1 ಇಜಿಪ್ತ್ ದೆಸಾತ್ ಸರ್ವೆಸ್ಪರಾನ್ , ಮೊಯ್ಜೆ ಅನಿ ಆರೊನಾಚ್ಯಾ ವಾಂಗ್ಡಾ ಬೊಲುನ್ ಅಸೆ ಮಟ್ಲ್ಯಾನ್, 2 ಸಗ್ಳ್ಯಾ ಮೈನ್ಯಾತ್ನಿ ಹೊಚ್ ತುಮ್ಕಾ ವರ್ಸಾಚೊ ಪೈಲೆಚೊ ಮೈನೊ ಹೊವ್ನ್ ರಾವ್ಚೊ. 3 ಇಜ್ರಾಯೆಲಾಂಚ್ಯಾ ಸಗ್ಳ್ಯಾ ಲೊಕಾಂಚ್ಯಾಕ್ಡೆ ಬೊಲುನ್, ತೆಂಕಾ, ಹ್ಯಾ ಮೈನ್ಯಾಚ್ಯಾ ಧಾ ವೆಚ್ಯಾ ದಿಸಿ ತುಮ್ಚ್ಯಾತ್ಲ್ಯಾ ಹರ್ ಎಕ್ಲ್ಯಾನಿಬಿ ಎಕ್ ಶೆಳಿ ಎಚುನ್, ಎಕ್ ಘರ್‍ಹಾತ್ನಾ ಎಕ್ ಶೆಳಿ ನಾತರ್ ಬಕ್ರೆ ಹಾನುಚೆ ಮನುನ್ ಸಾಂಗ್. 4 ತಿ ಶೆಳಿ ಖಾವ್ನ್ ಸಾರುಕ್ ಎಕ್ ಘರ್‍ಹಾತ್ನಾ ಹೊಯ್ನಾಸಲ್ಲಿ ಕಮ್ಮಿ ಲೊಕಾ ತ್ಯಾ ಘರ್‍ಹಾತ್ ಹೊತ್ತಿ ಹೊಲ್ಯಾರ್, ಬಾಜುಚ್ಯಾ ಘರಾತ್ಲ್ಯಾ ಲೊಕಾಂಚ್ಯಾ ವಾಂಗ್ಡಾ ಮಿಳುನ್ ಎಕ್ ಮಾನ್ಸಾನ್ ಕವ್ಡೆ ಖಾವ್ಕ್ ಹೊತಾ ಮನ್ತಲ್ಯಾ ತವ್ಡೆ ಶೆಳಿಚೊ ಪೆಟೊ ಎಚುನ್ ಘೆಂವ್ದಿತ್. 5 ತಿ ಶೆಳಿ ಕಸ್ಲೊಬಿ ದೊಶ್ ನಸಲ್ಲೊ ಎಕ್ ವರ್ಸಾಚೊ ಗಂಡ್ ಪೆಟೊ ಹೊವ್ನ್ ರಾವ್ಚೆ, ತುಮಿ ಬಕ್ರೆ ನಾತರ್ ಶೆಳಿಚೊ ಪೆಟೊ ಘೆವ್ಚೆ. 6 ಹ್ಯಾ ಮೈನ್ಯಾಚ್ಯಾ ಚವ್ದಾಚ್ಯಾ ದಿಸಾ ಪತರ್ಬಿ ತೆ ಥವ್ನ್ ಘೆವ್ನ್ ತ್ಯಾ ದಿಸಿ ಸಾಂಚೆಕ್ ಇಜ್ರಾಯೆಲ್ ಲೊಕಾನಿ ಅಪ್ಲ್ಯಾ ಅಪ್ಲ್ಯಾ ಕುಟ್ಮಾಚ್ಯಾ ವಾಂಗ್ಡಾ ಸನಾಕ್ ಕಾಪುಚೆ. 7 ತ್ಯಾ ಶೆಳಿಯಾಂಚ್ಯಾ ರಗ್ತಾತ್ ಉಲ್ಲೆ ಕಾಡುನ್, ಅಪ್ನಿ ಜೆವಾನ್ ಕರ್‍ತಲ್ಯಾ ತ್ಯಾ ಘರಾಚ್ಯಾ ದಾರಾಚ್ಯಾ ದೊನ್ ಪಟ್ಟಿಯಾಕ್ನಿ ಬಿ ಅನಿ ವೈಲ್ಯಾ ದೊನ್ ಪಟ್ಟಿಯಾಂಕ್ನಿಬಿ ಲಾವ್ಚೆ. 8 ತ್ಯಾ ದಿಸಿ ರಾತ್ತಿನುಚ್ ತೆ ಮಾಸ್ ಖಾವ್ಚೆ, ತ್ಯಾ ಆಗಿತ್ ಭಾಜುನ್ ಫುಗ್ ನಸಲ್ಲ್ಯಾ ಬಾರಿಕ್ಲಿಯಾಂಚ್ಯಾ ಅನಿ ಕೊಡು ನಿಸ್ತ್ಯಾಚ್ಯಾ ವಾಂಗ್ಡಾ ಜೆವ್ಚೆ. 