1 ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, 2 ತಿಯಾ ಪೈಲ್ಯಾ ಮೈನ್ಯಾಚ್ಯಾ ಪೈಲೆಚ್ಯಾ ದಿಸಿ ದೆವಾಕ್ ಬಗ್ತಲಿ ಗುಡಿ ಉಕ್ಲುನ್ ಇಬೆ ಕರುಚೆ. 3 ಧಾ ಹುಕುಮಾಂಚಿ ಕರಾರಾಂಚಿ ಪೆಟಿ ತ್ಯಾತುರ್ ಥವ್ನ್, ತೆ ಪಡ್ದ್ಯಾನ್ ಧಾಪುಚೆ. 4 ಮಾನಾ ಮಾಚೊ ಹಾನುನ್, ತೆಚೆ ವರ್‍ತಿ ಥವ್ಚೆ ಹೊಲ್ಲೆ ಸಗ್ಳೆ ಸಮಾ ಕರುನ್ ಥವ್ನ್, ದಿವ್ಯಾಚೊ ಖಾಂಬೊ ಹಾನುನ್, ತೆಚೆ ದಿವೆ ಸಮಾ ಕರುನ್ ಥವ್ಚೆ. 5 ಕರಾರಾಂಚ್ಯಾ ಪೆಟಿಚ್ಯಾ ಇದ್ರಾಕ್ ಸೊನ್ಯಾಚೊ ಧುಪಾಚಿ ಆಲ್ತಾರ್ ಥವ್ನ್, ಗುಡಿಚ್ಯಾ ದಾರಾಕ್ ಪಡ್ದೊ ಭಾಂದುಚೆ. 6 ದೆವ್ ದಿಸ್ತಲ್ಯಾ ಬಗ್ತಲ್ಯಾ ಗುಡಿಚ್ಯಾ ದಾರಾಚ್ಯಾ ಇದ್ರಾಕ್ ಬಲಿ ಭೆಟ್ವುತಲೊ ಕಟ್ಟೊ ಥೌವ್ಚೆ. 7 ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ಅನಿ ಬಲಿಚ್ಯಾ ಕಟ್ಟ್ಯಾಚ್ಯಾ ಇದ್ರಾಕ್ ಆಯ್ದಾನ್ ಥವ್ನ್, ತ್ಯಾತುರ್ ಪಾನಿ ಭರುಚೆ. 8 ದಾರಾಚ್ಯಾ ಭೊತ್ಯಾನ್ ಆವರನ್ ಇಬೆಕರುನ್ ತೆಜ್ಯಾ ದಾರಾಕ್ ಪರ್ದೊ ಲೊಂಬಾತ್ ಘಾಲುಚೆ.

9 ಅನಿ ತನ್ನಾ ಅಭಿಶೆಕ್ ಕರಲ್ಲೆ ತೆಲ್ ಘೆವ್ನ್ ಗುಡಿ ಅನಿ ತ್ಯಾತುರ್ ಹೊತ್ತೆ ಸಗ್ಳಿ ಸಾಮಾನಾ ಅಭಿಶೆಕ್ ಕರುನ್ ನೆಮ್ಸುಚೆ, ತ್ಯಾ ದಿಸಾಕ್ನಾ ತಿ ನಿತಳ್ ಹೊತಾತ್. 10 ಬಲಿಚೊ ಕಟ್ಟೊ ಅನಿ ತೆಚಿ ಸಾಮಾನಾ ಅಭಿಶೆಕ್ ಕರುನ್ ಕಟ್ಟ್ಯಾಕ್ ನೆಮ್ಸುಚೆ, ತೊ ಕಟ್ಟೊ ಲೈ ನಿತಳ್ ಹೊವ್ನ್ ರಾವ್ಚೊ. 11 ಆಯ್ದಾನ್ ಅನಿ ತೆ ಥವ್ತಲೊ ಜಾಗೊ ಅಭಿಶೆಕ್ ಕರುನ್ ನೆಮ್ಸುಚೆ.

