ಉತ್ಪತ್ತಿ 24

ಇಸಾಕ್ ಅನಿ ರೆಬೆಕ್ಕಾ

1 ಅಬ್ರಾಹಾಮ್ ಲೈ ಮ್ಹಾತಾರೊ ಹೊತಾ ತನ್ನಾ ಸರ್ವೆಸ್ಪರ್ ದೆವಾನ್ ತೆಚ್ಯಾ ಸಗ್ಳ್ಯಾ ಕರಲ್ಯಾ ಕಾಮಾತ್ ಆಶಿರ್ವಾದ್ ದಿಲ್ಯಾನ್. 2 ಅಬ್ರಾಹಾಮಾಚೆ ಸಗ್ಳಿ ಆಸ್ತಿ ಬಗುನ್ ಘೆತಲೊ ಎಕ್ ಜಾಂಟೊ ಆಳ್ ರ್‍ಹಾತಾ, ಅಬ್ರಾಹಾಮ್ ತೆಕಾ ಬಲ್ವುನ್, ತುಜೊ ಹಾತ್ ಮಾಜ್ಯಾ ಜಾಂಗೆಚ್ಯಾ ಬುಡಿ ಥವ್, 3 ಜಿಮಿನ್ ಅನಿ ಮಳಬ್ ರಚಲ್ಯಾ ಸರ್ವೆಸ್ಪರಾಚ್ಯಾ ನಾವಾನ್ ಮಾಜ್ಯಾ ಲೆಕಾ ಸಾಟ್ನಿ ಮಿಯಾ ಜಿವನ್ ಕರ್‍ತಲ್ಯಾ ಕಾನಾನ್ ದೆಶ್ಯಾತ್ನಾ ಚೆಡು ಹುಡ್ಕುನ್ ಹಾನಿನಾ ಮನುನ್ ಭಾಸ್ ದಿ, 4 ತಿಯಾ ಮಾಜ್ಯಾ ಸ್ವತ್ಯಾಚ್ಯಾ ಲೊಕಾಂಚ್ಯಾಕ್ಡೆ ಮಟ್ಲ್ಯಾರ್ ಮಿಯಾ ಉಪಾಜಲ್ಲ್ಯಾ ಜಾಗ್ಯಾರ್ ಜಾವ್ನ್ ಮಾಜ್ಯಾ ಸಮಂಧಿಕಾತ್ನಾ ಇಸಾಕಾಕ್ ಬಾಯ್ಕೊ ಹಾನ್.

5 ತನ್ನಾ ತ್ಯಾ ಸೆವಕಾನ್, ತೆ ಚೆಡು ಮಾಜ್ಯಾ ವಾಂಗ್ಡಾ ಹ್ಯಾ ದೆಸಾಕ್ ಯೆಯ್ ನಸ್ಲ್ಯಾರ್, ತುಜಾ ಲೆಕಾಕ್ ತುಜ್ಯಾ ಸ್ವತ್ಯಾಚ್ಯಾ ಜಾಗ್ಯಾಕ್ ಧಾಡುಚೆ ಕಾಯ್? ಮನುನ್ ಇಚಾರ್‍ಲ್ಯಾನಿ.

6 ತನ್ನಾ ಅಬ್ರಾಹಾಮಾನ್, "ನಾ, ಮಾಜ್ಯಾ ಲೆಕಾಕ್ ಪಾಟಿ ಧಾಡುನಕ್ಕೊ. 7 ಕಶ್ಯಾಕ್ ಮಟ್ಲ್ಯಾರ್ ಸರ್ವೆಸ್ಪರ್ ದೆವ್ ಮಾಜ್ಯಾ ಲೆಕಾಕ್ ಎಕ್ ಚೆಡು ಹುಡ್ಕುನ್ ಹಾನುಕ್ ದೆವ್ ಧುತಾಕ್ ಫಿಡೆ ದಾಡ್ತಾ, ಅನಿ ದೆವಾನ್ ಮಾಕಾ ಅನಿ ಮಾಜ್ಯಾ ಪಿಳ್ಗಿಕ್ ಹ್ಯೊ ದೆಶ್ ದಿತಾ ಮನುನ್ ಗೊಸ್ಟ್ ದಿಲಾ" ಮಟ್ಲ್ಯಾನ್. 8 ಖರೆ ತೆ ಚೆಡು ತುಜ್ಯಾ ವಾಂಗ್ಡಾ ಯೆವ್ಕ್ ಮಾನಿ ನಸ್ಲ್ಯಾರ್, ತಿಯಾ ತ್ಯಾ ಆನಾತ್ನಾ ಸುಟ್ಕಾ ಹೊತೈ, ಖರೆ ತಿಯಾ ಮಾಜ್ಯಾ ಲೆಕಾಕ್ ಥೈ ಜಾಯ್ ಸಾರ್ಕೆ ಕರುನುಕ್ಕೊ ಮನುನ್ ಸಾಂಗ್ಲ್ಯಾನ್.

9 ತಸೆ ಹೊವ್ನ್ ತ್ಯಾ ಸೆವಕಾನ್ ಅಪ್ಲೊ ಯಜಮಾನ್ ಅಬ್ರಾಹಾಮಾಚ್ಯಾ ಜಾಂಗೆಚ್ಯಾ ಬುಡಿ ಹಾತ್ ಥವ್ನ್ ಭಾಸ್ ದಿಲ್ಯಾನ್.

