1 ರಾಖೆಲಾನ್ ಅಪ್ನಿ ಜಾಕೊಬಾಕ್ ಪೊರಾ ಉಪಾಜುಕ್ ಹೊವ್ಕ್ನಾ ಮನುನ್ ಅಪ್ಲ್ಯಾ ಥೊರ್ಲ್ಯಾ ಭೆನ್ ವರ್‍ತಿ ಹೊಟ್ಟೆಕಿಚ್ ಕರುನ್ಗೆಟ್ಲಿನ್ ಅನಿ ಜಾಕೊಬಾಕ್ಡೆ ಮಾಕಾ ಪೊರಾ ದಿ ನಾತರ್ ಮಿಯಾ ಮರುನ್ ಜಾತಾ ಮಟ್ಲಿನ್.

2 ಜಾಕೊಬಾಕ್ ತಿಚೆ ವರ್‍ತಿ ರಾಗ್ ಹೊವ್ನ್, ಮಿಯಾ ಕಾಯ್ ದೆವ್ ಕಾಯ್ ತುಕಾ ಪೊರಾ ದಿಯ್ ನಸ್ತಾನಾ ರಾವ್ಕ್ ಮಿಯಾ ದೆವಾಚೊ ಜಾಗೊ ಘೆವ್ಕ್ ಹೊಯ್ನಾ, ಮನುನ್ ಜವಾಬ್ ದಿಲ್ಯಾನ್.

3 ತೆಕಾ ರಾಖೆಲಾನ್ ಮಾಜಿ ದಾಸಿ ಬಿಲ್ಹಾ ಹಾಯ್ ನೈ? ತಿಚ್ಯಾ ವಾಂಗ್ಡಾ ಮಿಳುನ್ ತಿಚ್ಯಾ ಪೊರಾಕ್ ಜಲಮ್ ದಿವ್ನ್ ಮಾಜ್ಯಾ ಹೊಟ್ಟ್ಯಾತ್ ಘಾಲುಂದಿತ್ ತನ್ನಾ ತಿಚ್ಯಾ ವೈನಾ ಮಾಜಿ ಪಿಳ್ಗಿ ಹೊತಲಿ, ಮಟ್ಲಿನ್. 4 ಅನಿ ತಸೆಚ್ ಆಳ್ ಬಿಲ್ಹಾಕ್ ಅಪ್ಲ್ಯಾ ನ್ಹೌರಾಕ್ ಒಪ್ಸುನ್ ದಿಲಿನ್, ಜಾಕೊಬ್ ತಿಚ್ಯಾ ವಾಂಗ್ಡಾ ಮಿಳ್ಳೊ. 5 ತಿ ಪೊಟಾನ್ ರ್‍ಹಾವ್ನ್ ಎಕ್ ಲೆಕಾಕ್ ಜಲಮ್ ದಿಲಿನ್. 6 ತನ್ನಾ ರಾಖೆಲಾನ್ ದೆವಾನ್ ಮಾಕಾ ನ್ಯಾಯ್ ದಿಲ್ಯಾನ್, ಮಾಜಿ ಮಾಗ್ನಿ ಆಯ್ಕುನ್ ಮಾಕಾ ಲೆಕ್ ದಿಲ್ಯಾನ್ ಮನುನ್ ಲೆಕಾಕ್ "ದಾನ್" ಮನುನ್ ನಾವ್ ಥವ್ಲಿನ್. 7 ತಿ ಆಳ್ ಬಿಲ್ಹಾ ಅನಿಬಿ ಪೊಟಾನ್ ರ್‍ಹಾವ್ನ್ ಜಾಕೊಬಾಚ್ಯಾ ದೊನ್ವೆಚ್ಯಾ ಲೆಕಾಕ್ ಜಲಮ್ ದಿಲಿನ್, 8 ತನ್ನಾ ರಾಖೆಲಾನ್ ಅಪ್ಲ್ಯಾ ಭೆನಿಚ್ಯಾ ವಾಂಗ್ಡಾ ಲೈ ಇರ್ಸೆನ್ ಜಿಕ್ಲೊ ಮನುನ್ ತ್ಯಾ ಲೆಕಾಕ್ "ನಪ್ತಾಲಿ" ಮನುನ್ ನಾವ್ ಥವ್ಲಿನ್.

