1 ಸರ್ವೆಸ್ಪರ್ ದೆವಾನ್ ಸಾರ್‍ಹಾಕ್ ದಿಲ್ಲಿ ಗೊಸ್ಟ್ ಫುರಾ ಕರ್ತಾ. 2 ಅಬ್ರಾಹಾಮ್ ಮ್ಹಾತಾರೊ ಹೊಲ್ಲ್ಯಾ ಎಳಾರ್ಬಿ ದೆವಾನ್ ದಿಲ್ಲ್ಯಾ ಗೊಸ್ಟಿ ಸಾರ್ಕೆ ತ್ಯಾ ಕಾಳಾರ್ ತಿನಿ ಪೊಟಾನಿ ರ್‍ಹಾವ್ನ್ ಎಕ್ ಲೆಕಾಕ್ ಜಲಮ್ ದಿಲಿನ್. 3 ಅಬ್ರಾಹಾಮಾನ್ ಸಾರ್‍ಹಾಕ್ನಾ ಉಪಾಜ್ಲ್ಯಾಲ್ಯಾ ಲೆಕಾಕ್ ಇಸಾಕ್ ಮನುನ್ ನಾವ್ ಥವ್ಲ್ಯಾನ್. 4 ಸರ್ವೆಸ್ಪರಾಚ್ಯಾ ಗೊಸ್ಟಿಚ್ಯಾ ಸಾರ್ಕೆ ಅಬ್ರಾಹಾಮಾನ್ ತೆಚ್ಯಾ ಲೆಕಾಕ್ ಆಟ್ ದಿಸಾ ಹೊಲ್ಲ್ಯಾ ಮಾನಾ ಸುನ್ನತ್ ಕರಸ್ಲ್ಯಾನ್. 5 ಇಸಾಕ್ ಉಪಾಜಲ್ಲ್ಯಾ ತನ್ನಾ ಅಬ್ರಾಹಾಮಾಕ್ ಸಂಬರ್ ವರ್ಸಾ ಹೊಲ್ಲೊ ರ್‍ಹಾತಾ. 6 ತನ್ನಾ ಸಾರಾನ್, "ದೆವಾನ್ ಮಾಜ್ಯಾ ತೊಂಡಾರ್ ಹಾಸೊ ದಿಲಾ ಹೆ ಆಯ್ಕುನ್ ಹರ್ ಎಕ್ಲೊಬಿ ಮಾಜ್ಯಾ ವಾಂಗ್ಡಾ ಹಾಸ್ತಾತ್" ಮನುನ್ ಸಾಂಗ್ಲಿನ್. 7 ಸಾರ್‍ಹಾನ್, ಮಾಕಾ ಅಬ್ರಾಹಾಮಾಕ್ನಾ ಪೊರಾ ಹೊತಾತ್ ಮನುನ್ ಕೊನ್ಬಿ ಯವ್ಜುಕ್ ನತ್ತ್ಯಾನಿ ಅನಿ ಸಾರಾ ಪೊರಾಕ್ನಿ ಥಾನ್ ಪಾಜ್ವುತಾ ಮನುನ್, ಖರೆ ಅಬ್ರಾಹಾಮ್ ಮಾತಾರೊ ಹೊಲ್ಯಾರ್ಬಿ ತೆಚ್ಯಾ ಸಾಟ್ನಿ ಮಿಯಾ ಎಕ್ ಲೆಕಾಕ್ ಜಲಮ್ ದಿಲೊ.

8 ಮಾನಾ ಇಸಾಕ್ ಮೊಟೊ ಹೊಲೊ ಅನಿ ತೆನಿ ಥಾನ್ ಫಿತಲೆ ಸೊಡಲ್ಯಾ ದಿಸಿ ಅಬ್ರಾಹಾಮಾನ್ ಸಗ್ಳ್ಯಾಕ್ನಿ ಮೊಟೆ ಜೆವಾನ್ ಘಾಟ್ಲ್ಯಾನ್.