10 ಅನಿ ಅಬ್ರಾಹಾಮಾಚಿ ಧಾ ಒಂಟಿಯಾಚ್ಯಾ ವರ್‍ತಿ ಲೈ ಕಿಮ್ತತಿಚಿ ವಸ್ತಾ ವಾಂವುನ್ ನಾಹೊರ್ ವಸ್ತಿ ರ್‍ಹಾತಲ್ಯಾ, ಮೆಸೊಪೊಟೊಮಿಯಾ ಮನ್ತಲ್ಯಾ ಶಾರಾಕ್ ಯೆವ್ನ್ ಪಾವ್ಲೊ. 11 ತೊ ಜಾವ್ನ್ ಪಾವಲ್ಲ್ಯಾ ಮಾನಾ ಶಾರಾಚ್ಯಾ ಭಾಯ್ರ್ ಹೊತ್ತ್ಯಾ ಭಾಂಯಿಚ್ಯಾ ಜಗ್ಗೊಳ್ ಒಂಟಿಯಾಕ್ನಿ ಡೊಗ್ಲಾ ಠೆಕ್ವುಲ್ಯಾನ್, ಸಾಂಚೆಕ್ಡೆ ತ್ಯಾ ಗಾವಾತ್ಲಿ ಬಾಯ್ಕಾಮನ್ಸಾ ಭಾಂಯ್ಕ್ ಪಾನಿ ನೆವ್ಕ್ ಯೆಯ್ತ್. 12 ತನ್ನಾ ತ್ಯಾ ಸೆವಕಾನ್, ಮಾಜೊ ಯಜಮಾನ್ ಅಬ್ರಾಹಾಮಾಚ್ಯಾ ಸರ್ವೆಸ್ಪರ್ ದೆವಾ, ಆಜ್ ತಿಯಾ ಮಾಜ್ಯಾ ಯಜಮಾನಾಕ್ ಕರಲ್ಲೆ ಕರಾರ್ ಮಜತ್ ಹೊಯ್ ಸಾರ್ಕೆ ಕರ್, 13 ತ್ಯಾ ಶಾರಾಚಿ ಚೆಡ್ವಾ ಹ್ಯಾ ಭಾಂಯಿಕ್ ಪಾನಿಯಾಕ್ ಮನುನ್ ಯೆತಾತ್ ತನ್ನಾ ಮಿಯಾ ಹಿತ್ತೆ ಇಬೆ ರ್‍ಹಾತಾ, 14 ಮಿಯಾ ಚೆಡ್ವಾತ್ನಿ ಎಕ್ಲಿಕ್ಡೆ ದಯಾ ಕರುನ್ ಬಿಂದ್ಗೊ ಖಾಲ್ತಿ ಉತ್ರುನ್ ಪಾನಿ ದಿ ಮನುನ್ ಮಾಗ್ತಾ, ತನ್ನಾ ತಿನಿ ತಿಯಾಬಿ ಪಾನಿ ಫಿ ಅನಿ ತುಜ್ಯಾ ಒಂಟಿಯಾಕ್ನಿಬಿ ಪಾನಿ ಪಿವ್ಸು ಮಟ್ಲ್ಯಾರ್ ತಿಚ್ ಮಾಜೊ ಯಜಮಾನ್ ಇಸಾಕಾ ಸಾಟ್ನಿ ತಿಯಾ ಎಚಲ್ಲೆ ಚೆಡು, ಅಸೆ ಹೊಲ್ಯಾರ್ ಮಿಯಾ ಮಾಜ್ಯಾ ಯಜಮಾನಾಕ್ಡೆ ದಿಲ್ಲೊ ಭಾಸ್ ಫುರಾ ಹೊತಾ ಮನುನ್ ಮಾಗ್ನಿ ಕರ್ಲ್ಯಾನ್. 15 ಸೆವಕ್ ಮಾಗ್ನಿ ಕರುನ್ ಸಾರುಚ್ಯಾ ಅದ್ದಿಚ್ ಅಬ್ರಾಹಾಮಾಚೊ ಭಾವ್ ನಾಹೊರ್ ಅನಿ ಮಿಲ್ಕಾಚೊ ಲೆಕ್ ಬೆತುವೆಲಾಚಿ ಲೆಕ್ ರೆಬೆಕ್ಕಾ ಖಾಂಜ್ಯಾ ವರ್‍ತಿ ಬಿಂದ್ಗೊ ಥವ್ನ್ ಘೆವ್ನ್ ಪಾನಿಯಾಕ್ ಭಾಂಯಿಕ್ಡೆ ಯೆಲಿ.

16 ತಿನಿ ಖಾಲ್ತಿ ಉರ್ತುನ್ ಬಿಂದ್ಗ್ಯಾತ್ ಪಾನಿ ಭರುನ್ ಘೆವ್ನ್ ಪರ್‍ತುನ್ ಯೆಲಿ, ತಿ ಲೈ ಸುಂದರ್, ದಾಂಡ್ಗಿ ಅನಿ ಲಿಂಬೆ ಚೆಡು ಹೊವ್ನ್ ರ್‍ಹಾತಾ. 17 ತನ್ನಾ ತ್ಯಾ ಸೆವಕಾನ್, ತೆಚೆಕ್ಡೆ ಪಳುನ್ ಜಾವ್ನ್, "ಬಾಯಿ ದಯಾ ಕರುನ್ ಉಲ್ಲೆ ತುಜ್ಯಾ ಬಿಂದ್ಗ್ಯಾತ್ಲೆ ಪಾನಿ ಫಿವ್ಕ್ ದಿ" ಮನುನ್ ಇಚಾರ್‍ಲ್ಯಾನಿ.

