1 ಅನಿ ಇಜ್ರಾಯೆಲ್ ಲೊಕಾಕ್ನಿ ಹಿ ನಿಯಮಾ ದಿ; 2 ತುಮ್ಚ್ಯಾತ್ ಕೊನ್ ತರ್ಬಿ ಎಕ್ಲೊ ಹೆಬ್ರೊವಾಕ್ ಗುಲಾಮ್ ಕರುನ್ ಇಕಾತ್ ಘೆಟಲ್ಲೊ ಹೊಲ್ಯಾರ್, ತೊ ಮಾನುಸ್ ಸಾ ವರಿಸ್ ಗುಲಾಮ್ ಹೊವ್ನ್ ಕಾಮ್ ಕರುನ್, ಸಾತ್ವ್ಯಾ ವರ್ಸಾತ್ ಕಾಯ್ಬಿ ದಿಯ್ ನಸ್ತಾನಾ ಸುಟ್ಕಾ ಹೊವ್ನ್ ಜಾವ್ಚೊ. 3 ತೊ ಯೆತಾನಾ ಲಗಿನ್ ಹೊಯ್ ನಸ್ತಾನಾ ಯೆಲ್ಲೊ ಹೊಲ್ಯಾರ್, ಎಕ್ಲೊಚ್ ಜಾಂವ್ದಿತ್, ಅನಿ ಬಾಯ್ಕೊ ಘೆವ್ನ್ ಯೆಲ್ಲೊ ಹೊಲ್ಯಾರ್ ಬಾಯ್ಕೊಬಿ ತೆಜ್ಯಾ ವಾಂಗ್ಡಾ ಜಾಂವ್ದಿತ್. 4 ಅನಿ ತೆಜ್ಯಾ ಯಜ್ಮಾನಾನ್ ತೆಕಾ ಲಗಿನ್ ಕರ್ಸುನ್ ತೆಕಾ ಪೊರಾ ಹೊಲ್ಲಿ ರಾಲ್ಯಾರ್, ತಿ ಪೊರಾ ಅನಿ ತಿ ಬಾಯ್ಕೊ ತ್ಯಾ ಯಜ್ಮಾನಾಚಿ ಆಸ್ತಿ ಹೊತಾತ್, ಅನಿ ತೊ ಗುಲಾಮ್ ಎಕ್ಲೊಚ್ ಜಾವ್ಚೊ. 5 ಖರೆ ತ್ಯಾ ಗುಲಾಮಾನ್, "ಮಿಯಾ ಮಾಜ್ಯಾ ಯೆಜ್ಮಾನಾಕ್ ಅನಿ ಬಾಯ್ಕೊ ಪೊರಾಕ್ನಿ ಪ್ರೆಮ್ ಕರ್ತಾ, ತಸೆ ಹೊವ್ನ್, ಮಾಕಾ ಸೊಡುನ್ ಜಾವ್ಕ್ ಮನ್ ನಾ", ಮನುನ್ ಘಟ್ ಮನಾನ್ ಸಾಂಗಲ್ಲೆ ಹೊಲ್ಯಾರ್, 6 ತನ್ನಾ ತೆಜ್ಯಾ ಯಜ್ಮಾನಾನ್ ತೆಕಾ ದೆವಾಚ್ಯಾ ಇದ್ರಾಕ್ ಬಲ್ವುನ್ ಹಾನುನ್, ದಾರಾಚ್ಯಾ ನಾತರ್ ದಾರಾಚ್ಯಾ ಪಟ್ಟಿಯಾಂಚ್ಯಾ ಜಗ್ಗೊಳ್ ಇಬೆ ಕರುನ್, ತೆಚಿ ಕಾನಾ ಟೊಪುಚಿ ತ್ಯಾ ದಿಸಾಕ್ನಾ ತೊ ಯಜ್ಮಾನಾಕ್ ಶಾಶ್ವತ್ ಗುಲಾಮ್ ಹೊವ್ನ್ ರ್‍ಹಾತಾ.

