1 ಅನಿ ಬರ್ಯಾ ವಾಸೆಚ್ಯಾ ಪಾನಿಯಾನಿ ಧುಪ್ ಜಾಳ್ವುಕ್ ಸಾಟ್ನಿ ಜಾಲಿಚ್ಯಾ ಝಾಡಾನ್ ಎಕ್ ಕಟ್ಟೊ ಕರುಚೆ. 2 ತೆಚಿ ಲಾಂಬಿ ಎಕ್ ಹಾತ್, ಅನಿ ರುಂದ್ ಎಕ್ ಹಾತ್ ಅನಿ ಉಪ್ಪರ್ ದೊನ್ ಹಾತ್ ರಾವ್ನ್ ಚವ್ಕ್ ರಾವ್ಚೆ, ಅನಿ ತೆಕಾ ಶಿಂಗಾಬಿ ತೆಜ್ಯಾ ವಾಂಗ್ಡಾ ಮಿಳ್ವುನ್ ಕರುಚೆ. 3 ತೆಚ್ಯಾ ವೈಲ್ಯಾ ಭಾಗಾಕ್ ಭೊತ್ಯಾನಿ ಅನಿ, ಶಿಂಗಾಕ್ನಿ ನಿತಳ್ ಸೊನ್ಯಾನ್ ಧಾಪುಚೆ, ಅನಿ ತೆಚ್ಯಾ ಭೊತ್ಯಾನಿ ಸೊನ್ಯಾಚೆ ಖಾಂಬೆ ಕರುಚೆ. 4 ಅನಿ ತೆಚ್ಯಾ ಖಾಂಬ್ಯಾಂಚ್ಯಾ ದೊನ್ ಮುಲ್ಲ್ಯಾಚ್ಯಾ ಖಾಲ್ತಿ ದೊನ್ ಸೊನ್ಯಾಚಿ ಕಾಕ್ನಾ ಕರುಚೆ, ಕಟ್ಟ್ಯಾಕ್ ವಾವುನ್ ನ್ಹೆವ್ಕ್ ತ್ಯಾ ಕಾಕ್ನಾತ್ನಿ ದಾಂಡೆ ಶಿರ್ಕುಚೆ. 5 ಅನಿ ಜಾಲಿಚ್ಯಾ ಝಾಡಾನ್ ದಾಂಡೆ ಕರುನ್ ತೆಂಕಾ ಸೊನ್ಯಾನಿ ಧಾಪುಚೆ. 6 ತೆ ಕರಾರಾಚ್ಯಾ ಪೆಟಿಚ್ಯಾ ಇದ್ರಾಕ್ ಮಟ್ಲ್ಯಾರ್, ಕರಾರಾಚ್ಯಾ ಪೆಟಿಚ್ಯಾ ವರ್‍ತಿ ಮಿಯಾ ತುಕಾ ದಿಸ್ತಲ್ಯಾ ಕರ್ಪಾಸನಾಚ್ಯಾ ಇದ್ರಾಕ್ ಥವ್ಚೆ. 7 ಹರ್ ಎಕ್ ದಿಸಿ ಸಕ್ಕಾಳಾಕ್ ಆರೊನಾನ್ ತೆಜ್ಯಾ ವರ್‍ತಿ ಬರ್ಯಾ ವಾಸೆಚೊ ಧುಪ್ ಜಾಳ್ವುಚೆ. 8 ಅನಿ ಸಾಂಚೆಕ್ಡೆ ದಿವೊ ಪೆಟ್ವುತಲ್ಯಾ ಎಳಾರ್, ಬರ್ಯಾ ವಾಸೆಚ್ಯಾ ತೆಲಾನಿ ಧುಪ್ ಜಾಳ್ವುಚೆ, ಅಸೆ ತುಮ್ಚೆಕ್ನಾ ಅನಿ ತುಮ್ಚ್ಯಾ ಪಿಳ್ಗಿಕ್ನಾ ಸರ್ವೆಸ್ಪರಾಚ್ಯಾ ಇದ್ರಾಕ್ ಸದ್ದಾಚೆ ಧುಪ್ ಜಾಳ್ವುನ್ ಹೊವ್ಚೆ. 9 ತುಮಿ ದುಸ್ರೆ ಖಲೆಬಿ ಧುಪ್ ಹೊಂವ್ದಿತ್, ಜಾಳ್ವುತಲಿ ಬಲಿ ಹೊಂವ್ದಿತ್, ಖಾತಲಿ ಬಲಿ ಹೊಂವ್ದಿತ್, ತೆಚ್ಯಾ ವರ್‍ತಿ ಭೆಟ್ವು ನ್ಹಯ್ , ಅನಿ ತೆಚ್ಯಾ ವರ್‍ತಿ ಪಾನಿಯಾಚಿ ಬಲಿಬಿ ಭೆಟ್ವುಚೆ ನ್ಹಯ್ . 10 ಆರೊನಾನ್ ಅನಿ ತೆಚ್ಯಾ ಪಿಳ್ಗಿಚ್ಯಾನಿ ತೆಜ್ಯಾ ಶಿಂಗಾಕ್ನಿ ವರ್ಸಾಕ್ ಎಗ್ದಾ ಬಲಿ ಭೆಟ್ವಲ್ಲ್ಯಾ ಜನಾವರಾಚೆ ರಗಾತ್ ಲಾವ್ನ್ ಪಾಪ್ ಮಾಪಿ ಕರುನ್ ಘೆವ್ಚೆ, ತೆಚ್ ಸರ್ವೆಸ್ಪರಾಕ್ ಅಗ್ದಿ ನಿತಳ್ ಹೊಲ್ಲೆ ರ್‍ಹಾತಾ ಮಟ್ಲ್ಯಾನ್.

