1 ಮಾನಾ ದೊನ್ ವರಿಸ್ ಹೊಲ್ಲ್ಯಾ ತನ್ನಾ ಫರೊಹಾ ರಾಜಾಕ್ ಎಕ್ ಸಪಾನ್ ಪಡ್ತಾ, ತೊ ರಾಜಾ ತ್ಯಾ ಸಪ್ನಾತ್ ನೈಲ್ ನ್ಹಯಿಚ್ಯಾ ದಂಡೆರ್ ಇಬೆ ಹೊತ್ತೊ. 2 ತನ್ನಾ ಸಾತ್ ಪುಟ್ಪುಟಿತ್ ಅನಿ ಸುಂದರ್ ಹೊತ್ತಿ ಗಾಯಾ ನೈಲ್ ನ್ಹಯಿತ್ನಾ ಭಾಯ್ರ್ ಯೆವ್ನ್ ಚರುಕ್ ಲಾಗಲ್ಲಿ. 3 ಮಾನಾ ಸಾತ್ ಬಡ್ಕಿ ಅನಿ ಭಗುಕ್ ಬರಿ ನಸಲ್ಲಿ ಗಾಯಾ ನೈಲ್ ನ್ಹಯಿತ್ನಾ ಯೆವ್ನ್ ತ್ಯಾ ಸಾತ್ ಗಾಯಾಂಚ್ಯಾ ಫಾಟ್ನಾ ಇಬೆರಾಲಿ. 4 ಮಾನಾ ಸಾತ್ ಬಡ್ಕ್ಯಾ ಗಾಯಾನಿ, ತ್ಯಾ ಸಾತ್ ಪುಟ್ ಪುಟಿತ್ ಹೊತ್ತ್ಯಾ ಗಾಯಾಕ್ನಿ ಖಾಲ್ಯಾನಿ, ತನ್ನಾ ಮಾನಾ ಫರೊಹಾ ರಾಜಾ ನಿಜೆತ್ನಾ ಜಾಗೊ ಹೊಲೊ. 5 ಫರೊಹಾ ರಾಜಾ ಅನಿ ಪರ್‍ತುನ್ ನಿಜ್ತಾನಾ ತೆಕಾ ದೊನ್ವೆಚೆ ಸಫಾನ್ ಪಡ್ತಾ, ತ್ಯಾ ಸಫ್ನಾತ್ ಸಾತ್ ಕನ್ಸಾ ಬರೆ ಪುಸ್ಟಿ ಹೊವ್ನ್ ಎಕುಚ್ ಝಾಡಾತ್ ಉಗಾವ್ಲಿ, 6 ತೆಂಚ್ಯಾ ಫಾಟ್ನಾ ತ್ಯಾಚ್ ಝಾಡಾಕ್ ಹುನ್ಲ್ಯಾ ವಾರ್ಯಾನಿ ಜಳುನ್ ಗೆಲ್ಲಿ ದುಸ್ರಿ ಸಾತ್ ಕನ್ಸಾ ಉಗಾವ್ಲಿ. 7 ಮಾನಾ ತಿ ಸಾತ್ ವಾಳುನ್ ಗೆಲ್ಲಿ ಕನ್ಸಾ ತ್ಯಾ ಸಾತ್ ಪುಟ್ ಪುಟಿತ್ ಹೊತ್ತ್ಯಾ ಕನ್ಸಾಕ್ನಿ ಖಾತಾತ್, ತನ್ನಾ ಫರೊಹಾ ರಾಜಾ ಜಾಗೊ ಹೊವ್ನ್ ಹೆ ಬಿ ಸಫಾನ್ ಮನುನ್ ಕಳುನ್ ಪರ್‍ತುನ್ ನಿಜ್ತಾ. 8 ದುಸ್ರೆ ದಿಸಿ ಸಕ್ಕಾಳಿ ರಾಜಾಕ್ ತ್ಯಾ ಸಫ್ನಾಚ್ಯಾ ವಿಶಯಾತ್ ಲೈ ಚಿಂತಾಲಾಗ್ತಾ, ತನ್ನಾ ತೊ ರಾಜಾ ಇಜಿಪ್ತಾತ್ಲ್ಯಾ ಮೊಡ್ಗಾರಾಕ್ನಿ ಬಲ್ವುನ್ ಅನಿ ಪಂಡಿತಾಕ್ನಿ ಬಲ್ವುನ್ ತೆಂಕಾ ತ್ಯಾ ಸಫಾನ್ ಸಾಂಗ್ತಾ ಅನಿ ಅರ್ಥ್ ಇಚಾರ್ತಾ ಖರೆ ತೆಂಚ್ಯಾತ್ ಕೊನಾಕ್ಬಿ ತ್ಯಾ ಸಪ್ನಾಂಚೊ ಅರ್ಥ್ ಸಾಂಗುಕ್ ಅನಿ ವಿವರನ್ ಕರುಕ್ ಹೊವ್ಕ್ ನಾ.

