೆ ಜಾನಾ ತೆಚ್ಯಾ ವಾಂಗ್ಡಾ ಲಗ್ನಾಚ್ಯಾ ಘರಾತ್ ಭುತ್ತುರ್ ಗುಸ್ಲೆ ಮಾನಾ ದಾರ್ ಧಾಪ್ಲೆ.

11 ಮಾನಾ ಹುರಲ್ಲ್ಯಾ ಪಾಂಚ್ ಧೆಡ್ನಿಯಾ ಯೆಲ್ಯಾ ಅನಿ,ಸಾಯ್ಬಾನು, ಸಾಯ್ಬಾನು! ದಾರ್ ಉಗ್ಡಾ! ಮನುನ್ ಮೊಟ್ಯಾನ್ ಬಲ್ವುಲ್ಯಾನಿ. 12 ಖರೆ ನ್ಹವ್ರ್ಯಾನ್ ಭುತ್ತುರ್‍ನಾ ಜಬಾಬ್ ದಿವ್ನ್. ನಾ ಹೊಯ್ನಾ! ತುಮಿ ಕೊನ್ ಮನುನ್ ಮಾಕಾ ಖರೆಚ್‍ಬಿ ಗೊತ್ತ್ ನಾ. ಮಟ್ಲ್ಯಾನ್.

13 ತೆಚೆಸಾಟ್ನಿ ತುಮಿ ಕನ್ನಾಬಿ ಉಶಾರ್ಕಿತ್ ರ್‍ಹಾವಾ, ಕಸ್ಯಾಕ್ ಮಟ್ಲ್ಯಾರ್ ಮಾನ್ಸಾಚೊ ಲೆಕ್ ಯೆತಲೊ ದಿಸ್ ನಾಹೊಲ್ಯಾರ್ ಎಳ್ ತುಮ್ಕಾ ಗೊತ್ತ್ ನಾ. ಮನುನ್ ಜೆಜುನ್ ಮುಗಸ್ಲ್ಯಾನ್.

ತಿನ್ ಆಳಾಂಚಿ ಕಾನಿ

14 "ಸರ್‍ಗಾಚೊ ರಾಜ್ ಮಟ್ಲ್ಯಾರ್ ಅಶೆ ಮನುಕ್ ಹೊತಾ. ಎಗ್ದಾ ಎಕ್ ಮಾನುಸ್ ಹೊತ್ತೊ, ತೊ ಧುರ್‍ಲ್ಯಾ ದೆಸಾಕ್ ಜಾನಾರ್ ಹೊತ್ತೊ ತನ್ನಾ ತೆನಿ ಅಪ್ನಾಚ್ಯಾ ಆಳಾಕ್ನಿ ಬಲ್ವುಲ್ಯಾನ್ ಅನಿ ಅಪ್ನಾಚ್ಯಾ ಆಸ್ತಿಚಿ ಜವಾಬ್ದಾರಿ ತೆಂಕಾ ದಿಲ್ಯಾನ್. 15 ತೆನಿ ತೆಂಕಾ ತೆಂಚ್ಯಾ ತಾಕ್ತಿ ಪರ್‌ಕಾರ್ ಎಕ್ಲ್ಯಾಕ್ ಪಾಂಚ್ ಹಜಾರ್, ಎಕ್ಲ್ಯಾಕ್ ದೊನ್ ಹಜಾರ್ ಅನಿ ಅನಿಎಕ್ಲ್ಯಾಕ್ ಎಕ್ ಹಜಾರ್ ಸೊನ್ಯಾಚ್ಯಾ ಪೈಸ್ಯಾಂಚ್ಯಾ ಗಾಲಿಯಾ ದಿಲ್ಯಾನ್. ಮಾನಾ ತೊ ಧುರ್‍ಲ್ಯಾ ದೆಸಾಕ್ ಗೆಲೊ. 16 ಪಾಂಚ್ ಹಜಾರ್ ಸೊನ್ಯಾಚ್ಯಾ ಪೈಸ್ಯಾಂಚ್ಯಾ ಗಾಲಿಯಾ ಘೆಟಲ್ಲೊ ಗೆಲೊ ಅನಿ ತೆ ಪೈಸೆ ಯಾವಾರಾತ್ ಘಾಟ್ಲ್ಯಾನ್. ಅನಿ ಅನಿ ಪಾಚ್ ಹಜಾರ್ ಸೊನ್ಯಾಚ್ಯಾ ಪೈಸೆ ಖಮ್ವುಲ್ಯಾನ್. 17 ತಸೆಚ್ ದೊನ್ ಹಜಾರ್ ಸೊನ್ಯಾಚ್ಯಾ ಪೈಸ್ಯಾಂಚ್ಯಾ ಗಾಲಿಯಾ ಘೆಟಲ್ಲ್ಯಾನ್, ಅನಿ ದೊನ್ ಹಜಾರ್ ಪೈಸ್ಯಾಂಚ್ಯಾ ಗಾಲಿಯಾ ಕಮ್ವುಲ್ಯಾನ್. 18 ಖರೆ ಎಕ್ ಹಜಾರ್ ಸೊನ್ಯಾಚ್ಯಾ ಪೈಸ್ಯಾಂಚ್ಯಾ ಗಾಲಿಯಾ ಘೆಟಲ್ಲ್ಯಾನ್, ಜಾವ್ನ್ ಜಿಮಿನ್ ಖಂಡುನ್ ಅಪ್ನಾಚ್ಯಾ ಮಾಲ್ಕಾನ್ ದಿಲ್ಲೆ ಪೈಸೆ ನಿಪ್ವುನ್ ಥವ್ಲ್ಯಾನ್".

