1 ಹ್ಯಾ ಜಗಾ ವರ್‍ತಿ ಲೊಕಾ ವಾಡುನ್ಗೆತ್ ಗೆಲ್ಲ್ಯಾ ಸಾರ್ಕಿ ತೆಂಕಾ ಚೆಡ್ವಾಬಿ ಉಪಜ್ಲಿ. 2 ತನ್ನಾ ದೆವಾಚ್ಯಾ ಲೆಕಾನಿ ಮಾನ್ಸಾಚ್ಯಾ ಲೆಕಿಯಾಂಚೆ ಸುಂದರ್ ಪಾನ್ ಬಗುನ್, ಅಪ್ನಿ ಎಚುನ್ ಘೆಟಲ್ಯಾ ಚೆಡ್ವಾಕ್ನಿ ಲಗಿನ್ ಕರುನ್ ಘೆಟ್ಲ್ಯಾನಿ. 3 ತನ್ನಾ ಸರ್ವೆಸ್ಪರ್ ದೆವಾನ್, ಮಾಜೊ ಆತ್ಮೊ ಸದಾಸರ್ವತಾಕ್ ಹೆಂಚ್ಯಾ ವಾಂಗ್ಡಾ ರಾವ್ಕ್ ಮಿಯಾ ಸೊಡಿನಾ, ಕಶ್ಯಾಕ್ ಮಟ್ಲ್ಯಾರ್ ಲೊಕಾ ಮರ್ತಲಿಚ್, ತೆನಿ ಎಕ್ಸೆ ವಿಸ್ ವರಿಸ್ ತವ್ಡೆಚ್ ಝಿತ್ತೆ ರ್‍ಹಾವ್ಚೆ ಮಟ್ಲ್ಯಾನ್. 4 ತ್ಯಾ ದಿಸಾತ್ನಿ ಅನಿ ತೆಚ್ಯಾ ಮಾನಾಚ್ಯಾ ದಿಸಾತ್ನಿ ಮಾನ್ಸಾಂಚ್ಯಾ ಲೆಕಿಯಾಂಚ್ಯಾ ಅನಿ ದೆವಾಚ್ಯಾ ಲೆಕಾಂಚ್ಯಾ ಪಿಳ್ಗಿಚಿ ಲೈ ಮೊಟ್ಟ್ಯಾ ಆಂಗಾಚಿ ಲೊಕಾ ಜಿಮ್ನಿ ವರ್‍ತಿ ಹೊತ್ತಿ, ತೆನಿ ಲೈ ತಾಕ್ತಿಚೆ ಅನಿ ನಾವ್ ಕರಲ್ಲೆ ಹೊವ್ನ್ ಹೊತ್ತೆ.

5 ತನ್ನಾ ಸರ್ವೆಸ್ಪರ್ ದೆವಾನ್ ಜಗಾಚ್ಯಾ ವರ್‍ತಿ ಮಾನ್ಸಾಚೆ ಬುರ್ಸೆ ಪಾನ್ ಲೈ ವಾಡುನ್ಗೆತ್ ಹೊತ್ತೆ, ಅನಿ ತೆಂಚಿ ಮನಾತ್ಲಿ ಯೆವ್ಜನ್ಯಾ ಕನ್ನಾಬಿ ಬುರ್ಶಿಚ್ ಹೊವ್ನ್ ಹೊತ್ತೆ ಬಗುನ್, 6 ಜಿಮ್ನಿ ವರ್‍ತಿ ಮಾನ್ಸಾಕ್ನಿ ರಚಲ್ಯಾ ಸಾಟ್ನಿ ಸರ್ವೆಸ್ಪರ್ ದೆವಾಕ್ ಲೈ ಬೆಜಾರ್ ಹೊಲೊ, ಅನಿ ತೆಜೊ ಮನ್ ಚುಟ್ಮುಟ್ಲೊ, 7 ಮಿಯಾ ಹ್ಯಾ ರಚಲ್ಯಾ ಜಿಮ್ನಿ ವೈನಾ ಮಾನ್ಸಾಕ್ನಿ ನಾಶ್ ಕರ್ತಾ, ಅನಿ ತೆಂಚ್ಯಾ ವಾಂಗ್ಡಾ ಹರ್ ಎಕ್ ಜನಾವಾರಾಕ್ನಿ, ಫಾಕ್ರಾಕ್ನಿ ಅನಿ ಜಿಮ್ನಿರ್ ಫಿರುನ್ಕೆಳ್ತಲ್ಯಾ ಕಿಡ್ಯಾಕ್ನಿಬಿ ನಾಶ್ ಕರ್ತಾ , ಕಶ್ಯಾಕ್ ಮಟ್ಲ್ಯಾರ್ ಮಿಯಾ ತೆಂಕಾ ರಚಲ್ಯಾ ವೈನಾ ಮಾಕ್ ಲೈ ಬೆಜಾರ್ ಹೊವ್ಲಾ, ಮಟ್ಲ್ಯಾನ್. 8 ಖರೆ ಸರ್ವೆಸ್ಪರ್ ದೆವಾಚ್ಯಾ ನದ್ರೆಕ್ ನೊಯೆ ಮೆಚ್ಕಿಚೊ ಹೊವ್ನ್ ಹೊತ್ತೊ.

