1 ಸರ್ವೆಸ್ಪರಾನ್ ಮೊಯ್ಜೆಕ್, "ಪಯ್ಲ್ಯಾ ಸಾರ್ಕೆ ಅನಿಬಿ ದೊನ್ ಗುಂಡ್ಯಾಚಿ ಫಳಿಯಾ ತಯಾರ್ ಕರುನ್ಗೆ, ಅನಿ ಪಯ್ಲೆ ತಿಯ್ಯಾ ಪೊಡಲ್ಯಾ ಗುಂಡ್ಯಾ ವೈನಿ ಗೊಸ್ಟಿಯಾ ಹೊತ್ತ್ಯಾ ಸಾರ್ಕೆ, ಮಿಯ್ಯಾ ತೆಂಚೆರ್ ಲಿವ್ತಾ. 2 ಉದ್ದ್ಯಾ ಸಕ್ಕಾಳಿ ತಯಾರ್ ಹೊವ್ನ್, ಸಿನಾಯ್ ಮಡ್ಡಿಚ್ಯಾ ತುದಿರ್ ಮಾಜ್ಯಾ ಇದ್ರಾಕ್ ಯೆವ್ನ್ ಇಬೆರಾ. 3 ತುಜಾ ವಾಂಗ್ಡಾ ಕೊನ್ ಬಿ ಯೆವ್ಚೆ ನ್ಹಯ್ , ಹ್ಯಾ ಮಡ್ಡಿಚ್ಯಾ ಜಗ್ಗೊಳ್ ಕೊನ್ಬಿ ದಿಸುಚೆ ನ್ಹಯ್ , ಬಕ್ರೆ, ನಾತರ್ ಗೊರಾ ಡೊರಾ ಸೈತ್ ಮಡ್ಡಿಚ್ಯಾ ಫಿಡೆ ಚರುಚೆ ನ್ಹಯ್ " ಮಟ್ಲ್ಯಾನ್. 4 ಸರ್ವೆಸ್ಪರಾನ್ ಹುಕುಮ್ ದಿಲ್ಯಾ ಸಾರ್ಕೆ, ಮೊಯ್ಜೆನ್ ದೊನ್ ಗುಂಡ್ಯಾಚಿ ಫಳಿಯಾ ತಯಾರ್ ಕರುನ್ ಘೆವ್ನ್ ಸಕ್ಕಾಳಿ ನಸ್ಕಾತ್ ತೆ ಘೆವ್ನ್ ಸಿನಾಯ್ ಮಡ್ಡಿರ್ ಗೆಲೊ. 5 ತನ್ನಾ ಸರ್ವೆಸ್ಪರ್ ಮಳ್ಬಾನ್ ಧಾಪುನ್ಗೆವ್ನ್ ಖಾಲ್ತಿ ಯೆವ್ನ್ ತೆಚೆಕ್ಡೆ ಇಬೆ ರಾವ್ನ್, ಅಪ್ನಾಚೆ ಪವಿತ್ರ್ ನಾವ್, ಸರ್ವೆಸ್ಪರ್ ಮನುನ್ ಪರ್ಗಟ್ಲ್ಯಾನ್. 6 ತನ್ನಾ ಸರ್ವೆಸ್ಪರ್ ತೆಚ್ಯಾ ಇದ್ರಾಕ್ ಯೆವ್ನ್,

ಮಿಯಾ, ದಯಾ ಅನಿ ಕಾಳಜಿ ಹೊತ್ತೊ ದೆವ್,

ಕಮ್ಮಿ ರಾಗಾಚೊ,

ಪ್ರೆಮ್ ಅನಿ ವಿಶ್ವಾಸಾಚೊ ದೆವ್,

7 ಹಾಜಾರ್ ಟಕ್ಲ್ಯಾಂಚ್ಯಾ ಪತರ್ಬಿ ತುಜ್ಯಾ ಪಿಳ್ಗಿಕ್ ಪ್ರೆಮ್ ದಾಕ್ವುತಾ, ಪಾಪಾಚಿ ಅಪ್ರಾದಾ ಮಾಪ್ ಕರ್ತಾ, ಖರೆ ಮಿಯಾ ಚುಕ್ ಕರಲ್ಯಾಂಚ್ಯಾ ಪೊರಾಕ್ನಿ ಅನಿ ನಾತ್ರಾಕ್ನಿ ತೆಂಚ್ಯಾ ತಿನ್ವಾ ಅನಿ ಚಾರ್ವ್ಯಾ ಪಿಳ್ಗಿಕ್ ಶಿಕ್ಷ್ಯಾ ದಿವ್ಕ್ ಇಸ್ರಿನಾ, ಮಟ್ಲ್ಯಾನ್. 