ನಿರ್ಗಮನ್ 6

1 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್; "ಮಿಯಾ ಫಾರೊವ್ ರಾಜಾಕ್ ಕಾಯ್ ಕರ್ತಾ ಮನ್ತಲೆ ತಿಯಾ ಲಗ್ಗುನಾಚ್ ಬಗ್ತೈಯ್; ತೊ ಮಾಜ್ಯಾ ಭುಜೆಚಿ ಬಳ್ ಬಗುನ್ ತೆಂಕಾ ಜಾವ್ಕ್ ಸೊಡ್ತಾ, ಮಾಜ್ಯಾ ಹಾತಿಚ್ಯಾ ಬಳಾ ವೈನಾ ತರಾಸಾತ್ ಪಡುನ್ ತೆಂಕಾ ಅಪ್ಲ್ಯಾ ದೆಶ್ಯಾತ್ನಾ ಪಳ್ಸುನ್ ಘಾಲ್ತಾ," ಮಟ್ಲ್ಯಾನ್.

ದೆವಾನ್ ಮೊಯ್ಜೆಕ್ ಬಲ್ವಲ್ಲೆ

2 ದೆವಾನ್ ಮೊಯ್ಜೆಚ್ಯಾ ವಾಂಗ್ಡಾ ಪರ್‍ತುನ್ ಬೊಲುನ್, ಮಿಯಾ ಸರ್ವೆಸ್ಪರ್ ,

3 ಅಬ್ರಾಹಾಮ್, ಇಸಾಕ್ ಅನಿ ಜಾಕೊಬಾಕ್ನಿ ಮಿಯಾ "ಸಗ್ಳೆಬಿ ಕರುಕ್ ಶಕ್ತ್ ಹೊತ್ತೊ ದೆವ್" ಮನುನ್ ದಾಕ್ವುನ್ ಘೆಟಲ್ಲೊ ತವ್ಡೆಚ್ ಖರೆ ಸರ್ವೆಸ್ಪರ್ ಯಾಹ್ವೆ ಮನ್ತಲ್ಯಾ ನಾವಾನ್ ಮಾಜಿ ವಳಕ್ ಕರುನ್ ದಿವ್ಕ್ ನಾ. 4 ಮಿಯಾ, ತೆನಿ ಪರ್ವಾಸಾಕ್ ಗೆಲ್ಲೆ ಹೊವ್ನ್ ಹೊತ್ತ್ಯಾ ಕಾನಾನ್ ದೆಶ್ಯಾಕ್ ಸ್ವತಾಚೆ ಕರುನ್ ತೆಂಕಾ ದಿತಾ, ಮನುನ್ ತೆಂಚ್ಯಾ ವಾಂಗ್ಡಾ ಕರಾರ್ ಕರುನ್ಗೆಟ್ಲಾ. 5 ಅನಿ ಇಜಿಪ್ತಾತ್ಲ್ಯಾ ಲೊಕಾನಿ ಗುಲಾಮ್ ಕರುನ್ ಥವ್ನ್ ಘೆಟಲ್ಯಾ ಇಜ್ರಾಯೆಲ್ ಲೊಕಾಂಚೆ ಅಳಾಪ್ ಮಾಕಾ ಆಯ್ಕ್ಲಾ, ಅನಿ ಮಿಯಾ ದಿಲ್ಲೊ ಕರಾರ್ ಯಾದ್ ಕರುನ್ಗೆಟ್ಲಾ. 6 ತಸೆ ಹೊವ್ನ್, ಇಜ್ರಾಯೆಲ್‌ಕಾರಾಕ್ನಿ ಅಸೆ ಸಾಂಗ್ "ಮಿಯಾಚ್ ಸರ್ವೆಸ್ಪರ್ , ಇಜಿಪ್ತಾಚ್ಯಾನಿ ತುಮ್ಚ್ಯಾ ವರ್‍ತಿ ವಾವಲ್ಲ್ಯಾ ವಜ್ಜ್ಯಾ ಕಾಮಾಂತ್ನಾ ತುಮ್ಕಾ ಭಾಯ್ರ್ ಕಾಡ್ತಾ ಅನಿ ಗುಲಾಮ್ ಗಿರಿತ್ನಾ ಸೊಡ್ಸುತಾ, ಮಾಜೊ ಹಾತ್ ಫಿಡೆ ಕರುನ್ ತೆಂಕಾ ಮೊಟಿ ಶಿಕ್ಷ್ಯಾ ಲಾವ್ನ್ ತುಮ್ಕಾ ಸುಟ್ಕಾ ಕರ್ತಾ. 7 ಮಿಯಾ ತುಮ್ಕಾ ಮಾಜಿ ಲೊಕಾ ಕರುನ್ಗೆತಾ, ಅನಿ ಮಿಯಾ ತುಮ್ಚೊ ದೆವ್ ಹೊವ್ನ್ ರ್‍ಹಾತಾ, ಇಜಿಪ್ತಾಚ್ಯಾ ಲೊಕಾನಿ ತುಮ್ಚ್ಯಾ ವರ್‍ತಿ ವಾವಲೆ ವಜ್ಜೆ ಕಾಮ್ ಮನ್ತಲ್ಯಾ ಗುಲಾಮ್ ಗಿರಿತ್ನಾ ಸುಟ್ಕಾ ಕರಲ್ಲ್ಯಾ ತನ್ನಾ ಮಿಯಾಚ್ ಸರ್ವೆಸ್ಪರ್ ದೆವ್ ಮನ್ತಲೆ ತುಮ್ಕಾ ಕಳುನ್ ಯೆತಾ. 8 ತವ್ಡೆಚ್ ನಸ್ತಾನಾ, ಅಬ್ರಾಹಾಮ್, ಇಸಾಕ್ ಅನಿ ಜಾಕೊಬಾಕ್ ದಿತಾ ಮನುನ್ ಭಾಸ್ ಥವ್ನ್ ದಿಲ್ಲ್ಯಾ ದೆಶ್ಯಾಕ್ ತುಮ್ಕಾ ಪಾವ್ಸುತಾ, ತೊ ತುಮ್ಕಾ ಸ್ವತಾಚೊ ದೆಶ್ ಕರುನ್ ದಿತಾ, ಸರ್ವೆಸ್ಪರ್ ಮಿಯಾಚ್ ಮನುನ್ ತೆಂಕಾ ಸಾಂಗ್" ಮಟ್ಲ್ಯಾನ್. 9 ಮೊಯ್ಜೆನ್ ಹಿ ಗೊಸ್ಟಿಯಾ ಇಜ್ರಾಯೆಲ್‌ಕಾರಾಕ್ನಿ ಕಳ್ವುಲ್ಯಾನ್, ಹೊಲ್ಯಾರ್ಬಿ ತೆನಿ ತೆಚ್ಯಾ ಬೊಲ್ನ್ಯಾಕ್ನಿ ಕಾನ್ ದಿವ್ಕ್ ನಾತ್, ಕಶ್ಯಾಕ್ ಮಟ್ಲ್ಯಾರ್, ತೆಂಚೊ ಮನ್ ಮೊಡಲ್ಲೊ ಹೊತ್ತೊ, ಅನಿ ತೆಂಚೆ ಗುಲಾಮ್ ಗಿರಿಚೆ ಕಾಮ್ ತವ್ಡೆಚ್ ಲೈ ಕಠಿನ್ ಹೊಲ್ಲೆ ಹೊತ್ತೆ.

