1 ಎಕ್ ದಿಸಾ ಲಾಬಾನಾಚ್ಯಾ ಲೆಕಾನಿ, "ಅಮ್ಚ್ಯಾ ಬಾಬಾಚಿ ಆಸ್ತಿ ಸಗ್ಳಿ ಜಾಕೊಬಾಚೊ ವಾಟೊ ಹೊಲಾ; ಅನಿ ಅಮ್ಚ್ಯಾ ಬಾಬಾಚ್ಯಾ ಆಸ್ತಿನ್ ತೊ ಲೈ ಸಾವ್ಕಾರ್ ಹೊಲೊ" ಮನುನ್ ಸಾಂಗ್ತಲಿ ಗೊಸ್ಟ್ ಜಾಕೊಬಾಕ್ ಆಯ್ಕೊ ಯೆಲಿ. 2 ತನ್ನಾ ಜಾಕೊಬಾನ್ ಲಾಬಾನಾಚೆ ತೊಂಡ್ ಬಗ್ತಾನಾ ತೊ ಅದ್ದಿ ಪ್ರೆಮಾನ್ ಹೊತ್ತ್ಯಾ ಸಾರ್ಕೆ ಅತ್ತಾ ದಿಸಿ ನಸಿ. 3 ತನ್ನಾ ಸರ್ವೆಸ್ಪರ್ ದೆವಾನ್ ಜಾಕೊಬಾಕ್ ತಿಯಾ ತುಜ್ಯಾ ಸಮಂದಿಕಾಂಚ್ಯಾಕ್ಡೆ ತುಜ್ಯಾ ಬಾಬಾಚ್ಯಾ ದೆಸಾಕ್ ಪರ್‍ತುನ್ ಜಾ; ಮಿಯಾ ತುಜ್ಯಾ ವಾಂಗ್ಡಾ ರ್‍ಹಾತಾ ಮನುನ್ ಸಾಂಗ್ಲ್ಯಾನ್.

4 ಅಸೆ ರ್‍ಹಾತಾನಾ ತೆನಿ ರಾಖೆಲಾಕ್ ಅನಿ ಲೆಯಾ ಅಪ್ನಿ ಬಕ್ರಿರಾಕ್ತಲ್ಯಾ ಸೆತಾಕ್ ಭೆಟುಕ್ ಯೆವಾ ಮನುನ್ ಸಾಂಗುನ್ ಧಾಡ್ಲ್ಯಾನ್. 5 ಅನಿ ತೆಂಕಾ, ತುಮ್ಚ್ಯಾ ಬಾಬಾಚೆ ತೊಂಡ್ ಬಗ್ತಾನಾ, ಮಾಜ್ಯಾ ವಿಶಯಾತ್ ಅದ್ದಿ ಹೊತ್ತ್ಯಾ ಪ್ರೆಮಾನಿ ನಾ ಸಾರ್ಕೆ ದಿಸುಲ್ಲಾ, ಹೊಲ್ಯಾರ್ಬಿ ಮಾಜ್ಯಾ ಬಾಬಾಚೊ ದೆವ್ ಮಾಜ್ಯಾ ವಾಂಗ್ಡಾ ಹಾಯ್. 6 ಮಿಯಾ ಸಗ್ಳಿ ತಾಕತ್ ವಾಪ್ರುನ್ ತುಮ್ಚ್ಯಾ ಬಾಬಾ ಸಾಟ್ನಿ ಸೆವಾ ಕರ್ಲಾ. 7 ಖರೆ ತುಮ್ಚ್ಯಾ ಬಾಬಾನ್ ಮಾಕಾ ಪಸ್ವುಲ್ಯಾನ್, ಅನಿ ಮಾಜೊ ಪಗಾರ್ ಧಾ ಪಟಿ ಬದಲ್ಲ್ಯಾನ್, ಖರೆ ದೆವಾನ್ ಮಾಕಾ ತೊ ಪಸ್ವುತಲ್ಯಾತ್ನಾ ರಾಕ್ಲ್ಯಾನ್. 8 ಎಗ್ದಾ ಲಾಬಾನಾನ್, ಸೆಳಿ ಬಕ್ರಿಯಾಂಚ್ಯಾ ಪೆಟ್ಯಾತ್ನಿ ಚಿಕ್ಕಿಯ ಹೊತ್ತೆ ತಿಯಾ ಥವ್ನ್ ಘೆ, ತೆಚ್ ತುಕಾ ಪಗಾರ್ ಮನುನ್ ಸಾಂಗ್ಲ್ಯಾನ್, ಮಾನಾ ತೆನಿ ಮನಾ ತ್ಯಾ ಸಗ್ಳ್ಯಾ ಬಕ್ರಿಯಾನಿ ಹಂಡೆ ಬಂಡೆ ರ್‍ಹಾತಲ್ಯಾ ಪೆಟ್ಯಾಕ್ನಿಚ್ ಜಲಮ್ ದಿಲ್ಯಾನಿ, ತೆಜಾ ವೈನಾ ತೆ ಸಗ್ಳಿ ಮಾಜಿ ಹೊಲಿ, ತೆ ಬಗುನ್ ಲಾಬಾನಾನ್, ಅತ್ತಾ ಮಿಯಾ ಹಂಡೆ ಬಂಡೆ ರಾತಲಿ ಬಕ್ರಿಯಾ ಮಾಕಾ ಘೆತಾ, ತಿಯಾ ಒಳಕ್ ರಾತಲಿ ಬಕ್ರಿಯಾ ಘೆ, ಅನಿ ತೆಚ್ ತುಜೆ ಪಗಾರ್ ಮಟ್ಲ್ಯಾನ್, ಮಾನಾ ತೆನಿ ಸಾಂಗ್ತಾನಾ ಸಗ್ಳ್ಯಾ ಬಕ್ರಾನಿ ಒಳಕ್ ಹೊತ್ತೆ ಪೆಟೆಚ್ ಹೊಲೆ.

