ನಿರ್ಗಮನ್ 14

ತಾಂಬ್ಡೆ ಸಮುಂದರ್ ದಾಟ್ತಲೆ

1 ದೆವಾನ್ ಮೊಯ್ಜೆ ವಾಂಗ್ಡಾ ಬೊಲುನ್, 2 ಇಜ್ರಾಯೆಲ್ ಲೊಕಾ ಪಿಹಹಿರೊತಿಕ್ ಇದ್ರಾಕ್ ಹೊವ್ನ್ ಮಿಗ್ದೊಲಿಕ್ ಅನಿ ಸಮುಂದರಾಕ್ ಮದ್ದಿ ಬಾಳ್ಚೆಪೊನಿಚ್ಯಾ ಇದ್ರಾಕ್ ವಸ್ತಿ ರಾವ್ಚೆ ಮನುನ್ ತೆಂಕಾ ಸಾಂಗ್, ತೆಕಾ ಇದ್ರಾಕ್ ತುಮಿ ಸಮುಂದರಾಚ್ಯಾ ದಂಡೆರ್ ವಸ್ತಿ ರಾವ್ಚೆ. 3 ಫಾರೊವ್ ರಾಜಾ ಇಜ್ರಾಯೆಲ್ ಲೊಕಾಂಚ್ಯಾ ವಿಶಯಾತ್ ತೆನಿ ದೆಸಾತ್ ಗಾವ್ನ್ ಪಡ್ಲೆ, ಡಂಗ್ಳಿನ್ ತೆಂಕಾ ಬುತ್ತುರ್ ಧಾಪುನ್ ಥವ್ಲಿನ್ ಮನುನ್ ಸಾಂಗ್ತಾ. 4 ಎವ್ಡೆಚ್ ನಸ್ತಾನಾ, ಫಾರೊವಾನ್ ತೆಂಕಾ ಫಾಟ್ ಲಾಗಿ ಸಾರ್ಕೆ ಮಿಯಾ ತೆಜೊ ಮನ್ ಮಂಡ್ ಕರ್ತಾ; ಫಾರೊವಾಕ್ನಾ ಅನಿ ತೆಚ್ಯಾ ಸಗ್ಳ್ಯಾ ಸೈನ್ಯಾಕ್ನಾ ಮಿಯಾ ಮಾಕಾ ಹೊಗ್ಳಾಪ್ ಘೆತಾ; ತನ್ನಾ ಮಿಯಾಚ್ ದೆವ್ ಮನುನ್ ಇಜಿಪ್ತಾಚಿ ಲೊಕಾ ಕಳ್ವುನ್ ಘೆತಾತ್ ಮನುನ್ ಸಾಂಗ್ಲ್ಯಾನ್, ತೆನಿಬಿ ತಸೆಚ್ ಕರ್ಲ್ಯಾನಿ. 5 ಇಜ್ರಾಯೆಲ್ ಲೊಕಾ ಪಳುನ್ ಗೆಲಿ ಮನುನ್ ಇಜಿಪ್ತಾಚ್ಯಾ ರಾಜಾಕ್ ಕಳ್ವುನ್ ಯೆಲೆ; ತನ್ನಾ ಫಾರೊವಾಚೊ ಅನಿ ತೆಚ್ಯಾ ಅಧಿಕಾರಿಯಾಂಚೊ ಮನ್ ಲೊಕಾಕ್ನಿ ವಿರೊಧ್ ಹೊವ್ನ್ ಫಿರ್ಲೊ; ತೆನಿ, "ಇಜ್ರಾಯೆಲ್ ಲೊಕಾಕ್ನಿ ಅಪ್ನಿ ಸೆವಾ ಕರ್‍ತಲೆ ಸೊಡುನ್ ಜಾವ್ಕ್ ಕಶ್ಯಾಕ್ ಸೊಡ್ಲಾಂವ್?" ಮಟ್ಲ್ಯಾನಿ. 6 ತನ್ನಾ ತೊ ಅಪ್ಲಿ ಘೊಡ್ಕಿಯಾಂಚಿ ಗಾಡಿ ತಯಾರ್ ಕರುನ್ ಘೆವ್ನ್, ಅಪ್ನಾಚ್ಯಾ ಸೈನಿಕಾಂಚ್ಯಾ ವಾಂಗ್ಡಾ ಜಾವ್ಕ್ ಲಾಲೊ. 