7 ಕೊನ್ ತರ್ಬಿ ಅಪ್ನಾಚ್ಯಾ ಲೆಕಿಕ್ ಗುಲಾಮ್ ಕರುನ್ ಇಕಲ್ಲೆ ಹೊಲ್ಯಾರ್, ತಿ ಘವ್ಮಾನ್ಸಾನ್ ಗುಲಾಮ್ ಗಿರಿತ್ನಾ ಸುಟ್ಕಾ ಹೊವ್ನ್ ಗೆಲ್ಲ್ಯಾ ಸಾರ್ಕೆ ಜಾವ್ಕ್ ನಾ. 8 ಅಪ್ನಾಕ್ ಮನುನ್ ಗೊತ್ತ್ ಕರುನ್ಗೆಟಲ್ಲ್ಯಾ ಯಜ್ಮಾನಾಕ್ ತಿ ಮನಾಕ್ ಯೆವ್ಕ್ ನಸ್ಲ್ಯಾರ್, ತೆಜ್ಯಾಕ್ನಾ ಸುಟ್ಕಾ ಕರುನ್ ಘೆವ್ಕ್ ತಿಕಾ ಅವ್ಕಾಸ್ ದಿವ್ಚೆ, ತಿಕಾ ದುಸ್ರ್ಯಾ ಕ್ನಿ ಇಕಾತ್ ದಿವ್ಕ್ ತೆಕಾ ಅವ್ಕಾಸ್ ನಾ. 9 ತೆನಿ ತಿಕಾ ಅಪ್ನಾಚ್ಯಾ ಲೆಕಾಕ್ ಗೊಸ್ಟ್ ಕರುನ್ಗೆಟಲ್ಲೆ ಹೊಲ್ಯಾರ್, ತಿಕಾ ಲೆಕಿ ಸಾರ್ಕೆ ಚಿಂತುಚೆ. 10 ಯಜ್ಮಾನಾನ್ ಅನಿ ಎಕ್ಲಿಕ್ ಮಿಳ್ವುನ್ ಘೆಟಲ್ಲೆ ಹೊಲ್ಯಾರ್ಬಿ ಪೈಲೆಚಿಕ್ ಜೆವಾನ್, ಕಪ್ಡೆ ಅನಿ ಸಂಸಾರಾಚಿ ಹಕ್ಕಾ ಕಮ್ಮಿ ಕರುಚೆ ನ್ಹಯ್. 11 ಹ್ಯಾ ತಿನಾತ್ಲೆ ಖಲೆಬಿ ಚಾಲ್ವಿನಸ್ತಾನಾ ಗೆಲ್ಯಾರ್, ತಿನೆ ಕಾಯ್ಬಿ ದಿಯ್ನಸ್ತಾನಾ ಸುಟ್ಕಾ ಹೊವ್ನ್ ಜಾವ್ಕ್ ಹೊತಾ.