18 ತನ್ನಾಚ್ ತಿನಿ ತೆಕಾ ಅಪ್ಲ್ಯಾ ಖಾಂಜ್ಯಾ ವೈಲೊ ಭರಲ್ಲೊ ಬಿಂದ್ಗೊ ಖಾಲ್ತಿ ಉತ್ರುನ್ "ಪಾನಿ ಫಿ" ಮಟ್ಲಿನ್,

19 ತೆನಿ ಪಾನಿ ಪಿವ್ನ್ ಹೊಲ್ಲ್ಯಾ ಮಾನಾ ತುಮ್ಚ್ಯಾ ಒಂಟ್ಯಾಕ್ನಿ ಮಿಯಾ ಪಾನಿ ಹಾನುನ್ ದಿತಾ ತೆಂಕಾ ಪಾಜೆ ತವ್ಡೆ ಫಿಂವ್ದಿತ್ ಮಟ್ಲಿನ್. 20 ಬಿಂದ್ಗ್ಯಾತ್ಲೆ ಫಿತಲೆ ಪಾನಿ ಡೊನ್ಯಾತ್ ವೊತುನ್ ಅನಿಬಿ ಪಾನಿ ಹಾನುಕ್ ಪರ್‍ತುನ್ ಗೆಲಿ, ಮಾನಾ ತಿನಿ ಲಗ್ಗುನಾ ಭಾಂಯಿಕಡೆ ಜಾವ್ನ್ ಪಾನಿ ಭರುನ್ ಸಗ್ಳ್ಯಾ ಒಂಟ್ಯಾಕ್ನಿ ಪಾನಿ ಹಾನುನ್ ಫಿವ್ಸುಲಿನ್.

21 ಮಾನಾ ತೊ ಗಪ್ ಇಬೆ ರ್‍ಹಾವ್ನ್ ತಿಕಾ ಬಗುನ್ಗೆತ್ ಸರ್ವೆಸ್ಪರ್ ದೆವಾನ್ ಅಪ್ಲಿ ಮಾಗ್ನಿ ಆಯ್ಕ್ಲಾ ಮನುನ್ ಕಳ್ವುನ್ ಘೆಟ್ಲ್ಯಾನ್.

22 ಒಂಟಿಯಾನಿ ಪಾನಿ ಫಿಲ್ಲ್ಯಾ ಮಾನಾ ತ್ಯಾ ಆಳಾನ್ ರೆಬೆಕ್ಕಾಕ್ ಲೈ ಕಿಮ್ತಿಚೆ ಸೊನ್ಯಾಚಿ ನಾಕಾಚಿ ಮೊತಿ, ಅನಿ ದೊನ್ ಮೊಟ್ಟಿ ಲೈ ಕಿಮ್ತಿಚಿ ಸೊನ್ಯಾಚಿ ಕಾಕ್ನಾ ಹಾತಾಕ್ನಿ ನೆಸ್ವುಲ್ಯಾನ್. 23 ಅನಿ ತಿಕಾ, ತುಮ್ಚೊ ಬಾಬಾ ಕೊನ್? ಅನಿ ತುಮ್ಚ್ಯಾ ಬಾಬಾಚ್ಯಾ ಘರ್‍ಹಾತ್ ಮಾಕಾ ರಾವ್ಕ್ ಜಾಗೊ ಹಾಯ್ ಕಾಯ್? ಮನುನ್ ಇಚಾರ್ತಾ.

24 ಮಾನಾ ರೆಬೆಕ್ಕಾನ್, ಮಾಜೊ ಬಾಬಾ ನಾಹೊರಾಚೊ ಅನಿ ಮಿಲ್ಕಾಚೊ ಲೆಕ್ ಬೆತುವೆಲ್ ಮಟ್ಲಿನ್. 25 ಅನಿ ತುಮ್ಕಾ ಅನಿ ಒಂಟಿಯಾಕ್ನಿ ರಾವ್ಕ್ ಎಗ್ಳೊ ಎಗ್ಳೊ ಜಾಗೊ ಅನಿ ಖಾವ್ಕ್ ಚಾರೊ ಹಾಯ್ ಮಟ್ಲಿನ್.

26 ಮಾನಾ ತ್ಯಾ ಸೆವಕಾನ್ ಸರ್ವೆಸ್ಪರ್ ದೆವಾಕ್ ಡಿಂಬಿಯಾ ಗಾಲುನ್ ಆರಾದನ್ ಕರ್ಲ್ಯಾನ್. 27 ತೆನಿ ಮಾಜೊ ಯಜಮಾನ್ ಅಬ್ರಾಹಾಮಾಚ್ಯಾ ಸರ್ವೆಸ್ಪರ್ ದೆವಾ ತುಕಾ ಧನ್ಯವಾದ್ ತಿಯಾ ತುಜೆ ಪ್ರೆಮ್ ಅನಿ ಖರೆಪಾನ್ ತೆಚೆಕ್ನಾ ಕಾಡುಕ್ ನೈ, ಅನಿ ಮಾಜ್ಯಾ ಯಜಮಾನಾಚ್ಯಾ ಸಮಂಧಿಕಾಂಚ್ಯಾಕ್ಡೆ ನಿಟ್ ವಾಟೆನ್ ಹಾನುನ್ ಪಾವಸ್ಲೆಯ್ ಮಟ್ಲ್ಯಾನ್.