9 ತೆ ಮಾಸ್ ಹಿರ್ವೆ ನಾತರ್ ಪಾನಿ ಘಾಲುನ್ ಸಿಜ್ವುನ್ ಖಾವ್ಚೆ ನ್ಹಯ್ , ಟಕ್ಲೆ, ಪಾಂಯಾ, ಪೊಟಾತ್ಲೆ ಸಗ್ಳೆಬಿ ಆಗಿತುಚ್ ಭಾಜುನ್ ಖಾವ್ಚೆ. 10 ದುಸ್ರೆ ದಿಸಿ ಸಕ್ಕಾಳ್ ಪತರ್ ಉಲ್ಲೆಬಿ ಹುರ್ವುಚೆ ನ್ಹಯ್ , ಸಕ್ಕಾಳ್ ಪತರ್ ಹುರಲ್ಲೆ ಆಗಿನ್ ಜಾಳುನ್ ಟಾಕುಚೆ. 11 ತೆ ಜೆವಾನ್ ಜೆವ್ತಾನಾ, ಪರ್ಯಾನಾಕ್ ತಯಾರ್ ಹೊಲ್ಲ್ಯಾಂಚ್ಯಾ ಸಾರ್ಕೆ, ತುಮಿ ಕಂಬ್ರೆಚೊ ಪಟ್ಟೊ ಬಾಂದುನ್ ಘೆವ್ನ್, ಹೊನಯಾ ನೆಸುನ್ಗೆನ್, ಹಾತಿತ್ ಎಕ್ ದಾಂಡೊ ಘೆವ್ನ್ ಲಗ್ಗು ಲಗ್ಗುನಾ ಜೆವಾನ್ ಕರುಚೆ, ಕಶ್ಯಾಕ್ ಮಟ್ಲ್ಯಾರ್, ಸರ್ವೆಸ್ಪರಾಕ್ ಮಾನ್ ದಿತಲೊ ಪಾತ್ಕಾಚೊ ಸನ್ ಹ್ಯೊ. 12 ತ್ಯಾ ರಾತ್ತಿನ್ ಮಿಯಾ ಇಜಿಪ್ತಾಚ್ಯಾ ಮದ್ನಾ ಜಾತಾ, ಅನಿ ಇಜಿಪ್ತಾಚ್ಯಾ ಮಾನ್ಸಾತ್ನಿ ಹೊಂವ್ದಿತ್ ಜನಾವರಾತ್ನಿ ಹೊಂವ್ದಿತ್ ಪೈಲೆ ಉಪಾಜಲ್ಲೆ ಹೊತ್ತೆ ಮಿಯಾ ಜಿವ್ ಕಾಡ್ತಾ, ಇಜಿಪ್ತಾಚ್ಯಾ ದೆವತೆಕ್ನಿ ನ್ಯಾಯ್ ನಿರ್ನಯ್ ಕರ್ತಾ, ಮಿಯಾಚ್ ಸರ್ವೆಸ್ಪರ್ . 13 ಖರೆ ತುಮಿ ದಾರಾಕ್ ಲಾವಲ್ಲ್ಯಾ ರಗ್ತಾ ವೈನಾ ತುಮಿ ಹೊತ್ತೆ ಘರ್ ಮಾಕಾ ಕಳ್ತಾ, ತೆ ಬಗುನ್ ಮಿಯಾ ತುಮ್ಕಾ ಕಾಯ್ಬಿ ಕರಿ ನಸ್ತಾನಾ ಜಾತಾ. ಮಿಯಾ ಇಜಿಪ್ತ್ ದೆಶ್ಯಾಚ್ಯಾಕ್ನಿ ತರಾಸ್ ದಿತಾನಾ ತುಮ್ಕಾ ಕಾಯ್ಬಿ ತರಾಸ್ ಹೊಯ್ನಾ. 14 ಹ್ಯೊ ದಿಸ್ ತುಮ್ಕಾ ಯಾದ್ ರಾತಲೊ ದಿಸ್ ಹೊವ್ನ್ ರ್‍ಹಾತಾ, ತ್ಯಾ ದಿಸಾ ತುಮಿ ಸರ್ವೆಸ್ಪರಾಕ್ ಮಾನ್ ದಿತಲೊ ಸನ್ ಕರುನ್ ಸುತ್ತಿ ಕರುಚೆ, ತೊ ಶಾಶ್ವತ್ ನೆಮ್ ಮನುನ್ ಸದಾ ಸರ್ವತಾಕ್ ಸನ್ ಕರುಚೆ.

