1 ತನ್ನಾ ಮೊಯ್ಜೆನ್ ಅನಿ ಇಜ್ರಾಯೆಲ್ ಲೊಕಾನಿ ದೆವಾಕ್ ಹಿ ಗಿತ್ ಗಾವುನ್ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, "ಮಿಯಾ ದೆವಾಕ್ ಗಾವ್ತಾ;

ತೊ ಬಳಾನ್ ಜಯ್ ಹೊಲೊ;

ಘೊಡ್ಕಿಯಾಕ್ನಿ ಅನಿ ತೆಂಕಾ

ಚಾಲ್ವುತಲ್ಯಾಕ್ನಿ ಸಮುಂದರಾತ್ ಟಾಕ್ಲ್ಯಾನ್.

2 ದೆವ್ ಮಾಜೊ ಬಳ್ ಅನಿ ಸ್ತುತಿ ಹೊವ್ನ್ ಹಾಯ್. ತೊ ಮಾಜಿ ರಾಕನ್ ಹೊಲೊ. ತೊ

ಮಾಜೊ ದೆವ್, ತೆಚ್ಯಾ ಸಾಟ್ನಿ ಮಿಯಾ ಎಕ್ ವಸ್ತಿ ರಾತಲೊ ಜಾಗೊ ತಯಾರ್ ಕರ್ತಾ.

ತೊ ಮಾಜ್ಯಾ ಬಾಬಾಚೊ ದೆವ್, ಮಿಯಾ ತೆಕಾ ಮಾನ್ ದಿತಾ.

3 ಸರ್ವೆಸ್ಪರ್ ಯುದ್ದ್ ಕರ್ತಲೊ; ಸರ್ವೆಸ್ಪರ್ ಮನ್ತಲೆ ತೆಚೆ ನಾವ್".

4 "ತೆನಿ ಫಾರೊವಾಚ್ಯಾ ಘೊಡ್ಕಿಯಾಂಚಿ ಗಾಡಿಯಾ ಅನಿ ತೆಜೊ ಸೈನ್ ಸಮುಂದರಾತ್ ಪಾಡ್ವುಲ್ಲ್ಯಾನ್;

ಅನಿ ಎಚುನ್ ಘೆಟಲ್ಲೆ ತೆಜ್ಯಾ ಝಗ್ಡ್ಯಾಕ್ ಶ್ರೆಶ್ಟ್ ಹೊತ್ತಿ ಸೈನಿಕಾ ತಾಂಬ್ಡ್ಯಾ ಸಮುಂದರಾತ್ ಬುಡುನ್ ಗೆಲಿ.

5 ಖೊಲ್ ಸಮುಂದರಾನ್ ತೆಂಕಾ ಧಾಪುನ್ ಘಾಟ್ಲ್ಯಾನ್",

ತೆನಿ ಗುಂಡ್ಯಾಚ್ಯಾ ಸಾರ್ಕೆ ಸಮುಂದರಾಚ್ಯಾ ಮುಳಾತ್ ಬುಡುನ್ ಗೆಲೆ.

6 "ಎ ಸರ್ವೆಸ್ಪರ್ ದೆವಾ! ತುಜ್ಯಾ ಉಜ್ವ್ಯಾ ಹಾತಿಚೊ ಬಳ್ ಮಹಿಮಾನ್ ಭರಲ್ಲೊ ಹಾಯ್,

ಎ ಸರ್ವೆಸ್ಪರಾ ತುಜ್ಯಾ ಉಜ್ವ್ಯಾ ಹಾತಿನ್ ವಿರೊಧಿಯಾಕ್ನಿ ಝೆಜ್ರುನ್ ಪುಡ್ ಕರ್ಲ್ಯಾನ್".

7 ತುಜ್ಯಾ ಮಹತ್ವಾಚ್ಯಾ ಮೊಟ್ಟ್ಯಾ ಪಾನಾನ್ ತುಕಾ ವಿರೊಧ್ ಹೊವ್ನ್ ಉಟಲ್ಯಾಕ್ನಿ ಪಾಡ್ವುನ್,

ತುಜ್ಯಾ ರಾಗಾಚ್ಯಾ ಆಗಿನ್ ತೆಂಕಾ ಗವ್ತಾ ಸಾರ್ಕೆ ಜಾಳ್ವುನ್ ಟಾಕ್ಲ್ಯಾ.

8 ತುಜ್ಯಾ ನಾಕಾತ್ಲ್ಯಾ ಮೊಟ್ಟ್ಯಾ ವಾರ್ಯಾನ್ ಅನಿ ಉಸ್ಕಾರ್ಯಾನ್ ಪಾನಿ ಗೊಳಾ ಹೊಲೆ ಪ್ರವಾಹ್ ಗೊಳಾ ಹೊವ್ನ್ ಇಬೆರ್‍ಹಾಲೆ;

ಸಮುದರಾಚ್ಯಾ ಮುಳಾಚಿ ಪಾನಿಯಾಬಿ ಘಟ್ ಹೊಲಿ.

