ನಿರ್ಗಮನ್ 35

ಸಬ್ಬಾತಾಚಿ ನೆಮಾ

1 ಮೊಯ್ಜೆನ್ ಇಜ್ರಾಯೆಲಾಂಚಿ ಸಗ್ಳಿ ಲೊಕಾ ಎಕಾಕ್ಡೆ ಗೊಳಾ ಕರುನ್ "ಸರ್ವೆಸ್ಪರಾನ್ ತುಮ್ಕಾ ಹುಕುಮ್ ದಿಲ್ಲೆ ಕಾಯ್ ಮಟ್ಲ್ಯಾರ್, 2 ತುಮಿ ಸಾ ದಿಸ್ ಕಾಮ್ ಕರುಚೆ, ಖರೆ ಸಾತ್ವೊ ದಿಸ್ ನಿತಳ್ ಅನಿ ದೆವಾಕ್ ಮನುನ್ ಸಾಬ್ಬಾತಾಚೊ ದಿಸ್ ಹೊಲ್ಲ್ಯಾ ಸಾಟ್ನಿ, ಜೆ ಕೊನ್ ಹ್ಯಾ ದಿಸಿ ಕಾಮ್ ಕರ್ತಾ ತೊ ಮರ್ತಾ. 3 ಸಾಬ್ಬಾತಾ ದಿಸಿ ತುಮ್ಚಾ ಘರ್‍ಹಾತ್ ತುಮಿ ಆಗ್ ಬಿ ಪೆಟ್ವಿ ಸಾರ್ಕೆ ನಾ" ಮಟ್ಲ್ಯಾನ್.

ದೆವಾಕ್ ಬಗ್ತಲ್ಯಾ ಗುಡಿಕ್ ಪಾಜೆ ಹೊಲ್ಲಿ ಸಾಮಾನಾ

4 ಮೊಯ್ಜೆನ್ ಸಗ್ಳ್ಯಾ ಲೊಕಾಕ್ನಿ, ಸರ್ವೆಸ್ಪರಾನ್ ಅಶೆ ಹುಕುಮ್ ಕಾಯ್ ಮಟ್ಲ್ಯಾರ್, 5 ತುಮಿ ತುಮ್ಚ್ಯಾಕ್ನಾ ಕಾನಿಕ್ ಹಾನುನ್ ಸರ್ವೆಸ್ಪರಾಕ್ ಕಾನಿಕ್ ದಿವ್ಚೆ, ಫುರಾ ಮನಾನ್ ಕಾನಿಕ್ ದಿತಲ್ಯಾನ್ ತವ್ಡೆಚ್ ದಿವ್ಚೆ, ಸರ್ವೆಸ್ಪರಾಕ್ ದಿತಲಿ ಕಾನಿಕ್ ಕಾಯ್ ಮಟ್ಲ್ಯಾರ್, ಸೊನೆ, ಚಾಂದಿ, ಅನಿ ಪಿತ್ಳಿ, 6 ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚೊ ದೊರೊ, ಅನಿ ಶುದ್ದ್ ಕಪ್ಡೆ, ಶೆಳಿಯಾಂಚ್ಯಾ ಕೆಸಾಂಚೆ ಕಪ್ಡೆ, 7 ಹಾದಾಕ್ ಹಾನಲ್ಲಿ ತಾಂಬ್ಡ್ಯಾ ಬನ್ನಾಚ್ಯಾ ಬಕ್ರ್ಯಾಚಿ ಕೆಸಾ ಅನಿ ಸಮುಂದರಾಚ್ಯಾ ದಂಡೆ ವೈಲ್ಯಾ ಡುಕ್ರಾಚೆ ಚಮ್ಡೆ, ಅನಿ ಜಾಲಿ ಝಡಾಚೆ ನಾಕುಡ್. 8 ದಿವ್ಯಾಕ್ನಿ ಪಾಜೆ ಹೊಲ್ಲೆ ತೆಲ್, ಅಭಿಶೆಕಾಚೆ ತೆಲ್ ಅನಿ ಬರ್ಯಾ ವಾಸೆಚೆ ಧುಪ್ ಅನಿ ಪಾಜೆ ಹೊಲ್ಲಿ ಬರ್ಯಾ ವಾಸೆಚಿ ಪಾನಿಯಾ, 9 ತಸೆಚ್ ಮೊಟ್ಟ್ಯಾ ಯಾಜಕಾಂಚ್ಯಾ ಛಾತಿಚ್ಯಾ ಕವ್ಚಿಕ್ ಪಾಜೆ ಹೊಲ್ಲಿ ರತ್ನಾ ಅನಿ ಪಿಸ್ವಿಚ್ಯಾ ಪದ್ಕಾತ್ ಕೊರದ್ತಲಿ ರತ್ನಾ ಹೆ ಸಗ್ಳೆ ದಿವ್ಚೆ.

