1 ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಅನಿ ತುಜ್ಯಾ ವಾಂಗ್ಡಾ ಇಜಿಪ್ತಾತ್ನಾ ಭಾಯ್ರ್ ಹಾನಲ್ಲಿ ಲೊಕಾ ಹೊ ಜಾಗೊ ಸೊಡುನ್ ಮಿಯಾ ಅಬ್ರಾಹಾಮಾಕ್, ಇಸಾಕಾಕ್, ಜಾಕೊಬ್ ಅನಿ ತೆಂಚ್ಯಾ ಪುರ್ವಜಾಕ್ನಿ ಭಾಸ್ ದಿಲ್ಲ್ಯಾ ಜಾಗ್ಯಾಕ್ ಜಾ", ಮಟ್ಲ್ಯಾನ್. 2 ಮಿಯಾ ಎಕ್ ದುತಾಕ್ ಧಾಡ್ತಾ, ತೊ ತುಕಾ ವಾಟ್ ದಾಕ್ವುತಾ, ಅನಿ ಮಿಯಾ ಕಾನಾನ್ ಕಾರಾಕ್ನಿ, ಅಮೊರಿಯಾಕ್ನಿ, ಹಿತ್ತಿಯಾಕ್ನಿ, ಹಿವ್ವಿಯಾಕ್ನಿ, ಪೆರಿಜಿಯಾಕ್ನಿ, ಅನಿ ಜೆಬುಸಿಯಾಕ್ನಿ ಹಾರ್ವುತಾ, 3 ತಿಯಾ, ಮ್ಹಾವ್ ಅನಿ ದುದ್ದ್ ಹೊಂವ್ತಲ್ಯಾ ಜಾಗ್ಯಾರ್ ಜಾವ್ಲೆಯ್, ಖರೆ ಮಿಯ್ಯಾ ತುಜೆಕ್ನಾ ಯೆಯ್ನಾ ಕಶ್ಯಾಕ್ ಮಟ್ಲ್ಯಾರ್, ತುಮಿ ಮಾಜ್ಯಾ ಹುಕುಮಾಕ್ನಿ ಆಯ್ಕಿನಾಶಿ ಆಶಿ ಹೊವ್ನ್ ಮಿಯಾ ತುಮ್ಕಾ ವಾಟೆರ್ ನಾಸ್ ಕರುಕ್ ಸಕ್ತಾ.

4 ಲೊಕಾನಿ ಹೆ ಆಯ್ಕಲ್ಲೆ ತನ್ನಾ ಗುನ್ಗುಟ್ಟುಕ್ ಚಾಲು ಕರ್ಲ್ಯಾನಿ, ಅನಿ ಸೊನೆ ಚಾಂದಿ ನೆಸ್ತಲೆ ಸೊಡ್ಲ್ಯಾನಿ. 5 ಸರ್ವೆಸ್ಪರಾನ್ ಮೊಯ್ಜೆಕ್ ಲೊಕಾಕ್ನಿ ಆಶೆ ಸಾಂಗುಕ್ ಹುಕುಮ್ ದಿಲ್ಯಾನ್, "ತುಮಿ ಕೊನಾಕ್ ಬಿ ಆಯ್ಕಿ ನಸಲ್ಲ್ಯಾ ಲೊಕಾನು, ಮಿಯ್ಯಾ ತುಮ್ಚೆಕ್ನಾ ಉಲ್ಲೊ ಎಳ್ ರಾಲ್ಯಾರ್ ಬಿ ತುಮ್ಕಾ ನಾಶ್ ಕರ್ತಾ, ಅತ್ತಾ ತುಮ್ಚೆ ಸೊನೆ ಕಾಡಾ, ಮಿಯಾ ತುಮ್ಕಾ ಕಾಯ್ ಕರುಚೆ ಮನುನ್ ನಿರ್ದಾರ್ ಕರುನ್ ಸಾಂಗ್ತಾ" ಮಟ್ಲ್ಯಾನ್. 6 ತಸೆ ಹೊವ್ನ್, ತೆನಿ ಸಿನಾಯ್* ಮಡ್ಡಿ ದಾಟಲ್ಲೆ ತನ್ನಾ ಇಜ್ರಾಯೆಲ್ ಲೊಕಾನಿ ಕೊನಿಬಿ ಸೊನೆ ನೆಸುಕ್ ನಸಲ್ಲ್ಯಾನಿ.