10 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, 11 "ಜಾ ಅನಿ ಇಜ್ರಾಯೆಲ್‌ಕಾರಾಕ್ನಿ ಹ್ಯಾ ದೆಶ್ಯಾತ್ನಾ ಜಾವ್ಕ್ ಸೊಡ್ ಮನುನ್ ಇಜಿಪ್ತಾಚೊ ರಾಜಾ ಫಾರೊವಾಕ್ ಸಾಂಗ್" ಮಟ್ಲ್ಯಾನ್.

12 ತನ್ನಾ ಮೊಯ್ಜೆನ್ ಸರ್ವೆಸ್ಪರಾಕ್ಡೆ, "ಇಜ್ರಾಯೆಲ್ ಲೊಕಾಚ್ ಮಾಜಿ ಗೊಸ್ಟ್ ಆಯ್ಕಿನಾ ಹೊಲಾತ್, ಅನಿ ಫಾರೊವ್ ರಾಜಾ ಆಯ್ಕ್ತಲೊ ಕಾಯ್? ಮಿಯಾ ಬೊಲ್ನ್ಯಾತ್ನಿ ಬಿ ಕಾಯ್ ತವ್ಡೊ ಹುಶ್ಯಾರ್ ನ್ಹಯ್" ಮಟ್ಲ್ಯಾನ್. 13 ಸರ್ವೆಸ್ಪರಾನ್ , ಮೊಯ್ಜೆ ಅನಿ ಆರೊನಾಕ್ಡೆ ಬೊಲುನ್ ಇಜ್ರಾಯೆಲ್ ಲೊಕಾಂಚ್ಯಾಕ್ಡೆ ಅನಿ ಫಾರೊವ್ ರಾಜಾಕ್ಡೆ ಜಾವ್ಚೆ ಅನಿ ಇಜ್ರಾಯೆಲ್‌ಕಾರಾಕ್ನಿ ಇಜಿಪ್ತಾಕ್ನಾ ಭಾಯ್ರ್ ಕಾಡುಚೆ ಮನುನ್ ತೆಂಕಾ ಹುಕುಮ್ ದಿಲ್ಯಾನ್.

