1 ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್, "ಫಾರೊವಾಚ್ಯಾ ಇದ್ರಾಕ್ ಜಾ, ಮಿಯಾ ತೆಜೊ ಅನಿ ತೆಚ್ಯಾ ಅಧಿಕಾರಿಯಾಂಚಿ ಮನಾ ಕಠಿನ್ ಕರ್ಲಾ, ಕಶ್ಯಾಕ್ ಮಟ್ಲ್ಯಾರ್ ತೆಂಚ್ಯಾ ಇದ್ರಾಕ್ ಹಿ ಅಜಾಪಾಚಿ ಕಾಮಾ ಕರುಕ್ ಅವ್ಕಾಸ್ ಗಾವ್ಚೆ. 2 ಇಜ್ರಾಯೆಲಾಂಚ್ಯಾ ಲೊಕಾನಿ ತೆಂಚ್ಯಾ ಪೊರಾಕ್ನಿ ಅನಿ ನಾತ್ರಾಕ್ನಿ ಹಿ ಅಜಾಪಾ ಸಗ್ಳಿ ಸಾಂಗುಚೆ, ಅನಿ ಇಜಿಪ್ತಾಚ್ಯಾ ಲೊಕಾಕ್ನಿ ಮಿಯಾ ಸರ್ವೆಸ್ಪರಾನ್ ಮನ್ ಯೆಲ್ಲ್ಯಾ ಸಾರ್ಕೆ ಶಿಕ್ಷ್ಯಾ ದಿಲೊ ಮನುನ್ ಕಳುಚೆ, ಅಸೆ ಹ್ಯಾ ಅಜಾಪಾಚ್ಯಾ ವೈನಾ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ವುನ್ ಘೆತ್ಯಾಸಿ", ಮಟ್ಲ್ಯಾನ್.

3 ಅಸೆಚ್ ಮೊಯ್ಜೆನ್ ಅನಿ ಆರೊನಾನ್ ಫಾರೊವ್ ರಾಜಾಚ್ಯಾ ಇದ್ರಾಕ್ ಜಾವ್ನ್ ತೆಕಾ, ಇಬ್ರಿಯಾಂಚೊ ದೆವ್ ಸರ್ವೆಸ್ಪರ್ ಸಾಂಗುಲಾಗಲ್ಲಿ ಬೊಲ್ನಿಯಾ ಹಿ, ತಿಯಾ ಮಾಕಾ ಖೈ ಪತರ್ ಖಾಲ್ತಿ ಹೊವ್ನ್ ಚಲಿನ್ಹಯ್ ? ಮಾಕಾ ಆರಾದನ್ ಕರುಕ್ ಜಾವ್ಕ್ ಮಾಜ್ಯಾ ಲೊಕಾಕ್ನಿ ಒಪ್ಕಿ ದಿ. 4 ನಾ ಹೊಲ್ಯಾರ್ ಉದ್ದ್ಯಾಚ್ ತುಜ್ಯಾ ದೆಶ್ಯಾತ್ ಠೊಳಾ ಯೆಯ್ ಸಾರ್ಕೆ ಕರ್ತಾ. 