7 ಇಜ್ರಾಯೆಲಾಚಿ ಲೊಕಾ ರಾವ್ಕ್ ಜಾಗೊ ಕರಿತ್, ತನ್ನಾ ಮೊಯ್ಜೆ ಪವಿತ್ರ್ ಜಾಗೊ ಹುಡ್ಕುನ್ ತೆಂಚೆಕ್ನಾ ಉಲ್ಲೆ ಧುರ್ ಜಾಗೊ ಕರಿ, ತ್ಯಾ ಜಾಗ್ಯಾಕ್ ಸರ್ವೆಸ್ಪರಾಚೆ ಹಾಜಿರ್ಪಾನಾಚಿ ಗುಡಿ ಮನಿತ್, ಕೊನಾಕ್ ಬಿ ಕಾಯ್ತರ್ ತರಾಸ್ ರಾಲ್ಯಾರ್ ತ್ಯಾ ಜಾಗ್ಯಾರ್ ಜಾವ್ನ್ ದಾಕುನ್ ಘೆಯ್ತ್. 8 ಮೊಯ್ಜೆ ಭಾಯ್ರ್ ಗೆಲ್ಲ್ಯಾ ತನ್ನಾ, ಸಗ್ಳಿ ಲೊಕಾ ಅಪಾಪ್ಲ್ಯಾ ಬಿಡಾರಾಚ್ಯಾ ದಾರಾಕ್ಡೆ ಇಬೆ ರಾವ್ನ್ ತೊ ಭಿತ್ತುರ್ ಜಾಯ್ ಪತರ್ ತೆಕಾ ಬಗಿತ್. 9 ಮೊಯ್ಜೆ ಬಿಡಾರಾಚ್ಯಾ ಭುತ್ತುರ್ ಗೆಲ್ಯಾ ಮಾನಾ, ಮೊಡಾಚೊ ಖಾಂಬೊ ಉತ್ರುನ್ ತ್ಯಾ ಬಿಡಾರಾಚ್ಯಾ ದಾರಾತ್ ಇಬೆರಾಯ್, ಅಸೆ ಸರ್ವೆಸ್ಪರ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲಿ. 10 ಮೊಡಾಚೊ ಖಾಂಬೊ ಬಿಡಾರಾಚ್ಯಾ ದಾರಾತ್ ಇಬೆ ಹೊತ್ತೆ ಬಗಲ್ಲ್ಯಾ ತನ್ನಾ ಸಗ್ಳಿ ಲೊಕಾ ಅಪಾಪ್ಲ್ಯಾ ಬಿಡಾರಾಂಚ್ಯಾ ದಾರಾತ್ನಿಚ್ ಡಬ್ಬ್ ಪಡಿತ್. 11 ಸರ್ವೆಸ್ಪರ್ ಮೊಯ್ಜೆಚ್ಯಾ ಇದ್ರಾಕ್ ಯೆವ್ನ್ ದೊಸ್ತಾಕ್ಡೆ ಬೊಲಲ್ಯಾ ಸಾರ್ಕೆ ಇದ್ರಾ ಬದ್ರಾಕ್ ರಾವ್ನ್ ಬೊಲಿ, ಅನಿ ಮೊಯ್ಜೆ ಥೈತ್ನಾ ಗೆಲ್ಲೆ ತನ್ನಾ ನುನಾಚೊ ಲೆಕ್ ಮೊಯ್ಜೆಚೊ ಸೆವಕ್, ಹೊಲ್ಲೊ ಜೊಶುವಾ ಮನ್ತಲೊ ದಾಂಡ್ಗೊ ಮಾನುಸ್, ಬಿಡಾರಾತ್ ರಾಯ್.

