1 ಸರ್ವೆಸ್ಪರಾನ್ ಮೊಯ್ಜೆಕ್, 2 "ಥೊರ್ಲೆ ಹೊವ್ನ್ ಉಪಾಜಲ್ಲೆ ಗಂಡ್ ಸಗ್ಳೆಬಿ ಮಾಕಾ ಎಚುನ್ ಕಾಡುನ್ ಥವಲ್ಲೆ ಹೊವ್ಚೆ; ಇಜ್ರಾಯೆಲಾಂಚ್ಯಾ ಮಾನ್ಸಾತ್ನಿ ಹೊಂವ್ದಿತ್, ನಾತರ್ ಜನಾವರಾತ್ನಿ ಹೊಂವ್ದಿತ್ ಪೈಲೆ ಉಪಾಜಲ್ಲೆ ಮಾಜೆಚ್ " ಮನುನ್ ಸಾಂಗ್ಲ್ಯಾನ್.

3 ಮೊಯ್ಜೆನ್ ಇಜ್ರಾಯೆಲಾಂಚ್ಯಾ ಲೊಕಾಕ್ನಿ, ಗುಲಾಮ್ ಗಿರಿತ್ ರಾವ್ನ್ ಇಜಿಪ್ತ್ ದೆಸಾಕ್ನಾ ಸುಟ್ಕಾ ಹೊಲ್ಲೊ ಹ್ಯೊ ದಿಸ್ ತುಮಿ ಯಾದ್ ಥವ್ನ್ ಘೆವ್ಚೆ, ತುಮ್ಚ್ಯಾ ಸರ್ವೆಸ್ಪರಾನ್ ಅಪ್ಲೊ ಬಳ್ ವಾಪ್ರುನ್ ಸುಟ್ಕಾ ಕರ್ಲ್ಯಾನ್, ಹ್ಯಾ ದಿಸಾತ್ ತುಮಿ ಆಂಬೊಟ್ ಮಿಸಳ್ ಕರಲ್ಲೆ ಕಾಯ್ಬಿ ಖಾವ್ಚೆ ನ್ಹಯ್ . 4 ಚೈತ್ರ್ ಮಾಸ್ ಮೈನ್ಯಾಚ್ಯಾ ದಿಸಿ ತುಮಿ ಯೆಲ್ಲ್ಯಾಸಿ. 5 ಸರ್ವೆಸ್ಪರಾನ್ ತುಮ್ಚ್ಯಾ ಪುರ್ವಜಾಕ್ನಿ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ತುಮ್ಕಾ ದುದ್ದ್ ಅನಿ ಮ್ಹಾಂವ್ ಹೊಂವ್ತಲ್ಯಾ ಗಾಂವಾಕ್ ಮಟ್ಲ್ಯಾರ್ ಕಾನಾನಾಚೆ ಅನಿ ಹಿತ್ತಿಯಾಂಚಿ, ಅಮೊರಿಯಾಂಚೆ, ಅನಿ ಹಿವ್ವಿಯಾಂಚಿ, ಜೆಬುಸಿಯಾಂಚಿ ಲೊಕಾ ವಸ್ತಿ ಕರ್‍ತಲ್ಯಾ ಗಾಂವಾಕ್ ಬಲ್ವುನ್ ಹಾನುನ್ ತೆ ತುಮ್ಕಾ ದಿಲ್ಲ್ಯಾ ತನ್ನಾ, ತುಮಿ ಹ್ಯಾ ಮೈನ್ಯಾತ್ ಹ್ಯೊ ಸನ್ ಕರುಚೆ. 6 ಸಾತ್ ದಿಸಾಚ್ಯಾ ಪತರ್ ತುಮಿ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ, ಸಾತ್ವ್ಯಾ ದಿಸಾ ದಿಸಿ ಸರ್ವೆಸ್ಪರಾಕ್ ಮಾನ್ ದಿತಲ್ಯಾ ಸಾಟ್ನಿ ಸನ್ ಕರುಚೆ. 