5 ಜಿಮಿನ್ ಪುರಾ ಕಾಳಿ ದಿಸಿ ಸಾರ್ಕೆ ತವ್ಡಿ ಠೊಳಾ ಯೆತಾತ್, ಗಾರ್ಬಿಯಾಂಚ್ಯಾ ಪಾವ್ಸಾನ್ ನಾಶ್ ಹೊಯ್ ನಸ್ತಾನಾ ಹುರಲ್ಲೆ ಸಗ್ಳೆ ತೆ ಠೊಳಾ ಖಾತಾತ್, ಸೆತಾತ್ ಹೊತ್ತ್ಯಾ ತುಮ್ಚ್ಯಾ ಸಗ್ಳ್ಯಾ ಝಾಡಾಂಚಿ ಪಾನಾ, ಚಿಗರ್ ಸಗ್ಳೆ ಖಾತಾತ್. 6 ತುಜ್ಯಾ ಘರ್‍ಹಾತ್ ಅನಿ ತುಜ್ಯಾ ರಾಜಾಚ್ಯಾ ಘರ್‍ಹಾತ್ ಅನಿ ತುಜ್ಯಾ ಅಧಿಕಾರಿಯಾಂಚ್ಯಾ ಅನಿ ಇಜಿಪ್ತಾಚ್ಯಾ ಲೊಕಾಂಚ್ಯಾ ಸಗ್ಳ್ಯಾ ಘರಾತ್ನಿಬಿ ತಿ ಠೊಳಾ ಬರ್ತಾತ್, ತುಮ್ಚ್ಯಾ ಪುರ್ವಜಾಂಚ್ಯಾ ಕಾಲಾಕ್ನಾ ಅಜುನ್ ಪತರ್ಬಿ ತಸ್ಲ್ಯಾ ಠೊಳಾಂಚೊ ಹಿಂಡ್ ಕೊನ್ಬಿ ಬಗುಕ್ನಾತ್, ಮನುನ್ ಅಸೆ ಸಾಂಗುನ್ ಫಾರೊವ್ ರಾಜಾಕ್ನಾ ಪರ್‍ತುನ್ ಗೆಲೊ. 7 ತನ್ನಾ ಫಾರೊವ್ ರಾಜಾಚ್ಯಾ ಘರಾತ್ಲ್ಯಾ ಅಧಿಕಾರಿಯಾನಿ ತೆಕಾ, "ಹ್ಯೊ ಮಾನುಸ್ ಅನಿ ಕೆವ್ಡೊ ಪತರ್ ಅಸೊ ತರಾಸಾಚೊ ಹೊವ್ನ್ ರ್‍ಹಾತಾಕಿ? ತಿ ಲೊಕಾ ಜಾವ್ನ್ ಅಪ್ಲ್ಯಾ ಸರ್ವೆಸ್ಪರಾಕ್ ಆರಾದನ್ ಕರುಕ್ ಒಪ್ಕಿ ದಿವ್ನ್ ಸೊಡ್, ಇಜಿಪ್ತ್ ದೆಶುಚ್ ನಾಶ್ ಹೊವ್ಲಾ, ಮನ್ತಲೆ ತುಕಾ ಕಳುಕ್ ನಾ ಕಾಯ್?" ಮನುನ್ ಸಾಂಗ್ಲ್ಯಾನಿ. 8 ಹೆ ಆಯ್ಕಲ್ಲ್ಯಾ ಫಾರೊವ್ ರಾಜಾನ್, ಮಯ್ಜೆಕ್ ಅನಿ ಆರೊನಾಕ್ ಅನಿ ಪರ್‍ತುನ್ ಬಲ್ವುಕ್ ಲಾವ್ನ್, "ತುಮಿ ಜಾವ್ನ್ ತುಮ್ಚ್ಯಾ ಸರ್ವೆಸ್ಪರಾಕ್ ದೆವಾಕ್ ಆರಾದನ್ ಕರುಕ್ ಅಡ್ಡಿನಾ, ಖರೆ ಕೊನ್ ಕೊನ್ ಜಾವ್ಚೆ ಮನುನ್ ಕರ್ಲ್ಯಾಸಿ?" ಮನುನ್ ಇಚಾರ್‍ಲ್ಯಾನಿ.

