ನಿರ್ಗಮನ್ 28

ಯಾಜಕಾನ್ ನೆಸ್ತಲ್ಯಾ ಕಪ್ಡ್ಯಾಂಚ್ಯಾ ವಿಶಯಾತ್

1 ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, ತುಜೊ ಭಾವ್ ಆರೊನ್ ಅನಿ ತುಜಿ ಲೆಕಾ ನಾದಾಬ್, ಅಬಿಹು, ಎಲಿಯಾಜರ್ ಅನಿ ಇತಾಮಾರ್ ಹೆಂಕಾ ಇಜ್ರಾಯೆಲಾಂಚ್ಯಾಕ್ನಾ ತುಜ್ಯಾಕ್ಡೆ ಯೆವ್ಕ್ ಸಾಂಗ್, ತೆನಿ ಯಾಜಕಾ ಹೊವ್ನ್ ಮಾಜಿ ಸೆವಾ ಕರುಕ್ ಪಾಜೆ. 2 ತುಜೊ ಭಾವ್ ಆರೊನಾಕ್ ಬರೆ ಶಿಂಗಾರ್ ಅನಿ ಮಾನ್ ಗಾವಿ ಸಾರ್ಕೆ ಕಪ್ಡೆ ತಯಾರ್ ಕರ್ಸುಚೆ. 3 ಮಿಯಾ ಶಾನೆಪಾನಾಚೆ ವರು ದಿಲ್ಲ್ಯಾ ಮಾನ್ಸಾಂಚ್ಯಾ ವಾಂಗ್ಡಾ ಬೊಲುನ್, ತೆಂಚ್ಯಾ ಹಾತಾನಿ ಕಪ್ಡೆ ತಯಾರ್ ಕರ್ಸುಚೆ, ಆರೊನ್ ತೆ ಕಪ್ಡೆ ನೆಸುನ್ಗೆವ್ನ್ ಮಾಜಿ ಯಾಜಕ್ ಸೆವಾ ಕರುಕ್ ನೆಮಕ್ ಹೊತಾ. 4 ಕರ್ಸುಚೆ ಹೊಲ್ಲೆ ಕಪ್ಡೆ ಖಲೆ ಮಟ್ಲ್ಯಾರ್, ಪದಕಾಚಿ ಪಿಶ್ವಿ, ಮೊಟ್ಯಾಯಾಜಕಾಚಿ ಕವ್ಚಿಸಾರ್ಕಿ ವೈಲಿ ಅಂಗಿ, ಝಗೊ, ಪಾವ್ಡ್, ಕಂಬ್ರೆಚೊ ಪಟ್ಟೊ, ಅನಿ ತುಜೊ ಭಾವ್ ಆರೊನಾಚಿ ಲೆಕಾ ಯಾಜಕಾ ಹೊವ್ಕ್ ಸಾಟ್ನಿ ತೆಂಕಾಬಿ ಕಪ್ಡೆ ತಯಾರ್ ಕರ್ಸುಚೆ. 5 ಲೊಕಾನಿ ಕಾನಿಕ್ ದಿಲ್ಲೆ ಸೊನೆ, ಅನಿ ಝಾಂಬ್ಳ್ಯಾ ರಗ್ತಾಚ್ಯಾ ಬನ್ನಾಚ್ಯಾ ದೊರ್ಯಾಚೆ ಕಪ್ಡೆ ತ್ಯಾ ಕಾಮಾಕ್ ವಾಪ್ರುಚೆ.

