ಉತ್ಪತ್ತಿ 13

ಅಬ್ರಾಮ್ ಅನಿ ಲೊಟ್ ಎಗಳ್ತಲೆ

1 ಮಾನಾ ಅಬ್ರಾಮ್ ಅಪ್ನಾಚಿ ಆಸ್ತಿ ಅನಿ ಬಾಯ್ಕೊಕ್ ಬಲ್ವುನ್ಗೆವ್ನ್ ಇಜಿಪ್ತಾತ್ನಾ ನೆಗೆವ್ ಮನ್ತಲ್ಯಾ ಗಾಂವಾಕ್ ಗೆಲೊ. ಅನಿ ತೆಚ್ಯಾ ವಾಂಗ್ಡಾ ಲೊಟ್ಬಿ ಹೊತ್ತೊ. 2 ಅನಿ ಅಬ್ರಾಮಾಕ್ಡೆ ಲೈ ಶೆಳಿಯಾ, ಬಕ್ರಿ ಅನಿ ಗೊರಾಡೊರಾ, ಸೊನೆ ಚಾಂದಿ ರ್‍ಹಾವ್ನ್ ತೊ ಲೈ ಮೊಟೊ ಸಾವ್ಕಾರ್ ಹೊತ್ತೊ. 3 ಮಾನಾ ತೊ ಇಜಿಪ್ತ್ ಸೊಡುನ್ ನೆಗೆವ್ ದೆಶ್ಯಾ ಪತರ್ ಎಕ್ ಜಾಗ್ಯಾ ವೈನಾ ಅನಿ ಎಕ್ ಜಾಗ್ಯಾ ವೈರ್ ಫಿರುನ್ಗೆತ್ ಬೆತೆಲ್ ಅನಿ ಆಯಿ ಮನ್ತಲ್ಯಾ ಜಾಗ್ಯಾಚ್ಯಾ ಮದ್ದಿ ಝೊಪ್ಡೆ ಭಾಂದಲ್ಯಾನ್, 4 ಬಲಿ ಭೆಟ್ವುತಲೊ ಕಟ್ಟೊ ಭಾಂದಲ್ಲ್ಯಾ ಜಾಗ್ಯಾಕ್ ಪರ್‍ತುನ್ ಯೆವ್ನ್ ಸರ್ವೆಸ್ಪರ್ ದೆವಾಚೆ ನಾವ್ ಘೆವ್ನ್ ಆರಾದನ್ ಕರ್ಲ್ಯಾನ್.

5 ಅನಿ ಅಬ್ರಾಮಾಚ್ಯಾ ವಾಂಗ್ಡಾ ಹೊತ್ತ್ಯಾ ಲೊಟಾಕ್ಬಿ ಗೊರಾ ಅನಿ ಬಕ್ರಿಯಾ ಶೆಳಿಯಾ ಹೊತ್ತಿ ಅನಿ ಸ್ವತಾಚೊ ಕುಟುಂಬ್ ಅನಿ ಆಳಾಬಿ ಹೊತ್ತಿ. 6 ಖರೆ ತೆಂಚ್ಯಾ ದೊಗ್ಯಾಂಚ್ಯಾಕ್ಡೆ ಬಿ ಲೈ ಜನಾವರಾ ಹೊತ್ತ್ಯಾ ಸಾಟ್ನಿ ತೆನಿ ದೊಗೆಬಿ ವಾಂಗ್ಡಾ ರಾವ್ಕ್ ಜಾಗೊ ಪಾವ್ಕ್ ನಾ.

7 ಅಸೆ ರ್‍ಹಾತಾನಾ ಅಬ್ರಾಮಾಚ್ಯಾ ಅನಿ ಲೊಟಾಚ್ಯಾ ಗೊರಾಡೊರಾ ರಾಕ್ತಲ್ಯಾಂಚ್ಯಾ ಮದ್ದಿ ಝಗ್ಡೊ ಹೊವ್ಕ್ ಸುರು ಹೊಲೆ, ತ್ಯಾ ದಿಸಾತ್ನಿ ಕಾನಾನಾಚಿ ಲೊಕಾ ಅನಿ ಪೆರಿಜಿಂಚಿ ಲೊಕಾ ತ್ಯಾ ದೆಸಾತ್ ವಸ್ತಿ ರಾಯ್ತ್.

8 ತನ್ನಾ ಅಬ್ರಾಮಾನ್ ಲೊಟಾಕ್, "ಮಾಜ್ಯಾ ಅನಿ ತುಜ್ಯಾ ಮದ್ದಿ ಅನಿ ಮಾಜ್ಯಾ ಘೊರಾ ರಾಕ್ತಲ್ಯಾಂಚ್ಯಾ ಅನಿ ತುಜ್ಯಾ ಗೊರಾ ರಾಕ್ತಲ್ಯಾಂಚ್ಯಾ ಮದ್ದಿ ಝಗ್ಡೊ ಹೊತೊಲೊ ನಕ್ಕೊ ಕಶ್ಯಾಕ್ ಮಟ್ಲ್ಯಾರ್, ಮಿಯಾ ಅನಿ ತಿಯಾ ಸಮಂದಿಕಾ ನೈ ಕಾಯ್" ಮಟ್ಲ್ಯಾನ್.