9 ಅಸಿ ಕರುನ್ ದೆವಾನ್ ಮಾಕಾ ತುಮ್ಚ್ಯಾ ಬಾಬಾಕ್ನಾ ಬಕ್ರಾಂಚೊ ತಾಂಡೊ ಕಾಡುನ್ ದಿಲ್ಯಾನ್.

10 ಜನಾವಾರಾ ಮಿಳ್ತಲ್ಯಾ ಎಳಾರ್ ಮಾಕಾ ಎಕ್ ಸಫಾನ್ ದಿಸ್ಲೆ ತ್ಯಾ ಸಪ್ನಾತ್ ಜನಾವಾರಾ ಮಿಳ್ತಾನಾ ಸಗ್ಳಿ ಪೊಲ್ವ್ಯಾಕ್ನಿ ಟಿಕ್ಕೊ ಅನಿ ಒಳಕ್ ಹೊತ್ತ್ಯಾ ಸಾರ್ಕೆ ದಿಸ್ಲೆ. 11 ತನ್ನಾ ಎಕ್ ದೆವ್ ಧುತಾನ್ ಸಪ್ನಾತ್ ಮಾಕಾ; ಜಾಕೊಬಾ ಮನುನ್ ಬಲ್ವುತಾನಾ, ಮಿಯಾ ಜಾಪ್ ದಿವ್ನ್ "ಮಿಯಾ ಹಿತ್ತೆ ಹಾಯ್" ಮಟ್ಲೊ. 12 ತನ್ನಾ ತೆನಿ ಮಾಕಾ ಹಿತ್ತೆ ಬಗ್: ಟಿಕ್ಕೊಅನಿ ಮಚ್ಚಾ ರ್‍ಹಾತಲೆ ಬಕ್ರಿಯಾ ಎಕುಚ್ ಮಿಳ್ತಾತ್, ಅಸಿ ಹೊವ್ಚೆ ಮನುನ್ ಮಿಯಾಚ್ ಕರಲ್ಲೊ ಮಟ್ಲ್ಯಾನ್ ಅನಿ ತುಕಾ ಲಾಬಾನಾನ್ ಕರಲ್ಲೆ ಅನ್ಯಾಯ್ ಮಿಯಾ ಬಗಟ್ಲಾ ತನ್ನಾ ಉಪಾಜ್ತಲೆ ಪೆಟೆ ಪುರಾ ತುಜಿಚ್ ಹೊಯ್ ಸಾರ್ಕೆ ಕರ್‍ಲೊ. 13 ತುಜ್ಯಾ ವಾಂಗ್ಡಾ ಬೆತೆಲಾತ್ ಯೆಲ್ಲೊ ದೆವ್ ಮಿಯಾಚ್, ತಿಯಾ ಮಾಜ್ಯಾ ಸಾಟ್ನಿ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದಲೈ, ತಿಯಾ ತ್ಯಾ ಬಲಿ ಭೆಟ್ವುತಲ್ಯಾ ಕಟ್ಟ್ಯಾ ವರ್‍ತಿ ಆಲಿವಾಚೆ ತೆಲ್ ಒತುನ್ ಆನ್ ಕರ್ಲೆ, ತನ್ನಾ ತಿಯಾ ಉಪಾಜಲ್ಲ್ಯಾ ಜಾಗ್ಯಾಕ್ ಪರ್‍ತುನ್ ಅತ್ತ್ಯಾಚ್ ಜಾ ಮಟ್ಲ್ಯಾನ್ ಮನುನ್ ಕಳ್ವುಲ್ಯಾನ್, ಮಟ್ಲ್ಯಾನ್.

