ನಿರ್ಗಮನ್ 22

ಬದ್ಲಿ ದಿತಲಿ ವಿಶಯಾತ್ ನೆಮಾ

1 ಕೊನ್ ತರ್ಬಿ ಎಕ್ಲ್ಯಾನ್ ಬಕ್ರೆನಾತರ್ ಬೈಲ್ ಚೊರುನ್ ಕಾಪ್ಲ್ಯಾರ್ ನಾತರ್ ಇಕ್ಲ್ಯಾರ್, ತೆನಿ ಎಕ್ ಬೈಲಾಕ್ ಬದ್ಲಿ ಪಾಂಚ್ ಬೈಲಾ ಅನಿ ಎಕ್ ಬಕ್ರ್ಯಾಕ್ ಬದ್ಲಿ ಚಾರ್ ಬಕ್ರಿಯಾ ದಿವ್ಚೆ. 2 ಚೊರ್ ಚೊರಿ ಕರುನ್ಗೆತ್ ರ್‍ಹಾತಾನಾ ಗಾವ್ನ್ ಪಡುನ್ ಮರುನ್ಗೆಲ್ಯಾರ್, ತೆ ಮಾನ್ಸಾಚೊ ಹಾತ್ತೊ ಮನುಕ್ ಹೊಯ್ನಾ. 3 ದಿಸ್ ಉಗಾವ್ಲ್ಯಾ ಮಾನಾ ಕೊನ್ ತರಿಬಿ ಚೊರಾಕ್ ರಗ್ತಾಚೊ ದೊಶ್ ಹೊಲ್ಯಾರ್ ತೆ ಮಾನ್ಸಾಚೊ ಹತ್ತೊ ಕರಲ್ಲ್ಯಾ ಸಾರ್ಕೆಚ್, ಚೊರಾನ್ ಅಪ್ನಿ ಚೊರಲ್ಲೆ ಸಗ್ಳೆಬಿ ದಿವ್ಚೆ, ಅನಿ ತೆಜ್ಯಾಕ್ಡೆ ಕಾಯ್ಬಿ ದಿವ್ಕ್ ನಾ ಹೊಲ್ಯಾರ್ ಚೊರಿ ಕರಲ್ಲ್ಯಾ ಸಾಟ್ನಿ ತೆಕಾ ಗುಲಾಮ್ ಕರುನ್ ಇಕುಚೆ. 4 ಚೊರಾನ್ ಚೊರಲ್ಲೊ ಬೈಲ್ ನಾತರ್ ಗಾಡಾವ್ ನಾತರ್ ಶೆಳಿ ಹೊವ್ನ್ ರಾಲ್ಯಾರ್, ಅನಿ ತೆ ಝಿತ್ತೆಚ್ ತೆಂಚ್ಯಾಕ್ಡೆ ಗಾವ್ಲ್ಯಾರ್, ತೆನಿ ದೊನ್ ಪಟ್ಟ್ ಬದ್ಲಿ ದಿವ್ಚೆ. 5 ಕೊನ್ ತರ್ಬಿ ಎಕ್ಲ್ಯಾನ್ ಅಪ್ನಾಚ್ಯಾ ಸೆತಾಕ್ ನಾತರ್, ದರಾಕ್ಷಿಚ್ಯಾ ಮ್ಹಳ್ಯಾತ್ ಬೈಲಾಕ್ ಚಾರ್ವುನ್ ತೆ ದುಶ್ರ್ಯಾಚ್ಯಾ ಸೆತಾಕ್ ಜಾವ್ನ್ ಚರ್ವುಲ್ಯಾರ್, ಅಪ್ನಾಚ್ಯಾ ಸೆತಾಚಿ ಬರಿ ಫಳಾ ನಾತರ್ ಪಿಕಾ ಬದ್ಲಿಕ್ ದಿವ್ಚೆ. 