9 ತನ್ನಾ ಫರೊಹಾ ರಾಜಾಕ್ ವಾಯ್ನ್ ದಿತಲ್ಯಾನ್ ಜುಜೆಕ್ ಯಾದ್ ಕರುನ್ ಘೆವ್ನ್, ಅತ್ತಾ ಮಿಯಾ ಮಾಜಿ ಚುಕ್ ರಾಜಾಚ್ಯಾ ಇದ್ರಾಕ್ ಒಪ್ಪುನ್ ಘೆವ್ಚೆ. 10 ರಾಜಾ ತಿಯಾ ಮಾಕಾ ಅನಿ ಬಾರಿಕ್ಲಿ ದಿತಲ್ಯಾಕ್ ಅಮ್ಚ್ಯಾ ವರ್‍ತಿ ರಾಗ್ ಯೆವ್ನ್ ಅಮ್ಕಾ ರಾಕ್ತಲ್ಯಾಂಚ್ಯಾ ಅಧಿಪತಿಚ್ಯಾ ಘರ್‍ಹಾತ್ ಭಂದಿಖಾನ್ಯಾತ್ ಘಾಟಲೈ,

11 ತನ್ನಾ ಅಮ್ಕಾ ದೊಗ್ಯಾಕ್ನಿಬಿ ಎಕುಚ್ ದಿಸಿ ಸಫ್ನಾ ಪಡಲ್ಲಿ ತ್ಯಾ ಸಫ್ನಾಕ್ನಿ ದುಸ್ರೊ ದುಸ್ರೊ ಅರ್ಥ್ ಹೊತ್ತೊ. 12 ತನ್ನಾ ಅಮ್ಚ್ಯಾ ವಾಂಗ್ಡಾ ಎಕ್ ಇಬ್ರಿಯಾಂಚೊ ದಾಂಡ್ಗೊ ಝಿಲ್ಗೊ ಹೊತ್ತೊ ತೊ ರಕ್ವಾಲ್ಯಾಂಚ್ಯಾ ಮುಂಖಡಾಚೊ ಸೆವಕ್ ಹೊಲ್ಲೊ ಹೊತ್ತೊ, ತೆಕಾ ಅಮಿ ಅಮ್ಚೆ ಸಫಾನ್ ಸಾಂಗ್ಲಾಂವ್ ತೆ ಅಮ್ಕಾ ತೆನಿ ತ್ಯಾ ಸಫ್ನಾಂಚೊ ಅರ್ಥ್ ಸಾಂಗ್ಲ್ಯಾನ್. 13 ತೆನಿ ಸಾಂಗಲ್ಯಾ ಸಾರ್ಕೆ ಮಾಜೆ ಅದ್ದಿ ಹೊತ್ತೆ ಕಾಮ್ ಮಾಕಾ ಗಾವ್ಲೆ ಅನಿ ತೆಚೊ ಅರ್ಥ್ ಸಮಾ ಹೊತ್ತೊ, ಅನಿ ಮಾನಾ ಬಾರಿಕ್ಲಿ ದಿತಲ್ಯಾಕ್ ಸಾಂಗಲ್ಯಾ ಅರ್ಥಾ ಸಾರ್ಕೆ ತೆಕಾ ಮಾರುನ್ ದಂಡ್ ಹೊಲೆ ಮಟ್ಲ್ಯಾನ್.

