Rute 1

ಎಲಿಮೆಲೆಕ್ ಅನಿ ತೆಜೊ ಕಟುಂಬ್ ಮೊವಾಬಾಕ್ ಗೆಲ್ಲೆ

1 ನ್ಯಾಯ್ ಕರ್‍ತಲ್ಯಾಂಚ್ಯಾ ರಾಜ್ವಡ್ಕಿಚ್ಯಾ ಎಳಾರ್, ಇಜ್ರಾಯೆಲ್ ದೆಸಾತ್ ಬರ್‍ಗಾಲ್ ಯೆಲ್ಲ್ಯಾ ಸಾಟ್ನಿ, ಜುದಾಂಚ್ಯಾ ಪ್ರಾಂತ್ಯಾಚೊ ಎಕ್ಲೊ ಮಾನುಸ್, ಅಪ್ನಾಚಿ ಬಾಯ್ಕೊ ಅನಿ ದೊನ್ ಲೆಕಾಕ್ನಿ ಬಲ್ವುನ್ ಘೆವ್ನ್, ಮೊವಾಬ್ ದೆಸಾಕ್ ವಸ್ತಿ ರಾವ್ಕ್ ಗೆಲೊ. 2 ತೆಚೆ ನಾವ್ ಎಲಿಮೆಲೆಕ್, ಅನಿ ತೆಜ್ಯಾ ಬಾಯ್ಕೊಚೆ ನಾವ್ ನವೊಮಿ, ಅನಿ ಎಕ್ ಲೆಕಾಚೆ ನಾವ್ ಮಹ್ಲುನ್ ಅನಿ ಎಕ್ಲೊ ಕಿಲ್ಯೊನ್, ಜುದ್ ದೆಶಾಚ್ಯಾ ಬೆತ್ಲೆಹೆಮಾಕ್ ಯೆವ್ನ್, ಮೊವಾಬ್ ದೆಸಾಕ್ ಜಾವ್ನ್ ಥೈ ವಸ್ತಿ ರ್‍ಹಾಲೆ. 3 ತನ್ನಾ ನವೊಮಿಚೊ ಘವ್ ಎಲಿಮೆಲೆಕ್ ಮರ್‍ಲೊ, ಅನಿ ತಿ ದೊನ್ ಲೆಕಾಂಚ್ಯಾ ವಾಂಗ್ಡಾ ರ್‍ಹಾಲಿ. 4 ಲೆಕಾನಿ ಒರ್ಪಾ ಅನಿ ರುತ್ ಮನ್ತಲ್ಯಾ ನಾವಾಚ್ಯಾ ದೊನ್ ಮೊವಾಬಿ ಬಾಯ್ಕೊ ಮಾನ್ಸಿಯಾಕ್ನಿ ಲಗಿನ್ ಕರುನ್ ಘೆವ್ನ್ ಲೈ ಕರುನ್ ಧಾ ವರ್ಸಾಂಚ್ಯಾ ಪತರ್ ಥೈಚ್ ರ್‍ಹಾಲ್ಯಾನಿ. 5 ತನ್ನಾ, ನವೊಮಿಚಿ ಲೆಕಾ ಮಹ್ಲುನ್ ಅನಿ ಕಿಲ್ಯೊನ್ ಮರ್‍ಲೆ, ಅಸೆ ನವೊಮಿ ಘವಾಕ್ ಅನಿ ದೊನಿ ಲೆಕಾಕ್ನಿ ಕಳ್ದುನ್ ಘೆವ್ನ್, ಎಕ್ಲಿಚ್ ಥೈ ರ್‍ಹಾಲಿ .