19 ಲೈ ದಿಸಾಂಚ್ಯಾ ಮಾನಾ ತ್ಯಾ ಆಳಾಂಚೊ ಮಾಲಿಕ್ ಪರ್ತುನ್ ಯೆಲೊ, ಅನಿ ತೆನಿ ತೆಂಚ್ಯಾಕ್ಡೆ ಲೆಕ್ಕ್ ಇಚಾರ್‍ಲ್ಯಾನ್. 20 ಪಾಂಚ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ಘೆಟಲ್ಲೊ ಫಿಡೆ ಯೆಲೊ ಅನಿ ಅನಿ ಪಾಂಚ್ ಹಜಾರ್ ಗಾಲಿಯಾ ದಿವ್ನ್, ಮಾಲಿಕ್, ತುಮಿ ಮಾಕಾ ಪಾಂಚ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ದಿಲ್ಲ್ಯಾಶಿ, ಖರೆ ಮಿಯಾ ಅನಿ ಪಾಂಚ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ಕಮ್ವುಲಾ. ಮಟ್ಲ್ಯಾನ್. 21 ತನ್ನಾ ಮಾಲ್ಕಾನ್, ಶಬ್ಬಾಸ್, ಮಾಜ್ಯಾ ಬರ್‍ಯಾ ಅನಿ ವಿಶ್ವಾಸಾಚ್ಯಾ ಆಳಾ! ಬಾರಿಕ್ಲ್ಯಾ ಕಾಮಾತುಚ್ ತಿಯಾ ವಿಸ್ವಾಸಾಚೊ ಮನುನ್ ದಾಕ್ವುನ್ ದಿಲೆಯ್. ತಸೆಮನುನ್ ಮಿಯಾ ತುಕಾ ಲೈ ಮೊಟ್ಯಾ ಜವಾಬ್ದಾರಿಚೆ ಕಾಮ್ ದಿತಾ. ಯೆ ಅನಿ ಮಾಜ್ಯಾ ಕುಶಿತ್ ಭಾಗ್ ಘೆ! ಮಟ್ಲ್ಯಾನ್.

22 ತನ್ನಾ ದೊನ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ದಿಲ್ಲೊ ಫಿಡೆ ಯೆಲೊ. ಅನಿ, ಮಾಲಿಕ್, ತುಮಿ ಮಾಕಾ ದೊನ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ದಿಲ್ಲ್ಯಾಶಿ. ಅಬಗಾ, ಮಿಯಾ ಅನಿ ದೊನ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ಕಮ್ವುಲಾ. ಮಟ್ಲ್ಯಾನ್. 23 ತನ್ನಾ ಮಾಲ್ಕಾನ್, ಶಬ್ಬಾಸ್, ಮಾಜ್ಯಾ ಬರ್‍ಯಾ ಅನಿ ವಿಶ್ವಾಸಾಚ್ಯಾ ಆಳಾ! ಬಾರಿಕ್ಲ್ಯಾ ಕಾಮಾತುಚ್ ತಿಯಾ ವಿಶ್ವಾಸಾಚೊ ಮನುನ್ ದಾಕ್ವುಲೆಯ್. ತಸೆಮನುನ್ ಮಿಯಾ ತುಕಾ ಮೊಟ್ಯಾ ಕಾಮಾಚಿ ಜವಾಬ್ದಾರಿ ದಿತಾ. ಯೆ ಅನಿ ಮಾಜ್ಯಾ ಕುಶಿತ್ ಭಾಗ್ ಘೆ! ಮನುನ್ ಸಾಂಗ್ಲ್ಯಾನ್.