9 ಲೆಯಾನ್ ಅಪ್ನಾಕ್ ಪೊರಾ ಹೊತಲೆ ಬಂದ್ ಹೊಲಿ ಬಗುನ್ ಅಪ್ಲಿ ಆಳ್ ಜಿಲ್ಪಾಕ್ ಜಾಕೊಬಾಚಿ ಬಾಯ್ಕೊ ಕರುನ್ ದಿಲಿನ್. 10 ಜಿಲ್ಪಾಕ್ಬಿ ಜಾಕೊಬಾಚೊ ಲೆಕ್ ಉಪಜ್ಲೊ. 11 ಲೆಯಾನ್ ಅಪ್ನಾಕ್ ಬರೆಚ್ ಹೊಲೆ ಮನುನ್ ತ್ಯಾ ಲೆಕಾಕ್ "ಗಾದ್" ಮನುನ್ ನಾವ್ ಥವ್ಲಿನ್. 12 ಲೆಯಾಚಿ ಆಳ್ ಜಿಲ್ಪಾನ್ ಜಾಕೊಬಾಚ್ಯಾ ಅನಿ ಎಕ್ ಲೆಕಾಕ್ ಜಲಮ್ ದಿಲಿನ್. 13 ತನ್ನಾ ಲೆಯಾನ್, ಮಿಯಾ ಕವ್ಡಿ ನಸಿಬ್ ವಾಲಿ ಅತ್ತಾ ಮಾಕಾ ಬಾಯ್ಕಾ ನಸಿಬ್ ವಾಲಿ ಮನ್ತಾತ್ ತಸಿ ಮನುನ್ ತ್ಯಾ ಲೆಕಾಕ್ "ಅಶೆರ್" ಮನುನ್ ನಾವ್ ಥವ್ಲಿನ್.

14 ಘಂವಾಚ್ಯಾ ಕಾತ್ರನಿಚ್ಯಾ ಎಳಾರ್ ರುಬೆನ್ ಸೆತಾಕ್ಡೆ ಜಾಯ್ತ್ ರ್‍ಹಾತಾನಾ, ಮಾಂಡ್ರೆಕಾ ಬಗಟ್ಲ್ಯಾನ್, ಅನಿ ತಿ ಹಾನುನ್ ಅಪ್ಲ್ಯಾ ಬಾಯ್ಕ್ ದಿಲ್ಯಾನ್, ತನ್ನಾ ರಾಖೆಲಾನ್ ತಿಕಾ "ಭೆನಿ ತುಜ್ಯಾ ಲೆಕಾನ್ ಹಾನಲ್ಯಾ ಮಾಂಡ್ರೆಕಾತ್ನಿ ಉಲ್ಲಿ ಮಾಕಾಬಿ ದಿ" ಮನುನ್ ಮಾಗ್ಲಿನ್.

15 ತನ್ನಾ ಲೆಯಾನ್ ತಿಯಾ ಮಾಜ್ಯಾ ನ್ಹೌರಾಕ್ ಚೊರಲ್ಲೆ ನೈ ಕರುನ್ ಮಾಜ್ಯಾ ಲೆಕಾನ್ ಹಾನಲಿ ಹನ್ನಾಬಿ ಘೆವ್ಕ್ ಯೆಲೈ ಕಾಯ್? ಮನುನ್ ಸಾಂಗ್ಲಿನ್, ತನ್ನಾ ರಾಖೆಲಾನ್ "ತಿಯಾ ತುಜ್ಯಾ ಲೆಕಾನ್ ಹಾನಲಿ ಮಾಂಡ್ರೆಕಾ ಮಾಕಾ ದಿಲ್ಯಾರ್ ಆಜ್ ರಾತ್ತಿನ್ ನ್ಹೌರೊ ತುಜ್ಯಾ ವಾಂಗ್ಡಾ ಮಿಳ್ತಾ" ಮಟ್ಲಿನ್.

16 ಸಾಂಜೆಕ್ಡೆ ಜಾಕೊಬ್ ಸೆತಾಕ್ನಾ ಘರಾಕ್ ಯೆತಾನಾ ಲೆಯಾ ತೆಚ್ಯಾ ಇದ್ರಾಕ್ ಯೆವ್ನ್ "ತಿಯಾ ಮಾಜ್ಯಾ ವಾಂಗ್ಡಾ ಮಿಳುಚೆ ಮಾಜ್ಯಾ ಲೆಕಾನ್ ಹಾನಲಿ ಮಾಂಡ್ರೆಕಾ ದಿವ್ನ್ ಮಿಯಾ ತುಕಾ ಇಕಾತ್ ಘೆಟ್ಲಾ," ಮಟ್ಲಿನ್ ತ್ಯಾ ದಿಸಿ ರಾತ್ತಿನ್ ಜಾಕೊಬ್ ತಿಚ್ಯಾ ವಾಂಗ್ಡಾ ಮಿಳ್ಲೊ.