14 ರಾಜ್ಯಾನ್ ಜುಜೆಕ್ ಬಂಧಿಖಾನ್ಯಾತ್ನಾ ಸುಟ್ಕಾ ಕರುಕ್ ಸಾಂಗುನ್ ಧಾಡಲ್ಯಾ ತನ್ನಾ ತೆಕಾ ಲಗ್ಗುನಾ ಸುಟ್ಕಾ ಕರುನ್ ಹೊಲೆ, ಮಾನಾ ಜುಜೆ ಕೆಸಾ ಕಾಡುನ್ ಘೆವ್ನ್ ಶುದ್ದ್ ಕಪ್ಡೆ ನೆಸುನ್ ಘೆವ್ನ್ ಫರೊಹಾ ರಾಜಾಚ್ಯಾ ಇದ್ರಾಕ್ ಜಾವ್ನ್ ಇಬೆ ರಾಲೊ. 15 ತನ್ನಾ ಫರೊಹಾ ರಾಜ್ಯಾನ್ ಜುಜೆಕ್, ಮಾಕಾ ಎಕ್ ಸಫಾನ್ ಪಡ್ಲಾ , ತ್ಯಾ ಸಪ್ನಾಚೊ ಅರ್ಥ್ ಸಾಂಗ್ತಲೊ ಹಿತ್ತೆ ಕೊನ್ಬಿ ನಾತ್ ತಿಯಾ ಹ್ಯಾ ಸಫ್ನಾಚೊ ಅರ್ಥ್ ಸಾಂಗ್ತೈ ಮನುನ್ ಮಿಯಾ ಆಯಿಕ್ಲಾ, ಮಟ್ಲ್ಯಾನ್. 16 ತನ್ನಾ ಜುಜೆನ್, ಮಾಕಾ ಕಾಯ್ ಹ್ಯಾ ಸಪ್ನಾಚೊ ಅರ್ಥ್ ಸಾಂಗ್ತಲೆ ತವ್ಡಿ ತಾಕತ್ ನಾ, ಖರೆ ಸರ್ವೆಸ್ಪರ್ ದೆವಾಕ್ಡೆ ಎಕುಕ್ ತಿ ತಾಕತ್ ಹಾಯ್ ಮಟ್ಲ್ಯಾನ್.

17 ತನ್ನಾ ಫರೊಹಾನ್ ರಾಜಾನ್ ಜುಜೆಕ್ಡೆ ತ್ಯಾ ಸಪ್ನಾತ್, ಮಿಯಾ ನೈಲ್ ನ್ಹಯಿಚ್ಯಾ ದಂಡೆರ್ ಇಬೆ ಹೊತ್ತೊ, 18 ನ್ಹಯಿತ್ನಾ ಪುಟ್ಪುಟಿತ್ ಹೊತ್ತಿ ಸಾತ್ ಗಾಯಾ ಯೆವ್ನ್ ಗವಾತ್ ಚರಿತ್ ಹೊತ್ತಿ, 19 ತನ್ನಾ ಬಡ್ಕಿ ಹೊತ್ತಿ ಅನಿ ಬಗುಕ್ ಬರಿ ನತ್ತಿ ಸಾತ್ ಗಾಯಾ ಯೆವ್ನ್ ತೆಂಚ್ಯಾ ವಾಂಗ್ಡಾ ಇಬೆ ರಾಲಿ, ಅನಿ ಮಿಯಾ ಅಸ್ಲಿ ಬಡ್ಕಿ ಗಾಯಾ ಮಿಯಾ ಇಜಿಪ್ತಾತ್ ಖೈಬಿ ಬಗುಕ್ ನಾ. 20 ಮಾನಾ ತ್ಯಾ ಪುಟ್ಪುಟಿತ್ ಹೊತ್ತ್ಯಾ ಸಾತ್ ಗಾಯಾಕ್ನಿ ಹ್ಯಾ ಸಾತ್ ಬಡ್ಕ್ಯಾ ಗಾಯಾನಿ ಖಾಲ್ಯಾನಿ. 21 ಮಾನಾ ತಿ ಗಾಯಾ ತೆಂಕಾ ಖಾಲ್ಯಾರ್ಬಿ ಖಾಲ್ಯಾ ಸಾರ್ಕೆ ದಿಸಿ ನಸಿತ್, ಅನಿ ತಿ ಅದ್ದಿ ಕಸಿ ಹೊತ್ತಿ ತಸೆಚ್ ದಿಸಿತ್, ತನ್ನಾ ಮಾನಾ ಮಾಕಾ ನಿಜೆತ್ನಾ ಜಾಗೊ ಜಾಲೊ. 22 ಅನಿ ಎಕ್ ಸಪಾನ್ ಅಸೆ ಹಾಯ್: ಎಕುಚ್ ದೆವಾಕ್ ಸಾತ್ ದಾನೆ ಭರಲ್ಲಿ ಕನ್ಸಾ ಉಗಾವ್ಲಿ, 23 ಮಾನಾ ತ್ಯಾ ಝಾಡಾತ್ ವಾರ್ಯಾನಿ ವಾಳುನ್ ಗೆಲ್ಲಿ ಸಾತ್ ಕನ್ಸಾಬಿ ಉಗಾವ್ಲಿ,