6 ಕೊನ್ ತರ್ಬಿ ಎಕ್ಲ್ಯಾನ್ ಲಾವಲ್ಲಿ ಆಗ್ ಅಕಸ್ಮಾತ್ ಕಾಟ್ಯಾಂಚ್ಯಾ ಝಿಳಿಕ್ ಲಾಗುನ್ ಅನಿ ಎಕ್ಲ್ಯಾಚ್ಯಾ ಪಿಕಾಕ್ ನಾತರ್ ಸೆತಾಕ್ ಲಾಗುನ್ ಜಳುನ್ ಗೆಲ್ಯಾರ್, ತೆಚಿ ಬದ್ಲಿ ಆಗ್ ಲಾವಲ್ಯಾನ್ ದಿವ್ಚೆ. 7 ಕೊನ್ ತರ್ಬಿ ಎಕ್ಲ್ಯಾನ್ ಅನಿ ಎಕ್ಲ್ಯಾಕ್ಡೆ ಬರೆ ಕರುನ್ ಥವ್ಕ್ ಪೈಸೆ ನಾತರ್ ವಸ್ತಾ ಕಾಯ್ತರ್ಬಿ ದಿಲ್ಯಾರ್, ತೆ ತೆಂಚ್ಯಾ ಘರ್‍ಹಾತ್ ಚೊರಿ ಹೊಲ್ಯಾರ್, ತೊ ಚೊರ್ ಗಾವ್ನ್ ಪಡ್ಲ್ಯಾರ್ ದೊನ್ ಪಟ್ಟ್ ಬದ್ಲಿ ದಿವ್ಚೆ. 8 ಅನಿ ಚೊರ್ ಗಾವ್ಕ್ ನಸ್ಲ್ಯಾರ್, ತ್ಯಾ ಘರಾಚೊ ಯೆಜ್ಮಾನ್ ಅಪ್ನಿ ಚೊರಿ ಕರುಕ್ ನಾ ಮನುನ್ ದಾಕ್ವು ಸಾಟ್ನಿ ದೆವಾಚ್ಯಾ ಇದ್ರಾಕ್ ಆರಾದನ್ ಕರ್‍ತಲ್ಯಾ ಜಾಗ್ಯಾರ್ ದಾಕ್ವುನ್ ಘೆವ್ಚೊ. 9 ಬೈಲ್, ಗಾಡಾವ್ ನಾತರ್ ಕಪ್ಡೆ ಕಾಯ್ ಹೊಲ್ಯಾರ್ಬಿ ನಾತರ್ ದುಸ್ರೆ ಸಾಮಾನ್ ಕಳ್ದುನ್ ಘೆಟಲ್ಲೆ ರಾಲ್ಯಾರ್, ತೆಜ್ಯಾ ವಿಶಯಾತ್ ಪಸ್ಲೊ ಮನ್ತಲೊ ಅನ್ಮಾನ್ ಹೊಲ್ಲೊ ರಾಲ್ಯಾರ್, ಅನಿ ದೊನ್ ಮಾನ್ಸಾ ತೆ ಮಾಜೆ ಮನುನ್ ಝಗ್ಡಿತ್ ರ್‍ಹಾತಾನಾ, ತೊ ಝಗ್ಡೊ ದೆವಾಚ್ಯಾ ಇದ್ರಾಕ್ ಹಾನುಚೆ, ಸರ್ವೆಸ್ಪರಾಕ್ನಾ ಕೊನ್ ಪಸ್ವಲ್ಲೆ ಮನುನ್ ನಿರ್ದಾರ್ ಯೆತಾ ತೆನಿ ದೊನ್ ಪಟ್ಟ್ ಬದ್ಲಿ ದಿವ್ಚೆ. 10 ಎಕ್ಲ್ಯಾನ್ ಅನಿ ಎಕ್ಲ್ಯಾಚೆ ಬಕ್ರೆ, ಗಾಡಾವ್, ಬೈಲ್ ನಾತರ್ ದುಸ್ರೆ ಕಸ್ಲೆಬಿ ಜನಾವರ್ ಹೊಂವ್ದಿತ್ ಅಪ್ನಾಕ್ಡೆ ಬರೆಕರುನ್ ಥವ್ನ್ ಘೆವ್ಕ್ ಒಪ್ಸುನ್ ಮಾನಾ ತೆ ಮರ್ಲ್ಯಾರ್ ನಾತರ್ ತೆಕಾ ದುಕ್ಕ್ ಕರ್ಲ್ಯಾರ್ ನಾತರ್ ಕೊನಾಕ್ಬಿ ಗೊತ್ತ್ ನಸ್ತಾನಾ ಚೊರಿ ಹೊಲ್ಯಾರ್, 11 ತ್ಯಾ ಮಾನ್ಸಾನ್ ತೆಜ್ಯಾ ವಿಶಯಾತ್ ಪಸ್ವುಕ್ನಾ ಮನುನ್ ದಾಕ್ವು ಸಾಟ್ನಿ ಸರ್ವೆಸ್ಪರಾ ವರ್‍ತಿ ಆನ್ ಘಾಲುಚೆ, ಅನಿ ತ್ಯಾ ಜನಾವರಾಚ್ಯಾ ಯೆಜ್ಮಾನಾಕ್ ತೆ ಆನ್ ವಿಶ್ವಾಸಾಕ್ ಯೆವ್ಚೆ, ತನ್ನಾ ಆನ್ ಕರಲ್ಲ್ಯಾನ್ ಬದ್ಲಿ ದಿತಲೆ ರ್‍ಹಾಯ್ನಾ. 12 ಖರೆ ಜನಾವರ್ ಚೊರಿ ಹೊಲ್ಲೆ ರಾಲ್ಯಾರ್, ತ್ಯಾ ಮಾನ್ಸಾನ್ ಯೆಜ್ಮಾನಾಕ್ ಬದ್ಲಿ ದಿವ್ಚೆ. 13 ಡಂಗ್ಳಿತ್ಲ್ಯಾ ಜನಾವರಾನ್ ತೆ ಜಿವ್ ಕಾಡಲ್ಲೆ ಹೊಲ್ಯಾರ್, ತೆಜೊ ಎಕ್ ತರ್ಬಿ ಭಾಗ್ ಸಾಕ್ಷಿಕ್ ದಾಕ್ವುಚೆ, ಡಂಗ್ಳಿತ್ಲ್ಯಾ ಜನಾವರಾನ್ ಜಿವ್ ಕಾಡಲ್ಲ್ಯಾಕ್ ಬದ್ಲಿ ದಿತಲೆ ರ್‍ಹಾಯ್ನಾ. 14 ಎಕ್ಲ್ಯಾಚೆ ಜನಾವರ್ ಅನಿ ಎಕ್ಲ್ಯಾನ್ ಉಲ್ಲ್ಯಾ ದಿಸಾಂಚ್ಯಾ ಸಾಟ್ನಿ ರಿನಾನ್ ಘೆಟಲ್ಲೆ ರಾಲ್ಯಾರ್, ತೆ ಜನಾವರ್ ಅಪ್ನಾಚೊ ಯೆಜ್ಮಾನ್ ಜಗ್ಗೊಳ್ ನತ್ತ್ಯಾ ತನ್ನಾ ದುಕ್ ಕರುನ್ಗೆಟ್ಲ್ಯಾರ್, ನಾತರ್ ಮರುನ್ ಗೆಲ್ಯಾರ್, ರಿನ್ ಘೆಟಲ್ಲ್ಯಾನ್ ಬದ್ಲಿ ದಿವ್ಕ್ ಪಾಜೆ. 15 ಅನಿ ತೆಜೊ ಯೆಜ್ಮಾನ್ ಜಗ್ಗೊಳ್ ಹೊತ್ತ್ಯಾ ತನ್ನಾ ಕಾಯ್ತರ್ಬಿ ಹೊಲ್ಯಾರ್, ತೆಕಾ ಬದ್ಲಿ ದಿತಲೆ ನಕ್ಕೊ, ತೆ ಭಾಡ್ಯಾಕ್ ಘೆಟಲ್ಲೆ ಹೊಲ್ಯಾರ್ ತೆಕಾ ಹೊಲ್ಲೆ ಲುಕ್ಷಾನ್ ತೆಜ್ಯಾ ಭಾಡ್ಯಾ ವಾಂಗ್ಡಾಚ್ ಮ್ಹೆಜುನ್ ಹೊವ್ಚೆ.

