1 ಮೊಯ್ಜೆನ್ ಮಡ್ಡಿ ವೈನಾ ಉತ್ರುನ್ ಯೆವ್ಕ್ ತಡೊ ಕರಲ್ಲೆ ಇಜ್ರಾಯೆಲ್ ಲೊಕಾನಿ ಬಗುನ್, ತೆನಿ ಸಗ್ಳೆ ಗೊಳಾ ಹೊವ್ನ್ ಆರೊನಾಕ್ಡೆ ಯೆವ್ನ್, "ಉಟ್ ಅನಿ ಅಮ್ಕಾ ಫಿಡೆ ಚಾಲ್ವುಕ್ ದೆವಾ ಕರುನ್ ದಿ, ಅಮ್ಕಾ ಇಜಿಪ್ತಾಕ್ನಾ ಬಲ್ವುನ್ ಹಾನಲ್ಲೊ ಮೊಯ್ಜೆ ಕಾಯ್ ಹೊಲೊಕಿ ಗೊತ್ತ್ ನಾ" ಮಟ್ಲ್ಯಾನಿ. 2 ತನ್ನಾ ಆರೊನಾನ್, "ತುಮ್ಚ್ಯಾ ಬಾಯ್ಕಾ ಪೊರಾಂಚ್ಯಾ ಕಾನಾಕ್ನಿ ಹೊತ್ತಿ ಸೊನ್ಯಾಚಿ ವಸ್ತಾ ಕಾಡುನ್ ಮಾಕಾ ದಿವಾ" ಮನ್ತಾನಾ, 3 ತಸೆಚ್ ಸಗ್ಳ್ಯಾ ಲೊಕಾನಿ ಅಪ್ನಾಚ್ಯಾ ಕಾನಾತ್ನಿ ಹೊತ್ತೆ ಸೊನೆ ಕಾಡುನ್ ಆರೊನಾಕ್ಡೆ ಹಾನುನ್ ದಿಲ್ಯಾನಿ. 4 ತೆನಿ ತೆ ಸೊನೆ ಘೆವ್ನ್, ಉಳಿಯಾನಿ ಬೈಲಾಚ್ಯಾ ಪಾಡ್ಯಾಚೊ ಆಕಾರ್ ಕರುನ್ ದಿತಾನಾ, ತ್ಯಾ ಲೊಕಾನಿ "ಇಜ್ರಾಯೆಲಾನೊ, ಅಬಕಾ, ತುಮ್ಕಾ ಇಜಿಪ್ತಾಕ್ನಾ ಬಲ್ವುನ್ ಹಾನಲ್ಲೊ ದೆವ್ ಹ್ಯೊಚ್" ಮಟ್ಲ್ಯಾನಿ.

5 ಆರೊನಾನ್ ತೆ ಬಗುನ್, ಬೈಲಾಚ್ಯಾ ಪಾಡ್ಯಾಚ್ಯಾ ಇದ್ರಾಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದುನ್,

"ಉದ್ದ್ಯಾ ಸರ್ವೆಸ್ಪರಾಕ್ ಮಾನ್ ದಿವ್ಕ್ ಸನ್ ಕರುಚೆ" ಮನುನ್ ಪರ್ಗಟ್ಲ್ಯಾನ್. 6 ತಸೆ ಹೊವ್ನ್ ಲೊಕಾನಿ ದುಸ್ರೆಂದಿಸಿ ಉಟುನ್ ಸಗ್ಳೆ ಅಂಗ್ ಬಲಿ ಅನಿ ಸಮಾದಾನಾಚಿ ಬಲಿಯಾ ಭೆಟ್ವುಲ್ಯಾನಿ, ಲೊಕಾನಿ ಬಸುನ್ ಜೆವ್ನ್, ಫಿವ್ನ್ ಮಾನಾ ಉಟುನ್ ನಾಚುನ್ ಮಜ್ಯಾ ಕರ್ಲ್ಯಾನಿ.