6 ಎಫೊದ್ ಮನ್ತಲ್ಯಾ ಮೊಟ್ಟ್ಯಾ ಯಾಜಕಾಚೆ ಕವ್ಚಿ ಪುಂಡಿಚ್ಯಾ ದೊರಿಚ್ಯಾ ಕಪ್ಡ್ಯಾನಿ ಕರ್ಸುನ್, ಸೊನ್ಯಾಚ್ಯಾ ದೊರ್ಯಾನ್ ಅನಿ ಝಾಂಬ್ಳ್ಯಾ ರಗ್ತಾಚ್ಯಾ ಬನ್ನಾಚ್ಯಾ ದೊರ್ಯಾನ್ ಹಾತಿಚೆ ಕಾಮ್ ಕರ್‍ತಲ್ಯಾಂಚ್ಯಾಕ್ನಾ ಶಿಂಗಾರ್ ಕರ್ಸುಚೆ. 7 ತ್ಯಾ ಕವ್ಚಿಚ್ಯಾ ಖಾಂಜ್ಯಾ ವರ್‍ತಿ ದೊನ್ ಪಟ್ಟಿಯಾ ರಾವ್ಚಿ, ಅನಿ ತೆಚಿ ದೊನಿ ತುದಿಯಾಬಿ ಜೊಡ್ಸುನ್ ರಾವ್ಚೆ. 8 ಕವ್ಚಿಚ್ಯಾ ವರ್‍ತಿ ಹೊತ್ತೆ ಕಾಮ್, ಕಂಬ್ರೆಚ್ಯಾ ಕವ್ಚಿಕ್ ಮಿಳುನ್ ರಾವ್ನ್, ತಸೆಚ್ ಪುಂಡಿಚ್ಯಾ ದೊರ್ಯಾಚ್ಯಾ ಕಪ್ಡ್ಯಾನಿ ಕರಲ್ಲೆ ಹೊವ್ನ್, ಸೊನ್ಯಾಚ್ಯಾ ದೊರ್ಯಾನ್ ಅನಿ ಝಾಂಬ್ಳ್ಯಾ ಬನ್ನಾಚ್ಯಾ ದೊರ್ಯಾನಿ ಶಿಂಗಾರ್ ಕರುನ್ ರಾವ್ಚೆ. 9 ಅನಿ ತಿಯಾ ದೊನ್ ಗುಂಡೆ ಘೆವ್ನ್, ತೆಜ್ಯಾ ವರ್‍ತಿ ಇಜ್ರಾಯೆಲಾಂಚ್ಯಾ ಕುಳಿಯಾಂಚಿ ನಾವಾ ಲಿವ್ಸುಚೆ. 10 ಎಕ್ ಗುಂಡ್ಯಾವರ್‍ತಿ ಸಾ ನಾಂವಾ ಅನಿ ಎಕ್ ಗುಂಡ್ಯಾ ವರ್‍ತಿ ಸಾ ನಾವಾ ತೆಂಚ್ಯಾ ಉಪಾಜಲ್ಲ್ಯಾ ಇಸಬಾ ಸಾರ್ಕೆ ಲಿವ್ಚೆ. 11 ಛಪ್ಪ್ಯಾಚೊ ಗುಂಡೊ ಲಿವಲ್ಲ್ಯಾ ಸಾರ್ಕೆ ಹ್ಯಾ ದೊನಿಬಿ ಗುಂಡ್ಯಾ ವೈನಿ ಇಜ್ರಾಯೆಲಾಂಚ್ಯಾ ಕುಳಿಯಾಂಚಿ ನಾವಾ ಲಿವ್ಸುನ್, ಗುಂಡ್ಯಾಕ್ನಿ ಕುಂದನಾತ್ ಥವ್ಚೆ. 12 ತ್ಯಾ ಗುಂಡ್ಯಾಕ್ನಿ ಖಾಂಜ್ಯಾ ವೈಲ್ಯಾ ಕವ್ಚಿಚ್ಯಾ ಪಟ್ಟಿಯಾವೈನಿ ಭಾಂದುಚೆ, ಹೆ ಗುಂಡೆ ಇಜ್ರಾಯೆಲಾಂಚ್ಯಾ ಯಾದಿಚೆ ಗುಂಡೆ ಹೊವ್ನ್ ರ್‍ಹಾತ್ಯಾತ್, ಆರೊನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಜಾತಾನಾ, ಇಜ್ರಾಯೆಲಾಂಚ್ಯಾ ಕುಳಿಯಾಂಚಿ ನಾವಾ ತೆಜ್ಯಾ ಯಾದೆಕ್ ಹಾನು ಸಾಟ್ನಿ ಹೆ ಅಪ್ನಾಚ್ಯಾ ದೊನಿ ಖಾಂಜ್ಯಾ ವೈನಿ ನೆಸುನ್ಗೆವ್ನ್ ಜಾತಾ.

13 ತೆ ಗುಂಡೆ ಬರೆ ಕರುನ್ ಥವ್ಕ್ ಸೊನ್ಯಾಚಿ ಸರ್ಪಳಿ ಕರುನ್ ಪೆಟಿಯಾ ಕರ್ಸುಚೆ. 14 ತವ್ಡೆಚ್ ನಸ್ತಾನಾ ಎನ್ತಲ್ಯಾ ಕಾಮಾನಿ ದೊರಿಯಾಂಚ್ಯಾ ಸಾರ್ಕೆ ದೊನ್ ಶುದ್ದ್ ಸೊನ್ಯಾಚಿ ಸರ್ಪೊಳಿಯಾ ಕರುನ್ ಗುಂಡ್ಯಾಂಚ್ಯಾ ಪೆಟಿಯಾಕ್ನಿ ಸಿರ್ಕುಚೆ.