7 ಯೆವ್ಡೆಚ್ ನಸ್ತಾನಾ, ತೆನಿ ಸಾ ಸೆಂಬರ್ ಘೊಡ್ಕಿಯಾಂಚಿ ಗಾಡಿಯಾ ಎಚುನ್ ಘೆಟ್ಲ್ಯಾನಿ, ಇಜಿಪ್ತಾಂಚಿ ಘೊಡ್ಕಿಯಾಂಚಿ ಗಾಡಿಯಾ ಅನಿ ತೆಂಕಾ ಚಾಲ್ವುತಲ್ಯಾಕ್ನಿ ಘೆವ್ನ್ ಗೆಲ್ಯಾನ್, ತೆನಿ ಸಗ್ಳಿ ಅಧಿಕಾರಿಯಾ ಹೊಲ್ಲೆ. 8 ದೆವಾನ್ ಇಜಿಪ್ತಾಚೊ ರಾಜಾ ಫಾರೊವಾಚೊ ಮನ್ ಮಂಡ್ ಕರಲ್ಲ್ಯಾ ಸಾಟ್ನಿ, ಅನಿ ತೆನಿ ಜಿಕುನ್ ಜಾವ್ಕ್ ಲಾಗಲ್ಲ್ಯಾ ಇಜ್ರಾಯೆಲ್ ಲೊಕಾಕ್ನಿ ಫಾಟ್ ಲಾಗ್ಲ್ಯಾನ್. 9 ಇಜಿಪ್ತಾಚ್ಯಾ ಫಾರೊವಾಚಿ ಸಗ್ಳಿ ಘೊಡ್ಕಿಯಾ, ಘೊಡ್ಕಿಯಾಂಚಿ ಗಾಡಿಯಾ ಅನಿ ಚಾಲ್ವುತಲೆ ತೆಚೊ ಸೈನ್ ಪಿಹರೊತಿಚ್ಯಾ ಜಗ್ಗೊಳ್ ಹೊತ್ತ್ಯಾ ಬಾಳ್ಚೆಪೊನಿಚ್ಯಾ ಇದ್ರಾಕ್ ಲೊಕಾನಿ ತೆನಿ ಸಮುಂದರಾಚ್ಯಾ ದಂಡೆಕ್ ವಸ್ತಿ ಹೊತ್ತ್ಯಾಚ್ಯಾ ಜಗ್ಗೊಳ್ ಕರ್ಲ್ಯಾನಿ. 10 ಫಾರೊವ್ ಜಗ್ಗೊಳ್ ಯೆಯ್ತ್ ರ್‍ಹಾತಾನಾ, ಅಬಕ್! ಇಜ್ರಾಯೆಲ್ ಲೊಕಾನಿ ನದರ್ ವರ್‍ತಿ ಕರುನ್ ಫಾಟ್ನಾ ಯೆವ್ ಲಾಗಲ್ಲ್ಯಾ ಇಜಿಪ್ತ್ ಕಾರಾಕ್ನಿ ಬಗುನ್ ಲೈ ಬ್ಹಿಂವ್ನ್ ಮಜತ್ತಿಕ್ ಸಾಟ್ನಿ ದೆವಾಕ್ಡೆ ರಡುನ್ ಮಾಗ್ನಿ ಕರ್ಲ್ಯಾನಿ. 11 ತೆನಿ ಮೊಯ್ಜೆಕ್ ಇಜಿಪ್ತಾತ್ ಮಸನ್ಗಿಯಾ ನಸಲ್ಲ್ಯಾ ಸಾಟ್ನಿ ಅಮ್ಕಾ ಡಂಗ್ಳಿತ್ ಮರಿ ಸಾರ್ಕೆ ಬಲ್ವುನ್ ಹಾನ್ಲೈ ಕಾಯ್? ತಿಯಾ ಅಸೆ ಕರುನ್ ಕಶ್ಯಾಕ್ ಅಮ್ಕಾ ಇಜಿಪ್ತಾಕ್ನಾ ಬಲ್ವುನ್ ಘೆವ್ನ್ ಯೆಲೈ? 12 ಅಮಿ ಇಜಿಪ್ತ್ ದೆಸಾತ್ ರ್‍ಹಾತಾನಾಚ್ ಥೈ ಅಮ್ಚ್ಯಾ ಖಬ್ರಿಕ್ ಯೆವ್ಕ್ ನಕ್ಕೊ; ಅಮಿ ಇಜಿಪ್ತಾಚ್ಯಾ ಲೊಕಾಂಚಿ ಸೆವಾ ಕರ್ತಾಂವ್ ಮನಲ್ಲ್ಯಾಂವ್, ಅಮಿ ಡಂಗ್ಳಿತ್ ಮರ್ತಲ್ಯಾಕಿಂತಾ ಇಜಿಪ್ತ್ ಕಾರಾಕ್ನಿ ಸೆವಾ ಕರ್‍ತಲೆಚ್ ಬರೆ ಮನಲ್ಲ್ಯಾಂವ್, ಮನುನ್ ಸಾಂಗ್ಲ್ಯಾನಿ. 