17 ದೆವಾನ್ ಲೆಯಾಚಿ ಮಾಗ್ನಿ ಆಯ್ಕ್ಲ್ಯಾನ್ ಅನಿ ತಿ ಪೊಟಾನಿ ರ್‍ಹಾವ್ನ್ ಜಾಕೊಬಾಚ್ಯಾ ಪಾಂಚ್ವೆಚ್ಯಾ ಲೆಕಾಕ್ ಜಲಮ್ ದಿಲಿನ್. 18 ಮಿಯಾ ಮಾಜಿ ಆಳ್ ನ್ಹೌರ್ಯಾಕ್ ಒಪಸಲ್ಲ್ಯಾ ಸಾಟ್ನಿ ದೆವಾನ್ ಮಾಕಾ ಭೊಮಾನ್ ದಿಲ್ಯಾನ್ ಮನುನ್ ತ್ಯಾ ಪೊರಾಕ್ ಇಸ್ಸಾಕಾರ್ ಮನುನ್ ನಾವ್ ಥವ್ಲಿನ್. 19 ಲೆಯಾ ಅನಿ ಪರ್‍ತುನ್ ಪೊಟಾನ್ ರ್‍ಹಾವ್ನ್ ಜಾಕೊಬಾಚ್ಯಾ ಸಾವೆಚ್ಯಾ ಲೆಕಾಕ್ ಜಲಮ್ ದಿಲಿನ್. 20 ದೆವಾನ್ ಮಾಕಾ ಲೈ ಕಿಮ್ತಿಚೆ ಭೊಮಾನ್ ದಿಲ್ಯಾನ್, ಮಿಯಾ ಮಾಜ್ಯಾ ನ್ಹೌರ್ಯಾ ಸಾಟ್ನಿ ಸಾ ಲೆಕಾಕ್ನಿ ಜಲಮ್ ದಿಲೊ ತೆಕಾ ಲಾಗುನ್ ತೊ ಮಾಕಾ ಸ್ವಿಕಾರ್ ಕರುನ್ಗೆತಾ ಅನಿ ಗೌರವಾನ್ ಬಗ್ತಾ ಮನುನ್ ತ್ಯಾ ಲೆಕಾಕ್ ಜೆಬೊಲೊನ್ ಮನುನ್ ನಾವ್ ಥವ್ಲಿನ್. 21 ಮಾನಾ ತಿನಿ ಎಕ್ ಚೆಡ್ವಾಕ್ ಜಲಮ್ ದಿವ್ನ್ ತಿಕಾ ದಿನ್ಹಾ ಮನುನ್ ನಾವ್ ಥವ್ಲಿನ್.

22 ಹೆ ಹೊಲ್ಯಾ ಮಾನಾ ದೆವಾನ್ ರಾಖೆಲಾಕ್ ಯಾದ್ ಕರುನ್ ಘೆವ್ನ್ ತಿಜಿ ಮಾಗ್ನಿ ಆಯ್ಕುನ್ ತಿಬಿ ಪೊಟಾನಿ ರ್‍ಹಾಯ್ ಸಾರ್ಕೆ ಕರ್ಲ್ಯಾನ್. 23 ತಿ ಪೊಟಾನಿ ರ್‍ಹಾವ್ನ್ ಎಕ್ ಲೆಕಾಕ್ ಜಲಮ್ ದಿಲಿನ್ ದೆವಾನ್ ಮಾಕಾ ಹೊತ್ತೊ ಅವ್ಮಾನ್ ದುರ್ ಕರ್ಲ್ಯಾನ್, 24 ಸರ್ವೆಸ್ಪರ್ ದೆವಾನ್ ಮಾಕಾ ಅನಿಬಿ ಎಕ್ ಲೆಕ್ ದಿಂವ್ದಿತ್ ಮನುನ್ ತ್ಯಾ ಪೊರಾಕ್ ಜೊಸೆಪ್ ಮನುನ್ ನಾವ್ ಥವ್ಲಿನ್.

