1 ಅದ್ದಿ ದೆವಾನ್ ಮಳಬ್ ಅನಿ ಜಿಮಿನ್ ರಚ್ಲ್ಯಾನ್, 2 ತನ್ನಾ ಜಿಮ್ನಿಕ್ ಆಕಾರ್ ನತ್ತೊ ಅನಿ ಕಾಯ್ಬಿ ನತ್ತೆ ಸಗ್ಳ್ಯಾಕ್ಡೆ ಕಾಳೊಕ್ ಹೊತ್ತೊ, ಅನಿ ದೆವಾಚೊ ಆತ್ಮೊ ಪಾನಿಯಾಚ್ಯಾ ವರ್‍ತಿ ಫಿರುನ್ ಖೆಳುನ್ಗೆತ್ ಹೊತ್ತೊ. 3 ತನ್ನಾ ದೆವಾನ್: "ಉಜ್ವೊಡ್ ಹೊಂವ್ದಿತ್" ಮಟ್ಲ್ಯಾನ್, ಉಜ್ವೊಡ್ ಹೊಲೊ. 4 ತೊ ಉಜ್ವೊಡ್ ದೆವಾಕ್ ಬರೊ ದಿಸ್ಲೊ, ತನ್ನಾ ತೆನಿ ಉಜ್ವೊಡಾಕ್ ಕಾಳ್ಕಾಕ್ನಾ ಎಗಳ್ಲ್ಯಾನ್, 5 ಅನಿ ತೆನಿ ಉಜ್ವೊಡಾಕ್ "ದಿಸ್" ಅನಿ ಕಾಳ್ಕಾಕ್ "ರ್‍ಹಾತ್" ಮನುನ್ ನಾವ್ ದಿಲ್ಯಾನ್, ಅಸೆ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ ಹ್ಯೊ ಪೈಲೆಚೊ ದಿಸ್.

6 ಮಾನಾ ತೆನಿ, "ಪಾನಿಯಾಚ್ಯಾ ಮದ್ದಿ ಎಕ್ ಅಂತ್ರಾಳ್ ಹೊಂವ್ದಿತ್" ಮಟ್ಲ್ಯಾನ್, 7 ಅಸೆ ದೆವಾನ್ ಅಂತ್ರಾಳ್ ಹೊಂವ್ದಿತ್, ಅನಿ ವೈಲೆ ಪಾನಿ ಅನಿ ಖಾಯ್ಲೆ ಪಾನಿ ಎಗ್ಳೆ ಹೊಂವ್ದಿತ್, ಮಟ್ಲ್ಯಾನ್ ತಸೆಚ್ ಹೊಲೆ. 8 ದೆವಾನ್ ತ್ಯಾ ಅಂತ್ರಾಳಾಕ್ ಮಳಬ್ ಮನುನ್ ನಾವ್ ದಿಲ್ಯಾನ್ ತಸೆಚ್ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ ಹ್ಯೊ ದೊನ್ವೊ ದಿಸ್.

