1 ಇಜ್ರಾಯೆಲ್ ಲೊಕಾನಿ ಸರ್ವೆಸ್ಪರ್ ಹುಕುಮಾ ಸಾರ್ಕೆ ಸಿನ್ ಮನ್ತಲ್ಯಾ ಡಂಗ್ಳಿಕ್ನಾ ಪರ್ಯಾನ್ ಕರುನ್ ರೆಫಿದಿಮಿ ಮನ್ತಲ್ಯಾಕ್ಡೆ ವಸ್ತಿ ರಾಲ್ಯಾನಿ, ಥೈ ತೆಂಕಾ ಪಿವ್ಕ್ ಪಾನಿ ಗಾವ್ಕ್ ನಾ. 2 ತಸೆ ಹೊವ್ನ್, ತೆನಿ ಮೊಯ್ಜೆ ವಾಂಗ್ಡಾ ಝಗ್ಡುನ್ ಅಮ್ಕಾ ಪಿವ್ಕ್ ಪಾನಿ ದಾಕ್ವು ಮಟ್ಲ್ಯಾನಿ. ತನ್ನಾ ಮೊಯ್ಜೆನ್, ತುಮಿ ಮಾಜ್ಯಾ ವಾಂಗ್ಡಾ ಕಶ್ಯಾಕ್ ಝಗಡ್ತ್ಯಾಸಿ, ಕಶ್ಯಾಕ್ ಸರ್ವೆಸ್ಪರಾಚಿ ಪರಿಕ್ಷಾ ಕರ್ತ್ಯಾಶಿ ಮಟ್ಲ್ಯಾನ್. 3 ಥೈ ಲೊಕಾನಿ ಪಾನಿ ನಸಲ್ಲ್ಯಾ ತರಾಸಾನಿ, ಲೈ ಸೊಸ್ ಲಾಗುನ್ ಮೊಯ್ಜೆಚ್ಯಾ ವಿರೊಧ್ ಗುನ್ಗುಟ್ಲ್ಯಾನಿ, "ತಿಯಾ ಅಮ್ಚ್ಯಾ ಪೊರಾಕ್ನಿ ಅನಿ ಬಾಯ್ಕಾಕ್ನಿ ಅನಿ ಜನಾವಾರಾಕ್ನಿ ಇಜಿಪ್ತಾಕ್ನಾ ಕಶ್ಯಾಕ್ ಬಲ್ವುನ್ ಹಾನಲೈ ? ಪಾನಿ ನಸ್ತಾನಾ ಮಾರುಕ್ ಕಾಯ್?" ಮನುನ್ ಗಾಳಿಯಾ ದಿಲ್ಯಾನಿ. 4 ತನ್ನಾ ಮೊಯ್ಜೆನ್, "ಮಿಯಾ ಹ್ಯಾ ಲೊಕಾಂಚ್ಯಾ ಸಾಟ್ನಿ ಕಾಯ್ ಕರು? ಹೆನಿ ಮಾಕಾ ಗುಂಡೆ ಮಾರುನ್ ಜಿವ್ ಕಾಡ್ತಲ್ಯಾ ಸಾರ್ಕೆ ಹಾತ್", ಮನುನ್ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ಲ್ಯಾನ್.