28 ಮಾನಾ ರೆಬೆಕ್ಕಾ ಪಳುನ್ಗೆತ್ ಅಪ್ಲ್ಯಾ ಬಾಯ್ಚಾ ಘರಾಕ್ ಗೆಲಿ ಅನಿ ಹೊಲ್ಲಿ ಸಂಗ್ತಿಯಾ ತೆಂಕಾ ಸಾಂಗ್ಲಿನ್. 29 ಅನಿ ರೆಬೆಕ್ಕಾಕ್ ಲಾಬಾನ್ ಮನ್ತಲೊ ಭಾವ್ ಹೊತ್ತೊ, ಅನಿ ತೊ ಅಬ್ರಾಮಾಚೊ ಸೆವಕ್ ಹೊತ್ತ್ಯಾ ಭಾಂಯಿಕ್ಡೆ ಜಾವ್ಚೆ ಮನುನ್ ಭಾಯ್ರ್ ಪಳುನ್ಗೆತ್ ಯೆಲೊ. 30 ಅನಿ ಲಾಬಾನಾನ್ ಭೆನಿಚ್ಯಾ ನಾಕಾತ್ಲಿ ಮೊತಿ ಅನಿ ಹಾತಾಂತ್ಲಿ ಕಾಕ್ನಾ ಬಗಟಲ್ಲ್ಯಾನ್, ಅನಿ ಒಂಟಿಯಾ ಘೆವ್ನ್ ಭಾಂಯಿಕಡೆ ಇಬೆ ಹೊತ್ತ್ಯಾ ಅಬ್ರಾಹಾಮಾಚ್ಯಾ ಸೆವಕಾಚ್ಯಾ ವಿಶಯಾತ್ ಆಯ್ಕಲ್ಲ್ಯಾನ್ ಅನಿ ತೆಜ್ಯಾಕ್ಡೆ ಜಾವ್ನ್ ಪಾವ್ಲೊ. 31 ತೆಕಾ ಬಗುನ್ ಲಾಬಾನಾನ್, ಸರ್ವೆಸ್ಪರಾಚೆ ಆಶಿರ್ವಾದ್ ಘೆಟಲ್ಯಾ ತಿಯಾ ಕಶ್ಯಾಕ್ ಇಬೆ ಹಾಸ್? ಮಿಯಾ ಮಾಜ್ಯಾ ಘರ್‍ಹಾತ್ ತುಜ್ಯಾ ಸಾಟ್ನಿ ಮನುನ್ ರಾವ್ಕ್ ಎಕ್ ಖೊಲಿ ತಯಾರ್ ಕರ್ಲಾ ಅನಿ ತುಜ್ಯಾ ಒಂಟಿಯಾಕ್ನಿಬಿ ಥೈ ಜಾಗೊ ಹಾಯ್ ಮಟ್ಲ್ಯಾನ್.

32 ತನ್ನಾ ಲಾಬಾನಾಚ್ಯಾ ಘರಾಕ್ ಸೆವಕ್ ಗೆಲೊ, ಅನಿ ಒಂಟ್ಯಾ ವೈಲಿ ಪೊಟ್ಲಿಯಾ ಉತ್ರುಕ್ ಲಾಬಾನಾನ್ ಮಜತ್ ಕರ್ಲ್ಯಾನ್; ಅನಿ ತ್ಯಾ ಒಂಟಿಯಾಕ್ನಿ ಚಾರೊ ಘಾಟ್ಲ್ಯಾನ್, ಅನಿ ಮಾನಾ ತ್ಯಾ ಸೆವಕಾಕ್ ಅನಿ ತೆಚ್ಯಾ ವಾಂಗ್ಡಾ ಹೊತ್ತ್ಯಾಕ್ನಿ ಪಾಯ್ ಧುವ್ಕ್ ಪಾನಿ ಹಾನುನ್ ದಿಲ್ಯಾನ್. 33 ಮಾನಾ ಲಾಬಾನ್ ತ್ಯಾ ಸೆವಕಾಕ್ ಜೆವಾನ್ ವಾಡುಚೆ ಮನುನ್ ಗೆಲ್ಯಾರ್, ತ್ಯಾ ಸೆವಕಾನ್ ಮಿಯಾ ಖಲ್ಯಾ ಕಾಮಾನ್ ಯೆಲಾ ಮನುನ್ ತುಮ್ಕಾ ಸಾಂಗ್ಲ್ಯಾ ಶಿವಾಯ್ ಜೆವಾನ್ ಕರಿನಾ ಮನುನ್ ಸಾಂಗ್ಲ್ಯಾನ್, ತನ್ನಾ ಲಾಬಾನಾನ್ ತೆಕಾ ಕಾಯ್ ತೆ ಸಾಂಗ್ ಮಟ್ಲ್ಯಾನ್.