7 ತ್ಯಾ ದಿಸಾತ್ನಿಬಿ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ, ತವ್ಡೆಚ್ ನಸ್ತಾನಾ ತುಮ್ಚ್ಯಾಕ್ಡೆ ನಾತರ್ ತುಮ್ಚ್ಯಾ ಗಾಂವಾತ್ ಆಂಬೊಟ್ ಹೊಂವ್ದಿ ನಾತರ್ ಆಂಬೊಟ್ ಪಿಟ್ ಹೊಂವ್ದಿ ರಾವ್ಚೆ ನ್ಹಯ್. 8 ತ್ಯಾ ದಿಸಿ ತುಮಿ ತುಮ್ಚ್ಯಾ ಪೊರಾಕ್ನಿ, "ಅಮ್ಚಿ ಲೊಕಾ ಇಜಿಪ್ತ್ ದೆಸಾಕ್ನಾ ಯೆಲ್ಲ್ಯಾ ತನ್ನಾ, ಸರ್ವೆಸ್ಪರಾನ್ ತುಮ್ಚ್ಯಾ ಸಾಟ್ನಿ ಕರಲ್ಲೊ ಉಪ್ಕಾರ್ ಯಾದೆಕ್ ಹಾನುನ್ ಘೆವ್ಕ್ ಸಾಟ್ನಿ ಹ್ಯೊ ಸನ್ ಕರುಲಾಂವ್" ಮನುನ್ ಸಾಂಗುಚೆ. 9 ಸರ್ವೆಸ್ಪರಾನ್ ಅಪ್ಲೊ ಬಳ್ ದಾಕ್ವುನ್ ಅಮ್ಕಾ ಇಜಿಪ್ತಾತ್ನಾ ಸುಟ್ಕಾ ಕರಲ್ಲ್ಯಾ ಸಾಟ್ನಿ, ತೆಜೊ ನೆಮ್ ಅಮ್ಚ್ಯಾ ತೊಂಡಾತ್ ಸಾಂಗಿತ್ ರಾವ್ಚೆ, ತಸೆ ಹೊವ್ನ್ ಹ್ಯೊ ಸನ್ ಅಮ್ಚಾ ಹಾತಿಕ್ ಬಾಂದಲ್ಯಾ ಕಂಕನಾ ಸಾರ್ಕೆ ಅನಿ ಹುಬ್ಬಾಂಚ್ಯಾ ಮದ್ದಿ ಕಪ್ಳಾಕ್ ಭಾಂದಲ್ಲ್ಯಾ ಯಾದೆಚ್ಯಾ ಪಟ್ಟಿ ಸಾರ್ಕೆ ರ್‍ಹಾತಾ. 10 ಸೆ ರ್‍ಹಾತಾನಾ, ಹರ್ ಎಕ್ ವರ್ಸಾಬಿ ಚುಕಿನಸ್ತಾನಾ ಸಮಾ ಎಳಾರ್ ಹ್ಯೊ ಸನ್ ಕರುಚೆ.

11 "ಸರ್ವೆಸ್ಪರಾನ್ ತುಮ್ಕಾ ಅನಿ ತುಮ್ಚ್ಯಾ ಪುರ್ವಾಜಾಕ್ನಿ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ತುಮ್ಕಾ ಕಾನಾನಾಚ್ಯಾ ದೆಸಾಕ್ ಯೆಯ್ ಸಾರ್ಕೆ ಕರುನ್ ತೆ ತುಮ್ಕಾ ದಿತಾ, 12 ತಿಯಾ ಪೈಲೆ ಉಪಾಜಲ್ಲ್ಯಾ ಝಿಲ್ಗ್ಯಾಕ್ ಸರ್ವೆಸ್ಪರಾಕ್ ಭೆಟ್ವುಚೆ, ಅನಿ ಜನಾವರಾಂಚ್ಯಾ ಪೈಲೆ ಉಪಾಜಲ್ಲ್ಯಾ ಗಂಡ್ ಪೆಟ್ಯಾಕ್ನಿಬಿ ಸರ್ವೆಸ್ಪರಾಕ್ ಭೆಟ್ವುಚೆ. 