15 "ಸಾತ್ ದಿಸಾಚ್ಯಾ ಪತರ್ ತುಮಿ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ, ಪೈಲೆಚ್ಯಾ ದಿಸಿಚ್ ತುಮ್ಚ್ಯಾ ಘರಾತ್ನಿ ಹೊತ್ತೆ ಫುಗ್ ಹೊತ್ತೆ ಪಿಟ್ಟ್ ಸಗ್ಳೆ ತುಮಿ ಕಾಡುಚೆ, ಕಶ್ಯಾಕ್ ಮಟ್ಲ್ಯಾರ್ ತ್ಯಾ ಸಾತ್ ದಿಸಾತ್ನಿ ಆಂಬೊಟ್ ಮಿಳ್ವಲ್ಲಿ ಭಾಕ್ರಿಯಾ ಕೊನ್ ತರಿಬಿ ಖಾಲ್ಯಾರ್ ತೆಕಾ ಇಜ್ರಾಯೆಲ್ ಲೊಕಾಂಚ್ಯಾಕ್ನಾ ಬಾರ್ಯಾ ಘಾಲುಚೆ. 16 ಪೈಲೆಚ್ಯಾ ದಿಸಾ ದೆವಾಕ್ ಆರಾದನ್ ಕರುಕ್ ಗೊಳಾ ಹೊವ್ನ್ ಯೆವ್ಚೆ, ಸಾತ್ವ್ಯಾ ದಿಸಿಬಿ ದೆವಾಕ್ ಆರಾದನ್ ಕರುಕ್ ತಾಂಡೊ ಹೊವ್ನ್ ಮಿಳುನ್ ಯೆವ್ಚೆ. ಹ್ಯಾ ಆರಾದನ್ ಕರ್‍ತಲ್ಯಾ ದೊನ್ ದಿಸಾತ್ನಿ ಕಾಯ್ಬಿ ಕಾಮ್ ಕರುಚೆ ನ್ಹಯ್, ಜೆವ್ನಾಕ್ ಪಾಜೆ ತವ್ಡೆಚ್ ತಯಾರ್ ಕರುನ್ ಘೆವ್ಚೆ. 17 ಫುಗ್ ನತ್ತಿ ಭಾಕ್ರಿಯಾ ಖಾತಲೊ ಸನ್ ತುಮಿ ಕರುಚೆ, ಕಶ್ಯಾಕ್ ಮಟ್ಲ್ಯಾರ್, ಮಿಯಾ ತುಮ್ಕಾ ಇಜಿಪ್ತ್ ದೆಶ್ಯಾಕ್ನಾ ಬಲ್ವುನ್ ಹಾನಲ್ಲ್ಯಾ ಸಾಟ್ನಿ ತುಮಿ ಅನಿ ತುಮ್ಚ್ಯಾ ಪಿಳ್ಗಿಚಿ ಲೊಕಾ ಸಗ್ಳ್ಯಾ ಎಳಾರ್ನಿಬಿ ಹ್ಯಾ ದಿಸಾಚೊ ಸನ್ ಕರುಚೆ. 18 ಪೈಲೆಚ್ಯಾ ಮೈನ್ಯಾಚ್ಯಾ ಚವ್ದಾವ್ಯಾ ದಿಸಾಚ್ಯಾ ಸಾಂಚೆಕ್ನಾ ವಿಸ್ ಅನಿ ಎಕ್ ದಿಸಾಚ್ಯಾ ಸಾಂಚೆ ಪತರ್ಬಿ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ. 19 ಸಾತ್ ದಿಸಾ ಪತರ್ ತುಮ್ಚ್ಯಾ ಘರಾತ್ನಿ ಆಂಬೊಟ್ ಪಿಟ್ಟುಚ್ ರಾವ್ಚೆ ನ್ಹಯ್ , ಆಂಬೊಟ್ ಮಿಳ್ವುಲ್ಲೆ ಖಾತಲೊ ಸ್ವತ್ಯಾಚ್ಯಾ ದೆಶಾಚೊ ಹೊಂವ್ದಿ ನಾತರ್ ದುಸ್ರ್ಯಾ ದೆಶಾಚೊ ಹೊಂವ್ದಿ ತೆಕಾ ಇಜ್ರಾಯೆಲ್ ಲೊಕಾಂತ್ನಾ ಬಾರ್ಯ ಘಾಲುನ್ ಹೊತಾ. 20 ತುಮಿ ತುಮ್ಚ್ಯಾ ಘರಾತ್ನಿ ಫುಗ್ ನಸಲ್ಲಿ ಬಾರಿಕ್ಲಿಯಾಚ್ ಖಾವ್ಚೆ ಅನಿ ಆಂಬೊಟ್ ಮಿಳ್ವಲ್ಲೆ ಕಾಯ್ಬಿ ಖಾವ್ಚೆ ನ್ಹಯ್ " ಮನುನ್ ತಾಕಿತ್ ದಿಲ್ಯಾನ್.