9 ಹಿ ನೊಯೆಚಿ ಚರಿತ್ರಾ: ತೊ ಧರ್ಮಿಸ್ಟ್ ಅನಿ ಚುಕ್ ನಸಲ್ಲೊ ಹೊವ್ನ್ ಹೊತ್ತೊ, ತ್ಯಾ ಎಳಾರ್ ತೆಜಾ ಸಾರ್ಕೊ ಕೊನ್ಬಿ ನತ್ತೊ, ಅನಿ ತೊ ದೆವಾಚ್ಯಾ ವಾಂಗ್ಡಾ ವಿಶ್ವಾಸಾನ್ ಹೊತ್ತೊ. 10 ಅನಿ ನೊಯೆಕ್ ಶೆಮ್, ಹಾಮ್, ಜಾಫೆತ್ ಮನ್ತಲಿ ತಿನ್ ಲೆಕಾ ಹೊತ್ತಿ. 11 ತ್ಯಾ ಎಳಾರ್ ಲೊಕಾಂಚ್ಯಾ ವೈನಾ ಜಿಮಿನ್ ಬುರ್ಸ್ಯಾ ಪಾನಾನ್ ತರಾಸಾನ್ ಭರಲ್ಲಿ ಹೊತ್ತಿ. 12 ತನ್ನಾ ಸರ್ವೆಸ್ಪರ್ ದೆವಾನ್ ಜಗಾ ವರ್‍ತಿ ಹೊತ್ತಿ ಲೊಕಾಂಚಿ ಚಾಲ್ ಬುರ್ಶಿ ಹೊಲ್ಲಿ ಬಗಟ್ಲ್ಯಾನ್.

13 ತನ್ನಾ ಸರ್ವೆಸ್ಪರ್ ದೆವಾನ್ ನೊಯೆಕ್, ಸಗ್ಳ್ಯಾ ಲೊಕಾಕ್ನಿ ಮಿಯಾ ನಾಶ್ ಕರ್ತಾ, ಕಶ್ಯಾಕ್ ಮಟ್ಲ್ಯಾರ್ ಹೆಂಚ್ಯಾ ವೈನಾ ಜಿಮ್ನಿರ್ ತರಾಸ್ ಭರಲ್ಲೊ ಹಾಯ್, ಮಿಯಾ ಖರೆಚ್ ತೆಂಕಾಬಿ ಜಗಾತ್ ರ್‍ಹಾತಲೆ ಸಗ್ಳೆಬಿ ನಾಶ್ ಕರ್ತಾ ಮಟ್ಲ್ಯಾನ್. 14 ಅನಿ ಎಕ್ ಬರ್‍ಯಾ ಝಾಡಾಚೆ ತುಜ್ಯಾ ಸಾಟ್ನಿ ಮನುನ್ ಎಕ್ ಮೊಟಿ ಢೊನ್ ಭಾಂದುನ್ ಘೆ ತ್ಯಾತುರ್ ಲೈ ಖೊಲಿಯಾ ರಾಂವ್ದಿ ಅನಿ ಭಾಯ್ರ್ ಅನಿ ಭುತ್ತುರ್ನಾ ಡಾಂಬರ್ ಲಾವ್ ಮಟ್ಲ್ಯಾನ್. 15 ಅನಿ ತ್ಯಾ ಢೊನಾಚಿ ಲಾಂಬಿ ತಿನ್ಸೆ ಹಾತ್, ರುಂದಿಕ್ ಪನ್ನಾಸ್ ಹಾತ್ ಅನಿ ಉಪ್ಪರ್ ತಿಸ್ ಹಾತ್ ಹೊವ್ನ್ ರ್‍ಹಾವ್ಚೆ. 