12 ಕೊನಿ ತರ್ಬಿ ಮಾನ್ಸಾಕ್ ಮಾರುನ್ ಜಿವ್ ಕಾಡಲ್ಲ್ಯಾಕ್ ಮರ್ನಾಚಿ ಶಿಕ್ಷ್ಯಾ ಹೊವ್ಚಿ. 13 ಖರೆ ಜಿವ್ ಕಾಡುಚೆ ಮನ್ತಲಿ ಯವ್ಜನ್ ನಸ್ತಾನಾ, ದೆವಾಚ್ಯಾ ಇಚ್ಚ್ಯಾ ಸಾರ್ಕೆ ಜಿವ್ ಕಾಡಲ್ಲೆ ಹೊಲ್ಯಾರ್, ತ್ಯಾ ಮರ್ನಾಕ್ ಕಾರನ್ ಹೊಲ್ಲೊ ನಿಪುಕ್ ಮನುನ್ ವಳಕ್ ಕರುನ್ಗೆಟಲ್ಲ್ಯಾ ಜಾಗ್ಯಾಕ್ ಪಳುನ್ ಜಾವ್ಕ್ ಹೊತಾ. 14 ಅನಿ ಜಿವ್ ಕಾಡುಚೆ ಮನ್ತಲ್ಯಾ ಉದ್ದೆಶಾನ್ ದುಸ್ರ್ಯಾ ಎಕ್ಲ್ಯಾಕ್ ಪಶ್ವುನ್ ಜಿವ್ ಕಾಡಲ್ಲೊ ಹೊಲ್ಯಾರ್, ತೊ ಮಾಜ್ಯಾ ಬಲಿಭೆಟ್ವುತಲ್ಯಾ ಜಾಗ್ಯಾರ್ ರಾಲ್ಯಾರ್ಬಿ ತೆಕಾ ವಡುನ್ ಹಾನುನ್ ಮರ್ನಾಚಿ ಶಿಕ್ಷ್ಯಾ ದಿವ್ಚೆ. 15 ಕೊನಿ ತರ್ಬಿ ಅಪ್ನಾಚ್ಯಾ ಬಾಬಾಕ್ ನಾತರ್ ಬಾಯ್ಕ್ ಮಾರಲ್ಲ್ಯಾಕ್ ಮರ್ನಾಚಿ ಶಿಕ್ಷ್ಯಾ ಹೊವ್ಚಿ. 16 ಎಕ್ಲ್ಯಾನ್ ಅನಿ ಎಕ್ಲ್ಯಾಕ್ ಚೊರುನ್ ನ್ಹೆವ್ನ್ ಇಕ್ಲ್ಯಾರ್ ನಾತರ್ ಅಪ್ನಾಕ್ಡೆಚ್ ಥವ್ನ್ ಘೆಟ್ಲ್ಯಾರ್ ತಸ್ಲ್ಯಾಕ್ ಮರ್ನಾಚಿ ಶಿಕ್ಷ್ಯಾ ಹೊವ್ಚಿ. 17 ಕೊನ್ ತರ್ಬಿ ಬಾಬಾಕ್ ನಾತರ್ ಬಾಯ್ಕ್ ಶರಾಪ್ಲ್ಯಾರ್, ತೆಕಾ ಮರ್ನಾಚಿ ಶಿಕ್ಷ್ಯಾ ಹೊವ್ಚಿ. 18 ದೊಗೆ ಝಗ್ಡೊ ಕರಿತ್ ರ್‍ಹಾತಾನಾ, ಎಕ್ಲ್ಯಾನ್ ಅನಿ ಎಕ್ಲ್ಯಾಕ್ ಗುಂಡ್ಯಾನ್ ನಾತರ್ ಮುಟ್ಕ್ಯಾನ್ ಮಾರುನ್ ತೊ ಮರಿನಸ್ತಾನಾ, ದುಕ್ಕಾ ಹೊಲ್ಯಾರ್ಬಿ ಉಲ್ಲೊ ಎಳ್ ಹಾತ್ರಾನಾತ್ ರಾಯ್ಲ್, 19 ಅನಿ ಮಾನಾ ಉಟುನ್ ದಾಂಡೊ ಧರುನ್ಗೆವ್ನ್ ಚಲ್ತಾ ಹೊವ್ಕ್ ಫಿರೆ, ಅಸ್ಲ್ಯಾ ಎಳಾರ್ ಮಾರಲ್ಲ್ಯಾಕ್ ಶಿಕ್ಷ್ಯಾ ಹೊತಲಿ ನಕ್ಕೊ, ಖರೆ ಮಾರ್ ಬಸಲ್ಲ್ಯಾ ಮಾನ್ಸಾನ್ ಕಾಮ್ ಕರುಕ್ ಹೊಯ್ ನಸ್ತಾನಾ ರಾಲ್ಯಾರ್, ತೆಕಾ ಪಾಜೆ ತವ್ಡೆ ಪೈಸೆ ದಿವ್ಚೆ ಅನಿ ತೊ ಫುರಾ ಗುನ್ ಹೊಯ್ ಪತರ್ಬಿ ತೆಕಾ ಬಗುನ್ಗೆವ್ಚೆ. 