34 ತೆನಿ ಕಾಯ್ ಸಾಂಗ್ಲ್ಯಾನ್ ಮಟ್ಲ್ಯಾರ್, ಮಿಯಾ ಅಬ್ರಾಹಾಮಾಚೊ ಸೆವಕ್,

35 ಅನಿ ಮಾಜ್ಯಾ ಯಜಮಾನಾಕ್ ಆಶಿರ್ವಾದ್ ಕರುನ್ ಸರ್ವೆಸ್ಪರ್ ದೆವಾನ್ ಲೈ ಸಾವ್ಕಾರ್ ಕರ್ಲಾ, ಅನಿ ತೆಚೆಕ್ಡೆ ಗೊರಾಂಚೆ, ಬಕ್ರ್ಯಾಂಚೆ ಶೆಳಿಯಾಂಚೆ ತಾಂಡೆ, ಸೊನೆ ರುಪೆ, ಗಾಡ್ವಾ ಅನಿ ಒಂಟಿಯಾ ಸೆವಕಾ ಅನಿ ಸೆವಕಿಯಾ ದಿಲಾ. 36 ಅನಿ ತೆಜಾ ಬಾಯ್ಕೊಕ್ ಮಾತ್ಯಾರಾ ವಯ್ಯಾತ್ ಎಕ್ ಲೆಕ್ ದಿಲಾ, ತೆಚಿ ಆಸ್ತಿ ಫುರಾ ತ್ಯಾ ಲೆಕಾಚ್ಯಾ ನಾವಾರ್ ಕರುನ್ ದಿಲಾ, 37 ಅಸಿ ರ್‍ಹಾತಾನಾ ಮಾಜ್ಯಾ ಯಜಮಾನಾನ್ ತೆಚ್ಯಾ ಸ್ವತ್ಯಾಚ್ಯಾ ಕಾನಾನ್ ದೆಸಾಕ್ ಜಾವ್ನ್ ಅಪ್ಲ್ಯಾ ಲೆಕಾಕ್ ಎಕ್ ಚೆಡು ಹುಡ್ಕುನ್ ಹಾನುನಕ್ಕೊ ಮನುನ್ ಗೊಸ್ಟ್ ದಿಲಾ, 38 ಅನಿ ತೆಚ್ಯಾ ಸಮಂದಿಕಾಂಚ್ಯಾಕ್ನಾ ಎಚುನ್ ಚೆಡು ಹಾನುಚೆ ಮನುನ್ ಮಾಜ್ಯಾಕ್ಡೆ ಭಾಸ್ ಘೆಟ್ಲಾ. 39 ಅನಿ ಮಿಯಾ ತೆ ಚೆಡು ಮಾಜ್ಯಾ ವಾಂಗ್ಡಾ ಯೆಯ್ನಾ ಹೊಲ್ಯಾ ಕಾಯ್ ಕರುಚೆ? ಮಟಲ್ಲೊ, 40 ತನ್ನಾ ಯಜಮಾನಾನ್ ಮಾಕಾ, ಮಿಯಾ ಸರ್ವೆಸ್ಪರ್ ದೆವಾಕ್ ಖಾಲ್ತಿ ಹೊವ್ನ್ ಚಲ್ತಲೊ ಮಾನುಸ್ ತಸೆ ಹೊವ್ನ್ ಅಪ್ಲೆ ಕಾಮ್ ಪುರಾ ಹೊವ್ಕ್ ಅಪ್ಲ್ಯಾ ಧುತಾಕ್ ಫಿಡೆ ಧಾಡ್ತಾ, ಅನಿ ಮಾಜ್ಯಾ ಲೆಕಾಕ್ ಮಾಜ್ಯಾ ಸ್ವತ್ಯಾಚ್ಯಾ ಲೊಕಾತ್ನಿ ಚೆಡು ಗಾಯ್ ಸಾರ್ಕೆ ಕರುನ್ ತುಜೆ ಕಾಮ್ ಫುರಾ ಕರ್ತಾ ಮಟ್ಲ್ಯಾನ್. 41 ಅನಿ ಲೆಕಾಕ್ ಮಾಜ್ಯಾ ಬಾಬಾಚ್ಯಾ ಗಾಂವಾತ್ ಜೆಡು ದಿವ್ಕ್ ತೆನಿ ಮನ್ ಕರಿನಸಲ್ಯಾರ್ ತಿಯಾ ಕರಲ್ಯಾ ಭಾಸಾತ್ನಾ ಸುಟ್ಕಾ ಹೊತೆ.