9 ತನ್ನಾ ಮೊಯ್ಜೆನ್, "ಅಮಿ ಸರ್ವೆಸ್ಪರಾಕ್ ಸನ್ ಕರ್‍ತಲೆ ಹಾಯ್, ತಸೆ ಹೊವ್ನ್ ಪೊರಾ, ಮ್ಹಾತಾರೆ ಸಗ್ಳೆಬಿ ಜಾತಾಂವ್, ಝಿಲ್ಗೆ, ಚೆಡ್ವಾ ಅನಿ ಜನಾವಾರಾ, ಗೊರಾ, ಬೊಕ್ಡಾ ಹೆ ಸಗ್ಳೆ ಘೆವ್ನ್ ಜಾತಾಂವ್" ಮನುನ್ ಜವಾಬ್ ದಿಲ್ಯಾನ್. 10 ತನ್ನಾ ಫಾರೊವ್ ರಾಜಾನ್, "ತುಮಿ ತುಮ್ಚ್ಯಾ ಘರಾತ್ಲ್ಯಾ ಸಗ್ಳ್ಯಾ ಲೊಕಾಂಕ್ನಿ ಬಲ್ವುನ್ ಘೆವ್ನ್ ಜಾವ್ಕ್ ಮಿಯಾ ಒಪ್ಕಿ ದಿಯ್ನಾ, ದಿಲ್ಲೆ ಹೊಲ್ಯಾರ್, ಸರ್ವೆಸ್ಪರಾಚ್ಯಾ ದಯಾನುಚ್ ತುಮ್ಕಾ ರಾಕುಚೆ ಹೊತಾ, ಬಗಾ, ತುಮಿ ಬುರ್ಶಾ ಯವ್ಜನಿನ್ ಭರಲ್ಲೆ ಮನ್ತಲೆ ಸಮಾಚ್!". 11 ತುಮ್ಚ್ಯಾತ್ಲಿ ಘವ್ಮಾನ್ಸಾ ಯೆವ್ಡಿಚ್ ಜಾವ್ನ್ ಸರ್ವೆಸ್ಪರಾಕ್ ಆರಾದನ್ ಕರುಚೆ, ತುಮಿ ಇಚಾರಲ್ಲೆಬಿ ತವ್ಡೆಚ್ ನೈ‍ಯ್ ಕಾಯ್? ಮನುನ್ ಸಾಂಗುನ್ ತೆಂಕಾ ಅಪ್ಲ್ಯಾ ಇದ್ರಾಕ್ನಾ ಧಾಡುನ್ ದಿಲ್ಯಾನ್. 12 ಸರ್ವೆಸ್ಪರಾನ್ ಮೊಯ್ಜೆಕ್, "ಇಜಿಪ್ತ್ ದೆಸಾತ್ ಹಾತ್ ಉಕ್ಲುನ್ ಠೊಳಾ ಯೆಯ್ ಸಾರ್ಕೆ ಕರ್, ಗಾರ್ಬಿಯಾಂಚ್ಯಾ ಪಾವ್ಸಾನ್ ಹಾಳ್ ಹೊಯ್ ನಸ್ತಾನಾ ಹುರಲ್ಲೆ ಸಗ್ಳೆ ಫಿಕ್ ಠೊಳಾ ಖಾಂವ್ದಿತ್" ಮಟ್ಲ್ಯಾನ್. 13 ತಸೆಚ್ ಮೊಯ್ಜೆನ್ ಅಪ್ನಾಚೊ ದಾಂಡೊ ಇಜಿಪ್ತ್ ದೆಶ್ಯಾ ವರ್‍ತಿ ಉಕಲ್ಲ್ಯಾನ್, ತನ್ನಾ ಸರ್ವಶ್ವರಾನ್ ರ್‍ಹಾತ್ ಅನಿ ದಿಸ್, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ವಾರೆ ಮಾರಿ ಸಾರ್ಕೆ ಕರ್ಲ್ಯಾನ್, ತ್ಯಾ ವಾರ್ಯಾ ವಾಂಗ್ಡಾ ನಸ್ಕಾತುಚ್ ಠೊಳಾ ಯೆಯ್ ಸಾರ್ಕೆ ಹೊಲೆ. 14 ತಿ ಠೊಳಾ ಲೈ ಹೊತ್ತಿ, ಅನಿ ಸಗ್ಳ್ಯಾ ಇಜಿಪ್ತ್ ದೆಸಾತ್ ಪಗಳ್ಲಿ, ತಸ್ಲೆ ಪಾಟಿ ಕನ್ನಾಬಿ ಯೆಲ್ಲೆ ನತ್ತೆ, ಅನಿ ಫಿಡೆಬಿ ಯೆಯ್ ಸಾರ್ಕೆ ನಾ. 