9 ವಿರೊಧಿಯಾನಿ, ಅಮಿ ತೆಂಕಾ ಫಾಟ್ ಲಾಗುನ್ ಧರುನ್,

ಕೊಯ್ತೊ ಘೆವ್ನ್ ತಾಕ್ತಿನ್ ತೆಂಕಾ ಮಾರುನ್ ತೆಂಚ್ಯಾಕ್ಡೆ ಹೊತ್ತೆ ಸಗ್ಳೆ ವಾಟುನ್ ಘೆತಾಂವ್ ಮನುನ್ ಬೊಲಿತ್ ಹೊತ್ತೆ.

10 ಖರೆ ತಿಯಾ ಮೊಟ್ಯಾನ್ ಶ್ವಾಸ್ ಕಾಡಲ್ಲ್ಯಾ ತನ್ನಾ,

ಸಮುಂದರಾನ್ ತೆಂಕಾ ಧಾಪ್ಲ್ಯಾನ್ ತೆನಿ ಸಿಸಾ ಸಾರ್ಕೆ ಮೊಟ್ಟ್ಯಾ ಸಮುಂದರಾತ್ ಬುಡ್ವುಲ್ಯಾ.

11 ಎ ಸರ್ವೆಸ್ಪರಾ, ದೆವಾತ್ನಿ ತುಜ್ಯಾ ಸಾರ್ಕೊ ಕೊನ್ ಹಾಯ್? ತುಜ್ಯಾ ಸಾರ್ಕೊ ನಿತಳ್ ಪಾನಾತ್ ಅನಿ ಆಜಾಪಾಚಿ ಕಾಮಾ ಕರ್ತಲೊ ಕೊನ್?

ತುಜ್ಯಾ ಸರ್ಕೊ ಚಮತ್ಕಾರಾಚಿ ಅನಿ ಪರಾಕರ್ಮಿಚಿ ಕಾಮಾ ದಾಕ್ವುತಲೊ ಕೊನ್ ಹಾಯ್?

12 ತಿಯಾ ತುಜೊ ಉಜ್ವೊ ಹಾತ್ ಉಕಲ್ತಾನಾ ಜಿಮ್ನಿನ್ ವಿರೊದಿಯಾಕ್ನಿ ಗಿಳ್ಳಿನ್.

13 ತಿಯಾ ಕರಾರಾನ್ ಸುಟ್ಕಾ ಕರಲ್ಲ್ಯಾ ಲೊಕಾಕ್ನಿ ದಯಾನಿ ಚಾಲ್ವುನ್,

ತೆಂಕಾ ತುಜ್ಯಾ ಬಳಾನಿ ತುಜ್ಯಾ ನಿತಳ್ ಘರಾಕ್ಡೆ ಹಾನ್ಲೆ.

14 ದೆಶ್ಯಾತ್ಲಿ ಲೊಕಾ ಸಗ್ಳಿ ಹೆ ಆಯ್ಕುನ್ ಬ್ಹಿಂವ್ತಾತ್,

ದುಕ್ಕ್ ಮನ್ತಲೆ ಪಿಲಿಸ್ಟಿಯಾತ್ ವಸ್ತಿ ಕರ್‍ತಲ್ಯಾಕ್ನಿ ಧರುನ್ ಘೆತಾ.

15 ತನ್ನಾ ಯೆದೊಮಿತ್ಲಿ ಅಧಿಕಾರಿ ಲೊಕಾ ಪಿಶೆ ಸಾರ್ಕೆ ಹೊಲಾತ್;

ಮೊವಾಬಾತ್ಲಿ ಬಳೆಚಿ ಲೊಕಾ ಬ್ಹಿವ್ನ್ ಕಾಪುಕ್ಲಾಗ್ತಾತ್,

ಕಾನಾನಾತ್ ವಸ್ತಿ ಕರಲ್ಲೆ ಸಗ್ಳೆ ಧೈರೊ ಕಳ್ದುನ್ ಘೆತಾತ್.

16 ಭಿಂಯಾನ್ ಅನಿ ಗೊಂದಲಾನ್ ತೆಂಕಾ ಧರುನ್ ಘೆಟ್ಲಾ,

ತುಜ್ಯಾ ಬಳಾನ್ ತೆನಿ ಗುಂಡ್ಯಾ ಸಾರ್ಕೆ ಗಪ್ ಇಬೆ ಹಾತ್,

ತವ್ಡೆ ಹೊಯ್ ಪತರ್ ದೆವಾ, ತುಜಿ ಲೊಕಾ ಚಲುನ್ ಜಾವ್ನ್ ಅಪ್ಲ್ಯಾ ದೆಶ್ಯಾಕ್ ಪಾವ್ತಾತ್.