ಛಾತಿಚೊ ಕವ್ಚಿ

15 ಅನಿ ಛಾತಿಚೊ ಪದ್ಕಾಚೊ ಕವ್ಚಿ*28:15 ಛಾತಿಚ್ಯಾ ಪದ್ಕಾಚೊ ಕವ್ಚಿ ಮಟ್ಲ್ಯಾರ್, "ದೆವಾಚೊ ನಿರ್ದಾರ್" ಹಾತಿಚ್ಯಾ ಕಾಮಾನಿ ಕರ್ಸುಚೆ, ತೆ ಕವ್ಚಿಚ್ಯಾ ಸಾರ್ಕೆಚ್ ಸೊನ್ಯಾಚ್ಯಾ ದೊರ್ಯಾನ್ ಅನಿ ಝಾಂಬ್ಳ್ಯಾ ರಗ್ತಾಚ್ಯಾ ಬನ್ನಾಚ್ಯಾ ದೊರ್ಯಾನಿ ಕರ್ಸುಚೆ. 16 ತೆ ಎಕ್ ಗೆನ್ ಲಾಂಬಿ ಅನಿ ಎಕ್ ಗೆನ್ ರುಂದ್ ಅನಿ ದೊನ್ ಪರ್ದ್ಯಾನಿ ಚವ್ಕ್ ಆಕಾರಾಚೆ ರಾವ್ಚೆ. 17 ತೆಜ್ಯಾ ಫಿಡ್ಲ್ಯಾ ಭಾಗಾತ್ ಚಾರ್ ಸಾಲಾನಿ ಜವೆಚ್ಯಾ ಗುಂಡ್ಯಾನಿ ರತ್ನಾ ಕರ್ಸುಚೆ, ಅನಿ ಪೈಲೆಚ್ಯಾ ಸಾಲಾತ್, ಮಾನಿಕ್ಯ, ಪುಶ್ಪರಾಗ್, ಸ್ಪಟಿಕ್, 18 ದೊನ್ವೆಚ್ಯಾ ಸಾಲಾತ್ ಪಚ್ಚೆ, ಇಂದ್ರನಿಳ್, ವಜ್ರ, 19 ತಿನ್ವೆಚ್ಯಾ ಸಾಲಾತ್, ಸುವರ್ನ್ ರತ್ನ್, ಸುರ್ಯಕಾಂತ್, ಪದ್ಮ್ ರಾಗ್, 20 ಚಾರ್ವೆಚ್ಯಾ ಸಾಲಾತ್, ಪಿತರತ್ನ, ಬೆರುಲ್ಲ, ವೈಡುರ್ಯ, ಸೊನ್ಯಾಚ್ಯಾ ಜವೆಚ್ಯಾ ಗುಂಡ್ಯಾತ್ನಿ ಮಿಳ್ವುಚೆ. 21 ಇಜ್ರಾಯೆಲಾಂಚ್ಯಾ ಕುಳಿಯಾಂಚ್ಯಾ ಅಂಕ್ಯಾಕ್ ಸಮಾ ಹೊಯ್ಸಾರ್ಕೆ ಬಾರಾ ಗುಂಡೆ ರಾವ್ಚೆ, ಮುದ್ರಾ ರತ್ನಾತ್ ಕೊರದಲ್ಲೆ ಸಾರ್ಕೆ ಹರ್ ಎಕ್ ಗುಂಡ್ಯಾ ವರ್‍ತಿ ಎಕೆಕ್ ಕುಳಿಚೆ ನಾವ್ ಕೊರ್ದುಚೆ.