ನವೊಮಿ ರುತಾ ವಾಂಗ್ಡಾ ಬೆತ್ಲೆಹೆಮಾಕ್ ಪರ್‍ತುನ್ ಯೆತಲೆ

6 ಸರ್ವೆಸ್ಪರಾನ್ ಅಪ್ನಾಚ್ಯಾ ಲೊಕಾಕ್ನಿ ದಯಾ ದಾಕ್ವುಲ್ಯಾನ್ ಅನಿ ತೆಂಕಾ ಪಾವ್ಸ್ ಪಾನಿಯಾನಿ ಫಿಕ್ ದಿಲ್ಯಾನ್ ಮನ್ತಲಿ ಖಬರ್ ಆಯ್ಕುನ್ ನವೊಮಿ ಮೊವಾಬ್ ದೆಸಾಕ್ನಾ ಅಪ್ನಾಚ್ಯಾ ಸ್ವತ್ಯಾಚ್ಯಾ ದೆಸಾಕ್ ಸುನ್ನಾಂಚ್ಯಾ ವಾಂಗ್ಡಾ ಜಾವ್ಚೆ ಮನುನ್, 7 ತಿ ಅಪ್ನಾಚ್ಯಾ ದೊನಿ ಸುನ್ನಾಂಚ್ಯಾ ವಾಂಗ್ಡಾ ಅಪ್ನಿ ಹೊತ್ತ್ಯಾ ಜಾಗ್ಯಾಕ್ನಾ ಜುದ್ ದೆಸಾಕ್ ಜಾತಾನಾ, 8 ತನ್ನಾ ನವೊಮಿನ್ ಸುನ್ನಾಕ್ನಿ, ತುಮಿ ಪರ್‍ತುನ್ ತುಮ್ಚ್ಯಾ ತುಮ್ಚ್ಯಾ ಮ್ಹಾಯೆರಾಕ್ನಿ ಜಾವಾ; ತುಮಿ ಮಾಕಾ ಅನಿ ಮಾಜ್ಯಾ ಮ್ಹರಲ್ಲ್ಯಾ ಲೆಕಾಕ್ನಿ ಪ್ರೆಮ್ ಕರಲ್ಲ್ಯಾ ಸಾರ್ಕೆಚ್, ಸರ್ವೆಸ್ಪರ್ ತುಮ್ಕಾ ಪ್ರೆಮ್ ಕರುನ್ ದಯಾ ದಾಕ್ವುಂದಿತ್. 9 ತುಮಿ ದೊಗೆಬಿ ಲಗಿನ್ ಹೊವ್ನ್ ಘವಾಚ್ಯಾ ಘರ್‍ಹಾತ್ ಆರಾಮಾನ್ ರಾಯ್ ಸಾರ್ಕೆ ಸರ್ವೆಸ್ಪರ್ ಆಶಿರ್ವಾದ್ ದಿಂವ್ದಿತ್,

ಜಾವ್ನ್ ಯೆತಾ ಮನುನ್ ತೆಂಕಾ ಉಪ್ಪಾ ದಿಲಿನ್. ತನ್ನಾ ತೆನಿ ಮೊಟ್ಯಾನ್ ರಡುಕ್ ಲಾಗ್ಲ್ಯಾನಿ. 10 ತನ್ನಾ ತೆನಿ ಅಮಿಬಿ ತುಜ್ಯಾ ವಾಂಗ್ಡಾಚ್ ತುಜ್ಯಾ ಸ್ವತ್ಯಾಚ್ಯಾ ಲೊಕಾಂಚ್ಯಾಕ್ಡೆ ಯೆತಾಂವ್ ಮಟ್ಲ್ಯಾನಿ.