15 ಪುರಾ ಜಿಮಿನ್ ಕಾಳಿ ದಿಸಿ ಸಾರ್ಕೆ ತಿ ಠೊಳಾ ಭರುನ್ ಹೊತ್ತಿ, ಗಾರ್ಬಿಯಾಂಚ್ಯಾ ಪಾವ್ಸಾನ್ ನಾಶ್ ಹೊಯ್ ನಸ್ತಾನಾ ಹೊತ್ತಿ ಹಿರ್ವಿ ಝಾಡಾ, ಫಿಕ್ ಸಗ್ಳ್ಯಾ ನಮನ್ಯಾಚಿ ಫಳಾ ಸಗ್ಳೆ ಖಾಲ್ಯಾನಿ ಇಜಿಪ್ತ್ ದೆಸಾತ್ ಪುರಾ ಹಿರ್ವೆ ಮನ್ತಲೆ ಎಕ್ಬಿ ನಾ ಹೊಲೆ. 16 ತನ್ನಾ ಫಾರೊವ್ ರಾಜಾನ್ ಮೊಯ್ಜೆಕ್ ಅನಿ ಆರೊನಾಕ್ ಲಗ್ಗುನಾ ಬಲ್ವುಕ್ ಲಾವ್ನ್, "ಮಿಯಾ ತುಮ್ಚೊ ದೆವ್ ಸರ್ವೆಸ್ಪರಾಕ್ ಅನಿ ತುಮ್ಚ್ಯಾ ಇದ್ರಾಕ್ ಚುಕ್ ಕರ್‍ಲೊ. 17 ಅನಿ ಅತ್ತಾ ಮಾಕಾ ಎಗ್ದಾ ಕ್ಷಮಾ ಕರಾ, ಅನಿ ಹ್ಯೊ ತರಾಸ್ ಮಾಕಾ ಸೊಡುನ್ ಜಾಯ್ ಸಾರ್ಕೆ ತುಮ್ಚ್ಯಾ ಸರ್ವೆಸ್ಪರಾಕ್ ಮಾಗ್ನಿ ಕರಾ". 18 ಮೊಯ್ಜೆನ್ ರಾಜಾಕ್ನಾ ಪರ್‍ತುನ್ ಜಾವ್ನ್ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ಲ್ಯಾನ್. 19 ಸರ್ವೆಸ್ಪರಾನ್ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ವಾರ್ಯಾಕ್ ಲೈ ಬಳಾಚೊ ದಿಸ್ ಬುಡ್ತಲ್ಯಾ ದಿಕ್ಕಾಚೊ ವಾರೊ ಕರುನ್, ಎಕ್ ಠೊಳ್ ಸೊಡಿನಸ್ತಾನಾ ಫುರಾ ಠೊಳಾ ಹುಡುನ್ ಜಾವ್ನ್ ತಾಂಬ್ಡ್ಯಾ ಸಮುಂದರಾತ್ ಪಡಿ ಸಾರ್ಕೆ ಕರ್ಲ್ಯಾನ್. 20 ಖರೆ ಸರ್ವೆಸ್ಪರಾನ್ ರಾಜಾಚೊ ಮನ್ ಮಂಡ್ ಕರಲ್ಲ್ಯಾ ಸಾಟ್ನಿ ತೆನಿ ಇಜ್ರಾಯೆಲ್ ಲೊಕಾಕ್ನಿ ಜಾವ್ಕ್ ದಿವ್ಕ್ ನಾ.

21 ಮಾನಾ ಸರ್ವೆಸ್ಪರಾನ್ ಮೊಯ್ಜೆಕ್, ಮಳ್ಬಾಕ್ಡೆ ತುಜೊ ಹಾತ್ ಉಕಲ್ ತನ್ನಾ ಇಜಿಪ್ತ್ ದೆಸಾತ್ ಮೊಟೊ ಕಾಳೊಕ್ ಹೊತಾ, ಲೊಕಾಕ್ನಿ ಚಲುಕ್ಬಿ ಸುದ್ರಿನಾ ತವ್ಡೊ ಕಾಳೊಕ್ ಹೊತಾ . 22 ಮೊಯ್ಜೆನ್ ಮಳ್ಬಾಕ್ಡೆ ಹಾತ್ ಉಕಲಲ್ಲ್ಯಾ ತನ್ನಾ ಇಜಿಪ್ತ್ ದೆಸಾತ್ ಪುರಾ ತಿನ್ ದಿಸ್ ಪತರ್ ದಾಟ್ಲೊ ಕಾಳೊಕ್ ಹೊವ್ನ್ ರಾಲೊ. 