ನಿರ್ಗಮನ್ 9

ಜನಾವರಾಂಚೆ ಮರಾನ್

1 ತೆಚ್ಯಾ ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, "ತಿಯಾ ಫಾರೊವಾಚ್ಯಾ ಜಗ್ಗೊಳ್ ಜಾವ್ನ್, ‘ಇಬ್ರಿಯಾಂಚ್ಯಾ ದೆವ್ ಸರ್ವೆಸ್ಪರಾನ್ ಅಪ್ನಾಕ್ ಆರಾದನ್ ಕರುಕ್ ಅಪ್ಲ್ಯಾ ಲೊಕಾಕ್ನಿ ತುಮ್ಚ್ಯಾಕ್ನಾ ಜಾವ್ಕ್ ಒಪ್ಕಿ ದಿವ್ಚೆ ಮನುನ್ ಸಾಂಗಲ್ಯಾನ್. 2 ತಿಯಾ ತೆಂಕಾ ಒಪ್ಕಿ ದಿಯ್ನಸ್ತಾನಾ ಅಡ್ಡಿ ಕರಲ್ಲೆ ಹೊಲ್ಯಾರ್, 3 ಸರ್ವೆಸ್ಪರ್ ತುಜ್ಯಾ ದೆಶ್ಯಾತ್ ಹೊತ್ತ್ಯಾ ಘೊಡ್ಕಿಯಾ, ಗಾಡ್ವಾ, ಒಂಟಿಯಾ, ಗೊರಾ-ಡೊರಾ, ಬಕ್ರಿಯಾ, ಶೆಳಿಯಾ, ತುಮ್ಚ್ಯಾ ಹ್ಯಾ ಸಗ್ಳ್ಯಾ ಜನಾವರಾಂಚ್ಯಾ ವರ್‍ತಿ ಹಾತ್ ಉಕ್ಲುನ್ ಮೊಟ್ಟಿ ಶಿಕ್ ಯೆಯ್ ಸಾರ್ಕೆ ಕರುನ್, ತುಕಾ ಶಿಕ್ಷ್ಯಾದಿತಾ ಕರ್ತಾ, ಮನ್ತಲೆ ಕಳ್ವುನ್ ಘೆ. 4 ಸರ್ವೆಸ್ಪರ್ ಹೊವ್ನ್ ಹೊತ್ತೊ ಮಿಯಾ ಇಜ್ರಾಯೆಲಾಂಚ್ಯಾ ಅನಿ ಇಜಿಪ್ತಾಚ್ಯಾ ಲೊಕಾಂಚ್ಯಾ ಜನಾವರಾಕ್ನಿ ಫರಕ್ ಹೊಯ್ ಸಾರ್ಕೆ ಕರ್ತಾ, ಇಜ್ರಾಯೆಲಾಂಚ್ಯಾ ಜನಾವರಾತ್ನಿ ಎಕ್ಬಿ ಮರುನ್ ಜಾಯ್ನಾ’ ಮನುನ್ ಸಾಂಗ್. 5 ಸರ್ವೆಸ್ಪರ್ ಹೊವ್ನ್ ಹೊತ್ತೊ ಮಿಯಾ ಎಳ್ ನಿರ್ದಾರ್ ಕರುನ್ ಥವ್ಲಾ, ಉದ್ದ್ಯಾಚ್ ಹೆ ಕಾಮ್ ದೆಸಾತ್ ಕರ್ತಾ; ಮನುನ್ ಸಾಂಗ್" ಮಟ್ಲ್ಯಾನ್. 6 ದುಸ್ರೆಂದಿಸಿಚ್ ಸರ್ವೆಸ್ಪರಾನ್ ಹೆ ಕಾಮ್ ಕರ್ಲ್ಯಾನ್, ಇಜಿಪ್ತ್ ಲೊಕಾಂಚಿ ಸಗ್ಳಿ ಜನಾವರಾ ಮರುನ್ ಗೆಲಿ, ಖರೆ ಇಜ್ರಾಯೆಲಾಂಚ್ಯಾ ಜನಾವರಾತ್ನಿ ಎಕ್ಬಿ ಮ್ಹರುಕ್ನಾ. 7 ಫಾರೊವ್ ರಾಜಾನ್ ಆಳಾಕ್ನಿ ಧಾಡುನ್ ಇಚ್ಯಾರ್ನೆ ಕರ್ಲ್ಯಾನ್, ತನ್ನಾ ಇಜ್ರಾಯೆಲಾಂಚ್ಯಾ ಜನಾವರಾತ್ನಿ ಎಕ್ಬಿ ಮರುನ್ ಜಾವ್ಕನಾ ಮನ್ತಲೆ ಕಳುನ್ ಯೆಲೆ, ಹೊಲ್ಯಾರ್ಬಿ ರಾಜಾನ್ ಮಂಡ್ ಪಾನಾನ್, ತ್ಯಾ ಲೊಕಾಕ್ನಿ ಜಾವ್ಕ್ ಒಪ್ಕಿ ದಿವ್ಕ್ ನಾ.