20 ಎಕ್ಲ್ಯಾನ್ ಅಪ್ನಾಚ್ಯಾ ಗಂಡ್ ಆಳಾಕ್ ನಾತರ್, ಹೆನ್ನ್ ಆಳಾಕ್ ದಾಂಡ್ಯಾನ್ ಮಾರುನ್ ತೊ ಥೈಚ್ ಮರುನ್ ಗೆಲ್ಯಾರ್, ತೆಕಾ ಸಮಾ ಶಿಕ್ಷ್ಯಾ ದಿವ್ಚೆ. 21 ಅನಿ ತೊ ಆಳ್ ದೊನ್ ತಿನ್ ದಿಸ್ ಪತರ್ ಝಿತ್ತೊ ರಾಲ್ಯಾರ್, ತ್ಯಾ ಯಜ್ಮಾನಾಕ್ ಶಿಕ್ಷ್ಯಾ ದಿತಲಿ ನಾ, ಕಶ್ಯಾಕ್ ಮಟ್ಲ್ಯಾರ್, ಆಳಾ ತೆಚಿಚ್ ಆಸ್ತಿ ಹೊವ್ನ್ ರ್‍ಹಾತಾತ್. 22 ಲೊಕಾನಿ ಝಗ್ಡೆ ಕರ್ತಾನಾ, ಗರ್‍ವಾರ್ ಬಾಯ್ಕೊ ಮಾನ್ಸಿಕ್ ಮಾರ್ ಲಾಗ್ಲ್ಯಾರ್, ಅನಿ ತಿಕಾ ರಗಾತ್ ಜಾವ್ನ್ ಅನಿ ಕಾಯ್ಬಿ ತರಾಸ್ ಹೊವ್ಕ್ ನಸ್ಲ್ಯಾರ್, ತಿಚ್ಯಾ ಘವಾನ್ ನ್ಯಾಯ್ ನಿರ್ನಯ್ ಕರ್‍ತಲ್ಯಾಚ್ಯಾ ಒಪ್ಕಿವೈನಾ ಕವ್ಡೆ ಪೈಸೆ ಸಾಂಗ್ತಾ ತವ್ಡೆ ಮಾರಲ್ಲ್ಯಾ ಮಾನ್ಸಾಕ್ನಾ ಘೆವ್ಚೆ. 23 ಅನಿ ದುಸ್ರೊ ತರಾಸ್ ಹೊಲ್ಲೊ ರಾಲ್ಯಾರ್ ಜಿವಾಕ್ ಬದಲ್ ಜಿವ್, 24 ಡೊಳ್ಯಾಕ್ ಬದಲ್ ಡೊಳೊ, ದಾತಾಕ್ ಬದಲ್ ದಾತ್, ಹಾತಿಕ್ ಬದಲ್ ಹಾತ್, ಪಾಂಯಾಕ್ ಬದಲ್ ಪಾಂಯ್, 25 ಬರೊ ವಡಲ್ಲೊ ರಾಲ್ಯಾರ್ ತೆಜ್ಯಾ ಬದ್ಲಾಕ್ ಬರೊ, ದುಕ್ಕ್ ಕರಲ್ಲೆ ರಾಲ್ಯಾರ್ ತೆಜ್ಯಾ ಬದ್ಲಾಕ್ ದುಕ್ಕ್, ಮಾರಾಕ್ ಪರ್‍ತುನ್ ಮಾರ್ ಅಸೆಚ್ ಹರ್ ಎಕಾಕ್ಬಿ ಪರ್‍ತುನ್ ಶಿಕ್ಷ್ಯಾ ಹೊವ್ಚಿ. 26 ಕೊನ್ ತರ್ ಎಕ್ಲ್ಯಾನ್ ಅಪ್ನಾಚ್ಯಾ ಗಂಡ್ ಗುಲಾಮಾಕ್ ನಾತರ್ ಹೆನ್ನ್ ಗುಲಾಮಾಚ್ಯಾ ಡೊಳ್ಯಾಕ್ ಮಾರುನ್ ನಾಶ್ ಕರಲ್ಲೆ ಹೊಲ್ಯಾರ್, ತ್ಯಾ ಡೊಳ್ಯಾಚ್ಯಾ ಬದ್ಲಾಕ್ ತೆಕಾ ಗುಲಾಮ್ ಗಿರಿತ್ನಾ ಸುಟ್ಕಾ ಕರುಚೆ. 27 ಗುಲಾಮಾಚ್ಯಾ ದಾತಾಕ್ನಿ ಮಾರುನ್ ದಾತ್ ಕಾಡಲ್ಲೆ ಹೊಲ್ಯಾರ್, ತ್ಯಾ ಯಜ್ಮಾನಾನ್ ಗುಲಾಮಾಕ್ ಸುಟ್ಕಾ ಕರುಚೆ.

