ನಿರ್ಗಮನ್ 5

ಇಜಿಪ್ತಾಚ್ಯಾ ರಾಜಾಚ್ಯಾ ಇದ್ರಾಕ್ ಮೊಯ್ಜೆ ಅನಿ ಆರೊನ್

1 ಮಾನಾ ಮೊಯ್ಜೆ ಅನಿ ಆರೊನ್ ಫಾರೊವ್ ಮನ್ತಲ್ಯಾ ರಾಜಾಚ್ಯಾ ಇದ್ರಾಕ್ ಯೆಲೆ, ಅನಿ "ಇಜ್ರಾಯೆಲಾಂಚೊ ಸರ್ವೆಸ್ಪರ್ ದೆವ್ ಸಾಂಗ್ತಾ; ಮಾಜಿ ಲೊಕಾ ಡಂಗ್ಳಿತ್ ಮಾಕಾ ಮಾನ್ ದಿವ್ಕ್ ಸಾಟ್ನಿ ಎಕ್ ಸನ್ ಕರುಕ್ ಪಾಜೆ, ತೆಕಾ ತಿಯಾ ಒಪ್ಕಿ ದಿವ್ಚೆ" ಮಟ್ಲ್ಯಾನಿ.

2 ತನ್ನಾ ಫಾರೊವ್ ರಾಜಾನ್, "ಸರ್ವೆಸ್ಪರ್ ಮಟ್ಲ್ಯಾರ್ ಕೊನ್? ಮಿಯಾ ತೆಚಿ ಗೊಸ್ಟ್ ಆಯ್ಕುನ್ ಇಜ್ರಾಯೆಲಾಂಚ್ಯಾ ಲೊಕಾಕ್ನಿ ಜಾವ್ಕ್ ಸೊಡುಚೆ ಕಾಯ್? ತೊ ಸರ್ವೆಸ್ಪರ್ ಕೊನ್ ಕಿ ಮಾಕಾ ಗೊತ್ತ್ ನಾ, ಇಜ್ರಾಯೆಲ್‌ಕಾರಾಕ್ನಿ ಮಿಯಾ ಜಾವ್ಕ್ ಸೊಡಿನಾ" ಮನುನ್ ಸಾಂಗ್ಲ್ಯಾನ್. 3 ತನ್ನಾ ಮೊಯ್ಜೆನ್ ಅನಿ ಆರೊನಾನ್, "ಇಬ್ರಿಯಾ ಲೊಕಾಂಚೊ ದೆವ್ ಅಮ್ಕಾ ಭೆಟಿ ಹೊಲ್ಲೊ ತಿಯಾ ಒಪ್ಕಿ ದಿಲ್ಯಾರ್, ಅಮಿ ಡಂಗ್ಳಿತ್ ತಿನ್ ದಿಸ್ ಚಲ್ತಲ್ಯಾ ತವ್ಡೆ ಧುರ್ ಜಾವ್ನ್ ಅಮ್ಚೊ ದೆವ್ ಸರ್ವೆಸ್ಪರಾಕ್ ಬಲಿ ಭೆಟ್ವುನ್ ಯೆತಾಂವ್, ತಸೆ ಕರಿನಸ್ತಾನಾ ರಾಲ್ಯಾರ್ ತೊ ಅಮ್ಕಾ ಮರ್ನಾಚಿ ಪಿಡಾ ಧಾಡ್ತಲೊ ನಾ ತರ್ ಮೊಟ್ಟ್ಯಾ ಕೊಯ್ತ್ಯಾನ್ ಮಾರುನ್ ನಾ ಕರ್ತಿಲ್" ಮಟ್ಲ್ಯಾನಿ.

4 ತೆಂಕಾ ತ್ಯಾ ಇಜಿಪ್ತಾಚ್ಯಾ ರಾಜಾನ್, "ಯೆ! ಮೊಯ್ಜೆ ಅನಿ ಆರೊನ್ ತುಮಿ ಹ್ಯಾ ಲೊಕಾಕ್ನಿ ಕಾಮ್ ಸೊಡಿ ಸಾರ್ಕೆ ಕಶ್ಯಾಕ್ ಕರ್ತ್ಯಾಶಿ? ಚಲಾ ಅನಿ ತುಮ್ಚೆ ಗುಲಾಮ್ ಪಾನಾಚೆ ಕಾಮ್ ಕರಾ" ಮಟ್ಲ್ಯಾನ್. 5 ತವ್ಡೆಚ್ ನಸ್ತಾನಾ, ಫಾರೊವ್ ರಾಜಾನ್ ತೆಂಕಾ, "ಅಬಕಾ, ಗಾಂವಾತ್ ಹ್ಯಾ ಲೊಕಾಂಚೊ ಅಂಕೊ ಲೈ ಹೊಲಾ! ಹೆನಿ ಅಪ್ಲ್ಯಾ ಕಾಮಾಂತ್ನಾ ಚುಕ್ವುನ್ ಘೆವ್ಕ್ ತುಮಿಚ್ ಕಾರನ್ ಹೊವ್ಲ್ಯಾಸಿ" ಮಟ್ಲ್ಯಾನ್.