12 ತವ್ಡೆಚ್ ನಸ್ತಾನಾ, "ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ದಾರಾಕ್ಡೆ ಜಗ್ಗೊಳ್ ಹಾನುನ್, ನ್ಹಾವ್ಸುನ್, 13 ಆರೊನ್ ಮಾಜೊ ಯಾಜಕ್ ಹೊಯ್ ಸಾರ್ಕೆ ತೆಕಾ ನೆಮಲ್ಲೆ ದಿಕ್ಷಾಚೆ ಕಪ್ಡೆ ನೆಸ್ವುನ್, ತೆಕಾ ಅಭಿಶೆಕ್ ಕರುನ್ ನೆಮ್ಸುಚೆ. 14 ಮಾನಾ ಆರೊನಾಚ್ಯಾ ಲೆಕಾಕ್ನಿ ಬಲ್ವುನ್ ತೆಂಕಾ ದಿಕ್ಷಾಚೆ ಕಪ್ಡೆ ನೆಸ್ವುನ್, 15 ಮಾಜೊ ಯಾಜಕ್ ಹೊವ್ಕ್ ಸಾಟ್ನಿ ತೆಂಚ್ಯಾ ಬಾಬಾಕ್ ಅಭಿಶೆಕ್ ಕರಲ್ಲ್ಯಾ ಸಾರ್ಕೆಚ್ ತೆಂಕಾಬಿ ಅಭಿಶೆಕ್ ಕರುಚೆ, ಅಸೆ ಕರಲ್ಲ್ಯಾ ವೈನಾ ಯಾಜಕ್ ಪಾನ್ ತೆಂಕಾ ಅನಿ ತೆಂಚ್ಯಾ ಪಿಳ್ಗಿಕ್ ಶಾಶ್ವತ್ ಹೊವ್ನ್ ರ್‍ಹಾತಾ" ಮಟ್ಲ್ಯಾನ್. 16 ಸರ್ವೆಸ್ಪರಾನ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್ ಮೊಯ್ಜೆನ್ ಸಗ್ಳೆಬಿ ಕರ್ಲ್ಯಾನ್.

17 ದೊನ್ವ್ಯಾ ವರ್ಸಾಚ್ಯಾ ಪೈಲ್ಯಾ ಮೈನ್ಯಾಚ್ಯಾ ಪೈಲ್ಯಾ ದಿಸಾತ್ ಮೊಯ್ಜೆನ್ ಗುಡಿ ಉಕ್ಲುನ್ ಇಬೆ ಕರ್ಲ್ಯಾನ್. 18 ತೆನಿ ಗುಡಿ ಉಕ್ಲುನ್ ತೆಚೆ ಪಾಯಾಚೆ ಗುಂಡೆ ಘಾಲುನ್, ಚವ್ಕಟಾ ಇಬೆ ಕರುನ್, ಅಗ್ಳಿಯಾ ದಿವ್ನ್, ಖಾಂಬೆ ಇಬೆ ಕರ್ಲ್ಯಾನ್. 19 ಗುಡಿ ವರ್‍ತಿ ಪರ್ದೆ ಕಾಂಬ್ರುನ್, ತೆಚೆ ವೈಲೆ ಕಾಂಬ್ರಾನ್ ಘಾಟ್ಲ್ಯಾನ್, ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ ಮೊಯ್ಜೆನ್ ಹೆ ಸಗ್ಳೆ ಕರ್ಲ್ಯಾನ್. 20 ಹುಕುಮಾಂಚೆ ಗುಂಡೆ ಪೆಟಿತ್ ಥವ್ನ್, ಪೆಟಿಕ್ ದಾಂಡೆ ಲಾವ್ನ್, ತೆಜ್ಯಾ ವರ್‍ತಿ ಕರ್ಪಾಸನ್ ಥವ್ನ್, 21 ಕರಾರಾಚಿ ಪೆಟಿ ಗುಡಿತ್ ಹಾನುನ್, ತೆಜ್ಯಾ ಇದ್ರಾಕ್ ಪರ್ದೊ ಲೊಂಬಾತ್ ಘಾಲುನ್, ಸರ್ವೆಸ್ಪರಾನ್ ಸಾಂಗಲ್ಲ್ಯಾ ಸಾರ್ಕೆಚ್ ಕರಾರಾಚಿ ಪೆಟಿ ದಿಸಿನಾ ಸಾರ್ಕೆ ಕರ್ಲ್ಯಾನ್. 