11 ತನ್ನಾ ನವೊಮಿನ್, ಮಾಜ್ಯಾ ಲೆಕಿಯಾನು, ತುಮಿ ಫಾಟಿ ಪರ್‍ತುನ್ ಜಾವಾ, ಮಾಜ್ಯಾ ವಾಂಗ್ಡಾ ಕಶ್ಯಾಕ್ ಯೆತ್ಯಾಸಿ? ತುಮ್ಕಾ ಘವಾ ಕರುನ್ ದಿವ್ಕ್ ಮಾಜ್ಯಾ ಪೊಟಾತ್ ದುಸ್ರಿ ಅನಿಬಿ ಲೆಕಾ ಹಾತ್ ಕಾಯ್? 12 ಮಾಜ್ಯಾ ಲೆಕಿಯಾನು, ತುಮಿ ಫಾಟಿ ಪರ್‍ತುನ್ ಚಲಾ, ಮಿಯಾ ಅನಿ ಎಕ್ಲ್ಯಾಕ್ ಲಗಿನ್ ಕರುನ್ ಘೆತಲೊ ವಯಾ ಬಿ ದಾಟ್ಲೊ, ಎಕ್ ಎಳಾ ಲಗಿನ್ ಹೊವ್ನ್ ಪೊರಾ ಹೊಂವ್ದಿತ್ ಮನುನ್ ಆಶ್ಯಾನ್ ಅತ್ತ್ಯಾಚ್ ಪೊರಾಕ್ ಜಲಮ್ ದಿಲ್ಯಾರ್ಬಿ, 13 ತೆನಿ ಮೊಟೆ ಹೊಯ್ ಪತರ್ ರಾಕ್ತ್ಯಾಸಿ ಕಾಯ್? ತವ್ಡ್ಯಾ ಪತರ್ ಘವ್ ನಸ್ತಾನಾ ರ್‍ಹಾತ್ಯಾಸಿ ಕಾಯ್? ಮಾಜ್ಯಾ ಲೆಕಿಯಾನು ತಸೆ ಕರುನಕಾಸಿ, ಕಶ್ಯಾಕ್ ಮಟ್ಲ್ಯಾರ್, ಸರ್ವೆಸ್ಪರಾಚೊ ಹಾತ್ ಮಾಜ್ಯಾ ವಿರೊದ್ ಹೊತ್ತ್ಯಾ ಸಾಟ್ನಿ ಮಿಯಾ ತುಮ್ಚ್ಯಾ ವಿಶಯಾತ್ ಲೈ ಬೆಜಾರ್ ಹೊತಾ ಮಟ್ಲಿನ್.

14 ತನ್ನಾ ತೆನಿ ಮೊಟ್ಯಾನ್ ರಡ್ಲ್ಯಾನಿ, ಒರ್ಪಾನ್ ಮಾಮಿಕ್ ಉಪ್ಪಾ ದಿವ್ನ್ ಮ್ಹಾಯೆರಾಕ್ ಗೆಲಿನ್, ಖರೆ ರುತ್ ಮಾಮಿಕ್ ಸೊಡುನ್ ಜಾವ್ಕ್ ನಾ. 15 ಮಾನಾ ನವೊಮಿನ್ ರುತಾಕ್, ಅಬಕ್, ತುಜ್ಯಾ ವಾಂಗುಡ್ಚಿ ಜಾವ್ ಪರ್‍ತುನ್ ಅಪ್ನಾಚ್ಯಾ ಲೊಕಾಂಚ್ಯಾಕ್ಡೆ ಅನಿ ದೆವಾಂಚ್ಯಾಕ್ಡೆ ಜಾವ್ಕ್ ಲಾಗ್ಲಿ, ತಿಯಾಬಿ ತಿಚ್ಯಾ ಸಾರ್ಕೆ ತುಜ್ಯಾ ಲೊಕಾಂಚ್ಯಾ ವಾಂಗ್ಡಾ ಜಾ ಮಟ್ಲಿನ್. 16 ತನ್ನಾ ರುತಾನ್, ಮಾಕಾ ಪರ್‍ತುನ್ ಜಾ ಮನುನ್ ಒತ್ತಾಯ್ ಕರುನಕ್ಕೊ, ತಿಯಾ ಖಯ್ ಗೆಲ್ಯಾರ್ಬಿ ಮಿಯಾ ಥೈಚ್ ಯೆತಾ; ತಿಯಾ ವಸ್ತಿ ರ್‍ಹಾತಲ್ಯಾಕ್ಡೆಚ್ ಮಿಯಾಬಿ ವಸ್ತಿ ರ್‍ಹಾತಾ; ತುಜಿ ಲೊಕಾಚ್ ಮಾಜಿ ಲೊಕಾ ಅನಿ ತುಜೊ ದೆವುಚ್ ಮಾಜೊ ದೆವ್. 17 ತಿಯಾ ಮರ್‍ತಲ್ಯಾಕ್ಡೆಚ್ ಮಿಯಾಬಿ ಮರ್ತಾ; ಮಾಕಾಬಿ ಥೈಚ್ ಮಾಟಿ ಕರುಚೆ, ಮರಾನ್ ನಸ್ತಾನಾ ಅನಿ ದುಶ್ರ್ಯಾ ಕಾರನಾಕ್ ಮಿಯಾ ತುಕಾ ಸೊಡುನ್ ಗೆಲ್ಲೆ ಹೊಲ್ಯಾರ್ ಸರ್ವೆಸ್ಪರ್ ಮಾಕಾ ಶಿಕ್ಷ್ಯಾ ದಿಂವ್ದಿತ್.