25 ರಾಖೆಲಾಕ್ ಜುಜೆ ಉಪಾಜಲ್ಲ್ಯಾ ಮಾನಾ ಜಾಕೊಬಾನ್ ಲಾಬಾನಾಕ್ , ಮಿಯಾ ಮಜ್ಯಾ ಸ್ವತ್ಯಾಚ್ಯಾ ಗಾಂವಾಕ್ ಜಾವ್ಕ್ ಒಪ್ಕಿ ದಿವಾ. 26 ಮಿಯಾ ಘೊಳುನ್ ಖಮ್ವಲ್ಲಿ ಬಾಯ್ಕಾ ಪೊರಾ ಸಗ್ಳಿ ಧಾಡುನ್ ದಿ ಮಿಯಾ ಜಾತಾ ತುಮ್ಚಿ ಲೈ ಸೆವಾ ಕರ್ಲಾ ಮನುನ್ ತುಮ್ಕಾ ಗೊತ್ತ್ ಹಾಯ್, ಮಟ್ಲ್ಯಾನ್.

27 ತೆಕಾ ಲಾಬಾನಾನ್ ಮಾಜೆ ವರ್‍ತಿ ದಯಾ ಕರುನ್ ಹಿತ್ತೆಚ್ ಮಾಜ್ಯಾ ವಾಂಗ್ಡಾ ರಾ ತುಜ್ಯಾ ವೈನಾ ಸರ್ವೆಸ್ಪರ್ ದೆವಾನ್ ಮಾಕಾ ಆಶಿರ್ವಾದ್ ಕರ್ಲಾ ಮನ್ತಲೆ ಮಾಕಾ ದಿಸುನ್ ಯೆವ್ಲಾ. 28 ತುಕಾ ಕಾಯ್ ಪಗಾರ್ ದಿವ್ಚೆ ಸಾಂಗ್ ಮಿಯಾ ದಿತಾ ಮನುನ್ ಜವಾಬ್ ದಿಲ್ಯಾನ್.

29 ತೆಕಾ ಜಾಕೊಬಾನ್ ಮಿಯಾ ರಾಕಲ್ಲಿ ಜನಾವರಾ ಕಸಿ ವಾಡ್ವಳ್ಕಿ ಹೊಲಾತ್ ಮನುನ್ ತುಕಾಚ್ ಗೊತ್ತ್ ಹಾಯ್. 30 ಮಿಯಾ ಯೆವ್ಚೆ ಪೈಲೆ ತುಜ್ಯಾಕ್ಡೆ ಉಲ್ಲಿಸಿಚ್ ಜನಾವರಾ ಹೊತ್ತೆ ಸಗ್ಳೆಬಿ ವಾಡ್ವಳ್ಕಿ ಹೊಲಾ, ಮಿಯಾ ಖೈ ಜಾತಾ ಥೈ ತುಕಾ ಸರ್ವೆಸ್ಪರ್ ದೆವಾನ್ ಆಶಿರ್ವಾದ್ ದಿಲಾ, ಖರೆ ಮಿಯಾ ಮಾಜ್ಯಾ ಸ್ವತ್ಯಾಚ್ಯಾ ಘರಾನಾ ಸಾಟ್ನಿ ಕನ್ನಾ ಖಮ್ವುತಲೆ? ಮಟ್ಲ್ಯಾನ್.