9 ಮಾನಾ ದೆವಾನ್ "ಮಳ್ಬಾಚ್ಯಾ ಖಾಲ್ತಿ ಹೊತ್ತ್ಯಾ ಪಾನಿಯಾಕ್ ಎಕಾಕ್ಡೆ ಜಮಾ ಹೊಂವ್ದಿ ಅನಿ ವಾಳ್ಕಿ ಜಿಮಿನ್ ದಿಸುಂದಿತ್" ಮಟ್ಲ್ಯಾನ್, ತೆ ತಸೆಚ್ ಹೊಲೆ. 10 ದೆವಾನ್ ವಾಳ್ಕ್ಯಾ ಜಾಗ್ಯಾಕ್ ಜಿಮಿನ್ ಮನುನ್ ಅನಿ ಎಕಾಕ್ಡೆ ಗೊಳಾ ಹೊಲ್ಲ್ಯಾ ಪಾನಿಯಾಕ್ ಸಮುಂದರ್ ಮನುನ್ ನಾವ್ ದಿಲ್ಯಾನ್ ತೆ ದೆವಾಕ್ ಬರೆ ದಿಸ್ಲೆ. 11 ತನ್ನಾ ದೆವಾನ್, "ಬಿಂಯ್ ದಿತಲಿ ಅನಿ ಫಳಾ ದಿತಲಿ ಸಗ್ಳ್ಯಾ ರಿತಿಚಿ ಝಾಡಾ ಜಿಮಿನ್ ಉಗ್ವುಂದಿ", ಮಟ್ಲ್ಯಾನ್ ತೆ ತಸೆಚ್ ಹೊಲೆ. 12 ಜಿಮ್ನಿಚ್ಯಾ ವರ್‍ತಿ ಸಗ್ಳ್ಯಾ ನಮುನ್ಯಾಚಿ ಝಾಡಾ ಉಗಾವ್ಲಿ, ಸಗ್ಳ್ಯಾ ನಮುನ್ಯಾಚಿ ಬಿಂಯ್ ದಿತಲಿ ಝಾಡಾ ಅನಿ ಫಳಾ ದಿತಲಿ ಝಾಡಾ ಉಗಾವ್ಲಿ, ತೆ ದೆವಾಕ್ ಬರೆ ದಿಸ್ಲೆ. 13 ಅಸಿಚ್ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ ತೊ ತಿನ್ವೊ ದಿಸ್.

14 ಅನಿ ದೆವಾನ್, "ದಿಸಾಕ್ ರಾತಿಕ್ನಾ ಎಗ್ಳು ಸಾಟ್ನಿ ಮಳ್ಬಾತ್ ಉಜ್ವೊಡಾ ದಿಸುಂದಿತ್, ಅನಿ ಹೆಚ್ಯಾ ವೈನಾ ದಿಸಾ, ವರ್ಸಾ, ಅನಿ ಕಾಲ್ ದಾಕ್ವುಂದಿತ್, 15 ಅನಿ ತೊ ಉಜ್ವೊಡ್ ಮಳ್ಬಾತ್ ರ್‍ಹಾವ್ನ್ ಜಿಮ್ನಿ ವರ್‍ತಿ ಹೊಳ್ವುಂದಿತ್" ಮಟ್ಲ್ಯಾನ್, ತಸೆಚ್ ಹೊಲೆ. 16 ತೆಚ್ಯಾ ಮಾನಾ ದೆವಾನ್ ದಿಸ್ ಅನಿ ಚಂದ್ರಾಮ್ ರಚ್ಲ್ಯಾನ್, ದಿಸ್ ಚಾಲ್ವುಕ್ ದಿಸ್ ಅನಿ ರ್‍ಹಾತ್ ಚಾಲ್ವುಕ್ ಚಂದ್ರಾಮ್ ಅನಿ ಚಿಕ್ಕಿಯಾಬಿ ರಚ್ಲ್ಯಾನ್. 17 ದೆವಾನ್ ತೆಂಕಾ ಜಿಮ್ನಿಕ್ ಉಜ್ವೊಡ್ ದಿವ್ಕ್ ಥವ್ಲ್ಯಾನ್. 18 ಅನಿ ದಿಸ್ ಅನಿ ರ್‍ಹಾತ್ ಚಾಲ್ವುಕ್, ಉಜ್ವೊಡ್ ಅನಿ ಕಾಳೊಕ್ ಎಗ್ಳೆ ಕರುನ್ ಥವ್ಲ್ಯಾನ್, ಅನಿ ತೆಕಾ ತೆ ಬರೆ ದಿಸ್ಲೆ. 19 ಅಸಿಚ್ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ ತೊ ಚಾರ್ವೊ ದಿಸ್.