16 ಡೊನಾಚ್ಯಾ ಥಾಟಾಚ್ಯಾ ಖಾಲ್ತಿ ಭೊತ್ಯಾನಿ ಎಕ್ ಹಾತ್ ಲಾಂಬಿ ಕಿಂಡ್ ಥವ್ ತೆಚ್ಯಾ ಜಗ್ಗೊಳ್ ದಾರ್ ರಾಂವ್ದಿತ್ ಅನಿ ತ್ಯಾತುರ್ ತಿನ್ ಮಾಳ್ಗಿ ರಾಂವ್ದಿ. 17 ಮಿಯಾ ತುಕಾ ಸಾಂಗ್ತಲೆ ಅರ್ಥ್ ಕರುನ್ ಘೆ ಮಿಯಾ ಜಿಮ್ನಿ ವರ್‍ತಿ ಹೊತ್ತ್ಯಾ ಸಗ್ಳ್ಯಾ ಜನಾವಾರಾಕ್ನಿ ಜಲ್ ಪ್ರಳಯಾನ್ ನಾಸ್ ಕರ್ತಾ, ಹರ್ ಎಕ್ ಮರುನ್ ಜಾತಾ. 18 ಖರೆ ಮಿಯಾ ತುಜಾಕ್ಡೆ ಎಕ್ ಕರಾರ್ ಕರುನ್ಗೆತಾ ತೆ ಕಾಯ್ ಮಟ್ಲ್ಯಾರ್, ತಿಯಾ ಅನಿ ತುಜಿ ಬಾಯ್ಕೊ, ಲೆಕಾ, ಸುನ್ನಾ ಹೆನಿ ಸಗ್ಳೆ ಢೊನಾತ್ ಜಾವ್ಚೆ. 19 ಅನಿ ಜಿಮ್ನಿ ವರ್‍ತಿ ಹೊತ್ತ್ಯಾ ಜನಾವರಾತ್ನಿ ಹರ್ ಎಕ್ಬಿ ಎಕ್ ಗಂಡ್ ಎಕ್ ಹೆನ್ನ್ ತುಜ್ಯಾ ವಾಂಗ್ಡಾ ಢೊನಾತ್ ಝಿತ್ತೆ ರಾಂವ್ದಿತ್, 20 ಜಿಮ್ನಿ ವರ್‍ತಿ ರ್‍ಹಾತಲ್ಯಾ ಎಕ್ ಜೊಡ್ ಫಾಕ್ರಾಂಚಿ, ಅನಿ ಎಕ್ ಜೊಡ್ ಜಿಮ್ನಿ ವರ್‍ತಿ ಫಿರುನ್ ಖೆಳ್ತಲ್ಯಾ ಕಿಡ್ಯಾಂಚಿ, ಅನಿ ಹರ್ ಎಕ್ ಜಾತಿಚಿಬಿ ದೊದೊನ್ ಜನಾವಾರಾ ತುಜ್ಯಾ ವಾಂಗ್ಡಾ ಝಿತ್ತೆ ರಾವ್ಕ್ ಯೆಂವ್ದಿ. 21 ಅನಿ ಸಗ್ಳ್ಯಾ ನಮುನ್ಯಾಚೆ ಖಾವ್ಕ್ ಪಾಜೆ ಹೊಲ್ಲಿ ಜಿನ್ಸಾ ತಮ್ಕ್ಯಾ ವಾಂಗ್ಡಾ ಡೊನಾತ್ ಥವ್ನ್ ಗೆ ತೆ ತುಕಾ ಅನಿ ಸಗ್ಳ್ಯಾ ಜನಾವಾರಾಕ್ನಿ ಜೆವ್ನಾಕ್ ಹೊತಾ. 22 ನೊಯೆನ್ ಸರ್ವೆಸ್ಪರ್ ದೆವಾನ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್ ಕರ್ಲ್ಯಾನ್.