42 ತನ್ನಾ "ಮಾಜ್ಯಾ ಯಜಮಾನಾಚೊ ದೆವ್ ಹೊಲ್ಲ್ಯಾ ಸರ್ವೆಸ್ಪರ್ ದೆವಾ ದಯಾ ಕರುನ್ ಮಿಯಾ ಕರಲ್ಯಾ ತರಾಸಾಕ್ ಬರೆ ಹೊಯ್ ಸಾರ್ಕೆ ಕರ್ ಮನುನ್ ಹ್ಯಾ ಭಾಂಯಿಕ್ಡೆ ಯೆವ್ನ್ ಇಬೆ ಹೊತ್ತೊ". 43 ತನ್ನಾ ಮಿಯಾ ಹಿತ್ತೆ ಪಾನಿ ನೆವ್ಕ್ ಯೆತಲ್ಯಾ ಚೆಡ್ವಾ ಸಾಟ್ನಿ ಮನುನ್ ರಾಕಿತ್ ರ್‍ಹಾತಾ, ಮಾನಾ ತಿಕಾ ದಯಾ ಕರುನ್ "ಮಾಕಾ ಫಿವ್ಕ್ ಉಲ್ಲೆ ಬಿಂದ್ಗ್ಯಾತ್ಲೆ ಪಾನಿ ದಿ" ಮನುನ್ ಮಾಗ್ತಾ. 44 ಮಾನಾ ತಿನಿ ಮಾಕಾ ಅನಿ ಮಾಜ್ಯಾ ಒಂಟಿಯಾಕ್ನಿ ಪಾನಿ ದಿತಾ ಮಾಟ್ಲ್ಯಾರ್, ತಿ ಮಾಜ್ಯಾ ಯಜಮಾನಾಚ್ಯಾ ಲೆಕಾಕ್ ಸರ್ವೆಸ್ಪರ್ ದೆವಾನ್ ನೆಮಲ್ಲೆ ಚೆಡು ಹೊಂವ್ದಿ ಮಟ್ಲೊ. 45 ಅಸಿ ಮಿಯಾ ಮಾಜ್ಯಾ ಮನಾತ್ ಮಾಗ್ನಿ ಕರುನ್ ಸಾರುಚ್ಯಾ ಅದ್ದಿಚ್, ತಿಕುನಾ ಪಾನಿಯಾಕ್ ಮನುನ್ ರೆಬೆಕ್ಕಾ ಭಾಂಯಿಕ್ ಬಿಂದ್ಗೊ ಘೆವ್ನ್ ಯೆತಾನಾ ಮಿಯಾ ತಿಕಾ, ಮಾಕಾ ಫಿವ್ಕ್ ಉಲ್ಲೆ ಪಾನಿ ದಿ ಮಟ್ಲೊ. 46 ತನ್ನಾ ತಿನಿ ತಾಬೊಡ್ತೊಬ್ ಖಾಂಜಾ ವೈನಾ ಭರಲ್ಲಿ ಘಾಗರ್ ಉತ್ರುನ್ : ಪಾನಿ ಫಿವಾ ಅನಿ ತುಮ್ಚ್ಯಾ ಒಂಟಿಯಾಕ್ನಿ ಫಿವ್ಕ್ ಮಿಯಾ ಹಾನುನ್ ದಿತಾ ಮಟ್ಲಿನ್ ಮಾನಾ ಮಿಯಾ ಪಾನಿ ಫಿಲೊ ತಿನಿ ಮಾಜ್ಯಾ ಒಂಟಿಯಾಕ್ನಿ ಪಾನಿ ಹಾನುನ್ ಪಾಜ್ವುಲಿನ್. 47 ಮಾನಾ ಮಿಯಾ ತಿಕಾ: ತಿಯಾ ಕೊನಾಚಿ ಲೆಕ್ ಮನುನ್ ಇಚಾರ್ಲೊ, ತನ್ನಾ ತಿನಿ ಮಿಯಾ ನಾಹೊರ್ ಅನಿ ಮಿಲ್ಕಾಚೊ ಲೆಕ್ ಹೊವ್ನ್ ಹೊತ್ತ್ಯಾ ಬೆತುವೆಲಾಚಿ ಲೆಕ್ ಮಟ್ಲಿನ್, ಮಾನಾ ಮಿಯಾ ತಿಕಾ ನಾಕಾತ್ಲಿ ಮೊತಿ ಅನಿ ತೊಳ್ ಭಂದಿಯಾ ನೆಸ್ವುಲೊ. 48 ಮಾನಾ ಮಿಯಾ ಸರ್ವೆಸ್ಪರಾಕ್ ಡಿಂಬಿಯಾ ಘಾಲುನ್ ಆರಾದನ್ ಕರ್‍ಲೊ, ಕಶ್ಯಾಕ್ ಮಟ್ಲ್ಯಾರ್ ತೆನಿ ಮಾಕಾ ಸಮಾ ಜಾಗ್ಯಾಕ್ ಹಾನುನ್ ಪಾವ್ಲ್ಯಾನ್, ಮಾಜ್ಯಾ ಯಜಮಾನಾಚ್ಯಾ ಸಂಮದಿಕಾಂಚೆ ಚೆಡು ತೆಚ್ಯಾ ಲೆಕಾಕ್ ಹುಡ್ಕುನ್ ದಿಲ್ಯಾನ್. 49 ಅಸಿ ರ್‍ಹಾತಾನಾ ಮಾಜ್ಯಾ ಯಜಮಾನಾಚ್ಯಾ ವಿಶಯಾತ್ ಪ್ರೆಮ್ ಅನಿ ಭರೊಸೊ ರಾಲ್ಯಾರ್ ಮಾಕಾ ಸಾಂಗಾ, ನಾ ಹೊಲ್ಯಾರ್ ನಾ ಮನುನ್ ಸಾಂಗಾ, ಮಿಯಾ ಫಿಡೆ ಕಾಯ್ ಕರುಚೆ ಚಿಂತ್ತಾ ಮಟ್ಲ್ಯಾನ್.