ಲೊಕಾಂಚ್ಯಾ ವಿಶಯಾತ್ ಜವಾಬ್ದಾರಿಯಾ

16 ಇಡೆ ಹೊವ್ಕ್ ನಸಲ್ಲ್ಯಾ ಚೆಡ್ವಾಕ್ ಕೊನ್ ತರ್ಬಿ ಎಕ್ಲ್ಯಾನ್ ಟಕ್ಲೆ ಹಾಳ್ ಕರುನ್, ತಿಚೆಕ್ನಾ ನಿಜ್ಲ್ಯಾರ್ ತಿಚ್ಯಾ ಮರ್ಯಾದಿ ಸಾಟ್ನಿ ದಿತಲೆ ಮೊಹರ್ ಭರುನ್ ತಿಕಾ ಲಗಿನ್ ಕರುನ್ಗೆವ್ಚೆ. 17 ಖರೆ ತಿಜೊ ಬಾಬಾ ತಿಕಾ ಲಗಿನ್ ಕರುನ್ ದಿವ್ಕ್ ಒಪ್ಪಿ ನಸ್ಲ್ಯಾರ್, ತೆನಿ ತೊ ಮರ್ಯಾದಿಕ್ ಸಾಟ್ನಿ ದಿತಲೆ ಮೊಹರ್ ದಿವ್ಕುಚ್ ಪಾಜೆ. 18 ಮೊಡಿ ಕಾರ್ನಿಕ್ ಝಿತ್ತೆ ರಾವ್ಕ್ ಸೊಡುಚೆ ನ್ಹಯ್, 19 ಜನಾವರಾಕ್ನಾ ಮಿಳಲ್ಲ್ಯಾಕ್ ಮರ್ನಾಚಿ ಶಿಕ್ಷ್ಯಾ ಹೊವ್ಚಿ. 20 ಸರ್ವೆಸ್ಪರಾಕ್ ಸೊಡುನ್ ದುಸ್ರ್ಯಾ ದೆವಾಕ್ ಬಲಿ ಭೆಟ್ವುತಲೊ ನಾಶ್ ಹೊವ್ಕ್ ಪಾಜೆ. 21 ದುಸ್ರ್ಯಾ ದೆಶಾಚ್ಯಾಕ್ನಿ ಅನ್ಯಾಯ್ ಕರುಚೆ ನ್ಹಯ್, ತೆಕಾ ತರಾಸ್ ದಿವ್ಚೆ ನ್ಹಯ್, ತುಮಿಬಿ ಇಜಿಪ್ತಾತ್ ದುಸ್ರ್ಯಾ ದೆಶಾಚೆ ಹೊವ್ನ್ ಹೊತ್ತ್ಯಾಸಿ ನ್ಹಯ್. 22 ಘವ್ಮರಲ್ಲಿಕ್ ನಾತರ್, ಕೊನ್ ಬಿ ಗತಿ ನತ್ತ್ಯಾ ಪೊರಾಕ್ನಿ ತರಾಸ್ ದಿವ್ಚೆ ನ್ಹಯ್. 23 ತುಮಿ ಅಸ್ಲ್ಯಾಕ್ನಿ ತರಾಸ್ ದಿಲ್ಲೆ ಹೊಲ್ಯಾರ್ ತೆನಿ ಮಾಜೆಕ್ಡೆ ರಡ್ತಾತ್, ಮಿಯಾ ತೆಂಚ್ಯಾ ರಡ್ನ್ಯಾಕ್ ಕಾನ್ ದಿಯ್ ನಸ್ತಾನಾ ರ್‍ಹಾಯ್ನಾ ಮನ್ತಲೆ ತುಮ್ಕಾ ಗೊತ್ತ್ ರಾವ್ಚೆ. 24 ಮಿಯಾ ರಾಗ್ ಹೊವ್ನ್ ತುಮ್ಕಾ ವಿರೊದ್ಯಾಂಚ್ಯಾ ಹಾತಿತ್ನಾ ನಾಶ್ ಕರಸ್ತಾ, ತುಮ್ಚಿ ಬಾಯ್ಕಾ ಘವ್ಮರಲ್ಲಿ ಹೊತಾತ್, ಅನಿ ತುಮ್ಚಿ ಪೊರಾ ಕೊನ್ಬಿ ನತ್ತೆ ಹೊತಾತ್. 