1 ಸರ್ವೆಸ್ಪರ್ ದೆವಾನ್ ಅಬ್ರಾಹಾಮಾಕ್, ತುಜೊ ದೆಶ್ ಬಳಗ್ ಅನಿ ಬಾಬಾಚೆ ಘರ್ ಸೊಡುನ್ ಮಿಯಾ ದಾಕ್ವುತಲ್ಯಾ ದೆಸಾಕ್ ಜಾ.

2 ಮಿಯಾ ತುಕಾ ಲೈ ಮೊಟೊ ದೆಶ್ ಕರ್ತಾ,

ಅನಿ ಮಿಯಾ ತುಕಾ ಆಶಿರ್ವಾದ್ ದಿತಾ,

ಅನಿ ಮಿಯಾ ತುಜೆ ನಾವ್ ಮೊಟೆ ಕರ್ತಾ, ಅನಿ ತಿಯಾ ಆಶಿರ್ವಾದ್ ಹೊತೆಯ್.

3 ತುಕಾ ಆಶಿರ್ವಾದ್ ದಿತಲ್ಯಾಕ್ನಿ ಮಿಯಾ ಆಶಿರ್ವಾದ್ ದಿತಾ,

ಖರೆ ತುಜ್ಯಾ ವರ್‍ತಿ ಶಾಪ್ ಘಾಲ್ತಲ್ಯಾಕ್ನಿ ಮಿಯಾ ಶಾಪ್ ದಿತಾ,

ತುಜ್ಯಾ ವೈನಾ ಜಗಾಚ್ಯಾ ಸಗ್ಳ್ಯಾ ಲೊಕಾಕ್ನಿ ಮಿಯಾ ಆಶಿರ್ವಾದ್ ಕರ್ತಾ ಮನುನ್ ಸಾಂಗ್ಲ್ಯಾನ್.

4 ಸರ್ವೆಸ್ಪರ್ ದೆವಾಚ್ಯಾ ಗೊಸ್ಟಿ ಸಾರ್ಕೆ ಅಬ್ರಾಮ್ ಭಾಯ್ರ್ ಪಡುನ್ ಗೆಲೊ, ಅನಿ ತೆಚ್ಯಾ ವಾಂಗ್ಡಾ ಲೊಟಾಬಿ ಗೆಲೊ.

ತೊ ಹಾರಾನ್ ಶಾರ್ ಸೊಡುನ್ ಜಾತಾನಾ ಅಬ್ರಾಹಾಮಾಕ್ ಸತ್ತರಾರ್ ಪಾಂಚ್ ವರ್ಸಾ ಹೊಲ್ಲೆ ರ್‍ಹಾತಾ. 5 ಅಬ್ರಾಮಾನ್ ಅಪ್ಲ್ಯಿ ಬಾಯ್ಕೊ ಅನಿ ಭಾವಾಚೊ ಲೆಕ್ ಲೊಟಾಕ್ ಘೆವ್ನ್ ಅನಿ ಹಾರಾನಾತ್ ಖಮ್ವಲ್ಲಿ ಆಸ್ತಿ ಅನಿ ಆಳಾಕ್ನಿ ಘೆವ್ನ್ ಕಾನಾನ್ ದೆಸಾಕ್ ಜಾವ್ಕ್ ಲಾಗ್ಲೊ. ತೊ ಕಾನಾನ್ ದೆಶ್ಯಾಕ್ ಯೆವ್ನ್ ಪಾವಲ್ಲ್ಯಾ ತನ್ನಾ, 6 ಅಬ್ರಾಮ್ ಶೆಕೆಮಾಚ್ಯಾ ಪವಿತ್ರ್ ಜಾಗ್ಯಾ ವೈಲ್ಯಾ ಮೊರಿಯಾ ಝಾಡಾ ಪತರ್ಬಿ ಪಾವ್ಲೊ, ತ್ಯಾ ಎಳಾರ್ ಕಾನಾನಾಚಿ ಲೊಕಾ ತ್ಯಾ ದೆಸಾತ್ ವಸ್ತಿ ರಾಯ್ತ್. 7 ಥೈ ಸರ್ವೆಸ್ಪರ್ ದೆವ್ ದಿಸುನ್: ಮಿಯಾ ಹ್ಯೊ ದೆಶ್ ತುಜ್ಯಾ ಪಿಳ್ಗಿಚ್ಯಾ ಲೊಕಾಕ್ನಿ ದಿತಾ, ಮಟ್ಲ್ಯಾನ್.