24 ಮಾನಾ ತಿ ವಾಳುನ್ ಗೆಲ್ಲ್ಯಾ ಸಾತ್ ಕನ್ಸಾನಿ ತ್ಯಾ ಪುಸ್ಟಿ ಹೊತ್ತ್ಯಾ ಸಾತ್ ಕನ್ಸಾಕ್ನಿ ಗಿಳ್ಯಾನಿ, ತನ್ನಾ ಮಿಯಾ ಹ್ಯಾ ಸಪ್ನಾಚೊ ಅರ್ಥ್ ಕಳ್ವುನ್ ಘೆವ್ಕ್ ಮನುನ್ ಪಂಡಿತಾಕ್ನಿ ಅನಿ ಮೊಡ್ಗಾರಾಕ್ನಿ ಮಾಜೆ ಸಪಾನ್ ಸಾಂಗ್ಲೊ ಖರೆ ತೆಂಕಾ ತೆಚೊ ಅರ್ಥ್ ನಾತರ್ ವಿವರನ್ ತೆಂಚ್ಯಾನಿ ಸಾಂಗುಕ್ ಹೊವ್ಕ್ ನಾ, ಮಟ್ಲ್ಯಾನ್.

25 ತನ್ನಾ ಜುಜೆನ್ ಫರೊಹಾ ರಾಜಾಕ್, ದೆವಾನ್ ತುಮ್ಕಾ ಫಿಡೆ ಹೊತಲ್ಯಾಚ್ಯಾ ವಿಶಯಾತ್ ಕಳ್ವುಲಾ, ಅನಿ ಹ್ಯಾ ದೊನ್ ಸಫ್ನಾಂಚೊ ಅರ್ಥ್ ಎಕುಚ್ ಹಾಯ್. 26 ಅನಿ ಪುಟ್ಪುಟಿತ್ ಸಾತ್ ಗಾಯಾಚ್ ಸಾತ್ ವರಿಸ್ ಮನುನ್ ಅನಿ ಸಾತ್ ಪುಟ್ಪುಟಿತ್ ಕನ್ಸಾ ಮಟ್ಲ್ಯಾರ್ ಸಾತ್ ವರಿಸ್ ಹ್ಯಾ ದೊನ್ ಸಫ್ನಾಚೊ ಅರ್ಥ್ ಎಕುಚ್ ಹೊವ್ನ್ ಹಾಯ್. 27 ಬಡ್ಕಿ ಸಾತ್ ಗಾಯಾ ಅನಿ ವಾಳುನ್ ಗೆಲ್ಲಿ ಸಾತ್ ಕನ್ಸಾ ಮಟ್ಲ್ಯಾರ್, ಹ್ಯಾ ದೆಸಾತ್ ಸಾತ್ ವರಿಸ್ ಬರ್‍ಗಾಲ್ ಯೆತಲೊ ಹಾಯ್ ಮನುನ್ ದಾಕ್ವುನ್ ದಿತಾ, ಅನಿ ಬರ್‍ಯಾ ವರ್ಸಾಚ್ಯಾ ಮಾನಾ ಹಿ ಸಾತ್ ವರ್ಸಾ ಯೆತಾ. 28 ಅನಿ ಮಿಯಾ ಸಾಂಗಲ್ಯಾ ಸಾರ್ಕೆಚ್ ಹೊತಾ, ಕಶ್ಯಾಕ್ ಮಟ್ಲ್ಯಾರ್ ದೆವಾನ್ ತುಮ್ಕಾ ಫಿಡೆ ಹೊತಲೆಚ್ ದಾಕ್ವುನ್ ದಿಲಾ ಮಟ್ಲ್ಯಾನ್. 29 ಆಯ್ಕ್ ಇಜಿಪ್ತ್ ದೆಸಾತ್ ಸಾತ್ ವರಿಸ್ ಸಾತ್ ವರಿಸ್ ಸೆತಾಭಾತಾತ್ನಿ ಬರೆ ಹೊತಾ.