17 ತಿಯಾ ತೆಂಕಾ ತುಜ್ಯಾ ಸ್ವತ್ಯಾಚ್ಯಾ ದೆಶ್ಯಾಕ್ ಮಟ್ಲ್ಯಾರ್,

ಮಡ್ಡಿಚ್ಯಾ ಗಾಂವಾಕ್ ಹಾನುನ್ ಇಬೆ ಕರ್‍ತೆ,

ಸರ್ವೆಸ್ಪರ್ ದೆವಾ ತಿಯ್ಯಾ ಸ್ವತಾಕ್ ವಸ್ತಿ ರಾವ್ಕ್ ತಯಾರ್ ಕರುನ್ ಘೆಟಲ್ಲೊ ಜಾಗೊ ಅನಿ ದೆವಾ,

ತಿಯಾ ತಯಾರ್ ಕರುನ್ ಘೆಟಲ್ಲಿ ಪವಿತ್ರ ಗುಡಿ ಹೊತ್ತ್ಯಾ ಕ್ಡೆ ತೆಂಕಾ ಯೆಯ್ ಸಾರ್ಕೆ ಕರ್ತೆ

18 ಸರ್ವೆಶ್ವರುಚ್ ಸದಾ ಸರ್ವತಾಕ್ ರಾಜ್ವಡ್ಕಿ ಕರ್ತಾ.

19 ಫಾರೊವಾಚಿ ಘೊಡ್ಕಿಯಾ, ಘೊಡ್ಕಿಯಾಂಚಿ ಗಾಡಿಯಾ ಅನಿ ತೆ ಚಾಲ್ವುತಲ್ಯಾ ಸಮುಂದರಾತ್ ಗುಸುನ್ ಚಲ್ತಾನಾ, ಸರ್ವೆಸ್ಪರಾನ್ ಸಮುಂದರಾಚೆ ಪಾನಿ ಪರ್‍ತುನ್ ತೆಂಚ್ಯಾ ವರ್‍ತಿ ಯೆಯ್ ಸಾರ್ಕೆ ಕರುನ್ ಬುಡ್ವುಲ್ಯಾನ್, ಖರೆ ಇಜ್ರಾಯೆಲಾಚಿ ಲೊಕಾ ಸಮುಂದ್ರಾಚ್ಯಾ ಮದ್ದಿ ವಾಳ್ಕ್ಯಾ ಜಿಮ್ನಿ ವರ್‍ತಿ ಚಲುನ್ ಗೆಲ್ಯಾನಿ. 20 ಆರೊನಾಚಿ ಭೆನ್ ಮಿರ್ಯಾಮ್ ಎಕ್ ಪರ್ವಾದಿನಿ ಹೊವ್ನ್ ಹೊತ್ತಿ ವಾಜಾಪ್ ಹಾತಿತ್ ಘೆಟ್ಲಿನ್, ಸಗ್ಳ್ಯಾ ಬಾಯ್ಕಾ ಮನ್ಸಾನಿ ವಾಜ್ಪಾ ಧರುನ್ ಘೆವ್ನ್ ಗಿತ್ ಸಾಂಗಿತ್ ನಾಚುನ್ಗೆತ್ ತಿಚ್ಯಾ ಫಾಟ್ನಾ ಜಾತಾನಾ, 21 ಮಿರ್ಯಾಮಾನ್ ಅಸೆ ಗಾವ್ಲಿನ್ "ಸರ್ವೆಸ್ಪರಾ ಸ್ತುತಿ ಕರಾ,

ತೊ ಮೊಟೊ ಜಯ್ ಸಾಲಿ ಹೊಲಾ.

ತೆನಿ ಘೊಡ್ಕಿಯಾಕ್ನಿ ಅನಿ ತೆ ಚಾಲ್ವುತಲ್ಯಾಕ್ನಿ ಸಮುಂದರಾತ್,

ಪಾಡ್ವುನ್ ನಾಸ್ ಕರ್ಲ್ಯಾನ್".