31 ತನ್ನಾ ಲಾಬಾನಾನ್, ಮಿಯಾ ತುಕಾ ಕಾಯ್ ದಿವ್ಚೆ ಸಾಂಗ್ ?ಮಟ್ಲ್ಯಾನ್. ಜಾಕೊಬಾನ್ ಮಾಕಾ ಕಾಯ್ಬಿ ದಿತಲೆ ನಕ್ಕೊ ಎಕುಚ್ ಕಾಮಾಕ್ ಒಪ್ಕಿ ದಿಲ್ಯಾರ್ ಫಿರೆ ಮಿಯಾ ಅನಿ ಪರ್‍ತುನ್ ತುಜ್ಯಾ ಶೆಳಿಯಾಂಚೊ ತಾಂಡೊ ಚಾರ್ವುನ್ ಹಾನ್ತಾ. 32 ಕಾಯ್ ಮಟ್ಲ್ಯಾರ್ ಆಜ್ ಮಿಯಾ ತುಜ್ಯಾ ಶೆಳಿಯಾಂಚ್ಯಾ ತಾಂಡ್ಯಾಕ್ ಚಾರ್ವುಕ್ ಜಾತಾ, ಬಕ್ರ್ಯಾಂಚ್ಯಾ ಪೆಟ್ಯಾತ್ನಿ ಕಾಳಿ ಹೊತ್ತಿ ಅನಿ ಶೆಳಿಯಾಂಚ್ಯಾ ಪೆಟ್ಯಾತ್ನಿ ಹಂಡೆ ಬಂಡೆ ಹೊತ್ತೆ ಎಗ್ಳೆ ಕರ್ ಅನಿ ತೊಚ್ ಮಾಜೊ ಪಗಾರ್. 33 ಮಿಯಾ ಖರೊ ಹಾಯ್ ಕಿ ನಾ ಮನುನ್ ತಿಯಾ ಯೆವ್ನ್ ಪರಿಕ್ಷಾ ಕರ್ತಾನಾ ತುಕಾ ಕಳುನ್ ಯೆತಾ ಮಾಜ್ಯಾಕ್ಡೆ ಹಂಡೆ ಬಂಡೆ ನಸಲ್ಲಿ ಶೆಳಿಯಾ ನಾ ಹೊಲ್ಲಿ ರಾಲ್ಯಾರ್ ಅನಿ ಕಾಳ್ಯಾ ರಂಗಾಚಿ ಬಕ್ರಿಯಾ ನಾಹೊವ್ನ್ ದುಸ್ರಿ ರಾಲ್ಯಾರ್ ಮಿಯಾ ಚೊರ್ಲಾ ಮನುನ್ ಚಿಂತ್ ಮಟ್ಲ್ಯಾನ್.

34 ತನ್ನಾ ಲಾಬಾನಾನ್, "ಬರೆ ತಿಯಾ ಸಾಂಗಲ್ಯಾ ಸಾರ್ಕೆಚ್ ಹೊಂವ್ದಿತ್" ಮಟ್ಲ್ಯಾನ್. 35 ಖರೆ ಲಾಬಾನಾನ್ ತ್ಯಾಚ್ ದಿಸಿ ಪಾಲ್ವ್ಯಾತ್ನಿ ಹಂಡೆ ಬಂಡೆ ಹೊತ್ತ್ಯಾಕ್ನಿ ಅನಿ, ಶೆಳಿಯಾತ್ನಿ ಢಾನೆ ಢಾನೆ ಹೊತ್ತ್ಯಾಕ್ನಿ ಮಟ್ಲ್ಯಾರ್, ಉಲ್ಲೆ ಗೊರೊ ರಂಗ್ ದಿಸ್ತಲ್ಯಾ ಸಗ್ಳ್ಯಾಕ್ನಿ, ಬಕ್ರ್ಯಾಂಚ್ಯಾ ಪೆಟ್ಯಾತ್ನಿ ಕಾಳಿ ದಿಸ್ತಲಿ ಎಗ್ಳುನ್ ಅಪ್ಲ್ಯಾ ಲೆಕಾಂಚ್ಯಾ ತಾಬೆತ್ ದಿಲ್ಯಾನ್. 36 ತನ್ನಾ ಲಾಬಾನಾನ್ ಅಪ್ನಾಕ್ ಅನಿ ಅಪ್ಲಿ ಶೆಳಿಯಾ ರಾಕುಲಾಗಲ್ಯಾ ಜಾಕೊಬಾಕ್ಬಿ ತಿನ್ ದಿಸ್ ಪರ್ಯಾನ್ ಕರುನ್ ಜಾಯ್ ಸಾರ್ಕೆ ಧುರ್ ಕರುನ್ ಅಪ್ಲ್ಯಾ ಬಕ್ರ್ಯಾಂಚ್ಯಾ ಹಿಂಡಾಕ್ ಚಾರ್ವುಲ್ಯಾನ್.