7 ಅಸೆ ರ್‍ಹಾತಾನಾ ಸರ್ವೆಸ್ಪರಾನ್ ಮೊಯ್ಜೆಕ್, ತಿಯಾ ಮಡ್ಡಿ ವೈನಾ ಉತ್ರುನ್ ಜಾ, ತಿಯಾ ಇಜಿಪ್ತಾಕ್ನಾ ಬಲ್ವುನ್ ಹಾನಲ್ಲಿ ತುಜಿ ಲೊಕಾ ಪಾಪ್ ಕರುನ್ ಮಾಜೆಕ್ನಾ ತಿರಸ್ಕಾರ್ ಹೊಲಾತ್.

8 ಮಿಯಾ ತೆಂಕಾ ಹುಕುಮ್ ದಿಲ್ಲಿ ವಾಟ್ ತೆನಿ ಲಗ್ಗುನಾ ಇಸ್ರುನ್ ಅಪ್ನಾಕ್ನಿ ಪಾಜೆ ಹೊಲ್ಲಿ ಸೊನ್ಯಾಚ್ಯಾ ಬೈಲಾಚ್ಯಾ ಪಾಡ್ಯಾಚಿ ಮುರ್ತಿ ಕರುನ್ ಘೆವ್ನ್ ತೆಕಾ ಪಾಂಯ್ ಪಡುನ್ ಬಲಿ ಭೆಟ್ವುನ್, "ಅಬಕಾ ಇಜ್ರಾಯೆಲಾನೊ ತುಮ್ಕಾ ಇಜಿಪ್ತಾಕ್ನಾ ಹಾನಲ್ಲೊ ದೆವ್ ಹ್ಯೊಚ್" ಮನುಕ್ ಲಾಗ್ಲಾತ್.

9 ತವ್ಡೆಚ್ ನಸ್ತಾನಾ ಸರ್ವೆಸ್ಪರಾನ್ ಮೊಯ್ಜೆಕ್, "ಹಿ ಲೊಕಾ ಕವ್ಡೆ ಮೊಂಡ್ ಹಾತ್ ಮನುನ್ ಮಾಕಾ ಗೊತ್ತ್ ಹಾಯ್, 10 ತಸೆಹೊವ್ನ್ ತಿಯಾ ಮಾಕಾ ಅಡ್ವುನಕ್ಕೊ, ಮಾಜೊ ರಾಗ್ ಪೆಟುಂದಿತ್, ತೆಂಕಾ ಜಾಳ್ವುನ್ ಟಾಕ್ತಾ, ಅನಿ ಮಾನಾ ತುಜೆಕ್ನಾಚ್ ಲೊಕಾಂಚೊ ಮೊಟೊ ತಾಂಡೊ ಹೊಯ್ ಸಾರ್ಕೆ ಕರ್ತಾ" ಮಟ್ಲ್ಯಾನ್.

