1 ಸರ್ವೆಸ್ಪರಾನ್ ಮೊಯ್ಜೆಕ್ ಅಸೆ ಮಟ್ಲ್ಯಾನ್, 2 ಮಾಜ್ಯಾ ಸಾಟ್ನಿ ಇಜ್ರಾಯೆಲ್ ಲೊಕಾನಿ ಕಾನಿಕ್ ಕಾಡುನ್ ಥವ್ಚೆ ಮನುನ್ ಸಾಂಗ್, ಫುರಾ ಮನಾನ್ ದಿತಲ್ಯಾಕ್ನಾಚ್ ತಿ ಕಾನಿಕ್ ಘೆವ್ಚೆ. 3 ತಿಯಾ ತೆಂಚ್ಯಾಕ್ನಾ ಘೆವ್ಚಿ ಹೊಲ್ಲಿ ಕಾನಿಕ್ ಹಿಚ್, ಚಾಂದಿ, ಸೊನೆ, ತಾಂಬೆ, 4 ನಿಲಿ, ದುದ್, ಲೈ ತಾಂಬ್ಡ್ಯಾ ಬನ್ನಾಚೆ ದೊರೆ, ನಿತಳ್ ಲಪಾಟಿಯಾ, ತುಪ್ಪಟಾಚೆ ಕಪ್ಡೆ. 5 ಹಾದಾಕ್ ಹಾನಲ್ಲಿ ತಾಂಬ್ಡ್ಯಾ ಬನ್ನಾಚಿ ಬಕ್ರ್ಯಾಚಿ ಕೆಸಾ, ಸಮುಂದರಾಚ್ಯಾ ಡುಕ್ರಾಚಿ ಕೆಸಾ, ಜಾಲಿಚೆ ಝಾಡ್, 6 ದಿವ್ಯಾಕ್ ಪಾಜೆ ಹೊಲ್ಲೆ ತೆಲ್, ಅಭಿಶೆಕ್ ತೆಲಾಕ್ ಅನಿ ಬರ್ಯಾವಾಸೆಚ್ಯಾ ಧುಪಾಕ್ ಪಾಜೆ ಹೊಲ್ಲಿ ಬರ್ಯಾ ವಾಸೆಚಿ ತೆಲಾ.

7 ಮೊಟ್ಟ್ಯಾ ಯಾಜಕಾಚ್ಯಾ ಕವ್ಚಿಕ್ ಪಾಜೆ ಹೊಲ್ಲಿ ಗೊಮೆದಿಕ್ ರತ್ನಾ, ಅನಿ ಪದಕಾಚ್ಯಾ ಚಿಲಾತ್ ಕಾತ್ರುಚಿ ಹೊಲ್ಲಿ ಲೈ ನಮುನ್ಯಾಚಿ ರತ್ನಾ. 8 ಅನಿ ಮಿಯಾ ಲೊಕಾಂಚ್ಯಾ ಮದ್ದಿ ವಸ್ತಿ ರಾವ್ಕ್ ಮಾಕಾ ಎಕ್ ಬಿಡಾರ್ ಭಾಂದ್ಸುಚೆ. 9 ಥೈತ್ಲಿ ಫುರಾ ಸಾಮಾನಾ ಅನಿ ತೆ ಬಿಡಾರ್ ಮಿಯಾ ತುಮ್ಕಾ ದಾಕ್ವುತಲ್ಯಾ ನಮುನಿಚ್ ತಯಾರ್ ಕರ್ಸುಚೆ.