ಮೊಯ್ಜೆ ಅನಿ ಆರೊನಾಚಿ ವಂಶಾವಳಿ

14 ತೆಂಚ್ಯಾ ಘರಾನಾಚಿ ಮುಳಾಚಿ ಘವ್ಮಾನ್ಸಾ ಹಿಚ್ ತಿ; ಜಾಕೊಬಾಚ್ಯಾ ಥೊರ್ಲ್ಯಾ ಲೆಕಾಚೊ ಲೆಕ್ ರುಬೆನಾಚಿ ಲೆಕಾ, ಹನೊಕ್, ಫಲ್ಲು, ಹೆಚ್ರೊನ್, ಅನಿ ಕಾರ್ಮಿ ಹೆನಿಚ್ ರುಬೆನಾಚ್ಯಾ ಖಂದಾನಾಚಿ ಪುರ್ವಜಾ. 15 ಸಿಮೊನಾಚೊ ಲೆಕ್ ಜೆಮುಯೆಲ್, ಜಾಮಿನ್, ಒಹಾದ್, ಜಾಕಿನ್, ಜೊಹರ್ ಅನಿ ಕಾನಾನಾಂಚ್ಯಾ ಬಾಯ್ಕೊಮಾನ್ಸಿಕ್ ಉಪಾಜಲ್ಲೊ ಲೆಕ್ ಸಾವ್ಲ್ ಹೆನಿ ಸಿಮೊನಾಚ್ಯಾ ಖಂದಾನಾಚಿ ಪುರ್ವಜಾ. 16 ಲೆವಿಚ್ಯಾ ಲೆಕಾಂಚಿ ಅನಿ ತೆಂಚ್ಯಾ ಖಂದಾನಾ ಪುರ್ವಜಾಂಚಿ ನಾವಾ ಗೆರ್ಶೊನ್‍, ಕೊಹಾತ್ ಅನಿ ಮೆರಾರಿ, ಲೆವಿನ್ 137 ವರಿಸ್ ಜಿವನ್ ಕರ್ಲ್ಯಾನ್. 17 ಗೆರ್ಶೊನಾಚಿ ಲೆಕಾ ಲಿಬ್ನಿ ಅನಿ ಶಿಮ್ಮಿಯಿ ಅನಿ ತೆಂಚ್ಯಾ ಖಂದಾನಾಚೆ. 18 ಕೊಹಾತಾಚಿ ಲೆಕಾ, ಅಮ್ರಾಮ್, ಇಜರಾರ್, ಹೆಬ್ರೊನ್ ಅನಿ ಉಜ್ಜಿಯೆಲ್, ಕೊಹಾತಾನ್ ಎಕ್ಸೆ ತಿಸಾರ್ ತಿನ್ ವರ್ಸಾ ಜಿವನ್ ಕರ್ಲ್ಯಾನ್ . 19 ಮೆರಾರಿಚಿ ಲೆಕಾ, ಮ್ಹಾಲಿ ಅನಿ ಮುಶಿ ಹೆನಿ ಲೆವಿಚ್ಯಾ ಕುಳಿಚಿ ಪುರ್ವಜಾ ಹೊವ್ನ್ ಹಾತ್.

20 ಅಮ್ರಾಮಾನ್ ಅಪ್ಲ್ಯಾ ಬಾಬಾಚಿ ಭೆನ್ ಚೊಕೆಬೆದಾ ಮನ್ತಲಿಕ್ ಲಗಿನ್ ಕರುನ್ ಘೆಟ್ಲ್ಯಾನ್, ತಿಚ್ಯಾಕ್ನಾ ಆರೊನ್ ಅನಿ ಮೊಯ್ಜೆ ಉಪಾಜ್ಲೆ, ಅಮ್ರಾಮಾನ್ 137 ವರ್ಸಾ ಜಿವನ್ ಕರ್ಲ್ಯಾನ್. 21 ಇಜ್ಹಾರಾಚಿ ಲೆಕಾ ಕೊರಾ, ನೆಪಾಗ್ ಅನಿ ಜಿಕ್ರಿ. 22 ಉಜ್ಜಿಯೆಲಾಚಿ ಲೆಕಾ; ವಿಶಾಯೆಲ್, ಎಲ್ಜಾಫಾನ್ ಅನಿ ಸಿತ್ರಿ.