50 ತನ್ನಾ ಲಾಬಾನಾನ್ ಅನಿ ಬೆತುವೆಲಾನ್ ತೆಕಾ, ಹೆ ಸಗ್ಳೆ ಸರ್ವೆಸ್ಪರಾಕ್ನಾ ಯೆಲ್ಲೆ ಹಾಯ್; ಅಮಿ ನಿರ್ದಾರ್ ಘೆವ್ಕ್ ಹೊಯ್ನಾ. 51 ಅಮಿ ರೆಬೆಕ್ಕಾಕ್ ತುಮ್ಚ್ಯಾ ಅಧಿನಾತ್ ದಿತಾಂವ್; ಬಲ್ವುನ್ ಘೆವ್ನ್ ಜಾ; ಸರ್ವೆಸ್ಪರ್ ದೆವಾನ್ ಸಾಂಗಲ್ಲ್ಯಾ ಸಾರ್ಕೆ ತಿ ತುಜ್ಯಾ ಯಜಮಾನಾಚ್ಯಾ ಲೆಕಾಚಿ ಬಾಯ್ಕೊ ಹೊಂವ್ದಿತ್ ಮಟ್ಲ್ಯಾನಿ. 52 ಮಾನಾ ಅಬ್ರಾಹಾಮಾಚ್ಯಾ ಸೆವಕಾನ್ ತೆನಿ ಸಾಂಗಲಿ ಗೊಸ್ಟಿಯಾ ಆಯ್ಕುನ್ ಮಾನ್ ಬಾಗ್ವುನ್ ಸರ್ವೆಸ್ಪರ್ ದೆವಾಕ್ ಆರಾದನ್ ಕರ್ಲ್ಯಾನ್. 53 ಮಾನಾ ತ್ಯಾ ಸೆವಕಾನ್ ಅಪ್ಲಿ ಹಾನಲ್ಲೆ ಆಯಾರಾ ಅನಿ ತಿಕಾ ಸೊನೆ ಚಾಂದಿ ಅನಿ ಕಿಮ್ತಿತಿಚಿ ಕಪ್ಡೆ ರೆಬೆಕ್ಕಾಕ್ ದಿಲ್ಯಾನ್, ಅನಿ ತೆನಿ ರೆಬೆಕ್ಕಾಚ್ಯಾ ಬಾಯ್ಕ್ ಅನಿ ಭಾವಾಕ್ ಲೈ ಕಿಮ್ತಿತಿಚಿ ಆಯಾರಾ ದಿಲ್ಯಾನ್.

54 ಮಾನಾ ತ್ಯಾ ಸೆವಕಾನ್ ಅನಿ ತೆಚ್ಯಾ ವಾಂಗ್ಡಾ ಹೊತ್ತ್ಯಾನಿ ಜೆವಾನ್ ಕರುನ್ ಥೈ ರಾಲ್ಯಾನಿ, ಮಾನಾ ದುಸ್ರೆ ದಿಸಿ ಸಕ್ಕಾಳಿ ಉಟುನ್ "ಅಮಿ ಅತ್ತಾ ಅಮ್ಚ್ಯಾ ಯಜಮಾನಾಕ್ಡೆ ಪರ್‍ತುನ್ ಜಾತಾಂವ್" ಮಟ್ಲ್ಯಾನಿ.

55 ಖರೆ ರೆಬೆಕ್ಕಾಚ್ಯಾ ಬಾಯ್ನ್ ಅನಿ ಭಾವಾನ್ ತೆಕಾ, "ರೆಬೆಕ್ಕಾ ಅನಿ ಧಾ ದಿಸಾ ತರಿಬಿ ಅಮ್ಚ್ಯಾ ವಾಂಗ್ಡಾ ರಾಂವ್ದಿತ್, ಮಾನಾ ತಿಕಾ ಬಲ್ವುನ್ ಘೆವ್ನ್ ಜಾ" ಮನುನ್ ಸಾಂಗ್ಲ್ಯಾನಿ.

56 ಖರೆ ತ್ಯಾ ಸೆವಕಾನ್ ತೆಂಕಾ, ಮಾಕಾ ಅಡ್ವುನಕಾಶಿ ಸರ್ವೆಸ್ಪರ್ ದೆವಾನ್ ಮಾಜೊ ಪ್ರಯಾನ್ ಬರೊ ಕರ್ಲಾ ಅತ್ತಾ ಮಿಯಾ ಯಜಮಾನಾಕ್ಡೆ ಪರ್‍ತುನ್ ಜಾವ್ಚೆ.

57 ಮಾನಾ ತಿಚ್ಯಾ ಭಾವಾನ್ ಅನಿ ಬಾಯ್ನ್ ತೆಕಾ, "ಅಮಿ ತಿಚ್ಯಾ ಮನಾತ್ ಕಾಯ್ ಹಾಯ್ ಮನುನ್ ಇಚಾರ್ತಾಂವ್". 58 ತೆನಿ ರೆಬೆಕ್ಕಾಕ್ ಬಲ್ವುನ್, ತುಕಾ ತ್ಯಾ ಮಾನ್ಸಾಚ್ಯಾ ವಾಂಗ್ಡಾ ಜಾತಲೊ ಮನ್ ಹಾಯ್ ಕಾಯ್? ತನ್ನಾ ರೆಬೆಕ್ಕಾನ್ "ಹೊಯ್ ಮನ್ ಹಾಯ್", ಮಟ್ಲಿನ್.