14 ತನ್ನಾ ರಾಖೆಲ್ ಅನಿ ಲೆಯಾನ್ ಜಾಕೊಬಾಕ್, ಅಮ್ಚ್ಯಾ ಬಾಬಾ ಘರ್‍ಹಾತ್ ಅಮ್ಕಾ ಅನಿ ಕಾಯ್ ಹಕ್ಕ್ ಹಾಯ್, 15 ಅನಿ ತೆನಿ ಅಮ್ಕಾ ದುಸ್ರಾ ದೆಶಾಚ್ಯಾ ಸಾರ್ಕೆ ಬಗ್ಲ್ಯಾನ್; ತೆನಿ ಅಮ್ಕಾ ಇಕುನ್ ಗಾವಲ್ಲೆ ಪೈಸೊ ಪುರಾ ಅಪ್ನಿಚ್ ಕರುನ್ಗೆಟ್ಲ್ಯಾನ್. 16 ಅನಿ ಅಮ್ಚ್ಯಾ ಬಾಬಾಕ್ನಾ ದೆವಾನ್ ಅಮ್ಚಿ ಆಸ್ತಿ ಪುರಾ ಕಾಡುನ್ ಘೆಟ್ಲ್ಯಾನ್ ಅತ್ತಾ ಬಗಟ್ಲ್ಯಾರ್ ತಿ ಆಸ್ತಿ ಪುರಾ ಅಮ್ಚ್ಯಾ ಪೊರಾಕ್ನಿ ಗಾವ್ಲಾ ತನ್ನಾ ತಿಯಾ ದೆವ್ ಕಸೊ ಸಾಂಗ್ತಾ ತಸೆಚ್ ಕರ್ ಮಟ್ಲ್ಯಾನಿ.

17 ತನ್ನಾ ಜಾಕೊಬಾನ್, ಅಪ್ನಾಚ್ಯಾ ಪೊರಾಕ್ನಿ ಅನಿ ಬಾಯ್ಕಾಕ್ನಿ ಒಂಟಿಚ್ಯಾ ವರ್‍ತಿ ಬಸ್ವುನ್, 18 ಅನಿ ಖಮ್ವಲ್ಲಿ ಸಗ್ಳಿ ಆಸ್ತಿ ಅನಿ ಮೆಸೊಪೊಟೊಮಿಯಾ ದೆಸಾತ್ ಖಮ್ವಲ್ಲಿ ಸಗ್ಳೆ ಜನಾವಾರಾ ಘೆವ್ನ್ ಕಾನಾನ್ ದೆಸಾಕ್ ಅಪ್ಲೊ ಬಾಬಾ ಇಸಾಕಾಕ್ಡೆ ಗೆಲೊ. 19 ತೆನಿ ಜಾತಲ್ಯಾ ಎಳಾರ್ ಲಾಬಾನ್ ಅಪ್ನಾಚ್ಯಾ ಬಕ್ರಿಯಾಂಚೆ ಕೆಸಾ ಕಾತ್ರುಕ್ ಮನುನ್ ಘೆಲ್ಲೊ ರ್‍ಹಾತಾ ತನ್ನಾ ಬಾಬಾ ನತ್ತೆ ಬಗುನ್ ರಾಖೆಲಾನ್ ತೆಜಾ ಘರ್‍ಹಾತ್ ಜಾವ್ನ್ ತೆಚಿ ಕುಲ್ ದೆವಾಚಿ ಮುರ್ತಿಯಾ ಚೊರುನ್ ನೆಲಿನ್.

20 ಅನಿ ಜಾಕೊಬ್ ಬಿ ಅಪ್ನಿ ಜಾತಾ ಮನುನ್ ಅರಾಮ್ಯಾತ್ಲ್ಯಾ ಲಾಬಾನಾಕ್ ಸಾಂಗಿ ನಸ್ತಾನಾ ತೆಕಾ ಪಸ್ವುನ್ ಪಳುನ್ ಗೆಲೊ. 21 ಅನಿ ತೆನಿ ಅಪ್ನಾಚಿ ಆಸ್ತಿ ಫುರಾ ಘೆವ್ನ್ ಪಳುನ್ ಜಾವ್ನ್ ಯುಪ್ರಾಟಿಸ್ ಮನ್ತಲಿ ಮೊಟಿ ನ್ಹಯಿಕ್ ದಾಟುನ್ ಗಿಲ್ಯಾದ್ ಮನ್ತಲ್ಯಾ ಮಡ್ಡಿರ್ ಗೆಲೊ.