24 ಮಾನಾ ಎಕ್ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ಘೆಟಲ್ಲೊ ಫಿಡೆ ಯೆಲೊ ಅನಿ, ಧನಿಯಾ, ತಿಯಾ ಲೈ ಕಟೊರ್ ಮಾನುಸ್ ಮನುನ್ ಮಾಕಾ ಗೊತ್ತ್ ಹಾಯ್. ಪೆರುನಸಲ್ಲ್ಯಾಕ್ಡೆ ತಿಯಾ ಕಾತರ್‍ತೆ ಅನಿ ಸಿಪ್ಡುನಸಲ್ಲ್ಯಾಕ್ಡೆ ರಾಸ್ ಘಾಲ್ತೆಯ್. 25 ಮಿಯಾ ಭಿಂಯಾಲೊ. ತಸೆಮನುನ್ ಮಿಯಾ ಗೆಲೊ ಅನಿ ತುಜೆ ಪೈಸೆ ಜಿಮ್ನಿತ್ ಎಕ್ ಖಡ್ಡೊ ಕಾಡುನ್ ಧಾಪುನ್ ಥವ್ಲೊ. ಅಬಗ್! ತುಜೆ ಪೈಸೆ ತುಕಾ ಪಾವ್ಲೆ ಮಟ್ಲ್ಯಾನ್.

26 ತನ್ನಾ ತೆಚ್ಯಾ ಧನಿಯಾನ್ ಆಳ್ಸಿ ಅನಿ ಬುರ್ಶ್ಯಾ ಆಳಾ! ಮಿಯಾ ಪೆರಿನಸಲ್ಯಾಕ್ಡೆ ಕಾತರ್‍ತಾ ಅನಿ ಸಿಪ್ಡುನಸಲ್ಲ್ಯಾಕ್ಡೆ ರಾಸ್ ಘಾಲ್ತಾ ಮನುನ್ ತುಕಾ ಗೊತ್ತ್ ಹೊತ್ತೆ ನ್ಹಯ್? 27 ತಸೆಹೊಲ್ಯಾರ್, ತಿಯಾ ಮಾಜೆ ಪೈಸೆ ಪೈಸ್ಯಾಂಚೊ ಯಾವಾರ್ ಕರ್‍ತಲ್ಯಾಕ್ನಿ ಬಡ್ಡಿನ್ ಕಶ್ಯಾಕ್ ದಿವ್ಕ್‌ನೆಯ್, ಮಿಯಾ ಪರ್ತುನ್ ಯೆಲ್ಲ್ಯಾತನ್ನಾ ಸಗ್ಳೆ ಬಡ್ಡಿ ಸಮೆತ್ ತೆಂಚ್ಯಾಕ್ನಾ ಕಾಡುನ್ ಘೆಯ್‍ ಹೊತ್ತೊ. 28 ತೆಚೆಕ್ಡೆ ಹೊತ್ತೆ ಪೈಸೆ ಕಾಡುನ್ ಘೆವಾ, ಅನಿ ಧಾ ಹಜಾರ್ ಸೊನ್ಯಾಚ್ಯಾ ಗಾಲಿಯಾ ಹೊತ್ತ್ಯಾಕ್ ದಿವಾ. ಮಟ್ಲ್ಯಾನ್. 29 ಕೊನಾಕ್ಡೆ ಉಲ್ಲೆಸೆ ಹಾಯ್ ತೆಂಕಾ ಅನಿ ಜಾಸ್ತಿಚೆ ದಿವ್ನ್ ಹೊತಾ ಅನಿ ತೆಚೆಕ್ಡೆ ಭರ್‍ಪುರ್ ರ್‍ಹಾತಾ. ಖರೆ ಜೆ ಕೊನಾಕ್ಡೆ ಕಾಯ್ಬಿ ನಾ. ತೆಂಚ್ಯಾಕ್ಡೆ ಹೊತ್ತೆ ಉಲ್ಲೆಸೆಬಿ ಕಾಡುನ್ ಘೆವ್ನ್ ಹೊತಾ. 30 ತ್ಯಾ ಕಾಮಾಕ್ ಯೆವ್ ನಸಲ್ಲ್ಯಾ ಆಳಾಕ್ ಭಾಯ್ರ್ ಕಾಳ್ಕಾತ್ ಢಕ್ಲುನ್ ಘಾಲಾ; ಥೈ ತೊ ಬೊಬ್ ಮಾರ್‍ತಾ ಅನಿ ತರಾಸಾನ್ ದಾತಾ ಚಾವ್ತಾ. ಮನುನ್ ಸಾಂಗಟ್ಲ್ಯಾನ್.

