ನಿರ್ಗಮನ್ 36

1 ಬೆಚಲ್ ಅನಿ ಒಹೊಲಿಬಾಮಾನ್, ಸಗ್ಳೆಬಿ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆಚ್ ಕರುಚೆ, ಅನಿ ಹುರಲ್ಲಿ ಸಗ್ಳಿ ಬುದ್ವಂತಾ ಮಟ್ಲ್ಯಾರ್, ಸರ್ವೆಸ್ಪರಾಕ್ನಾ ಬುದ್ದ್ ಪಾವುನ್ ಘೆವ್ನ್, ದೆವಾಕ್ ಬಗ್ತಲಿ ಗುಡಿ ತಯಾರ್ ಕರ್‍ತಲ್ಯಾ ಕಾಮಾ ಸಾಟ್ನಿ ಪಾಜೆ ಹೊಲ್ಲಿ ಸಾಮಾನಾ ಕಸಿ ತಯಾರ್ ಕರ್‍ತಲೆ ಮನ್ತಲೆ ಕಳ್ವುನ್ ಘೆವ್ನ್ ತೆಂಚ್ಯಾ ವಾಂಗ್ಡಾ ಕಾಮ್ ಕರ್‍ತಾತ್ ಮಟ್ಲ್ಯಾನ್.

ಲೊಕಾನಿ ಹಾನಲ್ಲಿ ಲೈ ಕಾನಿಕಾ

2 ಮೊಯ್ಜೆನ್ ಬೆಚೆಲಾಕ್, ಒಹೊಲಿಬಾಮಾಕ್, ಅನಿ ಕೊನ್ ಕೊನಾಚ್ಯಾ ಮನಾತ್ನಿ ಸರ್ವೆಸ್ಪರಾನ್ ಬುದ್ದ್ ದಿಲಾ, ಅನಿ ಕೊನಾಕ್ ಕಾಮ್ ಕರುಕ್ ಮನ್ ಹಾಯ್ ತ್ಯಾ ಸಗ್ಳ್ಯಾ ಬುದ್ವಂತಾಕ್ನಿ ಅಪ್ನಾಕ್ಡೆ ಬಲ್ವುಲ್ಯಾನ್. 3 ತೆನಿ ದೆವಾಚಿ ಗುಡಿ ಬಾಂದ್ತಲ್ಯಾ ಕಾಮಾ ಸಾಟ್ನಿ ಇಜ್ರಾಯೆಲ್ ಲೊಕಾನಿ ಮೊಯ್ಜೆಕ್ಡೆ ಹಾನುನ್ ದಿಲ್ಲಿ ಸಗ್ಳಿ ಕಾನಿಕಾ ಘೆಟ್ಲ್ಯಾನಿ. ಇಜ್ರಾಯೆಲ್ ಲೊಕಾ ಹರ್ ಎಕ್ ದಿಸಾಬಿ ಸಕ್ಕಾಳಿ ಮೊಯ್ಜೆಕ್ಡೆ ಯೆವ್ನ್ ಬರ್ಯಾ ಮನಾನ್ ಕಾನಿಕ್ ದಿಯ್ತ್. 4 ತನ್ನಾ ಸರ್ವೆಸ್ಪರಾಚ್ಯಾ ಗುಡಿಚಿ ಕಾಮ್ ಕರುಲಾಗಲ್ಲ್ಯಾ ಸಗ್ಳ್ಯಾ ಬುದ್ವಂತಾನಿ ಅಪ್ನಾಚಿ ಕಾಮಾ ಸೊಡುನ್, 5 ಮೊಯ್ಜೆಕ್ಡೆ ಯೆವ್ನ್, ತೆಕಾ ಸರ್ವೆಸ್ಪರಾನ್ ಹುಕುಮ್ ದಿಲ್ಲ್ಯಾ ಕಾಮಾಕ್ ಪಾಜೆ ಹೊಲ್ಲ್ಯಾಕಿಂತಾಬಿ ಲೈ ಕಾನಿಕಾ ಲೊಕಾ ಹಾನುಲಾತ್,