22 ತಿನ್ ದಿಸಾ ಹೊಲ್ಲ್ಯಾ ಮಾನಾ ಜಾಕೊಬ್ ಪಳುನ್ ಗೆಲ್ಲಿ ಖಬರ್ ಲಾಬಾನಾಕ್ ಕಳ್ಳಿ. 23 ಮಾನಾ ಲಾಬಾನ್ ಅಪ್ನಾಚ್ಯಾ ಲೊಕಾಕ್ನಿ ಘೆವ್ನ್ ಜಾಕೊಬಾಚಿ ಪಾಟ್ ಲಾಗುನ್ ಸಾತ್ ದಿಸಾಚ್ಯಾ ಮಾನಾ ಗಿಲ್ಯಾದಾಚ್ಯಾ ಮಡ್ಡಿಕ್ ಜಾವ್ನ್ ಭೆಟ್ಲೊ. 24 ತ್ಯಾ ದಿಸಿ ರಾತ್ತಿನ್ ಅರಾಮ್ಯಾತ್ಲ್ಯಾ ಲಾಬಾನಾಚ್ಯಾ ಸಪ್ನಾತ್ ದೆವ್ ಯೆವ್ನ್ "ಬಗ್", ಜಾಕೊಬಾಕ್ ತಿಯಾ ಕಾಯ್ಬಿ ಬರೆ ನಾತರ್ ಬುರ್ಸೆ ಸಾಂಗುನಕ್ಕೊ ಮಟ್ಲ್ಯಾನ್. 25 ದುಸ್ರೆ ದಿಸಾ ಲಾಬಾನ್ ಜಾಕೊಬಾಕ್ ಜಾವ್ನ್ ಭೆಟ್ಲ್ಯಾನ್, ತನ್ನಾ ಜಾಕೊಬ್ ಮಡ್ಡಿಚ್ಯಾ ವರ್‍ತಿ ಝೊಪ್ಡೆ ಭಾಂದುನ್ ಘೆವ್ನ್ ಹೊತ್ತೊ ಮಾನಾ ಲಾಬಾನಾಬಿ ತ್ಯಾ ಮಡ್ಡಿ ವರ್‍ತಿ ಅಪ್ಲ್ಯಾ ಸಮಂದಿಕಾಕ್ನಿ ಗೊಳಾ ಕರುನ್ ಝೊಪ್ಡೆ ಭಾಂದುನ್ ಘೆಟ್ಲ್ಯಾನ್.

26 ಮಾನಾ ಲಾಬಾನಾನ್ ಜಾಕೊಬಾಕ್, ತಿಯಾ ಅಸೆ ಕಶ್ಯಾಕ್ ಕರ್ಲೆ ಮಾಜ್ಯಾ ದೊನಿ ಲೆಕಿಯಾಕ್ನಿಬಿ ಯುದ್ದಾತ್ನಾ ಬಂಧಿಕರುನ್ ನ್ಹೆತಲ್ಯಾಂಚ್ಯಾ ಸಾರ್ಕೆ ಮಾಕಾಬಿ ಸಾಂಗಿ ನಸ್ತಾನಾ ಯೆಲೆ? 27 ತಿಯಾ ಮಾಕಾ ಸಾಂಗಿ ನಸ್ತಾನಾ ಕಶ್ಯಾಕ್ ಪಸ್ವುನ್ ಯೆಲೆ? ಅನಿ ತಿಯಾ ಮಾಕಾ ಸಾಂಗಲ್ಲೆ ರಾಲ್ಯಾರ್ ಮಿಯಾ ತುಕಾ ಖುಶಿನ್ ಥೈ ಗಿತಾ ಗಾವುನ್ ಅನಿ ವಾಜಾಪ್ ವಾಜ್ವುನ್ ಧಾಡುನ್ ದಿಯ್ ಹೊತ್ತೊ. 28 ತಿಯಾ ಕರಲ್ಯಾ ಮಂಡ್ ಪಾನಾ ವೈನಾ ಮಿಯಾ ಮಾಜ್ಯಾ ನಾತವಾಕ್ನಿ ಉಪ್ಪಾ ದಿವ್ನ್ ಅನಿ ಲೆಕಿಯಾಕ್ನಿ ಜಾವ್ನ್ ಯೆವಾ ಮನುನ್ ಧಾಡುಕ್ಬಿ ನಾ. 29 ಮಿಯಾ ತುಕಾ ಕಾಯ್ಬಿ ಬುರ್ಸೆ ಕರುಕ್ ಹೊತಾ ಖರೆ ತುಜಾ ಬಾಬಾಚ್ಯಾ ದೆವಾನ್ ಕಾಲ್ ರ್‍ಹಾತ್ತಿ ಮಾಜ್ಯಾ ಸಪ್ನಾತ್ ಯೆವ್ನ್ ತುಕಾ ಕಾಯ್ಬಿ ಬುರ್ಸೆ ಕರುನ್ಹಯ್ ಮನುನ್ ಉಶಾರ್ಕಿ ದಿಲಾ. 30 ತುಕಾ ತುಜ್ಯಾ ಬಾಬಾಚ್ಯಾ ಘರಾಕ್ ಪಾಟಿ ಪರ್‍ತುನ್ ಜಾತಲೆ ಮನ್ ಹಾಯ್ ಮನುನ್ ಮಾಕಾ ಕಳಲ್ಲೆ , ಖರೆ ಮಾಜ್ಯಾ ಘರ್‍ಹಾತ್ನಾ ತಿಯಾ ಮಾಜಿ ಮುರ್ತಿಯಾ ಕಶ್ಯಾಕ್ ಚೊರುನ್ ಹಾನ್ಲೈ? ಮನುನ್ ಇಚಾರ್‍ಲ್ಯಾನಿ.