ಆಕ್ರಿಚಿ ಝಡ್ತಿ

31 ಮಾನ್ಸಾಚೊ ಲೆಕ್ ರಾಜಾಚಿ ಪದ್ವಿ ಘೆವ್ನ್ ಯೆತಾನಾ, ಸಗ್ಳಿ ದೆವಾಚಿ ದುತಾ ತೆಚ್ಯಾ ವಾಂಗ್ಡಾ ರ್‍ಹಾತ್ಯಾತ್ ಅನಿ ತೊ ಅಪ್ನಾಚ್ಯಾ ಮಹಿಮೆಚ್ಯಾ ಸಿವಾಸನಾ ವರ್‍ತಿ ಬಸ್ತಾ. 32 ಅನಿ ಸಗ್ಳ್ಯಾ ಬಾಶಾಂಚಿ ಲೊಕಾ ತೆಚ್ಯಾ ಇದ್ರಾಕ್ ಜಮಾ ಹೊತ್ಯಾತ್. ತನ್ನಾ ಕುರ್‍ಬುರಾ ಕಶೆ ಶೆಳಿಯಾಕ್ನಿ ಅನಿ ಬಕ್ರ್ಯಾಕ್ನಿ ಎಗಳ್ತ್ಯಾತ್ ತಸೆ ತೊ ಥೈ ಜಮಲ್ಲ್ಯಾ ಲೊಕಾಕ್ನಿ ದೊನ್ ತಾಂಡೆ ಕರುನ್ ಎಗಳ್ತಾ. 33 ಮಾನಾ ಬರ್‍ಯಾ ವಾಟೆನ್ ಚಲಲ್ಲ್ಯಾ ಲೊಕಾಕ್ನಿ ಅಪ್ನಾಚ್ಯಾ ಉಜ್ವ್ಯಾ ಬಾಜುಕ್ ಅನಿ ಬರ್‍ಯಾ ವಾಟೆನ್ ಚಲಿನಸಲ್ಲ್ಯಾ ಲೊಕಾಕ್ನಿ ರೊಡ್ಡ್ಯಾ ಬಾಜುಕ್ ಇಬೆ ರ್‍ಹಾವ್‍ಸುತಾ. 34 ತನ್ನಾ ರಾಜಾ ಅಪ್ನಾಚ್ಯಾ ಉಜ್ವ್ಯಾ ಬಾಜುಕ್ ಹೊತ್ತ್ಯಾಕ್ನಿ,ಮಾಜ್ಯಾ ಬಾಬಾಚೊ ಆಶಿರ್ವಾದ್ ಹೊತ್ತ್ಯಾನು ಯೆವಾ! ಜಗ್ ರಚುಚ್ಯಾ ಅದ್ದಿಚ್ಯಾನ್ ತುಮ್ಚ್ಯಾಸಾಟ್ನಿ ತಯಾರ್ ಕರುನ್ ಥವಲ್ಲೊ ರಾಜ್ ತುಮ್ಚಿ ಆಸ್ತಿ ಕರುನ್ ಘೆವಾ. 35 ಮಿಯಾ ಭುಕೆನ್ ಹೊತ್ತೊ ತುಮಿ ಮಾಕಾ ಜೆವಾನ್ ದಿಲ್ಯಾಶಿ. ಮಿಯಾ ಸೊಸೆನ್ ಹೊತ್ತೊ ಮಾಕಾ ತುಮಿ ಪಿವ್ಕ್ ದಿಲ್ಯಾಶಿ, ಮಿಯಾ ಪರ್‌ದೆಶಿ ಹೊಲ್ಲೊ ತುಮಿ ಮಾಕಾ ತುಮ್ಚ್ಯಾ ಘರಾತ್ನಿ ಅಸ್ರೊ ದಿಲ್ಯಾಶಿ. 36 ಮಿಯಾ ನಾಗ್ಡೊ ಹೊತ್ತೊ ತುಮಿ ಮಾಕಾ ನೆಸುಕ್ ದಿಲ್ಯಾಶಿ, ಮಿಯಾ ಶಿಕ್ ಪಡಲ್ಲೊ ತನ್ನಾ ಮಾಜಿ ಕಾಳ್ಜಿ ಕರ್‍ಲ್ಯಾಶಿ, ಮಿಯಾ ಬಂದಿಖಾನ್ಯಾತ್ ಹೊತ್ತೊ, ತನ್ನಾ ತುಮಿ ಮಾಕಾ ಭೆಟುಕ್ ಯೆಲ್ಲ್ಯಾಶಿ. ಮನುನ್ ಸಾಂಗ್ತಾ.