ತನ್ನಾ ತೆನಿ ಅಪ್ನಾಕ್ ಸರ್ವೆಸ್ಪರ್ ದೆವ್ ದಿಸ್ಲೊ ಮನುನ್ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದ್ಲ್ಯಾನ್. 8 ತೆನಿ ಬೆತೆಲಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಹೊತ್ತ್ಯಾ ಮಡ್ಡಿಯಾಂಚ್ಯಾ ಜಾಗ್ಯಾಕ್ ಜಾವ್ನ್ ಝೊಪ್ಡೆ ಭಾಂದ್ಲ್ಯಾನ್, ಬೆತೆಲಾಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಕ್ ಬೆತೆಲ್ ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಆಯಿ ಮನ್ತಲೆ ಗಾಂವ್ ಹೊತ್ತೆ, ಅನಿ ತೆನಿ ಥೈಬಿ ಸರ್ವೆಸ್ಪರ್ ದೆವಾಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದ್ಲ್ಯಾನ್, ಅನಿ ಸರ್ವೆಸ್ಪರ್ ದೆವಾಚ್ಯಾ ನಾವಾರ್ ಆರಾದನ್ ಕರ್ಲ್ಯಾನ್. 9 ಮಾನಾ ಅಬ್ರಾಮ್ ತೊ ಜಾಗೊ ಸೊಡುನ್ ನೆಗೆವ್ ಪತರ್ಬಿ ಗೆಲೊ.

10 ತ್ಯಾ ಎಳಾರ್ ಜಿಮ್ನಿರ್ ಬರ್‍ಗಾಲ್ ಹೊತ್ತೊ, ತೆಚ್ಯಾ ವೈನಾ ಅಬ್ರಾಮ್ ಇಜಿಪ್ತಾಚ್ಯಾ ದಕ್ಷಿನಾಕ್ ಉಲ್ಲೊ ಎಳ್ ರಾವ್ಕ್ ಮನುನ್ ಗೆಲೊ ಕಶ್ಯಾಕ್ ಮಟ್ಲ್ಯಾರ್, ತೊ ಬರ್‍ಗಾಲ್ ಲೈ ಕಠಿನ್ ಹೊತ್ತೊ. 11 ತನ್ನಾ ಅಬ್ರಾಮಾನ್ ಇಜಿಪ್ತಾಕ್ ಜಾವ್ನ್ ಪಾವ್ತಲ್ಯಾ ಅದ್ದಿಚ್ ಅಪ್ಲ್ಯಾ ಬಾಯ್ಕೊಕ್, ತಿಯಾ ಬಗುಕ್ ಲೈ ಬರಿ ದಿಸ್ತೆಯ್. 12 ಇಜಿಪ್ತಾಚ್ಯಾ ಲೊಕಾನಿ ತುಕಾ ಬಗುನ್ ಹಿ ಹೆಚಿ ಬಾಯ್ಕೊ ಮನುನ್ ಒಳ್ಕುನ್ ತೆನಿ ತುಕಾ ಕಾಡುನ್ ಗೆವ್ಕ್ ಮನುನ್ ತುಕಾ ಹುರ್ವುನ್ ಮಾಕಾ ಜಿವಾನಿ ಮಾರುನ್ ಟಾಕ್ತಲೆ, 13 ತಸೆ ಮನುನ್ ತುಜ್ಯಾ ವೈನಾ ಮಾಜೊ ಜಿವ್ ಹುರ್ತಾ, ಅನಿ ತಿಯಾ ತೆಂಕಾ ತಿಯಾ ಮಾಜಿ ಭೆನ್ ಮನುನ್ ಸಾಂಗ್, ತನ್ನಾ ತೆನಿ ತುಜೊ ಭಾವ್ ಮನುನ್ ಮಾಜ್ಯಾ ವರ್‍ತಿ ದಯಾ ದಾಕ್ವುತಲೆ ಮನುನ್ ಸಾಂಗ್ಲ್ಯಾನ್. 14 ತನ್ನಾ ಅಬ್ರಾಮ್ ಇಜಿಪ್ತಾಕ್ ಜಾವ್ನ್ ಪಾವ್ಲೊ ತನ್ನಾ ಥೈತ್ನಾ ಲೊಕಾನಿ ಸಾರಾಕ್ ಬಗ್ತಾನಾ ತಿ ಭಗುಕ್ ಲೈ ಸುಂದರ್ ಹೊತ್ತಿ. 15 ಅನಿ ಪಾರೊವ್ ರಾಜಾಚಿ ಅಧಿಕಾರಿಯಾ ತಿಕಾ ಬಗುನ್, ತಿ ಲೈ ಸುಂದರ್ ಹಾಯ್ ಮನುನ್ ರಾಜಾಕ್ ತಿಚ್ಯಾ ವಿಶಯಾತ್ ಕಳ್ವುನ್ ತಿಕಾ ರಾಜಾಚ್ಯಾ ಘರಾಕ್ ಧಾಡುನ್ ದಿಲ್ಯಾನಿ.