11 ತನ್ನಾ ಮೊಯ್ಜೆನ್ ಅಪ್ನಾಚೊ ದೆವ್ ಸರ್ವೆಸ್ಪರಾಕ್ಡೆ ಮಾಗುನ್ ಘೆವ್ನ್ , "ಸರ್ವೆಸ್ಪರಾ ತಿಯಾ ಮೊಟ್ಟ್ಯಾ ಬಳಾನ್ ಅನಿ ಭುಜೆಚ್ಯಾ ಬಳಾನ್ ಇಜಿಪ್ತಾಕ್ನಾ ಸೊಡ್ಸುನ್ ಹಾನಲ್ಲ್ಯಾ ತುಜ್ಯಾ ಲೊಕಾಂಚ್ಯಾ ವರ್‍ತಿ ಕಶ್ಯಾಕ್ ರಾಗಾನ್ ಪೆಟ್ತೆಯ್?" 12 ಇಜಿಪ್ತಾಚ್ಯಾ ಲೊಕಾನಿ, "ತುಜ್ಯಾ ವಿಶಯಾತ್, ಸರ್ವೆಸ್ಪರಾನ್ ತರಾಸ್ ದಿವ್ಚೆ ಮನುನುಚ್ ಇಜ್ರಾಯೆಲಾಕ್ನಿ ಹಿತ್ತೆತ್ನಾ ಬಲ್ವುನ್ ನ್ಹೆಲ್ಯಾನ್, ತೆಂಕಾ ಡಂಗ್ಳಿತ್ ಮಾರುನ್ ಜಿಮ್ನಿ ವೈನಾ ನಾಶ್ ಕರುಕುಚ್ ಬಲ್ವುನ್ ನ್ಹೆಲ್ಯಾನ್, ಮನುನ್ ಸಾಂಗಿ ಸಾರ್ಕೆ ಹೊವ್ಚೆ ಕಾಯ್? ತಿಯಾ ಪೆಟ್ತಲೊ ರಾಗ್ ಸೊಡುನ್ ತುಜ್ಯಾ ಲೊಕಾಕ್ನಿ ಬುರ್ಸೆ ಕರಿನಸ್ತಾನಾ ಮನ್ ಬದ್ಲುನ್ ಘೆ". 13 "ತುಜಿ ಸೆವಕಾ ಅಬ್ರಾಹಾಮ್, ಇಸಾಕ್ ಅನಿ ಜಾಕೊಬಾಕ್ ಯಾದ್ ಕರುನ್ಗೆ, ತಿಯಾ ತೆಂಕಾ ಆನ್ ಘಾಲುನ್, ಮಿಯಾ ತುಮ್ಚಿ ಪಿಳ್ಗಿ ವಾಡ್ವುನ್ ಮಳ್ಬಾತ್ಲ್ಯಾ ಚುಕ್ಕಿಯಾಂಚ್ಯಾ ತವ್ಡೆ ಕರ್ತಾ, ಅನಿ ಮಿಯಾ ಸಾಂಗ್ತಲಿ ಹಿ ಸಗ್ಳಿ ಗಾಂವಾ ತುಮ್ಚ್ಯಾ ಪಿಳ್ಗಿಕ್ ದಿತಾ ಮನುನ್, ಅನಿ ತೆನಿ ಹ್ಯೊ ದೆಶ್ ಸದಾ ಸರ್ವತಾಕ್ ತುಮ್ಕಾ ಅಧಿನ್ ಕರುನ್ ದಿತಾ ಮನುನ್ ಗೊಸ್ಟ್ ದಿಲೆಯ್", ಮಟ್ಲ್ಯಾನ್.

14 ತನ್ನಾ ಸರ್ವೆಸ್ಪರಾನ್ , ಅಪ್ನಾಚ್ಯಾ ಲೊಕಾಕ್ನಿ ಅಪ್ನಿ ಕರ್ತಾ ಮನುನ್ ಸಾಂಗಲ್ಲ್ಯಾ ಬುರ್ಸ್ಯಾಚ್ಯಾ ವಿಶಯಾತ್ ಮನ್ ಬದ್ಲುನ್ ಘೆಟ್ಲ್ಯಾನ್.

15 ಹುಕುಮಾಂಚೆ ತೆ ದೊನ್ ಗುಂಡೆ ಹಾತಿತ್ನಿ ಧರುನ್ಗೆವ್ನ್ ಮೊಯ್ಜೆ ಮಡ್ಡಿವೈನಾ ಉತ್ರುನ್ ಯೆಲೊ, ತ್ಯಾ ಗುಂಡ್ಯಾಂಚ್ಯಾ ದೊನಿ ಆಂಗಾನಿಬಿ ಹುಕುಮಾ ಲಿವಲ್ಲಿ ಹೊತ್ತಿ, ದೊನಿ ಭಾಜುಕ್ನಿಬಿ ಲಿವಲ್ಲೆ ಹೊತ್ತೆ. 16 ತೆ ಗುಂಡೆ ದೆವಾಚೆ ಕಾಮ್ ಹೊಲ್ಲೆ, ತೆಜ್ಯಾ ವರ್‍ತಿ ಲಿವಲ್ಲೆ ದೆವಾನ್ ಕೊರ್ದುನ್ ಲಿವಲ್ಲಿ ಅಕ್ಷರಾಚ್ ಹೊಲ್ಲಿ.

17 ಇಜ್ರಾಯೆಲ್ ಲೊಕಾ ಲೈ ಕುಶಿನಿ ಬೊಬ್ ಮಾರುನ್ಗೆತ್ ರ್‍ಹಾತಾನಾ, ಜೊಶ್ವಾನ್ ತಿ ಧನ್ ಆಯ್ಕುನ್, "ಬಿಡಾರಾಂಚ್ಯಾಕ್ನಾ ಯುದ್ದಾಚಿ ಧನ್ ಆಯ್ಕುಲ್ಲಾ" ಮನುನ್ ಮೊಯ್ಜೆಕ್ ಸಾಂಗ್ಲ್ಯಾನ್.

