1 ಅಪ್ಲ್ಯಾ ಕುಟ್ಮಾಚ್ಯಾ ಸಮೆತ್ ಜಾಕೊಬಾಚ್ಯಾ ವಾಂಗ್ಡಾ ಇಜಿಪ್ತಾಕ್ ಗೆಲ್ಲ್ಯಾ ಇಜ್ರಾಯೆಲಾಚ್ಯಾ ಲೆಕಾಂಚಿ ನಾವಾ ಹಿಚ್, 2 ರುಬೆನ್, ಸಿಮೊನ್, ಲೆವಿ, ಅನಿ ಜುದ್, 3 ಇಸ್ಸಾಕಾರ್, ಜೆಬುಲುನ್, ಅನಿ ಬೆಂಜ್ಯಾಮಿನ್; 4 ದಾನ್, ನೆಪ್ತಾಲಿ, ಗಾದ್, ಅನಿ ಅಶೆರ್, 5 ಖರೆ ಜುಜೆ ಅದ್ದಿಚ್ ಇಜಿಪ್ತಾಕ್ ಗೆಲ್ಲೊ, ಜಾಕೊಬಾಚ್ಯಾ ಖಂದಾನಾತ್ ಉಪಾಜಲ್ಲಿ ಒಟ್ಟು ಸತ್ತರ್ ಲೊಕಾ ಹೊತ್ತಿ.

6 ಮಾನಾ ಜುಜೆ ಅನಿ ತೆಚಿ ಭಾವಾ ಮರ್ಲಿ, ಅನಿ ತಸೆಚ್ ತೆಚ್ಯಾ ಖಂದಾನಾಚಿ ಸಗ್ಳಿ ಲೊಕಾಬಿ ಮರ್ಲಿ. 7 ಖರೆ ಇಜ್ರಾಯೆಲಾಂಚೊ ಅಂಕೊ ವಾಡುನ್ ಲೈ ಹೊಲೊ,

ಅನಿ ತೆನಿ ಬಲಿಸ್ಟ್ ಹೊಲೆ, ಲೈ ಮಟ್ಲ್ಯಾರ್ ತೊ ದೆಶ್ ತೆಂಚೆನುಚ್ ಭರುನ್ ಗೆಲೊ.