6 ತ್ಯಾಚ್ ದಿಸಿ ರಾಜಾನ್ ಅಪ್ಲ್ಯಾ ಜಬರ್ದಸ್ತಿನ್ ಕಾಮ್ ಕರಸ್ತಲ್ಯಾ ಮಾನ್ಸಾಕ್ ಅನಿ ಇಜ್ರಾಯೆಲ್‌ಕಾರಾಕ್ನಿ ಬಗುನ್ ಘೆತಲ್ಯಾಕ್ನಿ ಬಲ್ವುನ್ ಹುಕುಮ್ ಕರುನ್, 7 ಹೆಚ್ಯಾ ಮಾನಾ ಲೊಕಾಕ್ನಿ ಇಟಂಗಿಯಾ ಕರುಕ್ ಗವಾತ್ ದಿವ್ ನಕಾಸಿ, ತೆನಿಚ್ ಗವಾತ್ ಹಾನುನ್ ಘೆಂವ್ದಿತ್. 8 ಖರೆ ಅದ್ದಿ ಕರಲ್ಲಿ ತವ್ಡಿಚ್ ಇಟಂಗಿಯಾ ತೆನಿ ಕರುಕ್ ಪಾಜೆ ಎಕ್ಬಿ ಕಮ್ಮಿ ಕರುಕ್ನಾ, ಕಶ್ಯಾಕ್ ಮಟ್ಲ್ಯಾರ್, ತೆನಿ ಆಳ್ಸಿ ಹೊವ್ಲಾತ್ ತಸೆ ಹೊವ್ನ್, ತೆನಿ ಅಮಿ ದೆವಾಕ್ ಬಲಿ ಭೆಟ್ವುಕ್ ಜಾತಾಂವ್ ಮನುನ್ ಬೊಬ್ ಮರುಲ್ಲಾತ್. 9 ತುಮಿ ತೆಂಚ್ಯಾಕ್ನಾ ಅನಿ ಬಿ ತರಾಸಾಚಿ ಕಾಮಾ ಕರ್ಸುಚೆ, ಲೈ ಕಾಮ್ ಪಡ್ಲ್ಯಾರ್ ಅಸ್ಲ್ಯಾ ಝುಟ್ಯಾ ಕಾನಿಯಾಕ್ನಿ ಕಾನ್ ದಿವ್ಕ್ ತೆಂಕಾ ಎಳ್ ರ್‍ಹಾಯ್ನಾ, ಮನುನ್ ಹುಕುಮ್ ದಿಲ್ಯಾನ್.