6 ಮನ್ತಾನಾ ಮೊಯ್ಜೆನ್, ದೆವಾಚ್ಯಾ ಗುಡಿಚ್ಯಾ ಕಾಮಾಚ್ಯಾ ಸಾಟ್ನಿ ಖಲ್ಯಾಬಿ ಘವ್ಮಾನ್ಸಾನ್ ನಾತರ್ ಬಾಯ್ಕೊಮಾನ್ಸಿನ್ ಹೆಚ್ಯಾನ್ ಫಿಡೆ ಕಾಯ್ಬಿ ತಯಾರ್ ಕರ್‍ತಲೆ ನಕ್ಕೊ, ಮನುನ್ ಹುಕುಮ್ ದಿವ್ನ್, ಕಾನಿಕ್ ಹಾನ್ತಲೆ ಇಬೆ ಕರ್ಲ್ಯಾನ್. 7 ಕಶ್ಯಾಕ್ ಮಟ್ಲ್ಯಾರ್ ಕಾಮಾಕ್ ಪಾಜೆ ಹೊಲ್ಲ್ಯಾಕಿಂತಾಬಿ ಜಾಸ್ತಿಚೆ ಸಾಮಾನ್ ಹೊತ್ತೆ.

ಸರ್ವೆಸ್ಪರಾಚ್ಯಾ ಇದ್ರಾಕ್ ಗುಡಿ ತಯಾರ್ ಕರ್‍ತಲೆ

8 ತ್ಯಾ ಕಾಮಾಕ್ ಹೊತ್ತ್ಯಾ ಬುದ್ವಂತಾನಿ ಧಾ ಪರ್ದೆ ಪುಂಡಿಚ್ಯಾ ದೊರ್ಯಾಚ್ಯಾ ಕಪ್ಡ್ಯಾನಿ ಬಿಡಾರ್ ಕರುನ್, ತ್ಯಾ ಕಪ್ಡ್ಯಾಕ್ನಿ ಝಾಂಬ್ಳ್ಯಾ ರಗ್ತಾಚ್ಯಾ ಬನ್ನಾಚ್ಯಾ ದೊರ್ಯಾನಿ ಚಮತ್ಕಾರಾಚಿ ಕೆರುಬಿಯಾ ಹಾತಿಚ್ಯಾ ಕಾಮಾನ್ ಕರ್ಲ್ಯಾನಿ. 9 ಹರ್ ಎಕ್ ಕಪ್ಡೆಬಿ ವಿಸಾರ್ ಆಟ್ ಹಾತ್ ಲಾಂಬಿ, ಚಾರ್ ಹಾತ್ ರುಂದಿ ಹೊತ್ತೆ, ಸಗ್ಳೆ ಪರ್ದೆಬಿ ಎಕುಚ್ ಮಾಪಾಚೆ ಹೊತ್ತೆ. 10 ಪಾಚ್ ಕಪ್ಡೆ ಎಕಾಮೆಕಾಕ್ ಜೊಡಸ್ಲ್ಯಾನಿ. 11 ಹ್ಯಾ ದೊನಿ ಕಡೆ ಜೊಡಸ್ತಾನಾಬಿ ಹರ್ ಎಕಾಚ್ಯಾ ತುದಿಕ್ ಕಪ್ಡ್ಯಾಚ್ಯಾ ಮುಲ್ಲ್ಯಾಕ್ ಝಾಂಬ್ಳ್ಯಾ ದೊರ್ಯಾಚೊ ನಾಡೊ ಲಾವ್ಲ್ಯಾನಿ. 12 ತೆ ದೊರೆ ಹರ್ ಎಕಾಕ್ ಪನ್ನಾಪನ್ನಾಸ್ ಹೊಯ್ ಸಾರ್ಕೆ ಅನಿ ಎಕಾಚ್ಯಾ ಇದ್ರಾಕ್ ಥವ್ಲ್ಯಾನಿ. 13 ತವ್ಡೆಚ್ ನಸ್ತಾನಾ ಪನ್ನಾಸ್ ಸೊನ್ಯಾಚಿ ಕೊಂಡಿಯಾ ಕರುನ್ ತೆ ಪರ್ದೆ ಎಕಾಕ್ ಅನಿ ಎಕ್ ಜೊಡ್ಲ್ಯಾನಿ ಅಸೆ ಎಕುಚ್ ಗುಡಿ ಹೊಲಿ.