12 ಮೊಯ್ಜೆನ್ ಸರ್ವೆಸ್ಪರಾಕ್, "ತಿಯಾ ಮಾಕಾ ಹ್ಯಾ ಲೊಕಾಕ್ನಿ ತ್ಯಾ ಜಾಗ್ಯಾಕ್ ಚಾಲ್ವುನ್ ಘೆವ್ನ್ ಜಾ ಮನುನ್ ಹುಕುಮ್ ದಿಲೈ, ಖರೆ ಮಾಜ್ಯಾ ವಾಂಗ್ಡಾ ಕೊನಾಕ್ ಧಾಡ್ತೆಯ್ ಮನುನ್ ಸಾಂಗುಕ್ ನ್ಹಯ್ , ತುಜೆ ನಾವ್ ವಳಕ್ಲೈ ಅನಿ ತುಕಾ ಮಾಜಿ ದಯಾ ಗಾವ್ಲಾ, ಮನುನ್ ತಿಯಾ ಮಾಕಾ ಸಾಂಗಲೈ ನ್ಹಯ್ . 13 ಮಾಕಾ ತುಜಿ ದಯಾ ಗಾವಲ್ಲಿ ಹೊಯ್ ಹೊಲ್ಯಾರ್, ಮಿಯಾ ತುಕಾ ವಳಕಲ್ಲೊ ಹೊಯ್ ಹೊವ್ನ್ ರಾಯ್ ಸಾರ್ಕೆ ಮಾಕಾ ತುಜಿ ವಾಟ್ ದಾಕ್ವು, ತನ್ನಾ ಮಾಕಾ ತುಜಿ ದಯಾ ಗಾವ್ಲಾ ಮನುನ್ ಮಿಯಾ ಕಳ್ವುನ್ ಘೆತಾ, ಅನಿ ಹಿ ಲೊಕಾ ತುಜಿಚ್ ಮನ್ತಲೆ ಯಾದೆಕ್ ಹಾನುನ್ ಘೆ" ಮನುನ್ ಮಾಗ್ನಿ ಕರ್ಲ್ಯಾನ್. 14 ಸರ್ವೆಸ್ಪರಾನ್ , "ಮಿಯಾ ತುಜೆಕ್ನಾ ಯೆತಾ, ಅನಿ ತುಕಾ ಆರಾಮ್ ಥವ್ತಾ" ಮಟ್ಲ್ಯಾನ್. 15 ಮೊಯ್ಜೆನ್ ಜವಾಬ್ ದಿವ್ನ್, ತಿಯಾ ಅಮ್ಚೆಕ್ನಾ ಯೆಯ್ ನಸ್ಲ್ಯಾರ್, ಅಮ್ಕಾ ಹೊ ಜಾಗೊ ಸೊಡುಕ್ ಲಾವ್ ನಕ್ಕೊ, 16 ತಿಯಾ ಅಮ್ಚೆಕ್ನಾ ಯೆಯ್ ನಸ್ಲ್ಯಾರ್, "ತಿಯಾ ತುಜ್ಯಾ ಲೊಕಾನಿಕ್ನಾ ಅನಿ ಮಾಜೆಕ್ನಾ ಖುಶಿನ್ ಹಾಸ್ ಮನುನ್ ತುಜೆ ಹಾಜಿರ್ ಪಾನ್ ಅಮ್ಕಾ ಹುರಲ್ಲ್ಯಾ ಜಿಮ್ನಿ ವೈಲ್ಯಾ ಲೊಕಾನಿಕ್ನಾ ಯೆಗ್ಳೆಚ್ ಕರ್ತಾ ಮನುನ್ ಕೊನಾಕ್ ಕಶಿ ಕಳ್ತಾ ಕಿ?" ಮಟ್ಲ್ಯಾನ್. 17 ಸರ್ವೆಸ್ಪರಾನ್ ಮೊಯ್ಜೆಕ್, "ತುಕಾ ಮಾಜಿ ದಯಾ ಗಾವಲ್ಲ್ಯಾ ಸಾಟ್ನಿ ಅನಿ ಮಿಯಾ ತುಜೆ ನಾವ್ ವಳಕಲ್ಲ್ಯಾಸಾಟ್ನಿ, ಮಿಯಾ ಹೆ ಕಾಮ್ ತುಜ್ಯಾ ಸಾಟ್ನಿ ಕರ್ತಾ" ಮಟ್ಲ್ಯಾನ್.