23 ತ್ಯಾ ತಿನ್ ದಿಸಾತ್ನಿ ಎಕಾ ಮೆಕಾಕ್ ಬಗುನ್ ಘೆವ್ಕ್ ಹೊವ್ಕ್ ನಾ, ಅಪ್ನಿ ಹೊತ್ತ್ಯಾ ಜಾಗ್ಯಾ ವೈನಾ ಲೊಕಾ ಉಟುಕ್ ನಾತ್, ಖರೆ ಇಜ್ರಾಯೆಲ್ ಲೊಕಾ ಹೊತ್ತ್ಯಾಕ್ಡೆ ಉಜ್ವೊಡ್ ಹೊತ್ತೊ. 24 ತನ್ನಾ ಫಾರೊವ್ ರಾಜಾನ್ ಮೊಯ್ಜೆಕ್ ಬಲ್ವುನ್, "ತುಮಿ ಜಾವ್ನ್ ಸರ್ವೆಸ್ಪರಾಕ್ ಆರಾದನ್ ಕರಾ, ಜಾತಾನಾ ತುಮ್ಚ್ಯಾ ಬಾಯ್ಕಾ ಪೊರಾಕ್ನಿ ಘೆವ್ನ್ ಜಾವಾ, ಖರೆ ತುಮ್ಚಿ ಜನಾವಾರಾ ಹಿತ್ತೆಚ್ ರಾಂವ್ದಿತ್, ತುಮಿ ತೆ ಸೊಡುನ್ ಜಾವ್ಚೆ" ಮಟ್ಲ್ಯಾನ್. 25 ತನ್ನಾ ಮೊಯ್ಜೆನ್, "ಅಮ್ಚೊ ದೆವ್ ಸರ್ವೆಸ್ಪರಾಕ್ ಜಾಳ್ವುತಲಿ ಬಲಿ ದಿವ್ಕ್ ಪಾಜೆ, ತೆಕಾ ಪಾಜೆ ಹೊಲ್ಲಿ ಜನಾವರಾ ಅಮ್ಕಾ ದಿ". 26 ಅನಿ ತವ್ಡೆಚ್ ನಸ್ತಾನಾ, ಅಮ್ಚಿ ಸಗ್ಳಿ ಜನಾವರಾಬಿ ಘೆವ್ನ್ ಜಾವ್ಕ್ ಅವ್ಕಾಸ್ ದಿ, ಎಕ್ ಜನಾವರ್ಬಿ ಅಮಿ ಸೊಡುನ್ ಜಾವ್ಕ್ ಹೊಯ್ನಾ, ಅನಿ ಹ್ಯಾ ಜನಾವಾರಾನಿ ಸರ್ವೆಸ್ಪರಾಕ್ ಬಲಿ ಭೆಟ್ವುತಲೆ ಹಾಯ್, ಖಲಿ ಖಲಿ ಜನಾವಾರಾ ಬಲಿ ಭೆಟ್ವುಚೆ ಮನ್ತಲೆ ಅಮಿ ಥೈ ಜಾವ್ನ್ ಪಾವ್ಚ್ಯಾ ಅದ್ದಿ ಕಳಿನಾ; ಮಟ್ಲ್ಯಾನ್. 27 ಸರ್ವೆಸ್ಪರಾನ್ ರಾಜಾಚೊ ಮನ್ ಮಂಡ್ ಕರಲ್ಲ್ಯಾ ಸಾಟ್ನಿ ತೆನಿ ತೆಂಕಾ ಜಾವ್ಕ್ ಒಪ್ಕಿ ದಿವ್ಕ್ ನಾ. 28 ರಾಜಾನ್ ಮೊಯ್ಜೆಕ್, ಹಿತ್ತೆತ್ನಾ ಜಾ; ಹೆಚ್ಯಾನ್ ಫಿಡೆ ಮಾಜ್ಯಾ ಇದ್ರಾಕ್ ಯೆವ್ ನಕ್ಕೊ, ಹುಶಾರ್! ಪರ್‍ತುನ್ ಮಿಯಾ ತುಕಾ ಬಗಿನಾ ಸಾರ್ಕೆ ರಾ, ಮಿಯಾ ಪರ್‍ತುನ್ ತುಕಾ ಬಗಲ್ಲ್ಯಾ ದಿಸಾಚ್ ತಿಯಾ ಮರ್ತೆಯ್; ಮನುನ್ ಸಾಂಗ್ಲ್ಯಾನ್.

29 ತನ್ನಾ ಮೊಯ್ಜೆನ್, "ಬರೆ, ತಿಯಾ ಖರೆಚ್ ಸಾಂಗ್ಲೆಯ್, ಅನಿ ಫಿಡೆ ತುಕಾ ಮಿಯಾ ಬಗಿನಾ" ಮಟ್ಲ್ಯಾನ್.