13 ಖರೆ ಮೊಯ್ಜೆನ್ ಲೊಕಾಕ್ನಿ, ತುಮಿ ಭಿಂವ್ ನಕಾಸಿ; ಸರ್ವೆಸ್ಪರ್ ತುಮ್ಕಾ ರಾಕ್ತಲೆ ಬಗಾ, ತುಮಿ ಅತ್ತಾ ಬಗ್ತಲ್ಯಾ ಇಜಿಪ್ತಾಕ್ನಿ ಅನಿ ಕನ್ನಾ ಕನ್ನಾ ಬಗಿನ್ಯಾಸಿ. 14 ದೆವ್ ತುಮ್ಚ್ಯಾ ಸಾಟ್ನಿ ಝಗ್ಡೊ ಕರ್ತಾ; ಖರೆ ತುಮಿ ಗಪ್ ರಾವಾ ಮಟ್ಲ್ಯಾನ್. 15 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, ತಿಯಾ ಮಾಜೆಕ್ಡೆ ಕಶ್ಯಾಕ್ ರಡುನ್ ಮಾಗ್ನಿ ಕರ್‍ತೆ? ಇಜ್ರಾಯೆಲ್ ಲೊಕಾಕ್ನಿ ಫಿಡೆ ಜಾವ್ಚೆ ಮನುನ್ ಸಾಂಗ್. 16 ತಿಯಾ ತುಜೊ ದಾಂಡೊ ಉಕ್ಲುನ್ ಸಮುಂದರಾಕ್ ವಾಟೆ ಕರ್, ತನ್ನಾ ಇಜ್ರಾಯೆಲ್ ಲೊಕಾ ಸಮುಂದ್ರಾಚ್ಯಾ ವಾಳ್ಕ್ಯಾ ಜಿಮ್ನಿ ವರ್‍ತಿ ಚಲುನ್ ಜಾತಾತ್. 17 ಅಬಕ್! ಮಿಯಾ ಇಜಿಪ್ತ್ ಕಾರಾಂಚೊ ಮನ ಮಂಡ್ ಕರ್ತಾ; ತೆನಿ ಹೆಂಕಾ ಫಾಟ್ ಲಾಗ್ತಾತ್, ಯೆವ್ಡೆ ನಸ್ತಾನಾ, ಫಾರೊವ್ ತೆಚೊ ಸಗ್ಳೊ ಸೈನ್ ಅನಿ ತೆಚಿ ಘೊಡ್ಕಿಯಾಂಚಿ ಗಾಡಿಯಾ ಅನಿ ಘೊಡ್ಕಿಯಾ ತೆಂಚಿ ಚಾಲ್ವುತಲಿ ಲೊಕಾ ತೆಂಚ್ಯಾ ಸಗ್ಳ್ಯಾಂಚ್ಯಾ ವೈನಾ ಮಿಯಾ ಹೊಗ್ಳಾಪ್ ಕರುನ್ ಘೆತಾ. 18 ಮಿಯಾ, ಫಾರೊವ್ ಅನಿ ತೆಜೊ ಘೊಡ್ಕಿಯಾಂಚೆ ಗಾಡಿಯಾ ಚಾಲ್ವುತಲೆ, ಅನಿ ಘೊಡ್ಕಿಯಾ ಹೆಂಚ್ಯಾ ಸಗ್ಳ್ಯಾಂಚ್ಯಾಕ್ನಾ ಹೊಗ್ಳಾಪ್ ಕರುನ್ ಘೆಟಲ್ಲ್ಯಾ ತನ್ನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ಇಜಿಪ್ತ್ ಕಾರಾಕ್ನಿ ಕಳ್ವುನ್ ಯೆತಾ, ಮಟ್ಲ್ಯಾನ್.