59 ಮನಾ ತೆನಿ ರೆಬೆಕ್ಕಾಕ್ ಅನಿ ತಿಜಿ ಸೆವಕಿಕ್ ಅಬ್ರಾಹಾಮಾಚ್ಯಾ ಆಳಾ ವಾಂಗ್ಡಾ ಧಾಡುನ್ ದಿಲ್ಯಾನಿ. 60 ರೆಬೆಕ್ಕಾ ಜಾವ್ಕ್ ತಯಾರ್ ಹೊಲ್ಲ್ಯಾ ತನ್ನಾ,

ತಿಚ್ಯಾ ಭಾವಾನ್ ತಿಕಾ, "ಮಾಜ್ಯಾ ಭೆನಿ ತಿಯಾ ಹಜಾರಾನ್ ಹಜಾರ್ ಲೊಕಾಂಕ್ನಿ ಮುಳಾಚಿ ಬಾಯ್ ಹೊವ್ನ್ ರಾ,

ತುಮ್ಕಾ ವಿರೊಧ್ ಹೊವ್ನ್ ಯೆತಲ್ಯಾಕ್ನಿ ತುಜ್ಯಾ ಪಿಳ್ಗಿಚಿ ಲೊಕಾ ಮಾರುಂದಿತ್, ಅನಿ ತೆಂಚಿ ಶಾರಾ ಅಪ್ನಾಚಿ ಕರುನ್ ಘೆವ್ನಂದಿ", ಮನುನ್ ಆಶಿರ್ವಾದ್ ದಿಲ್ಯಾನ್.

61 ಮಾನಾ ರೆಬೆಕ್ಕಾ ಅನಿ ತಿಚಿ ಆಳ್ ದೊಗೆಬಿ ಒಂಟಿಯಾ ಚಡುನ್ ಅಬ್ರಾಹಾಮಾಚ್ಯಾ ಸೆವಕಾಚ್ಯಾ ವಾಂಗ್ಡಾ ಜಾವ್ಕ್ ಲಾಲೆ.

62 ತನ್ನಾ ಇಸಾಕ್ ಕಾನಾನಾಚ್ಯಾ ದಕ್ಷಿನ್ ಭಾಜುಕ್ ವಸ್ತಿ ಹೊತ್ತೊ ಅನಿ ಲೆಹೈರೊಹಿ ಭಾಂಯಿಕ್ನಾಚಲುನ್ ಯೆಯ್ತ್ ಹೊತ್ತೊ. 63 ಇಸಾಕ್ ಸಾಂಚೆಕ್ಡೆ ಸೆತಾಕ್ಡೆ ಫಿರುನ್ ಗೆಲ್ಲ್ಯಾ ತನ್ನಾ ತೆಕಾ ಲೈ ಧುರ್ನಾ ಒಂಟಿಯಾ ಯೆತಲಿ ದಿಸ್ಲಿ. 64 ತನ್ನಾ ರೆಬೆಕ್ಕಾನ್ ಇಸಾಕಾಕ್ ಬಗುನ್ ತಿ ಒಂಟಿಚ್ಯಾ ವೈನಾ ಉತ್ರುನ್ ಯೆವ್ನ್, 65 ಮಾಕಾ ಭೆಟುಕ್ ಮನುನ್ ತ್ಯಾ ಸೆತಾತ್ನಾ ಯೆವ್ ಲಾಗಲ್ಲೊ ಮಾನುಸ್ ಕೊನ್? ಮನುನ್ ಅಬ್ರಾಹಾಮಾಚ್ಯಾ ಆಳಾಕ್ ಇಚಾರ್ಲಿನ್.

ತನ್ನಾ ತ್ಯಾ ಆಳಾನ್ "ತೊ ಮಾಜ್ಯಾ ಯಜಮಾನಾಚೊ ಲೆಕ್" ಮಟ್ಲ್ಯಾನ್, ತನ್ನಾ ರೆಬೆಕ್ಕಾನ್ ತೊಂಡಾ ವೈಲೆ ಮುಸ್ಕೆ ಧಾಪುನ್ ಘೆಟ್ಲಿನ್.

66 ಮಾನಾ ಆಳಾನ್ ಸಗ್ಳಿ ಅಪ್ನಿ ಕರಲ್ಲಿ ಕಾಮಾ ಇಸಾಕಾಕ್ ಸಾಂಗ್ಲ್ಯಾನ್.

67 ಮಾನಾ ಇಸಾಕಾನ್ ರೆಬೆಕ್ಕಾಕ್ ಬಲ್ವುನ್ ಘೆವ್ನ್ ಅಪ್ನಾಚ್ಯಾ ಬಾಯ್ಚ್ಯಾ ಝೊಪ್ಡ್ಯಾತ್ ಗೆಲೊ. ತನ್ನಾಚ್ಯಾನ್ ರೆಬೆಕ್ಕಾ ಇಸಾಕಾಚಿ ಬಾಯ್ಕೊ ಹೊಲಿ, ಅನಿ ತೆನಿ ರೆಬೆಕ್ಕಾಕ್ ಲೈ ಪ್ರೆಮ್ ಕರ್ಲ್ಯಾನ್, ಅಪ್ಲಿ ಬಾಯ್ ಮರಲ್ಲೆ ದುಕ್ಕ್ ತಿಚೆ ವೈನಾ ಇಸರ್ಲ್ಯಾನ್.