20 ಮಾನಾ ದೆವಾನ್, "ಲೈ ನಮುನ್ಯಾಚ್ಯಾ ಪಾನಿಯಾತ್ ರಾತಲಿ ಜನಾವರಾನಿ ಭರುಂದಿ, ಅನಿ ಮಳ್ಬಾತ್ ಫಾಕ್ರಾ ಹುಡುಂದಿ", ಮಟ್ಲ್ಯಾನ್. 21 ಅಸೆ ದೆವಾನ್, ಪಾನಿಯಾತ್ ರಾತಲಿ ಸಗ್ಳ್ಯಾ ನಮುನ್ಯಾಚಿ ಮೊಟ್ಟಿ ಅನಿ ಬಾರಿಕ್ ಜನಾವರಾ ರಚ್ಲ್ಯಾನ್ ಅನಿ ಸಗ್ಳ್ಯಾ ನಮುನ್ಯಾಚಿ ಫಾಕ್ರಾ ರಚಲ್ಯಾನ್, ತನ್ನಾ ತೆಕಾ ತೆ ಬರೆ ದಿಸ್ಲೆ. 22 ದೆವಾನ್ ತಿ: ಪಾನಿಯಾತ್ಲಿ ಜನಾವರಾಂಚಿ ಪಿಳ್ಗಿ ವಾಡುನ್ ಸಮುಂದರ್ ಭರುಂದಿ, ಅನಿ ವರ್‍ತಿ ಹುಡ್ತಲ್ಯಾ ಫಾಕ್ರಾಂಚೊ ಅಂಕೊ ವಾಡುಂದಿತ್ ಮನುನ್, ಆಶಿರ್ವಾದ್ ಕರ್ಲ್ಯಾನ್. 23 ತಸೆಚ್ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ, ತೊ ಪಾಚ್ವೊ ದಿಸ್.

24 ಮಾನಾ ದೆವಾನ್: "ಜಿಮಿನ್ ಸಗ್ಳ್ಯಾ ನಮುನ್ಯಾಚಿ ಮೊಟಿ ಬಾರಿಕ್ಲಿ ಗಾಂವ್ಟಿ ಅನಿ ಡಂಗ್ಳಿತ್ಲಿ ಜನಾವರಾ ಉಪ್ಜುಂದಿತ್", ಮಟ್ಲ್ಯಾನ್, ತೆ ತಸೆಚ್ ಹೊಲೆ. 25 ಅಸೆ ದೆವಾನ್ ಹ್ಯಾ ಸಗ್ಳ್ಯಾ ನಮುನ್ಯಾಚಿ ಜನಾವರಾ ರಚ್ಲ್ಯಾನ್, ಅನಿ ತೆಕಾ ತೆ ಬರೆ ದಿಸ್ಲೆ.

26 ಮಾನಾ ದೆವಾನ್ "ಅತ್ತಾ ಮಾನ್ಸಾಕ್ನಿ ರಚುಂವಾ ತೆನಿ ಬಗುಕ್ ಅಮ್ಚ್ಯಾ ಸಾರ್ಕೆಚ್ ದಿಸುಚೆ, ಅನಿ ತೆನಿ ಸಮುಂದರಾಚ್ಯಾ ಜನಾವರಾಂಚ್ಯಾ ವರ್‍ತಿಬಿ ಮಳ್ಬಾತ್ ಹುಡ್ತಲ್ಯಾ ಫಾಕ್ರಾಚ್ಯಾ ವರ್‍ತಿಬಿ ಬಾರಿಕ್ ಮೊಟ್ಟ್ಯಾ ಗಾಂವ್ಟಿ ಅನಿ ಡಂಗ್ಳಿತ್ಲ್ಯಾ ಜನಾವಾರಾಂಚ್ಯಾ ವರ್‍ತಿಬಿ ಜಿಮ್ನಿ ವರ್‍ತಿ ತೆವಳ್ತಲ್ಯಾ ಕಿಡ್ಯಾಂಚ್ಯಾ ವರ್‍ತಿಬಿ ರಾಜ್ವಟ್ಕಿ ಕರುಂದಿತ್" ಮಟ್ಲ್ಯಾನ್.