14 ಹ್ಯಾ ಗುಡಿ ವರ್‍ತಿ ಕಾಂಬ್ರುಕ್ ಸಾಟ್ನಿ ಶೆಳಿಯಾಂಚ್ಯಾ ಕೆಸಾಂಚೆ ಆಕ್ರಾ ಕಪ್ಡ್ಯಾಚೆ ಪರ್ದೆ ಕರುನ್ ಬಿಡಾರಾಚ್ಯಾ ವರ್‍ತಿ ಧಾಪ್ಲ್ಯಾನಿ. 15 ಹರ್ ಎಕ್ ಪರ್ದೊಬಿ ತಿಸ್ ಹಾತ್ ಲಾಂಬಿ ಅನಿ ಚಾರ್ ಹಾತ್ ರುಂದಿ ಹೊತ್ತೆ, ಸಗ್ಳೆ ಪರ್ದೆಬಿ ಎಕುಚ್ ಮಾಪಾಚೆ ಹೊವ್ನ್ ಹೊತ್ತೆ. 16 ಪಾಂಚ್ ಪರ್ದ್ಯಾಕ್ನಿ ಎಕಾಕ್ಡೆ ಜೊಡ್ಸುನ್ ಹುರಲ್ಲ್ಯಾ ಸಾ ಪರ್ದ್ಯಾತ್ನಿ ಅನಿ ಎಕಾಕ್ಡೆ ಜೊಡಸ್ಲ್ಯಾನಿ. 17 ಹರ್ ಎಕ್ ಕಪ್ಡ್ಯಾಚ್ಯಾ ಮುಲ್ಲ್ಯಾತ್ ಪನ್ನಾ ಪನ್ನಾಸ್ ನಾಡೆ ಕರ್ಲ್ಯಾನಿ, 18 ಎಕುಚ್ ಗುಡಿಕ್ ಮಿಳು ಸಾಟ್ನಿ ಪನ್ನಾಸ್ ತಾಂಬ್ಯಾಚಿ ಕೊಂಡಿಯಾ ಕರ್ಲ್ಯಾನಿ. 19 ತವ್ಡೆ ನಸ್ತಾನಾ, ಹದಾಕ್ ಹಾನಲ್ಲೆ ಬಕ್ರ್ಯಾಚೆ ಚಮ್ಡ್ಯಾನ್ ಎಕ್ ಕಾಂಬ್ರಾನ್ ಅನಿ ಸಮುಂದ್ರಾಚ್ಯಾ ದಂಡೆಚ್ಯಾ ಡುಕ್ರಾಚ್ಯಾ ಚಮ್ಡ್ಯಾನ್ ಅನಿ ಎಕ್ ವೈಲೆ ಕಾಂಬ್ರಾನ್ ಕರ್ಲ್ಯಾನಿ. 20 ಜಾಲಿಚ್ಯಾ ಝಾಡಾನ್ ಬಿಡಾರಾಕ್ ಚವ್ಕಟಾ ಕರ್ಲ್ಯಾನಿ. 21 ಹರ್ ಎಕ್ ಚವ್ಕಟ್ ಬಿ ಧಾ ಹಾತ್ ಲಾಂಬಿ, ಅನಿ ಸಾಡೆ ಎಕ್ ಹಾತ್ ರುಂದಿ ಹೊತ್ತೆ. 22 ಹರ್ ಎಕ್ ಚವ್ಕಟ್ಬಿ ಅಡ್ವ್ಯಾ ಪಟ್ಟಿಯಾನಿ ಜೊಡಸಲ್ಲ್ಯಾ ದೊನ್ ಇಬೆ ಪಟ್ಟಿಯಾನಿ ಹೊಲ್ಲಿ ಹೊತ್ತೆ, ಬಿಡಾರಾಚ್ಯಾ ಸಗ್ಳ್ಯಾ ಚವ್ಕಟಾಕ್ನಿಬಿ ತಸೆಚ್ ಕರ್ಲ್ಯಾನಿ. 