28 ಘವ್ಮಾನ್ಸಾಕ್ ನಾತರ್ ಬಾಯ್ಕೊ ಮಾನ್ಸಿಕ್ ಬೈಲಾನ್ ಮಾರುನ್ ಜಿವ್ ಕಾಡ್ಲ್ಯಾರ್, ತ್ಯಾ ಬೈಲಾಕ್ ಗುಂಡ್ಯಾನ್ ಮಾರುನ್ ಜಿವ್ ಕಾಡುಚೆ, ಅನಿ ತ್ಯಾ ಬೈಲಾಚೆ ಮಾಂಸ್ ಖಾವ್ಚೆ ನ್ಹಯ್, ತ್ಯಾ ಬೈಲಾಚೊ ಯೆಜ್ಮಾನ್ ಚುಕಿದಾರ್ ಹೊಯ್ನಾ. 29 ಖರೆ ತೊ ಬೈಲ್ ಪೈಲೆಚ್ಯಾನ್ಬಿ ಮಾರುಕ್ ಯೆತಲೊ ಮನುನ್ ಗೊತ್ತ್ ರಾವ್ನ್, ತೆಜ್ಯಾ ವಿಶಯಾತ್ ಯೆಜ್ಮಾನಾಕ್ ಹುಶಾರ್ಕಿ ದಿಲ್ಲೆ ರಾಲ್ಯಾರ್ಬಿ, ತೆನಿ ತ್ಯಾ ಬೈಲಾಕ್ ಭಾಂದುನ್ ಥವ್ಕ್ ನಸಲ್ಲ್ಯಾ ಸಾಟ್ನಿ, ತ್ಯಾ ಬೈಲಾನ್ ಘವ್ಮಾನ್ಸಾಕ್ ನಾತರ್ ಬಾಯ್ಕೊಮಾನ್ಸಿಕ್ ಮಾರುನ್ ಜಿವ್ ಕಾಡಲ್ಲ್ಯಾ ಸಾಟ್ನಿ, ತ್ಯಾ ಬೈಲಾಕ್ ಮಾರುನ್ ಜಿವ್ ಕಾಡುಚೆ, ಅನಿ ತೆಜೊ ಯಜ್ಮಾನ್ ಬಿ ಮರ್ನಾಚ್ಯಾ ಶಿಕ್ಷ್ಯಾಕ್ ಗುರಿ ಹೊವ್ಚೆ. 30 ಖರೆ ತ್ಯಾ ಯಜ್ಮಾನಾನ್ ಅಪ್ನಾಚೊ ಜಿವ್ ಹುರ್ವುನ್ಗೆವ್ಕ್ ಪೈಸೆ ದಿವ್ಚೆ ಮನುನ್ ಚಿಂತ್ಲ್ಯಾರ್, ನೆಮಲ್ಲೆ ತವ್ಡೆ ಪೈಸೆ ದಿವ್ನ್ ಅಪ್ನಾಚೊ ಜಿವ್ ಹುರ್ವುನ್ ಘೆವ್ಕ್ ಹೊತಾ. 31 ತ್ಯಾ ಬೈಲಾನ್ ಮಾರುನ್ ಮರಲ್ಲೊ ಝಿಲ್ಗೊ ನಾತರ್ ಚೆಡು ಹೊಲ್ಯಾರ್ಬಿ ಹ್ಯಾಚ್ ನೆಮಾ ಸಾರ್ಕೆ ನಿರ್ದಾರ್ ಕರುಚೆ. 