ಉತ್ಪತ್ತಿ 48

ಎಪ್ರಾಯಿಮ್ ಅನಿ ಮನಸ್ಸೆಕ್ ಜಾಕೊಬಾಚೊ ಆಕ್ರಿಚೊ ಆಶಿರ್ವಾದ್

1 ಉಲ್ಲೊ ಎಳ್ ಹೊಲ್ಯಾ ಮಾನಾ ಬಾಬಾಕ್ ಲೈ ಹುಶ್ಯಾರ್ ನಸ್ತಾನಾ ಹಾತ್ರಾನ್ ಧರ್ಲಾ ಮನ್ತಲಿ ಖಬರ್ ಜುಜೆಕ್ ಗಾವ್ಲಿ ತೆನಿ ಅಪ್ಲ್ಯಾ ಮನಸ್ಸೆ ಅನಿ ಎಫ್ರಾಯಿಮ್ ಮನ್ತಲ್ಯಾ ಲೆಕಾಕ್ನಿ ಬಲ್ವುನ್ ಘೆವ್ನ್ ಅಪ್ಲ್ಯಾ ಬಾಬಾಕ್ಡೆ ಯೆಲೊ. 2 ತುಜೊ ಲೆಕ್ ಜುಜೆ ಯೆಲಾ ಮನುನ್ ಸಾಂಗ್ತಾನಾ ಜಾಕೊಬ್ ಉಟುನ್ ಸಮಾಧಾನ್ ಕರುನ್ ಘೆವ್ನ್ ಹಾತ್ರಾನಾ ವರ್‍ತಿ ಬಸ್ಲೊ, 3 ಜಾಕೊಬಾನ್ ಜುಜೆಕ್, ಮಾಕಾ ಸರ್ವಶಕ್ತ್ ದೆವಾನ್ ಕಾನಾನಾಚ್ಯಾ ಲುಜಿ ಮನ್ತಲ್ಯಾಕ್ಡೆ ದಿಸುನ್ ಆಶಿರ್ವಾದ್ ದಿವ್ನ್ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, 4 ಮಿಯಾ ತುಕಾ ಪೊರಾ ದಿವ್ನ್ ತುಜಿ ಪಿಳ್ಗಿ ವಾಡ್ವುತಾ; ತುಕಾ ಲೈ ಲೊಕಾಂಚೊ ಮುಳ್ ಕರುನ್ ಥವ್ತಾ;ಅನಿ ತುಜ್ಯಾ ಮಾನಾ ಹ್ಯೊ ದೆಶ್ ತುಜ್ಯಾ ಪಿಳ್ಗಿಚ್ಯಾಕ್ನಿ ಶಾಶ್ವತ್ ಆಸ್ತಿ ಕರುನ್ ಥವ್ತಾ ಮನುನ್ ಸಾಂಗಲ್ಯಾನ್,