18 ತನ್ನಾ ಮೊಯ್ಜೆನ್, "ಮಾಕಾ ಆಯ್ಕು ಲಾಗಲ್ಲಿ ಜಿಕೆಚಿ ಬೊಬ್ ಬಿ ನ್ಹಯ್ , ಹಾರಲ್ಲಿ ಬೊಬ್ ಬಿ ನ್ಹಯ್ , ಗಿತ್ ಸಾಂಗ್ತಲ್ಲ್ಯಾಂಚಿ ಬೊಬುಚ್" ಮಟ್ಲ್ಯಾನ್. 19 ತೆನಿ ಬಿಡಾರಾಂಚ್ಯಾ ಜಗ್ಗೊಳ್ ಯೆಲ್ಲ್ಯಾ ತನ್ನಾ, ಪಾಡೊ ಅನಿ ಲೊಕಾ ನಾಚು ಲಾಗಲ್ಲೆ ಬಗುನ್, ಲೈ ರಾಗಾನ್, ಹಾತಿತ್ಲೆ ಕರಾರಾಚೆ ಗುಂಡೆ ಮಡ್ಡಿಚ್ಯಾ ಬುಡ್ಲ್ಯಾ ಜಿಮ್ನಿ ವರ್‍ತಿ ಟಾಕುನ್ ಫೊಡ್ಲ್ಯಾನ್. 20 ಲೊಕಾನಿ ಕರ್ಸುನ್ ಘೆಟಲ್ಲೊ ಪಾಡೊ ಆಗಿನ್ ಜಾಳ್ವುನ್ ಪುಡ್ ಪುಡ್ ಕರುನ್ ಪಾನಿಯಾವರ್‍ತಿ ವೊತುನ್ ತೆ ಪಾನಿ ಇಜ್ರಾಯೆಲ್ ಲೊಕಾಕ್ನಿ ಫಿವ್ಸುಲ್ಯಾನ್.

21 ಅನಿ ತನ್ನಾ ತೆನಿ ಆರೊನಾಕ್ "ತಿಯಾ ಲೊಕಾಂಚ್ಯಾಕ್ನಾ ಮೊಟೊ ಪಾಪ್ ಕರಸ್ಲೈ ನ್ಹಯ್ ? ತಿಯಾ ಅಸೆ ಕರುಕ್ ತೆನಿ ತುಕಾ ಕಾಯ್ ಕರ್ಲ್ಯಾನಿ?" ಮನುನ್ ಇಚಾರ್‍ತಾನಾ, 22 ಆರೊನಾನ್, "ಸಾಯ್ಬಾ ತಿಯಾ ಬೆಜಾರ್ ಹೊವ್ ನಕ್ಕೊ, ಹಿ ಲೊಕಾ ಬುರ್ಸ್ಯಾ ಚಾಲಿಚಿ ಮನುನ್ ತುಕಾ ಗೊತ್ತ್ ಹಾಯ್, 23 ತೆನಿ ಮಾಜೆಕ್ಡೆ ಯೆವ್ನ್, ‘ಅಮ್ಚ್ಯಾ ಫಿಡೆ ಚಾಲ್ವುಕ್ ದೆವಾ ಕರುನ್ ದಿ, ಇಜಿಪ್ತಾಕ್ನಾ ಅಮ್ಕಾ ಬಲ್ವುನ್ ಹಾನಲ್ಲೊ ಮೊಯ್ಜೆ ಕಾಯ್ ಹೊಲೊಕಿ ಗೊತ್ತ್ ನಾ’, ಮಟ್ಲ್ಯಾನಿ. 24 ತನ್ನಾ ಮಿಯಾ ಸೊನ್ಯಾಚಿ ವಸ್ತಾ ಹೊತ್ತ್ಯಾ ಸಗ್ಳ್ಯಾಕ್ನಿ ಕಾಡುನ್ ದಿವಾ ಮನ್ತಾನಾ, ತೆನಿ ದಿಲ್ಯಾನಿ ಮಿಯಾತೆ ಘೆವ್ನ್ ಆಗಿತ್ ಘಾಲ್ತಾನಾ, ಪಾಡೊ ಹೊಲೊ" ಮಟ್ಲ್ಯಾನ್.

