1 ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್ ಅಸೆ ಮಟ್ಲ್ಯಾನ್, "ತಿಯಾ ಫಾರೊವ್ ರಾಜಾಚ್ಯಾ ಇದ್ರಾಕ್ ಜಾವ್ನ್ ಅಸೆ ಸಾಂಗ್, ಸರ್ವೆಸ್ಪರ್ ತುಕಾ ಸಾಂಗಲ್ಲ್ಯಾ ಸಾರ್ಕೆ ‘ಮಾಕಾ ಆರಾದನ್ ಕರುಕ್ ಮಾಜ್ಯಾ ಲೊಕಾಕ್ನಿ ಒಪ್ಕಿ ದಿ’. 2 ತಿಯಾ ಜಾವ್ಕ್ ಸೊಡಿನಸ್ಲ್ಯಾರ್ ತುಜ್ಯಾ ದೆಸಾತ್ ಪುರಾ ಬೆಡ್ಕಿಯಾಂಚ್ಯಾಕ್ನಾ ತರಾಸ್ ಹೊಯ್ ಸಾರ್ಕೆ ಕರ್ತಾ. 3 ನೈಲ್ ನ್ಹಯ್ತ್ ಮೆಜುಕ್ ಹೊಯ್ನಾ ತವ್ಡಿ ಬೆಡ್ಕಿಯಾ ಭರುನ್ ಜಾತಾತ್, ತಿ ಥೈನಾ ಯೆವ್ನ್ ತುಜ್ಯಾ ರಾಜಾಚ್ಯಾ ಘರ್‍ಹಾತ್ ನಿಜ್ತಲ್ಯಾ ಖೊಲಿತ್, ತುಜ್ಯಾ ಹಾತ್ರಾನಾತ್, ಅನಿ ತುಜ್ಯಾ ಅಧಿಕಾರಿಯಾಂಚ್ಯಾ ಅನಿ ಲೊಕಾಂಚ್ಯಾ ಘರಾತ್ನಿ ಅನಿ ಚುಲಿಯಾರ್ನಿಬಿ ಅನಿ ರಾಂದ್ತಲ್ಯಾ ಆಯ್ದಾನಾತ್ನಿ ಬಿ ದಿಸ್ತಾತ್. 4 ತುಜಾ ಲೊಕಾಂಚ್ಯಾ ವರ್‍ತಿಬಿ ಅನಿ ತುಜ್ಯಾ ಘರಾಚ್ಯಾ ಲೊಕಾಂಚ್ಯಾ ವರ್‍ತಿಬಿ ಬೆಡ್ಕಿಯಾ ಹುಡಿಯಾ ಮಾರ್‍ತಾತ್", ಮಟ್ಲ್ಯಾನ್.

5 ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲುನ್, "ತಿಯಾ ಆರೊನಾಕ್, ತುಜೊ ದಾಂಡೊ ಪಾನಿಯಾಚಿ ಕಾಲ್ಗಿಯಾ, ನ್ಹಯಾ, ತಳೆ, ಹ್ಯಾ ಸಗ್ಳ್ಯಾಕ್ಡೆ ಹಾತ್ ವೈರ್ ಕರುನ್ ದಾಕ್ವು, ತನ್ನಾ ಇಜಿಪ್ತ್ ದೆಶಾಚ್ಯಾ ವರ್‍ತಿ ಪುರಾ ಬೆಡ್ಕಿಯಾ ಭರ್ತಾತ್", ಮನುನ್ ಸಾಂಗ್ಲ್ಯಾನ್. 6 ತಸೆಹೊವ್ನ್, ಆರೊನಾನ್ ಇಜಿಪ್ತ್ ದೆಶಾಚ್ಯಾ ಪಾನಿ ಹೊತ್ತ್ಯಾ ಸಗ್ಳ್ಯಾ ಜಾಗ್ಯಾ ವೈನಿ ಹಾತ್ ಉಕ್ಲುನ್ ದಾಕ್ವಿ ಪತರ್ ಬೆಡ್ಕಿಯಾ ಥೈನಾ ಯೆವ್ನ್ ಸಗ್ಳ್ಯಾ ದೆಸಾತ್ ಭರ್ಲಿ. 7 ಖರೆ ಮೊಡ್ಗಾರಾನಿ ಅಪ್ಲ್ಯಾ ಮೊಡಿಯಾನಿ ತಸೆಚ್ ಕರುನ್ ಇಜಿಪ್ತ್ ದೆಶ್ಯಾತ್ ಬೆಡ್ಕಿಯಾ ಯೆಯ್ ಸಾರ್ಕೆ ಕರ್ಲ್ಯಾನಿ.