25 ಮಾಜ್ಯಾ ಲೊಕಾತ್ನಿ ಎಕ್ ಗರಿಬ್ ಮಾನ್ಸಾಕ್ ತಿಯಾ ರಿನ್ ದಿಲ್ಲೆ ಹೊಲ್ಯಾರ್, ತೆಕಾ ರಿನ್ ಕಾರಿನಾಸಾರ್ಕೆ ಬಗುಚೆ ನ್ಹಯ್, ಅನಿ ತೆಜ್ಯಾಕ್ನಾ ಬಡ್ಡಿ ಮಾಗುಚೆ ನ್ಹಯ್. 26 ತಿಯಾ ಎಕ್ಲ್ಯಾಚೆ ಕಂಬ್ಳೆ ಆಡು ಥವ್ನ್ ಘೆಟಲ್ಲೆ ಹೊಲ್ಯಾರ್, ದಿಸ್ ಬುಡುಚ್ಯಾ ಅದ್ದಿ ತೆ ಫಾಟಿ ಪರ್‍ತುನ್ ದಿವ್ಚೆ. 27 ಕಶ್ಯಾಕ್ ಮಟ್ಲ್ಯಾರ್, ತೆಕಾ ತೆ ಎಕುಚ್ ಕಾಂಬ್ರಾನ್ ಹೊವ್ನ್ ಹಾಯ್, ತೆನಿ ತೆಚ್ ಆಂಗಾಕ್ ಲಪ್ಟುನ್ ಘೆವ್ಚೆ, ಅನಿ ದುಸ್ರೆ ಕಾಯ್ಬಿ ಕಾಂಬ್ರಾನ್ ಘೆವ್ನ್ ನಿಜಿನಾ, ತೆನಿ ಮಾಜೆಕ್ಡೆ ಮಾಗ್ಲ್ಯಾರ್ ಮಿಯಾ ಆಯಿಕ್ತಾ, ಕಶ್ಯಾಕ್ ಮಟ್ಲ್ಯಾರ್, ಮಿಯಾ ದಯಾ ಮಯಿ ಹೊವ್ನ್ ಹಾಂವ್. 28 ದೆವಾಕ್ ಗಾಳಿಯಾ ದಿವ್ ನಕಾಸಿ, ತುಮ್ಚ್ಯಾ ಲೊಕಾಂಚ್ಯಾ ಜಾಂನ್ತ್ಯಾಕ್ ಶರಾಪ್ ದಿವ್ ನಕಾಸಿ. 29 ತುಮ್ಚ್ಯಾ ಖಳ್ಯಾತ್ನಾ ಅನಿ ಕಳಂಜಾತ್ನಾ ಮಾಕಾ ಪಾಜೆ ಹೊಲ್ಲೆ ದಿವ್ಕ್ ತಡೊ ಕರುನಕಾಸಿ. 30 ತುಮ್ಚ್ಯಾ ಥೊರ್ಲ್ಯಾ ಝಿಲ್ ಬಾಳ್ಸ್ಯಾಕ್ನಿ ಮಾಕಾ ಒಪ್ಸುನ್ ದಿವಾ, ತಸೆಚ್ ತುಮ್ಚ್ಯಾ ಜನಾವರಾಂಚ್ಯಾ ಥೊರ್ಲ್ಯಾ ವಾಂಸ್ರಾಕ್ನಿ ಮಾಕಾ ಒಪ್ಸುಚೆ, ತೆ ವಾಂಸ್ರು ಸಾತ್ ದಿಸಾಂಚ್ಯಾ ಪತರ್ ಅಪ್ನಾಚ್ಯಾ ಅವ್ಸಿಕ್ಡೆ ರಾಂವ್ದಿತ್, ಆಟ್ವೆ ದಿಸಿ ತೆ ಮಾಕಾ ಒಪ್ಸುನ್ ಹೊವ್ಚೆ. 31 ತುಮಿ ಮಾಜಿ ನಿತಳ್ ಲೊಕಾ ಹೊವ್ನ್ ರಾವ್ಚೆ, ತಸೆ ಹೊವ್ನ್ ಡಂಗ್ಳಿಚ್ಯಾ ಜನಾವರಾನ್ ಜಿವ್ ಕಾಡಲ್ಲೆ ಖಾವ್ಚೆ ನ್ಹಯ್, ತೆ ಕುತ್ರ್ಯಾಂಚ್ಯಾ ವಾಟ್ಯಾಕ್ ಸೊಡುಚೆ.