31 ತನ್ನಾ ಜಾಕೊಬಾನ್ ತೆಕಾ, ತಿಯಾ ತುಜ್ಯಾ ಲೆಕಿಯಾಕ್ನಿ ಮಾಜ್ಯಾಕ್ನಾ ಕಾಡುನ್ ಘೆತೈ ಮನ್ತಲ್ಯಾ ಭ್ಹಿಯಾನ್ ಮಿಯಾ ಸಾಂಗಿ ನಸ್ತಾನಾ ಪಳುನ್ ಯೆಲೊ, 32 ಖರೆ ಮಿಯಾ ತುಜಿ ಖಲಿಬಿ ಮುರ್ತಿಯಾ ಚೊರುನ್ ಹಾನುಕ್ ನಾ, ತುಜಿ ಮುರ್ತಿ ಕೊನ್ಬಿ ಚೊರುನ್ ಹಾನಲ್ಲೆ ರಾಲ್ಯಾರ್ ತೆಕಾ ಜಿವಾನಿ ಮಾರ್ತಲಿ ಶಿಕ್ಷ್ಯಾ ಹೊಂವ್ದಿತ್ ಮಟ್ಲ್ಯಾನ್, ಖರೆ ಜಾಕೊಬಾಕ್ ರಾಖೆಲಾನುಚ್ ಲಾಬಾನಾಚಿ ಮುರ್ತಿಯಾ ಚೊರುನ್ ಹಾನಲ್ಲಿ ಗೊತ್ತ್ ನತ್ತೆ,

33 ಮಾನಾ ಲಾಬಾನ್ ಜಾವ್ನ್ ಜಾಕೊಬಾಚ್ಯಾ ಝೊಪ್ಡ್ಯಾತ್ ಹುಡಕ್ಲ್ಯಾನ್, ಅನಿ ಲೆಯಾಚ್ಯಾಬಿ ಝೊಪ್ಡ್ಯಾತ್ ಹುಡಕ್ಲ್ಯಾನ್, ಮಾನಾ ತೆಂಚ್ಯಾ ದಾಸಿಚ್ಯಾ ಝೊಪ್ಡ್ಯಾತ್ ಹುಡ್ಕುನ್ ಖರೆ ಥೈಬಿ ತೆಕಾ ತೆಚಿ ಮುರ್ತಿಯಾ ಗಾವ್ಕ್ ನಾತ್ ಮಾನಾ ಥೈತ್ನಾ ರಾಖೆಲಾಚ್ಯಾ ಝೊಪ್ಡ್ಯಾಕ್ ಗೆಲೊ, 34 ಅನಿ ತಿಚ್ಯಾ ಝೊಪ್ಡ್ಯಾತ್ ಕವ್ಡೆ ಹುಡಕ್ಲ್ಯಾಬಿ ತೆಕಾ ಕಾಯ್ ಗಾವ್ಕ್ ನಾ, ತ್ಯಾ ಎಳಾರ್ ರಾಖೆಲ್ ತೆಕಾ ತೆಚಿ ಮುರ್ತಿಯಾ ಗಾವುಕ್ ನಾ, ತಿ ಮುರ್ತಿಯಾ ಒಂಟಿಯಾಂಚ್ಯಾ ವೈನಿ ಭಾಂದಲ್ಲ್ಯಾ ಪಿಸ್ವಿತ್ ಘಾಲುನ್ ತೆಚ್ಯಾ ವರ್‍ತಿ ಚಡುನ್ ಭಸಲ್ಲಿ. 35 ಅನಿ ರಾಖೆಲಾನ್ ಬಾಬಾಕ್, ಬಾಬಾ ತಿಯಾ ಮಾಜ್ಯಾ ವರ್‍ತಿ ರಾಗ್ ಕರು ನಕ್ಕೊ, ಮಿಯಾ ತುಜ್ಯಾ ಇದ್ರಾಕ್ ಉಟುನ್ ಇಬೆ ರಾಯ್‍ ಸಾರ್ಕೆ ನಾ ಕಶ್ಯಾಕ್ ಮಟ್ಲ್ಯಾರ್ ಮಾಕಾ ಬಾಯ್ಕಾ ಮನ್ಸಾಕ್ನಿ ಹೊತಲಿ ಮೈನ್ಯಾಚಿ ಪಾಳಿ ಹೊಲಾ ಮಟ್ಲಿನ್, ತನ್ನಾ ಲಾಬಾನಾನ್ ಹುಡಕ್ಲ್ಯಾರ್ಬಿ ತೆಕಾ ಕಾಯ್ ಗಾವ್ಕ್ ನಾ. 36 ತನ್ನಾ ಜಾಕೊಬಾನ್ ಲಾಬಾನಾಚ್ಯಾ ವರ್‍ತಿ ರಾಗಾನ್ ಗಾಳಿ ದಿವ್ನ್ ತಿಯಾ ತವ್ಡ್ಯಾ ಲಗ್ಗುನಾ ಮಾಜ್ಯಾ ಫಾಟ್ನಾ ಯೆವ್ಕ್ ಮಿಯಾ ಕಾಯ್ ಚುಕ್ ಕರ್ಲಾ? ಮನುನ್ ಇಚಾರ್‍ಲ್ಯಾನಿ. 