22 ತವ್ಡೆಚ್ ನಸ್ತಾನಾ, ತ್ಯಾ ಪದಕಾಚ್ಯಾ ವರ್‍ತಿ ದೊರಿಯಾಂಚ್ಯಾ ಸಾರ್ಕೆ ನಿತಳ್ ಸೊನ್ಯಾನ್ ಎನ್ತಲ್ಯಾ ಕಾಮಾನ್ ಸರ್ಪೊಳಿಯಾ ಕರ್ಸುಚೆ. 23 ದೊನ್ ಸೊನ್ಯಾಚಿ ಮುದ್ದಿಯಾ ಕರ್ಸುನ್ ಪದಕಾಚ್ಯಾ ದೊನಿ ಮುಲ್ಲ್ಯಾಕ್ನಿ ಲಾವ್ಚೆ. 24 ಅನಿ ತಿ ದೊನಿ ಸರ್ಪೊಳಿಯಾ ಪದಕಾಚ್ಯಾ ಮುಲ್ಲ್ಯಾತ್ಲ್ಯಾ ಮುದ್ದಿಯಾಕ್ನಿ ಸಿರ್ಕುಚೆ. 25 ತ್ಯಾ ಸರ್ಪೊಳಿಯಾಂಚ್ಯಾ ತುದಿಕ್ನಿ ಕವ್ಚಿಚ್ಯಾ ಭುಜೆಚ್ಯಾ ಪಟ್ಟಿಯಾವೈನಿ ಹೊತ್ತ್ಯಾ ದೊನಿ ಜವೆಂಚ್ಯಾ ಫಿಡ್ಲ್ಯಾ ಭಾಗಾತ್ ಸಿರ್ಕುಚೆ. 26 ತವ್ಡೆಚ್ ನಸ್ತಾನಾ ದೊನ್ ಸೊನ್ಯಾಚಿ ಮುದ್ದಿಯಾ ಕರ್ಸುನ್ ಪದಕಾಚ್ಯಾ ಭುತ್ತರ್ಲ್ಯಾ ಮುಲ್ಲ್ಯಾತ್ ಕವ್ಚಿಚ್ಯಾ ಜಗ್ಗೊಳುಚ್ ಥವ್ಚೆ. 27 ಅನಿ ದೊನ್ ಸೊನ್ಯಾಚಿ ಮುದ್ದಿಯಾ ಕರ್ಸುನ್ ಕವ್ಚಿಚ್ಯಾ ದೊನಿ ಭುಜಾಂಚ್ಯಾ ಪಟ್ಟಿಯಾಂಚ್ಯಾ ಖಾಲ್ತಿ, ಅನಿ ಕವ್ಚಿ ಜೊಡಸಲ್ಲ್ಯಾ ಜಾಗ್ಯಾಚ್ಯಾ ಜಗ್ಗೊಳ್, ಅನಿ ಕಂಬ್ರೆಚ್ಯಾ ಪಟ್ಟ್ಯಾಚ್ಯಾ ವರ್‍ತಿ ಥವ್ಚೆ. 28 ಪದಕ್ ಕಂಬ್ರೆಚ್ಯಾ ಪಟ್ಟ್ಯಾಚ್ಯಾ ವರ್‍ತಿ ಬಿಗುಹೊವ್ನ್ ರಾಯ್ಸಾರ್ಕೆ ಅನಿ ಕವ್ಚಿಕ್ನಾ ಸುಟುನ್ ಪಡಿನಾ ಸಾರ್ಕೆ ತೆಚಿ ಮುದ್ದಿಯಾ ಕವ್ಚಿಚ್ಯಾ ಮುದ್ದಿಯಾಕ್ನಿ ನಿಳ್ಯಾ ದೊರ್ಯಾನಿ ಭಾಂದುಚೆ.

29 ದೆವಾಚ್ಯಾ ನಿರ್ದಾರಾಚ್ಯಾ ಪದಕಾ ವರ್‍ತಿ ಇಜ್ರಾಯೆಲಾಂಚ್ಯಾ ಕುಳಿಯಾಂಚಿ ನಾವಾ ಲಿವಲ್ಲಿ ಹೊತ್ತ್ಯಾ ಸಾಟ್ನಿ, ಆರೊನ್ ಸದ್ದಾ ನಿತಳ್ ಜಾಗ್ಯಾ ವರ್‍ತಿ ಜಾತಾನಾ, ಸರ್ವೆಸ್ಪರಾಚ್ಯಾ ಯಾದೆಕ್ ಹಾನುಸಾಟ್ನಿ ತಿ ನಾವಾ ಅಪ್ನಾಚ್ಯಾ ಛಾತಿ ವರ್‍ತಿ ಥವ್ನ್ ಘೆವ್ನ್ ಜಾವ್ಚೊ. 30 ದೆವಾಚೊ ನಿರ್ದಾರ್ ಕಳ್ವುತಲಿ ಉರಿಮ್, ತುಮ್ಮಿಮ್ ಮನ್ತಲಿ ವಸ್ತಾ ತ್ಯಾ ಛಾತಿಚ್ಯಾ ಕವ್ಚಿತ್ ಥವ್ಚೆ, ಆರೊನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಜಾತಾನಾ ತೆ ತೆಜ್ಯಾ ಛಾತಿ ವರ್‍ತಿ ರ್‍ಹಾತಾ, ಇಜ್ರಾಯೆಲ್ ಲೊಕಾನಿ ಕರುಚೆ ಹೊಲ್ಲ್ಯಾ ಕಾಮಾಚೆ ದೆವಾಚೊ ನಿರ್ದಾರ್ ಆರೊನಾನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಕನ್ನಾಬಿ ನೆಸುನ್ಗೆವ್ನ್ ರಾವ್ಚೆ.