37 ತನ್ನಾ ತ್ಯಾ ಬರ್‍ಯಾ ವಾಟೆನ್ ಚಲಲ್ಲ್ಯಾ ಲೊಕಾನಿ, ಧನಿಯಾ ಅಮಿ ಕನ್ನಾ ತುಕಾ ತಿಯಾ ಭುಕೆನ್ ಹೊತ್ತೆ ಬಗುನ್ ಜೆವಾನ್ ದಿಲಾವ್ ಅನಿ ಸೊಸೆನ್ ಹೊತ್ತೆ ಬಗುನ್ ಫಿವ್ಕ್ ದಿಲಾವ್? 38 ಕನ್ನಾ ಅಮಿ ತುಕಾ ಪರ್‌ದೆಶಿ ಹೊತ್ತೆ ಬಗುನ್ ಅಮ್ಚ್ಯಾ ಘರಾತ್ನಿ ಅಸ್ರೊ ದಿಲಾವ್, ಅನಿ ನಾಗ್ಡೊ ಹೊತ್ತೊ ಬಗುನ್ ನೆಸುಕ್ ದಿಲಾವ್? 39 ಕನ್ನಾ ಅಮಿ ತಿಯಾ ಶಿಕ್ ಹೊತ್ತೆ ಬಗುನ್, ಅನಿ ಬಂದಿಖಾನ್ಯಾತ್ ಹೊತ್ತೆ ಬಗುನ್ ತುಕಾ ಭೆಟುಕ್ ಯೆಲ್ಲಾವ್? ಮನುನ್ ಜಬಾಬ್ ದಿತ್ಯಾತ್.

40 ತನ್ನಾ ರಾಜಾ ತೆಂಕಾ, ಮಿಯಾ ತುಮ್ಕಾ ಖರೆ ಅಸಲ್ಲೆ ಸಾಂಗ್ತಾ, ಜೆ ಕಾಯ್ ತುಮಿ ಮಾಜ್ಯಾ ಹ್ಯಾ ಭಾವಾನಿತ್ಲ್ಯಾ ಎಕ್ ಬಾರಿಕ್ಲ್ಯಾ ಭಾವಾಕ್‍ ಸೈತ್ ಕರ್ಲ್ಯಾಶಿ ತೆ ಮಾಕಾಚ್ ಕರ್‍ಲ್ಯಾಶಿ! ಮನುನ್ ಜಬಾಬ್ ದಿತಾ.