23 ಬಿಡಾರಾಚ್ಯಾ ದಕ್ಷಿನ್ ದಿಕ್ಕಾಕ್ ವಿಸ್ ಚವ್ಕಟಾ ಕರ್ಲ್ಯಾನಿ. 24 ಚಾಳಿಸ್ ಚಾದಿಂಚೆ ಪಾಯಾಚೆ ಗುಂಡೆ ಕರುನ್, ತ್ಯಾ ವಿಸ್ ಚವ್ಕಟಾಂಚ್ಯಾ ಖಾಲ್ತಿ ಥವ್ಲ್ಯಾನಿ, ಹರ್ ಎಕ್ ಚವ್ಕಟಾಚ್ಯಾ ದೊನಿ ಇಬ್ಯಾ ಪಟ್ಟಿಯಾಂಚ್ಯಾ ಖಾಲ್ತಿ ಎಕೆಕ್ ಪಾಯಾಚೊ ಗುಂಡೊ ಥವ್ಲ್ಯಾನಿ. 25 ತಸೆಚ್ ಬಿಡಾರಾಚ್ಯಾ ಉತ್ತರ್ ದಿಕ್ಕಾಕ್ ವಿಸ್ ಚವ್ಕಟಾ, 26 ಅನಿ ಹರ್ ಎಕ್ ಚವ್ಕಟಾಕ್ ದೊದೊನ್ ಪಾಯಾಚೆ ಗುಂಡೆ ಹೊಯ್ ಸಾರ್ಕೆ, ಚಾಳಿಸ್ ಪಾಯಾಚೆ ಗುಂಡೆ ಕರ್ಲ್ಯಾನಿ. 27 ಬಿಡಾರಾಚ್ಯಾ ಫಾಟಿಕ್ಡೆ ಮಟ್ಲ್ಯಾರ್, ದಿಸ್ ಬುಡ್ತಲ್ಯಾ ದಿಕ್ಕಾಕ್ ಸಾ ಚವ್ಕಟಾ ಕರ್ಲ್ಯಾನಿ. 28 ಬಿಡಾರಾಚ್ಯಾ ಫಾಟ್ಲ್ಯಾ ದೊನ್ ಮುಲ್ಲ್ಯಾಕ್ನಿ ಅನಿ ದೊನ್ ಚವ್ಕಟಾ ಕರ್ಲ್ಯಾನಿ. 29 ತೆ ಬುಡ್ನಾ ತುದಿ ಪತರ್ ಮಟ್ಲ್ಯಾರ್, ಪೈಲೆಚ್ಯಾ ಕಾಕ್ನಾ ಪಾತರ್ ಬಿ ಜೊಡಸಲ್ಲೆ ಹೊತ್ತೆ, ದೊನಿ ಮುಲ್ಲ್ಯಾಕ್ನಿಬಿ ಅಸೆಚ್ ಕರ್ಲ್ಯಾನಿ. 30 ಅಶೆ ಆಟ್ ಚವ್ಕಟಾ ಅನಿ ಹರ್ ಎಕ್ ಚವ್ಕಟಾಕ್ ದೊದೊನ್ ಚಾಂದಿಚಿ ಪಾಯಚೆ ಗುಂಡೆ ಸಗ್ಳೆ ಮಿಳುನ್ ಸೊಳಾ ಗುಂಡೆ ಕರ್ಲ್ಯಾನಿ. 31 ಜಾಲಿಚ್ಯಾ ಝಾಡಾನಿ ಅಗ್ಳಿಯಾ ಕರ್ಲ್ಯಾನಿ. 32 ಬಿಡಾರಾಚ್ಯಾ ದೊನಿ ಬಾಜುಚ್ಯಾ ಚವ್ಕಟಾಕ್ನಿ ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಚವ್ಕಟಾಕ್ನಿ ಪಾಂಚ್ ಪಾಂಚ್ ಅಗ್ಳಿಯಾ ಕರ್ಲ್ಯಾನಿ. 