10 ತಸೆ ಹೊವ್ನ್, ಕಾಮ್ ಕರಸ್ತಲ್ಯಾ ಮಕಾದಮ್ಮಾನಿ ಅನಿ ತೆಂಚ್ಯಾ ಸಾವ್ಕಾರಾನಿ ಭಾಯ್ರ್ ಜಾವ್ನ್, ತೆಂಕಾ "ತುಮ್ಕಾ ಗವಾತ್ ದಿವ್ ನಕಾಸಿ ಮನುನ್ ಫಾರೊವ್ ರಾಜಾನ್ ಹುಕುಮ್ ಕರುನ್ ಸಾಂಗ್ಲಾ. 11 ಖೈ ಗಾವ್ತಾ ಥೈತ್ನಾ ತುಮಿಚ್ ಗವಾತ್ ಹಾನುನ್ ಘೆವಾ, ಖರೆ ತುಮಿ ಕರ್‍ತಲೆ ಕಾಮ್ ಉಲ್ಲೆಬಿ ಕಮ್ಮಿ ಹೊತಲೆ ನಾ, ಬಗಾ", ಮಟ್ಲ್ಯಾನ್. 12 ‍ ಅಸೆ ರ್‍ಹಾತಾನಾ, ತ್ಯಾ ಲೊಕಾನಿ ಇಜಿಪ್ತ್ ದೆಶ್ಯಾತ್ ಫುರಾ ಫಿರುನ್, ಗವಾತ್ ಗಾಯ್ ನಸ್ತಾನಾ ಹುಡಕ್ಲ್ಯಾನಿ. 13 ಅನಿ ತೆನಿ ಜಬರ್ದಸ್ತಿನ್ ಕಾಮ್ ಕರಸ್ತಲೊ ತೆಂಚ್ಯಾ ವಾಂಗ್ಡಾಚ್ ರಾವ್ನ್, "ತುಮ್ಕಾ ಗವಾತ್ ಗಾವ್ತಲ್ಯಾ ಎಳಾರ್ ಕರಲ್ಲ್ಯಾ ಸಾರ್ಕೆಚ್ ಹರ್ ಎಕ್ ದಿಸಿಬಿ ತ್ಯಾ ದಿಸಾಚೆ ಕಾಮ್ ತ್ಯಾಚ್ ದಿಸಿ ಸಾರುಕ್ ಪಾಜೆ", ಮನುನ್ ಗಡ್ಬಡಿ ಕರುನ್ಗೆತ್ ಹೊತ್ತೊ. 14 "ತುಮಿ ಇಟ್ಟಂಗಿಯಾ ಕರಲೊ ಇಸಬ್ ಅದ್ದಿ ದಿಲ್ಲ್ಯಾ ಸಾರ್ಕೆ ಕಾಲ್ ಅನಿ ಆಜ್ ಕಶ್ಯಾಕ್ ದಿಯ್ನಾ ಹೊಲ್ಯಾಸಿ?" ಮನುನ್ ತ್ಯಾ ಅಧಿಕಾರಿ ಲೊಕಾನಿ ಅಪ್ನಿಚ್ ನೆಮ್ಸುನ್ ಘೆಟಲ್ಯಾ ಇಜ್ರಾಯೆಲಾಂಚ್ಯಾ ಕಾಮ್ ಕರಸ್ತಲ್ಯಾ ಮಕಾದಮ್ಮಾಕ್ನಿ ಮಾರ್ಲ್ಯಾನಿ.

15 ತನ್ನಾ ಇಜ್ರಾಯೆಲಾಂಚ್ಯಾ ಕಾಮ್ ಕರಸ್ತಲ್ಯಾ ಮಕಾದಮ್ಮಾನಿ ರಾಜಾಕ್ಡೆ ಜಾವ್ನ್, "ತಿಯಾ ತುಜ್ಯಾ ಗುಲಾಮಾಕ್ನಿ ಅಸೆ ಕಶ್ಯಾಕ್ ಚಾಲ್ವುತೈಯ್?" 16 "ಅಧಿಕಾರಿ ಲೊಕಾ ಗಾಂವಾತ್ ಗವಾತ್ ದಿಯ್ನಸ್ತಾನಾ ಇಟಂಗಿಯಾ ಕರುಚೆ ಮನ್ತಾತ್!, ಹೆಚ್ಯಾ ವೈನಾ ಗುಲಾಮ್ ಹೊವ್ನ್ ಹೊತ್ತೆ ಅಮಿ ಮಾರ್ ಖಾತಲೆ ಹೊಲೆ, ಚುಕ್ ತುಜ್ಯಾಚ್ ಲೊಕಾಂಚಿ ಹಾಯ್" ಮಟ್ಲ್ಯಾನಿ. 17 ತನ್ನಾ ರಾಜಾನ್, "ತುಮಿ ಖರೆಚ್ಬಿ ಆಳ್ಸಿ ಹಾಸಿ! ತ್ಯಾ ಕಾರನಾ ಸಾಟ್ನಿಚ್ ಅಮಿ ಜಾವ್ನ್ ಸರ್ವೆಸ್ಪರಾಕ್ ಬಲಿ ಭೆಟ್ವುನ್ ಯೆತಾಂವ್ ಮನ್ತ್ಯಾಸಿ. 18 ಚಲಾ ಕಾಮ್ ಕರಾ, ತುಮ್ಕಾ ಗವಾತ್ ದಿವ್ಕ್ ಹೊಯ್ನಾ, ಖರೆ ತುಮಿ ಇಟಂಗಿಯಾಂಚೊ ಹಿಸಾಬ್ ಸಮಾಚ್ ದಿವ್ಕ್ ಪಾಜೆ," ಮಟ್ಲ್ಯಾನ್. 19 ಸದ್ದಾ ಇಟಂಗಿಯಾಂಚೊ ಹಿಸಾಬ್ ಕಮ್ಮಿ ಕರಿನಸ್ತಾನಾ ದಿವ್ಚೆ, ಮನುನ್ ರಾಜಾನ್ ಕಠಿನ್ ಹುಕುಮ್ ದಿಲ್ಯಾ ಸಾಟ್ನಿ, ಇಜ್ರಾಯೆಲಾಂಚ್ಯಾ ಕಾಮಾ ಕರಸ್ತಲ್ಯಾ ಮಕಾದಮ್ಮಾನಿ ಅನಿ ಲೊಕಾನಿ ಅಪ್ನಿ ಲೈ‍ ತರಾಸಾತ್ ಪಡ್ಲಾಂವ್ ಮನ್ತಲೆ ಕಳ್ವುನ್ ಘೆಟ್ಲ್ಯಾನಿ.