25 ಲೊಕಾನಿ ದಿಕ್ ಚುಕುನ್ ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾ ಸಾರ್ಕೆ ಕರುಕ್ ಆರೊನಾನ್ ಸೊಡಲ್ಲ್ಯಾ ಸಾಟ್ನಿ, ತೆಂಚ್ಯಾ ವಿರೊದಿಯಾಕ್ನಿ ಹಾಸುಕ್ ವಾಟ್ ಹೊಲಿ. 26 ತೆನಿ ರಿತ್ ನಸ್ತಾನಾ ಕರುಲಾಗಲ್ಲಿ ಕಾಮಾ ಮೊಯ್ಜೆನ್ ಬಿಡಾರಾಚ್ಯಾ ದಾರಾತ್ ಇಬೆರಾವ್ನ್ ಬಗುನ್, ಸರ್ವೆಸ್ಪರಾಚ್ಯಾ ಪಕ್ಷಾಚೆ ಮಾಜೆಕ್ಡೆ ಯೆವ್ಚೆ ಮಟ್ಲ್ಯಾನ್, ತನ್ನಾ ಲೆವಿಚ್ಯಾ ಕುಳಿಚೆ ಸಗ್ಳೆ ತೆಜ್ಯಾಕ್ಡೆ ಯೆಲೆ. 27 ಮೊಯ್ಜೆನ್ ತೆಂಕಾ, "ಇಜ್ರಾಯೆಲಾಂಚೊ ಸರ್ವೆಸ್ಪರ್ ದೆವ್ ಹುಕುಮ್ ದಿತಲೆ ಕಾಯ್ ಮಟ್ಲ್ಯಾರ್, ತುಮ್ಚ್ಯಾತ್ಲೊ ಹರ್ ಎಕ್ಲೊಬಿ ಕಂಬ್ರೆಕ್ ಕೊಯ್ತೊ ಭಾಂದುನ್ಗೆವ್ನ್, ಬಿಡಾರಾಂಚ್ಯಾ ಮದ್ದಿ ಎಕ್ ದಾರಾಕ್ನಾ ಅನಿ ಎಕ್ ದಾರಾಕ್ಡೆ ಫಿರುನ್ಗೆತ್, ಭಾವ್, ವಾಂಗ್ಡಿ, ಸೆಜಾರಿ ಮನುನ್ ಬಗಿನಸ್ತಾನಾ, ಲೊಕಾಕ್ನಿ ನಾಶ್ ಕರುಚೆ", ಮಟ್ಲ್ಯಾನ್.

28 ಲೆವಿಚ್ಯಾ ಕುಳಿಚ್ಯಾನಿ ಮೊಯ್ಜೆಚ್ಯಾ ಹುಕುಮಾ ಸಾರ್ಕೆ ಕರ್ಲ್ಯಾನಿ, ತ್ಯಾ ದಿಸಿ ಲೊಕಾತ್ನಿ ಲೈ ಕರುನ್ ತಿನ್ ಹಾಜಾರ್ ಲೊಕಾ ಮರ್ಲಿ. 29 ಮೊಯ್ಜೆನ್ ಲೆವಿಕ್ನಿ, ಆಜ್ ತುಮ್ಚ್ಯಾತ್ಲೊ ಹರ್ ಎಕ್ಲೊಬಿ, ಲೆಕಾಕ್ ಅನಿ ಭಾವಾಕ್ ದ್ಯಾನ್ ದಿಯ್ ನಸ್ತಾನಾ, ತುಮ್ಕಾ ತುಮಿ ಸರ್ವೆಸ್ಪರಾಚ್ಯಾ ಸೆವಾಕ್ ಒಪ್ಸುನ್ ದಿವ್ಚೆ, ತಸೆ ಹೊಲ್ಯಾರ್ ತೊ ತುಮ್ಕಾ ಆಜುಚ್ ಆಶಿರ್ವಾದ್ ದಿತಾ, ಮಟ್ಲ್ಯಾನ್.