10 ತಿಯಾ ಜಾಲಿಚ್ಯಾ ಝಾಡಾನ್ ಎಕ್ ಕರಾರಾಚಿ ಪೆಟಿ ತಯಾರ್ ಕರುಚೆ, ಸಾಡೆ ದೊನ್ ಹಾತ್ ಲಾಂಬ್, ಸಾಡೆ ಎಕ್ ಹಾತ್ ರುಂದ್ ಅನಿ ಸಾಡೆ ಎಕ್ ಹಾತ್ ಉಪ್ಪರ್ ರಾಂವ್ದಿತ್. 11 ತೆಜ್ಯಾ ಭಾಯ್ರ್ ಅನಿ ಭುತ್ತುರ್ ಚೊಕ್ಕ್ ಸೊನ್ಯಾಚ್ಯಾ ತಗ್ಡಾನಿ ಧಾಪುಚೆ ತೆಜ್ಯಾ ವರ್‍ತಿ ಸಗ್ಳ್ಯಾ ಭೊತ್ಯಾನಿ ಭಾಂದುಚೆ. 12 ಚಾರ್ ಸೊನ್ಯಾಚಿ ಕಾಕ್ನಾ ಲಾವ್ನ್, ತೆಜ್ಯಾ ಚಾರಿ ಮುಲ್ಲ್ಯಾಕ್ನಿಬಿ ಎಕೆಕ್ ಕಡೆ ದೊದೊನ್ ಕಾಕ್ನಾ ಥವ್ಚೆ. 13 ಅನಿ ತಿ ಪೆಟಿ ಉಕ್ಲುಕ್ ಜಾಲಿಚ್ಯಾ ಝಾಡಾಚೆ ದಾಂಡೆ ಕರ್ಸುನ್ ತೆಕಾ ಸೊನ್ಯಾಚಿ ತಗ್ಡಾ ನೆಸ್ವುನ್, 14 ಕರಾರಾಚ್ಯಾ ಪೆಟಿಚ್ಯಾ ದೊನಿ ಭಾಜುಕ್ನಿ ಕಾಕ್ನಾ ಮಿಳ್ವುಚೆ. 15 ತ್ಯಾ ದಾಂಡ್ಯಾಕ್ನಿ ಕರಾರಾಚ್ಯಾ ಪೆಟಿತ್ನಾ ಕಾಡಿನಸ್ತಾನಾ ತ್ಯಾತುರ್ನಿಚ್ ಥವ್ಚೆ. 16 ಅನಿ ತ್ಯಾ ಕರಾರಾಚ್ಯಾ ಪೆಟಿಚ್ಯಾ ಭುತ್ತುರ್ ಮಿಯಾ ತುಕಾ ದಿತಲೆ ಹುಕುಮಾಂಚೆ ಗುಂಡೆ ಥವ್ಚೆ. 17 ಹೆ ತವ್ಡೆಚ್ ನಸ್ತಾನಾ ಆಗ್ದಿ ನಿತಳ್ ಸೊನ್ಯಾನ್ ಎಕ್ ಕೃಪಾಸನ್ ಕರ್ಸುಚೆ, ತೆ ಸಾಡೆ ದೊನ್ ಹಾತ್ ಲಾಂಬ್ ಅನಿ ಸಾಡೆ ಎಕ್ ಹಾತ್ ರುಂದ್ ರಾವ್ಚೆ. 18 ಕೃಪಾಸನಾಚ್ಯಾ ದೊನಿ ತುದಿಯಾಕ್ನಿ ಎಕೆಕ್ ಕೆರುಬಿಯಾಂಚಿ ದೊನ್ ಸೊನ್ಯಾಚಿ ಆಕಾರಾ ನಕಾಸಿಚ್ಯಾ ಕಾಮಾನಿ ಕರ್ಸುಚೆ. 19 ಕೃಪಾಸನಾಚ್ಯಾ ಎಕೆಕ್ ತುದಿಕ್ಬಿ ಎಕೆಕ್ ಕೆರುಬಿ ಕರುನ್ ತೆಜ್ಯಾ ತುದಿಕ್ ಜೊಡ್ಸುಚೆ. 20 ತೆ ಕೆರುಬಿಯಾಂಚ್ಯಾ ವರ್‍ತಿ ಅಪ್ನಾಚೆ ಫಾಂಕುಟೆ ಪಗಳಲ್ಲ್ಯಾ ಗತಿನ್ ಅನಿ ಕೃಪಾಸನಾಕ್ ಅಪ್ನಾಚ್ಯಾ ಫಾಂಕುಟ್ಯಾನಿ ಧಾಪಲ್ಲ್ಯಾ ಗತಿನ್ ರಾವ್ಚೆ, ತೆಂಚಿ ತೊಂಡಾ ಇದ್ರಾ ಬದ್ರಾಕ್ ಹೊವ್ನ್ ಎಕಾಮೆಕಾಕ್ ಬಗುಲಾಗಲ್ಲ್ಯಾ ಸಾರ್ಕೆ ರಾವ್ಚೆ. 21 ತೆ ಕೃಪಾಸನ್ ಕರಾರಾಚ್ಯಾ ಪೆಟಿಚ್ಯಾ ವರ್‍ತಿ ಥವ್ಚೆ, ಮಿಯಾ ತುಕಾ ದಿತಲೆ ಹುಕುಮಾಂಚೆ ಗುಂಡೆ ತ್ಯಾ ಕರಾರಾಚ್ಯಾ ಪೆಟಿತ್ ಥವ್ಚೆ. 22 ಮಿಯಾ ತುಮ್ಕಾ ದಿಸ್ತಲೊ ತ್ಯಾಚ್ ಜಾಗ್ಯಾರ್, ಕೃಪಾಸನಾಚ್ಯಾ ವರ್‍ತಿ ಹುಕುಮಾಂಚೆ ಗುಂಡೆ ಥವಲ್ಲ್ಯಾ ಕರಾರಾಚ್ಯಾ ಪೆಟಿ ವೈಲ್ಯಾ ದೊನ್ ಕೆರುಬಿಯಾಂಚ್ಯಾ ಮದ್ದಿ ಮಿಯಾ ರಾವ್ನ್ ತುಜ್ಯಾ ವಾಂಗ್ಡಾ ಬೊಲ್ತಾ, ಅನಿ ಇಜ್ರಾಯೆಲ್‌ಕಾರಾಕ್ನಿ ದಿವ್ಚಿ ಹೊಲ್ಲಿ ಹುಕುಮಾ ಕಳ್ವುತಾ.