16 ರಾಜಾನ್ ಅಬ್ರಾಮ್ ಸಾರಾಚೊ ಭಾವ್ ಮನುನ್ ಚಿಂತುನ್ ಸಾರಾ ವೈನಾ ಅಬ್ರಾಹಾಮಾಕ್ ದಯಾ ದಾಕ್ವುಲ್ಯಾನ್, ಅನಿ ತೆಕಾ ಗೊರಾ, ಶೆಳಿಯಾ, ಬಕ್ರಿಯಾ, ಅನಿ ಗಾಡ್ವಾ, ಆಳಾ ಅನಿ ಒಂಟಿಯಾ ದಿಲ್ಯಾನ್.

17 ಖರೆ ಅಬ್ರಾಮಾಚಿ ಬಾಯ್ಕೊ ಸಾರಾಕ್ ಬಲ್ವುನ್ ಘೆಟ್ಲ್ಯಾಲ್ಯಾ ವೈನಾ ದೆವಾನ್ ರಾಜಾ ವರ್‍ತಿ ಅನಿ ರಾಜಾಚ್ಯಾ ಘರ್‍ಹಾತ್ ರ್‍ಹಾತಲ್ಯಾಕ್ನಿ ಮೊಟೊ ಸಂಕಟ್ ಯೆಯ್ ಸಾರ್ಕೆ ಕರ್ಲ್ಯಾನ್. 18 ತನ್ನಾ ಪಾರೊವ್ ರಾಜಾನ್ ಅಬ್ರಾಹಾಮಾಕ್ ಬಲ್ವುಕ್ ಲಾವ್ನ್, ತಿಯಾ ಅಸೆ ಕಶ್ಯಾಕ್ ಕರ್‍ಲೆ? ಸಾರಾ ತುಜಿ ಬಾಯ್ಕೊ ಮನುನ್ ಕಶ್ಯಾಕ್ ಸಾಂಗುಕ್ ನೈ? 19 ಮಿಯಾ ತಿಕಾ ಮಾಜಿ ಬಾಯ್ಕೊ ಕರುನ್ ಘೆವ್ಚೆ ಮನುನ್ ಕರಲ್ಲೊ ಖರೆ ತಿಯಾ ಹಿ ಮಾಜಿ ಭೆನ್ ಹೊತಾ ಮನುನ್ ಕಶ್ಯಾಕ್ ಸಾಂಗ್ಲೈ? ತುಜ್ಯಾ ಬಾಯ್ಕೊಕ್ ಘೆವ್ನ್ ಹಿತೆತ್ನಾ ಜಾ! ಮನುನ್ ಸಾಂಗ್ಲ್ಯಾನ್. 20 ತನ್ನಾ ಪಾರೊವ್ ರಾಜಾನ್ ಅಬ್ರಾಹಾಮಾಕ್ ಇಜಿಪ್ತಾತ್ನಾ ಧಾಡಾ ಮನುನ್ ಅಪ್ಲ್ಯಾ ಲೊಕಾಕ್ನಿ ಹುಕುಮ್ ದಿಲ್ಯಾನ್, ಮಾನಾ ಅಬ್ರಾಹಾಮಾಕ್ ತೆಚಿ ಬಾಯ್ಕೊ ಸಾರಾ ಅನಿ ತೆಚ್ಯಾ ವಾಂಗ್ಡಾ ಹೊತ್ತಿ ಆಸ್ತಿ ಸಗ್ಳಿ ದಿವ್ನ್ ತೆಕಾ ದಾಡ್ಲ್ಯಾನ್.