9 ಎಕ್ ದಿಸಿ ಅಬ್ರಾಹಾಮಾಕ್ನಾ ಇಜಿಪ್ತಾಚ್ಯಾ ಹಾಗರಾಕ್ ಉಪಾಜಲ್ಲೊ ಲೆಕ್ ಇಸ್ಮಾಯೆಲ್ ಸಾರ್‍ಹಾಚೊ ಲೆಕ್ ಇಸಾಕಾಕ್ ಎಡ್ಸಡುಲಾಗಲ್ಲೆ ಬಗ್ಲಿನ್. 10 ತನ್ನಾ ಸಾರಾನ್ ಅಬ್ರಾಹಾಮಾಕ್, "ತ್ಯಾ ದಾಸಿಕ್ ಅನಿ ತಿಚ್ಯಾ ಲೆಕಾಕ್ ಭಾಯ್ರ್ ಘಾಲ್, ಆಸ್ತಿ ಫುರಾ ಮಾಜ್ಯಾ ಲೆಕ್ ಇಸಾಕಾಕ್ ಹೊತಾ, ಅನಿ ತೆಚ್ಯಾ ವಾಂಗ್ಡಾ ಅನಿ ಎಕ್ಲೊ ವಾಟೊ ಹೊತಲೆ ಮಾಕಾ ಮನ್ ನಾ "ಮನುನ್ ಸಾಂಗ್ಲಿನ್. 11 ಇಸ್ಮಾಯೆಲ್ ಬಿ ಅಬ್ರಾಹಾಮಾಚೊ ಲೆಕ್ ಹೊಲ್ಯಾ ಸಾಟ್ನಿ ತೆಚ್ಯಾ ವಿಶಯಾತ್ ಅಬ್ರಾಹಾಮಾಕ್ ಲೈ ದುಕ್ಕ್ ಹೊತಾ. 12 ಖರೆ ಸರ್ವೆಸ್ಪರ್ ದೆವಾನ್ ಅಬ್ರಾಹಾಮಾಕ್, ತುಜ್ಯಾ ಆಸ್ತಿಕ್ ಇಸಾಕ್ ಎಕುಚ್ ವಾರಿಸ್ದಾರ್ ಹೊವ್ಚೆ, ಅನಿ ತಿಯಾ ಹಾಗರಾ ಸಾಟ್ನಿ ಅನಿ ತಿಚ್ಯಾ ಲೆಕಾ ಸಾಟ್ನಿ ಮನುನ್ ಚಿಂತಾ ಕರುನಕ್ಕೊ ಸಾರಾನ್ ಸಾಂಗಟಲ್ಲ್ಯಾ ಸಾರ್ಕೆ ಕರ್. 13 ಖರೆ ಮಿಯಾ ತುಜ್ಯಾ ಸೆವಕಿಚ್ಯಾ ಲೆಕಾಕ್ ಆಶಿರ್ವಾದ್ ದಿತಾ, ತೆಚ್ಯಾ ವೈನಾ ಮಿಯಾ ಮೊಟೊ ಲೊಕಾಂಚೊ ತಾಂಡೊ ಹೊಯ್ ಸಾರ್ಕೆ ಕರ್ತಾ, ಕಶ್ಯಾಕ್ ಮಟ್ಲ್ಯಾರ್ ತೊ ಬಿ ತುಜೊಚ್ ಲೆಕ್ ನೈ ಮಟ್ಲ್ಯಾನ್.

14 ಮಾನಾ ದುಸ್ರೆ ದಿಸಾ ಸಕ್ಕಾಳಾಕ್ ಉಲ್ಲೆ ಜೆವಾನ್ ಅನಿ ಚಮ್ಡ್ಯಾಚ್ಯಾ ಚಿಲಾತ್ ಪಾನಿ ದಿವ್ನ್ ಪೊರಾಕ್ ತಿಚ್ಯಾ ಡುಬ್ರಿವರ್‍ತಿ ಬಸ್ವುನ್ ತೆಂಕಾ ಘರ್‍ಹಾತ್ನಾ ಧಾಡುನ್ ದಿಲ್ಯಾನ್, ಮಾನಾ ತೆನಿ ಬೆರ್ಶಿಬಾಚ್ಯಾ ಡಂಗ್ಳಿತ್ ಪಿರುನ್ಗೆತ್ ಹೊತ್ತ್ಯಾನಿ. 15 ಅನಿ ಉಲ್ಲೊ ಎಳ್ ಹೊಲ್ಲ್ಯಾ ಮಾನಾ ತೆಂಚ್ಯಾಕ್ಡೆ ಹೊತ್ತೆ ಪಾನಿ ಸರುನ್ ಗೆಲೆ, ತೆಂಕಾ ಪಿವ್ಕ್ ಪಾನಿ ನತ್ತ್ಯಾ ಸಾಟ್ನಿ , ತಿ ಲೆಕಾಕ್ ಎಕ್ ಝಿಳಿಚ್ಯಾ ಸಾವ್ಳಿತ್ ನಿಜ್ವುತಾ, 16 ಅನಿ ತ್ಯಾ ಪೊರಾಕ್ನಾ ಸೆಂಬರ್ ಮಿಟರ್ ಧುರ್ ಜಾವ್ನ್ ಮಾಜೆ ಪೊರ್ ಮರ್ತಲೆ ಬಗುಕ್ ಹೊಯ್ನಾ ಮನುನ್ ಅಪ್ನಾ ಯೆವ್ಡ್ಯಾಕುಚ್ ಸಾಂಗುನ್ ಘೆವ್ನ್ ರಡುಲಾಲಿ.