5 ತನ್ನಾ ಸರ್ವೆಸ್ಪರಾನ್ , "ತಿಯಾ ನೈಲ್ ನ್ಹಯಿಕ್ ಮಾರಲ್ಲೊ ಧಾಂಡೊ ಘೆವ್ನ್, ಲೊಕಾಂಚ್ಯಾ ಫಿಡೆ ಮಿಯಾ ದಾಕ್ವುತಲ್ಯಾ ಜಾಗ್ಯಾಕ್ ಜಾ. 6 ಥೈಚ್ ಹೊತ್ತ್ಯಾ ಎಕ್ ಮೊಟ್ಟ್ಯಾ ಗುಂಡ್ಯಾ ವರ್‍ತಿ ಮಿಯಾಚ್ ತುಜಾ ಫಿಡ್ಯಾತ್ ಇಬೆ ರ್‍ಹಾತಾ, ಅನಿ ತಿಯಾ ತ್ಯಾ ಮೊಟ್ಟ್ಯಾ ಗುಂಡ್ಯಾಕ್ ಮಾರ್, ತ್ಯಾತುರ್ನಾ ಪಾನಿ ಯೆತಾ, ಲೊಕಾ ತೆ ಪಾನಿ ಫಿವುಂದಿತ್" ಮನುನ್ ಹುಕುಮ್ ದಿಲ್ಯಾನ್, ಅಸೆ ಮೊಯ್ಜೆನ್ ಇಜ್ರಾಯೆಲ್ ಲೊಕಾಂಚ್ಯಾ ಜಾಂನ್ತ್ಯಾಂಚ್ಯಾ ಇದ್ರಾಕುಚ್ ಕರ್ಲ್ಯಾನ್. 7 ಇಜ್ರಾಯೆಲ್ ಲೊಕಾನಿ ಥೈ ಸರ್ವೆಸ್ಪರ್ ಅಪ್ನಾಚ್ಯಾ ಮದ್ದಿ ಹಾಯ್ ಕಿ ನಾ? ಮನುನ್ ಪರಿಕ್ಷಾ ಕರಲ್ಲ್ಯಾ ಸಾಟ್ನಿ ತ್ಯಾ ಜಾಗ್ಯಾರ್ ಮೊಯ್ಜೆನ್, ಮಸ್ಸಾ ಮನುನ್ ಅನಿ ಲೊಕಾನಿ ಅಪ್ನಾಚ್ಯಾ ವಾಂಗ್ಡಾ ವಾದ್ ಕರಲ್ಲ್ಯಾ ಸಾಟ್ನಿ ಮೆರಿಬಾ ಮನುನ್ ನಾವ್ ಥವ್ಲ್ಯಾನ್.