8 ಮಾನಾ ಜುಜೆಚಿ ವಳಕ್ ನತ್ತೊ ಎಕ್ ನ್ಹವೊ ರಾಜಾ ಇಜಿಪ್ತಾತ್ ಅಧಿಕಾರಾಕ್ ಯೆಲೊ. 9 ತೆನಿ ಅಪ್ಲ್ಯಾ ಲೊಕಾಕ್ನಿ; "ಬಗಾ", ಇಜ್ರಾಯೆಲಾಚ್ಯಾ ಖಾಂದಾನಾಚಿ ಲೊಕಾ ಅಮ್ಚ್ಯಾ ಕಿಂತಾಬಿ ಲೈ ಹೊವ್ನ್ ವಾಡುಲ್ಲಾತ್, ಅನಿ ಬಲಿಸ್ಟ್ ಹೊಲಾತ್, 10 ಅಮ್ಕಾ ವಿರೊಧ್ ಕೊನ್ ತರಿಬಿ ಝಗ್ಡ್ಯಾಕ್ ಯೆಲ್ಯಾರ್, ತೆನಿ ಅಮ್ಚ್ಯಾ ವಿರೊಧಿಯಾಂಚ್ಯಾ ವಾಂಗ್ಡಾ ಮಿಳುನ್ ಅಮ್ಚೆಕ್ನಾ ಝಗ್ಡೊ ಕರುನ್ ಹ್ಯೊ ದೆಶ್ ಸೊಡುನ್ ಜಾಯ್ಲ್, ತಸೆ ಹೊವ್ನ್ ಯೆವಾ, ತೆನಿ ಅಮ್ಚೆ ದೆಶ್ ಸೊಡುನ್ ಜಾಯ್ನಾ ಸಾರ್ಕೆ ಕಾಯ್ತರಿಬಿ ಯೆವ್ಜನ್ ಹುಡ್ಕುಂವಾ ಮಟ್ಲ್ಯಾನ್. 11 ತನ್ನಾ ತೆಂಕಾ ಅಪ್ಲ್ಯಾ ಜಬರ್ದಸ್ತಿನ್ ತರಾಸ್ ದಿತಲ್ಯಾ ಸರ್ಕೆ ಕಾಮ್ ಕರಸ್ತಲ್ಯಾ ಅಧಿಕಾರಿಕ್ನಿ ಖಾಲ್ತಿ ಹೊಯ್ ಸಾರ್ಕೆ ಕರ್ಲ್ಯಾನಿ, ತೆನಿ ಫಾರೊವಾಸಾಟ್ನಿ ಪಿತೊಮ್ ರಾಮ್ಸೆಸ್ ಮನ್ತಲೆ ಗುಡಾನಾಂಚೆ ಶಾರ್ ಭಾಂದಸ್ಲ್ಯಾನಿ. 12 ಖರೆ ತೆನಿ ಕವ್ಡೆ ತರಾಸ್ ದಿತ್ಯಾತ್ ತವ್ಡೆ ಲೈ ಇಜ್ರಾಯೆಲ್ ಲೊಕಾ ವಾಡ್ವಳ್ಕಿ ಹೊಲಿ, ಇಜಿಪ್ತಾಚ್ಯಾ ಲೊಕಾನಿ ಇಜ್ರಾಯೆಲ್ ಲೊಕಾಕ್ನಿ ವಾಡ್ವಳ್ಕಿ ಹೊತಲೆ ಬಗುನ್ ಲೈ ಭಿಂವ್ಲ್ಯಾನಿ. 13 ತಸೆ ಹೊವ್ನ್ ಇಜಿಪ್ತಾತ್ಲ್ಯಾ ಲೊಕಾನಿ ಇಜ್ರಾಯೆಲಾಂಚ್ಯಾಕ್ನಾ ಲೈ ಕಟಿನ್ ಕಾಮಾ ಕರ್ಸುನ್ ಘೆಟ್ಲ್ಯಾನಿ. 14 ಮಾಟಿಚಿ ಕಾಮಾ, ಇಟಂಗಿಚಿ ಕಾಮಾ, ಅನಿ ಸೆತಾಚಿ ಕಾಮಾ, ಸಗ್ಳ್ಯಾ ನಮುನಿಚ್ಯಾ ಕಾಮಾತ್ನಿಬಿ ಲೈ ತರಾಸ್ ದಿಲ್ಯಾನಿ, ಅನಿ ತೆಂಕಾ ಜಿವಾಚೊ ಲೈ ಬೆಜಾರ್ ಹೊಯ್ ಸಾರ್ಕೆ ಕರ್ಲ್ಯಾನಿ, ಇಜಿಪ್ತಾಚ್ಯಾ ಲೊಕಾನಿ ಇಜ್ರಾಯೆಲ್ ಲೊಕಾಂಚ್ಯಾಕ್ನಾ ಕರಸಲ್ಲಿ ಸಗ್ಳಿ ಕಾಮಾಬಿ ಲೈ ತರಾಸಾಚಿಚ್ ಹೊತ್ತಿ .