17 ತನ್ನಾ ಸರ್ವೆಸ್ಪರ್ ದೆವಾಕ್ ತ್ಯಾ ಪೊರಾಚೆ ರಡ್ತಲೆ ಆಯಿಕ್ತಾ, ದೆವ್ ಧುತಾನ್ ಸರ್ಗಾಕ್ನಾ ತಿಕಾ ಬಲ್ವುನ್, ಹಾಗರಾ ತಿಯಾ ಕಶ್ಯಾಕ್ ತರಾಸ್ ಘೆತೆಯ್? ಬ್ಹಿಂವ್ ನಕ್ಕೊ ದೆವಾಕ್ ತುಜಾ ಪೊರಾಚೊ ರಡೊ ಆಯಿಕ್ಲಾ, 18 ಜಾ ತೆಕಾ ಉಕ್ಲುನ್ ಘೆ, ಅನಿ ತೆಕಾ ರಮಸ್ ಮಿಯಾ ತೆಚ್ಯಾ ಪಿಳ್ಗಿ ವೈನಾ ಮೊಟೊ ದೆಶ್ ಹೊಯ್ ಸಾರ್ಕೆ ಕರ್ತಾ, ಮನುನ್ ಸಾಂಗ್ಲ್ಯಾನ್. 19 ಮಾನಾ ದೆವಾನ್ ತಿಚೆ ಡೊಳೆ ಉಗಡ್ಲ್ಯಾನ್ ಅನಿ ತಿಕಾ ಎಕ್ ಬಾಂಯ್ ದಿಸಿ ಸಾರ್ಕೆ ಕರ್ತಾ, ಮಾನಾ ತಿ ಜಾವ್ನ್ ಪಾನಿ ಭರುನ್ ಘೆವ್ನ್ ಲೆಕಾಕ್ ಪಾನಿ ಫಿವಸ್ತಾ. 20 ದೆವ್ ತ್ಯಾ ಝಿಲ್ಗ್ಯಾ ವಾಂಗ್ಡಾ ರ್‍ಹಾವ್ನ್ ತೆಕಾ ವಾಡ್ವಳ್ಕಿ ಕರ್ತಾ, ಅನಿ ತೊ ತ್ಯಾ ಡಂಗ್ಳಿತ್ ಜಿವನ್ ಕರಿತ್ ಮೊಟೊ ಶಿಕಾರಿಕಾರ್ ಹೊತಾ.

21 ತೆಚಿ ಬಾಯ್ ತೆಕಾ ಇಜಿಪ್ತಾತ್ನಾ ಎಕ್ ಚೆಡು ಹಾನುನ್ ಬಾಯ್ಕೊ ಕರ್‍ಲಿನ್, ಮಾನಾ ತೆನಿ ಪರಾನ್ ಮನ್ತಲ್ಯಾ ಡಂಗ್ಳಿತ್ ವಸ್ತಿ ಕರಿತ್ ರ್‍ಹಾತಾತ್.

22 ಮಾನಾ ಅಬಿಮೆಲೆಕ್ ಅನಿ ತೆಚೊ ಸೈನ್ಯಾಧಿಕಾರಿ ಫಿಕೊಲ್ ತೆನಿ ದೊಗೆ ಜಾನಾಬಿ ಅಬ್ರಾಹಾಮಾಚ್ಯಾ ವಾಂಗ್ಡಾ ಬೊಲ್ತ್ಯಾತ್, ಅನಿ ಅಬಿಮೆಲೆಕಾನ್ ಅಬ್ರಾಹಾಮಾಕ್, "ತಿಯಾ ಕರ್‍ತಲ್ಯಾ ಹರ್ ಎಕಾತ್ಬಿ ದೆವ್ ತುಜ್ಯಾ ವಾಂಗ್ಡಾ ಹಾಯ್, 23 ತನ್ನಾ ತಿಯಾ ಮಾಜ್ಯಾ ಇದ್ರಾಕ್ ಭಾಸ್ ದಿ, ತಿಯಾ ಮಾಜ್ಯಾ ವಾಂಗ್ಡಾ ಅನಿ ಮಾಜ್ಯಾ ಪಿಳ್ಗಿಚ್ಯಾ ವಾಂಗ್ಡಾ ನ್ಯಾಯಾನ್ ಚಲ್, ಅನಿ ಮಿಯಾ ತುಕಾ ದಯಾ ದಾಕ್ವುಲ್ಯಾ ಸರ್ಕೆ ತಿಯಾ ಬಿ ಮಾಕಾ ದಯಾ ದಾಕ್ವುಚೆ" ಮನುನ್ ಸಾಂಗ್ಲ್ಯಾನ್.