8 ಮೊಯ್ಜೆನ್ ಎಕ್ದಮ್ ಅಡ್ವೆ ಪಡುನ್ ಆರಾದನ್ ಕರುನ್, 9 "ಸರ್ವೆಸ್ಪರಾ ತುಜಿ ದಯಾ ಮಾಕಾ ಗಾವಲ್ಲಿ ಹೊಯ್ ಹೊಲ್ಯಾರ್, ತಿಯಾಚ್ ಮಾಜ್ಯಾ ವಾಂಗ್ಡಾ ಯೆವ್ಚೆ, ಅಮ್ಚಿ ಲೊಕಾ ಮಂಡ್ ಹಾತ್, ಖರೆ ತಿಯಾ ಅಮ್ಚಿ ಪಾಪಾ ಅನಿ ಬುರ್ಶಿ ಕಾಮಾ ಕ್ಷಮಾ ಕರುನ್, ತುಜಿ ಸ್ವತಾಚಿ ಲೊಕಾ ಕರುನ್ ಅಮ್ಕಾ ಮಾನುನ್ ಘೆವ್ಚೆ", ಮನುನ್ ಮಾಗ್ನಿ ಕರ್ಲ್ಯಾನ್.

10 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, ಆಯ್ಕ್, ಮಿಯಾ ಎಕ್ ಕರಾರ್ ಕರ್ತಾ, ಹ್ಯಾ ಜಗಾತ್ ಖೈ ಬಿ ಖಲ್ಯಾಬಿ ಲೊಕಾತ್ನಿ ಹೊವ್ಕ್ ನಸಲ್ಲೆ ಮೊಟಿ ಕಾಮಾ ತುಜಿ ಲೊಕಾ ಬಗಿ ಸಾರ್ಕೆ ಕರ್ತಾ, ತುಜ್ಯಾ ಭೊತ್ಯಾನಿ ಹೊತ್ತಿ ಸಗ್ಳಿ ಲೊಕಾ ಸರ್ವೆಸ್ಪರಾಚೆ ಚಮತ್ಕಾರ್ ಬಗ್ತಾತ್, ಮಿಯಾ ತುಮ್ಚ್ಯಾ ವಿಶಯಾತ್ ಕರುಚೆ ಮನುನ್ ಚಿಂತಲ್ಲೆ ಲೈ ಮೊಟೆ ಹಾಯ್. 11 ಮಿಯಾ ಅತ್ತಾ ಹುಕುಮ್ ದಿತಲ್ಯಾಕ್ ತುಮಿ ಮಾನ್ ದಿವ್ನ್ ಚಲುಚೆ, ಅಬಕ್, ಮಿಯಾ ಅಮೊರಿಯ, ಕಾನಾನ್ ಕಾರಾ, ಹಿತ್ತಿಯಾ ಅನಿ ಪರಿಜಿಯಾ, ಹಿವ್ವಿಯಾ, ಅನಿ ಜೆಬುಸಿಯಾಕ್ನಿ ತುಮ್ಚ್ಯಾ ಇದ್ರಾಕ್ ಪಳಸ್ತಾ. 12 ಬಗಾ, ತುಮಿ ಜಾವ್ನ್ ಪಾವ್ತಲ್ಯಾ ದೆಶಾಚ್ಯಾ ಲೊಕಾಂಚ್ಯಾ ವಾಂಗ್ಡಾ ಕಸ್ಲೊಬಿ ಕರಾರ್ ಕರುನ್ ಘೆವ್ಕ್ ನ್ಹಯ್ , ತೊ ಕರಾರ್ ತುಮ್ಕಾ ಪಾಸೊ ಹೊವ್ನ್ ರಾತಿಲ್. 13 ತಸೆಹೊವ್ನ್, ತುಮಿ ತೆಂಚೆ ಬಲಿ ಭೆಟ್ವುತಲೆ ಕಟ್ಟೆ ಪಾಡ್ವುನ್, ತೆಂಚೆ ಗುಂಡ್ಯಾಚೆ ಖಾಂಬೆ ಪಾಡ್ವುನ್ ಅಶೆರ್ ಮನ್ತಲೆ ಮುರ್ತಿಯಾಂಚೆ ಖಾಂಬೆ ತೊಡುನ್ ಟಾಕುಚೆ. 