18 ರುತ್ ಅಪ್ನಾಚ್ಯಾ ವಾಂಗ್ಡಾಚ್ ಯೆವ್ಕ್ ಘಟ್ ಮನ್ ಕರಲ್ಲಿ ಹಾಯ್ ಮನುನ್ ನವೊಮಿನ್ ಕಳ್ವುನ್ ಘೆವ್ನ್ ಗಪ್ ರ್‍ಹಾಲಿನ್.

19 ತಸೆಚ್ ತೆನಿ ಪರ್ಯಾನ್ ಕರುನ್ ಬೆತ್ಲೆಹೆಮಾಕ್ ಗಾಂವಾಚ್ಯಾ ಭುತ್ತುರ್ ಯೆಲ್ಲ್ಯಾ ತನ್ನಾ ಬಾಯ್ಕಾ ಮನ್ಸಿಯಾನಿ, ಹಿ ನವೊಮಿ ನ್ಹಯ್ ಕಾಯ್? ಮನುನ್ ಅಜಿಬ್ ಹೊವ್ನ್ ಬೊಲುಕ್ ಲಾಗ್ಲ್ಯಾನಿ.

20 ತನ್ನಾ ನವೊಮಿನ್, ಮಾಕಾ ನವೊಮಿ ಮನುನ್ ಬಲ್ವುನಕಾಸಿ, ಸರ್ವೆಸ್ಪರಾನ್ ಮಾಕಾ ಲೈ ದುಕ್ಕ್ ದಿಲಾ, ತಸೆಹೊವ್ನ್ "ಮಾರ್‍ಹಾ"*1:20 ಮಾರಾ ಮಟ್ಲ್ಯಾರ್ ಕೊಡು ಮನುನ್ ಅರ್‍ತ್. ಮನುನ್ ಬಲ್ವಾ. 21 ಮಿಯಾ ಸಾವ್ಕಾರ್ನಿ ಹೊವ್ನ್ ಗೆಲೊ, ಸರ್ವೆಸ್ಪರಾನ್ ಮಾಕಾ ಕಾಯ್ಬಿ ನತ್ತಿ ಕರುನ್ ಪರ್‍ತುನ್ ಹಾನ್ಲ್ಯಾನ್, ಸರ್ವೆಸ್ಪರ್ ಮಾಜ್ಯಾ ವಿರೊಧ್ ಹೊವ್ನ್ ಹಾಯ್, ಸರ್ವೆಸ್ಪರಾನ್ ಮಾಕಾ ದುಕ್ವುಲ್ಯಾನ್; ಅಸೆ ರ್‍ಹಾತಾನಾ, ತುಮಿ ಮಾಕಾ ನವೊಮಿ ಮನುನ್ ಬಲ್ವುಕ್ ಕಸೆ ಹೊತಾ? ಮಟ್ಲಿನ್.

22 ಅಸೆ ನವೊಮಿ ಅಪ್ನಾಚಿ ಸುನ್ನ್ ಮೊವಾಬಾಚ್ಯಾ ರುತಾ ವಾಂಗ್ಡಾ ಬೆತ್ಲೆಹೆಮಾಕ್ ಯೆಲಿ, ತನ್ನಾ ಬಾರ್‍ಲಿಚಿ ಪಿಕ್ ಕಾತರ್‍ತಲೊ ಎಳ್ ಶುರು ಹೊಲ್ಲೊ.