11 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲುನ್ ಸಾಂಗಟಲ್ಲೆ ಕಾಯ್ ಮಟ್ಲ್ಯಾರ್, 12 "ತಿಯಾ ಮೆಜ್ನಿ ಕರ್‍ತಲ್ಯಾ ಇಜ್ರಾಯೆಲ್ ಲೊಕಾಂಚ್ಯಾ ಪೊರಾಕ್ನಿ ಕಾಯ್ಬಿ ದುಕ್ನೆ ಯೆವ್ಚೆ ನ್ಹಯ್ ಸಾರ್ಕೆ, ಹರ್ ಎಕ್ಲ್ಯಾನ್ಬಿ ಅಪ್ನಾಚ್ಯಾ ಜಿವಾಕ್ ರಾಕುನ್ಗೆವ್ಕ್ ಸರ್ವೆಸ್ಪರಾಕ್ ಕಾನಿಕ್ ದಿವ್ಚೆ. 13 ಮೆಜಲ್ಯಾತ್ಲೊ ಹರ್ ಎಕ್ ಮಾನುಸ್ಬಿ ಸರ್ವೆಸ್ಪರಾಕ್ ದಿತಲೆ ಕಾಯ್ ಮಟ್ಲ್ಯಾರ್, ವಿಸ್ ಗೆರಾ ಚಾಂದಿಚ್ಯಾ ಪೈಸ್ಯಾ ಸಾರ್ಕೆ, ಅರ್ದೆ ಶೆಕೆಲ್ ಪೈಸೆ, ಕಾನಿಕ್ ದಿವ್ಚೆ, ತೆ ಸರ್ವೆಸ್ಪರಾಕ್ ನಿತಳ್ ಕಾನಿಕ್ ಹೊವ್ನ್ ಹಾಯ್. 14 ಮೆಜ್ನಿತ್ಲ್ಯಾ ಇಸ್ ವರ್ಸಾಚ್ಯಾ ಅನಿ ತೆಜ್ಯಾ ವೈಲ್ಯಾ ವರ್ಸಾಚ್ಯಾ ಹರ್ ಎಕ್ ಮಾನ್ಸಾನಿ ಸರ್ವೆಸ್ಪರಾಕ್ ಕಾನಿಕ್ ದಿವ್ಚೆ. 15 ಅನಿ ಲೈ ಬದಿಕ್ ಹೊತ್ತ್ಯಾನಿ ತುಮ್ಚ್ಯಾ ಜಿವಾಚ್ಯಾ ಮಾಪಿಯಾಕ್ನಿ ಸರ್ವೆಸ್ಪರಾಕ್ ದಿತಲಿ ಕಾನಿಕ್ ಅರ್ದ್ಯಾ ಶೆಕೆಲಾಕಿಂತಾ ಲೈ ದಿವ್ಚೆ ನ್ಹಯ್ , ಅನಿ ತ್ಯಾತುರುಚ್ ಗರಿಬ್ ಹೊತ್ತೆ ಕಮ್ಮಿ ದಿವ್ಚೆ ನ್ಹಯ್ . 16 ಖರೆ ಚುಕ್ ಮಾಪಿ ಕರಲ್ಲೆ ಪೈಸೆ ಇಜ್ರಾಯೆಲಾಂಚ್ಯಾಕ್ನಾ ಘೆವ್ನ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಸೆವಾಕ್ ವಾಪ್ರುಚೆ, ಹೆ ಇಜ್ರಾಯೆಲ್ ಲೊಕಾಕ್ನಿ ಸರ್ವೆಸ್ಪರಾಚ್ಯಾ ಇದ್ರಾಕ್ ಯಾದೆಕ್ ಅನಿ ಪಚ್ಚಾತಾಪಾಚ್ಯಾ ವಿಶಯಾತ್ ರ್‍ಹಾತಾ" ಮಟ್ಲ್ಯಾನ್.