21 ಮೊಯ್ಜೆನ್ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾ ಲೊಕಾಕ್ನಿ ಬಲ್ವುಕ್ ಲಾವ್ನ್ ತೆಂಕಾ, "ತುಮಿ ತುಮ್ಚ್ಯಾ ತುಮ್ಚ್ಯಾ ಕುಟ್ಮಾಂಚ್ಯಾ ಸಾಟ್ನಿ ಬಕ್ರ್ಯಾಂಚ್ಯಾ ತಾಂಡ್ಯಾತ್ನಾ ಪೆಟೆ ಎಚುನ್ ಘೆವ್ನ್ ಪಾತ್ಕಾಚ್ಯಾ ಸನಾಕ್ ಕಾಪಾ. 22 ಹಿಸ್ಸೊಪ್ ಝಾಡಾಚಿ ಟಾಳಿ ಆಯ್ದಾನಾತ್ ಹೊತ್ತ್ಯಾ ರಗ್ತಾತ್ ಬುಡ್ವುನ್ ದಾರಾಚ್ಯಾ ಪಟ್ಟಿಯಾಕ್ನಿ ಅನಿ ತೆಚ್ಯಾ ದೊನಿ ಖಾಂಬ್ಯಾಕ್ನಿ ಬಿ ಲಾವಾ, ಅನಿ ತುಮ್ಚ್ಯಾತ್ಲೊ ಎಕ್ಲೊಬಿ ದಿಸ್ ಉಗಾವಿ ಪತರ್ ಬಿ ದಾರಾತ್ನಾ ಭಾಯ್ರ್ ಜಾವ್ಚೆ ನ್ಹಯ್. 23 ಸರ್ವೆಸ್ಪರಾನ್ ಇಜಿಪ್ತಾಚ್ಯಾ ಲೊಕಾಕ್ನಿ ಮಾರುಕ್ ಜಾತಾನಾ ತ್ಯಾ ದೆಸಾತ್ನಾ ಜಾತಾ, ತನ್ನಾ ತುಮ್ಚ್ಯಾ ಘರಾಚ್ಯಾ ಪೈರಿಯಾರ್ನಿ ಅನಿ ದೊನಿ ಖಾಂಬ್ಯಾರ್ನಿ ತೆ ರಗಾತ್ ಬಗುನ್ ಫಿಡೆ ದಾಟುನ್ ಜಾತಾ. ತುಮ್ಕಾ ಮಾರುನ್ ನಾಶ್ ಕರ್ನಾರೊ ಮರ್ನಾಚೊ ಧುತ್ ತುಮ್ಚ್ಯಾ ಘರಾತ್ನಿ ಯೆವ್ಕ್ ದಿಯ್ನಾ. 24 ತುಮಿ ಅನಿ ತುಮ್ಚ್ಯಾ ಪಿಳ್ಗಿಚಿ ಲೊಕಾ ಹ್ಯೊ ನೆಮ್ ಶಾಶ್ವತ್ ಕರುಚೆ. 25 ಸರ್ವೆಸ್ಪರಾನ್ ಅಪ್ಲ್ಯಾ ಗೊಸ್ಟಿ ಸಾರ್ಕೆ ತುಮ್ಕಾ ದಿತಲ್ಯಾ ದೆಶ್ಯಾಕ್ ತುಮಿ ಪಾವಲ್ಲ್ಯಾ ತನ್ನಾ, ತುಮಿ ಹ್ಯೊ ನೆಮ್ ಕರುಕುಚ್ ಪಾಜೆ. 