23 ಜಾಲಿಚ್ಯಾ ಝಾಡಾನ್ ಎಕ್ ಮಾಂಚೊ ಕರಸ್, ತೆ ದೊನ್ ಹಾತ್ ಲಾಂಬ್, ಎಕ್ ಹಾತ್ ರುಂದ್ ಅನಿ ಸಾಡೆ ಎಕ್ ಹಾತ್ ಉಪ್ಪರ್ ರಾಂವ್ದಿತ್. 24 ತೆಕಾ ನಿತಳ್ ಸೊನ್ಯಾಚೆ ತಗಾಡ್ ಲಪ್ಟುನ್ ಭೊತ್ಯಾನ್ ತೊರಾನ್ ಭಾಂದ್ಸುಚೆ. 25 ಮಾಂಚ್ಯಾಕ್ ಭೊತ್ಯಾನ್ ಅರ್ದ್ಯಾ ಹಾತಿ ತವ್ಡಿ ಲಾಂಬ್ ಆಡ್ವಿ ಪಟ್ಟಿ ಕರ್ಸುನ್ ತೆಕಾಬಿ ಸೊನ್ಯಾಚೆ ತೊರಾನ್ ಭಾಂದ್ಸುಚೆ. 26 ಚಾರ್ ಸೊನ್ಯಾಚಿ ಕಾಕ್ನಾ ಕರ್ಸುನ್, ಮಾಂಚ್ಯಾಚ್ಯಾ ಚಾರಿ ಪಾಂಯಾಕ್ನಿಬಿ ಘಾಲ್ಸುಚೆ. 27 ತಿ ಕಾಕ್ನಾ ಅಡ್ವಿ ಹೊತ್ತ್ಯಾ ಪಟ್ಟಿಕ್ ಲಾಗುನ್ ರಾವ್ಚಿ, ಅನಿ ತೊ ಮಾಂಚೊ ಉಕ್ಲುಕ್ ಸಾಟ್ನಿ ದಾಂಡೆ ಮಿಳ್ವುನ್ ಥವ್ಚೆ. 28 ತೆ ದಾಂಡೆ ಜಾಲಿಚ್ಯಾ ಝಾಡಾನ್ ಕರ್ಸುನ್ ತೆಂಕಾ ಸೊನ್ಯಾಚ್ಯಾ ತಗ್ಡಾನ್ ಲಪ್ಟುಚೆ ಅನಿ ಮಾಂಚೊ ಹೆಜ್ಯಾನುಚ್ ಉಕ್ಲುಚೆ. 29 ಮಾಚ್ಯಾ ವರ್‍ತಿ ಥವ್ತಲಿ ವಾಟ್ಕಿಯಾ, ಧುಪಾಚೆ ದಿವೆ, ಹುಜಿ ಅನಿ ಪಾನಿ ಭೆಟ್ವುಕ್ ಪಾಜೆ ಹೊಲ್ಲಿ ಆಯ್ದಾನಾ, ಹೆ ಸಗ್ಳೆ ನಿತಳ್ ಸೊನ್ಯಾನುಚ್ ಕರ್ಸುಚೆ. 30 ತೆಜ್ಯಾ ಜಗ್ಗೊಳ್ ಕನ್ನಾಬಿ ಭಾಕ್ರಿಯಾ ಮಾಜ್ಯಾ ಇದ್ರಾಕ್ ಮಾಂಚ್ಯಾ ವರ್‍ತಿ ಥವಲ್ಲಿ ರಾವ್ಚಿ.