32 ಅನಿ ಮಾರುನ್ಗೆವ್ನ್ ಮರಲ್ಲೊ ಗುಲಾಮ್ ಹೊಲ್ಯಾರ್, ತೆಂಚ್ಯಾ ಯಜ್ಮಾನಾಕ್ ತಿಸ್ ಚಾಂದಿಚೆ ಪೈಸೆ ದಿವ್ಚೆ, ಅನಿ ತ್ಯಾ ಬೈಲಾಕ್ ಗುಂಡೆ ಮಾರುನ್ ಜಿವ್ ಕಾಡುಚೆ. 33 ಕೊನ್ ತರ್ ಎಕ್ಲ್ಯಾನ್ ಖಡ್ಡೊ ಕಾಡುನ್ ಥವ್ನ್, ತೊ ಧಾಪುಕ್ ನಸಲ್ಲ್ಯಾ ಸಾಟ್ನಿ, ಅನಿ ಎಕ್ಲ್ಯಾಚೊ ಬೈಲ್ ನಾತರ್ ಗಾಡಾವ್ ತ್ಯಾತುರ್ ಪಡುನ್ ಮರ್ಲ್ಯಾರ್, 34 ತೊ ಖಡ್ಡೊ ಕಾಡಸಲ್ಲ್ಯಾನ್ ಥೈ ಹೊಲ್ಲ್ಯಾ ಲುಕ್ಷಾನಾಕ್ ಬದ್ಲಾಚೆ ದಿವ್ಚೆ, ತ್ಯಾ ಜನಾವರಾಚ್ಯಾ ಯೆಜ್ಮಾನಾಕ್ ತೆಜೊ ಪೈಸೊ ದಿವ್ಚೆ, ಅನಿ ತ್ಯಾ ಮರಲ್ಲ್ಯಾ ಜನಾವರಾಕ್ ಅಪ್ನಿಚ್ ಘೆವ್ಕ್ ಹೊತಾ. 35 ಎಕ್ಲ್ಯಾಚ್ಯಾ ಬೈಲಾನ್ ಅನಿ ಎಕ್ಲ್ಯಾಚ್ಯಾ ಬೈಲಾಕ್ ಮಾರುನ್ ಜಿವ್ ಕಾಡಲ್ಲೆ ಹೊಲ್ಯಾರ್, ಝಿತ್ತೊ ಹೊತ್ತ್ಯಾ ಬೈಲಾಕ್ ಸಮಾಧಾನಾನ್ ವಾಟೆ ಕರುನ್ಗೆವ್ಚೆ. 36 ಖರೆ ತೊ ಬೈಲ್ ಮಾರುಕ್ ಯೆತಲೊ ಮನುನ್ ಅದ್ದಿಚ್ ಗೊತ್ತ್ ರಾಲ್ಯಾರ್ಬಿ, ತೆಕಾ ಭಾಂದುನ್ ಥವ್ಕ್ ನಸಲ್ಲ್ಯಾ ಸಾಟ್ನಿ ತೆನಿ ಬೈಲಾಕ್ ಬದಲ್ ಬೈಲ್ ದಿವ್ಚೆ, ಅನಿ ಮರಲ್ಲ್ಯಾ ಬೈಲಾಕ್ ಅಪ್ನಿಚ್ ಘೆವ್ಚೆ.