22 ಮಾನಾ ಮೊಯ್ಜೆನ್ ಇಜ್ರಾಯೆಲ್‌ಕಾರಾಕ್ನಿ ತಾಂಬ್ಡ್ಯಾ ಸಮುಂದ್ರಾಚ್ಯಾ ಜಗ್ಗೊಳ್ನಾ ಚಾಲ್ವುಕ್ ಲಾಗಲ್ಯಾ ತನ್ನಾ, ತೆನಿ ಶುರ್ ಮನ್ತಲ್ಯಾ ಡಂಗ್ಳಿತ್ ತಿನ್ ದಿಸ್ ಚಲುನ್ ಗೆಲ್ಯಾನಿ, ಖರೆ ತೆಂಕಾ ಖೈ ಬಿ ಪಾನಿ ಗಾವ್ಕ್ ನಾ. 23 ಮಾನಾ "ಮಾರಾ" ಮನ್ತಲ್ಯಾ ಜಾಗ್ಯಾಕ್ ಜಾವ್ನ್ ಪಾವ್ಲ್ಯಾನಿ; ಖರೆ ಥೈತ್ಲೆ ಪಾನಿ ಕೊಡು ಹೊತ್ತ್ಯಾ ಸಾಟ್ನಿ ತೆಂಕಾ ತೆ ಪಿವ್ಕ್ ಹೊವ್ಕನಾ, ತಸೆ ಹೊವ್ನ್ ತ್ಯಾ ಜಾಗ್ಯಾಕ್ "ಮಾರಾ" ನಾತರ್ ಕೊಡು ಮನುನ್ ನಾವ್ ಯೆಲೆ. 24 ಲೊಕಾನಿ ಅಮಿ ಕಾಯ್ ಪಿವ್ಚೆ? ಮನುನ್ ಮೊಯ್ಜೆ ವರ್‍ತಿ ಗುನ್ಗುಟ್ಟುಕ್ ಲಾಗಲ್ಲೆ ತನ್ನಾ, 25 ಮೊಯ್ಜೆನ್ ಸರ್ವೆಸ್ಪರಾಕ್ಡೆ ಮಾಗ್ನಿ ಕರ್ಲ್ಯಾನ್, ತನ್ನಾ ಸರ್ವೆಸ್ವರಾನ್ ತೆಕಾ ಎಕ್ ಝಾಡ್ ದಾಕ್ವುಲ್ಯಾನ್,

ತೆ ಝಾಡ್ ಪಾನಿಯಾತ್ ಘಾಟಲ್ಲೆ ತನ್ನಾ ಪಾನಿ ಗೊಡ್ ಹೊಲೆ, ಥೈ ಸರ್ವೆಸ್ಪರಾನ್ ಇಜ್ರಾಯೆಲ್‌ಕಾರಾಕ್ನಿ ಎಕ್ ನೆಮ್ ನಿರ್ದಾರ್ ಕರುನ್ ತೆಂಕಾ ಪರಿಕ್ಷಾ ಕರುನ್ ಅಸೆ ಮಟ್ಲ್ಯಾನ್. 26 ಸರ್ವೆಸ್ಪರಾನ್ ತೆಂಕಾ, ತುಮಿ ಮಾಜ್ಯಾ ಸಗ್ಳ್ಯಾ ಗೊಸ್ಟಿಯಾಕ್ನಿ ಕಾನ್ ದಿವ್ನ್, ಮಾಜ್ಯಾ ದಿಶ್ಟಿಕ್ ಬರೆ ದಿಸ್ತಲೆ ಕರುನ್, ಮಾಜ್ಯಾ ಹುಕುಮಾಕ್ನಿ ಮಾನ್ ದಿವ್ನ್ ಚಲಲ್ಲೆ ಹೊಲ್ಯಾರ್, ಮಿಯಾ ಇಜಿಪ್ತ್ ಕಾರಾಕ್ನಿ ದಿಲ್ಲ್ಯಾ ದುಕ್ನ್ಯಾತ್ನಿ ಎಕ್ಬಿ ತುಮ್ಚಾಕ್ಡೆ ಯೆವ್ಕ್ ದಿಯ್ನಾ, ಸರ್ವೆಸ್ಪರ್ ಮನ್ತಲೊ ಮಿಯಾಚ್ ತುಮ್ಕಾ ಅರಾಮ್ ಥವ್ತಲೊ, ಮಟ್ಲ್ಯಾನ್. 27 ಮಾನಾ ತೆನಿ ಎಲಿಮಿಕ್ ಯೆಲ್ಯಾನಿ, ಥೈ ಬಾರಾ ಪಾನಿಯಾಚಿ ಝರಿಯಾ, ಸತ್ತರ್ ಖಜುರಾಚಿ ಝಾಡಾ ಹೊತ್ತ್ಯಾ ಸಾಟ್ನಿ ತ್ಯಾ ಪಾನಿಯಾಚ್ಯಾ ಜಗ್ಗೊಳ್ ಝೊಪ್ಡಿ ಭಾಂದುನ್ ಘೆವ್ನ್ ರಾಲ್ಯಾನಿ.