33 ಚವ್ಕಟಾಚ್ಯಾ ಮದ್ದಿ ಹೊತ್ತಿ ಅಗ್ಳಿಯಾ ಎಕ್ ತುದಿಕ್ನಾ ಅನಿ ಎಕ್ ತುದಿ ಪಾತರ್ ಪಾವಿ ಸಾರ್ಕೆ ಕರ್ಲ್ಯಾನಿ. 34 ಚವ್ಕಟಾಕ್ನಿ ಸೊನ್ಯಾಚಿ ತಗ್ಡಾ ಮಾರುನ್, ತೆಜ್ಯಾನಿ ಅಗ್ಳಿಯಾಕ್ನಿ ಸೊನ್ಯಾಚಿ ಕಾಕ್ನಾ ಕರ್ಲ್ಯಾನಿ, ಅನಿ ಪಟ್ಟಿಯಾಕ್ನಿ ಸೊನ್ಯಾಚಿ ತಗ್ಡಾ ಮಾರ್ಲ್ಯಾನಿ.

35 ಪುಂಡಿಚ್ಯಾ ದೊರ್ಯಾಚ್ಯಾ ಕಪ್ಡ್ಯಾನ್ ಅನಿ ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚ್ಯಾ ಶೆಳಿಚ್ಯಾ ಕಪ್ಡ್ಯಾಚ್ಯಾ ದೊರ್ಯಾನ್, ಸುಂದರ್ ಕೆರುಬಿಯಾ ಹಾತಿಚ್ಯಾ ಕಾಮಾನಿ ಕರುನ್ ಎಕ್ ಪರ್ದೊ ಕರ್ಲ್ಯಾನಿ. 36 ತೆಕಾ ಜಾಲಿಚ್ಯಾ ಝಾಡಾನ್ ಚಾರ್ ಖಾಂಬೆ ಕರುನ್ ಸೊನ್ಯಾಚಿ ತಗ್ಡಾ ಮಾರ್ಲ್ಯಾನಿ, ಅನಿ ತೆಂಕಾ ಸೊನ್ಯಾಚಿ ಕೊಂಡಿಯಾ ಕರುನ್ ಚಾಂದಿಚೆ ಪಾಯಾಚೆ ಗುಂಡೆ ಥವ್ಲ್ಯಾನಿ. 37 ಬಿಡಾರಾಚ್ಯಾ ದಾರಾತ್ ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚ್ಯಾ ದೊರ್ಯಾನಿ ಚಮತ್ಕಾರಾಚಿ ಹಾತಿಚಿ ಕಾಮಾ ಕರುನ್ ಪರ್ದೊ ಘಾಟ್ಲ್ಯಾನಿ. 38 ತೊ ಪರ್ದೊ ಸರ್ಕುಕ್ ಸಾಟ್ನಿ ಪಾಂಚ್ ಖಾಂಬೆ ಕರುನ್, ತೆಕಾ ಕೊಂಡಿಯಾ ಕರುನ್ ಖಾಂಬ್ಯಾಕ್ನಿ ಅನಿ ತೆಚ್ಯಾ ಕಟ್ನಾಕ್ನಿ ಸೊನ್ಯಾಚಿ ತಗ್ಡಾ ಮಾರ್ಲ್ಯಾನಿ, ಅನಿ ತೆಚೆ ಪಾಂಚ್ ಪಾಯಾಚೆ ಗುಂಡೆ ತಾಂಬ್ಯಾನಿ ಕರ್ಲ್ಯಾನಿ.