ಯಾಜಕಾಂಚೆ ಹುರಲ್ಲೆ ಕಪ್ಡೆ

31 ತಿಯಾ ಮೊಟ್ಟ್ಯಾ ಯಾಜಕಾನ್ ಕವ್ಚಿಚ್ಯಾ ವಾಂಗ್ಡಾ ನೆಸುಚಿ ಹೊಲ್ಲಿ ವೈಲಿ ಅಂಗಿ ಝಾಂಬ್ಳ್ಯಾ ಬನ್ನಾಚ್ಯಾ ಕಪ್ಡ್ಯಾನುಚ್ ಕರ್ಸುಚೆ. 32 ತೆಕಾ ಟಕ್ಲೆ ಗುಸ್ವುಕ್ ಜಾಗೊ ರಾವ್ಚೊ, ತೆ ಪಿಂಜುನ್ ಜಾಯ್ನಾ ಸಾರ್ಕೆ ಯುದ್ದಾಚ್ಯಾ ಕವ್ಚಿಚ್ಯಾ ಗತಿನ್ ತ್ಯಾ ಜಾಗ್ಯಾಚ್ಯಾ ಭೊತ್ಯಾನ್ ಹಾತಿಚಿ ಸಿವನ್ ಘಾಲ್ಸುಚೆ. 33 ವೈಲ್ಯಾ ಅಂಗಿಚ್ಯಾ ಭೊತ್ಯಾನ್ ಝಾಂಬ್ಳ್ಯಾ ರಗ್ತಾಚ್ಯಾ ಬನ್ನಾಚ್ಯಾ ದೊರ್ಯಾನಿ ದಾಳಿಂಬ್ರ್ ಹನ್ನಾ ಸಾರ್ಕೆ ಚಂಡಾ ಅನಿ ತೆಜ್ಯಾ ಮದ್ದಿ ಗೆಜ್ಜಿ ಲಾವ್ಚೆ. 34 ಎಕಾಚ್ಯಾ ಮಾನಾ ಎಕ್ ದಾಳಿಂಬ್ರಾಚಿ ಚಂಡಾ ಅನಿ ಸೊನ್ಯಾಚೆ ಗೆಜ್ಜಿ ತ್ಯಾ ವೈಲ್ಯಾ ಅಂಗಿಚ್ಯಾ ಭೊತ್ಯಾನಿ ರಾವ್ಚೆ. 35 ಆರೊನಾನ್ ಸೆವಾ ಕರ್ತಾನಾ ತಿ ಅಂಗಿ ನೆಸುನ್ಗೆವ್ಚೆ, ತೊ ಸರ್ವೆಸ್ಪರಾಚ್ಯಾ ಇದ್ರಾಕ್ ಪವಿತ್ರ್ ಜಾಗ್ಯಾಕ್ ಜಾತಾನಾ ಅನಿ ಯೆತಾನಾ ಮರಿನಾ ಸಾರ್ಕೆ ತ್ಯಾ ಗೆಜ್ಜ್ಯಾಂಚೊ ನಾದ್ ಆಯ್ಕೊ ಯೆವ್ಚೊ. 36 ನಿತಳ್ ಸೊನ್ಯಾನ್ ಪಟ್ಟೊ ಕರ್ಸುನ್ ಮುದ್ರೆ ಕೊರದಲ್ಲ್ಯಾ ಸಾರ್ಕೆ ತೆಜ್ಯಾ ವರ್‍ತಿ ಸರ್ವೆಸ್ಪರಾಚ್ಯಾ ವಾಟ್ಯಾಚೆ ಮನುನ್ ಕೊರ್ದುಚೆ. 37 ತೆ ಪಾವ್ಡಾಕ್ ಭಾಂದುಸಾಟ್ನಿ ತೆಕಾ ಝಾಂಬ್ಳ್ಯಾ ಬನ್ನಾಚ್ಯಾ ದೊರ್ಯಾನ್ ಭಾಂದುಚೆ, ಅನಿ ತೆ ಪಾವ್ಡಾಚ್ಯಾ ಫಿಡ್ಲ್ಯಾ ಭಾಜುಕ್ ರಾವ್ಚೆ. 38 ಇಜ್ರಾಯೆಲ್ ಲೊಕಾನಿ ಕಾನಿಕ್ ದಿಲ್ಲ್ಯಾ ದೆವಾಚ್ಯಾ ಸಗ್ಳ್ಯಾ ಸಾಮಾನಾತ್ನಿ ಕಾಯ್ತರಿಬಿ ದೊಶ್ ರಾಲ್ಯಾರ್, ಆರೊನಾನ್ ತೊ ಪಟ್ಟೊ ಅಪ್ನಾಚ್ಯಾ ಕಪ್ಳಾ ವರ್‍ತಿ ನೆಸುನ್ಗೆವ್ನ್ ದೊಶ್ ಅಪ್ನಿ ವಯ್ಸುನ್ ಘೆಟಲ್ಲ್ಯಾ ಸಾಟ್ನಿ ತೆಂಕಾ ಸರ್ವೆಸ್ಪರಾಚ್ಯಾ ಇದ್ರಾಕ್ ಸ್ವಿಕಾರ್ ಕರುನ್ ಹೊತಾ. 39 ಆರೊನಾನ್ ನೆಸುಚಿ ಹೊಲ್ಲಿ ಅಂಗಿ ದೊರ್ಯಾನಿ ಕರ್ಸುಚೆ, ಅನಿ ತೆಜೊ ಪಾವ್ಡೊ ದೊರ್ಯಾನಿ ಕರ್ಸುಚೆ, ತೆಜೊ ಕಂಬ್ರೆಚೊ ಪಟ್ಟೊ ಕಸುತಿಚ್ಯಾ ಕಾಮಾನಿ ಕರ್ಸುಚೆ.