14 ಸ್ವತಾಚಿ ಮಾನ್ ರಾಕುನ್ ಘೆತಲೊ ಮನ್ತಲ್ಯಾ ನಾವಾಚೊ ಸರ್ವೆಸ್ಪರ್ , ಅಪ್ನಾಚೆ ಮಾನ್ ದುಶ್ರ್ಯಾಕ್ನಿ ಜಾವ್ಕ್ ದಿಯ್ ನಸಲ್ಲ್ಯಾ ಸಾಟ್ನಿ, ತುಮಿ ದುಶ್ರ್ಯಾ ಖಲ್ಯಾಬಿ ದೆವಾಚ್ಯಾ ಫಿಡೆ ಡಬ್ಬ್ ಪಡುಚೆ ನ್ಹಯ್ . 15 ತುಮಿ ತ್ಯಾ ದೆಶ್ಯಾಚ್ಯಾ ಲೊಕಾಂಚ್ಯಾಕ್ನಾ ಕರಾರ್ ಕರುನ್ಗೆಯ್ ನಸ್ತಾನಾ ಹುಶಾರ್ಕಿನ್ ರಾವಾ, ತಸೆ ಹೊಲ್ಯಾರ್ ತೆನಿ ಅಪ್ನಾಚ್ಯಾ ದೆವಾಕ್ನಿ ಫುಜ್ಯಾ ಕರುನ್ ಬಲಿ ಭೆಟ್ವಲ್ಲ್ಯಾ ತನ್ನಾ ತೆಂಚ್ಯಾತ್ಲೊ ಕೊನ್ ತರ್ಬಿ ತುಮ್ಕಾ ಜೆವ್ನಾಕ್ ಬಲ್ವುತಲೊ, ಅನಿ ತುಮಿ ಜಾವ್ನ್ ಜೆವ್ಸಿಲಾ ಬಗಾ; 16 ತವ್ಡೆಚ್ ನಸ್ತಾನಾ, ತುಮಿ ತೆಂಚ್ಯಾಕ್ನಾ ಚೆಡ್ವಾ, ಝಿಲ್ಗೆ ಹಾನ್ತಲೆ ನಾತರ್ ದಿತಲೆ ಹೊಯ್ಲ್, ಮಾನಾ ತಿ ಸುನ್ನಾ ಅವ್ಸಿಚ್ಯಾ ಘರಾಚ್ಯಾ ದೆವಾಕ್ನಿ ಫುಜ್ಯಾ ಕರ್‍ತಲೆ ಹೊವ್ನ್ ತುಮ್ಚ್ಯಾ ಪೊರಾಕ್ನಿ ದುಶ್ರ್ಯಾ ದೆವಾಂಚ್ಯಾ ಫುಜ್ಯಾಚ್ಯಾ ಪಾಪಾತ್ ಘಾಲ್ತಿಲ್, ಹುಶ್ಯಾರ್ಕಿನ್ ರಾವಾ. 17 ಮುರ್ತಿಯಾ ದೆವ್ ಮನುನ್ ಕರುನ್ ಘೆವ್ ನಕಾಸಿ. 18 ಫುಗ್ ನಸಲ್ಲಿ ಭಾಕ್ರಿಯಾ ಖಾತಲಿ ಜಾತ್ರಾ ಕರುಚೆ, ಮಿಯಾ ತುಮ್ಕಾ ಹುಕುಮ್ ದಿಲ್ಲ್ಯಾ ಸಾರ್ಕೆ ಪೈಲ್ಯಾ ಮೈನ್ಯಾತ್ ಸಾತ್ ದಿಸಾ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ, ತುಮಿ ಇಜಿಪ್ತಾಕ್ನಾ ಸುಟ್ಕಾ ಹೊವ್ನ್ ಯೆಲ್ಲೆ ಪೈಲೆಚ್ಯಾ ಮೈನ್ಯಾತುಚ್ ನ್ಹಯ್ .