13 ಖರೆ ಗಾಡ್ವಾಚ್ಯಾ ಪೈಲೆಚ್ಯಾ ಪೆಟ್ಯಾಚ್ಯಾ ಬದ್ಲಾಕ್ ಬೊಕ್ಡ್ಯಾಚೊ ಪೆಟೊ ದಿವ್ನ್ ತ್ಯಾ ಗಾಡ್ವ್ಯಾಚ್ಯಾ ಪೆಟ್ಯಾಕ್ ಸೊಡ್ಸುನ್ ಘೆವ್ಚೆ; ತಸೆ ಸೊಡ್ಸುನ್ ಘೆವ್ಕ್ ಹೊಯ್ ನಸ್ಲ್ಯಾರ್ ತೆಜೊ ಗಳೊ ಮೊಡುನ್ ಜಿವ್ ಕಾಡುಚೆ, ನಾತರ್ ಮಾನ್ಸಾಚೊ ಪೈಲೆಚೊ ಪೊರ್ ತರಿಬಿ ದಿವ್ನ್ ತೆಕಾ ಸೊಡ್ಸುನ್ ಘೆವ್ಚೆ. 14 ಹೆಚ್ಯಾ ಮಾನಾ ತುಮ್ಚ್ಯಾ ಪೊರಾನಿ ಹೆಚೊ ಅರ್ಥ್ ಕಾಯ್? ಮನುನ್ ಇಚಾರ್‍ತಾನಾ, ತುಮಿ ತೆಂಕಾ ಗುಲಾಮ್ ಗಿರಿತ್ ರ್‍ಹಾತಾನಾ ಸೆರ್ವೆಶ್ವರಾನ್ ಅಪ್ಲೊ ಮೊಟೊ ಬಳ್ ದಾಕ್ವುನ್ ಇಜಿಪ್ತಾಕ್ನಾ ಅಮ್ಕಾ ಸೊಡ್ಸುಲಾ. 15 ಫಾರೊವ್ ರಾಜಾನ್ ಹಟ್ಟ್ ಧರುನ್ ಅಮ್ಕಾ ಜಾವ್ಕ್ ದಿವ್ಕ್ ನಾ ಹೊಲ್ಲ್ಯಾ ತನ್ನಾ ಸರ್ವೆಸ್ಪರಾನ್ ಇಜಿಪ್ತಾತ್ ಪೈಲೆಚ್ಯಾ ಪೊರಾಕ್ನಿ ಜನಾವರಾಂಚ್ಯಾ ಪೈಲೆಚ್ಯಾ ಪೆಟ್ಯಾಕ್ನಿ ಒಟ್ಟು ತ್ಯಾ ದೆಸಾತ್ ಪೈಲೆ ಉಪಾಜ್ತಲ್ಯಾ ಸಗ್ಳ್ಯಾಕ್ನಿ ಜಿವಾನಿ ಮರ್ಲ್ಯಾನ್. ತಸೆ ಹೊವ್ನ್ ಗಂಡ್ ಹೊವ್ನ್ ಉಪಾಜ್ತಲೆ ಪೈಲೆಚೆ ಫಳ್ ಅಮ್ಚ್ಯಾ ಸರ್ವೆಸ್ಪರಾಕ್ ಭೆಟ್ವುತಾಂವ್, ಮಾನ್ಸಾಚೆ ಪೈಲೆಚೆ ಫಳ್ ತರಿಬಿ ಬದ್ಲಾಕ್ ದಿವ್ನ್ ಸೊಡ್ಸುನ್ ಘೆತಾಂವ್ " ಮನುನ್ ಸಾಂಗುಚೆ. 16 ಸರ್ವೆಸ್ಪರಾನ್ ಅಪ್ನಾಚಿ ಮೊಟಿ ಬಳ್ ದಾಕ್ವುನ್ ಅಮ್ಕಾ ಇಜಿಪ್ತಾತ್ನಾ ಸೊಡಸ್ಲ್ಯಾಲ್ಯಾನ್, ಹಿ ಖಬರ್ ಅಮಿ ಯಾದೆಕ್ ಥವ್ನ್ ಘೆವ್ಚೆ, ಹೆಕಾ ಹಿ ಪದ್ದತ್ ತುಮ್ಚ್ಯಾ ಹಾತಿತ್ ಭಾಂಧಲ್ಲ್ಯಾ ಕಂಕನಾ ಸಾರ್ಕೆ ರ್‍ಹಾತಾ. ಕಪ್ಳಾಕ್ ಭಾಂದಲ್ಲ್ಯಾ ಪಟ್ಟಿಚ್ಯಾ ಸಾರ್ಕೆ ರ್‍ಹಾತಾ.