37 ಅನಿ ಮಾಜ್ಯಾ ಸಾಮಾನಾತ್ನಿ ಹುಡ್ಕುನ್ ಬಗಟ್ಲ್ಯಾರ್ಬಿ ತುಜೆ ವಸ್ತ್ ಕಾಯ್ಬಿ ಗಾವ್ಕ್ ನಾ ಖರೆ ತಸ್ಲೆ ಕಾಯ್ಬಿ ತುಕಾ ಗಾವ್ಲ್ಯಾರ್ಬಿ ತಿಯಾ ಮಾಜ್ಯಾ ಅನಿ ತುಜ್ಯಾ ಲೊಕಾಂಚ್ಯಾ ಇದ್ರಾಕ್ ಹಾನುನ್ ದಾಕ್ವು ಅಮ್ಚ್ಯಾತ್ ಕೊನ್ ಸಮಾ ಹಾತ್ ಮನುನ್ ತೆನಿಚ್ ನಿರ್ದಾರ್ ಕರುಂದಿತ್ ಮಟ್ಲ್ಯಾನ್. 38 ಖರೆ ಮಿಯಾ ತುಜ್ಯಾಕ್ಡೆ ವಿಸ್ ವರಿಸ್ ಪತರ್ ಕಾಮ್ ಕರ್‍ಲೊ, ಅನಿ ಖರೆ ತುಜ್ಯಾ ಬಕ್ರಾಂಚ್ಯಾ ತಾಂಡ್ಯಾತ್ ಹೊಂವ್ದಿತ್ ಶೆಳಿಯಾಂಚ್ಯಾ ತಾಂಡ್ಯಾತ್ ಹೊಂವ್ದಿತ್ ಎಕ್ಬಿ ಪೆಟೊ ಮರುಕ್ ನಾ ಅನಿ ಮಿಯಾ ತುಜಿ ಎಕ್ಬಿ ಬಕ್ರಿಯಾತ್ನಿ ಎಕ್ಬಿ ಮಿಯಾ ಖಾವ್ಕ್ ನಾ. 39 ಕ್ರುರ್ ಜನಾವಾರಾ ಬಕ್ರಾಕ್ನಿ ಜಿವ್ ಕಾಡ್ಲ್ಯಾರ್ಬಿ ತೆಚ್ಯಾ ಬದ್ಲಾಕ್ ಮಾಜಿ ಬಕ್ರಿಯಾ ಘೆಟಲೈ ಮರುನ್ ಗೆಲ್ಲ್ಯಾ ಜನಾವಾರಾ ಮಾಜ್ಯಾಕ್ನಾ ಕಾಯ್ಬಿ ಚುಕ್ ನಾ ಮನುನ್ ಮಿಯಾ ತುಕಾ ಸಾಂಗ್ಲಾ, ಕೊನಿಬಿ ರಾತ್ತಿನ್ ಹೊಂವ್ದಿ ದಿಸಾನ್ ಹೊಂವ್ದಿತ್ ಚೊರುನ್ ಘೆವ್ನ್ ಗೆಲ್ಲ್ಯಾಚಾ ಬದ್ಲಾಕ್ ತಿಯಾ ಮಾಜೆಕ್ನಾ ಜನಾವಾರ್ ಘೆಟಲೈ ನ್ಹಯ್. 40 ದಿಸಾನಿ ನಿಂಬಾರ್ ರಾತ್ತಿನ್ ಥಂಡಿತ್ ಡಂಗ್ಳಿತ್ ಮಿಯಾ ತರಾಸ್ ಕರುನ್ ಘೆಟ್ಲೊ; ತನ್ನಾ ಬಿ ಮಾಕಾ ನಿಜುಕ್ ಹೊವ್ಕ್ ನಾ; ಮಾಜಿ ಗತ್ ಅಸಿ ಹೊತ್ತಿ. 41 ಅನಿ ಇಸ್ ವರಿಸ್ ಪತರ್ ತುಜಾ ಘರ್‍ಹಾತ್ ಹೊತ್ತೊ; ಅನಿ ತುಜ್ಯಾ ಲೆಕಿಯಾಂಚ್ಯಾ ಸಾಟ್ನಿ ಚವ್ದಾ ವರಿಸ್ ಪತರ್ ಅನಿ ತುಜ್ಯಾ ಬಕ್ರಿಯಾಂಚ್ಯಾ ಸಾಟ್ನಿ ಸಾ ವರಿಸ್ ಪಾತರ್ ಸೆವಾ ಕರ್‍ಲೊ, ಖರೆ ತಿಯಾ ಮಾಜೆ ಪಗಾರ್ ಧಾ ಪಟಿ ಬದಲೈ. 42 ಖರೆ ಮಾಜೊ ಬಾಬಾ ಅಬ್ರಾಹಾಮಾಚೊ ದೆವ್ ಅನಿ ಇಸಾಕಾನ್ ಭಕ್ತಿನ್ ಆರಾದನ್ ಕರಲ್ಲೊ ದೆವ್ ಮಾಜ್ಯಾ ವಾಂಗ್ಡಾ ನಾ ಹೊಲ್ಯಾರ್ ತಿಯಾ ಮಾಕಾ ಖಾಲಿ ಹಾತಿನ್ ಧಾಡಿ ಹೊತ್ತೈ, ಮಾಜೊ ತರಾಸ್ ಅನಿ ಕಾಮ್ ಬಗುನ್ ಕಾಲ್ಚ್ಯಾ ರ್‍ಹಾತ್ತಿ ದೆವಾನ್ ತುಕಾ ಕಾಯ್ಬಿ ಕರುನಕ್ಕೊ ಮನುನ್ ಸಾಂಗ್ಲ್ಯಾನ್ ಮಟ್ಲ್ಯಾನ್.