8 ತನ್ನಾ ಫಾರೊವ್ ರಾಜಾನ್ ಮೊಯ್ಜೆಕ್ ಅನಿ ಆರೊನಾಕ್ ಬಲ್ವುನ್, "ತುಮಿ ಸರ್ವೆಸ್ಪರಾಕ್ಡೆ ಮಾಗ್ನಿ ಕರುನ್ ಹಿ ಬೆಡ್ಕಿಯಾ ಮಾಜ್ಯಾಕ್ನಾ ಅನಿ ಮಾಜ್ಯಾ ಲೊಕಾಂಚ್ಯಾಕ್ನಾಬಿ ಜಾಯ್ ಸಾರ್ಕೆ ಕರಾ, ತಸೆ ಕರ್ಲ್ಯಾರ್, ಸರ್ವೆಸ್ಪರಾಕ್ ಬಲಿ ಭೆಟ್ವುಕ್ ಜಾವ್ಕ್ ಮಿಯಾ ತುಮ್ಚ್ಯಾ ಲೊಕಾಕ್ನಿ ಒಪ್ಕಿ ದಿತಾ" ಮಟ್ಲ್ಯಾನ್. 9 ತನ್ನಾ ಮೊಯ್ಜೆನ್, "ಹಿ ಬೆಡ್ಕಿಯಾ ತುಮ್ಚ್ಯಾಕ್ನಾ ಅನಿ ತುಮ್ಚ್ಯಾ ಘರಾಕ್ನಿ ಅನಿ ಸೆತಾ ಭಾತಾತ್ನಿ ಸಗ್ಳೆ ಸೊಡುನ್ ಜಾವ್ನ್ ನೈಲ್ ನ್ಹೈಯ್ತ್ ತವ್ಡೆಚ್ ರ್‍ಹಾಯ್ ಸಾರ್ಕೆ ಮಿಯಾ ಕನ್ನಾ ತುಮ್ಚ್ಯಾ ಸಾಟ್ನಿ ಅನಿ ತುಮ್ಚ್ಯಾ ಲೊಕಾಂಚ್ಯಾ ಸಾಟ್ನಿ ಮಾಗ್ನಿ ಕರುಚೆ? ತುಮ್ಚ್ಯಾ ಮೊಟ್ಟ್ಯಾ ಇಚ್ಚ್ಯಾಕ್ ಸಮಾ ದಿಸಲ್ಲ್ಯಾ ಸಾರ್ಕೆ ತುಮಿಚ್ ತೆಕಾ ಎಕ್ ಎಳ್ ನಿರ್ದಾರ್ ಕರಾ", ಮಟ್ಲ್ಯಾನ್ . 10 ತೆನಿ "ಉದ್ದ್ಯಾಚ್ ಹೊವ್ಚೆ" ಮಟ್ಲ್ಯಾನ್. ತನ್ನಾ ಮೊಯ್ಜೆನ್, "ತುಮ್ಚ್ಯಾ ಗೊಸ್ಟಿಯಾಂಚ್ಯಾ ಸಾರ್ಕೆ ಹೊತಾ; ಹೆಚ್ಯಾ ವೈನಾ ಅಮ್ಚ್ಯಾ ಸರ್ವೆಸ್ಪರ್ ದೆವಾಚ್ಯಾ ಸಮಾ ಕೊನ್ಬಿ ನಾ ಮನ್ತಲೆ ತುಮಿಚ್ ಕಳ್ವುನ್ ಘೆತ್ಯಾಸಿ" ಮಟ್ಲ್ಯಾನ್. 