ಸಿಜ್ತಲೆ

8 ಸರ್ವೆಸ್ಪರಾನ್ ಮೊಯ್ಜೆ ಅನಿ ಆರೊನಾಕ್, "ತುಮಿ ಚುಲಿತ್ಲಿ ರಕ್ಕಾ ಹಾತ್ ಭರುನ್ ಘೆವಾ, ಅನಿ ಮೊಯ್ಜೆ ತಿ ರಕ್ಕಾ ಫಾರೊವ್ ರಾಜಾಚ್ಯಾ ಇದ್ರಾಕ್ ಮಳ್ಬಾಕ್ಡೆ ವಾರ್ಯಾತ್ ಸಿಪುನ್ದಿತ್, 9 ತಿ ರಕ್ಕಾ ಧುಳ್ ಸಾರ್ಕೆ ಹೊವ್ನ್ ಇಜಿಪ್ತ್ ದೆಶ್ಯಾತ್ ಫುರಾ ಪಗ್ಳುನ್ ಮಾನ್ಸಾಂಚ್ಯಾ ಅನಿ ಜನಾವರಾಂಚ್ಯಾ ವರ್‍ತಿ ಪೊಕೆ ಉಟಿಸಾರ್ಕೆ ಕರುನ್ ತೆ ಫುಟುನ್ ದುಕ್ಕಾ ಹೊಯ್ ಸಾರ್ಕೆ ಕರ್ತಾ" ಮನುನ್ ಸಾಂಗ್ಲ್ಯಾನ್. 10 ಮೊಯ್ಜೆನ್ ಅನಿ ಆರೊನಾನ್ ಚುಲಿತ್ಲಿ ರಕ್ಕಾ ಘೆವ್ನ್ ಫಾರೊವ್ ರಾಜಾಚ್ಯಾ ಇದ್ರಾಕ್ ಇಬೆರ್‍ಹಾಲೆ, ಅನಿ ಮೊಯ್ಜೆನ್ ತಿ ರಕ್ಕಾ ಮಳ್ಬಾಕ್ಡೆ ವಾರ್ಯಾತ್ ಸಿಪ್ಲ್ಯಾನ್, ತ್ಯಾ ರಕ್ಕಾನಿ ಮಾನ್ಸಾತ್ನಿ ಅನಿ ಜನಾವರಾತ್ನಿ ಪೊಕೆ ಹೊವ್ನ್ ದುಕ್ಕಾ ಹೊಯ್ ಸಾರ್ಕೆ ಹೊಲೆ. 11 ತೆ ಪೊಕೆ ಮೊಡ್ಗಾರಾಕ್ನಿ ಅನಿ ಇಜಿಪ್ತಾಚ್ಯಾ ಸಗ್ಳ್ಯಾ ಲೊಕಾತ್ನಿಬಿ ಹೊತ್ತ್ಯಾ ಸಾಟ್ನಿ ತ್ಯಾ ಮೊಡ್ಗಾರಾಕ್ನಿ ಹ್ಯಾ ಪೊಕ್ಯಾಂಚ್ಯಾ ಸಾಟ್ನಿ ಮೊಯ್ಜೆಚ್ಯಾ ಇದ್ರಾಕ್ ಇಬೆ ರಾವ್ಕ್ ಹೊವ್ಕ್ ನಾ. 12 ಹೊಲ್ಯಾರ್ಬಿ ಸರ್ವೆಸ್ಪರಾನ್ ಅದ್ದಿಚ್ ಮೊಯ್ಜೆಕ್ ಸಾಂಗಲ್ಲ್ಯಾ ಸಾರ್ಕೆಚ್ ಹೊಲೆ, ಸರ್ವೆಸ್ಪರಾನ್ ಫಾರೊವ್ ರಾಜಾಚೊ ಮನ್ ಮಂಡ್ ಕರಲ್ಲ್ಯಾ ಸಾಟ್ನಿ, ತೆನಿ ತೆಂಚ್ಯಾ ಬೊಲ್ನ್ಯಾಕ್ನಿ ಕಾನ್ ದಿವ್ಕ್ ನಾ.