ಸರ್ವೆಸ್ಪರಾಚ್ಯಾ ಬಿಡಾರಾಚಿ ಲಿವಲ್ಲಿ ಸಾಮಾನಾ

10 ತುಮ್ಚ್ಯಾತ್ಲಿ ಬುದ್ವಂತ್ ಲೊಕಾ ಯೆವ್ನ್, ಸರ್ವೆಸ್ಪರಾನ್ ಹುಕುಮ್ ದಿಲ್ಲೆ ಹೆ ಸಗ್ಳೆ ಕರುಚೆ, 11 ತೆನಿ ಕರುಚೆ ಹೊಲ್ಲಿ ಕಾಮಾ ಖಲಿ ಮಟ್ಲ್ಯಾರ್, ದೆವಾಕ್ ಬಗ್ತಲೆ ಬಿಡಾರ್, ತೆಚ್ಯಾ ವೈಲಿ ಕಾಂಬ್ರಾನ್, ತೆಚಿ ಕೊಂಡಿಯಾ, ಚವ್ಕಟಾ, ಅಗ್ಳಿಯಾ, ಖಾಂಬೆ ಅನಿ ಪಾಯಾಚೆ ಗುಂಡೆ, 12 ಕರಾಂಚೆ ಗುಂಡೆ ಹೊತ್ತಿ ಪೆಟಿ, ತೆ ಉಕಲ್ತಲೆ ದಾಂಡೆ, ಕ್ರಪಾಸನ್ ಅನಿ ತೆ ಧಾಪ್ತಲೊ ಪರ್ದೊ. 13 ಮಾಚೊ, ತೆಚೆ ದಾಂಡೆ, ತೆಚಿ ಸಾಮಾನಾ ಅನಿ ತೆಜ್ಯಾ ವರ್‍ತಿ ಭೆಟ್ವುತಲಿ ಭಾಕ್ರಿಯಾ, 14 ದಿವ್ಯಾಚೊ ಖಾಂಬೊ, ತೆಚಿ ಸಾಮಾನಾ, ದಿವೆ, ದಿವ್ಯಾಕ್ನಿ ಪಾಜೆ ಹೊಲ್ಲೆ ತೆಲ್, 15 ಧುಪಾಚೆ ಕಟ್ಟೊ ಅನಿ ತೆಚೆ ದಾಂಡೆ, ಅಭಿಶೆಕಾಚೆ ತೆಲ್, ಬರ್ಯಾ ವಾಸೆಚ್ಯಾ ಧುಪಾಚೆ ತೆಲ್, ಬಿಡಾರಾಚ್ಯಾ ದಾರಾಚೊ ಪರ್ದೊ, 16 ಬಲಿಚೊ ಕಟ್ಟೊ, ತಾಂಬ್ಯಾಚಿ ಚಾಳನ್, ದಾಂಡೆ, ಸಾಮಾನಾ, ಮೊಟಿ ವಾಟ್ಲಿ ಅನಿ ತೆಚೊ ಕಟ್ಟೊ. 17 ದಾರಾಚೆ ಪರ್ದೆ, ಖಾಂಬೆ, ಪಾಯಾಚೆ ಗುಂಡೆ ಅನಿ ಭಾಯ್ಲ್ಯಾ ದಾರಾಚೆ ಪರ್ದೆ, 18 ಬಿಡಾರಾಚೆ ಖಾಂಬೆ, ದಾರಾಚೆ ಖಾಂಬೆ ಅನಿ ಹೆಂಚಿ ದೊರಿಯಾ, 19 ಪವಿತ್ರ ಜಾಗ್ಯಾಕ್ ಪಾಜೆ ಹೊಲ್ಲೆ ಸುಂದರ್ ಕಪ್ಡೆ ಮಟ್ಲ್ಯಾರ್, ಮೊಟೊ ಯಾಜಕ್ ಅರೊನ್ ಅನಿ ತೆಚ್ಯಾ ಲೆಕಾಕ್ನಿ ಪಾಜೆ ಹೊಲ್ಲೆ ಕಪ್ಡೆ ಹೆಚ್ ಮಟ್ಲ್ಯಾನ್.