19 ತನ್ನಾ ಇಜ್ರಾಯೆಲ್ ಲೊಕಾಚ್ಯಾ ಫಿಡ್ನಾ ಜಾಯ್ತ್ ಹೊತ್ತ್ಯಾ ದೆವ್ ಧುತಾನ್ ಅಪ್ಲೊ ಜಾಗೊ ಸೊಡುನ್, ತೆಂಚ್ಯಾ ಪಾಟಿಕ್ಡೆ ಯೆಲ್ಯಾನ್, ತೆಂಚ್ಯಾ ಫಿಡೆ ಹೊತ್ತ್ಯಾ ಮಳ್ಬಾಚ್ಯಾ ಖಾಂಬ್ಯಾನ್ ಬಿ ಅಪ್ಲೊ ಜಾಗೊ ಸೊಡುನ್ ತೆಂಚ್ಯಾ ಫಾಟಿಕ್ಡೆ ಇಬೆ ರಾಲ್ಯಾನ್. 20 ತೆ ಇಜಿಪ್ತಾಚ್ಯಾ ಅನಿ ಇಜ್ರಾಯೆಲಾಂಚ್ಯಾ ಮದ್ದಿ ಯೆಲೆ, ತೆ ತೆಂಕಾ ಮೊಡ್ ಅನಿ ಕಾಳೊಕ್ ಹೊಲ್ಲ್ಯಾ ಸಾಟ್ನಿ, ಅನಿ ಇಜ್ರಾಯೆಲಾಕ್ನಿ ರಾಚ್ಚೆನ್ ಉಜ್ವೊಡ್ ದಿತಲೆ ಹೊಲ್ಲ್ಯಾ ಸಾಟ್ನಿ, ತ್ಯಾ ರಾತ್ತಿನ್ ಎಕ್ಲ್ಯಾಕ್ ಬಿ ಜಗ್ಗೊಳ್ ಯೆವ್ಕ್ ಹೊವ್ಕ್ ನಾ.