5 ಅನಿ ಮಿಯಾ ಹಿತ್ತೆ ತುಜ್ಯಾಕ್ಡೆ ಯೆವ್ಚ್ಯಾ ಅದ್ದಿ ತುಕಾ ಇಜಿಪ್ತಾತ್ ಉಪಾಜಲ್ಲಿ ದೊನ್ ಲೆಕಾ ಮಾಜಿ ಹೊವ್ಚಿ, ರುಬೆನ್ ಅನಿ ಸಿಮೆಯೊನ್ ಮಾಜಿ ಲೆಕಾ ಹೊವ್ನ್ ಹೊತ್ತ್ಯಾ ಸಾರ್ಕೆಚ್ ಮನಸ್ಸೆ ಅನಿ ಎಫ್ರಾಯಿಮ್ ಬಿ ಮಾಜಿ ಲೆಕಾ ಹೊವ್ಚೆ, 6 ತೆಂಚ್ಯಾ ಮಾನಾ ತುಕಾ ಹೊಲ್ಲಿ ಲೆಕಾ ತುಜಿ ಹೊವ್ನ್ ರಾಂವ್ದಿತ್, ತೆನಿ ಅಪ್ಲ್ಯಾ ಬಾವಾಂಚ್ಯಾ ಆಸ್ತಿತ್ ವಾಟೊಘೆವ್ನ್ ತೆಂಚ್ಯಾ ಖಂದಾನಾಚಿಚ್ ನಾಂವಾ ಥವ್ನ್ ಘೆಂವ್ದಿತ್. 7 ಕಶ್ಯಾಕ್ ಮಟ್ಲ್ಯಾರ್, ತುಮ್ಚಿ ಬಾಯ್ ರಾಖೆಲ್, ಮಿಯಾ ಪದ್ದಾನ್ ಅರೆಮಿಕ್ನಾ ಯೆತಾನಾ ಎಪ್ರಾಹಾತಾಕ್ ಪಾವ್ಕ್ ಅಜುನ್ ಧುರ್ ರ್‍ಹಾತಾನಾಚ್, ವಾಟೆವರ್‍ತಿ ಮರುನ್ ಮಾಕಾ ಸೊಡುನ್ ಗೆಲಿ, ಅತ್ತಾ ಬೆತ್ಲೆಹೆಮ್ ಮನುನ್ ಬಲ್ವುತಲ್ಯಾ ಎಪ್ರಾಹಾತಾಕ್ ಜಾತಲ್ಯಾ ವಾಟೆಚ್ಯಾ ಭಾಜುಕ್ ತಿಕಾ ಸಮಾದಿ ಕರ್‍ಲೊ, ಮಟ್ಲ್ಯಾನ್.

8 ಅನಿ ಜಾಕೊಬಾನ್ ಜುಜೆಚ್ಯಾ ಲೆಕಾಕ್ನಿ ಬಗುನ್ ಹೆನಿ ಕೊನ್? ಮನುನ್ ಇಚಾರ್‍ಲ್ಯಾನಿ.

9 ತನ್ನಾ ಜುಜೆನ್ ಮಾಕಾ ಹ್ಯಾ ದೆಶ್ಯಾತ್ ದೆವಾನ್ ದಿಲ್ಲಿ ಲೆಕಾ ಹಿ ಮಟ್ಲ್ಯಾನ್, ತೆಂಕಾ ಮಾಜ್ಯಾ ಜಗ್ಗೊಳ್ ಬಲ್ವುನ್ ಹಾನ್ ತೆಂಕಾ ಆಶಿರ್ವಾದ್ ದಿತಾ ಮನುನ್ ಜಾಕೊಬಾನ್ ಜುಜೆಕ್ ಸಾಂಗ್ಲ್ಯಾನ್. 10 ತೊ ಲೈ ಮ್ಹಾತಾರೊ ಹೊಲ್ಯಾಸಾಟ್ನಿ ಡೊಳೆ ದಿಸಿ ನಸ್ತಾನಾ ರ್‍ಹಾತಾನಾ ಜುಜೆನ್ ತೆಂಕಾ ಜಗ್ಗೊಳ್ ಹಾನಲ್ಯಾ ತನ್ನಾ ತೆಂಕಾ ಯಾಂಗ್ ಮಾರುನ್ ಉಪ್ಪಾ ದಿಲ್ಯಾನ್. 11 ಮಾನಾ ಜೊಸೆಪಾಕ್, ಮಿಯಾ ಅನಿ ಪರ್‍ತುನ್ ತುಜೆ ತೊಂಡ್ ಬಗ್ತಾ ಮನುನ್ ಚಿಂತುನತ್ತೊ, ಖರೆ ದೆವಾನ್ ತುಕಾ ತವ್ಡೆಚ್ ನೈ ತುಜಿ ಪಿಳ್ಗಿಬಿ ಬಗಿ ಸಾರ್ಕೆ ಕರ್ಲ್ಯಾನ್! ಮಟ್ಲ್ಯಾನ್. 12 ತನ್ನಾ ಜುಜೆನ್ ಅಪ್ಲ್ಯಾ ಲೆಕಾಕ್ನಿ ಇಜ್ರಾಯೆಲಾಚ್ಯಾ ಹೊಟ್ಟ್ಯಾತ್ನಾ ಕಾಡುನ್ಗೆವ್ನ್ ಜಿಮ್ನಿ ಪತರ್ ಮಾನ್ ಬಾಗುನ್ ಬಾಬಾಕ್ ನಮಸ್ಕಾರ್ ಕರ್ಲ್ಯಾನ್.