17 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, 18 ಎಕ್ ತಾಂಬ್ಯಾಚಿ ಮೊಟಿ ವಾಟ್ಲಿ ಅನಿ ತೆ ಥವ್ಕ್ ಎಕ್ ಮ್ಹನಿ ಕರುನ್, ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಅನಿ ಬಲಿ ಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಮದ್ದಿ ಥವ್ನ್ ತ್ಯಾತುರ್ ಪಾನಿ ಭರುಚೆ. 19 ಆರೊನ್ ಅನಿ ತೆಚಿ ಲೆಕಾ ತ್ಯಾತುರ್ ಹಾತ್ ಪಾಂಯ್ ಧುವ್ನ್ ಘೆವ್ಚೆ. 20 ತೆನಿ ದೆವಾಕ್ ಬಗ್ತಲ್ಯಾ ಬಿಡಾರಾಚ್ಯಾ ಭುತ್ತುರ್ ಜಾತಾನಾ, ಅನಿ ಸರ್ವೆಸ್ಪರಾಚಿ ಸೆವಾ ಕರುಕ್, ಅನಿ ಬಲಿ ಭೆಟ್ವುಕ್ ಮನುನ್ ಬಲಿ ಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಜಗ್ಗೊಳ್ ಯೆತಾನಾ, ತಸೆಚ್ ಯೆಲ್ಯಾರ್ ಮರುನ್ ಜಾತಿಲ್, ತಸೆ ಹೊವ್ನ್ ಝಿತ್ತೆ ರಾವ್ಚೆ ಹೊಲ್ಯಾರ್ ಹಾತಿ ಪಾಂಯಾ ಧುವ್ನ್ ಘೆವ್ನ್ ಯೆವ್ಚೆ. 21 ಧುವ್ನ್ ಘೆವ್ನ್ ಜಾಯ್ ನಸ್ಲ್ಯಾರ್, ಮರ್ನಾಚಿ ಶಿಕ್ಷ್ಯಾ ಹೊತಾ, ಹೆ ತೆಕಾ ಅನಿ ತೆಜ್ಯಾ ಪಿಳ್ಗಿಚ್ಯಾಕ್ನಿ ಶಾಶ್ವತ್ ನಿಯಮ್ ಹೊವ್ನ್ ಹಾಯ್.