30 ತೆಚ್ಯಾ ಮಾನಾ ಸಾತ್ ವರಿಸ್ ಇಜಿಪ್ತ್ ದೆಸಾತ್ ಬರ್‍ಗಾಲ್ ಯೆತಾ, ಅನಿ ಬರಿ ದಿಸಾ ಇಸ್ರುನ್ ಜಾತಾತ್, ಹ್ಯೊ ಬರ್‍ಗಾಲ್ ದೆಶ್ಯಾಕ್ ನಸ್ಟ್ ಕರ್ತಾ. 31 ಬರ್‍ಯಾ ಪಿಕೆಚೊ ಎಳ್ ಫುರಾ ಇಸ್ರುನ್ ಜಾತಾ ಕಶ್ಯಾಕ್ ಮಟ್ಲ್ಯಾರ್ ಯೆತಲೊ ಬರಗಾಲ್ ತವ್ಡೊ ಲೈ ಭಯಂಕರ್ ಹೊವ್ನ್ ಹಾಯ್. 32 ಹಿ ವಿಶಯ್ ಲಗ್ಗುನಾಚ್ ಕರ್ತಾ ಮನುನ್ ಘಟ್ ನಿರ್ದಾರ್ ಕರಲ್ಯಾ ಸಾಟ್ನಿ ದೆವಾನ್ ಫರೊಹಾ ರಾಜಾಕ್, ಎಕುಚ್ ವಿಶಯಾತ್ ದೊನ್ ಸಪ್ನಾ ದಿಲ್ಯಾನ್.

33 ತನ್ನಾ ತುಮಿ ಎಕ್ ಬುದ್ದ್ ಹೊತ್ತ್ಯಾಕ್ ಅನಿ ಶಾನ್ಯಾಕ್ ಎಕ್ಲ್ಯಾಕ್ ತುಮಿ ಹ್ಯಾ ದೆಸಾತ್ ಆಡಳಿತ್ ಅಧಿಕಾರಿ ಹೊವ್ನ್ ಎಚುನ್ ಕಾಡುಚೆ. 34 ಬರೆ ಪಿಕ್ ಯೆಲ್ಲ್ಯಾ ಸಾತ್ ವರ್ಸಾತ್ನಿ ಪಾಂಚಾತ್ಲೊ ಎಕ್ ವಾಟೊ ತೆರ್ಗಿ ವಸುಲಿ ಗೊಳಾ ಕರುಕ್ ಎಕ್ ಅದಿಕಾರಿಕ್ ನೆಮುಚೆ. 35 ಅನಿ ಫಿಡೆ ಯೆತಲ್ಯಾ ಬರ್ಯ್ಯಾ ವರ್ಸಾತ್ನಿ ಪುರಾ ದಾನೆ ಪರೊಹಾಚ್ಯಾ ಅದಿಕಾರ್‍ಹಾತ್ ಶಾರ್‍ಹಾತ್ನಿ ಗೊಳಾ ಕರುನ್ ರಾಕುನ್ ಥವ್ಕ್ ತೆಂಕಾ ಹುಕುಮ್ ದಿ. 36 ತನ್ನಾ ಅಸೆ ದಾನೆ ಗೊಳಾ ಕರುನ್ ಥವ್ತಲ್ಯಾ ವೈನಾ ಇಜಿಪ್ತಾಚಿ ಲೊಕಾ ಯೆತಲ್ಯಾ ಸಾತ್ ಬರಗಾಲಾಚ್ಯಾ ವರ್ಸಾತ್ನಿ ಭುಕೆನ್ ಸತ್ತ್ಯಾ ನಾಸ್ ಹೊಯ್ನಾ ಸಾರ್ಕೆ ತೆಂಕಾ ಪೊಟಾಕ್ ದಿವ್ಕ್ ಹೊತಾ.