11 ಬೆಡ್ಕಿಯಾ ತುಮ್ಕಾ ಅನಿ ತುಮ್ಚ್ಯಾ ಲೊಕಾಕ್ನಿ ಸೊಡುನ್ ನೈಲ್ ನ್ಹಯ್ತ್ ತವ್ಡಿಚ್ ರ್‍ಹಾತಾತ್, ಮಟ್ಲ್ಯಾನ್. 12 ಮೊಯ್ಜೆ ಅನಿ ಆರೊನ್ ಫಾರೊವ್ ರಾಜಾಕ್ನಾ ಗೆಲೆ, ಅನಿ ತೆಚ್ಯಾ ವರ್‍ತಿ ಯೆಲ್ಲಿ ಬೆಡ್ಕಿಯಾ ಕಾಡುಚೆ ಮನುನ್ ಮೊಯ್ಜೆನ್ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ಲ್ಯಾನ್. 13 ಸರ್ವೆಸ್ಪರಾನ್ ತೆಚ್ಯಾ ಮಾಗ್ನಿ ಸಾರ್ಕೆಚ್ ಕರ್ಲ್ಯಾನ್, ಘರಾತ್ನಿ ಅನಿ ದಾರಾತ್ನಿ ಅನಿ ಸೆತಾ ಭಾತಾತ್ನಿ ಹೊತ್ತಿ ಬೆಡ್ಕಿಯಾ ಸಗ್ಳಿ ಮರುನ್ ಗೆಲಿ. 14 ಇಜಿಪ್ತಾಚ್ಯಾ ಲೊಕಾನಿ ಬೆಡ್ಕಿಯಾ ಗುಂಪೆ ಗುಂಪೆ ಕರುನ್ ಗೊಳಾ ಕರ್ಲ್ಯಾನಿ, ಸಗ್ಳ್ಯಾ ದೆಸಾತ್ ಬುರ್ಶಿ ವಾಸ್ ಭರುನ್ ಗೆಲ್ಲಿ. 15 ಖರೆ ತರಾಸ್ ಕಮ್ಮಿ ಹೊಲೊ ಮನುನ್ ಕಳುನ್ ಯೆಲ್ಲ್ಯಾ ತನ್ನಾ, ಫಾರೊವ್ ರಾಜಾನ್ ಅಪ್ಲೊ ಮನ್ ಕಠಿನ್ ಕರುನ್ಗೆಟ್ಲ್ಯಾನ್, ಸರ್ವೆಸ್ಪರಾನ್ ಅದ್ದಿಚ್ ಸಾಂಗಲ್ಲ್ಯಾ ಸಾರ್ಕೆ ತೊ ತೆಂಚಿ ಗೊಸ್ಟಿಯಾ ಆಯ್ಕಿನಾ ಹೊಲೊ.