ಲೊಕಾನಿ ಹಾನಲ್ಲಿ ಅಪ್ನಾಚಿ ಕಾನಿಕಾ

20 ಸಗ್ಳಿ ಇಜ್ರಾಯೆಲಾಚಿ ಲೊಕಾ ಮೊಯ್ಜೆಚ್ಯಾ ಇದ್ರಾಕ್ನಾ ಗೆಲ್ಲ್ಯಾ ಮಾನಾ, 21 ಕೊನಾಚ್ಯಾ ಮನಾಕ್ ಯೆತಾ, ಅನಿ ಕೊನಾಚೊ ಮನ್ ದಿವ್ಕ್ ತಯಾರ್ ಹೊತ್ತೊ, ಹೆನಿ ಸಗ್ಳ್ಯಾನಿ ಯೆವ್ನ್ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ಕಾಮಾಕ್ ಅನಿ ತೆಜ್ಯಾ ಸೆವಾಕ್ ಅನಿ ಯಾಜಕಾಂಚ್ಯಾ ಕಪ್ಡ್ಯಾಂಚ್ಯಾ ಸಾಟ್ನಿ ಸರ್ವೆಸ್ಪರಾಕ್ ಕಾನಿಕ್ ದಿಲ್ಯಾನಿ. 22 ಬರ್ಯಾ ಮನಾಚ್ಯಾ ಘವ್ಮಾನ್ಸಾನಿ ಅನಿ ಬಾಯ್ಕೊಮನ್ಸಾನಿ ಸರ್ವೆಸ್ಪರಾ ಸಾಟ್ನಿ ಹಾತಿತ್ಲಿ ಖಡ್ಗಾ, ಕಾನಾತ್ಲಿ ಫುಲ್ಲಾ, ಛಪ್ಪ್ಯಾಚಿ ಮುದ್ದಿ, ಗಳ್ಯಾತ್ಲೆ ಹಾರ್ ಅನಿ ಸಗ್ಳ್ಯಾ ನಮುನ್ಯಾಚಿ ಸೊನ್ಯಾಚಿ ವಸ್ತಾ ಹಾನುಕ್ ದಿಲ್ಯಾನಿ. 23 ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚೆ ದೊರೆ, ಶುದ್ದ್ ಕಪ್ಡೆ, ಶೆಳಿಚ್ಯಾ ಕೆಸಾಂಚೆ ಕಪ್ಡೆ, ತಾಂಬ್ಡ್ಯಾ ಬನ್ನಾಚೆ ಬಕ್ರ್ಯಾಚೆ ಹದಾ ಕರಲ್ಲಿ ಕೆಸಾ, ಸಮುಂದರಾಚ್ಯಾ ದಂಡೆ ವೈಲ್ಯಾ ಡುಕ್ರಾಚೆ ಚಮ್ಡೆ ಹೊತ್ಯಾ ಸಗ್ಳ್ಯಾನಿ ತೆ ಹಾನುನ್ ದಿಲ್ಯಾನಿ. 24 ಚಾಂದಿ ನಾತರ್ ತಾಂಬೆ ಹೊತ್ತ್ಯಾ ಸಗ್ಳ್ಯಾನಿ ತೆ ಹಾನುನ್ ಸರ್ವೆಸ್ವರಾಕ್ ದಿಲ್ಯಾನಿ, ಬಿಡಾರ್ ಭಾಂದುಕ್ ಪಾಜೆ ಹೊಲ್ಲ್ಯಾ ಜಾಲಿಚ್ಯಾ ಝಾಡಾಚಿ ನಾಕ್ಡಾ ಹೊತ್ತ್ಯಾನಿಬಿ ಹಾನುನ್ ದಿಲ್ಯಾನಿ. 25 ಸಗ್ಳ್ಯಾ ಬುದ್ವಂತ್ ಬಾಯ್ಕೊಮಾನ್ಸಾನಿ ಅಪ್ನಾಚ್ಯಾ ಸ್ವತ್ಯಾಚ್ಯಾ ಹಾತಾನಿ ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚೆ ದೊರೆ ತಯಾರ್ ಕರುನ್, ಹಾನುನ್ ದಿಲ್ಯಾನಿ. 26 ಅನಿ ಹುರಲ್ಲ್ಯಾ ಬುದ್ವಂತ್ ಬಾಯ್ಕಾಮನ್ಸಿಯಾನಿ ಶೆಳಿಯಾಂಚೆ ಕೆಸಾಂಚೆ ದೊರೆ ಕರುನ್ ಹಾನುನ್ ದಿಲ್ಯಾನಿ. 27 ಅಧಿಪತಿಯಾನಿ ಮೊಟ್ಟ್ಯಾ ಯಾಜಕಾಚ್ಯಾ ಛಾತಿಚ್ಯಾ ಕವ್ಚಿಕ್ ಪಾಜೆ ಹೊಲ್ಲಿ ಗೊಮೆದಿಕ್, ರತ್ನಾ, ಅನಿ ಛಾತಿಚ್ಯಾ ಪದ್ಕಾಕ್ ಕೊರ್ದುಕ್ ಪಾಜೆ ಹೊಲ್ಲಿ ರತ್ನಾ, 28 ದಿವ್ಯಾಕ್ ಪಾಜೆ ಹೊಲ್ಲೆ ತೆಲ್, ಅಭಿಶೆಕ್ ತೆಲಾಕ್ ಅನಿ ಬರ್ಯಾ ವಾಸೆಚೆ ಧುಪಾಕ್ ಪಾಜೆ ಹೊಲ್ಲಿ ಬರ್ಯಾ ವಾಸೆಚಿ ಪಾನಿಯಾ ಹಾನುನ್ ದಿಲ್ಯಾನಿ. 29 ಮೊಯ್ಜೆ ವೈನಾ ಸರ್ವೆಸ್ಪರಾನ್ ಹುಕುಮ್ ದಿಲ್ಲ್ಯಾ ಸಗ್ಳ್ಯಾ ಘವ್ಮಾನ್ಸಾ ಅನಿ ಬಾಯ್ಕೊಮನ್ಸಾ ತೆ ಪುರಾ ಮನಾನ್ ಹಾನುನ್ ದಿಲ್ಯಾನಿ.