22 ತವ್ಡೆಚ್ ನಸ್ತಾನಾ, ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ಉತ್ತರ್ ದಿಕ್ಕಾಕ್ಡೆ ಪರ್ದ್ಯಾಚ್ಯಾ ಭಾಯ್ರ್ ಮಾಚೊ ಥವ್ಲ್ಯಾನ್. 23 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್, ಮಾಚ್ಯಾ ವರ್‍ತಿ ಸರ್ವೆಸ್ಪರಾಚ್ಯಾ ಇದ್ರಾಕ್ ಸಮಾ ಕರುನ್ ಭಾಕ್ರಿಯಾ ಥವ್ಲ್ಯಾನ್. 24 ಅನಿ ತೆನಿ ದಿವ್ಯಾಂಚೊ ಖಾಂಬೊ ದೆವಾಕ್ ಬಗ್ತಲ್ಯಾ ಗುಡಿತ್ ಮಾಚ್ಯಾಚ್ಯಾ ಇದ್ರಾಕ್ ಗುಡಿಚ್ಯಾ ದಕ್ಷಿನ್ ಭಾಗಾಕ್ ಥವ್ನ್, 25 ಅನಿ ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ, ತೆಚೆ ದಿವೆ ಸರ್ವೆಸ್ಪರಾಚ್ಯಾ ಇದ್ರಾಕ್ ಸಮಾ ಕರುನ್ ಥವ್ಲ್ಯಾನ್. 26 ಅನಿ ಸೊನ್ಯಾಚೊ ಧುಪಾಚೊ ಕಟ್ಟೊ ಗುಡಿಚ್ಯಾ ಪರ್ದ್ಯಾಚ್ಯಾ ಇದ್ರಾಕ್ ಥವ್ನ್, 27 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ, ತೆಜ್ಯಾ ವರ್‍ತಿ ಬರ್ಯಾ ವಾಸೆಚ್ಯಾ ತೆಲಾಂಚೆ ಧುಪ್ ಘಾಟ್ಲ್ಯಾನ್. 28 ಅನಿ ತೆನಿ ಗುಡಿಚ್ಯಾ ದಾರಾಕ್ ಪರ್ದೊ ಘಾಟ್ಲ್ಯಾನ್. 29 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್, ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ದಾರಾಚ್ಯಾ ಇದ್ರಾಕ್ ಬಲಿ ಭೆಟ್ವುತಲೊ ಕಟ್ಟೊ ಥವ್ನ್ ತೆಜ್ಯಾ ವರ್‍ತಿ ಸಗ್ಳೆ ಆಂಗ್ ಬಲಿ ಅನಿ ದಾನ್ಯಾಂಚಿ ಬಲಿ ಭೆಟ್ವುಲ್ಯಾನ್. 