30 ದುಸ್ರೆಂದಿಸಿ ಮೊಯ್ಜೆನ್ ಲೊಕಾಕ್ನಿ, ತುಮಿ ಮೊಟಿ ಚುಕ್ ಕರ್ಲ್ಯಾಸಿ, ಹೊಲ್ಯಾರ್ಬಿ ಮಿಯಾ ಮಡ್ಡಿಚಡುನ್ ಸರ್ವೆಸ್ಪರಾಕ್ಡೆ ಜಾತಾ, ಖರೆ ಮಾಜೆ ವೈನಾ ತುಮಿ ಕರಲ್ಲ್ಯಾ ಪಾಪಾಕ್ನಿ ಮಾಪಿ ಗಾವ್ತಿಲ್, ಮಟ್ಲ್ಯಾನ್. 31 ತನ್ನಾ ಮೊಯ್ಜೆನ್ ಪರ್‍ತುನ್ ಸರ್ವೆಸ್ಪರಾಕ್ಡೆ ಜಾವ್ನ್, "ಅಯ್ಯೊ, ಅಯ್ಯೊ ಹ್ಯಾ ಲೊಕಾನಿ ಮೊಟೊ ಪಾಪಾ ಕರ್ಲಾತ್, ಸೊನ್ಯಾಚೊ ದೆವ್ ಕರುನ್ಗೆಟ್ಲಾತ್. 32 ಖರೆ ತಿಯಾ ದಯಾಕರುನ್ ತೆಂಚೊ ಪಾಪ್ ಮಾಪಿ ಕರುಚೆ, ನಾ ಹೊಲ್ಯಾರ್ ತಿಯಾ ಲಿವಲ್ಲ್ಯಾ ಝಿತ್ತ್ಯಾಂಚ್ಯಾ ಪಟ್ಟಿತ್ನಾ ಮಾಜೆ ನಾವ್ಬಿ ಪುಸುನ್ ಟಾಕ್, ಮನುನ್ ಮಾಗ್ತಾ" ಮನುನ್ ಮಾಗ್ನಿ ಕರ್ಲ್ಯಾನ್. 33 ತನ್ನಾ ಸರ್ವೆಸ್ಪರಾನ್ , ಮಾಜಿ ಗೊಸ್ಟ್ ಚುಕುನ್ ಕೊನಿ ಕೊನಿ ಚುಕ್ ಕರ್ಲಾತ್ ತೆಂಚಿ ನಾಂವಾಚ್ ಮಾಜೆಕ್ಲ್ಯಾ ಪಟ್ಟಿತ್ನಾ ಪುಸುನ್ ಟಾಕ್ತಾ. 34 ತಿಯಾ ಹಿತ್ತೆತ್ನಾ ಜಾವ್ನ್ ಮಿಯಾ ತುಕಾ ಸಾಂಗಲ್ಲ್ಯಾ ದೆಶ್ಯಾಕ್ ತೆಂಕಾ ಚಾಲ್ವುನ್ಗೆವ್ನ್ ಜಾ, ತುಜ್ಯಾ ಫಿಡೆ ಮಾಜೊ ಧುತ್ ಜಾತಾ, ಖರೆ ಮಿಯಾ ತೆಂಕಾ ಶಿಕ್ಷ್ಯಾ ದಿತಾನಾ ತೆಂಚ್ಯಾ ಪಾಪಾಂಚ್ಯಾ ಸಮಾಚ್ ಶಿಕ್ಷ್ಯಾದಿತಾ.

35 ಇಜ್ರಾಯೆಲಾನಿ ಆರೊನಾಚ್ಯಾ ಹಾತಿತ್ನಾ ಸೊನ್ಯಾಚೊ ಪಾಡೊ ಕರ್ಸುನ್ ಘೆಟಲ್ಲ್ಯಾ ಸಾಟ್ನಿ ಸರ್ವೆಸ್ಪರಾನ್ ತೆಂಕಾ ಶಿಕ್ಷ್ಯಾ ದಿಲ್ಯಾನ್.