37 ಹಿ ಯೆವ್ಜನ್ ಫರೊಹಾ ರಾಜಾಕ್ ಅನಿ ತೆಚ್ಯಾ ಸಗ್ಳ್ಯಾ ಅಧಿಕಾರಿಯಾಕ್ನಿ ಬರೆ ದಿಸ್ಲೆ. 38 ಮಾನಾ ಫರೊಹಾ ರಾಜ್ಯಾನ್ ತೆಂಕಾ, ಅಮಿ ದೆವಾಚೊ ಆತ್ಮೊ ಹೊತ್ತ್ಯಾ ಜುಜೆಕಿಂತಾ ಬರೊ ಮಾನುಸ್ ಕನ್ನಾಬಿ ಬಗ್ತಾಂವ್ ಕಾಯ್?. 39 ಹೆಜ್ಯಾನ್ ಬರೊ ಮಾನುಸ್ ಅಮ್ಕಾ ಗಾವ್ತಾ ಕಾಯ್ ಮನುನ್ ಜುಜೆಕ್, ದೆವಾನ್ ತುಕಾ ಹೆ ಸಗ್ಳೆ ಕಳ್ವಲ್ಯಾ ಸಾಟ್ನಿ ತುಜ್ಯಾ ಸಮಾ ಬುದ್ದ್ ಹೊತ್ತೊ ಶಾನೊ ಮಾನುಸ್ ಕೊನ್ಬಿ ನಾ; 40 ತೆಚ್ಯಾ ವೈನಾ ಮಿಯಾ ತುಕಾ ಮಾಜ್ಯಾ ದೆಶಾಚೊ ಕರ್ಬಾರಿ ಕರ್ತಾ ಅನಿ ಮಾಜಿ ಫುರಾ ಲೊಕಾ ತುಜಿ ಹುಕುಮಾ ಆಯ್ಕ್ತಾತ್, ಸಿಂವಾಸನಾಚ್ಯಾ ವಿಶಯಾತ್ ತವ್ಡೊಚ್ ಮಿಯಾ ತುಜ್ಯಾನ್ಕಿ ಮೊಟೊ ಹೊವ್ನ್ ರ್‍ಹಾತಾ ಮಟ್ಲ್ಯಾನ್. 41 ತನ್ನಾ ಫರೊಹಾ ರಾಜಾನ್ ಜುಜೆಕ್, "ಅತ್ತಾ ಮಿಯಾ ತುಕಾ ಇಜಿಪ್ತ್ ದೆಶಾಚೊ ರಾಜ್ಪಾಲ್ ಕರ್ತಾ" ಮನುನ್, 42 ರಾಜ್ಯಾನ್ ಅಪ್ಲ್ಯಾ ಬೊಟಾತ್ನಾ ರಾಜಾಚೊ ಛಪ್ಪೊ ಹೊತ್ತಿ ಮುದ್ದಿ ಕಾಡುನ್ ಜುಜೆಚ್ಯಾ ಬೊಟಾಕ್ ನೆಸ್ವುಲ್ಯಾನ್ ಅನಿ ಲೈಲನಾಚೊ ಝಗೊ ಅನಿ ಸೊನ್ಯಾಚೊ ಹಾರ್ ನೆಸ್ವುಲ್ಯಾನ್. 43 ತೆನಿ ಜುಜೆಕ್ ಅಪ್ಲೊ ದೊನ್ವೊ ರಾಜ್ ರಥ್ ಫಿರುನ್ಕೆಳುಕ್ ದಿಲ್ಯಾನ್ , ಅನಿ ಗೌರವಾಕ್ ಸೆವಕಾ ಫಿಡೆ ಜಾವ್ನ್ ಡೊಗ್ಲಾಠೆಕುನ್ ನಮಸ್ಕಾರ್ ಕರಾ! ಮನುನ್ ಮೊಟ್ಯಾನ್ ಸಾಂಗ್ಲ್ಯಾನಿ, ಅಸೊ ಜುಜೆ ಇಜಿಪ್ತಾಚೊ ರಾಜ್ಯ್ ಪಾಲ್ ಹೊಲೊ. 