30 ಮೊಯ್ಜೆನ್ ಗುಡಿಚ್ಯಾ ಅನಿ ಬಲಿಚ್ಯಾ ಕಟ್ಟ್ಯಾಚ್ಯಾ ಮದ್ದಿ ಆಯ್ದಾನ್ ಥವ್ನ್, ಧುವ್ನ್ ಘೆವ್ಕ್ ಸಾಟ್ನಿ ತ್ಯಾತುರ್ ಪಾನಿ ಥವ್ಲ್ಯಾನ್. 31 ತ್ಯಾತುರ್ ಮೊಯ್ಜೆ, ಆರೊನ್ ಅನಿ ತೆಚಿ ಲೆಕಾ ಹಾತ್, ಪಾಂಯ್ ಧುವ್ನ್ ಘೆಯ್ತ್, 32 ಅನಿ ತೆನಿ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ ಗುಡಿಚ್ಯಾ ಭುತ್ತುರ್ ಜಾತಾನಾ ಅನಿ ಬಲಿ ಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಸೆವಾಕ್ ಯೆಲ್ಲ್ಯಾ ತನ್ನಾ ತೆನಿ ತಸೆ ಕರ್ಲ್ಯಾನಿ. 33 ಗುಡಿಚ್ಯಾ ಅನಿ ಬಲಿಚ್ಯಾ ಕಟ್ಟ್ಯಾಚ್ಯಾ ಭೊತ್ಯಾನ್ ಆವರನಾ ಇಬೆ ಕರುನ್, ಮ್ಹಾಳ್ ಜಾಗ್ಯಾಚ್ಯಾ ದಾರಾಕ್ ಪರ್ದೆ ಘಾಟ್ಲ್ಯಾನ್, ಅಸೆ ಮೊಯ್ಜೆನ್ ತೆ ಸಗ್ಳೆ ಕಾಮ್ ಕರುನ್ ಸಾರ್ಲ್ಯಾನ್.

34 ತನ್ನಾ ದೆವಾಕ್ ಬಗ್ತಲ್ಯಾ ಗುಡಿಕ್ ಮೊಡಾನ್ ಧಾಪ್ಲ್ಯಾನ್, ಅನಿ ಸರ್ವೆಸ್ಪರಾಚಿ ಮಹಿಮಾ ಗುಡಿತ್ ಭರ್ಲಿ. 35 ಗುಡಿ ವರ್‍ತಿ ಮೊಡ್ ಧಾಪಲ್ಲ್ಯಾ ಸಾಟ್ನಿ ಅನಿ ಸರ್ವೆಸ್ಪರಾಚಿ ಮಹಿಮಾ ಗುಡಿತ್ ಭರಲ್ಲ್ಯಾ ಸಾಟ್ನಿ, ಮೊಯ್ಜೆಕ್ ಗುಡಿತ್ ಜಾವ್ಕ್ ಹೊವ್ಕ್ ನಾ. 36 ತೊ ಮೊಡ್ ಗುಡಿಕ್ ಸೊಡುನ್ ವರ್‍ತಿ ಗೆಲ್ಲ್ಯಾ ತನ್ನಾ, ಇಜ್ರಾಯೆಲ್ ಲೊಕಾ ಫಿಡೆ ಪರ್ಯಾನ್ ಕರಿತ್. 37 ತೊ ಮೊಡ್ ಸೊಡಿನಸ್ತಾನಾ ರ್‍ಹಾತಾನಾ, ಸೊಡಿ ಪತರ್ ಪರ್ಯಾನ್ ಕರಿನಸ್ತಾನಾ ರಾಯ್ತ್. 38 ಇಜ್ರಾಯೆಲ್ ಲೊಕಾಂಚ್ಯಾ ಸಗ್ಳ್ಯಾ ಪರ್ಯಾನಾತ್ನಿಬಿ ತೆಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕ್ ದಿಸ್ ಉಜ್ವೊಡಿಚ್ ಸರ್ವೆಸ್ಪರಾಚೊ ಮೊಡ್ ಗುಡಿಚ್ಯಾ ವರ್‍ತಿ ಹೊತ್ತೊ, ಅನಿ ರಾತ್ತಿನ್ ಮೊಡಾತ್ ಆಗ್ ಹೊಳ್ವಳು ಲಾಗಲ್ಲಿ.