22 ತವ್ಡೆಚ್ ನಸ್ತಾನಾ, ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಟಲ್ಲೆ ಕಾಯ್ ಮಟ್ಲ್ಯಾರ್, 23 ತಿಯಾ ಬರ್ಯಾ ವಾಸೆಚ್ಯಾ ತೆಲಾತ್ನಿ, ಸರ್ವೆಸ್ಪರಾಚ್ಯಾ ಸೆವಾಕ್ ನೆಮಲ್ಲ್ಯಾ ಮಾಪಾಕ್ ಸಮಾ ಹೊಯ್ ಸಾರ್ಕೆ, ಸಾ ಕಿಲೊ ರಗತ್ಬೊಳ್, ತಿನ್ ಕಿಲೊ ಬರೆ ಲಂವ್ಗಾಚೆ ಚೆಕ್ಕೆ, ತಿನ್ ಕಿಲೊ ಬರ್ಯಾ ವಾಸೆಚೆ ಬಜೆ, ಸಾ ಕಿಲೊ ದಾಲ್ಚಿನ್ನಿ, 24 ಸಾ ಕಿಲೊ ಒಲಿವಾಚೆ ತೆಲ್, ಹೆ ಸಗ್ಳೆ ಘೆವ್ನ್, 25 ಬರ್ಯಾ ವಾಸೆಚ್ಯಾ ತೆಲಾತ್ ಮಿಳ್ವುನ್, ನಿತಳ್ ಅಭಿಶೆಕ್ ತೆಲ್ ತಯಾರ್ ಕರುಕ್ ಲಾವ್ಚೆ. 26 ತೆಚೆ ವೈನಾ ದೆವಾಕ್ ಬಗ್ತಲಿ ಗುಡಿ, ಹುಕುಮಾಂಚ್ಯಾ ಕರಾರಾಂಚಿ ಪೆಟಿಕ್ ಅಭಿಶೆಕ್ ಕರುಕ್ ಸಾಟ್ನಿ, ತೆ ತೆಲ್ ವಾಪ್ರುಚೆ. 27 ಅಲ್ತಾರಿ, ಅನಿ ತೆಜ್ಯಾ ವರ್‍ತಿ ಥವ್ತಲಿ ಸಾಮಾನಾ, ದಿವ್ಯಾಚೊ ಖಾಂಬೊ, ಅನಿ ತೆಜ್ಯಾ ವೈಲಿ ಸಾಮಾನಾ, ಧುಪ್ ಜಾಳ್ವುತಲೊ ಕಟ್ಟೊ, 28 ಬಲಿಚೊ ಕಟ್ಟೊ, ಅನಿ ತೆಚಿ ಸಾಮಾನಾ ಮೊಟಿ ವಾಟ್ಲಿ, ಅನಿ ತಿ ಥವ್ತಲಿ ಮ್ಹನಿ, ಹೆ ಸಗ್ಳೆ ನಿತಳ್ ಕರುನ್ ಪರ್ತಿಸ್ಟೆ ಕರುಚೆ. 29 ತೆ ಅಗ್ದಿ ನಿತಳ್ ಹೊವ್ನ್ ರಾವ್ಚೆ, ಹೆಕಾ ಲಾಗ್ತಲೆ ಸಗ್ಳೆಬಿ ನಿತಳ್ ಹೊವ್ನ್ ರಾವ್ಚೆ. 30 ತವ್ಡೆಚ್ ನಸ್ತಾನಾ, ಆರೊನ್ ಅನಿ ತೆಚಿ ಲೆಕಾ ಮಾಜಿ ಯಾಜಕಾ ಹೊವ್ನ್ ರಾಯ್ ಸಾರ್ಕೆ ತೆಂಕಾ ಅಭಿಶೆಕ್ ಕರುನ್ ನೆಮ್ಸುಚೆ. 31 ತಿಯಾ ಇಜ್ರಾಯೆಲ್ ಲೊಕಾಕ್ನಿ ಹುಕುಮ್ ದಿವ್ಚೆ ಹೊಲ್ಲೆ ಕಾಯ್ ಮಟ್ಲ್ಯಾರ್; ತುಮಿ ಅನಿ ತುಮ್ಚ್ಯಾ ಪಿಳ್ಗಿಚಿ ಲೊಕಾ ಹೆ ತೆಲ್ ಮಾಜ್ಯಾ ಸೆವಾಕ್ ನೆಮಲ್ಲೆ ನಿತಳ್ ಅಭಿಶೆಕ್ ತೆಲ್ ಮನುನ್ ಕಳ್ವುನ್ ಘೆವ್ಚೆ. 32 ಅನಿ ಹೆ ತೆಲ್ ಆಂಗಾಕ್ ಲಾವ್ಕ್ ವಾಪ್ರುಚೆ ನ್ಹಯ್ , ಹೆಜೆನ್ ಖಾವ್ಕ್ ಮನುನ್ ದುಸ್ರ್ಯಾ ಕಾಮಾಕ್ನಿ ತೆಲ್ ಕರುಚೆ ನ್ಹಯ್ , ಕಶ್ಯಾಕ್ ಮಟ್ಲ್ಯಾರ್ ಹೆ ಸರ್ವೆಸ್ಪರಾಕ್ ನೆಮಲ್ಲೆ, ಅನಿ ನಿತಳ್ ಮನುನ್ ಕಳ್ವುನ್ ಘೆವಾ. 33 ಹೆಚ್ಯಾ ಸಾರ್ಕೆಚ್ ತೆಲ್ ಕರ್‍ತಲೆ ಹೊಂವ್ದಿತ್, ಅನಿ ಹೆ ಯಾಜಕ್ ನ್ಹಯ್ ಹೊಲ್ಲ್ಯಾಕ್ನಿ ಲಾವ್ತಲೆ ಹೊಂವ್ದಿತ್ ಕರಲ್ಲ್ಯಾಕ್ ಅಪ್ನಾಚ್ಯಾ ಕುಳಿತ್ನಾ ಭಾಯ್ರ್ ಕಾಡುನ್ ಹೊತಾ.