44 ಮಾನಾ ಫರೊಹಾ ರಾಜ್ಯಾನ್ ತೆಕಾ, "ತುಜೊ ಹುಕುಮ್ ನಸ್ತಾನಾ ಇಜಿಪ್ತಾಚೆ ಕೊನ್ಬಿ ಪಾಯ್ ಉಲ್ಕುಕ್ ಹೊಯ್ನಾ ಅನಿ ಪಾಯಾನ್ ಚಲುಕ್ಬಿ ಹೊಯ್ನಾ" ಕಶ್ಯಾಕ್ ಮಟ್ಲ್ಯಾರ್, ಮಿಯಾ ಫರೊಹಾನ್ ರಾಜಾ ಮಾಜ್ಯಾ ಮನಾಕ್ ಯೆಲ್ಲ್ಯಾ ಸಾರ್ಕೆ ಕರ್ತಾ ಮಟ್ಲ್ಯಾನ್. 45 ಮಾನಾ ಜುಜೆಕ್ ಫರೊಹಾ ರಾಜಾನ್ ಇಜಿಪ್ತಾಚೆ ಸಫ್ನತ್ಪನ್ನೆಹ್ ಮನುನ್ ನಾವ್ ಥವ್ಲ್ಯಾನ್,

ಅನಿ ಅಪ್ಲಿ ಲೆಕ್ ಆಸನತ್ ಮನ್ತಲಿ ವಾಂಗ್ಡಾ ಲಗಿನ್ ಕರ್ಲ್ಯಾನ್ ಜುಜೆನ್ ಇಜಿಪ್ತ್ ದೆಶಾವರ್‍ತಿ ಅಧಿಕಾರ್ ಶುರು ಕರ್ಲ್ಯಾನ್,

46 ಇಜಿಪ್ತ್ ದೆಸಾತ್ ಜುಜೆನ್ ಕಾಮ್ ಸುರು ಕರಲ್ಲ್ಯಾ ತನ್ನಾ ತಿಸ್ ವರ್ಸಾಚೊ ಹೊಲ್ಲೊ ರ್‍ಹಾತಾ, ತೆನಿ ಪರೊಹಾ ರಾಜಾಚ್ಯಾ ಇದ್ರಾಕ್ನಾ ಜಾವ್ನ್ ಫುರಾ ಇಜಿಪ್ತ್ ದೆಶ್ಯಾತ್ ಫಿರ್ಲ್ಯಾನ್.

47 ತ್ಯಾ ಸಾತ್ ವರ್ಸಾತ್ ಜಿಮ್ನಿ ವರ್‍ತಿ ಫಿಕ್ ಬರೆ ಹೊವ್ನ್ ಉತ್ಪನ್ ಹೊತಾ. 48 ಜುಜೆನ್ ಇಜಿಪ್ತಾತ್ ತ್ಯಾ ಸಾತ್ ಬರ್‍ಯಾ ವರ್ಸಾತ್ನಿ ಶಹಾರಾಂಚ್ಯಾ ಅಜು ಭಾಜುಕ್ ಹೊತ್ತ್ಯಾ ಸೆತಾಂತ್ಲಿ ಫಿಕ್ ಗೊಳಾ ಕರುನ್ ಶಹಾರ್‍ಹಾತ್ನಿ ಥವ್ಲ್ಯಾನ್. 49 ತೆ ಗೊಳಾ ಕರಲ್ಲೆ ದಾನೆ ಸಮದ್ರಾಚ್ಯಾ ರೆತಿಚ್ಯಾ ಸಾರ್ಕೆ ಲೈ ಹೊತಾನಾ ಜುಜೆನ್ ಮಾಪ್ತಲೆ ಸೊಡುನ್ ದಿಲ್ಯಾನ್.