19 ತುಮ್ಚ್ಯಾತ್ ಮಾನ್ಸಾಚೆ ಹೊಂವ್ದಿತ್, ಗೊರಾ-ಡೊರಾಂಚೆ ಹೊಂವ್ದಿತ್ ಪೈಲೆ ಉಪಾಜಲ್ಲೆ ಗಂಡ್ ಹೊತ್ತೆ ಸಗ್ಳೆ ಮಾಜೆಚ್. 20 ಗಾಡ್ವಾಚ್ಯಾ ಪೆಟ್ಯಾಚ್ಯಾ ಬದ್ಲಾಕ್ ಬಕ್ರ್ಯಾಚೊ ಪೆಟೊ ದಿವ್ನ್ ತ್ಯಾ ಗಾಡ್ವಾಚ್ಯಾ ಪೆಟ್ಯಾಕ್ ಸೊಡ್ಸುನ್ ಘೆವ್ಚೆ, ತಸೆ ಸೊಡ್ಸುನ್ ಘೆವ್ಕ್ ಹೊವ್ಕ್ ನಸ್ಲ್ಯಾರ್, ತೆಜೊ ಗಳೊ ಚಿರ್ಡುನ್ ಜಿವ್ ಕಾಡುಚೆ, ಖರೆ ತುಮ್ಚ್ಯಾ ಥೊರ್ಲ್ಯಾ ಝಿಲ್ಗ್ಯಾಕ್ ಜಿವ್ ಕಾಡಿನಸ್ತಾನಾ ಬದ್ಲಿಕ್ ದಿವ್ನ್ ಸೊಡ್ಸುನ್ ಘೆವ್ಚೆ,

ಮಾಜ್ಯಾ ಇದ್ರಾಕ್ ಯೆತಾನಾ ಎಕ್ಲೊಬಿ ಕಾನಿಕ್ ನಸ್ತಾನಾ ದಿಸುಚೆ ನ್ಹಯ್ .

21 ಸಾ ದಿಸ್ ತುಮ್ಚೆ ಕಾಮ್ ಕರುನ್ ಸಾತ್ವ್ಯಾದಿಸಿ ಕಾಯ್ಬಿ ಕಾಮ್ ಕರಿನಸ್ತಾನಾ ರಾವ್ಚೆ, ಪೆರ್ತಲ್ಯಾ ಅನಿ ಕಾತರ್ತಲ್ಯಾ ಎಳಾರ್ಬಿ ತಸೆಚ್ ಸಾತ್ವ್ಯಾ ದಿಸಾತ್ ಕಾಯ್ಬಿ ಕಾಮ್ ಕರುಚೆ ನ್ಹಯ್ . 22 ಪಾತ್ಕಾಚೊ ಸನ್ ಹೊಲ್ಲ್ಯಾ ಉಲ್ಲಿ ವಾರಾಂಚ್ಯಾ ಮಾನಾ ಘಂವಾಚ್ಯಾ ಪಿಕೆಚಿ ಪೈಲೆಚಿ ಭೆಟ್ವುತಲಿ ಜಾತ್ರಾ, ಅನಿ ಮೈನ್ಯಾಚ್ಯಾ ಆಕ್ರಿಕ್ ಪಿಕ್ ಗೊಳಾ ಕರ್ತಲಿ ಜಾತ್ರಾ ಕರುಚೆ. 23 ತುಮ್ಚ್ಯಾತ್ಲಿ ಫುರಾ ಘವ್ಮಾನ್ಸಾ ವರ್ಸಾಕ್ ತಿನ್ದಾ ಇಜ್ರಾಯೆಲಾಂಚೊ ದೆವ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಆರಾದನ್ ಕರುಚೆ. 24 ಮಿಯಾ ತುಮ್ಚ್ಯಾ ಇದ್ರಾಕ್ನಾ ದುಶ್ರ್ಯಾ ದೆಶ್ಯಾಚ್ಯಾಕ್ನಿ ಪಳ್ಸುನ್ ತುಮ್ಚೊ ದೆಶ್ ವಾಡ್ವುತಾ, ತವ್ಡೆಚ್ ನಸ್ತಾನಾ ತುಮಿ ವರ್ಸಾಕ್ ತಿನ್ದಾ ತುಮ್ಚೊ ದೆವ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಜಾತಾನಾ, ಕೊನಾಚೆನ್ಬಿ ತುಮ್ಚಿ ಜಿಮಿನ್ ಕಾಡುನ್ಗೆವ್ಕ್ ಹೊಯ್ನಾ.