ಗಾರ್ಬಿಯಾ

13 ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್, ತಿಯಾ ಸಕ್ಕಾಳಿ ಉಟುನ್ ಫಾರೊವ್ ರಾಜಾಚ್ಯಾ ಇದ್ರಾಕ್ ಇಬೆರಾವ್ನ್ ಅಸೆ ಸಾಂಗ್, ಇಬ್ರಿಯಾಂಚೊ ದೆವ್ ಸರ್ವೆಸ್ಪರ್ ದಿತಲೆ ಹುಕುಮ್ ಹೆ, ಮಾಕಾ ಆರಾದನ್ ಕರುಕ್ ಮಾಜ್ಯಾ ಲೊಕಾಕ್ನಿ ಒಪ್ಕಿ ದಿವ್ಚೆ, 14 ನಾ ಹೊಲ್ಯಾರ್ ಹ್ಯಾ ಪಟಿ ಮಿಯಾ ದಿತಲೊ ತರಾಸ್ ತುಜ್ಯಾ ಲೊಕಾಕ್ನಿ ಅನಿ ಅಧಿಕಾರಿಯಾಕ್ನಿ ತವ್ಡೆಚ್ ನ್ಹಯ್ ತುಕಾಬಿ ಲಾಗ್ತಾ, ಹೆಜ್ಯಾ ವೈನಾ ಸಗ್ಳ್ಯಾ ಜಗಾತುಚ್ ಮಾಜ್ಯಾ ಸಮಾ ಕೊನ್ಬಿ ನಾ ಮನ್ತಲೆ ತುಕಾ ಕಳುನ್ ಯೆತಾ, 15 ಮಿಯಾ ಹಾತ್ ಉಕ್ಲುನ್ ತುಜ್ಯಾ ಲೊಕಾಕ್ನಿ ಬುರ್ಸ್ಯಾ ರೊಗಾನಿ ಮಾರುನ್ ಟಾಕಿ ಸಾರ್ಕೆ ಹೊತ್ತೆ, ತನ್ನಾ ತಿಯಾ ಅಜುನ್ ಪತರ್ ಬಿ ಜಿಮ್ನಿ ವರ್‍ತಿ ರಾಯ್ನಸ್ತಾನಾ ನಾಶ್ ಹೊವ್ನ್ ಜಾಯ್ ಹೊತ್ತೈಯ್. 16 ಖರೆ ಮಿಯಾ ತುಕಾ ಮಾಜಿ ಬಳ್ ದಾಕ್ವುನ್ ಮಾಜೆ ನಾವ್ ಸಗ್ಳ್ಯಾ ಜಗಾಕ್ ಪರ್ಗಟ್ ಕರುಚೆ ಮನ್ತಲ್ಯಾ ಉದ್ದೆಸಾನ್ ಜಿವ್ ಕಾಡಿ ನಸ್ತಾನಾ ಹುರ್ವುಲಾ. 17 ತಿಯಾ ಮಾಜ್ಯಾ ಲೊಕಾಕ್ನಿ ಜಾವ್ಕ್ ದಿಯ್ನಸ್ತಾನಾ ತೆಂಕಾ ಅಡ್ಕಳ್ ಕರುಲೈ ಕಾಯ್? 18 ತಸೆ ಹೊಲ್ಯಾರ್ ಉದ್ದ್ಯಾ ಯೆವ್ಡ್ಯಾ ಎಳಾಕ್ ಗಾರ್ಬಿಯಾಂಚೊ ಪಾವ್ಸ್ ಯೆಯ್ ಸಾರ್ಕೆ ಕರ್ತಾ, ಇಜಿಪ್ತ್ ರಾಜ್ ತಯಾರ್ ಹೊಲ್ಯಾಕ್ನಾ ಆಜ್ ಪತರ್ಬಿ ತಸ್ಲೊ ಪಾವ್ಸ್ ಪಡುಕ್ ನತ್ತೊ, ತಸ್ಲೊ ಗಾರ್ಬಿಯಾಂಚೊ ಪಾವ್ಸ್ ಯೆಯ್ ಸಾರ್ಕೊ ಕರ್ತಾ. 