43 ತನ್ನಾ ಜಾಕೊಬಾಕ್, ಹಿ ತುಜಿ ಬಾಯ್ಕಾ ಮಾಜಿ ಲೆಕಿಯಾ ಅನಿ ಹಿ ತುಜಿ ಪೊರಾ ಮಾಜಿ ನಾತ್ರಾ; ಅನಿ ಹಿ ಜನಾವಾರಾ ಸಗ್ಳಿ ಮಾಜಿ ಅನಿ ಹಿತ್ತೆ ತುಜೆ ಮನುನ್ ಕಾಯ್ಬಿ ಹಾಯ್ ಕಾಯ್ ಬಗ್ ಖರೆ ಮಿಯಾ ಮಾಜ್ಯಾ ನಾತ್ರಾಂಚ್ಯಾ ಸಾಟ್ನಿ ಅನಿ ಲೆಕಿಯಾಂಚ್ಯಾ ಸಾಟ್ನಿ ಕಾಯ್ಬಿ ಕರುಕ್ ನಾ ಮಟ್ಲ್ಯಾನ್. 44 ತನ್ನಾ ಮಿಯಾ ತುಜ್ಯಾ ವಾಂಗ್ಡಾ ಎಕ್ ಕರಾರ್ ಕರುನ್ ಘೆಂವ್ವಾ, ತನ್ನಾ ಅಮ್ಚ್ಯಾ ಖರಾರಾಕ್ ಸಾಕ್ಷಿ ಹೊವ್ನ್ ರ್‍ಹಾತಾ, ಮಟ್ಲ್ಯಾನ್.

45 ತನ್ನಾ ತೆನಿ ಎಕ್ ಗುಂಡೊ ನಿಟ್ಟ್ ಇಬೆ ಕರ್ಲ್ಯಾನ್. 46 ಅನಿ ತೆನಿ ಅಪ್ಲ್ಯಾ ಭಾವಾಕ್ನಿ; "ಗುಂಡ್ಯಾಂಚೊ ಗುಂಪೊ ಕರಾ" ಮಟ್ಲ್ಯಾನ್, ತನ್ನಾ ತೆನಿ ಗೊಳಾ ಕರ್ಲ್ಯಾನಿ, ಮಾನಾ ತೆನಿ ತ್ಯಾ ಗುಂಡ್ಯಾಂಚ್ಯಾ ಗುಂಪ್ಯಾಕ್ಡೆ ಬಸುನ್ ಜೆವಾನ್ ಕರ್ಲ್ಯಾನಿ. 47 ತನ್ನಾ ಲಾಬಾನಾನ್‍ ತ್ಯಾ ಜಾಗ್ಯಾಕ್ ಯಗರ್ ಸಾಹದುತ್ ಮನುನ್ ನಾವ್ ಥವ್ಲ್ಯಾನ್ ಅನಿ ಜಾಕೊಬಾನ್ ಗಲಿದ್ ಮನುನ್ ಎಕ್ ನಾವ್ ಥವ್ತಾ. 48 ತನ್ನಾ ಲಾಬಾನಾನ್ ಜಾಕೊಬಾಕ್, "ಗಲಿದ್ ಮನ್ತಲೊ ಹ್ಯೊ ಗುಂಡ್ಯಾಂಚೊ ಗುಂಪೊ ಮಾಜ್ಯಾ ಅನಿ ತುಜ್ಯಾ ಮದ್ದಿ ಎಕ್ ಸಾಕ್ಷಿ ಹೊವ್ನ್ ಹಾಯ್" ಮಟ್ಲ್ಯಾನ್ . 49 ಅಸಿ ರ್‍ಹಾತಾನಾ: "ಅಮಿ ದೊಗೆಬಿ ದುರ್ ಹೊಯ್ನಾ ಸಾರ್ಕೆ ಸರ್ವೆಸ್ಪರ್ ದೆವಾನ್ ಅಮ್ಕಾ ಬಗುನ್ಗೆತ್ ರಾಂವ್ದಿತ್" ಮನುನ್ ಲಾಬಾನಾನ್, ತ್ಯಾ ಜಾಗ್ಯಾಕ್ ಮಿಚ್ಪಾ ಮನುನ್ ನಾವ್ ಥವ್ಲ್ಯಾನ್. 50 ಖರೆ ಲಾಬಾನಾನ್ "ಮಾಜ್ಯಾ ಲೆಕಿಯಾಕ್ನಿ ತಿಯಾ ಮನ್ ದುಕ್ವುನ್ ದುಸ್ರಾ ಚೆಡ್ವಾಕ್ ಲಗಿನ್ ಹೊಲ್ಯಾರ್, ಇಚಾರ್ ಕರುಕ್ ಕೊನ್ಬಿ ನಾಹೊಲ್ಯಾರ್ ಅಮ್ಚೊ ದೆವುಚ್ ಅಮ್ಕಾ ಸಾಕ್ಷಿ ಹೊವ್ನ್ ರ್‍ಹಾತಾ" ಮಟ್ಲ್ಯಾನ್.