23 ಆರೊನಾನ್ ಅಮ್ಮಿನಾದಾಬಾಚಿ ಲೆಕ್ ಅನಿ ನ್ಹಾಕೊನಾಚಿ ಭೆನ್ ಯೆಲಿಕೆಬ್ ಮನ್ತಲಿಕ್ ಲಗಿನ್ ಕರುನ್ಗೆಟ್ಲ್ಯಾನ್, ಅನಿ ತಿಕಾ ನಾದಬ್ ಅನಿ ಅಬಿಹು, ಎಲಿಯಾಜರ್ ಅನಿ ಇತಾಮಾರ್ ಮನ್ತಲಿ ಪೊರಾ ಉಪಜ್ಲಿ. 24 ಕೊರಾಚಿ ಪೊರಾ, ಅಸ್ಸಿರ್, ಎಲ್ಕಾನಾ ಅನಿ ಅಭಿಯಾಸಾಪ್ ಹೆನಿಚ್ ಕೊರಹಿ ಲೊಕಾಂಚ್ಯಾ ಕುಳಿಚಿ ಪುರ್ವಜಾ. 25 ಆರೊನಾಚೊ ಲೆಕ್ ಎಲಿಯಾಜರ್ ಮನ್ತಲ್ಯಾನ್ ಪುಟಿಯೆಲಾಚ್ಯಾ ಲೆಕಿಕ್ ಎಕ್ಲಿಕ್ ಲಗಿನ್ ಕರುನ್ಗೆಟ್ಲ್ಯಾನ್, ತಿಕಾ ಫಿನೆಹಾಸನ್ ಮನ್ತಲೊ ಲೆಕ್ ಉಪಜ್ಲೊ, ತೆಂಚ್ಯಾ ಖಂದಾನಾಚ್ಯಾ ಹಿಸಾಬಾ ಸಾರ್ಕೆ ಹೆನಿಚ್ ಲೆವಿಯಾ ಲೊಕಾಂಚಿ ಪುರ್ವಜಾ.

26 ಅಪ್ಲ್ಯಾ ಅಪ್ಲ್ಯಾ ಕುಳಿಚ್ಯಾ ಸಾರ್ಕೆ ಇಜ್ರಾಯೆಲ್ ಲೊಕಾಕ್ನಿ ಇಜಿಪ್ತ್ ದೆಶ್ಯಾಕ್ನಾ ಬಲ್ವುನ್ ಹಾನುಕ್ ಸರ್ವೆಸ್ಪರಾಕ್ನಾ ಹುಕುಮ್ ಘೆಟಲ್ಲೆ ಮೊಯ್ಜೆ ಅನಿ ಆರೊನ್ ಹೆನಿಚ್. 27 ಇಜ್ರಾಯೆಲ್ ಲೊಕಾಕ್ನಿ ಇಜಿಪ್ತ್ ದೆಸಾಕ್ನಾ ಭಾಯ್ರ್ ಹಾನುಕ್ ಇಜಿಪ್ತಾಚೊ ರಾಜಾ ಫಾರೊವ್ ಮನ್ತಲ್ಯಾಚ್ಯಾ ವಾಂಗ್ಡಾ ಬೊಲಲೆ ಮೊಯ್ಜೆ ಅನಿ ಆರೊನ್ ಹೆನಿಚ್.

ಮೊಯ್ಜೆ ಅನಿ ಆರೊನಾಕ್ ಸರ್ವೆಸ್ಪರಾಚೊ ಹುಕುಮ್

28 ಸರ್ವೆಸ್ಪರಾನ್ ಇಜಿಪ್ತ್ ದೆಸಾತ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲುನ್, 29 "ಮಿಯಾ ಸರ್ವೆಸ್ಪರ್ , ಮಿಯಾ ತುಕಾ ಸಾಂಗ್ತಲೆ ಸಗ್ಳೆ ತಿಯಾ ಇಜಿಪ್ತಾಚೊ ರಾಜಾ ಫಾರೊವ್ ಮನ್ತಲ್ಯಾಚ್ಯಾ ಇದ್ರಾಕ್ ಸಾಂಗುಚೆ" ಮಟ್ಲ್ಯಾನ್. 30 ತನ್ನಾ ಮೊಯ್ಜೆನ್, "ಧನಿಯಾ ಮಿಯಾ ಬೊಲ್ತಲ್ಯಾತ್ ತೊದಲ್ತಾ, ಫಾರೊವ್ ಮನ್ತಲೊ ರಾಜಾ ಮಾಜೆ ಬೊಲ್ನೆ ಕಶೆ ಆಯಿಕ್ತಾ?" ಮಟ್ಲ್ಯಾನ್.