50 ಬರ್ಗಾಲಾಚಿ ವರ್ಸಾ ಯೆವ್ಚ್ಯಾ ಪೈಲೆಚ್ ಒನ್ ಶಹಾರಾಚೊ ಯಾಜಕ್ ಪೊಟಿಫರಾಚಿ ಲೆಕ್ ಆಸಾನತ್ ಮನ್ತಲಿಕ್ನಾ ಜುಜೆಕ್ ದೊನ್ ಲೆಕಾ ಉಪಾಜಲ್ಲಿ. 51 ಥೊರ್ಲೊ ಲೆಕ್ ಉಪಾಜಲ್ಲ್ಯಾ ತನ್ನಾ ದೆವಾನ್ ಮಾಜ್ಯಾ ತರಾಸಾಚ್ಯಾ ದೆಶ್ಯಾತ್ ಮಾಜ್ಯಾ ಬಾಬಾಚ್ಯಾ ಘರ್‍ಹಾತ್ಲ್ಯಾಕ್ನಿ ಇಸ್ರುಕ್ ಮಜತ್ ಕರ್ಲ್ಯಾನ್ ಮನುನ್ ತೆಕಾ, "ಮನಾಸ್ಸೆ" ಮನುನ್ ನಾವ್ ಥವ್ಲ್ಯಾನ್. 52 ಅನಿ ದೊನ್ವೆಚೊ ಲೆಕ್ ಉಪಾಜಲ್ಲ್ಯಾ ತನ್ನಾ, ಮಾಕಾ ತರಾಸ್ ಹೊಲ್ಲ್ಯಾ ದೆಶಾತುಚ್ ದೆವಾನ್ ವಾಡ್ವಳ್ಕಿ ಕರ್ಲ್ಯಾನ್ ಮನುನ್ ತೆಕಾ ಎಫ್ರಾಯಿಮ್ ಮನುನ್ ನಾವ್ ಥವ್ಲ್ಯಾನ್.

53 ಉತ್ಪನಾಚೊ ಸಾತ್ ವರಿಸ್ ಇಜಿಪ್ತ್ ದೆಸಾತ್ ಸರುನ್ ಜಾತಾ. 54 ಮಾನಾ ಜುಜೆನ್ ಸಾಂಗಲ್ಯಾ ಸಾರ್ಕೆ ಬರ್ಗಾಲಾಚಿ ಸಾತ್ ವರ್ಸಾ ಶುರು ಹೊಲಿ ಬರ್‍ಗಾಲ್ ಅಜು ಭಾಜುಚ್ಯಾ ಸಗ್ಳ್ಯಾ ದೆಶ್ಯಾತ್ನಿಬಿ ಪಗಳ್ಳೊ, ಅನಿ ಇಜಿಪ್ತಾತಾತ್ ತವ್ಡೆಚ್ ಜೆವ್ನಾಕ್ ಹೊತ್ತೆ. 55 ಸಗ್ಳ್ಯಾ ಇಜಿಪ್ತ್ ದೆಶ್ಯಾಕ್ ಬರ್‍ಗಾಲ್ ಯೆಲ್ಲ್ಯಾ ತನ್ನಾ ಲೊಕಾನಿ ಪರೊಹಾಕ್ಡೆ ಜೆವ್ನಾಕ್ ದಿ ಮನುನ್ ಮಾಗ್ಲ್ಯಾನಿ, ತನ್ನಾ ತೆನಿ ತೆಂಕಾ ಜುಜೆಕ್ಡೆ ಜಾವಾ, ಅನಿ ತೊ ಕಾಯ್ ಸಾಂಗ್ತಾ ತಸೆ ಕರಾ ಮಟ್ಲ್ಯಾನ್. 56 ಬರ್‍ಗಾಲ್ ಫುರಾ ದೆಶ್ಯಾತ್ ಯೆಲ್ಲ್ಯಾ ತನ್ನಾ ಜುಜೆನ್ ಗೊಳಾ ಕರುನ್ ಥವಲ್ಲೆ ದಾನೆ ಕಾಡುಕ್ ಲಾವ್ನ್ ಇಕಾತ್ ದಿಲ್ಯಾನ್ ಅನಿ ತ್ಯಾ ಎಳಾರ್ ಇಜಿಪ್ತಾತ್ ಬರ್‍ಗಾಲ್ ಲೈ ಹೊಲ್ಲೊ ಹೊತ್ತೊ. 57 ಇಜಿಪ್ತಾತ್ ಬರ್‍ಗಾಲ್ ಲೈ ಹೊತ್ತೊ, ಸಗ್ಳ್ಯಾ ಜಿಮ್ನಿ ವರ್‍ತಿ ಬರ್‍ಗಾಲ್ ಪಗಳಲ್ಲೊ ಹೊತ್ತ್ಯಾ ತನ್ನಾ ಜೊಸೆಪಾನ್ ಸಗ್ಳಿ ಕಳಂಜಾ ಕಾಡುನ್ ಇಜಿಪ್ತ್ ಕಾರಾಕ್ನಿ ಇಕಾತ್ ದಿಲ್ಯಾನ್.