16 ಮಾನಾ ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲುನ್ ಅಸೆ ಮಟ್ಲ್ಯಾನ್, "ತಿಯಾ ಆರೊನಾಕ್, ತುಜ್ಯಾ ದಾಂಡ್ಯಾನ್ ಜಿಮ್ನಿಚ್ಯಾ ವರ್‍ತಿ ಧುಳಿಕ್ ಮಾರ್, ತನ್ನಾ ಇಜಿಪ್ತ್ ದೆಸಾತ್ ಹೊತ್ತಿ ಜಿಮ್ನಿ ವೈಲಿ ಧುಳ್ ಪುರಾ ಉಂವ್ವಾ ಹೊತಾತ್ ಮನುನ್ ಸಾಂಗ್". 17 ತೆನಿ ತಸೆಚ್ ಕರ್ಲ್ಯಾನಿ, ಆರೊನಾನ್ ದಾಂಡೊ ಜಿಮ್ನಿ ವರ್‍ತಿ ಧುಳಿಕ್ ಮಾರಲ್ಯಾನ್, ತನ್ನಾ ಉಂವ್ವಾ ಮಾನ್ಸಾಚ್ಯಾ ವರ್‍ತಿ ಅನಿ ಜನಾವರಾಚ್ಯಾ ವರ್‍ತಿಬಿ ಯೆವ್ನ್ ಧಾಪುನ್ ಪಡ್ಲಿ, ಇಜಿಪ್ತ್ ದೆಸಾತ್ ಪುರಾ ಜಿವ್ನಿ ವೈರ್ ಧುಳ್ ಉಂವ್ವಾ ಹೊಲಿ. 18 ಖರೆ ಮೊಡ್ಗಾರಾನಿಬಿ ಅಪ್ಲ್ಯಾ ಮೊಡಿಯಾನಿ ತಸೆಚ್ ಕರುಕ್ ಕಟ್ಪಟ್ ಕರ್ಲ್ಯಾನಿ, ಖರೆ ತೆಂಚ್ಯಾಕ್ಡೆ ಹೊವ್ಕ್ ನಾ, ತಿ ಉಂವ್ವಾ ಮಾನ್ಸಾಚ್ಯಾ ವರ್‍ತಿಬಿ ಅನಿ ಜನಾವಾರಾಂಚ್ಯಾ ವರ್‍ತಿಬಿ ಹೊತ್ತಿ. 19 ತನ್ನಾ ತ್ಯಾ ಮೊಡ್ಗಾರಾನಿಬಿ, "ಹೆ ದೆವಾಚೆ ಕಾಮ್", ಮನುನ್ ರಾಜಾಕ್ ಕಳ್ವುಲ್ಯಾನಿ ಹೊಲ್ಯಾರ್ಬಿ ಫಾರೊವ್ ರಾಜಾಚೊ ಮನ್ ಲೈ ಕಠಿನ್ ಹೊಲ್ಲೊ ಹೊತ್ತೊ, ಸರ್ವೆಸ್ಪರಾನ್ ಅದ್ದಿಚ್ ಸಾಂಗಲ್ಯಾ ಸಾರ್ಕೆ ತೊ ತೆಂಚಿ ಗೊಸ್ಟಿಯಾ ಆಯ್ಕಿನಾ ಹೊಲೊ.

20 ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಸಕ್ಕಾಳಿ ಉಟುನ್ ಫಾರೊವ್ ರಾಜಾ ಸಾಟ್ನಿ ರಾಕುನ್ ಇಬೆ ರಾ, ತೊ ನ್ಹಯ್ ಕಡೆ ಯೆತಾ, ತೆಕಾ ಅಸೆ ಸಾಂಗ್, ‘ಸರ್ವೆಸ್ಪರ್ ತುಕಾ ಹುಕುಮ್ ದಿತಲಿ ಗೊಸ್ಟಿಯಾ ಹಿ ಮಾಕಾ ಆರಾದನ್ ಕರುಕ್ ಮಾಜ್ಯಾ ಲೊಕಾಕ್ನಿ ಒಪ್ಕಿ ದಿ’, 