24 ತನ್ನಾ ಅಬ್ರಾಹಾಮಾನ್ ಮಿಯಾ ಭಾಸ್ ದಿತಾ ಮನುನ್,

25 ಮಾನಾ ಅಬಿಮೆಲೆಕಾಚ್ಯಾ ಸೆವಕಾನಿ ಕಾಡುನ್ ಘೆಟಲ್ಯಾ ಭಾಂಯಿಚ್ಯಾ ವಿಶಯಾತ್ ಸಾಂಗ್ಲ್ಯಾನ್.

26 ತನ್ನಾ ಅಬಿಮೆಲೆಕಾನ್, "ತೆ ಕೊನ್ ಕರ್ಲಾತ್ ಮನುನ್ ಮಾಕಾ ಗೊತ್ತ್ ನಾ, ತಿಯಾ ಮಾಕಾ ಅದ್ದಿಚ್ ಕಶ್ಯಾಕ್ ಸಾಂಗುಕ್ ನೈ" ಅನಿ ಹ್ಯಾ ವಿಶಯಾತ್ ಆಯ್ಕುಲಾಗಲ್ಲೊ ಅತ್ತ್ಯಾಚ್ ಮಟ್ಲ್ಯಾನ್. 27 ಮಾನಾ ಅಬ್ರಾಹಾಮಾನ್ ಅನಿ ಅಬಿಮೆಲೆಕಾಕ್ ಉಲ್ಲಿ ಗೊರಾಡೊರಾ ದಿವ್ನ್ ತೆನಿ ದೊಗೆಬಿ ಎಕ್ ಕರಾರ್ ಕರುನ್ ಘೆಟ್ಲ್ಯಾನಿ. 28 ಅನಿ ಅಬ್ರಾಹಾಮಾನ್ ಶೆಳಿಯಾಂಚ್ಯಾ ತಾಂಡ್ಯಾತ್ನಾ ಸಾತ್ ಶೆಳಿಯಾ ಎಗ್ಳೆ ಕರ್ಲ್ಯಾನ್, 29 ಅನಿ ಅಬಿಮೆಲೆಕಾನ್ ತೆಕಾ ತಿಯಾ ಹೆ ಕಶ್ಯಾಕ್ ಎಗ್ಳೆ ಕರ್‍ಲೆ? ಮನುನ್ ಇಚಾರ್‍ಲ್ಯಾನಿ.

30 ತನ್ನಾ ಅಬ್ರಾಹಾಮಾನ್, "ಹಿ ಭಾಂಯ್ ಮಿಯಾಚ್ ಖಂಡುಕ್ ಲಾವ್ಲಾ, ಮನ್ತಲ್ಯಾಕ್ ಹೆ ಸಾಕ್ಷಿ ಹೊವ್ನ್ ರಾಂವ್ದಿತ್, ತಸೆ ಹೊವ್ನ್ ಹಿ ಸಾತ್ ಶೆಳಿಯಾ ಘೆ" ಮಟ್ಲ್ಯಾನ್. 31 ತೆಚ್ಯಾ ವೈನಾ ತ್ಯಾ ಕರಾರ್ ಕರಲ್ಯಾ ಭಾಂಯಿಕ್ ಬೆರ್ಶೆಬ್ ಮನುನ್ ನಾವ್ ಹೊಲೆ.

32 ಬೆರ್ಶೆಬಾತ್ ಕರಾರ್ ಹೊಲ್ಯಾ ಮಾನಾ ಅಬಿಮೆಲೆಕ್ ಅನಿ ತೆಜೊ ಸೈನಾಧಿಕಾರಿ ಫಿಕೊಲ್ ಪಿಲಿಶ್ಟಿಯಾಕ್ ಪರ್‍ತುನ್ ಗೆಲ್ಯಾನಿ. 33 ಮಾನಾ ಅಬ್ರಾಹಾಮಾನ್ ಬೆರ್ಶೆಬಾತ್ ತಾಮೆರಿಸ್ಕಾಚೆ ಝಾಡ್ ಲಾವ್ನ್ ಸದಾ ಸರ್ವತಾಕ್ ಜಿವನ್ ಕರ್‍ತಲ್ಯಾ ದೆವಾಕ್ ಆರಾದನ್ ಕರ್ಲ್ಯಾನ್. 34 ಮಾನಾ ಅಬ್ರಾಹಾಮ್ ಪಿಲಿಶ್ಟಿಯಾಂಚ್ಯಾ ದೆಸಾತ್ ಲೈ ಎಳಾಚ್ಯಾನ್ ಜಿವನ್ ಕರಿತ್ ಹೊತ್ತೊ.