8 ರೆಫಿದಿಮ್ ಮನ್ತಲ್ಯಾಕ್ಡೆ ಅಮಾಲೆಕ್ಯಾನಿ ಇಜ್ರಾಯೆಲಾಂಚ್ಯಾ ವಿರೊಧ್ ಹೊವ್ನ್ ಝಗ್ಡೊ ಕರುಕ್ ಯೆಲ್ಯಾನಿ. 9 ತನ್ನಾ ಮೊಯ್ಜೆನ್ ಜೊಶ್ವಾಕ್, "ಸೈನಿಕಾಕ್ನಿ ಎಚುನ್ ಘೆವ್ನ್ ಉದ್ದ್ಯಾ ಅಮ್ಚ್ಯಾ ಸಾಟ್ನಿ ಹೊರಾಟ್ ಕರಾ ಮಿಯಾ ಧಾಂಡೊ ಧರುನ್ಗೆವ್ನ್ ಮಡ್ಡಿಚ್ಯಾ ವರ್‍ತಿ ಇಬೆ ರ್‍ಹಾತಾ", ಮನುನ್ ಸಾಂಗ್ಲ್ಯಾನ್. 10 ಜೊಶ್ವಾನ್ ಮೊಯ್ಜೆಚ್ಯಾ ಒಪ್ಕಿವೈನಾ ಅಮಾಲೆಕ್ಯಾಂಚ್ಯಾ ವಾಂಗ್ಡಾ ಝಗ್ಡೊ ಕರುಕ್ ಜಾವ್ಕ್ ಲಾಲೊ. ಮೊಯ್ಜೆ ಅನಿ ಆರೊನ್ ಅನಿ ಹುರಾ ಹೆನಿ ತಿಗೆಬಿ ಮಡ್ಡಿಚ್ಯಾ ತುದಿಕ್ ವರ್‍ತಿ ಚಡ್ಲ್ಯಾನಿ. 11 ಮೊಯ್ಜೆನ್ ಹಾತ್ ವರ್‍ತಿ ಉಕಲ್ತಾನಾ ಇಜ್ರಾಯೆಲ್ ಲೊಕಾ ಜಿಕುನ್ಗೆತ್ ಹೊತ್ತ್ಯಾನಿ, ಅನಿ ತೊ ಹಾತ್ ಖಾಲ್ತಿ ಉತರ್ತಾನಾ ಅಮಾಲೆಕ್ಯಾನಿ ಜಿಕಿತ್. 12 ಅಸೆ ರ್‍ಹಾತಾನಾ, ಮೊಯ್ಜೆಚೊ ಹಾತ್ ಒಳುನ್ ಯೆಲ್ಲ್ಯಾ ತನ್ನಾ, ಆರೊನ್ ಅನಿ ಹುರಾನ್ ಎಕ್ ಗುಂಡೊ ಹಾನುನ್ ಥವ್ನ್ ತೆಚ್ಯಾ ವರ್‍ತಿ ಮೊಯ್ಜೆಕ್ ಬಸ್ವುಲ್ಯಾನಿ. ಎಕ್ಲೊ ಉಜ್ವ್ಯಾಕ್ ಅನಿ ಎಕ್ಲೊ ಡಾವ್ಯಾಕ್ ಇಬೆರಾವ್ನ್ ತೆಚ್ಯಾ ಹಾತಾಕ್ನಿ ಆದಾರ್ ದಿಲ್ಯಾನಿ. ಅಸೆಚ್ ತೆಚಿ ಹಾತಾ ಖಾಲ್ತಿ ಉತ್ರಿ ನಸ್ತಾನಾ ವರ್‍ತಿಚ್ ರ್‍ಹಾಯ್ ಸಾರ್ಕೆ ದಿಸ್ ಬುಡಿ ಪತರ್ ರಾಲ್ಯಾನಿ. 13 ಅಸೆ ಜೊಶ್ವಾನ್ ಅಮಾಲೆಕ್ಯಾಚ್ಯಾ ಸೈನ್ಯಾಕ್ನಿ ಕೊಯ್ತ್ಯಾಚೊ ವಾಟೊ ಕರುನ್ ಹಾರ್ವುಲ್ಯಾನ್.

14 "ಹ್ಯಾ ಜಿಮ್ನಿ ವರ್‍ತಿ ಅಮಾಲೆಕ್ಯಾಚೆ ನಾಂವುಚ್ ನಾ ಹೊಯ್ ಸಾರ್ಕೆ ಕರ್ತಾ, ಮನ್ತಲಿ ಹಿ ಗೊಸ್ಟ್ ಪುಸ್ತಕಾತ್ ಲಿವ್ನ್ ಅನಿ ಜೊಶ್ವಾಕ್ ಕಳಿ ಸಾರ್ಕೆ ಕರ್" ಮನುನ್ ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗ್ಲ್ಯಾನ್. 15 ಥೈ ಮೊಯ್ಜೆನ್ ಎಕ್ ಬಲಿ ಭೆಟ್ವುತಲೊ ಜಾಗೊ ತಯಾರ್ ಕರುನ್ ತೆಕಾ, "ಯೆವಾ ನಿಸ್ಸಿ"* ಮನುನ್ ನಾವ್ ಥವ್ಲ್ಯಾನ್. 16 ಅನಿ ಮೊಯ್ಜೆನ್

"ಸರ್ವೆಸ್ಪರಾಚೊ ಝಂಡೊ ಉಕ್ಲುನ್ ಧರಾ,

ಅನಿ ಸರ್ವೆಸ್ಪರಾಕ್ ಅಮಾಲೆಕ್ಯಾಂಚ್ಯಾ ವಾಂಗ್ಡಾ

ಸದಾ ಸರ್ವತಾಕ್ ಝಗ್ಡೊ ರ್‍ಹಾತಾ", ಮನುನ್ ಸಾಂಗ್ಲ್ಯಾನ್.