40 ಆರೊನಾಚ್ಯಾ ಲೆಕಾಕ್ನಿ ಸಮಾ ಮಾನ್ ಅನಿ ಶಿಂಗಾರ್ ಹೊಯ್ಸಾರ್ಕೆ ತೆಂಕಾ ಝಗೆ ಅನಿ ಪಾವ್ಡೆ ಕರ್ಸುಚೆ. 41 ತೆ ಕಪ್ಡೆ ತುಜೊ ಭಾವ್ ಆರೊನ್ ಅನಿ ತೆಜ್ಯಾ ಲೆಕಾಕ್ನಿ ನೆಸ್ವುನ್ ಅಭಿಶೆಕ್ ಕರ್ಸುನ್ ಕಾಮಾಕ್ ನೆಮ್ಸುಚೆ, ತನ್ನಾ ತೆನಿ ಮಾಜಿ ಯಾಜಕಾ ಹೊತಾತ್. 42 ತವ್ಡೆಚ್ ನಸ್ತಾನಾ ತೆಂಚೆ ನಾಗ್ಡೆ ಪಾನ್ ಧಾಪುಕ್ ಸಾಟ್ನಿ ಕಂಬ್ರೆಕ್ನಾ ಜಾಂಗೆ ಪತರ್ ದೊರ್ಯಾಚಿ ಚೆಡ್ಡಿಯಾ ಕರ್ಸುಚೆ. 43 ಆರೊನಾನ್ ಅನಿ ತೆಜ್ಯಾ ಲೆಕಾನಿ ದೆವಾಕ್ ಬಗ್ತಲ್ಯಾ ಬಿಡಾರಾತ್ ಜಾತಾನಾ ಅನಿ ಪವಿತ್ರ್ ಜಾಗ್ಯಾರ್ ಸೆವಾ ಕರುಕ್ ಜಾತಾನಾಬಿ ಹೆ ಕಪ್ಡೆ ನೆಸುನ್ ಘೆವ್ಚೆ, ನಾಹೊಲ್ಯಾರ್ ಪಾಪಾ ಸಾಟ್ನಿ ಮರುನ್ ಜಾತಿಲ್, ಹ್ಯೊ ನೆಮ್ ತೆಕಾ ಅನಿ ತೆಜ್ಯಾ ಪಿಳ್ಗಿಚ್ಯಾಕ್ನಿ ಶಾಶ್ವತಾಚೊ ಹೊವ್ನ್ ಹಾಯ್.