26 ಫಿಡೆ ತುಮ್ಚ್ಯಾ ಪೊರಾಕ್ನಿ, ತುಮಿ ಆಚರನ್ ಕರ್‍ತಲ್ಯಾ ಹ್ಯಾ ನೆಮಾಚೊ ಅರ್ಥ್ ಕಾಯ್? ಮಟ್ಲ್ಯಾರ್ ತುಮಿ ತೆಂಕಾ, 27 ಸರ್ವೆಸ್ಪರಾನ್ ಇಜಿಪ್ತ್ ದೆಶ್ಯಾಚ್ಯಾ ಲೊಕಾಕ್ನಿ ಮಾರಲ್ಲ್ಯಾ ತನ್ನಾ ತೆಂಚ್ಯಾ ದೆಸಾತ್ ಹೊತ್ತ್ಯಾ ಇಜ್ರಾಯೆಲ್ ಲೊಕಾಂಚ್ಯಾ ಘರಾಕ್ನಿ ಗುಸಿ ನಸ್ತಾನಾ, ಫಿಡೆ ದಾಟುನ್ ಜಾವ್ನ್ ಅಮ್ಚ್ಯಾ ಲೊಕಾಕ್ನಿ ಹುರ್ವುಲ್ಯಾನ್, ತಸೆ ಹೊವ್ನ್ ಸರ್ವೆಸ್ಪರಾಕ್ ಮಾನ್ ದಿವ್ಕ್ ಸಾಟ್ನಿ ಪಾತ್ಕಾಚ್ಯಾ ಬಲಿಚೊ ಸನ್ ಕರುಲಾಂವ್, ಮನುನ್ ಜವಾಬ್ ದಿವಾ" ಮಟ್ಲ್ಯಾನ್. ತನ್ನಾ ಇಜ್ರಾಯೆಲ್ ಲೊಕಾನಿ ಡಿಂಬಿಯಾ ಘಾಲುನ್ ಆರಾದನ್ ಕರ್ಲ್ಯಾನಿ. 28 ಇಜ್ರಾಯೆಲ್ ಲೊಕಾನಿ ಸರ್ವೆಸ್ಪರಾನ್ ಮೊಯ್ಜೆಕ್ ಅನಿ ಆರೊನಾಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ ಚಲುನ್ ಗೆಲ್ಯಾನಿ.

29 ಅರ್ದ್ಯಾ ರಾತ್ತಿನ್ ಸರ್ವೆಸ್ಪರಾನ್ , ಸಿಂವಾಸನಾರ್ ಬಸಲ್ಲ್ಯಾ ಫಾರೊವ್ ರಾಜಾಚ್ಯಾ ಥೊರ್ಲ್ಯಾ ಲೆಕಾಕ್ನಾ ಬಂಧಿಖಾನ್ಯಾತ್ ಹೊತ್ತ್ಯಾಚ್ಯಾ ಥೊರ್ಲ್ಯಾ ಲೆಕಾ ಪತರ್ಬಿ, ಇಜಿಪ್ತ್ ದೆಸಾತ್ ಹೊತ್ತ್ಯಾ ಸಗ್ಳ್ಯಾ ಥೊರ್ಲ್ಯಾ ಪೊರಾಕ್ನಿ ಅನಿ ಜನಾವರಾಂಚ್ಯಾ ಥೊರ್ಲ್ಯಾ ಪೆಟ್ಯಾಕ್ನಿ ಜಿವ್ ಕಾಡ್ಲ್ಯಾನ್. 30 ತ್ಯಾ ರಾತ್ತಿನ್ ಫಾರೊವ್ ರಾಜಾ ಅನಿ ತೆಚ್ಯಾ ಅಧಿಕಾರಿ ಲೊಕಾನಿ ಸಗ್ಳ್ಯಾನಿ ಉಟುನ್ ಬಗಲ್ಯಾ ತನ್ನಾ ಮಡೆ ನಸಲ್ಲೆ ಘರ್ ಎಕ್ಬಿ ನತ್ತೆ, ತಸೆ ಹೊವ್ನ್ ತ್ಯಾ ಪುರಾ ದೆಶ್ಯಾತ್ ಮೊಟೊ ಅಳಾಪ್ ಉಟ್ಲೊ.