13 ಮಾನಾ ಜುಜೆನ್ ಎಫ್ರಾಯಿಮಾಕ್ ಅಪ್ಲ್ಯಾ ಉಜ್ವ್ಯಾ ಅನಿ ಇಜ್ರಾಯೆಲಾಚ್ಯಾ ಡಾವ್ಯಾ ಭಾಜುಕ್ ಅನಿ ಮನಾಸ್ಸೆಕ್ ಅಪ್ಲ್ಯಾ ಡಾವ್ಯಾ ಅನಿ ಇಜ್ರಾಯೆಲಾಚ್ಯಾ ಉಜ್ವ್ಯಾ ಭಾಜುಕ್ ಜಗ್ಗೊಳ್ ಕರುನ್ ಇಬೆ ಕರ್ಲ್ಯಾನ್. 14 ಮನಸ್ಸೆ ಥೊರ್ಲೊ ಲೆಕ್ ಹೊವ್ನ್ ಉಪಾಜಲ್ಲೊ ರಾಲ್ಯಾರ್ಬಿ ಜಾಕೊಬಾನ್, ಅಪ್ಲಿ ಹಾತಾ ಅಡ್ಡ್ ಕರುನ್, ಧಾಕ್ಲ್ಯಾ ಎಫ್ರಾಯಿಮಾ ವರ್‍ತಿ ಉಜ್ವೊ ಹಾತ್ ಅನಿ ಮನಸ್ಸೆ ವರ್‍ತಿ ಡಾವೊ ಹಾತ್ ಥವ್ನ್, 15 ಜುಜೆಕ್ ಅಸೆ ಮನುನ್ ಆಶಿರ್ವಾದ್ ದಿವ್ನ್,

ಮಾಜಿ ವಾಡ್ ವಡ್ಲಾ, ಅಬ್ರಾಹಾಮ್, ಅನಿ ಇಸಾಕ್ ಚಲುನ್ಗೆತ್ ಯೆಲ್ಲೊ ದೆವ್ ತ್ಯಾ ದೆವಾನುಚ್ ಮಾಕಾ ಬಾರಿಕ್ ರ್‍ಹಾತಾನಾಚ್ಯಾನ್ ಆಜ್ ಪತರ್ ಚಾಲ್ವುನ್ಗೆವ್ನ್ ಯೆಲಾ,

16 ಸಗ್ಳ್ಯಾ ತರಾಸಾಂತ್ನಾ ಮಾಕಾ ಸುಟ್ಕಾ ಕರುನ್ ರಾಕ್ವನ್ ಕರುನ್ ಹಾನಲೊ ಧುತ್ ಝಿಲ್ಗ್ಯಾಕ್ನಿ ಆಶಿರ್ವಾದ್ ದಿಂವ್ದಿತ್ ತೆಂಚ್ಯಾ ವೈನಾ ಮಾಜಿ ವಾಡ್ ವಡ್ಲಾ ಅಬ್ರಾಮ್ , ಇಸಾಕಾಂಚೆ ನಾವ್ ವರ್‍ತಿ ಉಟುಂದಿತ್, ಅನಿ ಹೆನಿ ಜಿಮ್ನಿ ವರ್‍ತಿ ತೆಂಚಿ ಪಿಳ್ಗಿ ಲೈ ಹೊವ್ನ್ ವಾಡುಂದಿತ್! ಮಟ್ಲ್ಯಾನ್.