19 ತಸೆ ಹೊವ್ನ್, ತಿಯಾ ಆಳಾಕ್ನಿ ಧಾಡುನ್ ತುಜ್ಯಾ ಜನಾವರಾಕ್ನಿ ಅನಿ ಸೆತಾ ಭಾತಾತ್ನಿ ಹೊತ್ತೆ ಸಗ್ಳೆ ಸಮಾ ಕರುನ್ ಥವ್, ಘರಾಕ್ ಯೆಯ್ ನಸ್ತಾನಾ ಮದ್ದಿ ಮಾಳಾತ್ ಹೊತ್ತಿ ಮಾನ್ಸಾ, ಜನಾವರಾ ಸಗ್ಳೆ ಗಾರ್ಬಿಯಾಂಚ್ಯಾ ಪಾವ್ಸಾಚ್ಯಾ ಮಾರಾಕ್ ಮ್ಹರುನ್ ಜಾತಾತ್. 20 ಫಾರೊವ್ ರಾಜಾಚ್ಯಾ ಅಧಿಕಾರಿಯಾತ್ನಿ ಉಲ್ಲ್ಯಾನಿ ಸರ್ವೆಸ್ಪರಾಚ್ಯಾ ಬೊಲ್ನ್ಯಾಕ್ನಿ ಭಿಂವ್ನ್ ಅಪ್ಲ್ಯಾ ಆಳಾಕ್ನಿ ಅನಿ ಜನಾವರಾಕ್ನಿ ಲಗ್ಗು ಲಗ್ಗುನಾ ಘರಾಕ್ ಬಲ್ವುನ್ಗೆಟ್ಲ್ಯಾನಿ. 21 ಹುರಲ್ಯಾನಿ ಸರ್ವೆಸ್ಪರಾಚ್ಯಾ ಹುಶಾರ್ಕಿಕ್ ಧ್ಯಾನ್ ದಿಯ್ನಸ್ತಾನಾ, ಅಪ್ಲ್ಯಾ ಆಳಾಕ್ನಿ ಅನಿ ಜನಾವರಾಕ್ನಿ ಸೆತಾತ್ನಿಚ್ ಸೊಡ್ಲ್ಯಾನಿ. 22 ಅನಿ ಸರ್ವೆಸ್ಪರಾನ್ ಮೊಯ್ಜೆಕ್ "ತುಜೊ ಹಾತ್ ಮಳ್ಬಾಕ್ಡೆ ಕರ್, ತನ್ನಾ ಇಜಿಪ್ತ್ ದೆಶ್ಯಾತ್ ಸಗ್ಳೊ ಗಾರ್ಬಿಯಾಂಚೊ ಪಾವ್ಸ್ ಪಡ್ತಾ, ಮಾನ್ಸಾಂಚ್ಯಾ ವರ್‍ತಿ ಅನಿ ಜನಾವರಾಂಚ್ಯಾವರ್‍ತಿ ಅನಿ ಸೆತಾತ್ಲ್ಯಾ ಪಿಕೆ ವರ್‍ತಿಬಿ ತೊ ಪಾವ್ಸ್ ಪಡ್ತಾ", ಮನುನ್ ಸಾಂಗ್ಲ್ಯಾನ್. 23 ತಸೆಚ್ ಮೊಯ್ಜೆನ್ ಅಪ್ಲೊ ದಾಂಡೊ ಉಕಲ್ಲ್ಯಾನ್, ತನ್ನಾ ಸರ್ವೆಸ್ಪರಾನ್ ಗುಡ್ಗುಡೊ ಅನಿ ಗಾರ್ಬಿಯಾಂಚೊ ಪಾವ್ಸ್ ಧಾಡುನ್, ಲಕ್ಲಕೊ ಜಿಮ್ನಿಕ್ ಮಾರ್ಲೊ, ಅನಿ ಗಾರ್ಬಿಯಾಂಚೊ ಪಾವ್ಸ್ ಸಗ್ಳ್ಯಾ ಇಜಿಪ್ತ್ ದೆಶ್ಯಾ ವರ್‍ತಿ ಪಡ್ಲೊ. 