37 ಅಸೆ ರ್‍ಹಾತಾನಾ ಜಾಕೊಬಾನ್ ಚಿನಾರು, ಬಾದಾಮಿ, ಅರ್ಮೊನ್ ಮನ್ತಲ್ಯಾ ಝಾಡಾಂಚಿ ಹಿರ್ವಿ ಟಾಳಿಯಾ ಘೆವ್ನ್ ಪಟ್ಟಿ ಪಟ್ಟಿಯಾ ಕರುನ್ ಚಿರುನ್ ತ್ಯಾತುರ್ಲೊ ಗೊರೊ ರಂಗ್ ದಿಸಿ ಸಾರ್ಕೆ ಕರುನ್, 38 ತೆ ಶೆಳಿಯಾ ಪಾನಿ ಫಿತಲ್ಯಾ ಡೊನ್ಯಾತ್ನಿ ಥವ್ಲ್ಯಾನ್, ಶೆಳಿಯಾ ಅನಿ ಬಕ್ರಿ ಮಿಳ್ತಲೊ ಅನಿ ಪಾನಿ ಫಿತಲ್ಯಾ ಎಳ್ ಎಕುಚ್ ಹೊವ್ನ್ ರ್‍ಹಾತಾ. 39 ತಿ ಮಿಳ್ತಾನಾ ತೆ ದಾಂಡೆ ಬಗುನ್ಗೆತ್ ಮಿಳಲ್ಯಾ ಸಾಟ್ನಿ ಪಟ್ಟ್ಯಾ ಪಟ್ಟ್ಯಾಂಚೆ ಹಂಡೆ ಬಂಡೆ ನಾತರ್ ಢಾನ್ಯಾ ಢಾನ್ಯಾಂಚ್ಯಾ ಪೆಟ್ಯಾಕ್ನಿ ಜಲಮ್ ದಿಲ್ಯಾನಿ.

40 ಜಾಕೊಬಾನ್ ತೆ ಪೆಟೆ ಅಪ್ಲೆ ಮನುನ್ ಯೆಗ್ಳುನ್ ತೆಂಕಾ ಲಾಬಾನಾಚ್ಯಾ ತಾಂಡ್ಯಾಕ್ ಮಿಳ್ವುಕ್ನಾ, ಲಾಬಾನಾಚ್ಯಾ ಶೆಳಿಯಾಂಚಿ ತೊಂಡಾ ಗೆರೆ ಹೊತ್ತ್ಯಾ ಶೆಳಿಯಾಂಚ್ಯಾ ಅನಿ ಕಾಳಿ ಹೊತ್ತ್ಯಾ ತ್ಯಾ ಬಕ್ರಿಯಾಂಚ್ಯಾಕ್ಡೆ ಪರ್‍ತುನ್ ಥವ್ಲ್ಯಾನ್.

41 ಅನಿ ಬರಿ ಪುಸ್ಟಿ ಹೊತ್ತಿ ಶೆಳಿಯಾ ಅನಿ ಬಕ್ರಿಯಾ ಮಿಳ್ತಾನಾ ತೆ ದಾಂಡೆ ಬಗುನ್ಗೆತ್ ಮಿಳುಂದಿತ್ ಮನುನ್ ಜಾಕೊಬಾನ್ ಪಾನಿಯಾಚ್ಯಾ ಡೊನ್ಯಾತ್ನಿ ಥವ್ಲ್ಯಾನ್. 42 ಖರೆ ಬಳ್ ನಸಲ್ಯಾ ಶೆಳಿಯಾ ಅನಿ ಬಕ್ರ್ಯಾಂಚ್ಯಾ ಇದ್ರಾಕ್ ತಸೆ ಕರುಕ್ನಾ, ಅಸೆ ಬಲಿಸ್ಟ್ ಹೊತ್ತಿ ಫುರಾ ಜನಾವರಾ ಜಾಕೊಬಾಚ್ಯಾ ವಾಟ್ಯಾಕ್ ಯೆಲಿ, ಅನಿ ಬಳ್ ನಸಲಿ ಫುರಾ ಲಾಬಾನಾಚ್ಯಾ ವಾಟ್ಯಾಕ್ ಗಾವ್ಲಿ. 43 ಅಸೆ ಕರುನ್ ಜಾಕೊಬಾನ್ ಲೈ ಖಮ್ವುನ್ ಸಾವ್ಕಾರ್ ಹೊಲೊ; ತೆಕಾ ಹೆನ್ನ್ ಆಳಾ ಗಂಡ್ ಆಳಾ ಅನಿ ಲೈ ಶೆಳಿಯಾಂಚೊ ತಾಂಡೊ ಅನಿ ಒಂಟಿಯಾ ಗಾಡ್ವಾ ಸಗ್ಳೆ ಲೈ ಗಾವ್ಲೆ.