25 ಮಾಕಾ ಬಲಿ ಭೆಟ್ವುತಾನಾ, ಬಲಿಚ್ಯಾ ಜನಾವರಾಚ್ಯಾ ರಗ್ತಾ ವಾಂಗ್ಡಾ ಆಂಬೊಟ್ ಪಿಟ್ಟ್ ಭೆಟ್ವುಚೆ ನ್ಹಯ್ , ಪಾತ್ಕಾಚ್ಯಾ ಸನಾತ್ ತುಮಿ ಭೆಟ್ವಲ್ಲೆ ಮಾಂಸ್ ದುಸ್ರೆಂದಿಸಾ ಪತರ್ಬಿ ಥವ್ಚೆ ನ್ಹಯ್ . 26 ಜಿಮ್ನಿಚ್ಯಾ ಪೈಲೆಚ್ಯಾ ಫಳಾತ್ ಬರೆ ಹೊತ್ತೆ, ತುಮ್ಚೊ ದೆವ್ ಸರ್ವೆಸ್ಪರಾಚ್ಯಾ ಗುಡಿಕ್ ಹಾನುಚೆ, ಶೆಳಿಚ್ಯಾ ಪೆಟ್ಯಾಕ್ ತೆಜ್ಯಾ ಅವ್ಸಿಚ್ಯಾ ದುದ್ದಾತ್ ಸಿಜ್ವುಚೆ ನ್ಹಯ್ . 27 ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಹಿ ಗೊಸ್ಟಿಯಾ ಲಿವ್, ಹ್ಯಾ ಗೊಸ್ಟಿಯಾಂಚ್ಯಾ ವೈನಾ ತುಜೆಕ್ನಾ ಅನಿ ಇಜ್ರಾಯೆಲ್ ಲೊಕಾಂಚ್ಯಾಕ್ನಾ ಕರಾರ್ ಕರುನ್ಗೆಟ್ಲಾ" ಮಟ್ಲ್ಯಾನ್. 28 ಮೊಯ್ಜೆನ್, ಸರ್ವೆಸ್ಪರಾಚ್ಯಾ ಇದ್ರಾಕ್ ಮಡ್ಡಿ ವರ್‍ತಿ ಚಾಳಿಸ್ ರ್‍ಹಾತ್ ಅನಿ ದಿಸ್ ಕಾಯ್ಬಿ ಖಾಯ್ ನಸ್ತಾನಾ, ಅನಿ ಕಾಯ್ಬಿ ಫಿಯ್ ನಸ್ತಾನಾ ರಾವ್ನ್, ಸರ್ವೆಸ್ಪರಾಚಿ ಕರಾರಾಚಿ ಹುಕುಮಾ ಗುಂಡ್ಯಾಂಚ್ಯಾ ವರ್‍ತಿ ಲಿವ್ಲ್ಯಾನ್.