24 ತೊ ಗಾರ್ಬಿ ಯಾಂಚೊ ಪಾವ್ಸ್ ಲೈ ಮೊಟೊ ಅನಿ ಬಳಾಚೊ ಹೊತ್ತೊ, ಅನಿ ತೆಚ್ಯಾ ವಾಂಗ್ಡಾ ಲಕ್ಲಕುಲಾಗಲ್ಲೆ, ಇಜಿಪ್ತ್ ಮನ್ತಲೆ ದೆಶ್ ತಯಾರ್ ಹೊಲ್ಲ್ಯಾಕ್ನಾ ಅಸ್ಲೊ ಗಾರ್ಬಿಯಾಂಚೊ ಪಾವ್ಸ್ ಪಡಲೊಚ್ ನತ್ತೊ. 25 ತ್ಯಾ ಪಾವ್ಸಾ ವೈನಾ ಇಜಿಪ್ತ್ ದೆಶ್ಯಾತ್ ಸಗ್ಳ್ಯಾಕ್ಡೆ ಮಾನ್ಸಾ, ಜನಾವರಾ, ಅನಿ ಮಾಳ್ ಜಾಗ್ಯಾರ್ ಹೊತ್ತೆ ಸಗ್ಳೆಬಿ ನಾಸ್ ಹೊಲೆ, ಸೆತಾತ್ನಿ ಹೊತ್ತೆ ಪಿಕ್ ಫುರಾ ಝಡುನ್ ಗೆಲೆ, ಡಂಗ್ಳಿತ್ ಹೊತ್ತಿ ಝಾಡಾ ಸಗ್ಳಿ ಪಡುನ್ ಗೆಲಿ. 26 ಇಜ್ರಾಯೆಲಾಂಚಿ ಲೊಕಾ ರ್‍ಹಾತಲ್ಯಾ ಗೊಶೆನ್ ಮನ್ತಲ್ಯಾ ಪ್ರಾಂತ್ಯಾತ್ ತವ್ಡೊಚ್ ಪಾವ್ಸ್ ಪಡುಕ್ನಾ. 27 ತನ್ನಾ ಫಾರೊವ್ ರಾಜಾನ್ ಮೊಯ್ಜೆಕ್ ಅನಿ ಆರೊನಾಕ್ ಬಲ್ವುಕ್ ಲಾವ್ನ್, ತೆಂಕಾ, "ಮಿಯಾ ಚುಕ್ ಕರಲ್ಲೊ ಮನುನ್ ಅತ್ತಾ ಒಪ್ಪುನ್ಗೆತಾ, ಸರ್ವೆಸ್ಪರ್ ಖರೊ ಹಾಯ್, ಮಿಯಾ ಅನಿ ಮಾಜಿ ಲೊಕಾ ಚುಕ್ ಕರಲ್ಲೆ ಹೊವ್ನ್ ಹಾತ್, 28 ಹ್ಯೊ ಲೈ ಮೊಟೊ ಗುಡ್ಗುಡ್ಯಾಂಚೊ ಅನಿ ಗಾರ್ಬಿಯಾಂಚೊ ಪಾವ್ಸ್ ಅತ್ತಾ ಫಿರೆಚ್ ಫಿರೆ, ಹೆ ಸಗ್ಳೆ ಇಬೆ ಕರಿ ಸಾರ್ಕೆ ಸರ್ವೆಸ್ಪರಾಕ್ಡೆ ಮಾಗ್ನಿ ಕರಾ, ಹ್ಯಾ ದೆಶ್ಯಾಕ್ನಾ ಜಾವ್ಕ್ ಮಿಯಾ ತುಮ್ಕಾ ಒಪ್ಕಿ ದಿತಾ, ಹ್ಯಾನ್ ಫಿಡೆ ತುಮ್ಕಾ ಅಡ್ಡಿ ಕರಿನಾ", ಮಟ್ಲ್ಯಾನ್. 