34 ತವ್ಡೆಚ್ ನಸ್ತಾನಾ, ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲೆ ಕಾಯ್ ಮಟ್ಲ್ಯಾರ್, ದುದ್ದಾಚಿ ಮಡ್ಡಿ, ಗುಗ್ಗುಲ್, ಗಂಧಕಾಚೆ ಚೆಕ್ಕೆ, ಅನಿ ಬರ್ಯಾ ವಾಸೆಚಿ ತೆಲಾ, ನಿತಳ್ ಧುಪ್ ಹೆ ಸಗ್ಳೆ ಎಕುಚ್ ಮಾಪಾನ್ ಘೆವ್ನ್, 35 ಬರ್ಯಾ ವಾಸೆಚೆ ತೆಲ್ ತಯಾರ್ ಕರ್‍ತಲ್ಯಾಂಚ್ಯಾ ಬುದ್ದಿ ಸಾರ್ಕೆ ಕಾಲ್ವುನ್ ತ್ಯಾತುರ್ ಮಿಟ್ಟ್ ಘಾಲುನ್, ಸರ್ವೆಸ್ಪರಾಚ್ಯಾ ಸೆವೆಕ್ ಪವಿತ್ರ್ ಧುಪಾಚೆ ತೆಲ್ ಕರುಕ್ ಲಾವ್ಚೆ. 36 ತ್ಯಾತರ್ಲೆ ಉಲ್ಲೆ ಪುಡ್ ಕರುನ್, ಮಿಯಾ ತುಮ್ಕಾ ದಿಸ್ತಲ್ಯಾ ಜಾಗ್ಯಾರ್ ಕರಾರಾಂಚ್ಯಾ ಪೆಟಿಚ್ಯಾ ಇದ್ರಾಕ್ ಥವ್ಚೆ, ಅನಿ ತೆ ಅಗ್ದಿ ನಿತಳ್ ಮನ್ತಲೆ ತುಮ್ಕಾ ಗೊತ್ತ್ ರಾವ್ಚೆ. 37 ತುಮಿ ತುಮ್ಕಾ ಸ್ವತಾಕ್ ತ್ಯಾ ಧುಪಾಚ್ಯಾ ತೆಲಾಚ್ಯಾ ಸಾರ್ಕೆ ತಯಾರ್ ಕರುನ್ ಘೆವ್ಚೆ ನ್ಹಯ್ , ತೆ ಸರ್ವೆಸ್ಪರಾಚ್ಯಾ ಸೆವಾಕ್ ಯೆವ್ಡೆಚ್ ವಾಪರ್ತಲೆ ಅನಿ ನಿತಳ್ ನೆಮ್ಸುನ್ ಥವಲ್ಲೆ ಮನುನ್ ಚಿಂತುಚೆ. 38 ಕೊನ್ ತರ್ಬಿ ಬರ್ಯಾ ವಾಸೆಕ್ ಸಾಟ್ನಿ ಅಸ್ಲೆ ತಯಾರ್ ಕರ್ಸುನ್ ಘೆಟಲ್ಲೊ ರಾಲ್ಯಾರ್, ತೆಕಾ ಕುಳಿತ್ನಾ ಭಾಯ್ರ್ ಘಾಲುನ್ ಹೊತಾ.