ಸರ್ವೆಸ್ಪರಾಚಿ ಗುಡಿ ಭಾಂದುಕ್ ಕಾಮ್ ಕರ್ತಲಿ ಲೊಕಾ

30 ಅನಿ ಮೊಯ್ಜೆನ್ ಇಜ್ರಾಯೆಲ್ ಲೊಕಾಕ್ನಿ, ಸರ್ವೆಸ್ಪರಾನ್ ಜುದಾ ಕುಳಿಚ್ಯಾ ಹುರಾಚೊ ನಾತು ಉರಿಚೊ ಲೆಕ್ ಬೆಚೆಲಾಕ್ ತಯಾರ್ ಕರುನ್ ನೆಮ್ಲಾ. 31 ತೆಕಾ ಉಜ್ವೊಡಾಚೊ ಆತ್ಮೊ ದಿವ್ನ್ ಪಾಜೆ ಹೊಲ್ಲಿ ಬುದ್ದ್, ಶಿಕಾಪ್ ಅನಿ ಶಾನೆಪಾನ್ ಅನಿ ಸಗ್ಳ್ಯಾ ನಮುನಾಚಿ ಕೊರದ್ತಲಿ ಬುದ್ದ್ ದಿಲಾ, 32 ಸೊನೆ, ಚಾಂದಿ ಅನಿ ತಾಂಬ್ಯಾಚೆ ಕಾಮಾ ಕರುಕ್, 33 ರತ್ನಾ ಕೊರ್ದುಕ್ ಅನಿ ಝಾಡಾಂಚಿ ಚಮತ್ಕಾರಾಚಿ ಕಾಮಾ ಕರುಕ್, ಸಗ್ಳ್ಯಾ ನಮುನ್ಯಾಚಿ ಕಾಮಾ ಲಾವ್ಲಾ. 34 ಅನಿ ತೌವ್ಡೆಚ್ ನಸ್ತಾನಾ ದುಸ್ರ್ಯಾಕ್ನಿ ಶಿಕ್ವುಕ್ಬಿ ತೆಕಾ ಅನಿ ದಾನ್ ಕುಳಿಚ್ಯಾ ಅಹಿಸಾಮಾಕಾಚೊ ಲೆಕ್ ಒಹೊಲಿಬಾಮಾಕ್ಬಿ ವರು ದಿಲಾ. 35 ಗುಂಡೆ ಚಮತ್ಕಾರಾಚೆ ಕಾಮ್ ಕರ್‍ತಲೆ ಝಾಂಬ್ಳ್ಯಾ ರಕ್ತಾಚ್ಯಾ ಬನ್ನಾಚ್ಯಾ ದೊರ್ಯಾನಿ ಅನಿ ಶುದ್ದ್ ಕಪ್ಡ್ಯಾನಿ ಹಾತಿಚೆ ಕಾಮಾ ಕರ್‍ತಲೆ, ಸಿವ್ತಲೆ ಒಟ್ಟು ಸಗ್ಳ್ಯಾ ನಮುನಿಚಿ ಕಾಮಾ ಕರ್ಸುಕ್, ಅನಿ ಕರುಕ್ ಸರ್ವೆಸ್ಪರಾನ್ ತೆಂಕಾ ಬುದ್ದ್ ದಿಲಾ.