9 "ಮಾನಾ ಅನಿ ಸಗ್ಳೆ ದೆಶ್ ತುಜಾ ಇದ್ರಾಕುಚ್ ಹಾಯ್ ನೈ? ತಿಯಾ ಮಾಜ್ಯಾಕ್ನಾ ಎಗ್ಳೊ ಸರಕ್, ಅನಿ ತಿಯಾ ಡಾವ್ಯಾಕ್ ಜಾತೈ ಹೊಲ್ಯಾರ್ ಮಿಯಾ ಉಜ್ವ್ಯಾ ಭಾಜುಕ್ ಜಾತಾ ನಾತರ್ ತಿಯಾ ಉಜ್ವ್ಯಾಕ್ ಜಾತೈ ಹೊಲ್ಯಾರ್ ಮಿಯಾ ಡಾವ್ಯಾಕ್ ಜಾತಾ" ಮಟ್ಲ್ಯಾನ್.

10 ಲೊಟಾನ್ ಬಗ್ತಾನಾ ಜೊರ್ದಾನ್ ನ್ಹಯಿಚ್ಯಾ ಭೊತ್ಯಾನಿ ಭರ್ಪುರ್ ಪಾನಿ ಹೊತ್ತೊ ಜೊಗರಿ ಪತರ್ಲೊ ಜಾಗೊ ತೆಕಾ ದಿಸ್ಲೊ, ತ್ಯಾ ಎಳಾರ್ ಸರ್ವೆಸ್ಪರ್ ದೆವಾನ್ ಸೊದೊಮ್ ಅನಿ ಗೊಮೊರ್ ಶಾರಾಕ್ನಿ ನಾಶ್ ಕರ್‍ತಲ್ಯಾ ಅದ್ದಿ, ತೊ ಜಾಗೊ ಸರ್ವೆಸ್ಪರ್ ದೆವಾಚೊ ಮ್ಹಳೊ ಸಾರ್ಕೊ ಅನಿ ಇಜಿಪ್ತ್ ದೆಶ್ಯಾ ಸರ್ಕೊಬಿ ಹೊವ್ನ್ ಹೊತ್ತೊ. 11 ಲೊಟಾನ್ ತೆ ಬಗುನ್ ಜೊರ್ದಾನ್ ಮನ್ತಲ್ಯಾ ಜಾಗ್ಯಾಕ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಗೆಲೊ, ಅನಿ ತೆನಿ ಎಕಾಮೆಕಾಕ್ ಎಗಳ್ಳೆ. 12 ಅಬ್ರಾಮ್ ಕಾನಾನಾಚ್ಯಾ ಜಾಗ್ಯಾರ್ ವಸ್ತಿ ಕರುಲಾಲೊ ಅನಿ ಲೊಟಾನ್ ಸೊದೊಮ್ ಶರಾಂಚ್ಯಾ ಜಗ್ಗೊಳ್ ಮಾಳ್ ಜಾಗ್ಯಾ ವೈನಿ ಝೊಪ್ಡೆ ಭಾಂದ್ಲ್ಯಾನ್. 13 ತ್ಯಾ ಸೊದೊಮಾತ್ಲಿ ಲೊಕಾ ಲೈ ಬುರ್ಸೆ ಹೊವ್ನ್ ಹೊತ್ತಿ ಅನಿ ಸರ್ವೆಸ್ಪರ್ ದೆವಾಕ್ ವಿರೊದ್ ಹೊವ್ನ್ ಪಾಪ್ ಕರಿತ್ ಹೊತ್ತೆ.

ಅಬ್ರಾಮ್ ಹೆಬ್ರೊನಾಕ್ ಜಾತಲೆ

14 ಅಬ್ರಾಮ್ ಲೊಟಾಕ್ನಾ ಎಗ್ಳೊ ಹೊಲ್ಲ್ಯಾ ಮಾನಾ ಸರ್ವೆಸ್ಪರ್ ದೆವಾನ್ ತೆಕಾ, ತಿಯಾ ಹೊತ್ತ್ಯಾ ಜಾಗ್ಯಾ ವೈನಾ ಚಾರಿ ದಿಕ್ಕಾಕ್ನಿಬಿ ಡೊಳೆ ವರ್‍ತಿ ಕರುನ್ ಬಗ್, 15 ಅನಿ ತುಜಿ ನದರ್ ಖೈ ಪಾತರ್ ಪಾವ್ತಾ ತೊ ಸಗ್ಳೊ ಜಾಗೊ ಮಿಯಾ ತುಕಾ ಅನಿ ತುಜಾ ಪಿಳ್ಗಿಕ್ ಸದಾ ಸರ್ವತಾಕ್ ದಿತಾ ಮಟ್ಲ್ಯಾನ್. 16 ಕೊನ್ ತರ್ಬಿ ಧುಳ್ ಮೆಜ್ತಾ ಹೊಲ್ಯಾರ್ ತುಜಿ ಪಿಳ್ಗಿಬಿ ಮೆಜ್ತಾ. 17 ಅನಿ ಉಟ್ ಹೊ ದೆಶ್ ಲಾಂಬ್ ಅನಿ ರುಂದ್ ಫಿರುನ್ ಬಗ್, ಕಶ್ಯಾಕ್ ಮಟ್ಲ್ಯಾರ್ ತೊ ಮಿಯಾ ತುಕಾ ದಿತಾ. 18 ಮಾನಾ ಅಬ್ರಾಮಾನ್ ಅಪ್ನಾಚೊ ವಾಟೊ ಘೆವ್ನ್ ಹೆಬ್ರೊನಾತ್ ಹೊತ್ತ್ಯಾ ಮಾಮ್ರೆ ಮನ್ತಲ್ಯಾ ಶುದ್ದ್ ಝಾಡಾಕ್ಡೆ ಜಾವ್ನ್ ಝೊಪ್ಡೆ ಭಾಂದ್ಲ್ಯಾನ್, ಅನಿ ತೆನಿ ಸರ್ವೆಸ್ಪರ್ ದೆವಾಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದ್ಲ್ಯಾನ್.