21 ತನ್ನಾ ಮೊಯ್ಜೆನ್, ಸಮುಂದ್ರಾಚ್ಯಾ ವರ್‍ತಿ ತೆಚೊ ಹಾತ್ ದಾಕ್ವುತಾನಾ, ದೆವಾನ್ ರಾತ್ತಿನ್ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮೊಟ್ಟ್ಯಾ ವಾರ್‍ಯಾನ್ ಸಮುಂದ್ರಾಕ್ ಪಾಟಿ ಜಾಯ್ ಸಾರ್ಕೆ ಕರುನ್, ತೊ ವಾರೊ ಫುರಾ ರ್‍ಹಾತ್ ಮಾರುನ್ ಸಮುಂದರಾತ್ ವಾಳ್ಕಿ ಜಿಮಿನ್ ಹೊಯ್ ಸಾರ್ಕೆ ಕರ್ಲ್ಯಾನ್, ತನ್ನಾ ಪಾನಿ ವಾಟೆ ಹೊಲೆ. 22 ಅಸೆ ಇಜ್ರಾಯೆಲ್ ಲೊಕಾನಿ ವಾಳ್ಕ್ಯಾ ಜಿಮ್ನಿ ವರ್‍ತಿ ಚಲುನ್ ಗೆಲ್ಯಾನಿ, ತೆಂಕಾ ಪಾನಿ ಉಜ್ವ್ಯಾ ಭಾಜುಕ್ ಅನಿ ಧಾವ್ಯಾ ಭಾಜುಕ್ ಭಿತ್ತಿ ಸಾರ್ಕೆ ಇಬೆ ಹೊತ್ತೆ. 23 ಇಜಿಪ್ತ್ ಕಾರಾನಿ ಪರೊಹಾಚ್ಯಾ ಸಗ್ಳ್ಯಾ ಘೊಡ್ಕಿಯಾನಿ ಅನಿ ಘೊಡ್ಕಿಯಾಂಚಿ ಗಾಡಿಯಾ ಚಾಲ್ವುತಲ್ಯಾನಿ ತೆಂಕಾ ಫಾಟ್ ಲಾಗುನ್, ತೆಂಚ್ಯಾ ಫಾಟ್ನಾ ಸಮುಂದ್ರಾಚ್ಯಾ ಮದ್ದಿ ಪಾವ್ಲ್ಯಾನಿ. 24 ದಿಸ್ ಉಜ್ವಾಡ್ತಲ್ಯಾ ಎಳಾರ್ ಸರ್ವೆಸ್ಪರಾನ್ ಆಗಿಚೊ ಖಾಂಬೊ ಅನಿ ಮೊಡಾಚೊ ಖಾಂಬೊ ಇಜಿಪ್ತಾಂಚ್ಯಾ ಸೈನ್ಯಾಕ್ಡೆ ದಾಕ್ವುನ್ ತೆಂಕಾ ಕಂಗಾಲ್ ಕರ್ಲ್ಯಾನ್. 25 ತೆಂಚ್ಯಾ ಘೊಡ್ಕಿಯಾಂಚ್ಯಾ ಗಾಡಿಯಾಂಚಿ ಚಕ್ಕರಾ ಕಾಡುನ್ ಸೊಡಲ್ಯಾ ಸಾಟ್ನಿ ಇಜಿಪ್ತಾಚಿ ಲೊಕಾ ಲೈ ತರಾಸಾನ್ ಜಾಯ್ ಸಾರ್ಕೆ ಹೊಲೆ, ತನ್ನಾ "ಇಜ್ರಾಯೆಲಾಂಚ್ಯಾ ಇದ್ರಾಕ್ನಾ ಪಳುನ್ ಜಾಂವಾ, ಕಶ್ಯಾಕ್ ಮಟ್ಲ್ಯಾರ್, ದೆವ್ ಇಜಿಪ್ತ್ ಕಾರಾಕ್ನಿ ವಿರೊಧ್ ಹೊವ್ನ್ ತೆಂಚ್ಯಾ ಸಾಟ್ನಿ ಝಗ್ಡೊ ಕರ್ತಾ" ಮನುನ್ ಘೆಟ್ಲ್ಯಾನಿ. 