20 ತೆನಿ ಫಾರೊವ್ ರಾಜಾಕ್ನಾ ಪರ್‍ತುನ್ ಜಾತಾನಾ, ಮೊಯ್ಜೆ ಅನಿ ಆರೊನಾನ್ ತೆಂಕಾ ಭೆಟುಕ್ ವಾಟ್ ರಾಕಿತ್ ಹೊತ್ತೆ. 21 ತೆಂಕಾ ತ್ಯಾ ಇಜ್ರಾಯೆಲಾಂಚ್ಯಾ ಕಾಮ್ ಕರಸ್ತಲ್ಯಾ ಮಕಾದಮ್ಮಾನಿ, ತುಮಿ ಕರಲ್ಲೆ ಹೆ ಬುರ್ಸೆ ಕಾಮ್ ಬಗುನ್, ಸರ್ವೆಸ್ಪರ್ ತುಮ್ಕಾ ಸಮಾ ಶಿಕ್ಷ್ಯಾ ದಿಂವ್ದಿತ್, ಕಶ್ಯಾಕ್ ಮಟ್ಲ್ಯಾರ್, ರಾಜಾಕ್ ಅನಿ ತೆಚ್ಯಾ ಸೆವಕಾಕ್ನಿ ಅಮ್ಕಾ ಬಗಟ್ಲ್ಯಾರ್ ಕುಸ್ಡೆಪಾನ್ ಹೊಯ್ ಸಾರ್ಕೆ ಕರ್ಲ್ಯಾಸಿ, ತೆಂಚ್ಯಾ ಹಾತಾತ್ನಿ ಅಮ್ಕಾ ಜಿವ್ ಕಾಡುಕ್ ಕೊಯ್ತೊ ದಿಲೆ ಸಾರ್ಕೆ ಹೊಲಾ; ಮನುನ್ ಚಾಡಿಯಾ ಸಾಂಗ್ಲ್ಯಾನಿ.

ಮೊಯ್ಜೆನ್ ಸರ್ವೆಸ್ಪರಾಕ್ಡೆ ಚಾಡಿಯಾ ಸಾಂಗಲ್ಲೆ

22 ತನ್ನಾ ಮೊಯ್ಜೆನ್, ಸರ್ವೆಸ್ಪರಾಚ್ಯಾ ಜಗ್ಗೊಳ್ ಅನಿ ಪರ್‍ತುನ್ ಯೆವ್ನ್, "ಧನಿಯಾ, ಹ್ಯಾ ಲೊಕಾಕ್ನಿ ಅಶೆ ಕಶ್ಯಾಕ್ ಕರ್‍ಲೆ? ಮಾಕಾ ಕಶ್ಯಾಕ್ ಹಿತ್ತೆ ಧಾಡ್ಲೈ? 23 ಮಿಯಾ ಫಾರೊವ್ ರಾಜಾಚ್ಯಾ ಇದ್ರಾಕ್ ಜಾವ್ನ್ ತುಜ್ಯಾ ನಾವಾನ್ ಬೊಲಲ್ಯಾ ದಿಸಾಕ್ನಾ ತೊ ಹ್ಯಾ ಲೊಕಾಕ್ನಿ ಬುರ್ಸೆಚ್ ಕರುಲ್ಲಾ, ತಿಯಾ ತರ್ ತೆಂಕಾ ಸುಟ್ಕಾ ಕರುಕ್ ಕಾಯ್ಬಿ ಕರುಕ್ ನ್ಹಯ್," ಮಟ್ಲ್ಯಾನ್.