31 ಫಾರೊವ್ ರಾಜಾನ್ ತ್ಯಾ ರಾತ್ತಿನ್ ಮೊಯ್ಜೆಕ್ ಅನಿ ಆರೊನಾಕ್ ಬಲ್ವುಕ್ ಲಾವ್ನ್, "ತುಮಿ ಅಮ್ಚ್ಯಾ ಲೊಕಾಂಚ್ಯಾ ಮದ್ನಾ ಜಾವಾ, ತುಮಿ ಮಾಗುನ್ ಘೆಟಲ್ಲ್ಯಾ ಸಾರ್ಕೆಚ್ ತುಮಿ ಅನಿ ಇಜ್ರಾಯೆಲ್ ಲೊಕಾ ಸರ್ವೆಸ್ಪರಾಕ್ ಆರಾದನ್ ಕರುಕ್ ಜಾವಾ. 32 ತುಮಿ ಮಾಗುನ್ ಘೆಟಲ್ಲ್ಯಾ ಸಾರ್ಕೆ ಸರ್ವೆಸ್ಪರಾಕ್ ಆರಾದನ್ ಕರುಕ್, ತುಮಿ ಸಾಂಗಲ್ಲ್ಯಾ ಸಾರ್ಕೆಚ್ ಬಕ್ರಿ, ಶೆಳಿಯಾ ಅನಿ ಗೊರಾಬಿ ಘೆವ್ನ್ ಜಾವಾ, ಮಾಜ್ಯಾ ಬರೆ ಪಾನಾ ಸಾಟ್ನಿಬಿ ಮಾಗ್ನಿ ಕರಾ" ಮಟ್ಲ್ಯಾನ್. 33 ಇಜಿಪ್ತ್ ದೆಶಾಚ್ಯಾ ಲೊಕಾನಿ, "ಅಮಿ ಸಗ್ಳೆ ಮರ್ತಾಂವ್" ಮನುನ್ ಚಿಂತುನ್ಗೆವ್ನ್ ಲಗ್ಗುನಾ ಅಪ್ಲೊ ದೆಶ್ ಸೊಡುನ್ ಜಾವಾ, ಮನುನ್ ಇಜ್ರಾಯೆಲ್ ಲೊಕಾನಿ ಒತ್ತಾಯ್ ಕರ್ಲ್ಯಾನಿ. 34 ತಸೆ ಹೊವ್ನ್ ಇಜ್ರಾಯೆಲ್ ಲೊಕಾನಿ ಆಂಬೊಟ್ ನಸಲ್ಲೆ ಪಿಟ್ ಆಯ್ದಾನಾತ್ನಿ ಭರುನ್ಗೆವ್ನ್, ಕಪ್ಡ್ಯಾತ್ನಿ ಲಪ್ಟುನ್ ಅಪ್ಲ್ಯಾ ಖಾಂಜ್ಯಾರ್ನಿ ಥವ್ನ್ ಘೆವ್ನ್ ಜಾವ್ಕ್ ಲಾಗ್ಲೆ.

35 ಜಾತಾನಾ ತೆನಿ ಮೊಯ್ಜೆನ್ ಸಾಂಗುನ್ ದಿಲ್ಲ್ಯಾ ಸಾರ್ಕೆಚ್ ಇಜಿಪ್ತ್ ದೆಶಾಚ್ಯಾ ಲೊಕಾಂಚ್ಯಾಕ್ನಾ ಚಾಂದಿ ಅನಿ ಸೊನ್ಯಾಚಿ ವಸ್ತಾ ಅನಿ ಕಪ್ಡೆಬಿ ಮಾಗುನ್ ಘೆಟ್ಲ್ಯಾನಿ. 36 ಸರ್ವೆಸ್ಪರಾನ್ ಇಜ್ರಾಯೆಲಾಂಚ್ಯಾ ವರ್‍ತಿ ಇಜಿಪ್ತಾಚ್ಯಾ ಲೊಕಾಕ್ನಿ ದಯಾ ಹೊಯ್ ಸಾರ್ಕೆ ಕರ್ಲ್ಯಾನ್, ತಸೆ ಹೊವ್ನ್ ತೆನಿ ಮಾಗಲ್ಲೆ ಸಗ್ಳೆ ಇಜಿಪ್ತ್ ದೆಶಾಚ್ಯಾ ಲೊಕಾನಿ ದಿಲ್ಯಾನಿ, ಅಸೆ ಇಜ್ರಾಯೆಲ್ ಲೊಕಾನಿ ಇಜಿಪ್ತ್ ಲೊಕಾಂಚಿ ಆಸ್ತಿ ಸಗ್ಳಿ ಲುಟುನ್ ಘೆಟ್ಲ್ಯಾನಿ.