29 ಮೊಯ್ಜೆ ತೆ ದೊನ್ ಹುಕುಮಾಂಚೆ ಗುಂಡೆ ಹಾತಿತ್ನಿ ಧರುನ್ಗೆವ್ನ್, ಸಿನಾಯ್ ಮಡ್ಡಿ ಉತ್ರುನ್ ಯೆತಾನಾ, ತೆನಿ ಸರ್ವೆಸ್ಪರಾಕ್ಡೆ ಬೊಲುನ್ ಯೆಲ್ಲ್ಯಾ ಸಾಟ್ನಿ ತೆಚೆ ತೊಂಡ್ ಹೊಳ್ವುಲಾಗಲ್ಲೆ, ಖರೆ ತೆಕಾ ತೆ ಕಳುಕ್ ನಾ. 30 ಮೊಯ್ಜೆಚೆ ತೊಂಡ್ ಹೊಳ್ವುಲಾಗಲ್ಲೆ ಆರೊನ್ ಅನಿ ಹುರಲ್ಲ್ಯಾ ಇಜ್ರಾಯೆಲ್ ಲೊಕಾನಿ ಬಗುನ್ ತೆಜ್ಯಾ ಜಗ್ಗೊಳ್ ಯೆವ್ಕ್ ಭಿಂವ್ಲ್ಯಾನಿ. 31 ಖರೆ ಮೊಯ್ಜೆನ್ ತೆಂಕಾ ಬಲ್ವುತಾನಾ, ಆರೊನ್ ಅನಿ ತೆಂಚ್ಯಾ ತಾಂಡ್ಯಾಚೆ ಸಗ್ಳೆ ಅಧಿಪತಿ ತೆಜ್ಯಾ ಜಗ್ಗೊಳ್ ಯೆಲೆ, ಅನಿ ಮೊಯ್ಜೆನ್ ತೆಂಚ್ಯಾ ವಾಂಗ್ಡಾ ಬೊಲ್ಲ್ಯಾನ್. 32 ಮಾನಾ ಸಗ್ಳಿ ಇಜ್ರಾಯೆಲ್ ಲೊಕಾ ಜಗ್ಗೊಳ್ ಯೆಲಿ, ಮೊಯ್ಜೆನ್ ಅಪ್ನಿ ಸಿನಾಯ್ ಮಡ್ಡಿ ವರ್‍ತಿ ಸರ್ವೆಸ್ಪರಾಕ್ನಾ ಘೆಟಲ್ಲಿ ಸಗ್ಳಿ ಹುಕುಮಾ ತೆಂಕಾ ಸಾಂಗ್ಲ್ಯಾನ್. 33 ಮೊಯ್ಜೆನ್ ತೆಂಚ್ಯಾಕ್ನಾ ಬೊಲುನ್ ಹೊಲ್ಯಾ ಮಾನಾ ಅಪ್ನಾಚ್ಯಾ ತೊಂಡಾ ವರ್‍ತಿ ಮುಸ್ಕೊ ಘಾಲುನ್ ಘೆಟ್ಲ್ಯಾನ್. 34 ತೊ ಸರ್ವೆಸ್ಪರಾಕ್ಡೆ ಬೊಲುಕ್ ಜಾತಾನಾ, ತೊ ಮುಸ್ಕೊ ಕಾಡುನ್ ಥವ್ತಾ, ಅನಿ ಅಪ್ನಿ ಭಾಯ್ರ್ ಯೆತಾನಾ ಸರ್ವೆಸ್ಪರಾಚಿ ಹುಕುಮಾ ಇಜ್ರಾಯೆಲ್ ಲೊಕಾಕ್ನಿ ಕಳ್ವುತಾ. 35 ಮೊಯ್ಜೆಚೆ ತೊಂಡ್ ಹೊಳ್ವುಲಾಗಲ್ಲೆ ಇಜ್ರಾಯೆಲ್ ಲೊಕಾ ಬಗಿತ್, ತಸೆ ಹೊವ್ನ್, ತೊ ಸರ್ವೆಸ್ಪರಾಕ್ಡೆ ಬೊಲುಕ್ ಜಾಯ್ ಪತರ್ಬಿ ಅಪ್ನಾಚ್ಯಾ ತೊಂಡಾ ವೈಲೊ ಮುಸ್ಕೊ ಧಾಪುನ್ ಘೆವ್ನುಚ್ ಹೊತ್ತೊ.