15 ಮಾನಾ ಇಜಿಪ್ತಾಚ್ಯಾ ರಾಜಾನ್ ಇಬ್ರಿಯಾಂಚ್ಯಾ ಬಾಯ್ಕಾಕ್ನಿ ಮಜ್ಜತ್ ಕರಲ್ಲ್ಯಾ ದೊನ್ ವೈಜಿನಿಯಾ "ಶಿಪ್ರಾ" ಅನಿ "ಪುವಾ" ಮನ್ತಲಿಂಚ್ಯಾಕ್ನಾ ಬೊಲುನ್, 16 "ತುಮಿ ಇಬ್ರಿಯಾ ಬಾಯ್ಕೊ ಮಾನ್ಸಾಕ್ನಿ ಪೊರಾ ಉಪಾಜ್ತಾನಾ ಝಿಲ್ಗೊ ಹೊಲ್ಯಾರ್ ತೆಕಾ ಜಿವ್ ಕಾಡಾ, ಅನಿ ಚೆಡು ಹೊಲ್ಯಾರ್ ತವ್ಡೆಚ್ ಝಿತ್ತೆ ರಾವ್ಕ್ ಸೊಡಾ" ಮಟ್ಲ್ಯಾನ್. 17 ಖರೆ ತ್ಯಾ ವೈಜಿನಿಯಾನಿ ದೆವಾಕ್ ಭಿಂವ್ನ್, ಇಜಿಪ್ತಾಚ್ಯಾ ರಾಜಾನ್ ಸಾಂಗಲ್ಯಾ ಸಾರ್ಕೆ ಕರಿನಸ್ತಾನಾ, ಝಿಲ್ಗ್ಯಾಕ್ನಿ ಝಿತ್ತೆ ರಾವ್ಕ್ ಸೊಡ್ಲ್ಯಾನಿ. 18 ತನ್ನಾ ತ್ಯಾ ರಾಜಾನ್ ವೈಜಿನಿಯಾಕ್ನಿ ಬಲ್ವುನ್, "ಕಶ್ಯಾಕ್ ಅಸ್ಲೆ ಕಾಮ್ ಕರ್ಲ್ಯಾಸಿ? ಝಿಲ್ಗ್ಯಾಕ್ನಿ ಕಶ್ಯಾಕ್ ಝಿತ್ತೆ ಸೊಡ್ಲ್ಯಾಸಿ?" ಮಟ್ಲ್ಯಾನ್. 19 ತನ್ನಾ ತ್ಯಾ ವೈಜಿನಿಯಾನಿ "ಇಬ್ರಿಯಾಂಚ್ಯಾ ಬಾಯ್ಕೊ ಮಾನ್ಸಿಯಾ ಇಜಿಪ್ತಾಚ್ಯಾ ಬಾಯ್ಕೊಮಾನ್ಸಿಯಾಂಚ್ಯಾ ಗತಿನ್ ನ್ಹಯ್, ತೆನಿ ಲೈ ಹುಶಾರ್ ಹಾತ್, ವೈಜಿನಿಯಾ ತೆಂಚ್ಯಾ ಜಗ್ಗೊಳ್ ಜಾವ್ಚ್ಯಾ ಅದ್ದಿಚ್ ಪೊರಾ ಉಪಾಜ್ತಾತ್" ಮಟ್ಲ್ಯಾನಿ. 20 ತೆಚ್ಯಾ ವೈನಾ ದೆವಾನ್ ತ್ಯಾ ವೈಜಿನಿಯಾಕ್ನಿ ದಯಾ ದಾಕ್ವುಲ್ಯಾನ್, ಅನಿ ಇಜ್ರಾಯೆಲ್ ಲೊಕಾ ಲೈ ಹೊವ್ನ್ ವಾಡುನ್ಗೆತ್ ಗೆಲಿ. 21 ಅನಿ ತಿ ವೈಜಿನಿಯಾ ದೆವಾಕ್ ಭಿಂವ್ನ್ ಚಲಲ್ಲ್ಯಾಸಾಟ್ನಿ, ತೆನಿ ತೆಂಚಿ ಪಿಳ್ಗಿ ವಾಡ್ವಳ್ಕಿ ಕರ್ಲ್ಯಾನ್, ಇಜ್ರಾಯೆಲ್ ಲೊಕಾ ಲೈ ಹೊವ್ನ್ ವಾಡ್ವಳ್ಕಿ ಹೊಲಿ.

22 ಆಕ್ರಿಕ್ ಫಾರೊವ್ ರಾಜ್ಯಾನ್ ಅಪ್ಲ್ಯಾ ಲೊಕಾಕ್ನಿ, "ಇಬ್ರಿಯಾಕ್ನಿ ಉಪಜಲ್ಯಾ ಸಗ್ಳ್ಯಾ ಝಿಲ್ ಬಾಳ್ಸ್ಯಾಕ್ನಿ ನೈಲ್ ನ್ಹಯ್ತ್ ಟಾಕುಚೆ, ಖರೆ ಚೆಡ್ವಾಚ್ಯಾ ಬಾಳ್ಸ್ಯಾಕ್ನಿ ತವ್ಡೆಚ್ ಝಿತ್ತೆ ಸೊಡುಚೆ" ಮನುನ್ ಹುಕುಮ್ ದಿಲ್ಯಾನ್.