37 ಇಜ್ರಾಯೆಲ್ ಲೊಕಾ ರಾಮ್ಸೆಸ್ ಶಾರಾಕ್ನಾ ಜಾವ್ನ್ ಸುಕ್ಕೊತ್ ಮನ್ತಲ್ಯಾಕ್ಡೆ ಯೆಲ್ಯಾನಿ, ತೆನಿ ಬಾಯ್ಕಾ ಮನ್ಸಾ ಅನಿ ಪೊರಾ ಸೊಡುನ್ ಬರಿ ಘವ್ಮಾನ್ಸಾ ತವ್ಡಿಚ್ ಲೈ ಕರುನ್ ಸಾ ಲಾಕ್ ಹೊತ್ತಿ. 38 ತೆಂಚ್ಯಾ ವಾಂಗ್ಡಾ ಲೈ ಲೊಕಾ ದುಸ್ರ್ಯಾ ದೆಶಾಚಿ ಯೆಲ್ಲಿ, ಬಕ್ರಿ, ಶೆಳಿ ಅನಿ ಗೊರಾ ಲೈ ನಮುನ್ಯಾಚಿ ಜನಾವಾರಾ ಬಿ ಜಾವ್ಕ್ ಲಾಗಲ್ಲೆ. 39 ಇಜಿಪ್ತ್ ದೆಸಾಕ್ನಾ ಹಾನಲ್ಯಾ ಫಿಟ್ಟಾಚ್ಯಾ ಮುದ್ದ್ಯಾನಿಕ್ನಾ ಆಂಬೊಟ್ ನಸಲ್ಲಿ ಭಾಕ್ರಿಯಾ ಕರುನ್ ಭಾಜ್ಲ್ಯಾನಿ, ತೆನಿ ಇಜಿಪ್ತಾಕ್ನಾ ಯೆತಾನಾ ಯೆಲ್ಲೊಬಿ ಎಳ್ ಗಾವ್ಕ್ ನಸಲ್ಯಾ ಸಾಟ್ನಿ ಪಿಟ್ಟಾತ್ ಆಂಬೊಟ್ ಮಿಳ್ವುಕ್ ಹೊವ್ಕ್ ನಾ, ಅನಿ ದುಸ್ರೆ ರಾಂದಾಪ್ ಕರುಕ್ಬಿ ಹೊವ್ಕ್ ನಾ. 40 ಇಜ್ರಾಯೆಲಾಚಿ ಲೊಕಾ ಇಜಿಪ್ತ್ ದೆಸಾತ್ ಚಾರ್ಸೆ ತಿಸ್ ವರ್ಸಾ ಹೊತ್ತಿ. 41 ಹಿ ಚಾರ್ಸೆ ತಿಸ್ ವರ್ಸಾ ಕಳ್ದಲ್ಲ್ಯಾ ಮಾನಾ ತ್ಯಾ ದಿಸಿ ಸರ್ವೆಸ್ಪರಾಚಿ ಲೊಕಾ ಅನಿ ಸಗ್ಳ್ಯಾ ಕುಳಿಚಿ ಲೊಕಾ ಇಜಿಪ್ತ್ ದೆಶ್ ಸೊಡುನ್ ಯೆಲ್ಯಾನಿ. 42 ಸರ್ವೆಸ್ಪರಾನ್ ಇಜಿಪ್ತ್ ದೆಸಾಕ್ನಾ ತೆಂಕಾ ಬಾರ್ಯ್ ಹಾನಲ್ಲೆ ತ್ಯಾಚ್ ದಿಸಿ, ತಸೆ ಹೊವ್ನ್ ತೆನಿ ತ್ಯಾ ದಿಸಿಚ್ ಸದಾಸರ್ವತಾಕ್ ತೆಕಾ ಮಾನ್ ದಿವ್ಕ್ ಸಾಟ್ನಿ ರಾತ್ತಿನ್ ಜಾಗೆ ರಾವ್ನ್ ಸನ್ ಕರುಚೆ.