27 ಅಸೆ ದೆವಾನ್ ಮಾನ್ಸಾಕ್ನಿ ಅಪ್ನಾಚ್ಯಾ ರುಪಾತ್ ರಚಲ್ಯಾನ್, ತೆಂಕಾ ಅಪ್ನಾಚ್ಯಾ ರುಪಾತ್ ರಚ್ಲ್ಯಾನ್, ಘೊಮಾನುಸ್ ಅನಿ ಬಾಯ್ಕೊಮಾನುಸ್ ಕರುನ್ ರಚ್ಲ್ಯಾನ್.

28 ದೆವಾನ್ ತೆಂಕಾ ಆಶಿರ್ವಾದ್ ಕರುನ್ ಅನಿ: "ತುಮ್ಚಿ ಪಿಳ್ಗಿ ವಾಡುಂದಿತ್ ಅನಿ ಜಿಮಿನ್ ತುಮ್ಚ್ಯಾ ತಾಬೆತ್ ಕರುನ್ ಘೆವಾ, ಅನಿ ಸಮುಂದರಾತ್ ರ್‍ಹಾತಲ್ಯಾ ಮಾಸೊಳಾಂಚ್ಯಾ ವರ್‍ತಿ, ಮಳ್ಬಾತ್ ಹುಡ್ತಲ್ಯಾ ಫಾಕ್ರಾಂಚ್ಯಾ ವರ್‍ತಿ ಅನಿ ಜಿಮ್ನಿ ವರ್‍ತಿ ಫಿರುನ್ ಖೆಳ್ತಲ್ಯಾ ಹರ್ ಎಕ್ ಜನಾವರಾಂಚ್ಯಾ ವರ್‍ತಿ ತುಮಿ ರಾಜ್ವಟ್ಕಿ ಕರಾ" ಮಟ್ಲ್ಯಾನ್. 29 ತನ್ನಾ ದೆವಾನ್ ತೆಂಕಾ; "ಬಿಂಯ್ ದಿತಲ್ಯಾ ಅನಿ ಬಿಂಯ್ ರ್‍ಹಾತಲ್ಯಾ ಸಗ್ಳ್ಯಿ ನಮುನ್ಯಾಚ್ಯಾ ಫಳಾಚಿ ಝಾಡಾ ತುಮ್ಕಾ ಖಾವ್ಕ್ ಮನುನ್ ದಿಲಾ. 30 ಅನಿ ಜಿಮ್ನಿ ವರ್‍ತಿ ರ್‍ಹಾತಲ್ಯಾ ಜನಾವಾರಾಕ್ನಿ, ಮಳ್ಬಾತ್ ಹುಡ್ತಲ್ಯಾ ಫಾಂಕ್ರಾಕ್ನಿ ಜಿಮ್ನಿ ವರ್‍ತಿ ಫಿರುನ್ ಖೆಳ್ತಲ್ಯಾ ಜನಾವರಾಕ್ನಿ ಖಾವ್ಕ್ ಮನುನ್ ಬಾಜಿ ಪಾಲೊ ದಿಲಾ" ಮಟ್ಲ್ಯಾನ್, ತಸೆಚ್ ಹೊಲೆ. 31 ಅಪ್ನಿ ರಚಲ್ಲೆ ಸಗ್ಳೆ ದೆವಾನ್ ಬಗಲ್ಯಾ ತನ್ನಾ, ತೆ ತೆಕಾ ಲೈ ಬರೆ ದಿಸ್ಲೆ ಅಸಿ ಸಾಂಜ್ ಹೊವ್ನ್ ಸಕ್ಕಾಳ್ ಹೊಲಿ, ತೊ ಸಾವೊ ದಿಸ್.