26 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, "ಇಜಿಪ್ತ್ ಕಾರಾಂಚ್ಯಾ ವರ್‍ತಿ ತೆಂಚ್ಯಾ ಘೊಡ್ಕಿಯಾಂಚ್ಯಾ ಗಾಡಿಯಾರ್ನಿ ಅನಿ ತಿ ಚಾಲ್ವುತಲ್ಯಾರ್ನಿ ಪಾನಿ ಪರ್‍ತುನ್ ಯೆಯ್ ಸಾರ್ಕೆ ಸಮುಂದರಾಚ್ಯಾ ವರ್‍ತಿ ಹಾತ್ ಉಕಲ್" ಮಟ್ಲ್ಯಾನ್. 27 ತಸೆಚ್ ಮೊಯ್ಜೆನ್ ಸಮುಂದ್ರಾಚ್ಯಾ ವರ್‍ತಿ ಹಾತ್ ಉಕಲ್ತಾನಾ, ಸಮುಂದರಾಚೆ ಪಾನಿ ಅದ್ದಿ ಹೊತ್ತ್ಯಾ ಸಾರ್ಕೆಚ್ ಭರ್ಲೆ, ಇಜಿಪ್ತಾಚಿ ಲೊಕಾ ಸಮುಂದರಾಚ್ಯಾ ಇದ್ರಾಕ್ ಪಳುನ್ ಬುಡುನ್ ಮರ್ಲಿ, ಸರ್ವೆಸ್ಪರಾನ್ ಇಜಿಪ್ತ್ ಕಾರಾಕ್ನಿ ಸಮುಂದ್ರಾಚ್ಯಾ ಮದ್ದಿ ಬುಡ್ವುನ್ ಜಿವ್ ಕಾಡ್ಲ್ಯಾನ್. 28 ಪಾನಿ ಪರ್‍ತುನ್ ಯೆವ್ನ್ ಘೊಡ್ಕಿಯಾಂಚಿ ಗಾಡಿಯಾ ಘೊಡ್ಕಿಯಾ ಅನಿ ತಿ ಚಾಲ್ವುತಲೆ ಅನಿ ತೆಂಚ್ಯಾ ವಾಂಗ್ಡಾ ಸಮುಂದರಾತ್ ಯೆಯ್ತ್ ಹೊತ್ತೆ ಫಾರೊವಾಚೊ ಸಗ್ಳೊ ಸೈನ್ ಎಕ್ಲೊಬಿ ಹುರಿ ನಸ್ತಾನಾ ಬುಡುನ್ ಗೆಲೊ. 29 ಖರೆ ಇಜ್ರಾಯೆಲಾಂಚಿ ಲೊಕಾ ಸಮುಂದ್ರಾಚ್ಯಾ ಮದ್ದಿ ವಾಳ್ಕಾ ಜಿಮ್ನಿರ್ ಚಲುನ್ ಗೆಲ್ಯಾನಿ, ಪಾನಿ ತೆಂಚ್ಯಾ ಉಜ್ವ್ಯಾ ಅನಿ ಡಾವ್ಯಾ ಭಾಜುಕ್ನಿ ಭಿತ್ತ್ ಸಾರ್ಕೆ ಇಬೆ ಹೊತ್ತೆ. 30 ತ್ಯಾ ದಿಸಿ ಸರ್ವೆಸ್ಪರಾನ್ ಇಜ್ರಾಯೆಲಾಂಕ್ನಿ ಇಜಿಪ್ತ್ ಕಾರಾಂಚ್ಯಾ ಹಾತಿತ್ನಾ ರಾಕ್ವನ್ ಕರ್ಲ್ಯಾನ್, ಇಜ್ರಾಯೆಲಾನಿ ಸಮುಂದರಾಚ್ಯಾ ದಂಡೆಕ್ ಇಜಿಪ್ತಾಚಿ ಲೊಕಾ ಮರುನ್ ಪಡಲ್ಲೆ ಬಗಟ್ಲ್ಯಾನಿ. 31 ಇಜಿಪ್ತಾಚ್ಯಾ ಲೊಕಾಂಚ್ಯಾ ವರ್‍ತಿ ಸರ್ವೆಸ್ಪರಾನ್ ಕರಲ್ಲೆ ಕಾಮ್ ಇಜ್ರಾಯೆಲಾಂಚ್ಯಾ ಲೊಕಾನಿ ಬಗುನ್ ಸರ್ವೆಸ್ಪರಾಕ್ ಬ್ಹಿಂವ್ನ್, ಸರ್ವೆಸ್ಪರ್ ಅನಿ ತೆಜೊ ಸೆವಕ್ ಮೊಯ್ಜೆಚ್ಯಾ ವರ್‍ತಿಬಿ ವಿಶ್ವಾಸ್ ಥವ್ಲ್ಯಾನಿ.