51 ಅಸಿ ರ್‍ಹಾತಾನಾ ಜಾಕೊಬಾಕ್; ತುಜ್ಯಾ ಅನಿ ಮಾಜ್ಯಾ ಮದ್ದಿ ಮಿಯಾ ಇಬೆ ಕರಲ್ಲೊ ಹ್ಯೊ ಖಾಂಬೊ ಬಗ್, ಅನಿ ಗುಂಡ್ಯಾಂಚೊ ಗುಂಪೊ ಬಗ್, 52 ಮಿಯಾ ತುಕಾ ವಾಯ್ಟ್ ಕರುಕ್ ಮನುನ್ ಹ್ಯಾ ಗೊಂಡ್ಯಾಂಚೊ ಗುಂಪೊ ದಾಟುನ್ ತುಜ್ಯಾ ಜಗ್ಗೊಳ್ ಯೆಯ್ನಾ; ತಸೆಚ್ ತಿಯಾಬಿ ಹ್ಯಾ ಗುಂಡ್ಯಾಚೊ ಗುಂಪೊ ಅನಿ ಖಾಂಬೊ ದಾಟುನ್ ಯೆವ್ ನಕ್ಕೊ. 53 ನಾತರ್ ಅಮ್ಚ್ಯಾತ್ ಕೊನ್ ತರ್ಬಿ ಹ್ಯೊ ಕರಾರ್ ಮೊಡ್ಲ್ಯಾರ್ ತೆಂಕಾ ಅಬ್ರಾಹಾಮಾಚೊ ಅನಿ ನಾಹೊರಾಚೊ ಅನಿ ತೆಂಚ್ಯಾ ಬಾಬಾಚೊ ದೆವ್ ಮಾಕಾ ಅನಿ ತುಕಾ ಝಡ್ತಿ ಕರುಂದಿತ್, ಮಟ್ಲ್ಯಾನ್ ಅನಿ ಇಸಾಕ್ ಭಯಭಕ್ತಿನ್ ಆರಾದನ್ ಕರ್‍ತಲ್ಯಾ ದೆವಾಚ್ಯಾ ನಾಂವಾರ್ ಆನ್ ಕರ್ಲ್ಯಾನಿ. 54 ತನ್ನಾ ಜಾಕೊಬಾನ್ ಮಡ್ಡಿಚ್ಯಾ ವರ್‍ತಿ ಜನಾವಾರಾಕ್ ಮಾರುನ್ ದೆವಾಕ್ ಬಲಿ ಭೆಟ್ವುಲ್ಯಾನ್ ಅನಿ ಅಪ್ಲ್ಯಾ ಸಗ್ಳ್ಯಾ ಸಮಂದಕಾಕ್ನಿ ಜೆವಾನ್ ಘಾಟ್ಲ್ಯಾನ್, ಮಾನಾ ತೆನಿ ಜೆವಾನ್ ಕರುನ್ ತ್ಯಾ ರಾತ್ತಿನ್ ತ್ಯಾ ಮಡ್ಡಿ ವರ್‍ತಿ ವಸ್ತಿ ರಾಲ್ಯಾನಿ. 55 ಮಾನಾ ದುಸ್ರೆ ದಿಸಿ ಲಾಬಾನಾನ್ ಅಪ್ಲ್ಯಾ ಲೆಕಿಯಾಕ್ನಿ ಅನಿ ನಾತ್ರಾಕ್ನಿ ಆಶಿರ್ವಾದ್ ಕರುನ್ ಭೆಟುನ್ ಉಪ್ಪಾ ದಿವ್ನ್ ಅಪ್ಲ್ಯಾ ಘರಾಕ್ ಪರ್‍ತುನ್ ಗೆಲೊ.