18 ತನ್ನಾ ಮೊಯ್ಜೆನ್, "ಸರ್ವೆಸ್ಪರಾಕ್ ದಯಾಕರುನ್ ಮಾಕಾ ತುಜ್ಯಾ ಮಹಿಮಾ ದಾಕ್ವು" ಮನುನ್ ಮಾಗ್ಲ್ಯಾನ್.

19 ಸರ್ವೆಸ್ಪರಾನ್ , ಮಾಜಿ ಮಹಿಮಾ ತುಜ್ಯಾ ಇದ್ರಾಕ್ನಾ ದಾಟುನ್ ಜಾಯ್ ಸಾರ್ಕೆ ಕರ್ತಾ ಅನಿ ತುಜ್ಯಾ ಇದ್ರಾಕ್ ಮಿಯಾ ಮಾಜೆ ಪವಿತ್ರ್ ನಾವ್ ಸಾಂಗ್ತಾ, ಮಿಯಾಚ್ ಸರ್ವೆಸ್ಪರ್ ಅನಿ ಮಿಯಾ ಎಚುನ್ ಘೆಟಲ್ಲ್ಯಾಂಚ್ಯಾ ವರ್‍ತಿ ಮಾಜಿ ದಯಾ ಅನಿ ಕಾಳ್ಜಿ ದಾಕ್ವುತಾ. 20 ಖರೆ ತುಮಿ ಮಾಜೆ ತೊಂಡ್ ಬಗುಕ್ ಹೊಯ್ನಾ, ಕಶ್ಯಾಕ್ ಮಟ್ಲ್ಯಾರ್ ಮಾಕಾ ಬಗಟಲ್ಲೊ ಝಿತ್ತೊ ರ್‍ಹಾಯ್ನಾ. 21 ಖರೆ ಹಿತ್ತೆ ಮಾಜ್ಯಾ ಬಾಜುಕ್ ಎಕ್ ಮೊಟೊ ಗುಂಡೊ ಹಾಯ್ ತೆಚೆರ್ ತಿಯಾ ಇಬೆರಾ. 22 ಮಾಜಿ ಮಹಿಮಾ ತುಜ್ಯಾ ಇದ್ರಾಕ್ನಾ ದಾಟುನ್ ಜಾತಾನಾ, ಮಿಯಾ ತುಕಾ ಹ್ಯಾ ಗುಂಡ್ಯಾಚ್ಯಾ ಸಂದ್ಡಿತ್ ಇಬೆ ಕರುನ್, ಮಿಯಾ ದಾಟಿ ಪತರ್ಬಿ ತುಕಾ ಮಾಜ್ಯಾ ಹಾತಿನ್ ಧಾಪ್ತಾ. 23 ಮಾನಾ ಮಿಯಾ ಮಾಜೊ ಹಾತ್ ಪಾಟಿ ಘೆತಾ, ತಿಯಾ ಮಾಜಿ ಫಾಟ್ ಬಗ್ತೆಯ್, ಖರೆ ಮಾಜೆ ತೊಂಡ್ ಬಗುಕ್ ಹೊಯ್ನಾ ಮಟ್ಲ್ಯಾನ್.