41 ಮಾನಾ ತೊ ಅಪ್ನಾಚ್ಯಾ ರೊಡ್ಡ್ಯಾ ಬಾಜುಕ್ ಹೊತ್ತ್ಯಾ ಲೊಕಾಕ್ನಿ, ಜಾವಾ ತುಮಿ ಸರಾಪ್ ಪಡಲ್ಲ್ಯಾನು ಮಾಜ್ಯಾ ಇದ್ರಾಕ್ನಾ ಧುರ್ ಜಾವಾ, ಗಿರೊ ಅನಿ ತೆಚ್ಯಾ ದುತಾಕ್ನಿ ತಯಾರ್ ಕರಲ್ಲ್ಯಾ ಕನ್ನಾಚ್ ಇಜಿ ನಸಲ್ಲ್ಯಾ ಆಗಿತ್ ಜಾವಾ. 42 ಕಶ್ಯಾಕ್ ಮಟ್ಲ್ಯಾರ್ ಮಿಯಾ ಭುಕೆನ್ ಹೊತ್ತೊ ತನ್ನಾ ತುಮಿ ಮಾಕಾ ಜೆವ್ಕ್ ದಿವ್ಕನ್ಯಾಶಿ, ಮಿಯಾ ಸೊಸೆನ್ ಹೊತ್ತೊ ತನ್ನಾ ತುಮಿ ಮಾಕಾ ಫಿವ್ಕ್ ದಿವ್ಕನ್ಯಾಶಿ; 43 ಮಿಯಾ ಪರ್‌ದೆಶಿ ಹೊತ್ತೊ ತನ್ನಾ ತುಮಿ ಮಾಕಾ ತುಮ್ಚ್ಯಾ ಘರಾತ್ನಿ ಅಸ್ರೊ ದಿವ್ಕನ್ಯಾಶಿ, ಮಿಯಾ ನಾಗ್ಡೊ ಹೊತ್ತೊ ತನ್ನಾ ತುಮಿ ಮಾಕಾ ನೆಸುಕ್ ಕಪ್ಡೆ ದಿವ್ಕನ್ಯಾಶಿ. ಶಿಕ್ ಹೊತ್ತೊ ಅನಿ ಬಂದಿಖಾನ್ಯಾತ್ ಹೊತ್ತೊ ತನ್ನಾ ತುಮಿ ಮಾಜಿ ಕಾಳ್ಜಿ ಕರುಕ್‍ನ್ಯಾಶಿ. ಮನುನ್ ಸಾಂಗ್ತಾ.

44 ತನ್ನಾ ತೆನಿ, ಧನಿಯಾ, ಕನ್ನಾ ಅಮಿ ತುಕಾ ಭುಕೆನ್ ಹೊತ್ತೊ ನಾಹೊಲ್ಯಾರ್ ಸೊಸೆನ್ ಹೊತ್ತೊ. ಪರ್‌ದೆಶಿ ಹೊತ್ತೊ ನಾಹೊಲ್ಯಾರ್ ನಾಗ್ಡೊ ಹೊತ್ತೊ. ಶಿಕ್ ಹೊತ್ತೊ ನಾಹೊಲ್ಯಾರ್ ಬಂದಿಖಾನ್ಯಾತ್ ಹೊತ್ತೊ ಬಗಟ್ಲಾವ್. ಅನಿ ತುಕಾ ಮಜತ್ ಕರಿನಸ್ತಾನಾ ರ್‍ಹಾಲಾವ್? ಮನುನ್ ಜಬಾಬ್ ದಿತ್ಯಾತ್. 45 ತನ್ನಾ ರಾಜಾ, ಮಿಯಾ ತುಮ್ಕಾ ಖರೆಚ್ ಸಾಂಗ್ತಾ, ಕನ್ನಾ ತುಮಿ ಮಾಜ್ಯಾ ಹ್ಯಾ ಭಾವಾನಿತ್ಲ್ಯಾ ಎಕ್ ಬಾರಿಕ್ಲ್ಯಾ ಭಾವಾಕ್ ಮಜತ್ ಕರಿನಸ್ತಾನಾ ರ್‍ಹಾಲ್ಯಾಶಿ, ತನ್ನಾ ಮಾಕಾಚ್ ಮಜತ್ ಕರಿನಸ್ತಾನಾ ರ್‍ಹಾಲ್ಯಾಶಿ. ಮನುನ್ ಮನ್ತಾ. 46 ತನ್ನಾ ಹ್ಯಾ ಬರ್‍ಯಾ ವಾಟೆನ್ ಚಲಿನಸಲ್ಲ್ಯಾ ಲೊಕಾಕ್ನಿ ಖಾಯಮ್ಚ್ಯಾ ಶಿಕ್ಷೆತ್ ಧಾಡುನ್ ಹೊತಾ ಅನಿ ಬರ್‍ಯಾ ವಾಟೆನ್ ಚಲಲ್ಲಿ ಲೊಕಾ ಕನ್ನಾಚ್ ಮರಾನ್ ನಸಲ್ಲ್ಯಾ ಜಿವನಾಕ್ ಜಾತ್ಯಾತ್.