43 ಸರ್ವೆಸ್ಪರಾನ್ ಮೊಯ್ಜೆಕ್ ಅನಿ ಆರೊನಾಕ್ ಅಸೆ ಮಟ್ಲ್ಯಾನ್, ಪಾತ್ಕಾಚೊ ಸನ್ ಕರ್ತಲೊ ನೆಮ್ ಹ್ಯೊ, ದುಸ್ರ್ಯಾ ದೆಶ್ಯಾಚೊ ಕೊನ್ಬಿ ಹ್ಯಾ ಜೆವ್ನಾತ್ ವಾಟೊ ಘೆವ್ಚೆ ನ್ಹಯ್ . 44 ಖರೆ ತುಮಿ ಖರಿದಿಕ್ ಘೆಟಲ್ಲೊ ಆಳ್ ಹೊಲ್ಯಾರ್, ತೆನಿ ಸುನ್ನತ್ ಕರ್ಸುನ್ಗೆಟಲ್ಲೆ ರಾಲ್ಯಾರ್, ತೊ ತ್ಯಾ ಜೆವ್ನಾಕ್ ವಾಟೊ ಘೆವ್ಕ್ ಹೊತಾ. 45 ಉಲ್ಲ್ಯಾ ದಿಸಾಕ್ನಿ ಮನುನ್ ಯೆವ್ನ್ ಹೊತ್ತೊ ನಾತರ್ ದಿಸಾಚ್ಯಾ ಮಜುರಿಚ್ಯಾ ಕಾಮಾಚೊ ಆಳ್ ಹ್ಯಾತುರ್ ವಾಟೊ ಘೆವ್ಚೊ ನ್ಹಯ್ . 46 ರಾಂದಾಪ್ ಕರಲ್ಲ್ಯಾ ಘರಾತುಚ್ ತೆ ಜೆವಾನ್ ಕರುಚೆ, ತ್ಯಾತುರ್ ಉಲ್ಲೆಬಿ ಭಾಯ್ರ್ ಘೆವ್ನ್ ಜಾವ್ಚೆ ನ್ಹಯ್ ಬಲಿ ದಿಲ್ಲ್ಯಾ ಜನಾವರಾಚೆ ಎಕ್ಬಿ ಹಡ್ಡ್ ಮೊಡುಚೆ ನ್ಹಯ್ . 47 ಇಜ್ರಾಯೆಲಾಂಚ್ಯಾ ಸಗ್ಳ್ಯಾ ಲೊಕಾನಿ ಹ್ಯೊ ಸನ್ ಕರುಚೆ. 48 ತುಮ್ಚ್ಯಾಕ್ಡೆ ಹೊತ್ತ್ಯಾ ದುಸ್ರ್ಯಾ ದೆಶಾಚೆ ಕೊನಿಬಿ ಹ್ಯೊ ಪಾತ್ಕಾಚೊ ಸನ್ ಕರುಚೆ ಮನ್ತಲಿ ಆಶ್ಯಾ ರಾಲ್ಯಾರ್, ತೊ ಅನಿ ತೆಚ್ಯಾ ಘರಾತ್ಲ್ಯಾ ಸಗ್ಳ್ಯಾ ಘವ್ಮಾನ್ಸಾನಿ ಸುನ್ನತ್ ಕರುನ್ ಘೆವ್ಕ್ ತೆಚ್ಯಾ ಮಾನಾ ಯೆವ್ನ್ ಹ್ಯೊ ಸನ್ ಕರುಚೆ, ತಸ್ಲೊ ಸ್ವತ್ಯಾಚ್ಯಾ ದೆಶಾಚ್ಯಾ ಲೊಕಾಂಚ್ಯಾ ಸಾರ್ಕೊ ಹೊತಾ. ಖರೆ ಸುನ್ನತ್ ಕರ್ಸುನ್ ಘೆವ್ಕ್ ನಸಲ್ಲೊ ಕೊನ್ಬಿ ಹ್ಯಾ ಜೆವ್ನಾತ್ ಭಾಗಿ ಹೊವ್ಚೆ ನ್ಹಯ್ . 49 ಇಜ್ರಾಯೆಲಾಕ್ನಿ, ಸ್ವತ್ಯಾಚ್ಯಾ ದೆಶ್ಯಾಚ್ಯಾಕ್ ಅನಿ ತುಮ್ಚ್ಯಾ ವಾಂಗ್ಡಾ ಹೊತ್ತ್ಯಾ ದುಸ್ರಾ ದೆಶಾಚ್ಯಾಕ್ನಿ ಬಿ ಲಾಗು ಹೊತಲೊ ನೆಮ್ ಹೊವ್ನ್ ರ್‍ಹಾತಾ, ಮಟ್ಲ್ಯಾನ್. 50 ಮೊಯ್ಜೆಕ್ ಅನಿ ಆರೊನಾಕ್ ಸರ್ವೆಸ್ಪರಾನ್ ಸಾಂಗಲ್ಲ್ಯಾ ಸಾರ್ಕೆಚ್ ಸಗ್ಳ್ಯಾ ಇಜ್ರಾಯೆಲ್ ಲೊಕಾನಿ ಕರ್ಲ್ಯಾನಿ. 51 ತ್ಯಾ ದಿಸಾ ಸರ್ವೆಸ್ಪರಾನ್ ಇಜ್ರಾಯೆಲ್ ಕುಳಿಚ್ಯಾ ಲೊಕಾಕ್ನಿ ತಾಂಡೊ ತಾಂಡೊ ಹೊವ್ನ್ ಇಜಿಪ್ತ್ ದೆಶ್ಯಾಕ್ನಾ ಭಾಯ್ರ್ ಬಲ್ವುನ್ ಹಾನ್ಲ್ಯಾನ್.