31 ಅಗ್ದಿ ನಿತಳ್ ಸೊನ್ಯಾನ್ ಎಕ್ ದಿವ್ಯಾಂಚೆ ಝಾಡ್ ಕರ್ಸುಚೆ, ತೆಚೆ ಮುಳ್ ಅನಿ ಮದ್ಲೊ ಭಾಗ್ ನಕಾಸಿಚ್ಯಾ ಕಾಮಾನಿ ಕರ್ಸುಚೆ, ತೆ ದಿವ್ಯಾಂಚೆ ಝಾಡ್ ಅಖಂಡ್ ರಾವ್ಚೆ, ತೆ ತಾಸ್ತಾನಾ ಕರ್ತಾನಾ, ಪುಲ್ಲಾಂಚಿ ಅನಿ ಕಳ್ಯಾಂಚಿ ಚಿತ್ರಾ ಕಾಡುಚೆ. 32 ತ್ಯಾ ಝಾಡಾಕ್ ಎಕೆಕ್ ಭಾಜುಕ್ ತಿತಿನ್ ಟಾಂಕಿಯಾಂಚ್ಯಾ ಸಾರ್ಕೆ ಸಾ ಟಾಂಕಿಯಾ ರಾವ್ಚಿ. 33 ಹರ್ ಎಕ್ ಟಾಂಕಿಕ್ಬಿ ಬಾದಾಮಿ ಫುಲ್ಲಾಂಚ್ಯಾ ಸಾರ್ಕೆ ಹೊತ್ತಿ ತಿತಿನ್ ಫುಲ್ಲಾಂಚಿ ಸಿಂಗಾರಾ ರಾವ್ಚಿ, ಹರ್ ಎಕ್ ಸಿಂಗಾರಾಕ್ಬಿ ಎಕ್ ಫುಲ್ಲ್ ಅನಿ ಎಕ್ ಮೊಗ್ಗೊ ರಾವ್ಚೊ, ಸಾ ಟಾಂಕಿ ಯಾಕ್ನಿಬಿ ತಸೆಚ್ ಕರ್ಸುಚೆ. 34 ದಿವ್ಯಾಂಚ್ಯಾ ಝಾಡಾಚ್ಯಾ ಮದ್ಲ್ಯಾ ಭಾಗಾತ್ ಕಳೆ ಅನಿ ಫುಲ್ಲಾನಿ ಭರಲ್ಲೆ ಬಾದಾಮಿಚ್ಯಾ ಫುಲ್ಲಾಂಚ್ಯಾ ಸಾರ್ಕೆ ಚಾರ್ ಫುಲ್ಲಾಂಚೆ ಸಿಂಗಾರ್ ರಾವ್ಚೆ. 35 ದೊನ್ ಟಾಂಕಿಯಾಕ್ನಿ ಫಾಟೆ ಫುಟಲ್ಲ್ಯಾಕ್ಡೆ ಎಕೆಕ್ ಮೊಗ್ಗೊ ರಾವ್ಚೊ. 36 ಕಳೆ ಅನಿ ಫುಲ್ಲಾಂಚೆ ಝಾಡ್ ಫುರಾ ನಿತಳ್ ಸೊನ್ಯಾನಿ ಕರಸಲ್ಲೆ ರಾವ್ಚೆ. 37 ಅನಿ ತೆಕಾ ಸಾತ್ ದಿವೆ ಪೆಟ್ವುತಲಿ ಆಯ್ದಾನಾ ಕರ್ಸುಚೆ, ತ್ಯಾ ಆಯ್ದಾನಾತ್ನಿ ದಿವೆ ಪೆಟಲ್ಲ್ಯಾ ತನ್ನಾ ತೆಜೊ ಉಜ್ವೊಡ್ ತೆಂಚ್ಯಾ ಫಿಡ್ಲ್ಯಾ ಭಾಗಾತ್ ಹೊಳಾವ್ತಾ. 38 ದಿವ್ಯಾಂಚಿ ಕುಡಿ ಕಾಡ್ತಲಿ ಕತ್ರಿಯಾ ಅನಿ ಆಯ್ದಾನಾ ನಿತಳ್ ಸೊನ್ಯಾನ್ ಕರಸಲ್ಲಿ ರಾವ್ಚಿ. 39 ಫುರಾ ತಿಸಾರ್ ಪಾಂಚ್ ಕಿಲೊ ನಿತಳ್ ಸೊನೆ ವಾಪ್ರುನ್ ತೆ ದಿವ್ಯಾಂಚೆ ಝಾಡ್ ಅನಿ ತೆಚಿ ಸಾಮಾನಾ ತಯಾರ್ ಕರ್ಸುಚೆ. 40 ಮಿಯಾ ತುಕಾ ಡಂಗ್ಳಿತ್ ದಾಕ್ವಲ್ಲ್ಯಾ ಸಾರ್ಕೆಚ್ ಸಗ್ಳೆಬಿ ಹುಶ್ಯಾರ್ಕಿನ್ ಕರ್ಸುಚೆ.