29 ತನ್ನಾ ಮೊಯ್ಜೆನ್, "ಮಿಯಾ ಹ್ಯಾ ಶಾರ್‍ಹಾತ್ನಾ ತಿಕ್ಡಿನ್ ಗೆಲ್ಲ್ಯಾ ತಸೆಚ್ ಸರ್ವೆಸ್ಪರಾಕ್ಡೆ ಹಾತ್ ವರ್‍ತಿ ಕರುನ್ ಮಾಗ್ನಿ ಕರ್ತಾ, ತನ್ನಾ ಗುಡ್ಗುಡೊ ಅನಿ ಗಾರ್ಬಿಯಾಂಚೊ ಪಾವ್ಸ್ ಕಮ್ಮಿ ಹೊತಾ, ಹೆಜ್ಯಾ ವೈನಾ ಸಗ್ಳೆ ಜಗ್ ಸರ್ವೆಸ್ಪರಾಚ್ಯಾ ಖಾಲ್ತಿ ಹಾಯ್ ಮನ್ತಲೆ ತುಮಿ ಕಳ್ವುನ್ ಘೆತ್ಯಾಸಿ. 30 ಹೊಲ್ಯಾರ್ಬಿ ತಿಯಾ ಅನಿ ತುಜಿ ಅಧಿಕಾರಿಯಾ ಸರ್ವೆಸ್ಪರಾಕ್ ಭಿಂಯ್ನ್ಯಾಸಿ ಮನ್ತಲೆ ಮಾಕಾ ಗೊತ್ತ್ ಹಾಯ್" ಮಟ್ಲ್ಯಾನ್. 31 ಘಂವ್ ಅನಿ ಆಗ್ಸಿಚೆ ಪಿಕ್ ನಾಶ್ ಹೊವ್ನ್ ಗೆಲೆ, ಕಶ್ಯಾಕ್ ಮಟ್ಲ್ಯಾರ್ ಘಂವ್ ಕನ್ಸಾ ಯೆಲ್ಲಿ ಹೊತ್ತಿ ಅನಿ ಆಗ್ಸಿಚಿ ಫುಲ್ಲಾ ಹೊಲ್ಲಿ ಹೊತ್ತಿ. 32 ಖರೆ ಘಂವ್ ಅನಿ ಚೆನೆ ಫಾಟ್ನಾ ಯೆತಲಿ ಪಿಕ್ ಹೊಲ್ಯಾ ಸಾಟ್ನಿ ತೆಂಕಾ ಕಾಯ್ಬಿ ಹೊವ್ಕ್ ನಾ. 33 ಮೊಯ್ಜೆನ್ ಫಾರೊವ್ ರಾಜಾಕ್ನಾ ಸೊಡುನ್ ಶಾರ್‍ಹಾತ್ನಾ ಭಾಯ್ರ್ ಯೆವ್ನ್ ಸರ್ವೆಸ್ಪರಾಕ್ಡೆ ಹಾತ್ ಉಕ್ಲುನ್ ಮಾಗ್ನಿ ಕರ್ಲ್ಯಾನ್ ಗುಡ್ಗುಡೊ, ಪಾವ್ಸ್ ಅನಿ ಗಾರ್ಬಿಯಾ ಬಂದ್ ಹೊಲೆ. 34 ಖರೆ ತೊ ಪಾವ್ಸ್, ಗಾರ್ಬಿಯಾ ಅನಿ ಗುಡ್ಗುಡೊ ಬಂದ್ ಹೊಲ್ಲೆ ಬಗುನ್ ಫಾರೊವ್ ರಾಜಾನ್ ಅನಿ ತೆಚ್ಯಾ ಅಧಿಕಾರಿಯಾನಿ ಪರ್‍ತುನ್ ಅನಿ ಮನ್ ಮಂಡ್ ಕರುನ್ಗೆಟ್ಲ್ಯಾನಿ, ಅನಿ ಪಾಪಾಕ್ ಗುರಿ ಹೊಲೆ. 35 ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಲ್ಲ್ಯಾ ಸಾರ್ಕೆಚ್ ಹೊಲೆ, ಫಾರೊವ್ ರಾಜಾಚೊ ಮನ್ ಗುಂಡ್ಯಾ ಸಾರ್ಕೊ ಹೊಲೊ ಅನಿ ತೆನಿ ಇಜ್ರಾಯೆಲಾಂಚ್ಯಾ ಲೊಕಾಕ್ನಿ ಜಾವ್ಕ್ ಸೊಡುಕ್ನಾ.