21 ತಿಯಾ ಮಾಜ್ಯಾ ಲೊಕಾಕ್ನಿ ಜಾವ್ಕ್ ಸೊಡಿನಸ್ಲ್ಯಾರ್, ತುಕಾ ಅನಿ ತುಜ್ಯಾ ಘರಾಕ್ ಮಾಸ್ಕಾಂಚೊ ತರಾಸ್ ಯೆಯ್ ಸರ್ಕೆ ಕರ್ತಾ, ಇಜಿಪ್ತಾಚಿ ಲೊಕಾ ರ್‍ಹಾತಲ್ಯಾ ಘರಾತ್ನಿ ಬಿ ಅನಿ ತೆನಿ ಪಾಯ್ ಥವ್ತಲ್ಯಾ ಜಿಮ್ನಿಯಾಂಚ್ಯಾ ವರ್‍ತಿಬಿ ಮಾಸ್ಕಾಚ್ ಭರುನ್ ರ್‍ಹಾತಾತ್, ಮನುನ್ ಮಿಯಾ ತುಕಾ ಹುಶ್ಯಾರ್ಕಿ ದಿತಾ. 22 ಖರೆ ತ್ಯಾ ದಿಸಾತ್ನಿ ಮಾಜಿ ಲೊಕಾ ಹೊತ್ತ್ಯಾ ಗೊಶೆನ್ ಪ್ರಾಂತ್ಯಾಕ್ ಹ್ಯೊ ಮಾಸ್ಕಾಂಚೊ ತರಾಸ್ ರ್‍ಹಾಯ್ನಾ, ಹೆಚ್ಯಾ ವೈನಾ ಜಿಮ್ನಿ ವರ್‍ತಿ ರಾಜ್ವಡ್ಕಿ ಕರ್ತಲೊ ಸರ್ವೆಸ್ಪರ್ ಮಿಯಾಚ್ ಮನ್ತಲೆ ತಿಯಾ ಕಳ್ವುನ್ ಘೆವ್ಚೆ. 23 ಅಸೆ ಮಾಜ್ಯಾ ಲೊಕಾಕ್ನಿ ಅನಿ ತುಜ್ಯಾ ಲೊಕಾಕ್ನಿ ಫರಕ್ ಹೊಯ್ ಸಾರ್ಕೆ ಕರ್ತಾ, ಉದ್ದ್ಯಾಚ್ ಹೆ ಅಜಾಪ್ ಹೊತಾ, ಮನುನ್ ಸಾಂಗ್" ಮಟ್ಲ್ಯಾನ್. 24 ಸರ್ವೆಸ್ಪರಾನ್ ಮೊಟಿ ಮಾಸ್ಕಾ, ಫಾರೊವ್ ರಾಜಾಚ್ಯಾ ಘರಾಕ್ ಅನಿ ತೆಚ್ಯಾ ಅಧಿಕಾರಿಯಾಂಚ್ಯಾ ಘರಾಕ್ನಿಬಿ ಧಾಡ್ಲ್ಯಾನ್, ಸಗ್ಳೆ ಇಜಿಪ್ತಾತ್ ದೆಶ್ ಮಾಸ್ಕಾನಿ ನಾಶ್ ಹೊಲೊ. 25 ತನ್ನಾ ಫಾರೊವ್ ರಾಜಾನ್ ಮೊಯ್ಜೆಕ್ ಅನಿ ಆರೊನಾಕ್ ಬಲ್ವುನ್, "ತುಮಿ ಜಾವ್ನ್ ಹ್ಯಾ ದೆಶಾತುಚ್ ತುಮ್ಚ್ಯಾ ದೆವಾಕ್ ಬಲಿ ಭೆಟ್ವಾ", ಮಟ್ಲ್ಯಾನ್. 26 ತನ್ನಾ ಮೊಯ್ಜೆನ್ ಅನಿ ಆರೊನಾನ್ "ತಸೆ ಕರ್‍ತಲೆ ಸಮಾ ನ್ಹಯ್ , ಅಮ್ಚೊ ದೆವ್ ಸರ್ವೆಸ್ಪರಾಕ್ ಅಮಿ ಭೆಟ್ವುತಲಿ ಬಲಿ ಇಜಿಪ್ತಾಚ್ಯಾ ಲೊಕಾಕ್ನಿ ತಿರಸ್ಕಾರ್ ಹೊಲ್ಲಿ, ತೆಂಕಾ ತಿರಸ್ಕಾರ್ ಹೊಲ್ಲಿ ಬಲಿ ಅಮಿ ತೆಂಚ್ಯಾ ಇದ್ರಾಕ್ ಭೆಟ್ವುಲ್ಯಾರ್, ತೆನಿ ಅಮ್ಕಾ ಗುಂಡೆ ಮಾರುನ್ ಜಿವ್ ಕಾಡ್ತಾತ್ ನ್ಹಯ್? 