17 ಜುಜೆಕ್ ಅಪ್ಲ್ಯಾ ಬಾಬಾನ್ ಎಫ್ರಾಯಿಮಾ ವರ್‍ತಿ ಉಜ್ವೊ ಹಾತ್ ಥವಲ್ಯಾ ಬರೆ ದಿಸುಕ್ನಾ, ತೆನಿ ಹಾತ್ ಕಾಡುನ್ ಎಪ್ರಾಯಿಮಾಚ್ಯಾ ಟಕ್ಲ್ಯಾ ವೈನಾ ಕಾಡುನ್ ಮನಸ್ಸೆಚ್ಯಾ ಟಕ್ಲ್ಯಾ ವರ್‍ತಿ ಥವ್ನ್, 18 ಬಾಬಾ ತಸೆ ನೈ, ಥೊರ್ಲೊ ಲೆಕ್ ಹ್ಯೊಚ್ ಹೆಜ್ಯಾ ವರ್‍ತಿ ಉಜ್ವೊ ಹಾತ್ ಥವ್ ಮಟ್ಲ್ಯಾನ್. 19 ಖರೆ ಬಾಬಾನ್ ತೆಕಾ ಒಪ್ಪಿ ನಸ್ತಾನಾ, ಗೊತ್ತ್ ಹಾಯ್ ಲೆಕಾ, ಮಾಕಾ ಗೊತ್ತ್ ಹಾಯ್, ಹೆಜ್ಯಾನ್ಬಿ ಎಕ್ ದೆಶ್ ಹೊತಾ, ಹ್ಯೊಬಿ ತಾಕ್ತಿಚೊ ಹೊತಾ ಖರೆ ಹೆಜ್ಯಾಕಿಂತಾಬಿ ಹೆಜೊ ಭಾವ್ ತಾಕ್ತಿಚೊ ಹೊತಾ, ತೆಚ್ಯಾ ಪಿಳ್ಗಿ ವೈನಾ ದೆಶ್ಯಾಂಚೊ ತಾಂಡೊಚ್ ತಯಾರ್ ಹೊತಾ ಮಟ್ಲ್ಯಾನ್.

20 ತೆನಿ ತೆಂಕಾ ತ್ಯಾ ದಿಸಿ ಆಶಿರ್ವಾದ್ ದಿವ್ನ್, ಇಜ್ರಾಯೆಲ್ ತುಜ್ಯಾಕ್ಡೆ ಆಶಿರ್ವಾದ್ ದಿವ್ನ್, ದೆವ್ ತುಕಾ ಎಫ್ರಾಯಿಮ್ ಅನಿ ಮನಸ್ಸೆಕ್ ಕರಲ್ಯಾ ಸಾರ್ಕೆಚ್ ಕರುಂದಿತ್ ಮನುನ್ ಸಾಂಗ್ತಲಿ ಗೊಸ್ಟ್ ಹೊತಾ , ಮನುನ್ ಸಾಂಗುನ್ ಎಪ್ರಾಯಿಮಾಕ್ ಮನಸ್ಸೆಚ್ಯಾ ಫಿಡೆ ಇಬೆ ಕರ್ಲ್ಯಾನ್.

21 ತನ್ನಾ ಇಜ್ರಾಯೆಲಾನ್, ಜುಜೆಕ್ ಅಬಕ್ ಮಿಯಾ ಮರ್ತಾ, ಖರೆ ದೆವ್ ತುಮ್ಚ್ಯಾ ವಾಂಗ್ಡಾ ರ್‍ಹಾವ್ನ್ ತುಮ್ಕಾ ಅನಿ ಪರ್‍ತುನ್ ವಾಡ್ ವಡ್ಲಾಂಚ್ಯಾ ದೆಶ್ಯಾಕ್ ಪಾವ್ಸುತಾ. 22 ಅನಿ ಮಿಯಾ ಕೊಯ್ತ್ಯಾನ್ ಅನಿ ಭರ್ಚಿಯಾನಿ ಅಮೊರಿಯಾಂಚ್ಯಾಕ್ನಾ ಘೆವ್ನ್ ಯೆಲ್ಲೊ ಜಾಗೊ ತುಜ್ಯಾ ಭಾವಾಂಚ್ಯಾ ಕಿಂತಾಬಿ ಲೈ ತುಕಾಚ್ ದಿತಾ, ಮಟ್ಲ್ಯಾನ್.