17 ಫಾರೊವ್ ರಾಜಾನ್ ಲೊಕಾಕ್ನಿ ಧಾಡುನ್ ದಿಲ್ಲ್ಯಾ ತನ್ನಾ ಪಿಲಿಸ್ಟಿಯಾಂಚ್ಯಾ ದೆಶ್ಯಾಚಿ ವಾಟ್ ಜಗ್ಗೊಳ್ ರಾಲ್ಯಾರ್ಬಿ ದೆವಾನ್ ತೆಂಕಾ ತಸೊ ಚಾಲ್ವುಕ್ ನಾ; ಕಶ್ಯಾಕ್ ಮಟ್ಲ್ಯಾರ್, ತಿ ಲೊಕಾ ಝಗ್ಡೊ ಬಗುನ್ ಮನ್ ಬದ್ಲುನ್ ಘೆವ್ನ್ ಇಜಿಪ್ತಾಕ್ ಪಾಟಿ ಪರ್‍ತುನ್ ಜಾಯ್ಲ್ ಮನುನ್ ಘೆಟ್ಲ್ಯಾನ್. 18 ಅಸೆ ಹೊವ್ನ್ ಸರ್ವೆಸ್ಪರಾನ್ ತೆಂಕಾ ತಾಂಬ್ಡ್ಯಾ ಸಮುಂದರಾಚ್ಯಾ ಡಂಗ್ಳಿಚ್ಯಾ ವಾಟೆನ್ ಫಿರುನ್ಗೆತ್ ಜಾಯ್ ಸಾರ್ಕೆ ಕರ್ಲ್ಯಾನ್, ಹೊಲ್ಯಾರ್ಬಿ ಇಜ್ರಾಯೆಲ್ ಲೊಕಾ ಝಗ್ಡುಕ್ ತಯಾರಿ ಕರುನ್ ಘೆವ್ನ್ ಇಜಿಪ್ತ್ ದೆಸಾಕ್ನಾ ಗೆಲ್ಯಾನಿ. 19 ತನ್ನಾ ಮೊಯ್ಜೆನ್ ಅಪ್ನಾಚ್ಯಾ ವಾಂಗ್ಡಾ ಜುಜೆಚಿ ಹಡ್ಡಾ ಘೆವ್ನ್ ಗೆಲ್ಲ್ಯಾನ್, ತೆನಿ ಇಜ್ರಾಯೆಲ್ ಲೊಕಾಕ್ನಿ ದೆವ್ ತುಮ್ಚ್ಯಾ ವಾಂಗ್ಡಾ ರ್‍ಹಾತಾ. ದರ್ಶನ್ ಕರ್ತಾ, ತನ್ನಾ ಮಾಜಿ ಹಡ್ಡಾ ಹಿತ್ನಾ ತುಮ್ಚ್ಯಾ ವಾಂಗ್ಡಾ ಘೆವ್ನ್ ಜಾವ್ಚೆ ಮನುನ್, ಘಟ್ ಆನ್ ಕರ್ಸುನ್ ಘೆಟ್ಲ್ಯಾನ್.

20 ಅಸೆ ತೆನಿ ಸುಕ್ಕೊತಿಕ್ನಾ ಪರ್ಯಾನ್ ಕರುನ್ ಎತಾಮಿಚ್ಯಾ ಡಂಗ್ಳಿಚ್ಯಾ ಜಗ್ಗೊಳ್ಲ್ಯಾ ಜಾಗ್ಯಾರ್ ರಾಲ್ಯಾನಿ. 21 ಯೆವ್ಡೆಚ್ ನಸ್ತಾನಾ ತೆನಿ ರ್‍ಹಾತ್ ಅನಿ ದಿಸ್ ಚಲುನ್ ಜಾವ್ಕ್ ಹೊಯ್ ಸಾರ್ಕೆ, ದೆವಾನ್ ತೆಂಕಾ ದಿಸಾನಿ ವಾಟ್ ದಾಕ್ವುಕ್ ಮೊಡಾಚೊ ಖಾಂಬೊ, ಅನಿ ರಾಚ್ಚೆನ್ ತೆಂಕಾ ಉಜ್ವೊಡ್ ದಿವ್ಕ್ ಆಗಿಚೊ ಖಾಂಬೊ ತೆಂಚ್ಯಾ ಫಿಡೆ ಥವ್ಲ್ಯಾನ್. 22 ತೆನಿ ದಿಸಾನ್ ಮೊಡಾಚೊ ಖಾಂಬೊ ಅನಿ ರಾಚ್ಚೆನ್ ಆಗಿಚೊ ಖಾಂಬೊ ಲೊಕಾಂಚ್ಯಾ ಇದ್ರಾಕ್ನಾ ಕಾಡುಕುಚ್ ನಾ.