27 ಅಮಿ ಡಂಗ್ಳಿತ್ ತಿನ್ ದಿಸ್ ಚಲುನ್ ಜಾತಲ್ಯಾ ತವ್ಡ್ಯಾ ಧುರ್ ಜಾವ್ನ್, ಅಮ್ಚ್ಯಾ ಸರ್ವೆಸ್ಪರಾನ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್ ಬಲಿ ಭೆಟ್ವುತಲೆ ಹಾಯ್", ಮಟ್ಲ್ಯಾನ್. 28 ತನ್ನಾ ರಾಜಾನ್, "ಬರೆ ಡಂಗ್ಳಿಕ್ ಜಾವ್ನ್ ತುಮ್ಚ್ಯಾ ದೆವಾಕ್ ಬಲಿಭೆಟ್ವುಕ್ ತುಮ್ಕಾ ಒಪ್ಕಿ ದಿತಾ, ಖರೆ ಲೈ ಧುರ್ ಜಾವ್ಕ್ ನಾ, ಅನಿ ಮಾಜ್ಯಾ ಸಾಟ್ನಿಚ್ ಮಾಗ್ನಿ ಕರುಚೆ" ಮಟ್ಲ್ಯಾನ್. 29 ತನ್ನಾ ಮೊಯ್ಜೆನ್, "ತುಮ್ಚ್ಯಾಕ್ನಾ ಜಾವ್ಕ್ ಲಾಗಲ್ಲ್ಯಾ ತನ್ನಾಚ್ ಫಾರೊವ್ ರಾಜ್ಯಾಚ್ ತುಕಾಬಿ ಅನಿ ತುಜಾ ಲೊಕಾಕ್ನಿ ಮಾಸ್ಕಾಂಚೊ ತರಾಸ್ ಉದ್ದ್ಯಾಕ್ನಾ ರಾವ್ಚೆ ನ್ಹಯ್ ಮನುನ್ ಮಿಯಾ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ತಾ, ಖರೆ ಸರ್ವೆಸ್ಪರಾಕ್ ಬಲಿ ಭೆಟ್ವುಕ್ ಲೊಕಾಕ್ನಿ ಒಪ್ಕಿ ದಿಯ್ ನಸ್ತಾನಾ ಪಶ್ವು ನ್ಹಯ್", ಮಟ್ಲ್ಯಾನ್. 30 ಮೊಯ್ಜೆನ್ ಫಾರೊವಾಕ್ನಾ ಜಾವ್ನ್ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ಲ್ಯಾನ್. 31 ತೆನಿ ಮಾಗ್ನಿ ಕರಲ್ಲ್ಯಾ ಸಾರ್ಕೆಚ್ ಸರ್ವೆಸ್ಪರಾನ್ ಕರ್ಲ್ಯಾನ್, ತಿ ಮಾಸ್ಕಾ ಫಾರೊವ್ ರಾಜಾ ಅನಿ ತೆಚ್ಯಾ ಅಧಿಕಾರಿಯಾಕ್ನಿ ಅನಿ ತೆಜ್ಯಾ ಲೊಕಾಕ್ನಿ ಸೊಡುನ್ ಗೆಲಿ, ಎಕ್ಬಿ ಮಾಸುಕ್ ರಾವ್ಕ್ ನಾ. 32 ಖರೆ ಫಾರೊವ್ ರಾಜಾ ಅತ್ತಾಬಿ ಮಂಡ್ ಪಾನ್ ಕರುನ್, ಇಜ್ರಾಯೆಲ್ ಲೊಕಾಕ್ನಿ ಜಾವ್ಕ್ ಒಪ್ಕಿ ದಿವ್ಕ್ ನಾ.